Anmala, Cristo sordagan sunsogmaladi, anmar bibbisaar imaggosulid, ibmar soggwensaar Jehova igargi anmar obanega. Anmar wisid, be nueggwa Jehova sogedba igar imagbimoga, aagala, Jehova yeer be dagmaid (1 Crónicas 28:9 absogo). Auggi, ¿igi ibmar gualir sun anmar Jehova igargi yoledele? ¿Ibu be imaggoe mer be Jehova igargi banguega?

1. ¿Sun abar dulemar ibu ibmar imadamaloe, Jehova igargi be obanega?

Abar dulemar, Jehova igargi anmar obanbi gudamaloed. ¿Doamar sun Jehova igargi anmar obanbi guarmalale? Dulemar, Jehova igargi bangus gudimalad, anmar binsaed gaegala, abar aa dulemar issaggwa anmar idubugmaladgi sunmaggardamalad, Jehova igargi anmar obanmogaga. We dulemar bilemalad, apostatas. Yamo anmar ogwayega, noar Bab igar odurdagmalad e dummagan anmargi issaggwa sunmaggardamarmogad, Jehova igargi anmar obanega. Degsoggu, we dulemarbo sunmagged boni bibbisulid, e gardamar absogeddibe, internetgi e ibmar daggeddibe, e videomar daggeddibe, ar we dulemar isdar anmar dagdidiid. Aa dulemargi sunmagnagu Jesus weyob sogsamogad: “Ar ibyasuliyob gudidimalad. Ar dule ibyasulid, dule ibyasulid idumaile, ebobela neg gullu dummadgi argwanmaloed” (Mateo 15:14).

¿Igi anmar imagbalosunna, anmar ai wargwen soggalir, bar an Jehovaga arbaosurye, Jehovagi agbidder? Deyob ibmar gunoniggile, anmarga gwage nunmagged dummad ugged. Sun we dule, Jehova igargi be obanbi gudamogoed, ebali be nagumogaga. Deyob ibmar gualir mer bedi Jehova igargi banguedgi binsao (Mateo 10:37). Bur bedi Jehova sogedba igar imaggo, bur merbar we dulebali aggao (1 Corintios 5:11, TNM absogo).

2. ¿Ibu ibmar imadedbali sun agga anmar Jehova igargi bangudele?

Anmar nueggwa Jehova sogedba igar imagbiedbali, anmar, noar Bab igar odurdagmaladba aggabisurbalid. Arbaedgindibe, emarbo anmar ibmar imaggalirdibe, ibu anmar imaggarsundibe, anmar nue dagged abeleged, abaggar agga anmar, noar Bab igar odurdagmalad bendagnamogale. Jehova anmarga sogmaid: “Babilonia abargi gudiid be nomar” (Apocalipsis 18:2, 4).

 NUEGGWA WE IBMAR DURDAGMARGOLO

3. Mer yogasaar emarse binsaed galedao

¿Ibu be imaggoe, anmar sordagangi issaggwa sunmaglenai be iddoalir? Proverbios 14:15 absomalo, we ibmargi sunmagmarbalo:

• Dule anmarga ibmar soggalile, ¿ibigala anmar ibigwensur emarse binsaed galebisuli?

2 Juan 10 absomalo, we ibmargi sunmagmarbalo:

• ¿Nuedirdibe anmar, apostatamarbo sunmagger?

• ¿Ibu ibmar bamalad apostatamar ebudamarbali, dulemar binsaed gaega?

• Dulemar, anmar sordagangi issaggwa sunmagsiir anmar iddodamogale, ¿Jehova igi iddomaile?

4. Dule wargwen Jehova igargi yolesale, bedi nueggwa Jehova sogedba igar imaggo

Be wisguarsundibe, dule wargwen bela beladse Jehova igargi yolesye, ¿ibu be imaggoe? Dagmaloena, deyob ibmar gunoniggir igi ibmar imaglegoye ebbenne Jehova, Israel dulemarga sogsa. Levítico 5:1 absomalo.

Levíticogi soglenaid, be wisgussundibe dule wargwen bela beladse Jehova igargi yolesye, gwenagan idudimaladga be sogoye. Auggi bur nuediled, e dulegar inso bin be soggweler, idudimaladbo be sunmagnaoye. We dule, idudimaladga ibmar sogsulirdina, mer Jehova nug isguegala, bee be idudimaladga ibmar sogsunnoed.

• Deyob ibmar imaglegele, ¿igi mag daglegoe, be nue Jehova sogedba igar imagbie?

• Deyob ibmar imaglegele, ¿igi mag daglegoe, be, dule Jehova igargi yolesad bendagbie?

• Deyob ibmar imaglegele, ¿igi mag daglegoe, be, gwenagan aggar gued abesuli?

 5. Babilonia Nue Nug Niggadba mer bibbisaar aggao

 WE IGARGI SUNMAGLESAD

Be, Jehova igargi bangubisulile, mer be, dulemar issaggwa Jehova igargi sunmagmaladba aggaer gebed, mer bibbisaar be, noar Bab igar odurdagmaladba aggabalir gebed.

Ibu be durdasa

• ¿Ibigala nuedsuli, anmar, apostatamar sunmagbuggwar iddoged, e gardamar absogeddibe, e videomar daggeddibe?

• ¿Ibu be imaggoe, be ai wargwen soggalir, bar an Jehovaga arbaosurye, Jehovagi agbidder?

• Noar Bab igar odurdagmaladba mer be aggaegala, ¿ibu be imagger gebe?