Rydyn ni’n parchu’r pethau mae gwyddoniaeth wedi eu cyflawni ac yn derbyn canfyddiadau gwyddonol sydd â thystiolaeth yn gefn iddyn nhw.

 Mae Gweiadur yn diffinio gwyddoniaeth fel “cangen o wybodaeth neu astudiaeth sy’n gallu cael ei threfnu’n systematig ac sy’n dibynnu, fel arfer, ar brofi ffeithiau a dod o hyd i ddeddfau naturiol ein byd.” Nid gwerslyfr gwyddoniaeth yw’r Beibl, ond mae’n annog pobl i astudio byd natur ac i fanteisio ar ddarganfyddiadau gwyddonol. Ystyriwch rai enghreifftiau:

•   Seryddiaeth: “Edrychwch i fyny ar y sêr! Pwy wnaeth eu creu nhw? Pwy sy’n eu galw nhw allan bob yn un? Pwy sy’n galw pob un wrth ei enw?”​—Eseia 40:26.

•   Bioleg: “Byddai [Solomon yn] sôn am y coed, o’r cedrwydd yn Lebanon i’r isop sy’n tyfu ar y wal; byddai hefyd yn sôn am yr anifeiliaid, yr adar, yr ymlusgiaid, y pryfed, a’r pysgod.”​—1 Brenhinoedd 4:33.

•   Meddygaeth: “Does dim angen meddyg ar y rhai sy’n iach, ond mae angen un ar y rhai sy’n sâl.”​—Luc 5:​31.

•   Meteoroleg: “Wyt ti wedi bod i mewn i stordai’r eira, neu wedi gweld y storfeydd o genllysg . . .? O ble daw gwynt y dwyrain i chwythu drwy’r byd?”​—Job 38:22-​24.

 Mae ein cyhoeddiadau’n hyrwyddo parch tuag at wyddoniaeth drwy gynnwys erthyglau ar y byd natur ac ar gyflawniadau gwyddonol. Mae’r Tystion yn annog eu plant i gael addysg er mwyn iddyn nhw ddeall y byd o’u cwmpas yn well. Mae nifer o Dystion Jehofa yn gweithio mewn meysydd gwyddonol, gan gynnwys biocemeg, mathemateg, a ffiseg.

 Dydyn ni ddim yn credu bod gwyddoniaeth yn gallu ateb pob un o’n cwestiynau. a Er enghraifft, mae daearegwyr yn astudio beth yw’r ddaear ei hun, ac mae biolegwyr yn astudio sut mae’r corff yn gweithio. Ond pam mae’r ddaear mor berffaith ar gyfer bywyd, a hynny o fewn terfynau cyfyngedig iawn? A pham mae aelodau’r corff yn cydweithio mor effeithiol?

 Rydyn ni wedi dod i’r casgliad mai dim ond y Beibl all roi atebion boddhaol i’r cwestiynau hynny. (Salm 139:13-​16; Eseia 45:18) Felly rydyn ni’n credu bod addysg dda yn golygu dysgu am wyddoniaeth ac am y Beibl.

 Ar adegau, mae’n ymddangos fel petai gwyddoniaeth yn anghytuno â’r Beibl. Ond camddeall y Beibl sy’n gyfrifol am yr argraff hon yn aml. Er enghraifft, nid yw’r Beibl yn dysgu bod y ddaear wedi ei chreu o fewn chwe diwrnod 24-awr.​—Genesis 1:1; 2:4.

 Yn achos rhai damcaniaethau gwyddonol, er bod llawer yn eu derbyn, mae nifer o wyddonwyr uchel eu parch yn eu gwrthod oherwydd diffyg tystiolaeth. Er enghraifft, gan fod cynllun bwriadol i’w weld ym myd natur, rydyn ni’n cytuno â llawer o fiolegwyr, cemegwyr, ac eraill sydd wedi dod i’r casgliad nad yw pethau byw wedi esblygu drwy broses o fwtaniadau ar hap a dethol naturiol.