Dyma ysgrifennodd yr apostol Paul: “Er fy mod i eisiau gwneud beth sy’n iawn, mae’r drwg yno yn cynnig ei hun i mi.” (Rhufeiniaid 7:​21) Wyt ti wedi teimlo fel Paul weithiau? Os felly, gall yr erthygl hon ddangos iti sut i wrthsefyll y temtasiwn i ddilyn awydd drwg.

•  Beth ddylet ti ei wybod?

•  Beth elli di ei wneud?

•  Barn dy gyfoedion

 Yn aml, mae temtasiwn a phwysau gan gyfoedion yn dod gyda’i gilydd. Yn wir, dyma rybudd y Beibl: “Mae cwmni drwg yn llygru cymeriad da.” (1 Corinthiaid 15:33) Gall pwysau gan gyfoedion neu’r cyfryngau godi awydd cryf yn dy galon a all dy arwain i demtasiwn, ac achosi iti ‘ddilyn y dorf i wneud drwg.’​—Exodus 23:2.

 “Gall yr awydd i fod yn hoffus ac yn un o’r criw achosi i ti ymuno â holl bethau’r criw, er mwyn cadw eu ffafr.”​—Jeremy.

 Rhywbeth i’w ystyried: Pam gall temtasiwn fod yn gryfach os wyt ti’n poeni’n ormodol am beth mae eraill yn ei feddwl amdanat ti?​—Diarhebion 29:25.

 Y gwir yw: Paid â gadael i bwysau gan dy gyfoedion achosi iti gefnu ar dy safonau.

 Gwna dy gred yn gryf. Os nad wyt ti’n gwybod beth rwyt ti’n ei gredu, gelli di fod fel pyped y mae eraill yn ei reoli. Well o lawer iti wrando ar gyngor y Beibl: “Dylech bwyso a mesur pob un, a dal gafael yn beth sy’n dda.” (1 Thesaloniaid 5:​21) Os wyt ti’n dod i ddeall dy gredoau’n well, yna bydd yn haws iti ddal atyn nhw, yn hytrach nag ildio i’r temtasiwn.

 Rhywbeth i’w ystyried: Pam rwyt ti’n credu bod safonau moesol Duw er dy les di?

 “Dyma wela’ i, os dw i’n cadw at fy nghredoau, yn hytrach nag ildio i demtasiwn, dw i’n ennill mwy o barch gan eraill.”​—Kimberly.

 Esiampl dda yn y Beibl: Daniel. Mae’n debyg roedd Daniel dal yn ei arddegau wrth iddo benderfynu y byddai’n cadw cyfraith Duw.​—Daniel 1:8.

 Bydda’n ymwybodol o dy wendidau. Mae’r Beibl yn sôn am “chwantau gwamal ieuenctid”​—chwantau sy’n arbennig o gryf pan wyt ti’n ifanc. (2 Timotheus 2:​22) Mae’r rhain yn cynnwys teimladau rhywiol, yr awydd i ffitio i mewn, a’r awydd i fod yn annibynnol cyn iti fod yn barod amdano.

 Rhywbeth i’w ystyried: Mae’r Beibl yn dweud mai “chwantau drwg eu hunain sy’n temtio pobl, ac yn eu llusgo nhw ar ôl iddyn nhw gymryd yr abwyd.” (Iago 1:​14) Pa awydd sy’n dy demtio di fwyaf?

 “Bydda’n onest gyda ti dy hun am y temtasiynau sy’n dy ddenu di fwyaf. Gwna ymchwil ar sut i ymladd yn erbyn dy demtasiynau, gwna nodyn o bopeth sy’n berthnasol i ti. Yna y tro nesa’ rwyt ti’n wynebu’r temtasiwn hwnnw, byddi di’n gallu ei wrthsefyll.”​—Sylvia.

 Esiampl dda yn y Beibl: Dafydd. Ar adegau fe ildiodd i bwysau gan eraill ac i’w chwantau ei hun. Ond dysgodd Dafydd o’i gamgymeriadau a cheisiodd fod yn ddyn gwell. Fe weddïodd ar Jehofa: “Crea galon lân yno i, O Dduw, a rhoi ysbryd penderfynol i mi unwaith eto.”​—Salm 51:10.

 Cymera reolaeth. Dywed y Beibl: “Paid gadael i ddrygioni dy ddal yn ei grafangau.” (Rhufeiniaid 12:21) Does dim rhaid i ti gael dy ddal gan demtasiwn. Mi fedri di ddewis gwneud y peth iawn.

 Rhywbeth i’w ystyried: Pan wyt ti mewn sefyllfa lle mae ’na demtasiwn i wneud drwg, sut medri di reoli pethau a ‘newid y diweddglo’?

 “Dwi’n meddwl am sut bydda i’n teimlo os wna i ildio i’r temtasiwn. A fydda i’n teimlo rhyddhad? O bosib, am ychydig. A fydda i’n teimlo’n dda yn y pen draw? Na, bydda i’n teimlo’n waeth. Ydy’r pris yn un gwerth ei dalu? Na!”​—Sophia.

 Esiampl dda yn y Beibl: Paul. Er iddo gydnabod ei dueddiadau drwg, fe gymerodd reolaeth. Ysgrifennodd: “Dw i’n gwthio fy hun i’r eithaf ac yn ennill rheolaeth lwyr.”​—1 Corinthiaid 9:​27.

 Y gwir yw: Pan mae’n dod at ymdrin â themtasiwn, ti sydd yn sêt y gyrrwr.

 Cofia, pethau dros dro yw temtasiynau. “Erbyn hyn, pethau bach yw’r temtasiynau a oedd yn teimlo’n fawr yn yr ysgol uwchradd,” meddai Melissa, sy’n ugain oed. “Mae cofio hyn yn galonogol, oherwydd dw i’n gwybod bydd fy nhemtasiynau presennol yn pasio, a ryw ddydd wna i edrych yn ôl a gweld mai ymladd yn eu herbyn oedd y peth gorau i mi.”