Ail Cronicl 17:1-19
17 A daeth ei fab Jehosaffat yn frenin yn ei le, a chryfhaodd ei awdurdod dros Israel.
2 Gosododd filwyr yn holl ddinasoedd caerog Jwda, a rhoddodd garsiynau yng ngwlad Jwda ac yn y dinasoedd roedd Asa ei dad wedi eu cipio yn Effraim.
3 Parhaodd Jehofa i fod gyda Jehosaffat, am ei fod wedi dilyn ôl traed ei gyndad Dafydd, a wnaeth ef ddim ceisio’r duwiau Baal.
4 Roedd yn ceisio Duw ei dad, a dilynodd Ei orchymyn yn hytrach nag arferion Israel.
5 Sicrhaodd Jehofa fod y deyrnas wedi ei sefydlu’n gadarn yn ei ddwylo; a pharhaodd Jwda gyfan i roi anrhegion i Jehosaffat, ac roedd yn gyfoethog iawn ac yn cael ei anrhydeddu’n fawr.
6 Roedd yn hyderus wrth ddilyn ffyrdd Jehofa, a gwnaeth ef hyd yn oed gael gwared ar yr uchelfannau a’r polion cysegredig allan o Jwda.
7 Yn y drydedd flwyddyn o’i deyrnasiad, galwodd am ei dywysogion—Ben-hail, Obadeia, Sechareia, Nethanel, a Michea—a’u hanfon nhw i ddysgu yn ninasoedd Jwda.
8 Roedd ’na Lefiaid gyda nhw: Semaia, Nethaneia, Sebadeia, Asahel, Semiramoth, Jehonathan, Adoneia, Tobeia, a Tob-adoneia, ynghyd ag Elisama a Jehoram yr offeiriaid.
9 Dechreuon nhw ddysgu eraill yn Jwda, gan fynd â llyfr Cyfraith Jehofa gyda nhw, ac aethon nhw drwy holl ddinasoedd Jwda yn dysgu’r bobl.
10 A daeth ofn Jehofa ar holl deyrnasoedd y gwledydd o amgylch Jwda, ac ni wnaethon nhw frwydro yn erbyn Jehosaffat.
11 A daeth y Philistiaid ag anrhegion ac arian at Jehosaffat fel treth. Daeth yr Arabiaid â 7,700 o hyrddod* a 7,700 bwch gafr o’u preiddiau.
12 Daeth Jehosaffat yn fwy ac yn fwy pwerus, a pharhaodd i adeiladu llefydd caerog, a dinasoedd i storio nwyddau yn Jwda.
13 Roedd ganddo brosiectau mawr yn ninasoedd Jwda, yn ogystal â milwyr cryf yn Jerwsalem.
14 Roedd y rhain wedi eu trefnu yn ôl eu grwpiau o deuluoedd: o blith llwyth Jwda roedd ’na benaethiaid ar filoedd, y cyntaf oedd Adna y pennaeth, ac roedd ’na 300,000 o filwyr cryf gydag ef.
15 Roedd Jehohanan y pennaeth o dan ei awdurdod, ac roedd ’na 280,000 gydag ef.
16 Roedd Amaseia fab Sicri hefyd o dan ei awdurdod, a gwnaeth ef wirfoddoli i wasanaethu Jehofa, ac roedd ’na 200,000 o filwyr cryf gydag ef.
17 Ac o blith llwyth Benjamin roedd ’na Eliada, milwr cryf, a gydag ef roedd ’na 200,000 o ddynion wedi eu harfogi â’r bwa a’r darian.
18 Ac roedd Jehosabad o dan ei awdurdod, a gydag ef roedd ’na 180,000 o ddynion wedi eu harfogi ar gyfer brwydro.
19 Roedd y rhain yn gwasanaethu’r brenin ynghyd â’r rhai roedd y brenin wedi eu rhoi yn y dinasoedd caerog drwy Jwda i gyd.
Troednodiadau
^ Neu “o feheryn.”
