1-3. (a) Beth bynnag yw ein hamgylchiadau, beth ddylai ein blaenoriaeth fod? (b) Pa heriau penodol mae rhywun sy’n dysgu iaith newydd yn eu hwynebu, a pha gwestiynau sy’n codi? (Gweler y llun agoriadol.)

MAE miloedd o Dystion Jehofa heddiw yn helpu i gyflawni’r weledigaeth ynglŷn â phregethu’r newyddion da “i bob cenedl, a llwyth, ac iaith, a phobl.” (Dat. 14:6) A wyt ti ymhlith y rhai sy’n dysgu iaith newydd? A wyt ti’n gwasanaethu fel cenhadwr, neu mewn gwlad dramor lle mae angen mwy o help? Neu, a wyt ti wedi dechrau mynychu cyfarfodydd mewn iaith arall yn dy famwlad?

² Fel gweision Duw, mae angen i bob un ohonon ni flaenoriaethu iechyd ysbrydol ni’n hunain a’n teuluoedd. (Math. 5:3) Ond, ar adegau, gall fod yn anodd gwneud ein hastudiaeth bersonol yn ystyrlon oherwydd ein bod ni mor brysur. Ond mae’r rhai sy’n gwasanaethu mewn maes arall yn wynebu heriau eraill hefyd.

³ Yn ychwanegol i ddysgu iaith newydd, mae’r rhai sy’n gwasanaethu mewn maes arall hefyd yn gorfod bwydo eu calonnau’n rheolaidd â bwyd ysbrydol solet. (1 Cor. 2:10) Sut gallan nhw wneud hynny os nad ydyn nhw’n deall yn iawn yr iaith  sy’n cael ei siarad yn y gynulleidfa? A pham dylai rhieni Cristnogol sicrhau bod Gair Duw yn cyffwrdd â chalonnau eu plant?

4. Beth all fygwth ein hysbrydolrwydd? Rho enghraifft.

⁴ Gall methu deall Gair Duw mewn iaith arall fygwth ein hiechyd ysbrydol. Yn y bumed ganrif COG, roedd Nehemeia yn pryderu oherwydd nad oedd rhai o’r plant a ddychwelodd gyda’r Iddewon o Fabilon yn siarad yr iaith Hebraeg. (Darllen Nehemeia 13:23, 24.) Roedd y plant hyn yn colli eu hunaniaeth fel gweision Duw oherwydd nad oedden nhw’n deall Gair Duw yn iawn.—Neh. 8:2, 8.

5, 6. Beth mae rhai rhieni sy’n gwasanaethu yn y maes ieithoedd eraill wedi ei sylweddoli, a pham?

⁵ Mae rhai rhieni sy’n gwasanaethu yn y maes ieithoedd eraill wedi dod i sylweddoli bod eu plant wedi dechrau colli diddordeb yn y gwir. Oherwydd nad oedd y plant yn deall yn iawn beth roedd yn cael ei ddweud yn y cyfarfodydd, doedd y rhaglen ysbrydol yn y neuadd ddim yn cyffwrdd â’u calonnau. “Dylai trafod pethau ysbrydol,” meddai Pedro, ^[1] a symudodd o Awstralia i Dde America gyda’i deulu, “effeithio ar y galon a’r emosiynau.”—Luc 24:32.

⁶ Wrth ddarllen mewn iaith arall, mae’n bosibl na fyddai’r galon yn cael ei chyffwrdd fel y byddai petaen ni’n darllen yn ein mamiaith. Ar ben hynny, gall peidio â chyfathrebu’n dda mewn iaith arall ein blino’n feddyliol ac yn ysbrydol. Felly, tra ein bod ni’n cadw’r awydd i wasanaethu Jehofa yn y maes ieithoedd eraill, mae angen inni amddiffyn ein hiechyd ysbrydol.—Math. 4:4.

7. Sut roedd y Babiloniaid yn ceisio integreiddio Daniel i mewn i’w diwylliant a’u crefydd?

⁷ Pan alltudiwyd Daniel a’i ffrindiau, ceisiodd y Babiloniaid eu hintegreiddio nhw i mewn i’w diwylliant drwy ddysgu “iaith y Caldeaid” iddyn nhw. Hefyd, rhoddodd y prif swyddog, a oedd yn gyfrifol am eu hyfforddiant, enwau Babilonaidd arnyn nhw. (Dan. 1:3-7) Roedd yr enw a roddwyd i Daniel yn cyfeirio at Bel, prif dduw Babilon. Mae’n debyg fod y Brenin Nebuchadnesar eisiau rhoi’r argraff i Daniel fod Jehofa wedi cael ei ddarostwng gan dduw Babilon.—Dan. 4:8.

8. Beth oedd yn helpu Daniel i gadw ei iechyd ysbrydol tra oedd yn byw mewn gwlad estron?

⁸ Er y cynigiwyd i Daniel fwyd a gwin o fwrdd y brenin, “penderfynodd Daniel beidio â’i halogi ei hun.” (Dan. 1:8) Oherwydd bod Daniel wedi darllen “yr ysgrifau sanctaidd” yn ei famiaith, cadwodd ei iechyd ysbrydol tra oedd yn byw mewn gwlad estron. (Dan. 9:2, beibl.net) Felly, ar ôl tua 70 mlynedd o fyw ym Mabilon, roedd yn dal yn cael ei adnabod wrth ei enw Hebraeg.—Dan. 5:13.

9. Pa effaith gafodd Gair Duw ar ysgrifennwr Salm 119?

⁹ Roedd darllen Gair Duw yn helpu ysgrifennwr Salm 119 i fod yn barod i sefyll allan yn wahanol. Roedd rhaid iddo ddioddef agwedd wawdlyd rhai o aelodau’r llys brenhinol. (Salm 119:23, 61) Ond eto, roedd yn caniatáu i eiriau Duw dreiddio’n ddwfn i’w galon.—Darllen Salm 119:11, 46.

10, 11. (a) Wrth astudio Gair Duw, beth yw ein nod? (b) Sut gallwn ni gyrraedd ein nod? Eglura.

¹⁰ Er ein bod ni’n brysur iawn gyda  chyfrifoldebau seciwlar a theocrataidd, mae angen i bob un ohonon ni neilltuo amser ar gyfer astudiaeth bersonol ac addoliad teuluol. (Eff. 5:15, 16) Ond dylen ni wneud mwy nag astudio hyn a hyn o dudalennau, neu astudio er mwyn cael atebion ar gyfer y cyfarfodydd yn unig. Rydyn ni eisiau sicrhau ein bod ni’n caniatáu i Air Duw gyrraedd ein calonnau a chryfhau ein ffydd.

¹¹ Er mwyn cyrraedd y nod hwnnw wrth astudio, dylen ni fod yn gytbwys o ran meddwl am anghenion pobl eraill a’n hanghenion ysbrydol ein hunain. (Phil. 1:9, 10) Wrth baratoi ar gyfer y weinidogaeth, y cyfarfodydd, neu ar gyfer anerchiadau, pwysig yw cydnabod nad ydyn ni, o reidrwydd, yn cymhwyso’r wybodaeth at ein sefyllfa bersonol ein hunain. Er enghraifft, er bod cogydd yn gorfod blasu’r bwyd y mae’n ei baratoi, ni all ei gynnal ei hun ar y bwyd y mae’n ei samplo. Er mwyn medru aros yn iach, mae angen iddo baratoi bwyd maethlon iddo ef ei hun. Yn yr un modd, dylen ni roi maeth i’r galon drwy ein bwydo ein hunain â bwyd ysbrydol sy’n diwallu ein hanghenion personol.

12, 13. Pam mae llawer sy’n gwasanaethu yn y maes ieithoedd eraill yn elwa ar astudio’n rheolaidd yn eu mamiaith?

¹² Mae llawer sy’n gwasanaethu yn y maes ieithoedd eraill yn elwa ar astudio’r Beibl yn rheolaidd yn eu hieithoedd eu hunain. (Act. 2:8) Mae hyd yn oed cenhadon yn cydnabod na allan nhw ddibynnu’n llwyr ar y bwyd sylfaenol y maen nhw’n ei gael yn y cyfarfodydd er mwyn aros yn ysbrydol gryf yn eu haseiniadau.

¹³ Mae Alain, sydd wedi bod yn dysgu Perseg ers tua wyth mlynedd, yn cyfaddef: “Pan ydw i’n paratoi ar gyfer y  cyfarfodydd yn y Berseg, rwy’n tueddu i ganolbwyntio ar yr iaith. Oherwydd fy mod i’n ceisio deall y testun, nid yw fy nghalon, o reidrwydd, yn cael ei chyffwrdd gan y pethau ysbrydol rwy’n eu darllen. Dyna pam rwy’n rhoi amser o’r neilltu yn rheolaidd i astudio’r Beibl a chyhoeddiadau eraill yn fy mamiaith.”

14. Beth dylai rhieni ei sicrhau, a pham?

¹⁴ Peth pwysig yw i rieni sicrhau bod Gair Duw yn cyffwrdd â chalonnau eu plant ac yn procio’r meddwl yn raddol. Ar ôl gwasanaethu yn y maes ieithoedd eraill am dros dair blynedd, roedd Serge a’i wraig, Muriel, yn sylweddoli nad oedd eu mab, a oedd yn 17 mlwydd oed, yn mwynhau gweithgareddau theocrataidd. “Roedd pregethu mewn iaith arall yn mynd o dan ei groen, ond cyn hynny, roedd wrth ei fodd yn pregethu yn ei famiaith, sef Ffrangeg,” dywedodd Muriel. “Pan oedden ni’n sylweddoli bod y sefyllfa yn atal ein mab rhag gwneud cynnydd ysbrydol,” eglurodd Serge, “gwnaethon ni benderfynu symud yn ôl i’n hen gynulleidfa.”

15. (a) Beth mae angen i rieni ei ystyried wrth benderfynu a ddylen nhw symud yn ôl i gynulleidfa sy’n defnyddio iaith y plant? (b) Pa anogaeth sydd yn Deuteronomium 6:5-7 ar gyfer rhieni?

¹⁵ Beth sydd angen i rieni ei ystyried wrth benderfynu a ddylen nhw symud yn ôl i gynulleidfa sy’n defnyddio’r iaith y mae’r plant yn ei deall orau? Yn gyntaf, mae angen iddyn nhw feddwl a oes ganddyn nhw’r amser a’r adnoddau i helpu’r plant i ddod i garu Jehofa ac i ddysgu iaith newydd ar yr un pryd? Yn ail, efallai y gwelon nhw fod gan y plant ddiffyg diddordeb mewn gweithgareddau ysbrydol neu yn y maes y maen nhw’n gwasanaethu ynddo. O dan amgylchiadau o’r fath, efallai y bydd rhieni’n ystyried symud yn ôl i gynulleidfa sy’n defnyddio’r iaith y mae’r plant yn ei deall orau nes eu bod nhw wedi eu sefydlu yn y gwir.—Darllen Deuteronomium 6:5-7.

16, 17. Sut mae rhai rhieni wedi llwyddo i hyfforddi eu plant tra eu bod nhw’n gwasanaethu yn y maes ieithoedd eraill?

¹⁶ Ar y llaw arall, mae rhai rhieni wedi darganfod ffyrdd o hyfforddi eu plant yn eu mamiaith a mynychu cyfarfodydd neu grŵp mewn iaith arall yr un pryd. Mae Charles, sy’n dad i dair o ferched rhwng 9 ac 13 blwydd oed, yn mynychu grŵp Lingala. Mae’n egluro: “Gwnaethon ni benderfynu cynnal sesiynau astudio a’r addoliad teuluol gyda’n plant yn ein mamiaith. Ond rydyn ni hefyd yn cynnwys sesiynau ymarfer a gemau yn Lingala fel eu bod nhw’n gallu dysgu’r iaith a chael hwyl.”

¹⁷ Gwnaeth Kevin, tad i ddwy o ferched sy’n bump ac yn wyth mlwydd oed, gymryd camau er mwyn gwneud yn iawn am eu diffyg dealltwriaeth o’r cyfarfodydd a oedd mewn iaith arall. Mae’n egluro: “Mae fy ngwraig a minnau yn cynnal astudiaeth bersonol gyda’r merched yn Ffrangeg, sef eu mamiaith. Hefyd, rydyn ni wedi gosod y nod o fynychu un cyfarfod Ffrangeg y mis, ac rydyn ni’n dal ar ein cyfle yn ystod ein gwyliau i fynychu cynhadledd yn ein hiaith ein hunain.”

18. (a) Pa egwyddor yn Rhufeiniaid 15:1, 2 a all dy helpu di i benderfynu beth sydd orau i’th blant? (b) Pa awgrymiadau mae rhieni eraill wedi eu cynnig? (Gweler yr ôl-nodyn.)

¹⁸ Wrth gwrs, mae angen i bob teulu benderfynu beth fydd y peth gorau ar gyfer iechyd ysbrydol y plant. ^[2] (Gal. 6:5) Mae Muriel, a ddyfynnir gynt, yn cyfaddef ei bod hi a’i gŵr wedi gorfod aberthu beth roedden nhw eisiau ei wneud er mwyn helpu eu mab yn ysbrydol. (Darllen Rhufeiniaid 15:1, 2.) O edrych  yn ôl, mae Serge yn teimlo eu bod nhw wedi gwneud y penderfyniad iawn. Mae’n dweud: “O’r amser pan symudon ni yn ôl i’r gynulleidfa Ffrangeg, roedd ein mab yn ffynnu’n ysbrydol a chafodd ei fedyddio. Heddiw, mae’n gwasanaethu fel arloeswr llawn amser. Ac mae hyd yn oed yn ystyried symud i grŵp iaith arall!”

19, 20. Sut gallwn ni ddangos ein cariad tuag at Air Duw?

¹⁹ Oherwydd ei gariad, mae Jehofa wedi sicrhau bod ei Air, y Beibl, ar gael mewn cannoedd o ieithoedd fel bod “pob un yn cael ei achub” ac yn “dod i ganfod y gwirionedd.” (1 Tim. 2:4) Mae’n gwybod y gall pobl ddiwallu eu hanghenion ysbrydol yn well pan fyddan nhw’n darllen y Beibl yn eu mamiaith.

²⁰ Ond beth bynnag yw ein hamgylchiadau personol, dylen ni fod yn benderfynol o fwydo ein calonnau â bwyd ysbrydol solet. Drwy ddarllen yr Ysgrythurau’n rheolaidd yn iaith ein calon, byddwn ni’n cadw ein hiechyd ysbrydol yn ogystal â iechyd ysbrydol ein teulu, a byddwn ni’n dangos i Dduw ein bod ni’n trysori ei eiriau.—Salm 119:11.