Ail Brenhinoedd 13:1-25
13 Yn y drydedd flwyddyn ar hugain* o deyrnasiad Jehoas fab Ahaseia brenin Jwda, daeth Jehoahas fab Jehu yn frenin ar Israel yn Samaria, a theyrnasodd am 17 mlynedd.
2 Parhaodd i wneud beth oedd yn ddrwg yng ngolwg Jehofa, a chyflawnodd yr un pechodau roedd Jeroboam fab Nebat wedi achosi i Israel eu cyflawni. Wnaeth ef ddim cefnu ar y pechodau hynny.
3 Felly roedd dicter Jehofa yn erbyn yr Israeliaid yn danbaid, a dyma’n eu rhoi nhw yn nwylo Hasael, brenin Syria, ac yn nwylo Ben-hadad fab Hasael eu holl ddyddiau.
4 Ymhen amser, erfyniodd Jehoahas am ffafr Jehofa, a gwrandawodd Jehofa arno oherwydd roedd wedi gweld y dioddefaint roedd brenin Syria wedi ei achosi i Israel.
5 Felly rhoddodd Jehofa achubwr i Israel i’w rhyddhau nhw o afael Syria, ac roedd yr Israeliaid yn gallu byw yn eu tai fel o’r blaen.*
6 (Ond ni wnaethon nhw gefnu ar bechod teulu Jeroboam, y pechod roedd Jeroboam wedi achosi i Israel ei gyflawni. Roedden nhw’n parhau yn y pechod hwn, ac roedd y polyn cysegredig yn dal i sefyll yn Samaria.)
7 Cafodd Jehoahas ei adael gyda byddin o ddim ond 50 o farchogion, 10 o gerbydau, a 10,000 o filwyr, oherwydd roedd brenin Syria wedi dinistrio’r gweddill, gan sathru arnyn nhw fel llwch ar y llawr dyrnu.
8 Ynglŷn â gweddill hanes Jehoahas, popeth a wnaeth a’i weithredoedd nerthol, onid ydy hynny wedi ei ysgrifennu yn llyfr hanes brenhinoedd Israel?
9 Yna bu farw Jehoahas* a chafodd ei gladdu yn Samaria; a daeth ei fab Jehoas yn frenin yn ei le.
10 Yn yr ail flwyddyn ar bymtheg ar hugain* o deyrnasiad Jehoas brenin Jwda, daeth Jehoas fab Jehoahas yn frenin ar Israel yn Samaria, a theyrnasodd am 16 mlynedd.
11 Parhaodd i wneud beth oedd yn ddrwg yng ngolwg Jehofa ac i gyflawni’r holl bechodau roedd Jeroboam fab Nebat wedi achosi i Israel eu cyflawni. Wnaeth ef ddim cefnu ar y pechodau hyn.
12 Ynglŷn â gweddill hanes Jehoas, popeth a wnaeth, ei weithredoedd nerthol, a sut gwnaeth ef frwydro yn erbyn Amaseia brenin Jwda, onid ydy hynny wedi ei ysgrifennu yn llyfr hanes brenhinoedd Israel?
13 Yna bu farw Jehoas* ac eisteddodd Jeroboam* ar ei orsedd. A chafodd Jehoas ei gladdu yn Samaria gyda brenhinoedd Israel.
14 Nawr pan aeth Eliseus yn sâl â’r salwch a wnaeth ei ladd yn y pen draw, daeth Jehoas brenin Israel i lawr ato ac wylo drosto, gan ddweud: “Fy nhad, fy nhad! Cerbyd Israel a’i farchogion!”
15 Yna dywedodd Eliseus wrtho: “Cymera fwa a saethau.” Felly cymerodd fwa a saethau.
16 Yna dywedodd Eliseus wrth frenin Israel: “Gafael yn y bwa.” Felly gafaelodd ynddo ac yna rhoddodd Eliseus ei ddwylo ef ar ddwylo’r brenin.
17 Yna dywedodd: “Agora’r ffenest tua’r dwyrain.” Felly agorodd y ffenest. Dywedodd Eliseus: “Saetha!” Felly saethodd. Yna dywedodd: “Saeth fuddugoliaeth Jehofa, saeth fuddugoliaeth dros Syria! Byddi di’n taro Syria i lawr yn Affec nes iti drechu’r fyddin yn llwyr.”
18 Aeth ymlaen i ddweud: “Gafael yn y saethau,” felly gafaelodd ynddyn nhw. Yna dywedodd wrth frenin Israel: “Taro’r llawr.” Felly dyma’n taro’r llawr dair gwaith cyn stopio.
19 Gyda hynny, dyma ddyn y gwir Dduw yn digio ag ef a dweud: “Dylet ti fod wedi taro’r llawr bump neu chwe gwaith! Yna byddet ti wedi taro Syria i lawr nes iti ei threchu’n llwyr, ond nawr byddi di ond yn taro Syria i lawr dair gwaith.”
20 Wedyn bu farw Eliseus a chafodd ei gladdu. Ar ôl hynny, dechreuodd grwpiau o ladron o Moab ddod i mewn i’r wlad ar ddechrau pob blwyddyn.*
21 Un diwrnod, roedd ’na ddynion yn claddu dyn pan welson nhw grŵp o ladron. Felly dyma nhw’n taflu’r dyn i mewn i fedd Eliseus a rhedeg i ffwrdd. Pan wnaeth corff y dyn gyffwrdd ag esgyrn Eliseus, daeth yn ôl yn fyw a sefyll ar ei draed.
22 Nawr dyma Hasael, brenin Syria, yn erlid Israel holl ddyddiau Jehoahas.
23 Ond dangosodd Jehofa ffafr a thrugaredd tuag atyn nhw, a dangosodd ei fod yn gofalu amdanyn nhw er mwyn ei gyfamod ag Abraham, Isaac, a Jacob. Doedd ef ddim eisiau eu difetha nhw, a dydy ef ddim wedi eu gyrru nhw i ffwrdd o’i olwg hyd heddiw.
24 Unwaith i Hasael brenin Syria farw, daeth ei fab Ben-hadad yn frenin yn ei le.
25 Dyma Jehoas fab Jehoahas yn cymryd oddi ar Ben-hadad fab Hasael y dinasoedd roedd Hasael wedi eu cymryd oddi ar Jehoahas yn ystod adeg rhyfel. Dyma Jehoas yn taro Ben-hadad i lawr* dair gwaith ac yn cymryd dinasoedd Israel yn ôl.
Troednodiadau
^ Neu “23ain flwyddyn.”
^ Hynny yw, mewn heddwch a diogelwch.
^ Neu “Yna gorweddodd Jehoahas i lawr i orffwys gyda’i gyndadau.”
^ Neu “37ain flwyddyn.”
^ Neu “Yna gorweddodd Jehoas i lawr i orffwys gyda’i gyndadau.”
^ Hynny yw, Jeroboam II.
^ Yn y gwanwyn mae’n debyg.
^ Neu “yn trechu Ben-hadad.”
