Y Llyfr Ehangaf Ei Ddosbarthiad Yn Y Byd

“Y Beibl yw’r llyfr gyda’r darllen ehangaf arno yn holl hanes. . . . Dosbarthwyd mwy o gopïau o’r Beibl nag o unrhyw lyfr arall. Cyfieithwyd y Beibl hefyd mwy o weithiau, ac i fwy o ieithoedd, nag unrhyw lyfr arall.”—“The World Book Encyclopedia.”1

I RYW raddau, mae’r rhan fwyaf o lyfrau fel pobl. Maen’ nhw’n ymddangos, yn tyfu o ran poblogrwydd efallai, ac—onibai am lond dwrn o glasuron—yn mynd yn hen a marw. Yn aml mae llyfrgelloedd fel mynwentydd i nifer di-ri’ o lyfrau sydd wedi hen ddarfod, heb fod wedi cael eu darllen ac, i bob pwrpas, yn farw.

Mae’r Beibl, fodd bynnag, yn arbennig hyd yn oed ymhlith gweithiau clasurol. Er bod ei darddiad ysgrifenedig yn mynd yn ôl 3,500 mlynedd, mae’n dal i fod yn fyw iawn. Dyma’r llyfr sydd â’r cylchrediad ehangaf iddo ar y ddaear o bell ffordd. * Bob blwyddyn, dosberthir tua 60 miliwn copi o’r Beibl cyfan neu rannau ohono. Daeth yr argraffiad cyntaf a argraffwyd â phrint symudol o wasg argraffu y dyfeisiwr o’r Almaen Johannes Gutenberg tua 1455. Oddi ar hynny amcangyfrifir i bedwar biliwn o Feiblau (yn gyfan neu’n rhannau ohono) gael eu hargraffu. ’Does dim un llyfr, crefyddol neu fel arall, hyd yn oed yn cystadlu â hyn.

Y Beibl hefyd yw’r llyfr y bu mwyaf o gyfieithu arno mewn hanes. Cyfieithwyd yr holl Feibl neu rannau ohono i ragor na 2,100 o ieithoedd a thafodieithoedd. * Mae o leiaf rhan o’r Beibl o fewn cyrraedd dros 90 y cant o’r teulu dynol yn eu hiaith eu hunain.² Mae’r llyfr hwn felly wedi croesi ffiniau cenedlaethol ac wedi goresgyn rhwystrau hiliol ac ethnig.

Efallai nad yw ystadegau moel yn ddigon i’ch cymell i archwilio’r Beibl. Fodd bynnag, mae’r ffigyrau cylchrediad a chyfieithu yn drawiadol, yn tystio i apêl byd-eang y Beibl. Yn sicr mae’r llyfr sydd â’r gwerthu mwyaf iddo ac sydd â’r cyfieithu mwyaf arno yn holl hanes dyn yn haeddu’ch ystyriaeth chi.

[Troednodiadau]

[Llun ar dudalen 6]

Beibl Gutenberg, yn Lladin, y llyfr cyflawn cyntaf i’w argraffu â phrint symudol