Roedd cynhadledd ranbarthol 2020 yn hanesyddol—ein cynhadledd fyd-eang gyntaf i gael ei recordio a’i drosglwyddo dros y rhyngrwyd! Ond ym Malawi a Mosambîc, gwnaeth y rhan fwyaf o’n brodyr a’n chwiorydd wrando ar y gynhadledd heb ddefnyddio’r Rhyngrwyd. Sut roedd hyn yn bosib?

 Fel eithriad, cafwyd caniatâd gan Bwyllgor y Cydlynwyr a Phwyllgor Addysgu’r Corff Llywodraethol i ddarlledu’r gynhadledd dros deledu a radio ym Malawi a Mosambîc. Pam roedd angen y fath eithriad? Mae costau data Rhyngrwyd ym Malawi ymhlith y rhai drutaf yn y byd, ac felly ychydig iawn o Dystion sydd yn gallu cael mynediad i’r Rhyngrwyd. Esboniodd William Chumbi aelod o Bwyllgor Cangen Malawi: “Radio a theledu oedd yr unig ffyrdd i’n brodyr a’n chwiorydd allu wrando ar y gynhadledd.” Mae Luka Sibeko, sydd hefyd yn gwasanaethu ar Bwyllgor Cangen Malawi yn ychwanegu: “Petasai hi ddim wedi bod yn bosib i’w chael dros y teledu a’r radio, dim ond ychydig o’r brodyr yn nhiriogaeth y gangen fyddai wedi elwa o’r gynhadledd.” Yr un oedd yr hanes ym Mosambîc; ychydig iawn o frodyr fyddai wedi gallu fforddio dyfais electronig, heb sôn am y Rhyngrwyd.

 Oherwydd y pandemig COVID-19, roedd rhai o’r gorsafoedd teledu a radio eisoes yn darlledu cyfarfodydd cynulleidfaol. a Cysylltodd ein brodyr â’r gorsafoedd hyn a gofynnon nhw am amser ychwanegol i ddarlledu’r gynhadledd.

 Ym Malawi, roedd ein brodyr mewn sefyllfa anodd. Fel arfer mae gorsafoedd darlledu yn cyfyngu cwsmeriaid i un awr o ddarlledu yn unig. Mae gorsafoedd yn poeni na fydd rhaglenni hirach yn cadw sylw’r gynulleidfa. Ond esboniodd ein brodyr fod y gwaith yn wasanaeth cyhoeddus. Hyd yn oed o dan y cyfnod clo, rydyn ni’n rhoi i bobl newyddion da o’r Beibl i’w cysuro, sy’n helpu pobl i fod yn ddinasyddion da a chael bywyd teuluol hapus. O glywed hyn derbyniodd y gorsafoedd gais y brodyr am amser darlledu ychwanegol.

 Ym Malawi, cafodd y gynhadledd ei darlledu gan un orsaf deledu ac un orsaf radio, ill dau yn darlledu yn genedlaethol gyda’r potensial o gyrraedd miliynau o bobl. Ym Mosambîc, cafodd y gynhadledd ei darlledu gan un orsaf deledu ac 85 o orsafoedd radio.

 Yn y ddwy wlad, cafodd cyfanswm o £20,630 ei wario ar ddarlledu’r gynhadledd dros y teledu a bron i £15,000 i ddarlledu dros y radio. Gwnaeth y costau amrywio o £11 am orsaf fach i £2,030 am orsaf genedlaethol.

 Gweithiodd y brodyr yn galed i wneud y defnydd gorau o’r cyfraniadau. Ym Malawi, er enghraifft, roedden nhw’n gallu bargeinio am brisiau is gan gynnwys un gostyngiad o 30 y cant. Gwnaeth y gostyngiadau hyn arbed cyfanswm o £1,251. Ym Mosambîc, roedd rhai gorsafoedd yn fodlon gostwng eu prisiau oherwydd ein henw da am fod yn onest a thalu’n biliau’n brydlon.

 Roedd ein brodyr yn ddiolchgar iawn i allu gwylio neu wrando ar y gynhadledd ar orsafoedd lleol. Dywedodd Patrick, henuriad o Malawi: “’Dyn ni’n diolch i frodyr y Corff Llywodraethol am bopeth maen nhw wedi ei wneud droston ni yn ystod y pandemig.” Dywedodd Isaac, sydd hefyd ym Malawi: “Does gynnon ni ddim dyfeisiau eraill, felly roedden ni’n ddiolchgar iawn am ddarpariaeth arbennig cyfundrefn Jehofa o allu gwrando ar y gynhadledd dros y radio. O ganlyniad i hyn mae fy holl deulu wedi elwa o’r gynhadledd. I ni, roedd hyn yn brawf amlwg o gariad Jehofa tuag at ei bobl.”

 I un cyhoeddwr ym Mosambîc roedd cynhadledd 2020 yn gynhadledd gyntaf iddo. Dywedodd: “Roedd y trefniant i wylio’r gynhadledd ar y teledu yn fy atgoffa mai Jehofa yw’r hollalluog Dduw. Wnaeth y pandemig ddim ei rwystro Ef rhag rhoi bwyd ysbrydol inni a’i weini yn syth i fy ystafell fyw. Gwelais dystiolaeth o’r cariad sydd ymhlith pobl Jehofa. Dw i’n gwbl sicr mai hwn yw’r gwir grefydd.”

 Dywedodd henuriad o’r enw Wyson: “Hoffwn i ddiolch am y ffordd mae’r gwas ffyddlon a chall wedi gofalu amdanon ni yn ystod y pandemig. Mae’r ddarpariaeth o gael y gynhadledd dros radio a theledu wedi helpu llawer ohonon ni yn y rhan dlawd hon o’r byd i gael y rhaglen, ac i elwa ohoni.”

 Ar gyfer cynhadledd ranbarthol 2021, mae’r pwyllgorau Cydlynwyr ac Addysgu unwaith eto wedi gwneud eithriad er mwyn i’r gynhadledd gael ei darlledu dros deledu a radio mewn cymunedau penodol. Sut rydyn ni’n gallu talu’r costau o redeg y gynhadledd fel hyn? Drwy gyfraniadau tuag at y gwaith byd-eang, llawer ohonyn nhw sydd wedi cael eu gwneud drwy’r dulliau gwahanol sydd i’w cael ar donate.pr418.com. Diolch am eich cyfraniadau hael.