LECCION 38
Igi mag daglesale be yeer iddoge, Jehova nuggi be dula gudiidba
Jehova anmarga buggidar ibmar nuegan ugmaid, nabir anmar yeer iddodi guega. Anba anmarga neg undar gunairbela, Jehovadi anmarga ibmar nuegan ugmadaed. Degsoggu, ¿igi mag daglesarsunna be yeer iddomoga, Jehova dula be sediidba? ¿Ibigala anmar we ibmar ieged abelesuli?
1. ¿Ibigala anmar dagge daggesur ibmar imagged abelesuli?
Jehova nuggi anmar dula gudisoggua, aagala anmar dagge daggesur ibmar imagged abelesulid, mer anmar binsa boni amiega. Ar Jehova ‘anmar sediidid’, aadi bela ibmar dula buggwad obinyisadid (Salmo 36:9, TNM). Bab Dummad belagwabba dula anmar sediid, bunnoged ugmaid, belagwabba ibmar ugmaibalid (Gusmalad 17:25, 28). Nabir anmar dula gudi guegala, Jehova anmarga bergwabba ibmar abelemalad ugmaid. Degsoggu, Jehova nuggi nabir anmar yeer iddodiid (Gusmalad 14:17 absogo).
2. ¿Igi mag daglesale be yeer iddomoga, Jehova nuggi be dula gudiidba?
Gebbe be nan bonigwar gusgu, be sergan anba be wissulidgi, bad Jehovadi be dagsabinned. Aagala, ebbenne dule wargwen weyob Bab Dummadga sogsad: “Anba an yoo gwalulegua, anba an gwen ibmarga gued daglemasurgua, bad bedi an dagsad” (Salmo 139:16, TNM). Be iddogena, bule Jehova be binar be iddosunna (Mateo 10:29-31 absogo). Aagala, dule na duggin oburgwisdibe, dule baid oburgwisardibe, Jehova bela beladse wile iddodaed (Éxodo 20:13). a Anba Jehova wile iddodabalid, anmar dagge daggesur ibmar imaggedba boni aminoniggir, dule baidga anmar boni amisardibe. Degsoggu, anmar dagge daggesur ibmar imagsurdaele, dule bamaladga anmar boni amisurdabalile, mag daglegoed anmar yeer iddomoga, Jehova nuggi dula gudiidba.
NUEGGWA WE IBMAR DURDAGMARGOLO
Wegine be durdaggoed, igi mag daglesale be yeer iddomoga, Jehova nuggi be dula gudiidba.
3. Nueggwa na san aggwemalo
Bad anmar Jehovaga sogsasoggu be sogedbarbi an ibmar imagdi guoye, aagala anmardi Jehova sogedbarbi ibmar imagged. Ar anmar Jehovaga sogsayob gusad, an san, ibmar ogummaggar uglegedyob an beg uggoye, aagala anmardi dagge daggesur ibmar imagbisulid. Romanos 12:1, 2 absomalo, we ibmargi sunmagmarbalo:
-
¿Ibigala be na nueggwa san aggwed abelege?
-
¿Ibu be nabir imasale, be na nueggwa san aggwega?
4. Mer dagge daggesur ibmar imagdao
Bibliagi soglenaid, ibmar soggwen anmarga boniga guo daglegele, mer aa ibmar imagmaloye. VIDEO dagmalo, nue daggo, ibu nabir imaglesale mer boni amilegega.
Proverbios 22:3 absomalo, sorba we ibmargi sunmagmarbalo:
-
¿Ibu nabir dule imasale, mer e neg yaggi boni amilegega?
-
¿Ibu nabir dule imasale, mer e arbaedgi boni amilegega?
-
¿Ibu nabir dule imasale, mer dodonader boni amiega?
-
¿Ibu nabir dule imasale, carro onanasiir mer boni amiega, emarba nadabbirdibe?
5. Mer yamo goe osulogo
David sogsad, Jehova abesurdaye goemar anba yoo gualulemalad aggar gued. Salmo 139:13, 15 se geb 17 absomalo, we ibmargi sunmagmarbalo:
-
Jehova igi soge, goe anba yoo gualulegele, ¿bad dula mamoye sogdibe, geb gwalulesar durgusdaye sogdibe?
Ebbenne Jehova israelitamarga igar mesisad, dule, ome bonigwar gudiidga boni amisar igi imaglegoe. Éxodo 21:22, 23 absomalo, we ibmargi sunmagmarbalo:
-
Dule, ome bonigwar gudiidga boni amisadba e goe igarba mellesale, ¿igi we dule imaglegoye Jehova igar mesisa? ¿Igi Jehova we ibmar dagge daglesunna?
-
Degsoggu, ¿Jehova igi dagbarsunna, dule yamo goe osuloger? b
-
Igi bedi binsamoga, ¿bule Jehova, igar nued mesis be iddoge?
Dule emar oburgwedgi binsadisulidi, bonigwar gudiidgi ega igar aburuder sun goe osulogedgindi binsadaged. Isaías 41:10 absomalo, we ibmargi sunmagmarbalo:
-
Ome wargwengi nai guarmalale, goe osulogega, ¿doasega we ome bendagged egisoe? ¿Ibigala?
ABAR SOGDAMALAD: “Omegan na goe osulobier osulogoed, ar na egadid”.
-
¿Igi be wisi, Jehova, omegan bonigwar gudidiid wile dagdae, geb anba goemar yoo gwalulemalad wile dagdabali?
WE IGARGI SUNMAGLESAD
Jehova nuggi anmar dula gudiid. Aagala, Bibliagi anmarga soglenaid, mer binsa yogsaar boni amidamaloye, mer emarga boni amimarbaloye.
Ibu be durdasa
-
¿Igi anmar wisi, Jehova, dulemar aggar gued abesurdae?
-
¿Jehova igi iddodae, dule na duggin oburgwisar, dule baid oburgwisardibe?
-
¿Bule Jehova anmar binar iddollege?
NABIR BE WE IBMAR DURDASBALILED
¿Igi mag dalgesale anmar yeer iddomoga, Jehova, dula anmar sediidba?
Dule, Jehova sordaga gued idu goe osulosale, ¿Bab Dummad ega we ibmar ies imaggodibe?
“Bibliagi igi soglenai, ¿goe osuloged nueddibe?” (We garda jw.org gi nosad)
Wegine soglenaid, Bab Dummad igi dagdae dodoged soggwen boni bibbisulir.
“¿Bab Dummad igi dagdae dodoged soggwen boni bibbisulir?” (¡Despertad!, octubre 8, 2000 gad)
Dule na duggin oburgwedgi binsaadiile, we dule ibu ibmar imagger nuedirye Bibliagi soglenai.
“¿Biblia nabir an bendasardibe an na duggin oburgwedgi binsaalir?” (We garda jw.org gi nosad)
a Jehova, dulemar gwage nunmag iddodimalad bela beladse wile dagmadaed (Salmo 34:18). Mag iddoged, abar dulemar bela beladse wile iddodiidba na duggin oburgwedgi binsaardamala, degsoggu, we dulemar bendagbi gumaid. Be wisgubiele, Jehova igi we dulemarga sogmai, we garda absogo: “¿Biblia nabir an bendasardibe an na duggin oburgwedgi binsaalir?”, we leccion bergunaidsig we garda naid.
b Dule, Jehova sordaga gued idu goe osulosale, we ibmargi gannar gannar binsadi guer nuedsulid, ar Jehova bad ega we ibmar ies imasad. Be nabbi we ibmar wisgubiele, we gardagi bur nueggwa we ibmargi sunmaglenaid, “Bibliagi igi soglenai, ¿goe osuloged nueddibe?”, we leccion bergunaidsig we garda naid.
