˗Bhɔkwëë ˈkpii˗ ˗nu kë ˗sü ˈö ˗bhɔkwëëkëdhɛ ˗nu ˈgü ˗wo ˈduannu ˗kwɛ 2020 Masö ˈˈsu ˈgü korona ˗wɔn ˈgü. ˗Kwɛ ˈö yö ˗a ˈka, ˗bhɔkwëë ˈkpii˗ ˗nu ‹˗Kwa kwa zuʋ̈ˈˈ kë ˗saa›! ˈwo ꞊mɔɔn 6.000 ˗bha, ˗wo ˗dho kë ˈˈkpɔnŋtaadhɛ ˗todhʋ̈sü ˈgü ˗wo ˈö ˗ʒiö ˗wo 500 ˗ta ˗an ˈgü. ˗Bhɔkwëë ˈkpii˗ ˗nu ˈwo bhë, ˗a ˗blɛɛsü ˗yö ˗kë ˗kwɛ 2023 ˈMɛn 12 ˈö ˈdho ˈö yö˗ ˈka ˗a ˈˈsu ˗dhɛkpaɔyi 14 ˗bha.

Mɛn ˗nu ˈö ˈwo ʒiö mɛn 1.800 ˗ta ˈnën ˈö ˈwo kun ˗bhɔkwëë ˈkpii˗ ˈö bhë ˗a ˗ta Zoova ˗bha ꞊Gbɛkiö ˗nu ˗bha ˗bhɔkwëë ˈkpii˗ ˗nu kë ˗dhɛ ˈö Nubuugö, Nuyɔɔkö, Zeta zuni bhë, ˗a ˈgü. Pë ˈö kwa ꞊dhegblüdhe Klisitinö Torɛsö ˈö kun ˗an kpö ˈgü ˈö˗ pö, yö ꞊nɛɛn: «˗Dhɛ ˈö ˗bhɔkwëë bhë ˗a ˈˈdhiʋ̈sümɛn ˈö˗ pö ‹˗Ka ꞊sɛɛ˗ ˈˈta ˗bha,› mɛn ꞊gban ˈˈpɛpɛ ˗ya wo ˈˈkwɛɛ ˈkun ˗sü ˗bha. Mɛn ꞊gban yi zuʋ̈ˈˈ ꞊nii ˗kun ˗da ˗sü ˈka ˗kë ˗bhɔkwëë ˈö bhë, ˗a ˗ta ˗sü ˗bha.» Pë ˈö kwa ꞊dhegblü Duanö Simifö ˈö kun ˗bhɔkwëë bhë ˗a ˗ta ˈpö ˈö˗ pö, yö ꞊nɛɛn: «Zuʋ̈gblüdhidhe ˈö kun ˗bhɔkwëë bhë ˗a ˗ta, ˗yö ˗kun ˗së ꞊dedewo. Kwa ꞊dhegblü ˗nu ˗bhaa ˗kë wo ˈko ꞊bhaa ˗sü ˗kun ˗an ˗dhɛ ˈˈdhiasü.»

Kwa ꞊dhegblüdhe do ˈö ˈwo˗ ˗dhɛ Dɔsemasikolo, ˗yö ˗bɔ ˈˈyi ꞊bhaa korona ˈˈtʋ̈ŋ ˈka. ˈYii ˗bhɔkwëë ˈkpii˗ kë do ˗bhɔkwëëkëdhɛ ˗nu ˈgü. ˗Dhɛ ˈö go ˗bhɔkwëë ˈkpii˗ bhë ˗a ˗ta, pë ˈö˗ pö, yö ꞊nɛɛn: «Zuʋ̈gblüdhi waa ˗dhɔ ˈö ˈwo kun ˗bhɔkwëë ˈkpii˗ bhë ˗a ˗ta bhë, ˗wa ˗kë ˈö ˗kë n ˈgü ꞊dhɛ ˈpë ˈman ˗kpan n ˈˈtɔŋdhe ˈˈgbɩɩ˗ ˈbha ˈö yi ˈˈɲan ˗go yi ˈko ˗bha ˗sü yi ꞊ya ꞊gɔɔ, ˗a ˈdhö.» Kwa ꞊dhegblüdhe do ˈö˗ ˗kwɛ ˈdhö ˗kɔŋ do ö ga ˈˈsaaga, ˈö ˈwo˗ ˗dhɛ Noemi Tinaʒero ˈö bɔ ˈˈyi ꞊bhaa ˗kwɛ ˈö yö ˗a zübhodhɛ ˈka bhë, ˗ya ˗pö: «A ˗kpan ˈkɔdhidogümɛn ˗nu waa ˈˈtɔŋdë ˗nu ˗bha kö ˗wo zuʋ̈niidadhe ꞊dede ˈgü. [...] ˗Yö ˗kun ꞊dhɛ ˈpë ˈyi ˈˈkpɔnŋtaadhɛ ˗dɛɛ ˈgü ˗a ˈdhö.»

Mɛn ꞊vadhɛ ˗wa ˗pö ꞊dhɛ ˗bhɔkwëë ˈkpii˗ ˈö bhë, ˗a ˗gɔ ˗yö ˗së. Pë ˈö kwa ꞊dhegblü Samö Uu ˈö˗ pö, yö ꞊nɛɛn: «Pë ˈbha ˈö˗ kë ˗sü ˈdhö ˈˈgbɩɩ˗ mɛn ꞊vadhɛ yi ˗gɔ ˈyö ˗tɔ yi zuʋ̈ˈˈ ˗kë ˗saa ˗sü. ˗A ˗wɔn ˈgü ˗yö ˗kun ˗zobuödhe ˗së ˈö ˈyi ˗bhawɔn ˈdhö ˗a ˗bha kö ˈyi ʒiö Zoova ˗bha zuʋ̈saadhɛ ˈwɔnzuan ˈˈpiʋ̈ ˗a ˈka.» Kwa ꞊dhegblüdhe Flanshi Simifö ˗ya ˗pö: «˗Kɔ ˈö zuʋ̈saadhɛ ˗yö ˗gban ˗a ˈka ˈman ˗tosɛta kë ˗kɔ ꞊gban ˈˈpɛpɛ ˗bha, ˗bhɔkwëë ˈkpii˗ bhë ˗ya ˗zɔn n ˗dhɛ. ˗A ˈgüwɔn ꞊gban ˗kun ˗së.»

Mɛn ˈˈpɛpɛ ˈö ˈwo ˗mɔɔn ˗kë ˗bhɔkwëë ˈkpii˗ bhë ˗a ˗ta ˗sü ˗bha Nubuugö, Nuyɔɔkö bhë, ˗yö ˗kë ꞊faanmëndhe ꞊dede ˈka ˗an ˗bha ˈka. Kwa ˈˈɲan ˗yö ˈˈsu ˗nu ˈö ˈwo nu ˗ni ˈgü yö ˗an ˗gɔ, kö ˗zuugü ˗bhöpë ˗së ˈö ˈwo ꞊baa kwa ˗bhaa ˈka bhë, kwaa mɛn ˈˈmliɲɔn ꞊va ˈbha ˈkwa˗ bhö kwa ˈko ꞊bhaa kö ˈkwa˗ ꞊trɔɔn ˗së yö!—Psaume 122:1.