Beth Yw Ystyr Hyn?
Beth Yw Ystyr Hyn?
DYWEDODD Iesu Grist mai nodwedd cyfnod “gorpheniad yr oes” fyddai rhyfel, adegau newyn, plâu, a daeargrynfâu.—Mathew 24:1-8 [Y Beibl Cyssegr-Lan, 1908, troednodyn]; Luc 21:10, 11.
Ers 1914 mae ansawdd bywyd wedi dirywio yn sgil rhyfeloedd rhwng cenhedloedd a rhwng grwpiau ethnig, yn aml o ganlyniad i glerigwyr yn ymyrryd mewn gwleidyddiaeth, ond yn fwy diweddar o ganlyniad i ymosodiadau brawychwyr ar raddfa eang.
Er gwaethaf datblygiadau gwyddonol, mae cannoedd o filiynau o bobl yn fyd-eang yn brin o fwyd. Mae newyn yn lladd miliynau bob blwyddyn.
Yn ogystal, mae plâu neu epidemigau afiechydon heintus, yn rhan o’r arwydd roddodd Iesu. Yn dilyn Rhyfel Byd I, lladdodd epidemig ffliw 21,000,000 a rhagor o bobl. Tra roedd plâu’r gorffennol yn gymharol leol, ymledodd y ffliw hwn dros holl wledydd ac ynysoedd y byd. Heddiw mae AIDS yn cerdded y ddaear, a phlâu megis TB, malaria, dallineb afon (river blindness), ac afiechyd Chagas yn dal i boeni’r gwledydd datblygol.
Yn ôl pob sôn, mae degau o filoedd o ddaeargrynfâu, sy’n amrywio o ran eu cryfder, yn taro bob blwyddyn. Waeth beth fo’r offer sydd ar gael na’r dulliau gwell o gofnodi’r digwyddiadau, mae trychinebau mewn mannau poblog o ganlyniad i ddaeargrynfâu yn cael sylw amlwg yn y newyddion.
Yn ogystal, fe ragfynegodd y Beibl: “Rhaid iti ddeall hyn, fod amserau enbyd i ddod yn y dyddiau diwethaf. Bydd pobl yn hunangar ac yn ariangar, yn ymffrostgar a balch a sarhaus, yn anufudd i’w rhieni, yn anniolchgar ac yn ddigrefydd. Byddant yn ddi-serch a digymod, yn enllibus a dilywodraeth ac anwar, heb ddim cariad at ddaioni. Bradwyr fyddant, yn ddi-hid, yn llawn balchder, yn caru pleser yn hytrach na charu Duw, yn cadw ffurf allanol crefydd ond yn gwadu ei grym hi. Cadw draw oddi wrth y rhain.”—2 Timotheus 3:1-5.
Oni fyddech chi’n cytuno ein bod ni’n byw mewn “amserau enbyd”?
Ydych chi wedi sylwi fel mae pobl yn eithafol o hunanol, yn ariangar, ac yn llawn balchder?
Onid ydi pobl heddiw yn mynnu popeth iddynt eu hunain, yn anniolchgar, yn anheddychol, ac yn annheyrngar?
Ydych chi’n sylwi fel mae anufudd-dod i rieni ynghyd ag anghyfeillgarwch ar gynnydd, nid yma ac acw ond ar hyd a lled y ddaear?
Mae’n amlwg ein bod ni’n byw mewn byd sy’n feddw ar bleser ac yn brin o weithredoedd daionus. Dyna sut y disgrifia’r Beibl agwedd pobl yn ystod “y dyddiau diwethaf.”
Oes angen rhagor o brawf i nabod y cyfnod rydym yn byw ynddo? Ynglŷn â’r union gyfnod hwnnw fe ragfynegodd Iesu y byddai newydd da Teyrnas Dduw yn cael ei bregethu i bobl y byd. (Mathew 24:14) Ydi hynny’n digwydd?
Mae The Watchtower, cylchgrawn sy’n seiliedig ar y Beibl ac sydd â’r amcan o gyhoeddi newydd da Teyrnas Jehofah, yn cael ei argraffu’n gyson mewn rhagor o ieithoedd nag unrhyw gyfnodolyn arall.
Bob blwyddyn, mae Tystion Jehofah yn treulio dros biliwn o oriau yn tystiolaethu’n bersonol i eraill am Deyrnas Dduw.
Ar hyn o bryd cyhoeddir llenyddiaeth Feiblaidd ganddynt mewn tua 400 iaith, gan gynnwys ieithoedd sy’n cael eu darllen gan boblogaethau pellennig a bychain. Drwy gyfrwng gwaith Tystion Jehofah, mae’r newydd da wedi cyrraedd pob cenedl, gan gynnwys ynysoedd a thiriogaethau sy’n rhy fychan i haeddu arwyddocâd gwleidyddol. Yn y rhan fwyaf o’r gwledydd hyn maen’ nhw’n cynnal rhaglen addysg Feiblaidd reolaidd.
Yn wir, mae newydd da Teyrnas Dduw yn cael ei bregethu i bobl y ddaear, nid er mwyn achub y byd, ond er tystiolaeth. Mae pawb ym mhobman yn cael cyfle i ddangos eu hagwedd at yr Un a greodd y nefoedd a’r ddaear, ac i ddangos pa mor barod maen’ nhw i barchu’i ddeddfau ac i ymddwyn yn gariadus at eu cyd-ddyn.—Luc 10:25-27; Datguddiad 4:11.
Cyn bo hir, mi fydd Teyrnas Dduw yn sicrhau glendid ar y ddaear a’i throi’n baradwys fyd-eang yn rhydd oddi wrth ddylanwad y drygionus.—Luc 23:43.
[Blwch ar dudalen 6]
Dyddiau Diwethaf Beth?
Nid dyddiau diwethaf y ddynoliaeth. Mae’r Beibl yn cynnig sail gobaith byw am byth i’r rhai sy’n gwneud ewyllys Duw.—Ioan 3:16, 36; 1 Ioan 2:17.
Nid dyddiau diwethaf y ddaear chwaith. Mae Gair Duw yn addo y bydd y ddaear yn breswylfa i’w thrigolion am byth.—Salm 37:29; 104:5; Eseia 45:18.
Yn hytrach, yr hyn sydd dan sylw ydi dyddiau diwethaf y drefn bresennol dreisgar, ddigariad a’r rhai sy’n glynu wrth ei ffyrdd hi.—Diarhebion 2:21, 22.
[Blwch/llun ar dudalen 7]
Ai Gair Duw yn Wir Yw’r Beibl?
Dro ar ôl tro, ysgrifennodd proffwydi’r Beibl: “Dyma’r hyn a ddywed yr ARGLWYDD.” [“Iafe (Yahweh)”, xxix ] (Eseia 43:14; Jeremeia 2:2) Mi bwysleisiodd Iesu Grist, Mab Duw, ‘nad ohono’i hun yr oedd yn llefaru.’ (Ioan 14:10) Fe ddywed y Beibl yn gwbl amlwg fod “pob Ysgrythur wedi ei hysbrydoli gan Dduw.”—2 Timotheus 3:16.
Does dim un llyfr arall yn cael ei gyhoeddi mewn cymaint o ieithoedd—dros 2,200, yn ôl yr United Bible Societies. Does gan dim un llyfr arall gylchrediad mor eang—dros bedwar biliwn copi a rhagor. Onid dyna fyddech chi’n ei ddisgwyl gan neges oddi wrth Dduw i’r holl ddynolryw?
Os hoffech drafodaeth lawnach am y dystiolaeth mai Duw ysbrydolodd y Beibl, gweler y llyfr The Bible—God’s Word or Man’s?, a gyhoeddir gan Dystion Jehofah.
Os derbyniwch yn werthfawrogol mai Gair Duw yw’r Beibl, fe gewch chi fudd mawr o’i ddarllen.
[Blwch/lluniau ar dudalen 8]
Beth Yw Teyrnas Dduw?
Llywodraeth nefol ydyw sy’n fynegiant o frenhiniaeth y gwir Dduw, Jehofah, Creawdwr nefoedd a daear.—Jeremeia 10:10, 12.
Yn ôl y Beibl, Iesu Grist yw’r un sy’n derbyn gan Dduw yr awdurdod i lywodraethu. (Datguddiad 11:15) Pan oedd Iesu ar y ddaear, roedd yn amlwg ei fod eisoes wedi derbyn awdurdod aruthrol gan Dduw—awdurdod i reoli’r elfennau naturiol, i wella pob math o afiechydon, a hyd yn oed awdurdod i godi’r meirw. (Mathew 9:2-8; Marc 4:37-41; Ioan 11:11-44) Mynegwyd trwy broffwydoliaeth ysbrydoledig y Beibl y byddai Duw hefyd yn rhoi iddo: “arglwyddiaeth a gogoniant a brenhiniaeth, i’r holl bobloedd o bob cenedl ac iaith ei wasanaethu.” (Daniel 7:13, 14) Teyrnas nefoedd yw enw’r llywodraeth honno; o’r nef mae Iesu nawr yn gweithredu ei frenhiniaeth.
[Lluniau ar dudalen 7]
Pregethu’r newydd da yn fyd-eang