LECCION 35
Ibmar imagged idu, ¿igi be nabir nueggwa igar amisale?
Bela anmar ibmar imagged idu nueggwa igar amigedbidaed. Ar anmar wisid, anmar ibmar imaggoedbali, sun anmar Jehova ai nuedga gue, sun anmar Jehova igargi bangubali. Inbaggwa sun anmar ibmar wegimalad imaggedgi binsadabaloed: neg amigedgindibe, arbaed amigedgindibe, abirgin nigguedgindibe. Ibmar wegimalad imagged idu anmar nueggwa igar amidaele, sorba anmar buggib binsadi guosulid, Jehova anmarba yeer iddomai gumogoed.
1. Be ibmar soggwen imaggedgi binsaalile, ¿Bibliag igi ibmar soglenanaid nabir be bendasale?
Be ibmar soggwen imaggedgi binsaalile, Jehovas gordao be bendaggega. Bibliagi amidabalo Jehova bule be ibmar imagsoggalid nued dagmoga (Proverbios 2:3-6 absogo). Inbaggwa Bibliagi ise sogar igar madaed, mer weyob ibmar imagmaloye. Degiile, bur nuediled be aabali igar imagmogar.
Auggi, ¿igi anmar imagbalosunna Bibliagi ise sogar igar masulirdi? Deyob ibmar gunoniggile Jehova be bendaggoed mag be iddogega, igi be ibmar imaggoe (Isaías 48:17). Inbaggwa Bibliagi ise sogar igar masurdae inigwale, auggi ibmar soggwengi sunmaglenaidbali mag iddolledaed, igi ibmar imagleged Jehova abege. Biblia absomaidba be binna binna we ibmar durdagmaoed. Degsoggu, be ibmar soggwen imaggedgi binsaalile, aagimalad ibmar soglenanaid be bendaggoed nabir be Jehova sogedba igar imaggega.
2. Ibmar soggwen imagged idu, ¿ibu ibmarmargi bin be binsagweler nuedile?
Bibliagi soglenaid, ‘dule yogasaar ibmar imagsulidi, ibmar imagged idu nueggwa binsasdaye’ (Proverbios 14:15). Aagala, ibmar imagged idu nueggwa binsaed abeleged, mer anmar yogsaar ibmar imaggega. Degsoggu, be ibmar soggwen imaggedgi binsaalile nuediled bin be we ibmargi binsamogweler: “¿Bule Biblia sogedba an igar imagsoggar gunai? ¿Igi an bur ibmar imasar sorba an buggib binsadi gussulile? ¿An gwenagan igi anba iddomarmogoe? ¿Jehova igi anba iddomai gumogoe?” (Deuteronomio 32:29).
Jehova anmarga sogoedid, ibu ibmar nuedi, ibu ibmar isganabali. Aagala Jehova, gwage ulubgi anmarga ibmar nasisad, anmar mag neg iddo guega, anmar ibmar nued imasar mag iddogega, ibmar isgana imasar mag iddodabaliga (Romanos 2:14, 15). Degsoggu, anmar nueggwa Jehova igar durdaggele, geb anmar eba igar imagbalile, nabir anmar ibmar nuegan imagdi gusaled.
NUEGGWA WE IBMAR DURDAGMARGOLO
Wegine be durdaggoed, ibmar soggwen imagged idu nabir be nueggwa igar amidaegala, ibigala mag be iddo gued abelege, ibu ibmar nuedi, ibu ibmar isganabali. Geb Bibliagi ibmar soglenanaid igi nabir be bendasbalile.
3. Biblia sogedba igar imagdao
Be ibmar soggwen imagsoggalile Bibliagi ibmar soglenanaid, ¿igi nabir be bendasale? VIDEO dagmalo, we ibmargi sunmagmarbalo:
-
¿Unnila emar sogedba ibmar imagdi guega Jehova anmar imasdibe?
-
¿Ibigala nabir anmar na wargwengi ibmar imagge Jehova anmar imasa?
-
¿Igi Jehova anmar imasbali nabir anmar ibmar nuegan imagdi guega?
Soggwen dagmaloena, Bibliagi ise sogar igar masur inigwale, mag iddolleged igi ibmar imagleged Jehova abege, Efesios 5:15, 16 absomalo. Sorba we ibmargi sunmagmarbalo:
-
Igi nabir “ibagan nagumaid” ebulesale, bane bane Biblia absogega.
-
Igi nabir babgan “ibagan nagumaid” ebusale, nueggwa na negya aggwega; mimmiganale, negyaggi na e sergan bendaggega.
-
Igi nabir “ibagan nagumaid” ebulesale, igar iddogedse nanaega.
4. Biblia durdagmaidba be igar nuegan imadoed
Bibliagi igar soggwen ise sogar maile, ibigwensur eba igar imagleged. Auggi, igar ise sogar masulirdina, ¿adi igi imaglebalosunna? VIDEO dagmalo, we ibmargi sunmagmarbalo:
-
Videog igi soglenai be dagsa, ¿ome ibu imasa nabir Jehova sogedba ibmar imaggega?
¿Ibigala nuedsuli, ibmar imagged idu be emarse egisdaer, igi bur an ibmar imasar nabirye? Hebreos 5:14 absomalo, we ibmargi sunmagmarbalo:
-
Emarse egisdi gued anale, ¿ibigala bur nuedi, anmar na wala walagwengi mag iddo gued, ibu ibmar nuedi, geb ibu ibmar isganabali?
-
¿Ibu ibmarmar nabir be bendasale, walagwengi be nabir ibigwensur Biblia sogedba igar imagdaega?
Biblia durdasadba anmar igar imagdaele, aadi anmarga mapayob gumogoed, nabir anmar ibmar nuegan imaggega.
5. Anmar emarbi na ibmar imaggosulid
Bela anmar na emarbisursoggua, anmar na emarbi ibmar imaggosurbalid. Auggi, ¿igi mag daglesbalirsunna anmarginbi anmar binsasurdabali? Aagala, ibmar sogbogi sunmagmaloena.
Soggwengi: Gwenad gadi ibya maged binaled baid congregacionse naded, aaginmaladdi we ibmar nabir dagsurdamalad.
Romanos 15:1 geb 1 Corintios 10:23, 24 absomalo, we ibmargi sunmagmarbalo:
-
Bibliagi ibmar absolesadbali, we gwenad, ¿ibu imagge wilubbu? ¿Bedi ibu imasmogale, be ibmar gadi binaled dule baiddi nued dagsulir?
Sogbogi: Gwenad wargwen wisid Bibliagi soglenasuli issaggwaye cerveza wis gwagwen gober, auggi, edi binsaed mer an bur gwagwensaar goboye. Ibagwengi gwenagan walig gusiidgi daggalid, gwenagan cerveza gobbugmala.
Eclesiastés 7:16 geb Romanos 14:1, 10 absomalo, we ibmargi sunmagmarbalo:
-
Bibliagi ibmar absolesadbali, we gwenad, ¿ibu imagge wilubbu? ¿Bedi ibu imasmogale, be ibmar issaggwa dagged gwenagan bamaladdi issaggwa dagsulir?
¿Ibu nabir be imasale ibmar imagged idu nueggwa igar amigega?
1. Jehovaga sogo be bendagye nabir be igar nued imaggega (Santiago 1:5).
2. Bibliagi amidao, geb gardamar bamaladgi, be ibmar imagsoggalid nueddibe, nuedsurdibe. Gwenagan undargus Jehovaga arbadimaladse nabir be binsaed egisbalid.
3. Binsadabalo we ibmar imasar igi be iddogoe, geb igi bamalad bebali iddomarmogoe.
ABAR SOGDAMALAD: “Be abegedba be na ibmar imaggoed. ¡Aggarsulid bamalad igi be nig sogbimala!”
-
Ibmar imagged iduale, ¿ibigala anmar Jehovagi wis binsaed abelemoga, geb gwenagan bamaladgi?
WE IGARGI SUNMAGLESAD
Anmar ibmar soggwen imagsoggalile bin binsadagoloed, Jehova we ibmar nued daggodibe, nued daggosurdibe, geb gwenagan igi anmarba iddomarmogoe. Deyob anmar imagdaele, anmar yogasaar ibmar imaggosulid.
Ibu be durdasa
-
¿Ibu be nabir imasale, Jehova ibu ibmar nued dagge nabir be aa ibmar imagmogaga?
-
Ibmar soggwen imagsoggalile, ¿ibu be imagger nuedile mer be emarse egisdi guega igi an imaggoye?
-
¿Igi mag daglesale beginbi be na binsasurdae?
NABIR BE WE IBMAR DURDASBALILED
¿Igi be ibmar imagdaer nabir be Bab Dummad ai nuedga gusale?
“Igi anmar ibmar imaggele Bab Dummad nug odummogoe” (La Atalaya, abril 15, 2011 gad)
Wegine soglenaid, igi Jehova anmarga binsaed dagsadae.
Wegine soglenaid, ibu dule wargwen imasa, ibmar gadi binaled indaggega.
Wegine soglenaid, igar soggwen ise sogar Bibliagi masulile, igi nabir anba anmar Jehova sogedba igar imasale.
“¿Bela Bibliagi anmarga igarmar ise sogar meged abeledibe?” (La Atalaya, diciembre 1, 2003 gad)
