LECCION 57
Dule bela beladse e igargi yolesale, ¿Jehova ibu imasdae?
Be alamaggo inigwale nueggwa Jehova sogedba igar imaggega, ar bela anmar noedbibarsoggu, ibagwengi sun be noar ibmar imagnoniggoed. Ibagwengi sun bela beladse be, Jehova igargi yolebalid (1 Corintios 6:9, 10). Deyob ibmar gusale, mer iego, be e igargi yolesadba Jehova be indaggosulid, beg ibmar ies imaggoed, be bendaggoed nabir be gannar eg arbabaliga.
1. Dule bela beladse Jehova igargi yolesale, ¿ibu imagger gebe Jehova ega aa ibmar iegega?
Dule nueggwa Jehovaga arbadiinad bela beladse Jehova igargi yolenoniggile, bela beladse gwage nunmag iddos daed. Aagala, e igargi yolesmaladga Jehova weyob sogmaid: “Bemar isgued, ginniddibiiyob gue inigwele, boo sibudiggidyob dagle naoed” (Isaías 1:18). Dule bela beladse Jehova igargi yolesale, ¿ibu imagger gebe Jehova ega aa ibmar iegega? Ibu ibmar noar imasa, aa ibmar indagger gebed, mag daglebalir gebed mag na iddoge nue nosa, Jehovas gorbalir gebed e bendaggega. Mer bar gannar aa ibmar imaggegala, bela beladse alamagger gebed, na e binsaed ogwaega, na e daed ogwabaliga, gannar nueggwa Jehova sogedba igar imagdi guega (Isaías 55:6, 7 absogo).
2. Dule, Jehova igargi yolesale, ¿gwenagan idudimalad ibu imasdamala, we dule bendaggega?
Dule bela beladse e igargi yolesale, Jehova ega weyob sogmaid: “Idudimaladse be gole” (Santiago 5:14, 15 absogo). Gwenagan idudimalad nueggwa Jehova sogedba igar imagmalad, Jehova sordagan sabmarbalid, odurdaglesmarbalid, ibmar aggar gusale, igi anmar bendagmaloe, nabir anmar gannar nueggwa Jehovaga arbabaliga (Gálatas 6:1).
Dule, Jehova igargi yolesale, ¿gwenagan idudimalad ibu imasdamala, we dule bendaggega? Ebodibe, ebaadibe aa dulebo sigmaloed, ese Bibliagi oyogega, ibigala e ibmar imasad, nuedsuli. Ega binsaed nuegan dagsadamarbalid, mer bar gannar aa ibmar imaggega. Inbaggwa aa dulega sogsadamarbalid, ibu ibmar bar congregacion yaggi imaggosurgwele, gannar nueggwa Jehovaga ibmar imaggedse. Dule bela beladse Jehova igargi yolesad na e daed ogwabisulirdina, gwenagan idudimalad we dule onosunnoed, sordagan mer eba isgumalaga.
NUEGGWA WE IBMAR DURDAGMARGOLO
Wegine be durdaggoed, anmar bela beladse e igargi yolesale, ibu Jehova imasdae anmar bendaggega.
3. Mer Jehovagi ibmar odugguo, mer gwenagan idudimaladgi ibmar oduggubalo
Ibu ibmar noar anmar imasdibe, Jehova anmarba nunmag iddodamogad, aagala, anmar egi ibmar oduggued abelesulid. Salmo 32:1, 5 se absomalo, we ibmargi sunmagmarbalo:
-
Anmar wis Jehova igargi yolesale, ¿ibigala anmar, Jehovagi ibmar oduggued abelesuli?
Gwenagan idudimaladgi anmar ibmar oduggusurbalile, ibigwensur nabir anmar bendagmaloed. VIDEO dagmalo, we ibmargi sunmagmarbalo:
-
¿Gwenagan idudimalad igi Canon bendasmala, nabir gannar nueggwa Jehovag arbabaliga?
Gwenagan idudimaladgi anmar ibmar oduggued abelesulid, ar aamala anmar bendaggega onugsalesmalad. Santiago 5:16 absomalo, we ibmargi sunmagmarbalo:
-
Gwenagan idudimaladgi anmar ibmar oduggusulile, ¿ibigala bur wemarga ibigwensur gusale anmar bendaggega?
Bela beladse be Jehova igargi yolesale, mer idudimaladgi ibmar odugguo, degiile, Jehova nabir be bendaggoed.
4. ¿Ibigala abar anmar sordagan onolesdae?
Dule bela beladse Jehova igargi yolesad na e daed ogwabisulile, geg bar anmar sordaga gued, congregacion yaggi onolegoed. Degsoggu, bar anmar aa dulebo aggaosulid, bar anmar ebo sunmaggosurbalid. 1 Corintios 5:6, 11 geb 2 Juan 9, 11 se absomalo, we ibmargi sunmagmarbalo:
-
Igi madu ina bela madu omusdae, dule, Jehova sogedba igar imagbisulid onolesulile, ¿igi sordagan eba gudmogale?
Abar anmar sordagan onolesale, ¿ibigala igar nudasdamala gannar anmarba dogbaliga? Onolesadba mag na iddosdamalad, ee noar ibmar imasadi (Salmo 141:5). VIDEO dagmalo, we ibmargi sunmagmarbalo:
-
Sonia onolesgu, ¿ibu mag iddononiggi?
Anmar sorda wargwen onolesale...
-
... ¿igi Jehova nug odummolesdae?
-
... ¿igi mag dagledae Jehova dule isganasuli, Jehova nue anmar sabe?
5. Dule na e daed ogwasale, Jehova ega ibmar ies imasdamogad
Jesus sogsad, Jehova igi iddodae, dule e igargi yolesad gannar e sogedba igar imagbi gualir. Lucas 15:1, 7 se absomalo, we ibmargi sunmagmarbalo:
-
Lucasgi ibmar soglenaid, ¿ibu igargi anmar odurdagge?
Ezequiel 33:11 absomalo, we ibmargi sunmagmarbalo:
-
Dule nue gannar Jehova sogedba igar imagbiele, ¿ibu imaggoe?
Igi pastormar na gadi ovejamar binardae, Jehova na wile e sordagan dagdamogad.
ABAR SOGDAMALAD: “Idudimaladga dobe an ibmar soge, abaggar an onoarmalale”.
-
Dule deyob soggalir, ¿igi ega be sogsale?
WE IGARGI SUNMAGLESAD
Dule bela beladse Jehova igargi yolesale, auggi, mag na iddogele nue Jehova igargi yolesa, na e daed ogwasbalile, Jehova ega ibmar ies imagmogoed.
Ibu be durdasa
-
Be Jehova igargi yolesale, ¿ibigala be Jehovagi ibmar oduggued abelesuli?
-
Be Jehova igargi yolesale, ¿ibu be imagger gebe, Jehova bega ibmar iegega?
-
Bela beladse be Jehova igargi yolesale, ¿ibigala be gwenagan idudimaladga ibmar soged abelege?
NABIR BE WE IBMAR DURDASBALILED
Wegine soglenaid, igi mag daglege Jehova nue wile dule wargwen dagsa, Isaías 1:18 gi ibmar soglenaidyob.
¿Ibigala abar anmar sordagan onolesdamala?
“Binsa anmar sordagan onolessurdamalad” (La Atalaya, abril 15, 2015 gad)
Wegine soglenaid, igi be nabir emarga sogsale, ibigala anmar sordagan onolesmaladbo anmar wissur bar sunmagge.
“Anmar sordagan onolesale, ¿ibigala bar anmar ebo sunmassurdae?” (We garda jw.org gi nosad)
Wegine soglenaid, ibigala dule wargwen gannar Jehovaga arbabi guali, weyob soglenaidgi amio, “Gannar an Jehovaga arbabi gualid”.
“Biblia dulemar daed ogwamaid” (La Atalaya, abril 1, 2012 gad)
