1. ˈMën ˗gblüdë Sadhomɔn ˗ya ˗zɔn kwa ˗dhɛ ˈö ˗ya ˗sü ˈka Ecclésiaste 7:20 ˈgü?

 ˗GBLÜDË Sadhomɔn ˗ya ˗pö: «Mɛn kpɛnŋdhö ˈö ˗yö ˈti ˈwɔn yaa kë do toŋtoŋdhö, ˈyaa ˈdhö ˈˈsɛ ˗ta.» (Eccl. 7:20) Pë ˈö˗ pö bhë gagade ˗mü. Kwa ˈˈpɛpɛ ˈwɔnyaakëmɛn ˗mü kwa ˈka. (1 Zn. 1:8) ˗A ˗wɔn ˈgü, kwa ˗bhawɔn ˗yö ˗Zlan waa mɛn ˈˈwɛɛ ˗nu ˗bha kwa ˗bhawɔn ˈto ˗sü ˗bha.

2. Kwa ˈˈtɔŋdë ˈˈgbɩɩ˗ ˈbha ˗ya kwa ˗bhawɔn ˈto, kwa ˗kë kwa ˗de ˈgü ꞊dhɛ?

² ˈˈTʋ̈ŋ ˈö ˈka ˈwɔn yaa ˗kë ˗a ˈka ka ˈˈtɔŋdë ˈˈgbɩɩ˗ do ˈka, ka ˗zo ꞊kun ˗a ˈˈpiʋ̈ ˗ee? ˈYaa za ˈgü ꞊dhɛ ka ˗kun ˗a ˈˈpiʋ̈ kö ˈwɔn ˈö bhë ˈka˗ baaˈˈ, kö ka ˗bha ˈˈtɔŋdëdhɛ ˗yö yö ö pinŋ˗ ˈgü. ˗A ˗wɔn ˈgü, ka ˗bhawɔntodhe ˗dhɛ ˗a ˗gɔ ka zuʋ̈ˈˈ ꞊gban ˈka. ˗Dhɛ ˈö ˗wɩ ˗a ˗bha ˈö ka ˗bhawɔn to, ka ˗kë ka ˗de ˈgü ꞊dhɛ? Ka ˗kë ka ˗de ˈgü ˗së, ˈö ka zuʋ̈ˈˈ ꞊nii ˗yö ˗da ꞊dedewo, ˈyaa ˈˈdhʋ̈ ˗ee?

3. ˈMën ˈkwa dho ˗a yö ˈwɔn ˗gɔ ˈö yö ˗a ˈgü?

³ Kwa˗ ˈˈpiʋ̈ ˈkwa kë Zoova ˈˈtɔŋdë ˈˈgbɩɩ˗ ˈka. ˈˈKɛɛ ˈˈtʋ̈ŋ ˈbha ˗nu ˈka, kwa ˗dho pë ˈbha pö ɛɛnˈˈ kwa ˗dho ˈwɔn ˈbha kë ˈö ˗shiö ˗a ˗dhɛ. ꞊Ya kë ꞊dhɛ ˗kɔ bhë ˗a ˈdhö, ˈmën ˗kë ˈö ꞊mɔɔn˗ ˗bha ˗yö ga kwa ˈgü ꞊dhɛ Zoova zuʋ̈ˈˈ ˈˈwɩ ˗sü ˈka˗ ˗bha kö ˗yö kwa ˗bhawɔn ˈto? Zoova ˗bha mɛn ˗bhawɔn ˈto ˗sü waa kwa ˗bha ˗an ˗bhokopiʋ̈dhɛ ˈnën ˗tɔ ˗mën? Ɛɛnˈˈ ˈzü de ˗nu ˈö Zoova ˗yö ˗an ˗bhawɔn to? Dhɛɛˈˈ ˗nu ˈwo bhë kwa ˗dho ˗an ˗yɔ ꞊slɔɔ ˈwɔn ˗gɔ ˈö yö ˗a ˈgü.

4. ˈMën ˗kë ˈö ꞊mɔɔn˗ ˗bha ˗yö ga kwa ˈgü ꞊dhɛ Zoova ˗ya ˈˈpiʋ̈ ˈö kwa ˗bhawɔn ˈto?

⁴ ˗Zlan ˗Wo ˗yö kwa ˗zogban ꞊dhɛ Zoova ˗ya ˈˈpiʋ̈ ˈö kwa ˗bhawɔn ˈto. ˈDhɛ Zoova ˗yö ö ˗de ˗zɔn Moizö ˗dhɛ Sinai ˗tɔn ꞊troo, ˗yö ˗bɔ ö ˗bha ˈˈkiö do ˗ta ˈö˗ pö: «Zoova, Zoova, ˗Zlan ˈö mɛn ˗nu ˗wëë ˗ya ˗kë, ˈö mɛn ˗nu ˗bhawɔn to, ˈö ˈwɔn ˈyaa ˗shiö ˗a ˗dhɛ ˈˈvaandhö, yö ˗mü. ˗A ˗bha ˗dhɔ ꞊dede waa gagade ˈö˗ ˈgü ˗an ˈˈyi ˈyaa bhʋ̈ʋ̈ˈˈ. ˗Yö ö ˗bha ˗dhɔ ꞊dede ˗zɔn mɛn ˈˈgblü ꞊va ˗dhɛ, ˈö mɛn ˗nu ˗bha ˈwɔn yaa ˗nu ˗bhawɔn to.» (Ex. 34:6, 7) Zoova ˈˈgblü ˗yö ˗së, ˈö mɛn ˗nu ˗wëë ˗ya ˗kë. ˗Ya ˈˈpiʋ̈ kö ˈwɔnyaakëmɛn ˈö ˗ya ˈgo ö ˗bha ꞊sɔnŋ yaa ˈgü, ˈö˗ ˗bhawɔn ˈto.—Néh. 9:17; Ps. 86:15.

5. ˈKwa ˗dhɛ ˗ga Psaume 103:13, 14 ˈgü, ˗a kë ˗sü kö Zoova ˗yö mɛnbhɩɩdhe ˗nu dɔ ˗së ˈka bhë, ˗ya ˗blü ˗mën kë ˗sü ˗bha?

⁵ ˈDhɛ ˗kë ꞊dhɛ Zoova ˈnën kwa ˗da, ˈwɔn ˈˈpɛpɛ ˈö ˗gban mɛnbhɩɩdhe ˗nu kwa ˗bha do do ˈka, ˗ya ꞊gban ˗dɔ. (Ps. 139:15-17) ˗Ya kë ˈˈdhʋ̈, kö ˈwɔn yaa kë ˗dhii ˈö ˈkwa˗ sü kwa ˈˈbhɛman ˗nu ˗bha bhë, ˗kɔ ˈö˗ ˈka kwa kwi ˈgü ˗ya ˗yö. ˈWɔn ˗nu ˈö ˈkwa bɔ ˗an ˈgü kwa ˗bha ˗tosɛta ˈgü ˈö ˈwo kwa ˗kë mɛn suu ˈö ˈkwa˗ ˈka ꞊dɛɛ ˗a ˈka, ˗yö ˗an ˗dɔ ˈpö. Zoova ˗bha mɛnbhɩɩdhe ˗nu ˗dɔ ˗së ˈka ˗sü ˗ya ˗blü ˗mën kë ˗sü ˗bha? ˗Ya ˗blü kwa ˗bhawɔn ˈto ˗sü ˗bha.—Ps. 78:39; Psaume 103:13, 14 ˗wo pö.

6. ˗Mën ˈö˗ ˗zɔn ꞊dhɛ Zoova ˗ya ˈˈpiʋ̈ ˈö kwa ˗bhawɔn ˈto?

⁶ Zoova ꞊yaa˗ ˗zɔn ˈsaadhö ꞊dhɛ ö˗ ˈˈpiʋ̈ ˈö kwa ˗bhawɔn ˈto. ˗Ya ˈwɔn ˗dɔ ꞊dhɛ kwa ˈˈbhɛman Adan ˗bha ˈwɔn yaa ˈö˗ ˗kë ˗a ˗wɔn ˈgü, mɛn ꞊gban ˈˈpɛpɛ kwa ˈwɔnyaakësü waa ga ˗an ˗gɔ ꞊dhuëŋdhɛ ˈgü. (Wlɔ. 5:12) ˈKwaa ꞊mɔɔn˗ ˗bha ˗be toŋtoŋdhö kö ˈkwa kwa ˗de ɛɛnˈˈ mɛn ˈˈwɛɛ ˗nu bho ꞊dhuëŋdhɛ ˈö ˈˈdhʋ̈ ˗a ˈgü. (Ps. 49:7-9) ˈˈKɛɛ kwa ˗bha ˗Zlan ˈö kwa ˗dhɔ ˗ya ˗kë bhë, ˗yö kwa ˗bho ˈˈgan ˈgü, ˈyö sü ꞊dhɛ kwa ˗wëë ˗ya ˗kë. ˗Mën ˈö˗ ˗kë? Zan 3:16 ˗ya ˗zɔn ꞊dhɛ ˗a Gbö dosɛnŋ ˈö˗ ˗gɔ bhë ˗ya ˗bɔ kö ˗yö ga kwa ˗wɔn ˈgü. (Mat. 20:28; Wlɔ. 5:19) Yesu ˗yö kwa ˗duɛɛ ˗sü ˈö saanˈˈ sü ˈö dho ˈö ga˗ ˈka, kë ˈˈdhʋ̈ kö mɛn ˈˈpɛpɛ ˈwo dho ˈdhaŋ˗ bho ö ˈˈdhiʋ̈ ˗wo dha. (Ebl. 2:9) ˈDhɛ Zoova ˗yö ˗kpan ö Gbö ˗bha kö ga ˈlëësü, ˈˈdhiʋ̈dhiʋ̈sü suu ˈö ˈˈdhʋ̈ ˗ya wo ˗ni ˈgü, ˗yö ˗mën ˗a ˈka ꞊dedewo. ꞊Ya kë ꞊dhɛ Zoova ˈyaa˗ ˈˈpiʋ̈ ˗be ˈö kwa ˗bhawɔn ˈto, ˗yo ˈti ˗dho ö ꞊kwaa˗ ö Gbö ˗zü kö ˗yö ga.

7. Mɛn ˗nu ˈö Zoova ˗yö ˗an ˗bhawɔn to ö zuʋ̈ˈˈ ꞊gban ˈka, ˗a mɛn ˈbha ˗nu ˈnën ˈwo ˗tɔ de?

⁷ Mɛn ˗nu ˈwo ˈwɔn yaa ꞊gbɔɔnsü ˗nu ˗kë, ˈˈkɛɛ ˈö Zoova ˗yö ˗an ˗bhawɔn to ö zuʋ̈ˈˈ ꞊gban ˈka, ˗a  ˈwɔnzuan ꞊va ˗wo Biblö ˈgü. (Efɛ. 4:32) De ˈö ˈka ka ˗zota ˗a ˈgü? ˗A ˈbha ˗ya kë kö ka ka ˗zota ˗gblüdë Manase ˗wɔn ˈgü. ˗Gblüdë ˈö bhë ˗yö ˈwɔn yaa ꞊va ꞊dede ˗kë Zoova ˈˈɲan ˈˈdhiʋ̈. ˗Yö ˗yö mɛn ˗nu ˗dhɛ ˈˈdhiʋ̈ ˈö ˈwo ꞊sua ˗zlan ˗nu ˗dhɔkë. ˗Yö ö ˗de ˗bha ˈnën ˗nu ˗zë, ˈö ˈˈsaa˗ bho ˗an ˈka ꞊sua ˗zlan ˗nu ˗dhɛ. ˗Yö ˗dho ˗ʒiaanwo ˈö ꞊sua ˗zlan ˈˈbin ˗yökë, ˈö˗ dɔ Zoova ˗dhɔkëdhɛ ˈˈslʋ̈ʋ̈slʋ̈ ˈgü. Biblö ˗ya ˗pö: «˗Yö ˈwɔn yaa ꞊gbɔɔnsü ˗kë Zoova ˈˈɲan ˈˈdhiʋ̈ ö ˗de ˈˈɲaan, kë ˈˈdhʋ̈ kö ˗yö ˈmën ˗a ˈka.» (2 Chron. 33:2-7) ˈˈKɛɛ ˈdhɛ Manase ˗yö go ö ˗bha ꞊sɔnŋ yaa ˈgü ö zuʋ̈ˈˈ ꞊gban ˈka, Zoova ˗ya ˗bhawɔn ˗to. ˗Zlan ˗yö ˗wɩ ˗a ˗bha kö ˗yö kë ˈzü ˗gblüdë ˈka. (2 Chron. 33:12, 13) ˗A ˈbha ˗ya kë ˈpö kö ka ka ˗zota ˗gblüdë Davi ˗bha ˈwɔnzuan ˈgü. ˗Yö ˈwɔn yaa ꞊va ˗kë Zoova ˈˈɲan ˈˈdhiʋ̈, ˈö ˗da mɛn ˗nu ˗bha dhe ˈˈpiʋ̈ ˈö dho ˈö˗ ꞊gɔɔn zë. ˈˈKɛɛ ˈdhɛ ˗wɩ ˗a ˗bha ꞊dhɛ ˈwɔn ˗ya zë ö ˗gɔ, ˈö go ö ˗bha ꞊sɔnŋ yaa ˈgü ö zuʋ̈ˈˈ ꞊gban ˈka, Zoova ˗ya ˗bhawɔn ˗to. (2 Sam. 12:9, 10, 13, 14) ˗Yö ꞊mɔɔn˗ ˗bha ˈö ga kwa ˈgü ꞊dhɛ Zoova ˗ya ˈˈpiʋ̈ ˈö kwa ˗bhawɔn ˈto. ꞊Dhɛ ˗kɔ ˈkwa dho ˗a yö ˗a ˈka bhë ˗a ˈdhö, Zoova ˗bha mɛn ˗bhawɔn ˈto ˗sü ˈyaa ꞊dhɛ mɛnbhɩɩdhe ˗nu ˗bha ˈdhö.

8. ˈMën ˗kë ˈkwa ꞊mɔɔn˗ ˗bha ˈkwa˗ pö ꞊dhɛ Zoova ˈnën ˗tɔ zadɔmɛn ˗së ꞊dede?

⁸ Zoova ˈnën ˗tɔ ‹za ˗dɔ ˈˈkpɔnŋtaamɛn ˈˈpɛpɛ ˗bha ˗mɛn.› (ˈWun. 18:25) Zakanmɛn ˗së dua ˗mü kö ˗yö ˈˈsɛ ˗bha ˈtɔŋ˗ ꞊gban ˈˈpɛpɛ ˈgüman ˗së ˈka. ˗Kɔ ꞊dede ˈö bhë ˈyö kwa ˗bha zadɔmɛn Zoova ˈdhö˗ ˈka, ˈyö ˗tɔ ꞊dhɛ yöö ꞊dede ˈnën ˈtɔŋ˗ ˗nu bhë ˗an dɔ. (Is. 33:22) Mɛn ˈbha ˈö dho ˈwɔn ˗së waa ˈwɔn yaa ˗an ˗bhokoo dɔ ꞊dhɛ Zoova ˈdhö, ˈyaa ˈdhö. ˗Mën ˈbha ˈö zadɔmɛn ˗së ˗bhawɔn ˈdhö˗ ˗bha? ˈWɔn ˗ya ˗da, ˗a dua ˗mü kö pë ꞊gban ˈˈpɛpɛ ˈö˗ ˈgü ˗ya ˈgüman ꞊köŋ, kö ˗yö ꞊kun za ˈˈkan. ꞊Ya kë ˈˈdhʋ̈, kö kwa ꞊mɔɔn˗ ˗bha ˈkwa˗ pö ꞊dhɛ Zoova ˈnën ˗tɔ Zadɔmɛn ˗së ꞊dede, ˈyö ˗tɔ ꞊dhɛ ˗yö ˈwɔn ꞊gban ˈˈpɛpɛ ˗dɔ.

9. ˗Mën ˈö Zoova ˗yö ˗gban ˗a ˗ta ˈö za dɔ?

⁹ Zoova ˈyaa ꞊dhɛ zadɔmɛn ˗nu ˈwo mɛnbhɩɩdhe ˗nu ˈka ˗an ˈdhö. ˈWɔn ˈˈoo ˗wɔn ˈö ˗wɔ ˗a ˈˈdhiʋ̈, ˈwɔn ˈsɛɛn˗ ꞊gban ˈˈpɛpɛ ˈwo ˗kë ˗a ˗züzü, ˗yö ˗an ˗dɔ. (ˈWun. 18:20, 21; Ps. 90:8) Pë ˈö mɛnbhɩɩdhe ˗nu ˗wa yö ɛɛnˈˈ ˈwo˗ man, ˈyö ˈwo ˗gban ˗a ˗ta. ˈˈKɛɛ Zoova ˗zë mɛn ˗ya ˈwɔn ˈbha kë, ˗yö ö ˗zota ˗a ˗mɛn ˈgodhɛ ˗nu, ˗kɔ ˈö˗ ˗mɛn ˗nu ˗wa ˗to ˗a ˈka waa pë ˈö˗ ˗mɛn ˗bha, ˗an ˈgü. ˗Ya ˈgo mü ˈzü, Zoova ˗yö ˗dhɛ ˗yö mɛn ˗nu zuʋ̈ˈˈ ˈˈpiʋ̈. Pë ˈö mɛn ˈö ˈdhö ˗a ˗blü ˈwɔn ˗nu kë ˗sü ˗bha, ˗ya ˗dɔ. ˈWɔn gbɛ˗ ˈyaa ˗bin ˗sü ˈka ˗a ˗gɔ. (Ebl. 4:13) ˗A ˗wɔn ˈgü, ˗a ˗bha mɛn ˗bhawɔn ˈto ˗sü ˗yö ˗gban ˗sü ˈka pë ˈö˗ dɔ ˈö ˗gban ˗a ˗mɛn ˗bha, ˗a ˗ta.

10. ˈMën ˗kë ˈkwa ꞊mɔɔn˗ ˗bha ˈkwa˗ pö ꞊dhɛ Zoova ˗yö za ˗dɔ mɛn ˗nu ˗bha kpɛnŋdhödhɛ ˈgü ˗kplawo? (Deutéronome 32:4)

¹⁰ Zoova ˗yö za ˗dɔ mɛn ˗nu ˗bha kpɛnŋdhödhɛ ˈgü ˗kplawo. ˈYaa mɛn ˗nu ˗zë ˈgü zë toŋtoŋdhö. ˗A ˗bha mɛn ˗nu ˗bhawɔn ˈto ˗sü ˈyaa ˗gban mɛn kwibhadhɛ, mɛn ˗bha ˗kë ꞊bhɔɔmɛn ɛɛnˈˈ ˈtɔbhɔmɛn ˈka ˗sü, ɛɛnˈˈ ˈzü ˗kɔmɔnwɔnbhasü ˈö˗ ˗mɛn ˗gɔ, ˗a ˗ta. (1 Sam. 16:7; Zak. 2:1-4) Mɛn gbɛ˗ ˗kɔ ˈyaa ꞊mɔɔn˗ ˗bha kö ˗yö ˈˈgbɩɩdhɛ wɔ Zoova ˗ta ɛɛnˈˈ kö ˗yö ˈmën ˗a ˈˈpiʋ̈. (2 Chron. 19:7) ˗Kɔ ˈö ˈwɔn ˗yö ˗shiö ˗a ˈka˗ ˗dhɛ ɛɛnˈˈ ˈö ˗yɛ ˗a ˈka˗ ˗bha, ˈyaa ˈnën ˗gban ˗a ˗ta ˈö ˈwɔn ˗nu ˗kë. (Ex. 34:7) Zadɔmɛn ˗së ꞊dede ˗mü Zoova ˈka, ˈyö ˗tɔ ꞊dhɛ ˗yö ˈwɔn ꞊gban ˈˈpɛpɛ ˈö ˗gban kwa ꞊dede waa ˈwɔn ˈö ˈkwa˗ ˈgü ˗a ˗bha, ˗an ˗dɔ.—Deutéronome 32:4 ˗wo pö.

11. Zoova ˗bha mɛn ˗bhawɔn ˈto ˗sü ˗yö ˗go mɛnbhɩɩdhe ˗nu ˗bha ˈˈpiʋ̈ ˗kɔ ˗kë ꞊dhɛ?

¹¹ Mɛn ˗nu ˈwo Biblö ˈˈpian ˈö Eblö ˗wo ˈgü bhë ˗a ˗bɛnzë, ˗wa ˗yö ˈˈpuu ˈka ꞊dhɛ Zoova ˗bha mɛn ˗nu ˗bhawɔn ˈto ˗sü ˈyaa ꞊dhɛ mɛnbhɩɩdhe ˗nu ˗bha ˈdhö. ˗A ˈˈpian ˈbha ˗nu ˈgü, Eblö ˗wo kpö ˗nu ˈwo˗ pö ˈö ˗gban mɛn ˗bhawɔn ˈto ˗sü ˗bha bhë,  ˈsëëdhɛ ˗be do ˗ya ˗pö «ˈwaa ꞊mɔɔn˗ ˗bha ˗wa pö ˈˈdhʋ̈ mɛnbhɩɩdhe ˗nu ˗bha mɛn ˗nu ˗bhawɔn ˈto ˗sü ˗bha. ˗Yö ˗gban ˗Zlan ˗bha ˈwɔnyaakëmɛn ˗nu ˗bhawɔn ˈto ˗sü dosɛnŋ ꞊nën˗ ˗bha.» Zoova yöö dosɛnŋ ˈnën ꞊mɔɔn˗ ˗bha kö ˗yö ˈwɔnyaakëmɛn ˗bhawɔn ˈto ˈpapadhö. ˈWɔn ˗së ˗mɛɛn ˈö ˈkwa˗ ꞊slɔɔ Zoova ˗bha kwa ˗bhawɔn ˈto ˗sü ˈgü?

12-13. (1) Zoova ˗ya mɛn ˗bhawɔn ˈto, ˈwɔn ˗së ˗mɛɛn ˈö˗ ˗mɛn ˗ya ꞊slɔɔ? (2) Zoova ˗bha mɛn ˗bhawɔn ˈto ˗sü ˈwɔn ˗së ˗kë mɛn ˗dhɛ ˈˈtʋ̈ŋ ꞊dhɛ ˈˈpiʋ̈?

¹² ˈKwa ˈˈwɩ Zoova ˗bha kwa ˗bhawɔn ˈto ˗sü ˗bha, ˗yö «˗ya ˗dɩ ˈflëë˗ ˈgü ˈˈtʋ̈ng» ˗nu kwa ˗dhɛ. ˗A ˗gɛn ˗mü ꞊dhɛ kwa zuʋ̈ˈˈ ˗yö ˈwaannu, ˈö ö bo za ˗dɔ kwa ˗bha ˗sü ˈka. (Këw. 3:19, 20) Zoova ˗ya kwa ˗bhawɔn ˈto, ˗mlɛɛn ˈö kwaa˗ ˗nu kwa ꞊zinŋgü ˗yö ˗yö ö pinŋ˗ ˈgü ꞊dhɛ ˈpë kwa ˈti ˈwɔn yaa kë ˗a ˈka do, ˗a ˈdhö.

¹³ Zoova ˗ya kwa ˗bhawɔn ˈto, ˈyaa ˗dɔn bho kwa ˈka ɛɛnˈˈ ˈyaa ˈwɔn bho kwa ˈgü ˗a ˗wɔn ˈgü ˈzüdho. (Is. 43:25; Jér. 31:34) ˗Yö kwa ˗bha ꞊sɔnŋ yaa ˗nu ˗blü kwa ˈka ꞊gblɛɛn ꞊dhɛ «˗kɔ do ˈö ˈˈɲaan˗ ˈgo ˗ʒian ˈdhö˗ ˗pö ˗ʒian ˈka ꞊gblɛɛn bhë» ˗a ˈdhö. * (Ps. 103:12) ˈKwa kwa ˗zota ˗kɔ ˈö Zoova ˗bha mɛn ˗bhawɔn ˈto ˗sü ˈdhö˗ ˈka ˗a ˈgü, ˗a ˈˈnuɛ bho zuʋ̈ga ˗kë kwa ˗gɔ, ˈö ˈkwa ˗suʋ̈ ˗a ˗gɔ. (Ps. 130:4) ˈˈKɛɛ de ˈö Zoova ˗ya ˗bhawɔn to?

14. ˗A ˈˈpian ˈdhɛ ˈkwa go ˗a draanˈˈ bhë, ˗mën ˈö˗ ˗zɔn kwa ˗dhɛ ˈö ˗gban Zoova ˗bha mɛn ˗bhawɔn ˈto ˗sü ˗bha?

¹⁴ ꞊Dhɛ ˗kɔ ˈö ˈkwa go ˗a yö ˗a ˈka bhë ˗a ˈdhö, Zoova ˗bha mɛn ˗bhawɔn ˈto ˗sü ˈyaa ˈsü ˈwɔn yaa ˗bha ˗kë ˈkpii˗ ˗sü ɛɛnˈˈ ˗a ˗bha ˗kë ˈˈtɩtɩ ˗sü ˗bha. Kwa˗ ˗yö ˈpö ꞊dhɛ Zoova ˗bha ˗kë kwa ˗Damɛn, ˈtɔŋ˗ ˗dɔ kwa ˗ta ˗mɛn waa kwa ˗bha Zadɔmɛn ˈka ˗sü ˗wɔn ˈgü, pë ˗nu ˈö ˗an dɔ ˈyö ˗gban ˗an ˗ta ˈö mɛn ˗bhawɔn to. ˗Mën ˗nu ˈö Zoova ö ˈˈtʋ̈ŋ ˗kë ˗an ˈgü?

15. ˈKwa ˗dhɛ ˗ga Dhukö 12:47, 48 ˈgü, pë ˗nu ˈö Zoova ö ˈˈtʋ̈ŋ ˗kë ˗an ˈgü ˗a do ˈnën ˗tɔ ˗mën?

¹⁵ Pë ˗nu ˈö Zoova ˗yö ˗an ˗ga ˗a do ˈnën ˗tɔ ꞊sɔnŋyaakëmɛn ˗bha ˗wɩ ˗a ˗bha ˗sü ˈö ꞊dhɛ ˈya ˈwɔn yaa kë. Yesu ˗ya ˗zɔn ˈˈdhʋ̈ ˈˈpuu ˈka Dhukö 12:47, 48 ˈgü. (˗A ˗wo pö.) Mɛn ˗ya pë ˈö yö ꞊dede ˈö˗ ˈwɔn dɔ ꞊dhɛ ˈyaa Zoova ˗dhɛ ˗së ˗a kë ˗sü ˗yökodhiʋ̈ kë, ˗ya ˈdho ꞊yaa˗ kë, kö ˗ya ˈwɔn yaa ꞊gbɔɔnsü kë. Mɛn suu ˈö ˈˈdhʋ̈ ˗a ˈbha ˗ya kë, ˗Zlan ˈyaa ꞊mɔɔn˗ ˗bha kö ˗ya ˗bhawɔn ˈto. (Mak. 3:29; Zan 9:41) ˈˈKɛɛ ˈˈtʋ̈ŋ ˈbha ˗nu ˈka ˈpö, kwa ˈwɔn ˈbha ˗nu ˗kë, ˈö ˈkwa˗ yö ꞊taabha ꞊dhɛ ˈwɔn  yaa ˗mü. ꞊Ya kë ˈˈdhʋ̈, Zoova ꞊mɔɔn˗ ˗bha kö ˗yö kwa ˗bhawɔn ˈto ˗ee? ꞊Ii! ˈYö ˗tɔ ꞊dhɛ pë ˈbha ˗yö ˗dhö ˈzü ˈö ö ˈˈtʋ̈ŋ ˗kë ˗a ˈgü.

16. (1) ˗Mën ˈö ˗tɔ ˗go ꞊sɔnŋ yaa ˈgü ˗sü? (2) ˈKwa˗ pö Zoova kwa ˗bhawɔn ˈto, ˈmën ˗kë kwa dua ˈdhö ˗mü ˈkwa˗ kë ˈˈdhʋ̈?

¹⁶ Pë do ˈö Zoova ˗ya ˗ga ˈzü ˈyö ˗tɔ mɛn ˈö ˈwɔn yaa ˗kë ˗a ˗bha ˗go ö ˗bha ꞊sɔnŋ yaa ˈgü ˗sü ˈö ö zuʋ̈ˈˈ ꞊gban ˈka. ˗Mën ˈö ˗tɔ ˗go ꞊sɔnŋ yaa ˈgü ˗sü? ˗Go ꞊sɔnŋ yaa ˈgü ˗sü ˈnën ˗tɔ ‹kwa ˗zotagüwɔn ˗nu, kwa ˈˈtakɔ ˗nu waa ˈwɔn ˗nu ˈö ˈkwa˗ ˈˈpiʋ̈ ˈkwa ˗an kë, ˗an ˗bho ˈˈgblʋʋ ˗sü.› ˗Yö ˗gban ˈpö mɛn ˈö ˈwɔn yaa ˗kë ɛɛnˈˈ ˈö kun ˈwɔn ˗së ˈbha kë ˗sü ˈka, ˗a zuʋ̈ˈˈ ˗bha ˗to ˈzlöö ˗sü ˗bha. Mɛn ˈö˗ ˈˈpiʋ̈ ˈö ˈgo ö ˗bha ꞊sɔnŋ yaa ˈgü, ˗wëë ˗yö ˗kpɔ ˗a ˗ta ˈwɔn yaa ˈö˗ ˗kë, ˗a ˗wɔn ˈgü. ˈˈKɛɛ ˗ya ˈwɔn ˗dɔ ˈpö ꞊dhɛ waa Zoova wo ˗bha ˈˈtɔŋdëdhɛ ˗wɔn ˈsü ˈö˗ wo ˗bhaa ˈka, ˈyö dho ˈö ˗pö ˈwɔn suu ˈö ˈˈdhʋ̈ ˗a ˈgü. Kwa ˗zo ˈya ˗dho bhɔ ꞊dhɛ ˗gblüdë Manase waa Davi ˗wo ˈwɔn yaa ꞊gbɔɔnsü ˗kë, ˈˈkɛɛ Zoova ˗yö ˗an ˗bhawɔn ˗to, ˈyö ˗tɔ ꞊dhɛ ˗wo ˗go wo ˗bha ꞊sɔnŋ yaa ˈgü wo zuʋ̈ˈˈ ꞊gban ˈka. (1 Rois 14:8) ˈKwa ˈgo kwa ˗bha ꞊sɔnŋ yaa ˈgü kwa zuʋ̈ˈˈ ꞊gban ˈka Zoova ꞊yaa˗ yö, ˗yö kwa ˗bhawɔn ˗to. ˈˈKɛɛ ˈwɔn yaa ˈö ˈkwa˗ ˗kë ˗a ˗bha ˗mën kwa ˈka ˗sü dosɛnŋ ˈyaa ˈnën ˗tɔ ˗a ˈˈdhɛ. Kwa dua ˗mü ˈkwa pë ˈbha kë ˈzü. * Pë ˗nu ˈö Zoova ˗yö ˗an ˗ga ˈpö ˈö ꞊kun mɛn ˗bhawɔn ˈto, ˗a do ˗mü.

17. (1) ˈMën ˗tɔ ˗kë mɛn suu ˗dɛɛ ˈka ˗sü? (2) ˈMën ˗kë ˈö˗ ˗wɔn ˈdhö ˈˈgbɩɩ˗? (Isaïe 55:7)

¹⁷ Pë ˗wɔngbɩɩsü do ˈö Zoova ˗ya ˗ga ˈzü ˈyö ˗tɔ kwa ˗bha ˗kë mɛn suu ˗dɛɛ ˈka ˗sü. ˗Kë mɛn suu ˗dɛɛ ˈka ˗sü ˈnën ˗tɔ ˗kan ˈwɔn yaa ˈö ˈkwa˗ ˗kë ˈˈdhiʋ̈ ˗be ˗a ˗bha ˗sü kö ˈkwa ˗tosɛta kë ꞊dhɛ ˗kɔ ˈö Zoova ˈdhö˗ ˈˈpiʋ̈ ˈkwa˗ kë˗ ˈka, ˗a ˈdhö. (Isaïe 55:7 ˗wo pö.) Mɛn ˈö˗ ˈˈpiʋ̈ ˈö kë mɛn suu ˗dɛɛ ˈka, ˗a dua ˗mü kö ˗yö ö ˗zota ˗kɔ ˗nu bho ˈˈgblʋʋ, ˗yö ö ꞊kwaa Zoova ˗bha ˈwɔn yö ˗kɔ ˗zü kö ˗yö ˈˈdhiʋ̈sü ˗a ˈka. (Wlɔ. 12:2; Efɛ. 4:23) ˗A dua ˗mü kö ˗yö ˈˈkan ˗zotadhe waa ˈˈtakɔ yaa ˈö kun ˗an ˈgü ˗be, ˗an ˗bha. (Kodh. 3:7-10) Gagade ˗mü ꞊dhɛ kwa ˗bha ˗zoyö Yesu ˗bha ˈˈsaa˗ ˈö˗ bho bhë ˗a ˗dhɛ ˗sü ˈnën Zoova ˗gban ˗a ˗ta ˈö kwa ˗bhawɔn to, ˈö ˈkwa ˗kë ˈˈslʋ̈ʋ̈slʋ̈ ˗a ˈˈɲan ˈˈdhiʋ̈. ˈˈKɛɛ ˈkwa˗ pö Zoova ˗yö ˗gban ˈˈsaa˗ ˈö bhë ˗a ˗ta kö ˗yö kwa ˗bhawɔn ˈto, kwa dua ˗mü ˈkwa˗ ˗zɔn ˗a ˗dhɛ ꞊dhɛ kwa kwa  ˈgü dɔ ˗ni ˈgü ˈˈgbɩɩ˗ kö ˈkwa kwa ˈˈtakɔ ˗nu bho ˈˈgblʋʋ.—1 Zn. 1:7.

18. ˗Mën ˈö ˈkwa˗ yö ˈö ˗gban Zoova ˗bha mɛn ˗bhawɔn ˈto ˗sü ˗bha?

¹⁸ ˈWɔn ˗nu ˈkwa ˗ʒiö ˗an ˈgü ˈdɔɔndhö bhë, ˗kwaa ga ga ˗nu ˗wɔn blɛɛˈˈ ˈdɛdɛ ˈka. Zoova ˈnën ˗tɔ mɛn ˗bhawɔn ˈto ˗mɛn ˈkpii˗ ꞊dede ˈö ˗dhö ˈˈkpɔnŋ ꞊taa. ˈMën ˗kë ˈkwa˗ pö ˈˈdhʋ̈? ˗A ˗gɛn ˗blɛɛsü ˈnën ˗tɔ ˗a zuʋ̈ˈˈ ˈˈwɩ ˗sü ˈka ˗a ˗bha ˗kplawo kö ˈö mɛn ˗bhawɔn ˈto. ˗A ꞊plɛ ˗bha ˗naan ˈnën ˗tɔ ˈwɔn ˈˈpɛpɛ ˈö ˗gban kwa ˗bha, ˗ya ˗dɔ. ˗Ya ˈgo mü ˈzü, yö ˈnën dɔ ˗sü ˈka ˗së kö ˗ya kë ꞊dhɛ ˈkwa ˈgo kwa ˗bha ꞊sɔnŋ yaa ˈgü ꞊dedewo, ˗ya ˈwɔn dɔ. ˈYö˗ ˗yaaga ˗bha ˗naan ˗kë ꞊dhɛ Zoova ˗ya kwa ˗bhawɔn ˈto, ˗ya ˗bho ö ˗zo ˗bha ˈpapadhö ꞊dhɛ ˈpë kwa ˈti ˈwɔn yaa kë do toŋtoŋdhö ˗a ˈdhö. ˗Ya kë ˈˈdhʋ̈, kwa zuʋ̈ˈˈ ö ˗bo za ˗dɔ kwa ˗bha ˗sü ˈka, ˈö kwa ˈˈdhiaa ˗yö ˗da ˗a ˈgü.

19. ˈKö ˗kë ꞊dhɛ ˈwɔn yaa kë ˗dhii ˈö kwa ˗bha bhë ˗yö kwa ˗pö ꞊sɔnŋ yaa ˈgü ˗kplawo, kwa zuʋ̈gblüdhi ˗gɛn ˈnën ˗tɔ ˗mën?

¹⁹ ˈDhɛ ˗kë ꞊dhɛ ˈwɔn yaa kë ˗dhii ˗yö ꞊kun kwa ˗bha, kwa ˗dho ˗pö ꞊sɔnŋ yaa ˈgü ˗kplawo. ˈˈKɛɛ ˗wo ˈö kwa ˗bha ˈsëëdhɛ ˗be Étude perspicace des Écritures (Volume 2) ˈˈpian 765 ˗ya pö bhë, ˗yö ꞊mɔɔn˗ ˗bha ˈö kwa ˗zogban. ˗Ya ˗pö: «ˈDhɛ ˗kë ꞊dhɛ Zoova ˗ya ˈwɔn ˗dɔ ꞊dhɛ ö ˗dhɔkëmɛn ˗nu ˗wo ˈˈtëëtë ˗an ˗bha ˗kë mɛnbhɩɩdhe ˈka ˗sü ˗wɔn ˈgü, ˗an ˗wëë ˗ya ˗kë. ˗Dhɛ ˈö ˈˈdhʋ̈, ˈwɔn ˗nu ˗wa zë ˗an ˗gɔ, ˗an zuʋ̈ˈˈ dua ˈyaa ˗mü kö ˗yö za dɔ ˗an ˗bha. (Ps 103:8-14; 130:3) ˗Wa ˈˈta ˈsü ˗së ˈka ˗Zlan ˗bha ʒiaan ˗ta, ˗wo ꞊mɔɔn˗ ˗bha ˈwo ˗kë zuʋ̈gblüdhi ˈgü. (Fdh. 4:4-6; 1 Zn. 3:19-22)» Mɛn ꞊faanmën ˗wɔn ꞊dede ˗mü, ˈyaa ˈˈdhʋ̈ ˗ee?

20. ˈMën ˈkwa dho ˗a yö ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈ ˗a ˈgü?

²⁰ ˈKwa ˈwɔn yaa kë ˗ya ˈmën kwa zuʋ̈ˈˈ ˈka ꞊dedewo, Zoova ˗wɩ ˗a ˗bha ˈö kwa ˗bhawɔn to ö zuʋ̈ˈˈ ˈˈpuu ˈka. Kwa˗ ˈˈnuɛ ˗bho ˗a ˗wɔn ˈgü. ˈDhɛ ˈˈdhʋ̈, kwa ˗dho ʒiö ˗a ˗bha mɛn ˗bhawɔn ˈto ˗sü ˈwɔnzuan ˈˈpiʋ̈ ˗kɔ ˗kë ꞊dhɛ? Kwa ˗bha mɛn ˗bhawɔn ˈto ˗sü waa Zoova ˗bha ˗an ˗bhɔkwëëdhɛ waa ˗an ˗bhokopiʋ̈dhɛ ˈnën ˗tɔ ˗mën? ˈMën ˗kë ˈö ˗së kö ˈkwa ˗an dɔ? Dhɛɛˈˈ ˗nu ˈwo bhë, kwa ˗dho ˗an ˗yɔ ꞊slɔɔ ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈, ˗a ˈgü.