Dywedodd y Beibl y byddai rhyfeloedd, daeargrynfeydd, heintiau, a ‘phethau dychrynllyd’ eraill, yn ddigwyddiadau cyffredin yn ein dyddiau ni. (Luc 21:10, 11) Mae’r geiriau proffwydol hynny yn dal i gael eu gwireddu yn ystod blwyddyn wasanaeth 2022. a Er enghraifft, mae’r rhyfel yn Wcráin wedi parhau’n ddi-dor, gan effeithio ar filiynau o bobl. Roedd rhan helaeth o’r byd yn dal i geisio dod dros bandemig COVID-19. Ar ben hynny, cafodd nifer mawr o bobl eu heffeithio gan drychinebau naturiol, gan gynnwys daeargrynfeydd yn Haiti, a stormydd enfawr yng Nghanolbarth America, Ynysoedd y Philipinau, a de-ddwyrain Affrica. Sut mae Tystion Jehofa yn yr ardaloedd hynny wedi helpu pobl?

 Yn ystod blwyddyn wasanaeth 2022, mae ein cyfundrefn wedi rhoi cymorth i bobl oedd wedi dioddef mewn rhyw 200 o drychinebau! Gwarion ni bron i 12 miliwn o ddoleri ar gymorth. b Dyma ddwy enghraifft o’r ffordd cafodd cyfraniadau ariannol eu defnyddio i helpu pobl mewn trychinebau.

 Ar Awst 14, 2021, cafodd rhan ddeheuol Haiti ei tharo gan ddaeargryn maint 7.2. Er tristwch mawr, bu farw tri o Dystion Jehofa—un o’n brodyr a dwy o’n chwiorydd. Mae’r rhai a oroesodd wedi gorfod delio â’r difrod a’r boen emosiynol y mae’r daeargryn wedi eu hachosi. Dywed brawd o’r enw Stephane: “Bu farw cynifer o bobl yn y ddinas, roedd angladdau’n cael eu cynnal drwy’r wythnos bob wythnos am fwy na dau fis.” Dywed brawd arall, Éliézer: “Roedd llawer o’r Tystion heb gartref, heb ddillad, heb esgidiau, a heb angenrheidiau sylfaenol eraill. Am fisoedd roedd pobl yn byw mewn ofn oherwydd yr ôl-gryniadau.”

 Ymatebodd ein cyfundrefn yn gyflym. Darparodd cangen Haiti dros 53 tunnell o fwyd, yn ogystal â phebyll, tarpwlinau, matresi, a phaneli solar bach i wefru ffonau symudol. Ar ben hynny, cafodd mwy na 200 o gartrefi eu trwsio neu eu hailgodi yn ystod blwyddyn wasanaeth 2022. Cafodd mwy na miliwn o ddoleri eu gwario ar gymorth.

 Mae ein brodyr a’n chwiorydd yn ddiolchgar iawn. Dywed Lorette: “Cafodd ein tŷ a’n busnes eu dinistrio’n llwyr gan y daeargryn. Doedd gynnon ni ddim byd i’w fwyta. Ond daeth cyfundrefn Jehofa i’r adwy mor gyflym, a rhoi inni bopeth oedd ei angen.” Dywed Micheline: “Cafodd y lloches lle roedd fy nau fab a minnau’n byw ei difrodi gan y ddaeargryn. Yr unig beth o’n i’n gallu ei wneud oedd gweddïo am help. Atebodd Jehofa drwy ei gyfundrefn, a heddiw mae gynnon ni dŷ cadarn. Dw i eisiau gwneud popeth posib i ddangos i Jehofa fy mod i’n ddiolchgar.”

 Fe wnaeth yr awdurdodau lleol sylwi ar ein hymdrech i estyn cymorth. Dywedodd cyfarwyddwr neuadd dinas L’Asile: “Diolch yn fawr iawn am estyn cymorth mor gyflym, ac rydw i eisiau eich canmol chi am y ffordd rydych chi wedi parchu’r awdurdodau. Rydych chi’n helpu pobl, nid am resymau ariannol, ond oherwydd eich bod yn eu caru.”

 Ar Ionawr 24, 2022, fe wnaeth Storm Drofannol Ana gyrraedd y tir ym Mosambîc cyn symud ymlaen i Malawi. Cafwyd glaw trwm a gwyntoedd cryfion hyd at 100 cilomedr yr awr (62 mi/a), gan ddod â llinellau trydan i lawr. Fe wnaeth y storm ddinistrio pontydd ac achosi llifogydd difrifol.

 Effeithiodd y storm ar fwy na 30,000 o Dystion ym Malawi a Mosambîc. Mae brawd o’r enw Charles, oedd yn helpu gyda’r gwaith cymorth yn dweud: “Ro’n i’n torri fy nghalon o weld y brodyr yn dioddef a faint roedden nhw wedi ei golli.” I wneud pethau’n waeth, roedd y storm wedi difa eu cnydau a’r bwydydd oedd ganddyn nhw wrth gefn. Collodd llawer eu cartrefi. Yn drist iawn, collodd un brawd ei wraig a dwy ferch fach a foddodd pan drodd y cwch achub drosodd.

 Roedd y storm yn frawychus. Am 1:00 y bore, yn nhref Nchalo ym Malawi, clywodd y teulu Sengeredo sŵn dŵr yn taranu. Roedd dwy afon wedi gorlifo! Penderfynodd y Brawd Sengeredo y dylen nhw adael y tŷ. Roedd hynny yn gall oherwydd yn fuan wedyn daeth y llifogydd i mewn i’r tŷ a’i chwalu. Cafodd eu heiddo naill ai ei ddifrodi neu ei ysgubo i ffwrdd. Penderfynodd y teulu gerdded i Neuadd y Deyrnas. Fel arfer mae hyn yn cymryd rhyw hanner awr, ond cymerodd ddwy awr. Erbyn iddyn nhw gyrraedd, roedden nhw’n wlyb at eu crwyn ac wedi blino’n lân, ond o leiaf roedden nhw’n saff.

 Aeth y swyddfeydd cangen ym Malawi a Mosambîc ati ar unwaith i drefnu cymorth. Gofynnon nhw i’r arolygwyr cylchdaith a’r henuriaid asesu anghenion y brodyr, a rhoi cymorth ysbrydol ac emosiynol. Ffurfiwyd nifer o Bwyllgorau Cymorth ar ôl Trychineb, ac aethon nhw ati’n syth i helpu’r brodyr i gael bwyd a phethau angenrheidiol eraill. Cafodd dros $33,000 eu gwario ar gymorth dyngarol, a dros $300,000 ar drwsio neu ailadeiladu tai.

 Gan fod cyfradd chwyddiant mor uchel, roedd y Pwyllgorau yn gorfod defnyddio’r arian yn ofalus iawn. Er enghraifft, dros y saith mis cyntaf ar ôl y trychineb, bu cynnydd o tua 70 y cant ym mhris blawd india-corn, sydd yn brif fwyd ym Malawi. Cododd pris tanwydd hefyd. I arbed arian, prynodd y brodyr fwyd a deunydd adeiladu yn lleol ac mewn swmp. Felly roedden nhw’n gallu osgoi costau cludiant uchel a chael gostyngiadau ar y pris.

 Roedd y cymorth yn cyffwrdd calonnau pobl Jehofa. Dywed Felisberto, brawd o Mosambîc: “Dw i erioed wedi gweld cyfundrefn yn rhoi cymaint o help: deunydd adeiladu a gweithwyr, cludiant, bwyd, ac arweiniad cariadus. Roedd y cymorth yn esiampl eithriadol o’r cariad brawdol mae’r Beibl yn ei ddisgrifio yn Ioan 13:34, 35.” Mae Ester yn wraig weddw sy’n byw ym Malawi. Cafodd ei thŷ ei ddinistrio yn y storm, ond mae hi’n dweud: “Ro’n i’n anobeithio’n llwyr oherwydd doedd gen i ddim digon o arian i godi tŷ arall. Felly pan ddaeth y brodyr ac adeiladu un newydd imi, ro’n i’n teimlo bod y Baradwys wedi cyrraedd.”

 Wrth i’r byd newydd agosáu, rydyn ni’n disgwyl gweld mwy o drychinebau. (Mathew 24:7, 8) Ond, diolch i’ch cyfraniadau hael, rydyn ni’n hyderus y bydd pobl Jehofa’n cael y cymorth sydd ei angen. Mae rhai ffyrdd y gallwch chi gyfrannu yn cael eu hesbonio ar donate.pr418.com. Diolch o’r galon am eich haelioni.