Beth Mae’r Beibl yn ei Ddweud am y Prinder Bwyd a Welwn Heddiw?
“Dim newyn.” Dyna obaith arweinwyr y byd ynglŷn ag un o broblemau mwyaf y ddynoliaeth, sef darparu digon o fwyd i bawb ar y blaned. a Ond a ddaw amser pan na fydd neb ar y ddaear yn newynu? Beth mae’r Beibl yn ei ddweud?
Cafodd y prinder bwyd heddiw ei ragweld yn y Beibl
Dywedodd y Beibl y byddai cyfnodau o brinder bwyd yn “y dyddiau olaf.” Dyna enw’r Beibl ar gyfer ein hoes ni. (2 Timotheus 3:1) Nid Duw sy’n gyfrifol am y prinder bwyd, ond y mae wedi ein rhybuddio ni i’w ddisgwyl. (Iago 1:13) Sylwch ar y ddwy broffwydoliaeth hyn.
“Bydd ’na brinder bwyd . . . yn un lle ar ôl y llall.” (Mathew 24:7) Mae’r broffwydoliaeth hon yn rhagweld newyn mewn llawer man. Mae adroddiad diweddar gan grwpiau sy’n monitro sut mae bwyd yn cael ei gynhyrchu a’i ddosbarthu yn dweud: “O ran ei ymdrechion i roi terfyn ar newyn, diffyg diogeledd bwyd, a diffyg maeth, mae’r byd yn mynd ar yn ôl.” b Mae cannoedd o filiynau o bobl mewn dwsinau o wledydd yn methu cael y bwyd sydd ei angen arnyn nhw. O ganlyniad, mae llawer yn marw.
“Fe welais geffyl du, ac roedd gan yr un a oedd yn eistedd arno glorian yn ei law.” (Datguddiad 6:5) Yn y broffwydoliaeth hon, mae’r ceffyl a’r marchog yn cynrychioli newyn yn y dyddiau olaf. c Mae’r glorian yn llaw’r marchog ar gyfer pwyso bwyd i’w rannu’n ddognau. Wrth iddo farchogaeth, clywir llais yn dweud y byddai prisiau bwyd yn codi’n aruthrol ac yn rhybuddio pobl i beidio â gwastraffu bwydydd sylfaenol. (Datguddiad 6:6) Mae hyn yn disgrifio’r argyfwng bwyd a welwn ni heddiw, gyda biliynau o bobl yn methu fforddio neu’n methu cael hyd i fwyd maethlon.
Sut bydd prinder bwyd yn dod i ben?
Mae arbenigwyr yn dweud bod y ddaear yn cynhyrchu mwy na digon i fwydo pawb ar y blaned. Felly beth yw’r problemau sy’n achosi prinder bwyd? Ac yn ôl y Beibl, beth mae’r Creawdwr, Jehofa, d yn mynd i’w wneud er mwyn datrys y problemau hyn?
Problem: Nid yw llywodraethau’n gallu cael gwared ar y tlodi a’r diffyg cyfartaledd economaidd sy’n creu newyn.
Ateb: Bydd llywodraethau dynol amherffaith yn cael eu disodli gan lywodraeth berffaith—Teyrnas Dduw. (Daniel 2:44; Mathew 6:10) Heddiw, mae llawer o bobl dlawd yn cael trafferth talu am fwyd, ond o dan Deyrnas Dduw bydd hynny yn newid. Mae’r Beibl yn dweud am Iesu Grist, Brenin Teyrnas Dduw: “Mae’n achub y rhai sy’n galw arno mewn angen, a’r tlawd sydd heb neb i’w helpu.” (Salm 72:12) Ac mae Duw yn addo: “Bydd y tir yn rhoi cnwd da, cyfoethog.”—Eseia 30:23.
Problem: Mae rhyfeloedd yn ddinistriol ac maen nhw’n creu ansefydlogrwydd economaidd. O ganlyniad mae’n anodd neu’n amhosib dosbarthu bwyd.
Ateb: “Mae [Jehofa yn] dod â rhyfeloedd i ben drwy’r ddaear gyfan; mae’n malu’r bwa ac yn torri’r waywffon, ac yn llosgi cerbydau rhyfel mewn tân.” (Salm 46:9) Bydd Duw yn dinistrio arfau rhyfel, a’r rhai sy’n hyrwyddo rhyfeloedd. O ganlyniad, bydd hi’n bosib i bawb gael bwyd yn hawdd ac yn ddiogel. Mae’r Beibl yn dweud am Frenin Teyrnas Dduw: “Gwna i gyfiawnder lwyddo yn ei ddyddiau, ac i heddwch gynyddu.”—Salm 72:7.
Problem: Mae tywydd eithafol a thrychinebau naturiol yn difa cnydau ac yn lladd anifeiliaid.
Ateb: Bydd Duw yn rheoli grymoedd naturiol y ddaear, gan greu amgylchiadau a fydd yn ddelfrydol ar gyfer tyfu bwyd. Mae’r Beibl yn dweud: “Gwnaeth [Jehofa] i’r storm dawelu; roedd y tonnau’n llonydd. . . . Gall droi’r anialwch yn byllau dŵr, a’r tir sych yn ffynhonnau! Yna rhoi pobl newynog i fyw yno . . . Maen nhw’n hau hadau yn y caeau ac yn plannu coed gwinwydd, ac yn cael cynhaeaf mawr.”—Salm 107:29, 35-37.
Problem: Mae pobl farus a llwgr yn gwerthu bwyd nad yw’n ddiogel i’w fwyta, neu’n atal bwyd rhag cyrraedd y rhai sydd ei angen.
Ateb: Bydd Teyrnas Dduw yn cael gwared ar bawb sydd yn anonest ac yn llwgr. (Salm 37:10, 11; Eseia 61:8) Mae’r Beibl yn disgrifio Jehofa fel Duw sy’n “rhoi cyfiawnder i’r rhai sy’n cael eu gorthrymu, a bwyd i’r rhai newynog.”—Salm 146:7.
Problem: Mae traean o’r bwyd sy’n cael ei gynhyrchu bob blwyddyn yn cael ei wastraffu neu ei golli.
Ateb: O dan Deyrnas Dduw, bydd y cyflenwad bwyd yn cael ei reoli’n iawn. Pan oedd Iesu ar y ddaear, roedd yn ofalus i beidio â gwastraffu bwyd. Er enghraifft, ar un achlysur fe roddodd fwyd mewn ffordd wyrthiol i dorf o fwy na 5,000 o bobl. Ond ar y diwedd, dywedodd wrth ei ddisgyblion: “Casglwch y tameidiau dros ben, fel nad oes dim gwastraff.”—Ioan 6:5-13.
Gan fydd Teyrnas Dduw yn cael gwared ar achosion sylfaenol newyn, bydd pawb ar y ddaear yn cael digonedd o fwyd da a maethlon. (Eseia 25:6) I weld pryd bydd Teyrnas Dduw yn gwneud hyn, gweler yr erthygl “Pryd Daw Teyrnas Dduw i Reoli’r Ddaear?”
a Yr Agenda ar gyfer Datblygu Cynaliadwy 2030, a gafodd ei fabwysiadu gan bob Aelod-wladwriaeth o’r Cenhedloedd Unedig yn 2015.
b Adroddiad ar y cyd gan Sefydliad Bwyd ac Amaeth y Cenhedloedd Unedig, y Gronfa Ryngwladol ar gyfer Datblygu Amaethyddol, Cronfa Plant y Cenhedloedd Unedig, Rhaglen Bwyd y Byd, a Sefydliad Iechyd y Byd.
c I ddysgu mwy am bedwar marchog llyfr Datguddiad, gweler yr erthygl “The Four Horsemen—Who Are They?”
d Jehofa yw enw personol Duw. (Salm 83:18, Beibl Cysegr-lân) Gweler yr erthygl “Pwy Yw Jehofa?”
Efallai Byddwch Hefyd yn Hoffi
ATEBION I GWESTIYNAU AM Y BEIBL
Beth Yw Arwyddion y “Dyddiau Diwethaf” neu’r “Cyfnod Olaf”?
Rhagfynegodd y Beibl lawer o bethau a fyddai gyda’i gilydd yn arwydd o’r dyddiau diwethaf.
PYNCIAU ERAILL
Ydy System Economaidd Deg yn Bosib?
Mae ’na lywodraeth sydd yn gallu edrych ar ôl faterion y ddaear yn berffaith, a chael gwared ar dlodi ac ansicrwydd economaidd.
DYSGEIDIAETHAU PWYSIG Y BEIBL
Beth Yw Teyrnas Dduw?
Trwy gydol ei weinidogaeth, dysgodd Iesu am Deyrnas Dduw yn fwy nag unrhyw bwnc arall. Ers canrifoedd, mae ei ddilynwyr wedi bod yn gweddïo i’r Deyrnas honno ddod.
PYNCIAU ERAILL
Gobaith Go Iawn am Ddyfodol Gwell
Pam mae addewidion y Beibl yn wahanol i’r hyn mae pobl yn ei addo a’i ragfynegi?
