ˈWƆN ˗GƆ 4
Zoova ˈdhuëë˗ ˗kpɔ kwa ˗bha ˈgüdɔgbɩɩsü kö ˈkwa ˗zo ˗bo ˈwlaan˗ kë, ˗a ˗bha
«ˈKa kë ˗kaa ˗bhö ꞊sië kö ka ˗zʋ ˗yö ˗bö n ˗wɔn ˗ta ˗kpɛawo.»—DHU. 22:19.
ˈˈTAN 19 Dëmɛn ˗bha ˗bhöpë
ˈPË ˈKWA DHO ˗A YÖ a
1-2. ˈMën ˗kë ˈö ˈkwa nu ˗zo ˗bo ˈwlaan˗ ˗ta ˗kwɛ ˈˈpɛpɛ ˈka?
ˈDHƐ Yesu ˗yö ö ˗bha ˗tosɛta nu kwa ˗wɔn ˈgü, kë ˈˈdhʋ̈ kö ˈkwa ˗këdhösü ˈö ˈyaa ɲën ˗a ꞊slɔɔ ˗a ˗kwɛ ˗ya ˗mɔn 2.000 ˗bha ꞊dɛɛ. Gbeŋyi ˈwo dho ˗a zë ˗a ˈka bhë ˗a ˈgü, ˗yö ˗bɔ ˈbluu˗ waa we ˗an ˗ta ˈö ˈwlaan˗ ˈdɛdɛ ˗ya kö ö ˗bha gwëëˈˈ ˗nu ˗zo ˗yö ˗bo ˗dhɔ ˈö˗ ˗zɔn ˗an ˗dhɛ, ˗a ˈka.—1 Ko. 11:23-26.
2 Kwa kwa ˈˈtʋ ˗to Yesu ˗wo ˗bha, ˈyö sü ꞊dhɛ ˗a ˗dhɔ ˗yö kwa ˗kë ꞊dedewo. (Zan 14:15) ˗Zo ˗bo ˈwlaan˗ ˈˈtʋ̈ŋ ˈgü ˗kwɛ ˈˈpɛpɛ ˈka, kwa ˗bhɛɛ ˈö ˈkwa kwa ˗zota ga ˈö Yesu ˗ya wo ˗a ˈgü, kë ˈˈdhʋ̈ kö ˈkwa˗ ˗zɔn ꞊dhɛ kwa˗ ˈˈnuɛ ˗bho ˗a ˗bha ꞊dedewo. Kwa ˗bha ˗zlanwopösü ˗dadhiʋ̈ ˗sü ˗yö kwa zuʋ̈ˈˈ ˈˈgblü ˗dhi ˈpö, ˈö ˈkwa mɛn ꞊va ꞊faanmën kö ˗wo nu kwaa˗ ˗nu ˈkwa ˈwlaan˗ ˈö bhë ˗a kë. ˗Ya ˈgo mü ˈzü, kwa pë ˈˈpɛpɛ ˗kë kö pë ˈˈwɛɛ ˈbha ˈya dho kwa ˗kɔ ˈkun ˗nu ˗a ˗ta ˗sü ˗bha.
3. ˈMën ˈkwa dho ˗a yö ˈwɔn ˗gɔ ˈö yö ˗a ˈgü?
3 Zoova ˗dhɔkëmɛn ˗nu ˗wo Yesu ˗bha ga ˗zo ˗bo ˈwlaan˗ kë ˗su ˗wɔn ˗kun ˈˈgbɩɩ˗ ꞊dedewo. ˗A ˗wɔn ˈgü pë ˗yaaga ˈwo yö, ˗wo ˗an ˗kë. (1) ˗Wo ˗to ˗a kë ˗kɔ ꞊dede ˈö Yesu ˗ya ˗zɔn, ˗a ˈˈpiʋ̈. (2) ˗Wo mɛn ˈˈwɛɛ ˗nu ˗dhɛ ˗a ˗ta. (3) ˈKö ˗kë ꞊dhɛ ˗wo ˗kë ˈˈtʋ̈ŋ ˈˈgbɩɩ˗ ˈgü, ˗wo wo ˈgü ˗dɔ ˈˈgbɩɩ˗ ˗kplawo kö ˈwo ˗zo ˗bo ˈwlaan˗ kë. ˈWɔn ˗gɔ ˈö yö ˗a ˈgü, pë ˗yaaga ˈwo bhë kwa ˗dho ˗an yö.
-ZO ˗BO ˈWLAAN˗ KË ˗KƆ ˈÖ YESU ˗YA -ZƆN
4. ˗Zo ˗bo ˈwlaan˗ ˗ta ˗kwɛ ˈˈpɛpɛ ˈka, dhɛɛˈˈ ˗mɛɛn ˗nu ˈö ˈkwa ˗an ˗yɔ ꞊slɔɔ? ˈYö ˈmën ˗kë ˈö ˗an ˗wɔn ˈdhö kwa ˗gɔ ˈˈgbɩɩ˗ ꞊dedewo? (Dhukö 22:19, 20)
4 ˗Kwɛ ˈˈpɛpɛ ˈka, kwa kwa ˈˈtʋ ˗to ˈˈdhɛɛtadhiaŋ˗ ˈwo ˗gban Biblö ˗ta ˈwo dhɛɛˈˈ ꞊va ˗yɔ bɔ, ˗a ˗bha. ˈPë ˗kë ˈö mɛnbhɩɩdhe ˗nu ˗bhawɔn ˈdhö ˗gɔtadhɔpë ˗bha waa ˈpë ˗kë ˈö mɛn do ˗bha ga ˗yö mɛn ꞊va ˗bha ˈwɔn yaa ˗nu ˗bhawɔn to, kwa ˗an ˈgüman. Pë ˈö ˈbluu˗ waa we ˈwo˗ ˈka waa mɛn ˗nu ˈö ˗an dua ˈdhö ˗mü kö ˗wa ˈsü, ˗wo ˗an ˗zɔn kwa ˗dhɛ. (Dhukö 22:19, 20 ˗wo pö) ꞊Ya ˈgo mü ˈzü, kwa kwa ˗zota ˈwɔn ˗së ˈö dho ˗kë mɛn ˈö ˈwo ˗dho ˗tosɛta ˈö ˈyaa ɲën ˗a ꞊slɔɔ˗ ˈˈkpɔnŋ ꞊taa yö ˗an ˗dhɛ, ˗a ˈgü. (Is. 35:5, 6; 65:17, 21-23) Kwa dua ˈyaa ˗mü kö ˈkwa˗ ˈsü ˗bhaasü. Mɛn ˗nu ˈwo ˗mɔn ˈˈmliya ꞊va ˗bha ˈwaa˗ ˈgüman ɛɛnˈˈ ˈwaa Yesu ˗bha ˈˈsaa˗ ˈö bho bhë ˗a ꞊bhlëë dɔ ɛɛnˈˈ ˈzü ˈwaa Yesu ˗bha ga ˗zo ˗bo ˈwlaan˗ kë ꞊dhɛ ˗kɔ ˈö˗ pö˗ ˈka ö bha gwëëˈˈ ˗nu ˗dhɛ, ˗a ˈdhö. ˈMën ˗kë?
5. ˈDhɛ Yesu ˗bha bɔmɛn ꞊vadhɛ ˗wo ga, mɛn ˗nu ˗wo ˗zo ˗bo ˈwlaan˗ ˗kë ˗kɔ ˗kë ꞊dhɛ?
5 ˈDhɛ Yesu ˗bha bɔmɛn ˗nu ˗wo ga ˗a yi ˈyii ꞊gwëë ˈyö kletiɛn ꞊suasü ˗nu ˗wo ˗da ˗zlanwokɔdhi ˈgü. (Mat. 13:24-27, 37-39) ˗Wo ‹꞊sua ˗dhiang ˗nu ˗zë kö ˈdhang ˗bho Yesu ˈˈdhiʋ̈ ˗mɛ ˗nu ˗wo ziö˗ wo ꞊keng˗.› (Këw. 20:29, 30) ˗A «꞊sua ˗dhiang ˗nu» ˈwo ˈˈdhʋ̈ ˗a do ˈnën ˗tɔ ‹Yesu ˈyii ö ˗dɩ ˗nu ˗gɛnyan doseng kö ˗yö kë ˈbɔn ˗bho mɛ ˈgbɛ ꞊dede ˗bha› ˗pë ˈka ꞊dhɛ ˗kɔ ˈö Biblö ˗ya pö ˗a ˈka ˗a ˈdhö. ˈˈKɛɛ ˗a dua ˗mü ꞊ʒiaan kö ˗yö ö ˗de nu ˗gɛnɲan ˈka ꞊va. (Ebl. 9:27, 28) ꞊Dɛɛ, zuʋ̈puumɛn ꞊vadhɛ ˗wo ˈdhaŋ˗ ˗bho ꞊sua suu ˈö ˈˈdhʋ̈ ˗a ˈˈdhiʋ̈. ˗Ya kë ꞊shiöŋ Katolikömɛn ˗nu ˗wo ˗dho ˗zlanwokɔɔdhö ˈˈdhoogɔ ˈˈpɛpɛ ˈka ˈɲënŋgü, kö ˈwo ˈbluu˗ ˗bhö. ˗An ˗bha ˈgü, wo ˗zo ˈnën ˈwo˗ ˗bo ˗ni ˈgü Yesu ˗bha ˈˈsaa˗ ˈka bhë. b ˗Zlanwo ˈˈwɛɛ ˈbha ˗nu ˈgü ˈpö, mɛn ˗nu ˈwaa wo ˗zo ˗bo Yesu ˗bha ga ˈˈsaa˗ ˈka ˈˈtʋ̈ŋ ꞊gban ˈka. ˈˈKɛɛ ˗a ˈgümɛn ˗nu ꞊vadhɛ ˈwaa Yesu ˗bha ga ˗sü ˗gɛn dɔ ˗së ˈka. Mɛn ˈbha ˗nu ˗wo wo ˗de dhɛɛˈˈ ˗kpɔ, ˈwo˗ pö: «Yesu ˗bha ga ˗sü ꞊mɔɔn˗ ˗bha ꞊dedewo kö ˗yö n ˗man ˈwɔn yaa ˗nu ˗bhawɔn ˈto ˗ee? ˈMën ˗kë ˈö dhɛɛˈˈ suu ˈö ˈˈdhʋ̈ ˈwo˗ kpɔ? ˈYö ˗tɔ ꞊dhɛ ˗wa ˗pö ˗an ˗dhɛ ꞊dhɛ Yesu ˗bha ˈˈsaa˗ ˈyaa ꞊mɔɔn˗ ˗bha ˗ya kë kö kwa ˗bha ˈwɔn yaa ˗nu ˗bhawɔn ˗yö ˈto. Yesu ˗bha gwëëˈˈ ꞊dede ˗nu ˗wo mɛn ˗nu ˗takun ˗kɔ ˗kë ꞊dhɛ kö ˗wa ˗bha ˈˈsaa˗ ˗gɛn dɔ, kö ˗wo ˗zo ˗bo ˈwlaan˗ kë ˗kɔ ˗së dɔ ˈpö?
6. ˗Kwɛ 1872 ˈgü, ˈmën Biblö draanmɛn ˗nu ˗wa ˈgüman?
6 ˗Kwɛ 1870 ˈgü, Biblö draanmɛn ˗nu ˈö Shaadhö Tazö kun ˗an ˗gɔdhiʋ̈ ˗wo ˗ya Biblö ˈgü ˈˈpʋ ˗sü ˗bha. ˗Wo ˗kun ˗a ˈˈpiʋ̈ kö ꞊trɔɔn ˈö go Yesu ˗bha ga ˗sü ˈgü, ˈwo˗ dɔ. -Ya ˈgo mü, kö ˗kɔ ꞊dede ˈwo ˗dho ˗zo ˗bo ˈwlaan˗ kë ˗a ˈka ˈwo˗ dɔ ˈpö. ˗Kwɛ 1872 ˈgü, ˗wa ˗yö ꞊dhɛ Yesu ˗bha ga ˗sü ˈö bhë ˗yö ˗mɔn ˗a ˗bha ˈö mɛnbhɩɩdhe ˈˈpɛpɛ ˗gɔ ˗ta dhɔ. Gagade ˈö ˈˈdhʋ̈ ˈwii˗ ˈto wo ˗de ˗gɔ, ˗wo ˗bɔ ꞊ʒiaan ˈsëëdhɛ ˗be ˗nu, zunalö ˗nu waa ˈˈsu ˗bha ˈsëëdhɛ ˗nu ˗ta, ˈwo˗ ˗pɛn. ˗A yi ˈti ꞊gwëë ˈwo ˗ya ˗nu wo ˈkwëëdhö ˗sü ˗bha ˗gɛnɲan ˈka do ˗kwɛ do ˈˈpiʋ̈ kö ˈwo ˗zo ˗bo ˈwlaan˗ kë ꞊dhɛ kletiɛn ˗blɛɛsü ˗nu ˈdhö.
7. ˈWɔn ˗së ˗mɛɛn ˗nu ˈö ˈkwa ˗an ꞊slɔɔ Biblö draanmɛn ˗nu ˗bha Biblö ˈˈpiʋ̈ ˈpɔn ˗sü ˈgü?
7 Pë ˗nu ˈö kletiɛn ˗nu ˗wa ˈˈpiʋ̈ pɔn Biblö ˈgü ꞊kwɛŋzü bhë, ˗wo ˈwɔn ˗së kë ˗ni ˈgü kwa ˗dhɛ ꞊dɛɛ. ˗Kɔ ˗kë ꞊dhɛ? Zoova ˗ya ˗kë kö gagade ˈö ˗gban Yesu ˗bha ˈˈsaa˗ ˗bha waa ꞊trɔɔn ˈö go ˗a ˈgü mɛnbhɩɩdhe ˗nu ˗bha ˈka, ˈkwa ˗an dɔ. (1 Zn. 2:1, 2) Biblö ˗ya ˗pö ꞊dhɛ mɛn ˗nu ˈwo ˗Zlan dhɔɔbhaawɔn ˗kë, ˈwɔn ˗së ꞊plɛ ˗yö ˗an ˈˈdhiʋ̈ ˈˈgan ˗ni ˈgü. ˗A mɛn ˈbha ˗nu ˗dho ˗tosɛta kë dhaŋ˗ ˈgü ˗toëpö ˈka, ˈyo˗ mɛn ˈˈmliɲɔn ꞊va ˗dho kë ˈˈsɛ ˗ta yö ˗toëpö ˈka ˈpö. ˈKwa kwa ˗zota ꞊dedewo ˗dhɔ ˈö Zoova ˗ya ˗ke kwa ˈka waa ˈwɔn ˗së ꞊va ˈö Yesu ˗bha ˈˈsaa˗ ˗ya ˗kë kwa ˗dhɛ ˗an ˈgü, ˗ya ˗kë ˈö ˈkwa ꞊ɲɔɔn Zoova ˗bha. (1 Piɛ. 3:18; 1 Zn. 4:9) ˈDhɛ ˈˈdhʋ̈, ˗kwaa kë ꞊dhɛ kwa ꞊dhegblü ˗nu ˈwo kun ꞊kwɛŋzü ˗an ˈdhö, ˈkwa mɛn ˗nu ˗dhɛ kö kwaa˗ ˗nu ˈkwa ˗zo ˗bo ˈwlaan˗ kë ꞊dhɛ kɔ ˈö Yesu ˗ya ˗zɔn ˗a ˈka kwa ˗dhɛ bhë, ˗a ˈdhö.
ZOOVA ˗DHƆKËMƐN ˗NU ˗WO MƐN ˗NU ˗DHƐ ˗ZO ˗BO ˈWLAAN˗ ˗TA
˗Zo ˗bo ˈwlaan˗ kë ˈˈtʋ̈ŋ ˈgü, kwa ˗dho ˗a kë ꞊dhɛ kö ˈkwa mɛn ꞊va ˗dhɛ? (Kpɔɔˈˈ ˗wo ˗bhüöö kpö 8-10 ˗bha, ˗an ˈgü.) e
8. ˗Mën ˈö Zoova ˗dhɔkëmɛn ˗nu ˗wa ˗kë ˈkö ˈwo mɛn ˗nu ˗dhɛ ˗zo ˗bo ˈwlaan˗ ˗ta? (Pë ˈˈbin ˈö bhë ˗a ˗ga.)
8 ˗A ˗kwɛ ˗ya kë ꞊va ꞊dɛɛ ˈö Zoova ˗dhɔkëmɛn ˗nu ˈwo mɛn ˗nu ˗dhɛ ˗ni ˈgü ˗zo ˗bo ˈwlaan˗ ˗ta. ˗Kwɛ 1881 ˈgü, kwa ꞊dhegblü ˗nu ˈwo kun Zeta zuni ˗wo ˗dho wo ˈkwëëdhö ˗a mɛn do ˗gɔ ˈkɔɔ Alegeni, Pɛsivani ˈˈpian ˗ta, ˈwo ˗zo ˗bo ˈwlaan˗ ˗kë. ˈˈKɛɛ ꞊taabha, ˗zlanwokɔdhi ˗dhɛ ˈö ˈdhö ˗yö ˈö ˗bha ˗zo ˗bo ˈwlaan˗ ˗kë ö ˗de ˈˈpiʋ̈. ˗Kwɛ 1940 Masö ˈˈsu ˈgü, ˗wa ˗pö ˗zlanwopömɛn ˗nu ˈˈpɛpɛ ˗dhɛ ˗wo ꞊mɔɔn˗ ˗bha ˈwo wo ˗bha ˈˈyasagümɛn ˗nu ˗dhɛ ˗zo ˗bo ˈwlaan˗ ˗ta. ˗Kwɛ 1960 ˈgü, Betɛdhö ˗yö mɛn ˗dhɛ ˗a ˈka ˈsëëdhɛ ˗blɛɛsü ˗nu ˗yökë ˈö ˗an bɔ ˗zlanwokɔdhi ˗nu ˗dhɛ. ˈÖ ˗sü yi ˈö bhë ˗a ˗bha, ˗wa mɛn ˗dhɛ ˗a ka ˈsëëdhɛ ˈö ˗mɔn ˈˈmliya ꞊va ˗bha ˗a nu mɛn ˗nu ˗dhɛ. ˈMën ˗kë ˈkwa kwa ˗bha ˈˈtʋ̈ŋ waa kwa ꞊faan sü ˈkwa mɛn ˗nu ˗dhɛ ˗zo ˗bo ˈwlaan˗ ˗ta?
9-10. ˗De nu ˈkwa kwa ˈgü dɔ ˈˈgbɩɩ˗ ˈkwa ˗an ˗dhɛ ˗zo ˗bo ˈwlaan˗ ˗ta? (Zan 3:16)
9 Pë do ˈö˗ ˗wɔn ˈgü ˈzü ˈkwa mɛn ˗nu ˗dhɛ ˗zo ˗bo ˈwlaan˗ ˗ta ˈyö ˗tɔ kö ˗a mɛn ˗nu ˈö ˗an ˗bha nu ˗sü ˗blɛɛsü ˈdhö ˗mü ˗wo gagade ˈö ˗gban Zoova, Yesu waa ˈpë ˈwo˗ ˗kë kwa ˗dhɛ ˗an ˗bha, ˗an dɔ. (Zan 3:16 ˗wo pö.) Kwa˗ ˈˈpiʋ̈ kö ˈpë ˈwo dho ˗a yö ɛɛnˈˈ ˗a man ˗zo ˗bo ˈwlaan˗ ˗ta, ˗yö ˗an ˗blü Biblö draanˈˈ ˗su ˗bha kö ˗wo kë Zoova ˗dhɔkëmɛn ˗nu ˈka. ˈˈKɛɛ mɛn ˈˈwɛɛ ˈbha ˗nu ˗wo ˗dhö ˈö ˗zo ˗bo ˈwlaan˗ ˗yö ˈwɔn ˗së ˗kë ˗an ˗dhɛ ˈpö.
10 Mɛn ˗nu ˈö ˗wa ˈˈkan Zoova ˗dhɔkësü ˗bha, kwa ˗an ˗dhɛ ˗zo ˗bo ˈwlaan˗ ˗ta ˈpö. Kwa˗ ˗kë ˈˈdhʋ̈ kö ˈkwa ˗an ˗zo ˗bo ꞊dhɛ ˗an ˗dhɔ ˗yö ˗Zlan ˗kë ˗kplawo. ˗A mɛn ꞊vadhɛ ˗wa nu, ˗yö ˗kë kwa ˗dhɛ ˗së ꞊dedewo. ˗Nu ˗zo ˗bo ˈwlaan˗ ˗ta ˗sü ˗yö ˗an ˗zo ˗da Zoova ˗dhɔkë ˈwo˗ wo zuʋ̈gblüdhi ˈka ˈˈdhiʋ̈ ˗be bhë, ˗a ˈˈpiʋ̈. ˗Kwa Monika ˗bha ˈwɔnzuan ˗ga. c Kolona virisö ˈˈtʋ̈ŋ ˈgü, ˗yö ˗ya ˗zlanwopösü ˗bha ˈzü. ˗Dhɛ ˈö ö bo ˗zo ˗bo ˈwlaan˗ ˈö ˗kë ˗kwɛ 2021 ˈgü ˗a kë ˗sü ˈka, ˗ya ˗pö: «˗Zo ˗bo ˈwlaan˗ ˈö ˗kwɛ ˈö yö ˗a ˈka, n ˗zo ˈti dho bhɔ ˗a ˈka toŋtoŋdhö. ˗A ˗kwɛ ˗ya kë 20 ˈö ˈmii ˗zlanwopö. ˈˈKɛɛ a ˗ya ˈzü n ˗man ˗zoyödhe ˗wɔn ˗blɛɛ mɛn ˗nu ˗dhɛ ˗sü ˗bha, ˈa ˗an ˗dhɛ ˗zo ˗bo ˈwlaan˗ ˗ta. Pë ˈˈpɛpɛ ˈö n ˗kɔ ꞊mɔɔn˗ ˗bha a˗ ˗kë kö ˈa mɛn ˗nu ˗dhɛ, ˈyö sü ꞊dhɛ ˈwɔn ˈö Zoova waa Yesu ˈwo˗ ˗kë n ˗dhɛ bhë, ˗yö n ˗dhɛ ˗së ꞊dedewo.» (Ps. 103:1-4) ˈKö ˗kë ꞊dhɛ mɛn ˗nu ˗wo ˗nu ɛɛnˈˈ ˈwii nu, kwa kwa ˈgü ˗dɔ ˈˈgbɩɩ˗ ˈkwa ˗an ˗dhɛ ˗kplawo, ˈyö ˗tɔ ꞊dhɛ ˗a ˗kë ˈˈdhʋ̈ ˗sü ˗yö Zoova ˗dhɛ ˗së ꞊dedewo.
11. Kwa ˗bha ˈgüdɔgbɩɩsü kö ˈkwa mɛn ˗nu ˗dhɛ ˗zo ˗bo ˈwlaan˗ ˗ta bhë, Zoova ˗yö ˈdhuëë˗ ˗kpɔ ˗a ˗bha ˗kɔ ˗kë ꞊dhɛ? (Aggée 2:7)
11 Zoova ˗yö ˈdhuëë˗ ˗kpɔ kwa ˗bha ˈgüdɔgbɩɩsü kö ˈkwa mɛn ˗nu ˗dhɛ ˗zo ˗bo ˈwlaan˗ ˗ta bhë, ˗a ˗bha. ˈKö ˗kë ꞊dhɛ Kolona virisö ˗wɔn ˈgü ˗wo kwa ꞊kɛɛ˗ ˗kan pë ˈbha ˗nu kë ˗sü ˗bha ˗kwɛ 2021 ˈö ˗ʒiö yö ˗a ˈgü, mɛn 21.367.603 ˈnën ˈwo nu ˗zo ˗bo ˈwlaan˗ ˗ta. ˗Wo ˗ʒiö Zoova ˗dhɔkëmɛn ˗nu ˈwo kpɔnŋtaadhɛ ˗todhʋ̈sü ˈgü ˗an ˗ta ˗gɛnɲan ˈka ꞊plɛ waa ö ˈˈgbu. Gagade ˗mü ꞊dhɛ mɛn ꞊va ˗bha ˗kë ˗a ˗ta ˗sü ˈyaa ˈnën ˈö˗ ˗wɔn ˈdhö ˈˈgbɩɩ˗ Zoova ˗gɔ. Mɛn ˗nu ˈwo nu ˗zo ˗bo ˈwlaan˗ ˗ta ˈnën ö ˈˈtʋ̈ŋ ˗kë ˗an ˈgü do do ˈka ꞊ʒiaan. (Dhu. 15:7; 1 Tim. 2:3, 4) ˗Yö ˗ga ˗sü ˈka kwa ˈgü ꞊dhɛ Zoova ˗bɔ kwa ˗bha mɛn ˗nu ˗dhɛ ˗zo ˗bo ˈwlaan˗ ˗ta ˗sü ˗ta, ˈö kwa ˗takun kö ˈkwa zuʋ̈puumɛn ˗nu ꞊slɔɔ.—Aggée 2:7 ˗wo pö.
ˈˈTƲ̈Ŋ ˈˈGBƖƖ˗ ˈGÜ, ZOOVA ˗DHƆKËMƐN ˗NU ˗WO ˗ZO ˗BO ˈWLAAN˗ ˗KË
Zoova ˗yö ˈdhuëë˗ ˗kpɔ kwa ˗bha ˈgüdɔgbɩɩsü kö ˈkwa ˗zo ˗bo ˈwlaan kë bhë, ˗a ˗bha. (Kpɔɔˈˈ ˗wo ˗bhüöö kpö 12 ˈgü.) f
12. ˗Mën ˗nu ˈwo ꞊mɔɔn˗ ˗bha kö ˗wo ˗zo ˗bo ˈwlaan˗ kë ˗sü kë kwa ˗gɔ ˈˈgbɩɩ˗? (Pë ˈˈbin ˈö bhë ˗a ˗ga.)
12 Yesu ˗ya ˗pö ꞊dhɛ ˈˈtʋ̈ŋ ˗totaabhasü ˈgü, kwa ˗dho bɔ ˈwɔn ˈˈgbɩɩ˗ suu ꞊va ˈgü. ˗A ˗bha ˗nu ˈnën ˈwo ˗tɔ kwa ˗bha ˈkɔdhigümɛn ˗nu ˗bha ˗gban kwa ˗gɔ ˗sü, kwa ˈˈklʋʋbhɔsü, ˗gblü ˗nu, ˈˈyua ˈˈgbɩɩ˗ ˗nu waa ˈwɔn ˈˈgbɩɩ˗ ˈˈwɛɛ ˈbha ˗nu. (Mat. 10:36; Mak. 13:9; Dhu. 21:10, 11) ꞊Ya kë ꞊shiöŋ ˈwɔn ˈˈgbɩɩ˗ ˗nu ˈwo bhë ˗wa ˗kë ˈö ˗zo ˗bo ˈwlaan˗ kë ˗sü ˗kë kwa ˗gɔ ˈˈgbɩɩ. ˗Kɔ ˈö kwa ꞊dhegblü ˗nu ˗wa ˗kë ˗a ˈka kö ˈwo ˈwlaan˗ kë waa ˗kɔ ˈö Zoova ˗yö ˗an ˗takun ˗a ˈka, ˗kwaa ˗ga.
13. ˈDhɛ Aatɛmö ö ˈgü dɔ ˈˈgbɩɩ˗ kö ˈö ˗zo ˗bo ˈwlaan˗ kë ˗kasho ˈgü, Zoova ˗ya ˗takun ˗kɔ ˗kë ꞊dhɛ?
13 ˗Wa kwa ˗da ˗kasho ˈgü. Kwa ꞊dhegblü ˗nu ˈwo ˗an ˗da ˗kasho ˈgü ˗an ˗bha ˗zoyödhe ˗wɔn ˈgü, ˗wo pë ˈˈpɛpɛ ˗kë kö ˈwo Yesu ˗bha ga ˗zo ˗bo ˈwlaan˗ kë. ˗Kwa Aatɛmö ˗bha ˈwɔnzuan ˗ga. ˗Zo ˗bo ˈwlaan˗ ˈˈtʋ̈ŋ ˈö kun ˗kwɛ 2020 ˈgü bhë ˗a ˈka, ˗yö ˗kun ˗kashokɔ ˈˈsɔɔsɔ ˈö mɛn ˈˈsoodhu kun mü, ˗a ˈgü. ˈKö ˗kë ˈˈdhʋ̈, ˗yö ö ˈgü ˗dɔ ˈˈgbɩɩ˗ ˈö ˗zo ˗bo ˈwlaan˗ ˗kë ˗a ˈka pë ˗nu ꞊slɔɔ, kö ˈö˗ ˈˈdhɛɛtadhiaŋ˗ zë ö ˗de ˈˈpiʋ̈. ˈˈKɛɛ kashokɔ ˈö bhë ˗a ˈgü mɛn ˗nu ˗kun ꞊shɛti mü ˗ni ˈgü ˈö ˗an ˈˈdhiwo kun ˈya˗ ˈgbɛ. ˈDhɛ ˗kë ˈˈdhʋ̈, ˈmën Aatɛmö ˗ya ˗kë? ˗Ya ˗pö ˗an ˗dhɛ ꞊dhɛ ˗wo dɔ ˈˈgbɩɩ˗ kö ˗wo wo ꞊kwaa ꞊shɛti mü ˗sü waa ˈˈdhiwo yaa ˗zü ˈˈlɛlɛ do ˈˈpiʋ̈. ˗Wo ˗wɩ ˗a ˗bha, ˈö˗ ˈwɔn ˗yö Aatɛmö kun ꞊dedewo. Aatɛmö ˗ya ˗pö: «ˈDhɛ ˗kë ˈˈdhʋ̈, ˈyö ˈa˗ pö a ˗dho pë ˈö ˗zo ˗bo ˈwlaan˗ ˈdhö˗ ˈka, ˗a blɛɛˈˈ ˗an ˗dhɛ.» ˈKö ˗kë ꞊dhɛ ˈwii ˈˈwɩ˗ ˗bha, ˈdhɛ ˈwo Aatɛmö ˗ga kö ˗yö ˗zo ˗bo ˈwlaan˗ kë ˗ni ˈgü, ˈö ˗an ˈˈtʋ ˗da ˗wo ˈö˗ pö ˗a ˈgü, ˗wo dhɛɛˈˈ ꞊va ˗kpɔ ˗a ˗gɔ.
14. Kolona virisö ˈˈtʋ̈ŋ ˈgü, ˈmën Zoova ˗dhɔkëmɛn ˗nu ˗wa ˗kë kö ˗zo ˗bo ˈwlaan˗ ˗yö kë ˗dhɛ ꞊gban ˈgü?
14 Kolona virisö ˈˈtʋ̈ŋ ˈgü. ˈDhɛ Kolona virisö ˗yua ˗yö ˗pɛn, Zoova ˗dhɔkëmɛn ˗nu ˈwaa kun ˗ya ˗ni ˈgü ˗dhɛ do ˗bha kö ˗wo ˗zo ˗bo ˈwlaan˗ kë. ˈˈKɛɛ ˈkö ˗kë ˈˈdhʋ̈, ˈwii ˈˈkan ˗a kë ˗sü ˗bha. d ˗Dhɛ ˗nu ˈö ɛntɛnɛtö ˈdhö˗ ˗bha ˗zlanwokɔdhi ˗nu ˈwo mü, ˗wo wo ˗bha ˗kë parɛ ˈˈdhiʋ̈. ˈYö mɛn ˈˈmliɲɔn ꞊va ˈö ɛntɛnɛtö ˈyaa ˗an ˗gɔ ˈpö ꞊wɛ? ˗An ˗bha Betɛdhögümɛn ˗nu ˗wo pë ˈˈpɛpɛ ˗kë kö ˗yö bɔ tele ɛɛnˈˈ ꞊ladio ˈgü. ˗Ya ˈgo mü ˈzü, ˗wo ˗zo ˗bo ˈwlaan˗ ˈˈdhɛɛtadhiaŋ˗ ꞊dhiëëta ˗wo ˈö ˗ʒiö 500 ˗ta ˗a ˈgü kö ˈˈsɛ ˈˈpian ˗nu ˈwo mü ꞊gblɛɛn ˗a ˈgümɛn ˗nu ˗wo ˈwlaan˗ bhë ˗a kë ˈpö. ꞊Taabha, kwa ꞊dhegblü ˈbha ˗nu ˗wo wo ˗de ˗nu kö ˈwo ˈdho ˗a ˈˈdhɛɛtadhiaŋ˗ ˗nu ˈwo ˈˈdhʋ̈ ˗an ˈka ˗an ꞊dhiaa.
15. ˗Gleŋ ˗mɛɛn ˈö ˈkwa˗ sü Biblö ꞊klaŋnëndhe do ˈwo˗ ˗dhɛ Su ˗a ˗bha?
15 Kwa ˗bha ˈkɔdhigümɛn ˗nu ˗wa ˗gban kwa ˗gɔ. Mɛn ˈbha ˗nu ꞊waa˗ pö ˈwo ˗zo ˗bo ˈwlaan˗ kë ˗an ˗bha ˈkɔdhigümɛn ˗nu ˗gban ˗an ˗gɔ. Biblö ꞊klaŋnëndhe do ˈwo˗ ˗dhɛ Su, ˗kwaa ˗bha ˈwɔnzuan ˗ga. ˗Kwɛ 2021 ˈgü kö ˗zo ˗bo ˈwlaan˗ kë ˗yi ˗ya ˈto do, Su ˗ya ˗pö ˈö ˗bha Biblö ꞊klaŋgɔmɛn ˗dhɛ ꞊dhɛ ö ˗bha ˈkɔdhigümɛn ˗nu ˗bha ˗gban ö ˗gɔ ˗sü ˗wɔn ˈgü, ˈyaa ꞊mɔɔn˗ ˗bha kö ˈö ˗zo ˗bo ˈwlaan˗ kë. Kwa ꞊dhegblüdhe ˗yö Dhukö 22:44 ˗wo pö ˗a ˗dhɛ, ˈö˗ pö ˗a ˗dhɛ ꞊dhɛ kwa bɔ ˗ni ˈgü ˈwɔn ˈˈgbɩɩ˗ ˈgü, kwa dua ˗mü kö ˈkwa ˈto Yesu ˗bha ˈwɔnzuan ˈˈpiʋ̈ ˈkwa bhɛɛˈˈ Zoova ˗dhɛ. ꞊Ya ˈgo mü, kö ˈkwa kwa ˗zo yö Zoova ˗dhɛ kwa zuʋ̈ˈˈ ꞊gban ˈka. ˗Dhɛ ˈö˗ ˗ta ˗dhɛ ˗yö kpɔɔ Su ˗yö ˗zo ˗bo ˈwlaan˗ ˗kë ˗a ˈka pë ˗nu ˗slɔɔ, ˈyö dhiapiʋ̈ ˗bhɔkwëë ˗ga jw.org ˗ta. ˈDhɛ ˈkwa dɔ ˈˈdooka, ˈyö ˗da ö ˗gɔ ˈkɔɔ ˈö ˈˈkwɛɛ ˗ta ˈö ˗blü ˈö ö ˈˈtʋ to ˗zo ˗bo ˈwlaan˗ ˈˈdhɛɛtadhiaŋ˗ ˗bha telefɔnö ˈˈdhiʋ̈. ꞊Taabha, ˗yö ˈsëëdhɛ ˗bɔ kwa ꞊dhegblüdhe ˗dhɛ ˈö˗ pö: «Ü n ꞊faanmën ꞊dedewo ɲaandhiʋ̈. A n ˈgü ˗dɔ ˈˈgbɩɩ˗ ˈa ˗zo ˗bo ˈwlaan˗ ˗kë, ˈö Zoova n ˗takun. N zuʋ̈ˈˈ ˈˈgblü ˗ya dhi ˈgbɛ!» ˈWɔn suu ˗nu ˈwo ˈˈdhʋ̈ ˈkwa kë ˗an ˈgü, Zoova ꞊mɔɔn˗ ˗bha ˈö kwa ˗takun ˗ee?
16. ˈMën ˗kë ˈö ga kwa ˈgü ꞊dhɛ ˈkwa kwa ˈgü dɔ ˈˈgbɩɩ˗ kö ˈkwa ˗zo ˗bo ˈwlaan˗ kë, Zoova ˗dho kwa ˗takun? (Wlɔmö 8:31, 32)
16 ˈKwa kwa ˈgü dɔ ˈˈgbɩɩ˗ kö ˈkwa ˗zo ˗bo ˈwlaan˗ kë, ˗yö ˗kë Zoova ˗dhɛ ˗së ꞊dedewo. ˈWɔn ˗së ˈö˗ ˗kë kwa ˗dhɛ bhë ˈkwa˗ ˈˈnuɛ bho ˗a ˗bha, ˗yö ga kwa ˈgü ꞊dhɛ ˗yö ˗dho ˈdhuëë˗ ˈkpɔ kwa ˗bha. (Wlɔmö 8:31, 32 ˗wo pö.) ˈDhɛ ˈˈdhʋ̈, ˗kwa pë ˈˈpɛpɛ kë kö ˗zo ˗bo ˈwlaan˗ ˈö ˗kwɛ ˈö yö˗ ˈka ˈkwa˗ kë, kö ˗a ˈˈtʋ̈ŋ ˗ya ˗wo ˈkwa kwa ˈgü dɔ ˈˈgbɩɩ˗ ˈkwa kwa ˗bha ˗zlanwopösü ˗dadhiʋ̈.
ˈˈTAN 18 ˗Kwa ˗Zlan ˈˈnuɛ bho ˗gɔtadhɔpë ˗wɔn ˈgü
a ˗Tɛɛdhooʒiaando ˈö ˗kë ˗kwɛ 2023 Avlidhö 4 ˈka bhë ˗a ˈka, mɛn ˈˈmliɲɔn ꞊va ˈwo ˈˈkpɔnŋtaadhɛ ˗todhʋ̈sü ˈgü ˗wo ˗dho Klito ˗bha ga ˗zo ˗bo ˈwlaan˗ kë. ˗A mɛn ꞊vadhɛ ˈwo bhë, ˗an ˗bha ˗nu ˗a ˗ta ˗sü ˗blɛɛsü ˗mü. ˗A mɛn ˈbha ˗nu ˗de ˈpö ˗wo ˗kun Zoova ˗bha ꞊Gbɛkiö ˗nu ˈka ˈˈdhiʋ̈ ˗be, ˈˈkɛɛ ˈö ˗an ˗kɔ ˗ya ꞊zɔɔ ˗Zlan ˗dhɔkësü ˗bha. ˗A ˗kwɛ ˗ya kë ꞊va ˈwii ˗zo ˗bo ˈwlaan˗ kë. ˗A mɛn ˈbha ˗nu ˈwo ˈdhö ˈzü, ˈwɔn ˈwo˗ ˈgü ˗ya ˗kë ˈö ˗nu ˗a ˗ta ˗sü ˗kë ˗an ˗kɔa ˈˈgbɩɩ˗. ˈˈKɛɛ ˗wo ˗dho pë ˈˈpɛpɛ kë kö ˗wo kë mü. Ka ˗kë ˈwɔn suu ˈˈoo ˗su ˈgü, ˗yö kë ka ˈˈɲaan ꞊dhɛ ˈka ka ˈgü dɔ ˈˈgbɩɩ˗ ˈka nu, ˗yö ˗dho kë Zoova ˗dhɛ ˗së.
b Mɛn ꞊vadhɛ ˗wa ˗pö ꞊dhɛ ˈdhɛ Yesu ö ˗bha ga ˗zo ˗bo ˈwlaan˗ ˗kë, ˈbluu˗ waa we ˗wo ˗kë ˗a kwi waa˗ ꞊ɲɔɔn ꞊dede ˈka. ˗Wa ˗pö ˈzü ꞊dhɛ ˈˈtʋ̈ŋ ˈˈpɛpɛ ˈö ˈkwa ˗zo ˗bo ˈwlaan˗ kë ˗a ˈka, kö kwa Yesu kwi waa˗ ꞊ɲɔɔn kë ˗ni ˈgü ˈˈsaa˗ ˈka.
c ˈYa ˈtɔ ˈbhaa ˗nu bho ˈˈgblʋʋ.
d Kpɔɔˈˈ ˈzü ˈwɔn ˗gɔ ˈö ˗kë « Le Mémorial de 2021 » ˈka ˈö jw.org ˗ta bhë, ˗a ˗bha.
