1-2. (1) Kwa ˗bha mɛn ˈbha ˈö ˗ya ga, ˈˈtʋ̈ŋ ˗mɛɛn ˈka ˈö kwa ˗zo ˗bö ˗a ˗mɛn ˈka ꞊gbɔɔnsü? (2) Gbeŋ ˗totaabhasü kö ˗yö ꞊kun ga bhë ˗a ˈka, ˗mën ˈö Yesu ˗ya ˗kë?

 ˈKÖ ˗KË ꞊dhɛ kwa dhɔɔbhaamɛn ˗yö ˗ga ˗a yi ˗ya ꞊gwëë, kwa ˗zo ˗yö ꞊kun ˗a ˈˈpiʋ̈ ˗kplawo. ˗Dhɛkpaɔyi ꞊dede ˈö ga ˗a ˈka ˗ya ˗lo, kwa ˗zo ˗yö ˗da ˗a ˈˈpiʋ̈ ˈzü ˈgbɛ.

² ˗Kwɛ ˈˈpɛpɛ ˈka, kwa ˗kpa mɛn ˈˈmliɲɔn ꞊va ˗bha ˈˈkpɔnŋtaadhɛ ˗todhʋ̈sü ˈgü ˈö ˈkwa ˗zo ˗yö ˗bo Yesu Klito ˈö ˗kë kwa dhɔɔbhaamɛn ˈka bhë, ˗a ˗bha ga ˈka. (1 Piɛ. 1:8) Kwa ˗dho kwa ˈkwëë˗ kö mɛn ˈö ö ˗bha ˗tosɛta nu kö ˈö kwa ˗gɔ ˗ta ˈdhɔ ˈwɔn yaa waa ga ˗an ˗gɔ bhë, kwa ˗zo ˗yö ˗bo ˗a ˈka. (Mat. 20:28) ˗A ˗de ˗ʒiaan Yesu ˈnën˗ pö ö ˗bha gwëëˈˈ ˗nu ˗dhɛ ˗an ˗zo ˗yö ˗bo ö ˗bha ga ˈka. Gbeŋ ˗totaabhasü ˈö˗ ˗kë kö ˗yö ꞊kun ga bhë ˗a ˈka, ˗yö ˈwlaan˗ do ˗ya ˈö pö ˗an ˗dhɛ: «ˈKa kë ˗kaa ˗bhö ꞊sië kö ka ˗zʋ ˗yö ˗bö n ˗wɔn ˗ta ˗kpɛawo.»—Dhu. 22:19.

3. ˈMën ˈkwa ˗dho ˗a yö ˈwɔn ˗gɔ ˈö yö ˗a ˈgü?

³ Mɛn ˗nu ˈwo nu ˗ni ˈgü ꞊shiöŋ Klito ˗bha ga ˗zo ˗bo ˈwlaan˗ ˗ta bhë ˗an kpö ˈgü, ˗a mɛn kpö ˈdɛdɛ ˈnën ˈwo dho ˈdho dhaŋ˗ ˈgü. ˈˈKɛɛ mɛn ˈˈmliɲɔn ꞊va ˈwo dho ˈto ˈˈsɛ ˗ta yö, ˗wo ˗nu ˗a ˗ta ˈpö. ˈPë ˗kë ˈö ˗kwɛ ˈˈpɛpɛ ˈka ˈö ˗zo ˗bo ˈwlaan˗ kë ˗sü ˗dhɔ ˗yö mɛn kpö ꞊plɛ ˈwo bhë ˗an ˗kë, kwa ˗dho ˗a yö ˈwɔn ˗gɔ ˈö yö ˗a ˈgü. ˗Kɔ ˈö ˗kë ˗zo ˗bo ˈwlaan˗ ˗ta ˗sü ˗yö ˈwɔn ˗së ˗kë ˗a ˈka kwa ˗dhɛ, kwa ˗dho ˗a yö ˈpö. ˈPë ˗kë ˈö ˈˈɲɔn ˗a ꞊troo ˗nu ˗wo ˗zo ˗bo ˈwlaan˗ ˗kë, ˗kwaa ˈbha ˗nu ˗ga.

4. ˈMën ˗kë ˈö ˈˈɲɔn ˗a ꞊troo ˗nu ˗wo ˗zo ˗bo ˈwlaan˗ ˗bhöpë ˗bhö?

⁴ ˗Kwɛ ˈˈpɛpɛ ˈka, ˈˈɲɔn ˗a ꞊troo ˗nu ˈˈɲan ˗yö ˗zo ˗bo ˈwlaan˗ ˗gɔ, ˈyö ˗tɔ ꞊dhɛ ˗a ˗bhöpëbhömɛn ˗mü ˗an ˈka. Wo ˈnën ˈwo ˗zo ˗bo ˈwlaan˗ ˈbluu˗ ˗bhö, ˈwo˗ we mü. ˈMën ˗kë? ˈKwa˗  pö ˈkwa˗ ˗yɔ dɔ, Yesu waa ö ˗bha gwëëˈˈ ˗nu ˗an ˗bha gbeŋ ˗totaabhasü ˈwo˗ ˗kë kö ˗yö ꞊kun ga bhë ˈwɔn ˈö ˗kë ˗a ˈgü, ˗kwaa ˗ga. ˈDhɛ ˗wa wo bo Pakö ˗bhöpë ˗bhö ˗sü ˈka, ˈyö Yesu ˗yö ˈwlaan˗ ˈö ˈwo˗ ˗dhɛ ꞊dɛɛ Dëmɛn ˗bha ˗bhöpë bhë, ˗a ˗blɛɛsü ˗kë. ˗Yö ˈbluu˗ ˈˈklu ˈˈklu ˗bho, ˈö ˗nu ö ˗bha bɔmɛn ˗nu 11 ˈwo to ˗an ˗dhɛ kö ˗wa ˗bhö, ˈö we nu ˗an ˗dhɛ kö ˗wa mü. ˗Yö ˗go mü ˈzü ˈö ˗mlɛɛn ꞊plɛ ˗wɔn ˗blɛɛ ˗an ˗dhɛ. ˗Mlɛɛn ˗dɛɛ ˗waa ˗Gblüdëdhɛ ˗mlɛɛn. * (Dhu. 22:19, 20, 28-30) ˗Mlɛɛn ˗nu ˈwo ˈˈdhʋ̈ ˈyö bɔmɛn ˗nu waa kletiɛn ˗nu kpö ˈdɛdɛ ˈbha ˈwo dho bɔ ˗a ˗ta kö ˗wo kë ˗gblüdë ˗nu waa ˈˈsaabhomɛn ˗nu ˈka dhaŋ˗ ˈgü. (˗Dhɛ. 5:10; 14:1) ꞊Dɛɛ, ˈˈɲɔn ˗a ꞊troo ˗dhɛ ˗nu ˈwo ꞊kun ˈˈkpɔnŋ ꞊taa yö, ˈwo ˗mlɛɛn ˗nu ˈwo ˈˈdhʋ̈ ˗an ˈgü, wo dosɛnŋ ˈnën ˈwo ꞊mɔɔn˗ ˗bha ˗wo ˈbluu˗ ˗bhö, ˗wo we mü ˗zo ˗bo ˈwlaan˗ ˗ta.

5. ˈMën ˈˈɲɔn ˗a ꞊troo ˗nu ˗wa dɔ ˈö ˗gban ˗an ˗bha ˗dhɛkpaɔ dhiʋ̈ˈˈ ˗bha?

⁵ Pë do ˈbha ˈö˗ ˗wɔn ˈgü ˈö ˗zo ˗bo ˈwlaan˗ kë ˗sü ˗lele ˈdhö ˈˈɲɔn ˗a ꞊troo ˗nu ˗ta ˈyö ˗tɔ ˗ya ˗kë ˈwo wo ˗zota wo ˗bha ˗dhɛkpaɔ dhiʋ̈ˈˈ ˈgü. Zoova ˗ya ˗dhɛkpaɔ dhiʋ̈ˈˈ ˗së ꞊dede ˗ya ˗an ˗bha ˈka. ˗Wo ˈti ˗dho ga ɛɛnˈˈ ˗wo ˈti ˗dho kë shiʋ̈ˈˈ ˗pë ˈka toŋtoŋdhö dhaŋ˗ ˈgü. ˗Wo ˗dho kpa ˈˈɲɔn ˗a ꞊troo ˗nu ˈwo to ˗an ˗bha ˈwo ˗kë mɛn 144.000 ˈka, kö waa Yesu ˈö ˗ya kë ˗Gblüdë ˈka bhë, ˗wo ˗gblüdëdhɛ kë Zoova ˗Zlan ˈˈɲan ˈˈdhiʋ̈. (1 Ko. 15:51-53; 1 Zn. 3:2) ˈˈƝɔn ˗a ꞊troo ˗nu ˗wa ˈwɔn ˗dɔ ꞊dhɛ Zoova ˗ya wo ˗dhɛ kö ꞊bhlëëwɔn suu ˈö ˈˈdhʋ̈ ˗yö kë wo ˗dhɛ dhaŋ˗ ˈgü. ˈˈKɛɛ ˗wa ˈwɔn ˗dɔ ˈpö ꞊dhɛ ˈwa˗ pö ˈwo kë dhaŋ˗ ˈgü, wo dua ˗mü ˈwo ˈto ˗klu ˗sü ˈka ˗Zlan ˗bha kö ˗yö ˈdho ˗yö yö˗ ˈka wo ga ˗yi ˗bha. (2 Tim. 4:7, 8) ˗Wa wo ˗zota wo ˗bha ˗dhɛkpaɔ dhiʋ̈ˈˈ ˈgü, ˗an zuʋ̈ˈˈ ˈˈgblü ˗dhi ꞊dedewo. (Tit. 2:13) ˈYö ‹˗tuëë ˈˈwɛɛ ˗nu› ˗de ˈpö ꞊wɛ? (Zan 10:16) ˈMën ˗kë ˈwo ˗zo ˗bo ˈwlaan˗ ˗kë?

6. ˈMën ˗kë ˈö ˗tuëë ˈˈwɛɛ ˗nu ˗wo ˗zo ˗bo ˈwlaan˗ ˗kë ˗kwɛ ˈˈpɛpɛ ˈka?

⁶ ˗Tuëë ˈˈwɛɛ ˗nu ˗wa ˈdho ˗zo ˗bo ˈwlaan˗ ˗ta, ˈwaa˗ ˈbluu˗ ˗bhö ɛɛnˈˈ ˈwaa˗ we mü. ˗Wo kë ˗sü ˈka ꞊dhɛ ˗dhɛgamɛn ˗nu ˈdhö. ˗Kwɛ 1938 ˈgü, ˈyö ˈwo wo ˗wo bho kletiɛn ˗nu ˈwo dho ˈto ˈˈsɛ ˗ta yö ˗an ˗ta kö ˗wo ˗zo ˗bo ˈwlaan˗ kë ˈpö. ˗Kwɛ 1938, Masö 1 ˗bha ˈˈGlaadhiʋ̈ ˗Tɔn ˗ya ˗pö: «˗Yö ˗dho kë ˗së ꞊dedewo kö ˗tuëë ˈˈwɛɛ ˗nu ˗wo kë ˗bhɔkwëë suu ˈö ˈˈdhʋ̈ ˗a ˗ta, kö pë ˈö ˗dho kë mü ˗wa ˗ga. [...] ˗A dua ˗mü kö ˗yö ˗an zuʋ̈ˈˈ ˈˈgblü dhi ˈpö.» ꞊Dhɛ ˗kɔ ˈö mɛn ˗nu ˈwo ˗an ˗dhɛ ˈkosü ˈwlaan˗ ˗ta ˗an zuʋ̈ˈˈ ˈˈgblü ˗yö dhi ˈka ˗a ˈdhö, ˗kɔ do ˈö bhë ˗a ˈka ˗tuëë ˈˈwɛɛ ˗nu ˗bha ˗kë ˗zo ˗bo ˈwlaan˗ ˗ta ˗sü ˗yö ˗an zuʋ̈ˈˈ ˈˈgblü ˗dhi ˈpö.

7. ˈMën ˗kë ˈö ˗tuëë ˈˈwɛɛ ˗nu ˈˈɲan ˈdhö ˗zo ˗bo ˈwlaan˗ ˈˈdhɛɛtadhiaŋ˗ ˗gɔ?

⁷ ˗Tuëë ˈˈwɛɛ ˗nu ˗de ˈpö ˗wo wo ˗zota wo ˗bha ˗dhɛkpaɔ dhiʋ̈ˈˈ ˈgü. ˗Wo wo ˈˈɲan ˗to ˗zo ˗bo ˈwlaan˗ ˈˈdhɛɛtadhiaŋ˗ ˗gɔ, ˈyö sü ꞊dhɛ ˈwɔn ꞊vadhɛ ˈwo˗ ˈgü ˗wo ˗gban ˈwɔn ˗së ˗nu ˈö Klito waa mɛn 144.000 ˈwo ˗dho ˗an kë mɛnbhɩɩdhe ˗nu ˈwo ˗klu ˗Zlan ˗bha ˗an ˗dhɛ ˗kwɛ ˈˈgblü do ˈˈpiʋ̈, ˗an ˗bha. ˗Wo ˗dho kpa wo ˗bha ˗Gblüdë Klito ˗bha ˈwo kwa ˗takun kö ˈˈkpɔnŋtaadhɛ ˗yö kë ꞊bhɔɔ ˈˈsɛ ˈka, ˈgo mü kö ˈkwa kë ˈˈslʋ̈ʋ̈slʋ̈. ˗Dhɛgamɛn ˗nu ˈˈmliɲɔn ꞊va ˗wa nu ˗zo ˗bo ˈwlaan˗ ˗ta, ˗wa wo zota ˗dhɛkpaɔ dhiʋ̈ˈˈ ˗së ˈö ˗Zlan ˗ya ˈˈplüün bho Isaïe 35:5, 6; 65:21-23 waa ˗Dhɛkpaɔ dhiaˈˈ ˈsëëdhɛ 21:3, 4 ˈgü bhë ˗an ˗bha ˗yökodhiʋ̈sü  ˈgü, ˗an zuʋ̈ˈˈ ꞊nii ˗da ꞊dedewo. ˈWɔn ˗së ˗nu ˈwo ˗dho kë waa wo dhɔɔbhaamɛn ˗nu ˈö ˗wa ˗ga ˗an ˗dhɛ ꞊bhɔɔ ˈˈsɛ ˗ta ˗wa wo ˗zota ˗an ˈgü, ˗yö ˗an ˗bha ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗gɛn ˗gban, ˈö ꞊faan nu ˗an ˗dhɛ kö ˗wo ˗klu Zoova ˗dhɔkësü ˗bha.—Mat. 24:13; Ga. 6:9.

8. ˗Mën ˈbha ˈö˗ ˗wɔn ˈgü ˈzü ˈö ˗tuëë ˈˈwɛɛ ˗nu wo dho ˗zo ˗bo ˈwlaan˗ ˗ta?

⁸ ˗Mën ˈbha ˈö˗ ˗wɔn ˈgü ˈzü ˈö ˗tuëë ˈˈwɛɛ ˗nu wo dho ˗zo ˗bo ˈwlaan˗ ˗ta? ˗Wa ˈˈpiʋ̈ kö ˈwo˗ ˗zɔn ˈˈɲɔn ˗a ꞊troo ˗nu ˗dhɛ ꞊dhɛ ˗an ˗dhɔ ˗yö wo ˗kë, ˈö wo ˗kɔ ˈdhö ˗an ˗gɔ. ˗Zlan ˗Wo ˗ya ˗to ˈˈdhiʋ̈ ˈö˗ pö ꞊dhɛ ˈˈɲɔn ˗a ꞊troo ˗nu waa mɛn ˗nu ˈwo dho ˈto ˈˈsɛ ˗ta yö bhë, ˗wo ˗dho yökë wo ˈko ˈˈpiʋ̈. ˗Kɔ ˗kë ꞊dhɛ? ˗Kwaa ˈwɔnzuan ˈbha ˗nu ˗ga.

9. Zacharie 8:23 ˗ya ˗pö ˗mën ˈö ˗tuëë ˈˈwɛɛ ˗nu zuʋ̈ˈˈ ˈˈpiʋ̈ ˈˈɲɔɔn ˗a ꞊troo ˗nu ˗bha ˈka?

⁹ ˗Bhö Zacharie 8:23 ˗wo pö. Pë ˈö Zoova ˗ya to ˈˈdhiʋ̈ ˈö˗ pö bhë, ˗yö pë ˈö ˗tuëë ˈˈwɛɛ ˗nu zuʋ̈ˈˈ ˈgü ˈˈɲɔn ˗a ꞊troo ˗nu ˗bha ˈka, ˗a ˗zɔn ˗së ˈka. ˗Wo kpö ˈö ˗kë «Zuifö mi do» ɛɛnˈˈ «ka» ˈka bhë, ˗yö ˗wɩ mɛn kpö dosɛnŋ ˈka. ˗A mɛn kpö ˈö ˈˈdhʋ̈ ˈyö ˗tɔ ˈˈɲɔn ˗a ꞊troo ˗nu ˈwo ꞊kun ˈˈkpɔnŋ ꞊taa. (Wlɔ. 2:28, 29) «Mɛn ˗kɔŋ do ˈö ˈwo ˗wo ˈˈpɛpɛ ˈwo ˈˈsɛgɔ ˗todhʋ̈sü ˈgü ˗a pömɛn ˗nu ˈka» bhë, wo ˈnën ˈwo ˗tɔ ˗tuëë ˈˈwɛɛ ˗nu. ˗Wo ˗dho ˈˈɲɔn ˗a ꞊troo ˗nu ˗bha «sɔ blɛnŋˈˈ ˈkun ˈˈgbɩɩ˗ ꞊dedewo,» ˗a ˗gɛn ˗mü ꞊dhɛ ˗wo ˗dho ˈto ˗klu ˗sü ˈka ˗an ˗bha ˈö waa˗ ˗nu ˈwo ˗Zlan ˗dhɔkë ˗së ˈka. ˗A ˗wɔn ˈgü, ˗wo ˗nu ˗zo ˗bo ˈwlaan˗ ˗ta kö ˈwo˗ ˗zɔn ꞊dhɛ wo ˗klu ˗sü ˈka ˈˈɲɔn ˗a ꞊troo ˗nu ˗bha ꞊dedewo.

10. ˗Mën ˈö Zoova ˗ya ˗kë kö ˗wo ˈö ˗ya ˗sü ˈka Ézéchiel 37:15-19, 24, 25 ˈgü bhë, ˗yö yö ˈkö ˈˈdhiʋ̈?

¹⁰ ˗Bhö Ézéchiel 37:15-19, 24, 25 ˗wo pö. ˗Wo ˈö bhë ˗a ˗bha ˗yökodhiʋ̈sü ˈgü, Zoova ˗ya ˗kë ˈö ˈˈɲɔn ˗a ꞊troo ˗nu waa ˗tuëë ˈˈwɛɛ ˗nu ˗an zuʋ̈ˈˈ ˗kë do, ˈwo yökë wo ˈkwëë˗. Biblö ˈˈɲan ˈö bhë, ˗yö ˈˈdhünën ꞊plɛ ˗wɔn ˗blɛɛ. Mɛn ˗nu ˈwo dho ˈdho dhaŋ˗ ˈgü wo ˈnën ˈwo ˗tɔ «Zuda ˗bha» ˈˈdhünën, ˈyö ˗tɔ ꞊dhɛ Zuda ˗bha ˈkɔdhi ˈnën ˗Zlan ö ˗kɔ ˗yɛ ˗a ˗bha ꞊kwɛŋzü kö Izraɛdhö ˗gblüdë ˗nu ˗wo ˈgo ˗a ˈgü. ˈYö mɛn ˗nu ˈwo dho ˈto ˈˈsɛ ˗ta ˈwo ˗kë ˈpö «Eflaimö ˗bha» ˈˈdhünën ˈka. * Zoova ˗kun ˗a ˈˈpiʋ̈ kö mɛn kpö ꞊plɛ ˈwo bhë, ˗wo kë «ˈˈdhünën do» ˈka. ˗A ˗gɛn ˈnën ˗tɔ ꞊dhɛ mɛn kpö ꞊plɛ ˈwo bhë ˗wo yökë ˗ni ˈgu ˗Gblüdë dosɛnŋ ˈö Klito ˈka ˗a ˗kɔ ꞊löö. ˗Kwɛ ˈˈpɛpɛ ˈka, ˈˈɲɔn ˗a ꞊troo ˗nu waa ˗tuëë ˈˈwɛɛ ˗nu ˗wo ˗kpa wo ˈkwëë˗ ˈwo ˗zo ˗bo ˈwlaan˗ ˗kë. ˈWaa ˈˈpɛ wo ˈkoo kö ˗wo kë mɛn kpö ꞊plɛ ˈka, ˗wo ˗kë ꞊ʒiaan ‹˗tuëë kpö do› ˈö˗ ‹˗gɔdhiʋ̈mɛn ˈdhö do› ˗a ˈka.—Zan 10:16.

11. «ˈˈBhlaa ˗nu» ˈö Matiö 25:31-36, 40 ˗yö ˗an ˗wɔn ꞊blɛɛ bhë, ˗wo wo ˗kɔ ˗ya Yesu ꞊dhegblü ˗nu ˗gɔ ˗kɔ ˗kë ꞊dhɛ?

¹¹ ˗Bhö Matiö 25:31-36, 40 ˗wo pö. «ˈˈBhlaa ˗nu» ˈö Yesu ˗wɩ ˗an ˈka bhë, wo ˈnën ˈwo ˗tɔ mɛn kpɛnŋdhö ˗nu ˈwo dho ˈto ˈˈsɛ ˗ta, ˈö ˈwo ˈˈtʋ̈ŋ ˗totaabhasü ˈgü ꞊dɛɛ. Wo ˈnën ˈwo ˗an ˗dhɛ ˗tuëë ˈˈwɛɛ ˗nu. ˗Wo wo ˗kɔ ˗da ˈˈɲɔn ˗a ꞊troo ˗nu ˈö ˗wa ˈto ˈˈkpɔnŋ ꞊taa ˗an ˗dhɛ, ˈyö waa˗ ˗nu ˈwo ˗zlanwopö mɛn ˗nu ˗dhɛ, ˈwo ˗an ꞊klaŋkë ˈˈkpɔnŋtaadhɛ ˗todhʋ̈sü ˈgü.—Mat. 24:14; 28:19, 20.

12-13. ˗Kɔ ˗mɛɛn ˈbha ˈö ˗tuëë ˈˈwɛɛ ˗nu wo ˗kɔ ˗da ˗a ˈka ˈˈɲɔn ˗a ꞊troo ˗nu ˗dhɛ?

¹² ˗Kwɛ ˈˈpɛpɛ ˈka, ˗zo ˗bo ˈwlaan˗ yi ˗yö ˗wo ˗ni ˈgü, ˗tuëë ˈˈwɛɛ ˗nu ˗wa ˗zɔn ꞊dhɛ wo wo ˗kɔ ˗da Klito ꞊dhegblü ˗nu ˗dhɛ. ˗Wo ˈˈdhoogɔ ˗nu ˗to ˈˈdhiʋ̈ ˈwo ˗ya mɛn ˗nu ˗dhɛ ˗sü ˗bha ˈˈkpɔnŋtaadhɛ ˗todhʋ̈sü ˈgü kö ˗wo nu ˗zo ˗bo ˈwlaan˗ ˗ta. (Kpɔɔˈˈ ˈkɔnën « Ü ü ˗de baaˈˈ ˗ni ˈgü ˗zo ˗bo ˈwlaan˗ ˗bha ˗ee?» ˗bha.) ˗Wo wo ˈgü ˗dɔ ˈˈgbɩɩ˗ kö ˗zo ˗bo ˈwlaan˗  ˗yö kë ˗zlanwokɔdhi ˈˈpɛpɛ ˈgü ˈˈkpɔnŋ ꞊taa, ˈkö ˗kë ˗ʒianwo ꞊dhɛ ˈˈɲɔn ˗a ꞊troo ˗nu ˈti ˗dho kë ˗zlanwokɔdhi ꞊gban ˈgü. ˗Yö dhi ˗sü ˈka ꞊dedewo ˗tuëë ˈˈwɛɛ ˗nu ˗dhɛ kö ˈwo wo ˗kɔ ˗da Klito ꞊dhegblü ˗nu ˗dhɛ ꞊dhɛ ˗kɔ ˗nu bhë ˗an ˈdhö. ˗Wa ˈwɔn ˗dɔ ꞊dhɛ pë ˗nu ˈwo ˗an kë ˗ni ˈgü ˈˈɲɔn ˗a ꞊troo ˗nu ˗dhɛ bhë, Yesu ˗yö ˗an ˗sü ˗dhɛ pë ˈwo˗ ˗kë yöö ꞊dede ö ˗dhɛ, ˗a ˈdhö.—Mat. 25:37-40.

¹³ Kö ˗kë ꞊dhɛ kwa ˗dho ˈto ˈˈsɛ ˗ta ɛɛnˈˈ kwa ˗dho ˈdho dhaŋ˗ ˈgü, ˗mën ˈˈwɛɛ ˈbha ˈö˗ ˗wɔn ˈgü ˈkwa ˗zo ˗bo ˈwlaan˗ ˗kë?

14. Zoova waa Yesu ˗wo ˗dhɔ ꞊dede ˗zɔn kwa ˗dhɛ ˗kɔ ˗kë ꞊dhɛ?

¹⁴ ˗Dhɔ ˈö Zoova waa Yesu ˈwo˗ ˗zɔn kwa ˗dhɛ bhë, kwa ˗an ˈˈnuɛ ˗bho ˗a ˗bha. Zoova ˗ya ˗dhɔ ˗zɔn kwa ˗dhɛ ˗kɔ ꞊va ˗ta. ˈˈKɛɛ ˗a do ˈö ʒiö ˗a ˈˈpɛpɛ ˈwo to ˗an ˗ta ˈyö ˗tɔ ˗yö ö Gbö ˗wɔngbɩɩsü ˗bɔ kwa ˗dhɛ, kö ˗yö saanˈˈ ˈsü ˗yö ga kwa ˗wɔn ˈgü. (Zan 3:16) Yesu ˗de ˈpö ˗yö ˗dhɔ ꞊dede ˗zɔn kwa ˗dhɛ ö ˗bha ˗tosɛta ˗nu kwa ˗wɔn ˈgü ˗sü ˈka. (Zan 15:13) ˗Dhɔ suu ˈö Zoova waa Yesu ˈwo˗ ˗zɔn kwa ˗dhɛ bhë, ˈkwaa ꞊mɔɔn˗ ˗bha ˈkwa˗ ˗yɛ ˈzü kë ˗an ˗dhɛ. ˈˈKɛɛ kwa ꞊mɔɔn˗ ˗bha ˈkwa˗ ˗zɔn kwa ˗bha ˗tosɛta kë ˗kɔ ˈö ˗dhɛkpaɔyi ˈˈpɛpɛ ˈka ˗a ˈgü ꞊dhɛ kwa ˗an ˈˈnuɛ ˗bho ˗a ˗bha. (Kodh. 3:15) Kwa ˗nu ˗zo ˗bo ˈwlaan˗ ˗ta kö kwa ˗zo ˗yö ˗bo ˗dhɔ ˈwo˗ ˗zɔn kwa ˗dhɛ ˗a ˈka, ˈˈkɛɛ kö ˈkwa˗ ˗zɔn ˗an ˗dhɛ ˈpö ꞊dhɛ ˗an ˗dhɔ ˗yö kwa ˗kë.

15. ˈMën ˗kë ˈö ˈˈɲɔn ˗a ꞊troo ˗nu waa ˗tuëë ˈˈwɛɛ ˗nu ˈwo ˗gɔtadhɔpë sü ꞊dhɛ gbɔɔdhe ꞊bhlëësü ˈdhö?

¹⁵ Kwa ˗gɔtadhɔpë ˗sü ꞊dhɛ gbɔɔdhe ˈkpii˗ ˈdhö. (Mat. 20:28) ˈˈƝɔn ˗a ꞊troo ˗nu ˗wo ˗gɔtadhɔpë ˗sü pë ꞊bhlëësü ꞊dede ˈka, ˈyö ˗tɔ ꞊dhɛ yö ˈnën ˗dhɛpkaɔ dhiʋ̈ˈˈ ˗së ˈˈkwee ˗pʋ ˗an ˗gɔ. ˗An ˗bha ˗zo ˗yö Yesu ˗bha ˈˈsaa˗ ˗dhɛ ˗sü ˗wɔn ˈgü, Zoova ˗yö ˗an ˗dhɛ mɛn kpɛnŋdhö ˗nu, ˈö ˗an ˗kë ö ˗bha ˈnën ˗nu ˈka. (Wlɔ. 5:1; 8:15-17, 23) ˗Tuëë ˈˈwɛɛ ˗nu ˗de ˈpö ˗wo ˗Zlan ˈˈnuɛ ˗bho ˗gɔtadhɔpë ˗wɔn ˈgü. ˗Dhɛ ˈö ˗kë ꞊dhɛ ˗wo wo ˗zo ˗yö Yesu ˗bha ˈˈsaa˗ ˗dhɛ bhë, ˗wo ˈˈslʋ̈ʋ̈slʋ̈ Zoova ˈˈɲan ˈˈdhiʋ̈, ˈwo˗ ˗dhɔkë, ˈwo wo ˗zo yö ˈzü ꞊dhɛ wo ˗dho dha ‹ˈˈklʋʋbhɔdhe ˈkpii˗› ˗gɔ. (˗Dhɛ. 7:13-15) ˈˈƝɔn ˗a ꞊troo ˗nu waa ˗tuëë ˈˈwɛɛ ˗nu ˗wa ˗zɔn ꞊dhɛ wo ˗Zlan ˈˈnuɛ ˗bho ˗gɔtadhɔpë ˈwɔn ˈgü, ˗nu ˗zo ˗bo ˈwlaan˗ ˗ta ˗sü ˈö ˗kwɛ ˈˈpɛpɛ ˈka, ˗a ˈka.

16. ˗Mën ˈbha ˈö˗ ˗wɔn ˈgü ˈzü ˈkwa nu ˗zo ˗bo ˈwlaan˗ ˗ta?

¹⁶ Pë ˈbha ˈö˗ ˗wɔn ˈgü ˈzü ˈkwa ˗zo ˗bo ˈwlaan˗ ˗kë ˗yö ˗tɔ kwa˗ˈˈpiʋ̈ ˈkwa ˈwɔn man Yesu ˗ta. ˈKö ˗kë ꞊dhɛ kwa ˗dho ˈdho dhaŋ˗ ˈgü ɛɛnˈˈ kwa ˗dho ˈto ˈˈsɛ ˗ta, kwa˗ ˈˈpiʋ̈ kö ˗dhioo ˈö Yesu ˗ya dɔ kwa ˗ta ˗zo ˗bo ˈwlaan˗ yi ˈka bhë, ˈkwa˗ ˗ya ꞊bhlëë ˈgü. ˗Ya ˗pö: «˗Kaa kë ꞊ni ˈˈtʋ̈ng ꞊gban ˈgü kö ka ˗zʋ ˈya ˈdho bhɔ n ˗wɔn ˈka.»—1 Ko. 11:23, 24.

17. ˗Zo ˗bo ˈwlaan ˗yö kwa ˗takun kö ˈkwa ꞊ɲɔɔn Zoova ˗bha ˗kɔ ˗kë ꞊dhɛ?

¹⁷ Kwa ˗ɲɔɔn Zoova ˈˈsuee. (Zak. 4:8) ꞊Dhɛ ˗kɔ ˈkwa˗ yö ˗a ˈka bhë ˗a ˈdhö, ˗dho ˗zo ˗bo ˈwlaan˗ ˗ta ˗sü ˗ya ˗kë ˈö ˈkwa kwa ˗zota ˗dhɛkpaɔ dhiʋ̈ˈˈ ˗së ˈö Zoova ꞊yaa˗ ˗ya kwa ˗gɔ waa ˗dhɔ ˈö˗ ˗zɔn kwa ˗dhɛ, ˗an ˈgü. (Jér. 29:11; 1 Zn. 4:8-10) ˗A ˗kë ˈˈdhʋ̈ ˗sü ˗yö Zoova ˗dhɔ ˈö kwa ˈgü ˗a ˗dadhiʋ̈, ˈö kwaa˗ ˗nu kwa ˗bha ˈˈtɔŋdëdhɛ ˗kë ˈˈgbɩɩ˗.—Wlɔ. 8:38, 39.

18. Kwa ˗zota Yesu ˗bha ˈwɔnzuan ˈgü ˗sü kwa ˗blü ˗mën kë ˗sü ˗bha?

 ¹⁸ ˗Yö kwa ˗blü kö ˈkwa ˈto Yesu ˗bha ˈwɔnzuan ˈˈpiʋ̈. (1 Piɛ. 2:21) ˗Zo ˗bo ˈwlaan˗ yi ˗yö ˗wo ˗ni ˈgü, ˗kwɛzlan ˈö ˗gban Yesu ˗bha ˈˈdhoogɔ ˗totaabhasü ˈö˗ ˗kë ˈˈsɛ ˗ta yö ˗a ˗bha oo, ˗a ˗bha ga waa ˗a ˗bha ˗go ga ˈgü ˗sü ˗bha oo, kwa ˗an ˗wo ˗pö Biblö ˈgü. Gbeŋyi ˈkwa ˗zo ˗bo ˈwlaan˗ ˗kë ˗a ˈka bhë ˗a ˈgü, ˈˈdhɛɛtadhiaŋ˗ do ˈö kwa ˗zo ˗bo ˗dhɔ ˈö Yesu ˗ya ˗zɔn kwa ˗dhɛ bhë ˗a ˈka, kwa kwa ˈˈtʋ̈ ˗to ˗a ˗bha ˈpö. (Efɛ. 5:2; 1 Zn. 3:16) ˈWɔnzuan ˗së ˈö Yesu ˗ya to kwa ˗gɔ ˈkwa˗ ˗wo pö, ˈkwa kwa ˗zota ˗a ˈgü, ˗yö ˗dho kwa ˗blü kö ˈkwa «˗tosɛa kë ꞊dhɛ ˗kɔ ˈö Yesu Klisi ˗ya kë˗ ˈka˗ ꞊në˗ ˈdhö.»—1 Zn. 2:6.

19. Kwa ˗dho ˈto ˗klü ˗sü ˈka ˗Zlan ˗dhɔ ˗bha ˗kplawo ˗kɔ ˗kë ꞊dhɛ?

¹⁹ Kwa ˗dho pë ˈˈpɛpɛ kë kö ˈkwa ˈto ˗klü ˗sü ˈka ˗Zlan ˗dhɔ ˗bha ˗kplawo. (Zud. 20, 21) ˈKwa˗ pö ˈkwa ˈto ˗klü ˗sü ˈka ˗Zlan ˗dhɔ ˗bha ˗kplawo, kwa dua ˗mü ˈkwa ˈwɔn man ˗a ˗ta, ˈkwa˗ ˈtɔ kë ˈˈslʋ̈ʋ̈slʋ̈, ˈkwa ˗a zuʋ̈ˈˈ ˈˈgblü dhi. (Prov. 27:11; Mat. 6:9; 1 Zn. 5:3) ˗Dho ˗zo ˗bo ˈwlaan˗ ˗ta ˗sü ˗dho kwa ˗blü kö yi ˈˈpɛpɛ ˈka, kwa ˗bha ˗tosɛta kë ˗kɔ ˈgü ˈkwa˗ pö Zoova ˗dhɛ: «A˗ ˈˈpiʋ̈ ˈa ˈto ˗klü ˗sü ˈka ü ˗bha ˗dhɔ ˗bha ˗toëpö ˈka.»

20. ˈMën ˗kë ˈkwa dho ˗zo ˗bo ˈwlaan˗ ˗ta?

²⁰ ˈKö ˗kë ꞊dhɛ kwa ˗dho ˈdho dhaŋ˗ ˈgü ɛɛnˈˈ kwa ˗dho ˈto ˈˈsɛ ˗ta yö, kwa ˗dho ˗zo ˗bo ˈwlaan˗ ˗ta ˗gɛn ˗nu ˗wo ˗dhö. ˗Kwɛ ˈˈpɛpɛ ˈka, kwa ˗dho kwa ˈkwëëdhö yi ˈö ˈˈdhʋ̈ ˗a ˈka, kö kwa ˗zo ˗yö ˗bo Yesu Klito ˈö˗ ˗dhɔ ˗yö kwa ˗kë bhë ˗a ˗bha ga ˈka. ˈˈKɛɛ, ˗a ˗dhɛ ˈö˗ ˗wɔn ˈdhö ˈˈgbɩɩ˗ ˈzü ˈyö ˗tɔ kwa ˗nu ˈˈdhʋ̈ kö ˗dhɔ ꞊dede ˈö Zoova ˗ya ˗zɔn kwa ˗dhɛ, ˈö ö Gbö nu kwa ˗gɔtadhɔpë ˈka bhë, kwa ˗zo ˗yö ˗bo ˗a ˈka. ˗Zo ˗bo ˈwlaan˗ ˈö ˗dho ˗kë ˗kwɛ 2022 ˈö yö ˗a ˈgü, kwa ˗dho ˗a kë ˈˈMaandhooyi ˈˈdooka ˈka Avlidhö 15 ˈka. Zoova waa ö Gbö ˗an ˗dhɔ ˗yö kwa ˗kë, ˈdhɛ ˈˈdhʋ̈ Yesu ˗bha ga ˗zo ˗bo ˈwlaan˗ yi ˈka, pë ˗gbɛ dua ˈyaa ˗mü kö ˗yö kwa ˈkun ˗nu ˗a ˗ta ˗sü ˗bha.