ˈˈGlaadhiʋ̈ ˗tɔn ˗nu ˈwo yö ˈˈkpɛɛn ˗kwɛ ˈö yö ˗a ˈgü, ü ˗an ˗wo ˗pö ˗së ˈka ˗ee? Ü ꞊mɔɔn˗ ˗bha ˈü dhɛɛˈˈ ˗nu ˈwo yö ˗an ˗yɔ bɔ ˗ee?:

ˈMën ˈkwa dho ˗a ꞊slɔɔ ˈwɔn ˗blɛɛ Zoova ˗dhɛ ˗sü, ˈˈtʋ ˗to ˗a ˗bha ˗sü waa ˗zota pë ˗nu ˈwo ˗gban ˗a ˗bha ˗an ˈgü ˗sü ˈgü?

Kwa ˗dho ˗da ˈwɔn ˗së ˗nu ˗ʒian ˗ta, ˈkwa ˗kë mɛn ꞊klaŋkëmɛn ˗së ˈka, ˈö kwa ˗bha ˗zoyödhe ˗kë ˈˈgbɩɩ˗. ꞊Ya ˈgo mü, Zoova ˗dhɔ ˈö kwa ˈgü ˗yö ˗dho ˗dadhiʋ̈.—w22.01, ˈˈp. 30-31.

ˈKwa ˈdhaŋ˗ bho Zoova waa mɛn ˗nu ˈwo ˈˈdhiʋ̈sü kwa ˈka ˗an ˈˈdhiʋ̈, ˈwɔn ˗së ˗mɛɛn ˗nu ˈkwa dho ˗an ꞊slɔɔ?

꞊Dɛɛ, kwa dua ˗mü ˈkwa ˈdhaŋ˗ bho ˗Zlan ˗bha ˈwɔn kë ˗kɔ ˗nu ˈˈdhiʋ̈, mɛn zii ˗nu ˗bha ˗dhioo ˗nu ˗ya ꞊bhlëë ˈgü ˗sü ˈka. ˈKwa˗ kë ˈˈdhʋ̈, ˈˈklʋʋbhɔdhe ˈkpii˗ ˈˈtʋ̈ŋ ˈka ˗wa ˗dhioo ˗nu ˈwaa kwa ˈgü ˗së ɛɛnˈˈ ˈkwaa ˗an ˈgüman ˗së ˈka ˗an dɔ kwa ˗ta, kwa ˗dho ˈwɔn man ˗an ˗ta.—w22.02, ˈˈp. 4-6.

˗A pö ˈö ˗Zlan ˗bha ˈˈkiö ˗ya wo Zakadhi ˗dhɛ ꞊dhɛ «˗gwö kpö ˈö bhüʋ̈ˈˈ ˈdhö˗ ˗bha ˗yö [ˈˈsɛkɔɔnmɛn] Zodhobabɛlö ꞊kwɛɛ˗» bhë, ˈmën kun ˗a ˈˈpiʋ̈ ˈö˗ pö? (Zach. 4:8-10)

˗Wo ˈö bhë ˗yö ˈˈsɛgümɛn ˗nu ˗zogban ꞊dhɛ, ˈkö ˗kë ꞊dhɛ ˗Zlan ˗dhɔkëgükɔ ˈwo dho ˗a dɔ bhë ˗yö mɛn ˈbha ˗nu ˈgü ˗bhaasü, ˗a dɔ ˗sü ˗dho ɲën, ˈö ˗kë ꞊dhɛ ˗kɔ ˈö Zoova ˈdhö˗ ˈˈpiʋ̈ ˗yö kë˗ ˈka, ˗a ˈdhö.—w22.03, ˈˈp. 16-17.

Kwa ˗dho kë ‹ˈwɔnzuan ˗së ˈka kwa ˈwɔn blɛɛˈˈ ˗kɔ ˗nu ˈgü› ˗kɔ ˗kë ꞊dhɛ? (1 Tim. 4:12)

Kwa ˗zlanwopö ˗ni ˈgü mɛn ˗nu ˗dhɛ, kwa ˈˈdhiwo dua ˗mü kö ˗yö kë ˗së ˗an ˈˈpiʋ̈, ˈkwa ˗an ꞊bhlëë ˗ya. ˗Kwa ˈˈtan bho kwa zuʋ̈ˈˈ ꞊gban ˈka ˗bhɔkwëë ˗nu ˗ta, ˈkwa ˈwɔn ˗daa ˗së ˗nu kë zoodhö zoodhö. ˗Kwa gagade pö, kwa ˈwɔn blɛɛˈˈ ˗kɔ ˗yö mɛn ˈˈwɛɛ ˗nu ꞊faanmën, ˈkwa ˈˈkan ˗wo yaa suu ˈˈpɛpɛ ˗bha.—w22.04, pp. 6-9.

ˈMën ˗kë ˈö pë ˗nu ˈwo wü ˈˈdhiʋ̈˗ (ˈˈsɛkɔɔnmɛn ˗nu) ˗yiishiö ˈö Daniel ˈˈɲan ˈˈgblʋ̈gblʋ̈ 7 ˈgü bhë ˗an ˗bha, ˈwo ˗kë ˈpö wü ˈˈdhiʋ̈˗ do ˈö ˗Dhɛkpaɔ dhiaˈˈ ˈsëëdhɛ 13:1, 2 ˈgü, ˗a ˗bha?

Wü ˈˈdhiʋ̈˗ ˈö ˗Dhɛkpaɔ dhiaˈˈ ˈsëëdhɛ ˈˈɲan ˈˈgblʋ̈gblʋ̈ 13 ˗yö ˗wɩ ˗a ˈka bhë, ˈyaa ˈˈsɛgɔ dosɛnŋ ˈka ꞊dhɛ Wlɔmö ˈdhö. ˈˈSɛkɔɔnmɛn ˗nu ˈˈpɛpɛ ˈö ˈwo mɛnbhɩɩdhe ˗nu ꞊kɔɔn ˈö dho ˈö yö˗ ˈka ꞊dɛɛ ˗bha, ˗an ˗lokotasü ˗mü.—w22.05, ˈˈp. 9.

ˈMën ˈkwa dho ˗a kë kö ˈkwa˗ ˗zɔn ꞊dhɛ kwa ˈdhaŋ˗ ˗bho Zoova ˗bha kpɛnŋdhödhɛ ˈˈdhiʋ̈?

Mɛn ˈbha ˗ya ˈˈwɩ kwa ˗dhɛ, ɛɛnˈˈ ˗ya kwa ˗shiödhɛwɔn kë, ɛɛnˈˈ ˈzü ˗ya ˈwɔn yaa kë kwa ˈka, ˈkwaa kwa ˗naan yö ɛɛnˈˈ ˈkwaa˗ ˗wɔn ˈkun kwa ˗zo ˈˈpiʋ̈. Kwa ˈwɔn ˗nu ˗to Zoova ꞊kwɛɛ˗. ˗Yö ˗dho ˈwɔn yaa ꞊gban ˈˈpɛpɛ ˈö ꞊sɔnŋyaakësü ˗yö nu ˗an ˈka ˗an bho ˈˈshia˗.—w22.06, ˈˈp. 10-11.

꞊Waa˗ pö kwa ꞊dhegblü do ˗yö bhɛɛˈˈ ˗bhɔkwëë ˗nu ˗ta, ˗mën ˈö˗ ˗zo dua ˈyaa ˗mü kö ˗yö bhɔ ˗a ˈka?

Kwa dua ˈyaa ˗mü ˈkwa bɔ bhɛɛsü ˗ta kö ˈkwa ˗dhioo dɔ ˗zlanwokɔdhi ˗ta, ɛɛnˈˈ ˈkwa nɔɔn˗ ˗nu pö. Mɛn ˈö dho bhɛɛˈˈ, ˗a dua ˈyaa ˗mü kö ˗yö «ˈwun ꞊blɛɛˈ˗ ꞊va.» (Mat. 6:7, NTBL)—w22.07, ˈˈp. 24-25.

Mɛn ˗nu ˈö «ˈkpa ˗an këwun ˗yö ˗kë ˗së» waa mɛn ˗nu ˈö ‹ˈkpa ˗an këwun ˗yö ˗kë ya› bhë, ˗wo ˗dho ˗bo kö ˗Zlan ˗yö za dɔ ˗an ˗bha ˗kɔ ˗kë ꞊dhɛ? (Zan 5:29, NTBL)

ˈWɔn yaa ˗nu ˈö mɛn ˗nu ˗wo ˗an ˗kë ˈˈdhiʋ̈ ˗be kö ˗wo ꞊kun ga ˈyaa ˈnën ˈwo dho ˗gban ˗an ˗ta kö ˗wo ˗za dɔ ˗an ˗bha. ˗A ˗pö ˗kɔ ˈˈwɛɛ ˈgü ˗sü ˈka, ˗wa ˈgo ga ˈgü, Yesu ˗dho ö ˈˈɲan kë ˗an ˗bha, ˈö ˗dhɛ ˗ga ˗an zuʋ̈ˈˈ waa ˗an ˈˈtakɔ ˗nu ˈgü.—w22.09, ˈˈp. 18.

Mɛn ꞊faanmën ˗wo ˗mɛɛn ˈö Lutɛɛfɔdö ˗ya pö ˗bhɔkwëë ˈkpii˗ ˗ta ˗kwɛ 1922, Sɛtanblö ˈˈgü?

˗Bhɔkwëë ˈkpii˗ ˈö ˗kë Sedaa Poɛntö Zeta zuni bhë ˗a ˗ta, ˗ya ˗pö: «Kwa ˗bha ˗Gblüdë ˗ya Mɛndhɛkësü züdɔ. Ka ˈnën ka dua ˈdhö ˗mü ˈka˗ ˗wɔn blɛɛˈˈ mɛn ˗nu ˗dhɛ. ˈDhɛ ˈˈdhʋ̈, ˗ka ˗Gblüdë waa ö ˗bha ˗Gblüdëdhɛ ˗nɔɔn pö. ˗Ka ˗zlanwopö, ˗ka ˗zlanwopö, ˗ka ˗zlanwopö!»—w22.10, ˈˈp. 3-5.

ˈKwa ˗dhɛ ˗ga Isaïe ˈˈɲan ˈˈgblʋ̈gblʋ̈ 30 ˈgü, ˗kɔ ˗yaaga ˗mɛɛn ˈö Zoova ˗yö kwa ˗takun ˗a ˈka kö ˈkwa bɔ ˈwɔn ˈˈgbɩɩ˗ ˗nu ˈgü?

ˈWɔn ˗gɔ ˈö bhë ˗ya ˗zɔn ꞊dhɛ (1) Zoova ˗yö ö ˈˈtʋ ˗to kwa ˗bha, ˈö kwa ˗bha bhɛɛwo ˗nu ˗daakë, (2) ˗yö ʒiaan ˗nu ˗zɔn kwa ˗dhɛ, (3) ˗yö ˈdhuëë˗ ˗nu ˗kpɔ kwa ˗bha ꞊dɛɛ, ˈö dho ˗an ˈkpɔ ˈzü ˗dhɛkpaɔ dhiʋ̈ˈˈ ˈgü.—w22.11, ˈˈp. 9.

ˈMën ˗kë ˈkwa ꞊mɔɔn˗ ˗bha ˈkwa˗ pö ꞊dhɛ ˗wo ˗nu ˈwo ˗ya ˗sü ˈka Psaume 37:10, 11, 29 ˈgü bhë, ˗wo ˗yökodhiʋ̈ ˗kwɛŋzü, ˈwo dho yökodhiʋ̈ ˗dhɛkpaɔ dhiʋ̈ˈˈ ˈgü?

Davi ˗kun ˈwɔn ˗së ˗nu ˈö Izraɛdhömɛn kun bɔ ˗ni ˗an ˈgü, ˈö ˈbha ˗nu ˗kë Sadhomɔn ˗bha ˗gblüdëdhɛ kë ˈˈtʋ̈ŋ ˈgü bhë, ˗an ˗wɔn blɛɛˈˈ ˗ni ˈgü. Yesu ˗yö ˗gban wo ˈö˗ ˈˈɲan ˈsɛɛn˗ 11 ˈgü bhë ˗a ˗ta ˈö ꞊bhɔɔ ˈˈsɛ ˈö dho kë ˗dhɛkpaɔ dhiʋ̈ˈˈ ˈgü ˗a ˗wɔn ꞊blɛɛ. (Mat. 5:5; Dhu. 23:43)—w22.12, ˈˈp. 8-10, 14.