YESU zë ˈwo˗ wo ˈˈdhü ˗bha ˈwɔnyaakëmɛn ˗nu ꞊plɛ ꞊zinŋgü bhë, mɛn ꞊vadhɛ ˗wa ˗kwɛzlan ˗dɔ. (Mat. 27:35-38) ˈˈKɛɛ ˗a pö ˈö Biblö ˗ya wo ꞊dhɛ ˗wa ꞊glöö ˗baa ˗së ˈka ˈö ˈwo˗ ˗wɛɛ bho bhë, ˈwaa˗ ˈsü gagade ˈka.—Mak. 15:42-46.

Mɛn ˈbha ˗nu ˈö ˈwaa ˈdhaŋ˗ bho Naɔn ˗së ˈsëëdhɛ ˈˈdhiʋ̈ ˗wa ˗pö, ˗a pö ˗sü ˈö ꞊dhɛ ˗wo ˗wɩ ˗a ˗bha kö mɛn ˗nu ˈwo ˗an zë ˈˈdhü ˗bha ˗wo ˗an ˗wɛɛ bho bhë, ˈwaa˗ ˈsü gagade ˈka. ˗An ˗bha ˈgü, pë ˈˈwɛɛ ˈbha ˈnën ˈwo˗ ˗kë ˗an ꞊glöö ˈka. Ʒunalö ˗bɛnzëmɛn do ˈwo˗ ˗dhɛ Ariɛdhö Sabaa ˗yö ˈpë ˗kë ˈö mɛn ˗nu wo ˗zota ˈˈdhʋ̈, ˗a ˗gɛn ˗pö. ˗Ya ˗pö: «Pëyaakëmɛn ˈö˗ ˗dhɛ ˈyaa˗ ˗bha kö ˗yö kë mɛn ˗nu ˈˈpiʋ̈, ˈyo ˈwo˗ zë ˈˈdhü ˗bha. ˗A ˗wɔn ˈgü, mɛn ˈbha ˗nu ˗wa ˗pö Wlɔmömɛn ˗nu ˈwaa ꞊mɔɔn˗ ˗bha kö mɛn ˈwo˗ zë ꞊dhɛ ˗kɔ bhë ˗a ˈdhö ˗wo ꞊bhlëë ˗ya ˗a ˗bha, ˗wa ˗wɛɛ bho.» ˈWɔnyaakëmɛn suu ˈö ˈˈdhʋ̈ Wlɔmömɛn ˗nu ꞊waa˗ zë, ˗wo ˈlëë˗ ˗dɔ ˗a ˗bha, ˈwo˗ ꞊glöö to ˈˈdhü ˗bha kö ˗man ˗nu ˗wa ˗bhö. ˗A ˗mɛn ˗ya ˈˈbu, ˈyö ˗a pë ˈˈpɛpɛ ˈwo to ˈwo˗ ꞊kpaa ˈkwëë˗ ˈwo˗ ˗zuö ˗glu ˈˈdhi ˈkpii˗ ˈgü.

ˈˈKɛɛ pë zii mɛɛnˈˈ ˗mɛn ˗nu ˗wa ˗yö ꞊dhɛ Zuifö ˈbha ˗nu ˈwo ˗an zë ˈˈdhü ˗bha, ˗an ˗bha ˈti kë ˈˈdhʋ̈. ˗Kwɛ 1968 ˈgü, ˗wo ˗kpan mɛn ˈbha ˈwo˗ zë ˗kwɛ këŋ do ˗blɛɛsü ˈgü ˗a ga ˗bha Zuifö ˗nu ˗bha mɛn ˗wɛɛbhodhɛ ˈö kun Zedhizadhɛmö ˗pö ˈˈsuee bhë ˗a ˈgü. ˗A ga ˗nu ˗kun ꞊gbëŋ ˈgü. ˗A ga ˗nu ˈwo˗ ˗kɛɛdhö ˗a do ˗kun mü. ˈˈPoŋtiga ˗kun ˗gban ˗sü ˈka˗ ˗ta ˈˈdhü ˈˈklu do ˗bha. Sabaa ˗ya ˗pö: «Gɔndënën ˈö˗ ga ˈdhö ˗mü ˗wa ˗dhɛ Ʒeokanan. ˗Ya ˗kë ˈyö zɔɔdhe ˈö mɛn ˗nu kun ˗a ˗man ˗ni ˈgü ˈö ˗bhɔ ˈˈdhʋ̈ ꞊kwɛŋzü ˈö ˗gban Yesu ˗wɛɛbhosü ˗bha bhë, ˈö ɲën. Ʒeokanan ˗bha ˈwɔnzuan ˗ya ˗zɔn ꞊dhɛ Yesu ˗bha ˈˈtʋ̈ŋ ˈgü, mɛn ˈbha ˗nu ˈö Wlɔmömɛn ˗nu ˗wo ˗an zë ˈˈdhü ˗bha, ˗wo ˗wɩ ˗a ˗bha kö Zuifö ˗nu ˗wo ˗an ˗wɛɛ bho.»

꞊Dɛɛ ˗mü ꞊dɛɛ ˈka, ˈwɔn ˈö ˗gban ˗kɔ ˈwo Yesu dɔ ˗a ˈka ˈˈdhü ˗bha ˗a ˗bha, mɛn ˗nu ꞊kun ˗a zɔɔdhe ˗man ˗ni ˈgü. ˈˈKɛɛ gagade ˈö dho ˈto kwa ˈˈɲaan ˈyö ˗tɔ ꞊dhɛ pëyaakëmɛn ˈbha ˗nu ˈwo ˗an zë ˈˈdhü ˗bha ꞊kwɛŋzü, ˗wo ˗an ˗wɛɛ ˗bho. ˗Wo ˈti ˗an ˗zuö ˗an ˗bha ˗glu ˈˈdhi ˈkpii˗ bhë ˗a ˈgü ꞊dhɛ ˗kɔ ˈwo mɛn ˗kpɛɛ ˗nu ˈwo to ˗an ˗bha ˗kë ˗a ˈka ˗a ˈdhö. ˗Ya ˗zɔn ˈˈpuu ˈka ꞊dhɛ ˗a pö ˈö Biblö ˗ya wo ꞊dhɛ ˗wo Yesu ˗wɛɛ ˗bho bhë, kwa dua ˗mü ˈkwa ˈdhaŋ˗ bho ˗a ˈˈdhiʋ̈. Pë ˗nu ˈwo˗ ˗zɔn ꞊dhɛ pë ˈö Biblö ˗ya pö bhë gagade ˗mü, ˗wo ˗dhö.

˗Ya ˈgo ˗a ˈgü ˈzü, Zoova ˗ya ˗to ˈˈdhiʋ̈ ˈö˗ pö ꞊dhɛ ˗wo ˗dho Yesu ˗wɛɛ bho ꞊bhɔɔmɛn do ˗bha ö wɔdhɛ ˈö˗ ˗pëkë ˗a ˈgü. Mɛn gbɛ˗ ˗kɔ ˈyaa ꞊mɔɔn˗ ˗bha ˗ya kë kö pë ˈö ˗Zlan ˗ya pö ˗yö ö bo kë ˗su ˈka.—Is. 53:9; 55:11.