Ail Samuel 7:1-29
7 Pan oedd y brenin wedi setlo yn ei dŷ* ei hun ac roedd Jehofa wedi rhoi gorffwys iddo rhag yr holl elynion o’i gwmpas,
2 dywedodd y brenin wrth Nathan y proffwyd: “Dyma fi yn byw mewn tŷ o goed cedrwydd tra bod Arch y gwir Dduw yn eistedd mewn pabell.”
3 Atebodd Nathan: “Dos a gwna beth bynnag sydd yn dy galon oherwydd mae Jehofa gyda ti.”
4 Y noson honno, daeth gair Jehofa at Nathan yn dweud:
5 “Dos at fy ngwas Dafydd a dweud, ‘Dyma beth mae Jehofa yn ei ddweud: “A ddylet ti adeiladu tŷ i mi?
6 Oherwydd rydw i heb gael tŷ i fi fy hun ers y diwrnod des i â phobl Israel allan o’r Aifft, ond rydw i wedi bod yn symud o un lle i’r llall mewn pabell a thabernacl.
7 Yn ystod yr holl amser roeddwn i gyda’r Israeliaid i gyd, a wnes i erioed ddweud gair am hyn wrth unrhyw un o arweinwyr llwythau Israel y gwnes i eu penodi i fugeilio fy mhobl Israel? A wnes i erioed ofyn iddyn nhw, ‘Pam na wnaethoch chi adeiladu tŷ o goed cedrwydd imi?’”’
8 Nawr dyweda hyn wrth fy ngwas Dafydd, ‘Dyma mae Jehofa y lluoedd yn ei ddweud: “Gwnes i dy gymryd di i ffwrdd o’r tir pori, o ddilyn y praidd, i fod yn arweinydd dros fy mhobl Israel.
9 Bydda i gyda ti ble bynnag y byddi di’n mynd, a bydda i’n cael gwared ar dy holl elynion o dy flaen di; a bydda i’n gwneud dy enw di yn fawr, fel enwau dynion pwysig y byd.
10 Bydda i’n penodi rhywle i fy mhobl Israel ac yn eu sefydlu nhw yno, a byddan nhw’n byw yno ac ni fydd neb yn tarfu arnyn nhw ddim mwy; a fydd dynion drwg ddim yn eu gormesu nhw eto fel roedden nhw yn y gorffennol,
11 o’r diwrnod gwnes i benodi barnwyr dros fy mhobl Israel. A bydda i’n rhoi gorffwys i ti rhag dy holl elynion.
“‘“Hefyd, mae Jehofa wedi dweud wrthot ti y bydd Jehofa yn gwneud tŷ* iti.
12 Pan ddaw dy ddyddiau i ben a phan fyddi di’n gorffwys gyda dy gyndadau, yna bydda i’n codi un o dy deulu* ar dy ôl di, dy fab dy hun, a bydda i’n sefydlu ei deyrnas yn gadarn.
13 Ef ydy’r un fydd yn adeiladu tŷ er mwyn anrhydeddu fy enw i, a bydda i’n sefydlu gorsedd ei deyrnas yn gadarn, a hynny am byth.
14 Bydda i’n dad iddo, a bydd ef yn fab i mi. Pan fydd ef yn gwneud drwg, bydda i’n ei geryddu,* bydda i’n ei daro ac yn ei gosbi fel mae dynion yn gwneud.
15 Fydda i ddim yn cymryd fy nghariad ffyddlon i ffwrdd oddi wrtho fel gwnes i ei gymryd i ffwrdd oddi wrth Saul, yr un gwnes i gael gwared arno fel nad oeddet ti’n gallu ei weld.
16 Bydd dy dŷ a dy deyrnas yn parhau o dy flaen di am byth; bydd dy orsedd yn cael ei sefydlu’n gadarn am byth.”’”
17 Gwnaeth Nathan adrodd y geiriau hyn i gyd wrth Dafydd yn ogystal â’r weledigaeth gyfan.
18 A gyda hynny daeth y Brenin Dafydd i mewn ac eistedd o flaen Jehofa a dweud: “Pwy ydw i, O Sofran Arglwydd Jehofa? A beth yw fy nhŷ iti ddod â fi mor bell â hyn?
19 Fel petai hyn ddim yn ddigon, O Sofran Arglwydd Jehofa, rwyt ti hefyd yn siarad am dŷ dy was hyd at y dyfodol pell; ac mae’r cyfarwyddyd hwn* ar gyfer yr holl ddynoliaeth, O Sofran Arglwydd Jehofa.
20 Beth arall galla i, dy was Dafydd, ei ddweud wrthot ti pan wyt ti’n fy adnabod i mor dda, O Sofran Arglwydd Jehofa?
21 Er mwyn dy air ac yn ôl ewyllys dy galon rwyt ti wedi gwneud yr holl bethau gwych hyn ac wedi eu datgelu nhw i dy was.
22 Dyna pam rwyt ti mor rhyfeddol, O Sofran Arglwydd Jehofa. Does ’na neb fel ti, a does ’na ddim Duw ar wahân i ti; mae popeth rydyn ni wedi ei glywed â’n clustiau yn cadarnhau hyn.
23 A pha genedl arall ar y ddaear sydd fel dy bobl Israel? Aeth Duw a’u rhyddhau nhw i fod yn bobl iddo, gan wneud enw iddo’i hun drwy wneud pethau gwych a rhyfeddol drostyn nhw. Gwnest ti yrru cenhedloedd a’u duwiau allan ar ran dy bobl, y rhai gwnest ti eu hachub i ti dy hun o’r Aifft.
24 Gwnest ti sefydlu dy bobl Israel i fod yn bobl i ti hyd byth; ac rwyt ti, O Jehofa, wedi dod yn Dduw iddyn nhw.
25 “Nawr, O Jehofa Dduw, gwna fel rwyt ti wedi addo ynglŷn â dy was a’i dŷ hyd byth, a gad i dy addewid ddod yn wir.
26 Gad i dy enw gael ei ddyrchafu am byth, fel y bydd pobl yn dweud, ‘Jehofa y lluoedd sy’n Dduw dros Israel,’ a gad i dŷ dy was Dafydd gael ei sefydlu’n gadarn o dy flaen di.
27 Oherwydd rwyt ti, Jehofa y lluoedd, Duw Israel, wedi datgelu hyn i dy was drwy ddweud, ‘Gwna i adeiladu tŷ* iti.’ Dyna pam mae gan dy was y dewrder i weddïo arnat ti fel hyn.
28 Ac nawr, O Sofran Arglwydd Jehofa, ti yw’r gwir Dduw, ac mae dy eiriau di yn wir, ac rwyt ti wedi addo’r pethau da hyn i dy was.
29 Felly plîs, os yw’n dda yn dy lygaid di, bendithia dŷ dy was, a gad iddo barhau o dy flaen di am byth; oherwydd dyna rwyt ti, O Sofran Arglwydd Jehofa, wedi ei addo, a gad i dy fendith di fod ar dŷ dy was am byth.”
Troednodiadau
^ Neu “ei balas.”
^ Neu “llinach frenhinol.”
^ Llyth., “had.”
^ Llyth., “bydda i’n ei geryddu gyda gwialen dynion.”
^ Neu “mae’r gyfraith hon.”
^ Neu “llinach frenhinol.”
