ˈDhɛ ˗kë ꞊dhɛ ˗zlanwopömɛn ˗nu ˗kun kë ˗ni ˈgü ꞊va, ˗an ˗bhawɔn ˗kun ˈsëëdhɛ ꞊va ˗bha. ˈˈSu ˗bha ˈsëëdhɛ ˗nu dosɛnŋ ˈnën kwa ꞊dhegblü kun ˗an ˈˈgan ˗ni ˈgü Betɛdhö Bluklinö, ˈyö ˈsëëdhɛ ˗be ˗nu ˗zë ˈwo ˗an nu soete ˗nu ˗dhɛ kö ˗wo ˗an ˈˈgan. ˈˈSu ꞊va ˈˈpiʋ̈, soete ˗nu ˈwaa kun ˗mɔn ˗ni ˈgü ˗a ˗bha kö ˈsëëdhɛ ˗be ˗nu ˈö kwa ꞊dhegblü ˗nu dho ˗zlanwopö ˗an ˈka ˗wa ꞊gban ˈˈgan. ˗A ˈwɔn ˈgü, kwa ꞊dhegblü Lutɛɛfɔdö ˗ya ˗pö Lobɛɛ Maatɛn ˈö kun kwa ˗bha ˈsëëdhɛ ˈˈgandhɛ ˈwɔnyëë˗ ˈka ˗a ˗dhɛ ꞊dhɛ ˗yö ö ˗zota kö ˗ya kë ꞊dhɛ wo ꞊mɔɔn˗ ˗bha ˈwo wo ˗de ˗bha ˈsëëdhɛ ˗be ˈˈgan Betɛdhö, ˗ya pö ö ˗dhɛ.

Kwa ꞊dhegblü Maatɛn ˗ya ˗pö: «˗Yö ˗kun ˈˈslö ˗së ꞊dede ˈka, ˈyö sü ꞊dhɛ ˗ya kë ˈˈdhʋ̈ yi ˗dho yi ˗de ˗bha ˈsëëdhɛ ˗be ˈˈgandhɛ ˈˈdhi ˈˈpʋ.» Kwa ꞊dhegblü ˗nu ˗wo ˗dho ˈwo wo ˗bha ˈsëëdhɛ ˈˈgandhɛ ˈˈdhi ˗pʋ Kɔnkɔɔdö Bluklinö, ˈwo go mü ˈwo wo ˗bha ˈsëëdhɛ ˗gan ˗a ˈka ꞊manŋzi dhɔ.

˗An ˗bha ˈsëëdhɛ ˗be ˗nu ˗gan wo ˗de ˈˈpiʋ̈ ˗sü ˈyaa kun mɛn ˈbha ˗nu ˗dhɛ ˗së. Soete do ˈö kun ˗an ˗bha ˈsëëdhɛ ˗be ˗nu ˈˈgan ˗ni ˈgü zii ˈka ˗be, ˗a ˗gɔmɛn ˗yö ˗nu yi do ˈka kö ˈö ˗an ˗bha ˈsëëdhɛ ˈˈgandhɛ ˗dɛɛ ˈö ˈˈdhʋ̈, ˗a ˗ga. ˗Ya ˗pö: «ˈSëëdhɛ ˗be ˈˈgan pë ˗së ꞊dede ˗yö ka ˗gɔ, ˈˈkɛɛ mɛn ˈbha ˈyaa yökë ˗an ˗ta ˗dhɛ dɔ ka kpö ˈgü. ˈÖ go yö ˈö yö ˈˈsu ˈˈsɔɔdo ˗bha kö ꞊manŋzi ˗nu ˈwo yö ˈka ˗an ꞊gban shiʋ̈ˈˈ.»

Maatɛn ˗ya ˗pö: «Pë ˈö gɔndënën ˗ya pö bhë, ˗a pö ˗dhɛ ˗mü. ˈˈKɛɛ yi ˗zë yi˗ ˈwɔn ˗dɔ ꞊dhɛ Zoova ˗dho yi ˗takun kö ˈyi ˗mɔn yökë ˗an ˈka ˗sü ˗bha. ˈÖ yi ˗takun ˈˈdhʋ̈ ꞊dedewo.» ˈPë Maatɛn ˗ya pö bhë, ˈyö˗ ˈka. ˗A yi ˈti ꞊gwëë ˈyö ˈwo ˗ya ˈsëëdhɛ ˗be 2.000 ˈˈgan ˗sü ˗bha ˗dhɛkpaɔyi do ˈgü.

˗Ya ˈˈkan ˗an ˗de ˗bha ˈsëëdhɛ ˗nu ˗yökë ˗sü ˗bha, Zoova ˗dhɔkëmɛn ˗nu ˗wo ˗bɔ ꞊ladio ˗ta ˈzü ˈwo ˗Zlan ˗bha ˗Gblüdëdhɛ ˗nɔɔn pö. ˗Kwɛ 1922 Fevlie 26 ˈˈdooka ˈka, ˈyö kwa ꞊dhegblü Lutɛɛfɔdö ˗yö ö ˗bha ˈˈdhɛtaadhiaŋ˗ ˗blɛɛsü ˈö˗ ˗gɔ ˗kë « Des  millions de personnes actuellement vivantes ne mourront jamais » ˈka bhë ˗a zë ꞊ladio ˈö Lɔsö Anʒelɛsö Zeta zuni, ˗a ˈgü.

Mɛn ˗nu ˈwo wo ˈˈtʋ to ˗a ˗bha ˗wo ˗da mɛn 25.000 ˈgü. ˗A mɛn ˈbha ˗nu ˗wo ˈsëëdhɛ ˗bɔ, ˈwo kwa ꞊dhegblü Lutɛɛfɔdö ˈˈnuɛ bho ˗a ˗bha ˈˈdhɛɛtadhiaŋ˗ ˗bha. Gɔndënën do ˈwo˗ ˗dhɛ Wilaadö Ashfɔdö ˈö kun Santa Ana, Kalifɔni ˈˈpian ˗ta, ˗yö ˈsëëdhɛ ˗bɔ ˈpö. ˗Yö kwa ꞊dhegblü Lutɛɛfɔdö ˈˈnuɛ ˗bho ˗a ˗bha ˈˈdhɛɛtadhiaŋ˗ ˗së ˈö bhë ˗a ˗bha, ˈö˗ pö: «Mɛn ˗yaaga ˈö ˈwaa wo ˈflëëgü ˈö ˈwaa ˗mɔn ˗yö ˈˈkpɛnŋ ˗sü ˗bha, ˗wo n ˗gɔ ˈkɔɔ. ˗A ˗wɔn ˈgü, ˈkö ˗kë ˗ʒiaanwo ꞊dhɛ ü ˈˈdhɛɛtadhiaŋ˗ ˗zë ˗dhɛ ˈbha ˈgü yi ˈˈsuee yö ˗be, yi ˗kɔ ˈti ˈdho ꞊mɔɔn˗ ˗bha kö ˈyi nu yi ˈˈtʋ ˈto ü ˗bha.»

ˈˈDhoogɔ ˗nu ˈwo dɔ ˗a ˈˈpiʋ̈, ˗wo ˈˈdhɛɛtadhiaŋ˗ ꞊va ˈbha ˗zë ˈzü. ˗Kwɛ 1922 ˈˈdhiʋ̈todhɛ ˈgü, ˗wa ˗pö ˈˈGlaadhiʋ̈ ˗tɔn ˈsëëdhɛ ˈgü ꞊dhɛ «ˈmɛn ˈwo wo ˈˈtʋ to nɔɔn˗ ˗së ˗bha ꞊ladio ˈgü, ˗wo ˗mɔn mɛn 300.000 ˗bha.»

ˈSëëdhɛ ˗nu ˈö mɛn ˗nu ˗wa bɔ ˈˈdhʋ̈, ˗yö Biblö draanmɛn ˗nu ꞊faanmën ꞊dedewo. ˗A ˗wɔn ˈgü, ˗wo wo ˗de ˗bha ꞊ladio ˈkɔ ˗dɔ Betɛdhö ˈö Bluklinö ˗a ˈˈsuee. -A ˗kwɛ ˗nu ˈwo dɔ ˗a ˈˈpiʋ, ˗wo ˗bɔ ꞊ladio ˈö bhë ˗a ˗ta ˈwo ˗Zlan ˗bha ˗Gblüdëdhɛ ˗nɔɔn pö mɛn ꞊va ˗dhɛ, ˗dhɛ ꞊gban ˈgü. ˗A ꞊ladio ˈö ˈˈdhʋ̈, ˗wo ˗kun ˗a ˗dhɛ ˗ni ˈgü WBBR.

ˈˈGlaadhiʋ̈ ˗tɔn ˈö yö ˈˈkpɛnŋ ˗kwɛ 1922 Ʒuɛn 15 ˈgü bhë, ˗ya ˗pö ꞊dhɛ ˗bhɔkwëë ˈkpii˗ do ˗dho kë Sedaa Poɛntö ˗kwɛ do ˈö bhë ˗a ˈgü Sɛtanblö 5˗13 ˗bha, ˗an ˈgü. ˈDhɛ Biblö draanmɛn ˗nu ˗wo dho Sedaa Poɛntö, ˗an zuʋ̈ˈˈ ˈˈgblü ˗kun dhi ˗sü ˈka ꞊dedewo.

˗A ˗bha ˈˈdhɛɛtadhiaŋ˗ ˗blɛɛsü ˈgü, Lutɛɛfɔdö ˗ya ˗pö ˈˈtʋtomɛn ˗nu ˗dhɛ: «˗Yö ga ˗sü ˈka n ˈgü ˈkpakpadhö ꞊dhɛ kwa Dëmɛn ˗dho ˈdhuëë˗ ˈkpɔ ˗bhɔkwëë ˈkpii˗ ˈö yö ˗a ˗bha ˈö kë ꞊gbɛkiödhɛ ˗së ˈö˗ suu ˈti kë do ˈˈsɛ yö˗ ˈgü, ˗a ˈka.» ˗Bhɔkwëë ˈkpii˗ ˈö bhë ˗a ˗ta, ˈˈdhɛɛtadhiaŋzëmɛn ˈˈpɛpɛ ˗wo kwa ꞊dhegblü ˗nu ꞊faanmën kö ˗wo ˗zlanwopö.

˗A ˈˈMaandhooyi ˈö ˗kë Sɛtanblö 8 ˈka bhë ˗a ˈka, mɛn 8.000 ˈnën ˈwo nu. ˈˈTʋ ˗to Lutɛɛfɔdö ˗bha ˈˈdhɛɛtadhiaŋ˗ ˗bha ˗sü ˗lele ˗kun ˗an ˗ta. ˗Wo ˗kun ˗a ˈˈpiʋ̈ kö ˗yö ˈsëëdhɛ ˈˈɲanga ˈö ˗kë «ADV» ˈka ˈwo˗ ˗ya mɛn ˗dhɛ ˗a ˈka ˈsëëdhɛ ˗ta bhë, ˗a ˈklɔɔ˗ pö wo ˗dhɛ. ˈDhɛ ˈwo wo ˗yɛɛ sü,  ˈyö ˈwo˗ yö ꞊dhɛ ˈsëëdhɛ ˈwo˗ ˗be ˗kë ˗yö ʒiö ˗sü ˈka ˈˈdhɛɛtadhiaŋzëmɛn ˗gɔ ˗ta ˈˈdhuŋ. Aatii Klɔsö ˈö go Tulsa Oklaoma, Zeta zuni ˈö nu ˗bhɔkwëë ˈö bhë ˗a ˗ta, ˗yö ö ˗yɛɛ ˗sü ˈdhɛ ꞊mɔɔn˗ ˗bha ˈö ˈwɔnman ˗a ˗bha ˗së ˈka, ˗a ˈgü. ˈYaa kun ˈˈplëëplë, ˈyö ˗tɔ ꞊dhɛ ˈˈtʋ̈ŋ ˈö bhë ˗a ˈka miklo ɛɛnˈˈ mɛn ˗nu ˗wo ˗kë ˈˈgbɩɩ˗ ˗pë ˈbha ˈyaa kun mü.

˗Bhɔkwëë ˈˈdhiʋ̈sümɛn ˗ya ˗pö ꞊dhɛ kwa ꞊dhegblü Lutɛɛfɔdö ˗bha ˈˈdhɛɛtadhiaŋ˗ zü ˗ya dɔ, mɛn gbɛ˗ dua ˈyaa ˗mü kö ˗yö ˗da ˈkɔɔ ˈzü, kë ˈˈdhʋ̈ kö ˈˈtʋtomɛn ˗nu ˗wo ˈwɔnman ˗së ˈka. ˈDhɛ ˈkwa dɔ ˈˈlɛlɛ 9 waa minitö 30 ˈka, ˈyö Lutɛɛfɔdö ˗yö ˗ya ˗wo ˈö Yesu ˗ya pö Matiö 4:17 ˈgü bhë, ˗a ˈgü ˈˈpʋ ˗sü ˗bha. Biblö ˗ya ˗pö: «[˗Zlan] ˗bha ˗gblüdëdhɛ ꞊ya ꞊tëng ka ˗ta!» ˗Kɔ ˈö mɛn ˗nu dho ˗Gblüdëdhɛ ˈö ˈˈdhʋ̈ ˗a ˗wɔn man ˗a ˈka ˗ya ˗blɛɛ, ˈö˗ pö: «Yesu yö ꞊dede ˗ya ˗pö ꞊dhɛ ö ˗bha ˗Gblüdëdhɛ ˈˈtʋ̈ŋ ˗ya ˗wo, ö ˗dho ˈˈdhiʋ̈sü yö ˈö kë ˗sü ˈka ꞊dhɛ ˗mlü ˈˈkan ˗sü ˈdhö ˗a ˈka, kö mɛn ˗nu ˈö gagade ˗dhɔ ˗yö ˗an ˗kë ˈö ˗an ˈˈgan ö ˗bha.»

Kwa ꞊dhegblü Klɔsö ˈö kun ˈˈtʋtomɛn ˗nu kpö ˈgü, ˗ya ˗pö: «Yi ˗kun yi ˈˈtʋ ˈto ˗ni ˈgü ˗së ˈka ˗a ˗wo ˗bha.» ˈˈKɛɛ ˈdhɛ ꞊ɲɔɔn mü kö ˗deslɔɔdhe ˈyaa Klɔsö ˗gɔ, ˈyö yö ˈˈkpɛnŋ. ˗Dhɛ ˈö ˈdho ˗ni ˈgü ˈˈkpɛnŋ ˗a zuʋ̈ˈˈ ˗to ˈzlöö, ˈyö ˗tɔ ˗ya ˈwɔn ˗dɔ ꞊dhɛ ˈyii ˗dho ˗da ˈkɔɔ ˈzü.

ˈDhɛ minitö ˈbha ˗yö ˗ʒiö, ˈyö nu ö ˗de ˈˈpiʋ̈. ˈDhɛ ˈö ö ꞊yɛɛ kë ˗ni ˈgü kö ˈö ˗da ˈkɔɔ kö mɛn ˗nu ˗wo wo kwɛɛˈˈ ˈkun ˗ni ˈgü ˈˈgbɩɩ˗ ˈka. ˗A ˗wɔn ˈgü, ˗da ˈkɔɔ ˗sü ˈˈshiʋ̈ ˗kun ˗a ˗ta. ˈYö pö ˈö ˗da ˈkɔ ˗ta ˈˈdhuŋ kö ˈpë ˈwo˗ pö ˗ni ˈgü ˈö˗ man. ˈˈTʋ̈ŋ ˈö bhë ˗a ˈka kö Klɔsö ˗kwɛ ˗yö 23. ˗Yö ˗da ˈkɔ ˈˈbhaŋ ˗bha ˈö dho ˗a ˗ta ˈˈdhuŋ. ˗A ˈkɔ ˗ta ˗dhɛ ˗kë ˈˈpʋ ˗sü ˈka, ˈyö˗ yö ꞊dhɛ ˈya dɔ mü ö ˈˈdhɛɛtadhiaŋzëmɛn ˗wo ˗man ˗së ˈka.

ˈˈKɛɛ Aatii ˗kpan ö ˈˈtɔŋdë ˈbha ˗nu ˗bha mü ˈpö. ˗A mɛn do ˈwo˗ ˗dhɛ Flankö Ʒɔnsɔnö ˗yö ˗ɲɔɔn ˗a ˈˈsuee ˈö˗ dhɛɛˈˈ kpɔ, ˈö˗ pö: «˗Dhaanën ˈˈtɩtɩ do ˗yö ü ˗gɔ bhë ˗ee?»

ˈYö Aatii ˗ya pö ˗a ˗dhɛ: «꞊Ii.»

Flankö ˗ya ˗pö ˗a ˗dhɛ: «˗Zlan ꞊dede ˈnën ü bɔ ˈyö. Yi ˗kun bhɛɛˈˈ ˗ni ˈgü kö mɛn ˈbha ˈö ˗dhaanën  ˈdhö˗ ˗gɔ ˈyi ˗kpan ˗bha. Ü ˗kpan ˈsëëdhɛ ˈwo˗ ˗be ˗kë yö ˗a ˗bha ˗ee? Ü ˈˈtʋ ˈto zakanmɛn * ˈö dhiaŋzë ˗ni ˈgü bhë ˗a ˗bha ˗së ˈka. ꞊Yaa˗ pö ‹˗ka ˗zlanwopö, ˗ka ˗zlanwopö,› bhüʋ̈ga ˗yiishiö ˈwo yö ˗an ˈˈkan.»

˗Dhaanën ˗kun Aatii ꞊kwɛɛ ˈö kun ö ˈˈtʋ ˈto ˗ni ˈgü Lutɛɛfɔdö ˗bha kö ˗wo ˈö ꞊yaa˗ pö ˈö ˗dho bhüʋ̈ga ˈˈkan, ˈö˗ man. ˗A ˗dhɛ ˈti ꞊gwëë ˈyö Lutɛɛfɔdö yö ö ˗bha ˈˈdhɛɛtadhiaŋ˗ ˈˈpian ˗wɔngbɩɩsü ˗bha. ˗A ˗bha ˗Zlan ˗dhɔkë ö ꞊faan ˈka ˗sü ˗wɔn ˈgü, ˗a zuʋ̈ˈˈ ˈˈgblü ˗kun dhi ˗sü ˈka ꞊dedewo. ˈYö ˗gbla ˈö˗ pö: «˗Ka ˈto ˗klu ˗sü ˈka kwa Dëmɛn ˗bha, ˈka kë ˗a ˗bha ꞊Gbɛkiö ꞊dede ˗nu ˈka. ˗Ka gagade ˗ta ˗ko zë ˗kplawo kö ˗yö ˈdho ˗yö yö˗ ˈka ꞊sua ˗zlanwo ˗nu ˗bha ˗go ˈˈshia ˗sü ˗bha ˈpapadhö. ˗Ka ˗Zlan ˗bha ˗Gblüdëdhɛ ˗nɔɔn pö ˗dhɛ ꞊gban ˈgü. ˈˈKpɔnŋtaamɛn ˗nu dua ˗mü kö ˗wa ˈwɔn dɔ ꞊dhɛ Zoova ˈnën ˗tɔ ˗Zlan, ˈö Yesu ˗yö ˗kë ˈpö ˗gblüdë ˗nu ˗bha ˗Gblüdë, dëmɛn ˗nu ˗bha Dëmɛn ˈka. ˗A kë ˈˈtʋ̈ŋ ꞊dede ˈnën ˈkwa˗ ˈgü yö. Kwa ˗bha ˗Gblüdë ˗ya Mɛndhɛkësü züdɔ. Ka ˈnën ka dua ˈdhö ˗mü kö ˈka˗ ˗wɔn blɛɛˈˈ mɛn ˗nu ˗dhɛ. ˈDhɛ ˈˈdhʋ̈, ˗ka ˗Gblüdë waa ˈö ˗bha ˗Gblüdëdhɛ ˗nɔɔn pö. ˗Ka ˗zlanwopö, ˗ka ˗zlanwopö, ˗ka ˗zlanwopö!»

Aatii ˗ya ˗pö ˈdhɛ ˗kë ˈˈdhʋ̈, ˈyö waa kwa ꞊dhegblü ˈbha ˗nu ˈwo ˈˈbhüʋ̈ga ˗nu bhë ˗an ˗kan. ˈYö ˈsëëdhɛ bhë ˈö ˗ya ˈˈpʋ ˗sü ˗bha ˗lëëdhö. ˈSëëdhɛ ˈö ˈˈdhʋ̈ pë ˈö kun ˗ya ˗sü ˈka˗ ˗ta ˈyö ˗tɔ: «˗Kwa ˗Gblüdë waa ö ˗bha ˗Gblüdëdhɛ ˗nɔɔn pö.» Yö ˈnën ˈwo˗ to ꞊klöö ꞊Glee˗ ˗wo ˈgü ˈö ˗kë «ADV» ˈka.

˗Bhɔkwëë ˈkpii˗ ˈö ˗kë Sedaa Poɛntö ˗yö kwa ꞊dhegblü ˗nu ˗takun ˈö yö ˗wɔngbɩɩsü ˈö ˗kë ˗zlanwopösü ˈka bhë, ˈwo˗ sü wo ꞊sɔbhɛɛ ˈka. Mɛn ˗nu ˈwo wo ˗de nu ˗a kë ˗sü ˗dhɛ ˗an zuʋ̈ˈˈ ˈˈgblü ˗yö ˗dhi ꞊dedewo. ˗Yodhiʋ̈ do ˈbha ˈö go Oklaoma ˈˈpian ˗ta Zeta zuni, ˗ya ˗pö: «Yi ˗bha ˗zlanwopödhɛ ˈgü, mɛn ꞊vadhɛ ˈwo mü ˗wo ˗kun ˈˈshianbhomɛn ˗nu ˈka, ˈwo kun ˈˈflɛɛsü.» ˗Ya ˗pö ꞊dhɛ mɛn ˗nu ˗wa nɔɔn˗ ˈö kwa ˗bha ˈˈsu ˗bha ˈsëëdhɛ ˈwo kun ˗a ˗dhɛ ˗ni ˈgü L’Âge d’Or ˈgü ˗a man, «˗wo ˈˈgbʋ ˗bɔ.» ˗Ya ˗pö ˈzü: «˗An ˗zogban ˗sü ˗yö yi zuʋ̈ˈˈ ˈˈgblü ˗dhi ꞊dedewo.»

Biblö draanmɛn ˗nu ˗wa ˗yö ꞊dhɛ pë ˈö Yesu ˗ya pö Dhukö 10:2 ˈgü bhë, wo dua ˗mü kö ˈwo˗ kë ˈzozodhö. ˗Ya ˗pö: «[˗Zlan] ˗bha yë ˈö˗ këwɔn ˈdhö ˈdhö bha ˗kaa ˗ta ˗ga. ˈÖ ꞊dhɛ ˗mlü ˈdhö kö yö ꞊në ꞊ya ˗pë kë ˗dhɛ ꞊gban ˈˈpɛpɛ ˈgü bha, ˈˈkɛɛ ˗a ˈˈkanmɛ ˈyaa ˈdhö.» ˈDhɛ ˗kwɛ bhë ˈö ʒiö ˗ni ˈgü, kö ˗Zlan ˗bha ˗Gblüdëdhɛ ˗nɔɔn pö ˗sü ˈö ˗dhɛ ꞊gban ˈˈpɛpɛ ˈgü ˗a ꞊faan ˗yö ˗da ˗ni ˈgü ˗an ˗gɔ.