1. ˈKwa˗ pö ˈkwa dha Zoova ˗bha ˗dhɛkpaɔyi ˗gɔ, ˈmën kwa dua ˈdhö ˗mü kö ˈkwa˗ kë?

 BIBLÖ ꞊yaa˗ pö «Zoova ˗bha ˗dhɛkpaɔyi,» kö ˗yö ˗wɩ ˈˈtʋ̈ŋ ˈö dho ö ˈyɔɔ˗ ˗nu ˈgüshiʋ̈, kö ˗yö ö ˗dhɔkëmɛn ˗nu dha bhë, ˗a ˈka. ꞊Kwɛŋzü, Zoova ˗yö ˈwɔn ˗bho ˈˈsɛgɔ ˈbha ˗nu ˈgü. (Is. 13:1, 6; Ézéch. 13:5; Soph. 1:8) Kwa ˗bha ˈˈtʋ̈ŋ ˈö yö ˗a ˈgü, «Zoova ˗bha ˗dhɛkpaɔyi» zü ˗dho dɔ ˈˈsɛgɔmɛn ˗nu ˗bha ˗nu Babidhɔnö ˗pö ˈkpii˗ ˗gɔ ˗sü ˗ta, ˈö˗ ˈˈdhiʋ̈ ˗yö ta Aamagedɔn ˗gblü ˗ta. ˈKwa˗ pö ˈkwa dha «˗dhɛkpaɔyi» ˈö bhë ˗a ˈka, kwa dua ˗mü ˈkwa kwa ˗de baaˈˈ ꞊dɛɛ. Yesu ꞊yöö ꞊dede ˗ya ˗pö ꞊dhɛ ˈkwa «kë baasü ˈka yi ꞊gban ˈˈpɛpɛ ˈka» ˈˈklʋʋbhɔdhe ˈkpii˗ ˗gɔ.—Mat. 24:21; Dhu. 12:40.

2. ˈMën ˗kë ˈö 1 Tesadhonikö draanˈˈ ˗sü dhö kë ˗së kwa ˗bha ˈka?

² ˈSëëdhɛ ˗blɛɛsü ˈö bɔmɛn Pɔdhö ˗ya bɔ Tesadhonikömɛn ˗nu ˗dhɛ bhë ˗a ˈgü, ˗yö ˈwɔnzuan ꞊va ˈwo dho kletiɛn ˗nu ˗takun kö ˗wo kë baasü ˈka Zoova ˗bha zadɔ ˗dhɛkpaɔyi ˈkpii˗ ˗bha, ˗an ˗zɔn. ˗Ya ˈwɔn ˗dɔ ꞊dhɛ Zoova ˗bha ˗dhɛkpaɔyi ˈti ˗dho nu wo ˗bha ˈˈtʋ̈ŋ ˈgü. (2 Tes. 2:1-3) ˈKö ˗kë ˈˈdhʋ̈, ˗yö ö ꞊dhegblü ˗nu ˗zo ˗kpɔɔ kö ˗wo wo ˗de baaˈˈ ꞊dhɛ pë ˈö ˗dhɛkpaɔyi ˈö ˈˈdhʋ̈ ˗a nu ˗yi ˗ya ˈto do ˗a ˈdhö. Kwa dua ˗mü ˈkwa ˗dhioo ˈö bhë ˗a ˗ya ꞊bhlëë ˈgü ˈpö. ˗A ˗wɔn ˈgü, pë ˈö bɔmɛn Pɔdhö ˗ya pö ˈö ˗gban dhɛɛˈˈ ˗nu ˈwo yö ˗an ˗bha, ˗kwaa ˗ga: (1) Zoova ˗bha ˗dhɛkpaɔyi ˗dho nu ˗kɔ ˗kë ꞊dhɛ? (2) De ˗nu ˈwo dho dha yi ˈö ˈˈdhʋ̈ ˗a ˈka? (3) Kwa ˗dho kwa ˗de baaˈˈ ˗kɔ ˗kë ꞊dhɛ kö ˈkwa dha?

3. Zoova ˗bha ˗dhɛkpaɔyi ˗dho nu ꞊dhɛ ꞊kwaanmɛn nu gbeŋ ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)

³ ‹˗Yö ˗dho kë ꞊dhɛ ꞊kwaanmɛ ˗yö nu gbeng.› (1 Tes. 5:2) ˈWɔnzuan ˗nu ˈö Pɔdhö ˗yö ˗an sü ˈö ˗gban Zoova ˗bha ˗dhɛkpaɔyi nu ˗kɔ ˗bha, ˗a ˗blɛɛsü ˈnën bhë. ꞊Kwaanmɛn ˗nu ˗wo  ˈwɔn ˗nu ˗kë ˈzozodhö, ˈö ˈwo sɔ mɛn ˗nu ˗ta gbeŋ. Zoova ˗bha ˗dhɛkpaɔyi ˗dho ˈˈkan mɛn ˗nu ˈgü, ˈö sɔ mɛn ꞊vadhɛ ˗ta ˈpö. ˈWɔn ˗nu ˗dho yö wo ˈko ˈˈpiʋ̈ ˈwo ˗kë ˈzozodhö, ˈö˗ ˈwɔn ˗yö kletiɛn ꞊dede ˗nu kun ˗ʒiaanwo. ˈˈKɛɛ ˗an ˈgü ˈti ˗dho shiʋ̈ˈˈ ꞊dhɛ ˈwɔnyaakëmɛn ˗nu ˈdhö.

4. Zoova ˗bha ˗dhɛkpaɔyi ˗dho kë ꞊dhɛ dheguzë ˗nu ˗bha koyiga ˈdhö ˗kɔ ˗kë ꞊dhɛ?

⁴ ‹˗Yö ˗dho kë ꞊dhɛ ˈnë ˈkpɔ ˈˈgblʋ̈ʋ̈dhɛpiʋ̈ ˈdhö ˈgbiödhe ˗nu ˗bha.› (1 Tes. 5:3) Dheguzë ˈyaa ꞊mɔɔn˗ ˗bha kö ˈˈtʋ̈ŋ ꞊dede ˈö ˈˈgblʋ̈ʋ̈dhɛpiʋ̈ ɛɛnˈˈ koyiga dho ˗a ˈkun ˗a ˈka, ˗ya dɔ. ˈˈKɛɛ ˗a zuʋ̈ˈˈ ˈyaa dɔ ˈdudhö ꞊dhɛ ˗yö ˗dho kë. ˈˈGblʋ̈ʋ̈dhɛpiʋ̈ ɛɛnˈˈ koyiga ˗yö ˗nu ˗a ˗ta ˗a ˈtii ˈka, ˈö ˗kë ˈˈdhiʋ̈dhiʋ̈sü, ˈö ˗kë ꞊dhɛ pë ˈö yö ˈti ˗dho ɲën ˗a ˈdhö. ˗Kɔ do ˈö bhë ˗a ˈka, ˈkwaa Zoova ˗bha ˗dhɛkpaɔyi züdɔyi waa˗ nu ˈˈlɛlɛ dɔ. ˈˈKɛɛ ˗yö ga ˗sü ˈka kwa ˈgü ꞊dhɛ ˗yö nu ˗ni ˈgü, kö ˗Zlan ˗yö za dɔ ˈwɔnyaakëmɛn ˗nu ˗bha. ˗Yö ˗dho ˈˈkan ˗an ˈgü, ˈö ˈwii dho dha ˗a ˗gɔ.

5. ˈˈKlʋʋbhɔdhe ˈkpii˗ ˗dhö kë ꞊dhɛ ˗dhɛ ˗bha ꞊kpɔɔ ˗sü ˈdhö ˗kɔ ˗kë ꞊dhɛ?

⁵ ˗Yö ˗dho kë ꞊dhɛ ˗dhɛ ˗bha ꞊kpɔɔ ˗sü ˈdhö. Pɔdhö ˗bha ˈwɔnzuan ˗yaaga ˗bha ˗naan ˗yö ˗gban ꞊kwaanmɛn ˗nu ˈwo ꞊kwaan ˗ni ˈgü gbeŋ ˗an ˗bha ˈzü. ˈˈKɛɛ ˗a ˗dhɛ ˈö bhë ˗a ˈgü, ˗yö Zoova ˗bha ˗dhɛkpaɔyi ˗zɔn ˗dhɛ ˗bha ꞊kpɔɔ ˗sü ˈka. (1 Tes. 5:4) ꞊Kwaanmɛn ˗nu ꞊mɔɔn˗ ˗bha ˈwo to ꞊kwaan ˗sü ˗bha gbeŋ, ˈö ˗dhɛ ˗yö ꞊kpɔɔ ˗an ˈtii ˈka, ˈö mɛn ˗nu ˗kpan ˗an ˗bha. ˗Kɔ do ˈö bhë ˗a ˈka, ˈˈklʋʋbhɔdhe ˈkpii˗ ˗dho ˈsɔ mɛn ˗nu ˈö ˈwaa ˈˈkan ˗Zlan ˗shiödhɛwɔn kë ˗sü ˗bha ꞊dhɛ ˗dhɛtiidhɛ ˈgümɛn ˗nu ˈdhö ˗an ˗ta, ˈö mɛn ˈˈpɛpɛ ˗kpan ˗an ˗bha. Kwa dua ˈyaa ˗mü kö ˈkwa˗ kë ꞊dhɛ ˗an ˈdhö. ˗Kwa ˗ya kwa ˈˈɲaan, ˈkwa ˈˈkan ˈˈtakɔ ˗nu ˈö ˈwaa Zoova ˗dhɛ ˗së ˗an ˗bha. ˗Kwa kë ‹ˈwɔn ˗së suu ꞊gban ˈˈpɛpɛ këmɛn ˈka, pö ˈya ˗dho kë kwa ˗bha, kö ˈkwa ˈwɔn ꞊gban kë tɛan˗ ˗ta.› (Efɛ. 5:8-12) Pɔdhö ˗yö ˗bɔ ˈzü ˈwɔnzuan ꞊plɛ ˗ta ˈö mɛn ˗nu ˈö wo ˈti ˗dho dha ˗an ˗wɔn ꞊blɛɛ.

6. Mɛn ꞊vadhɛ ˗wo yi ˈgü ˗kɔ ˗kë ꞊dhɛ? (1 Tesadhonikö 5:6, 7)

⁶ ‹Mɛn ˗nu ˈö ˗wa yi zë.› (1 Tesadhonikö 5:6, 7 ˗wo pö.) Pɔdhö ˗yö mɛn ˗nu ˈö wo ˈti ˗dho dha Zoova ˗bha ˗dhɛkpaɔyi ˗gɔ bhë, ˗an ˗zɔn mɛn ˗nu ˈwo yi zë ˗ni ˈgü ˗an ˈka. ˈWɔn ˗nu ˈwo kë ˗ni ˈgü ˗an ˗züzü ˈwaa ˗an ˈsuan˗ bho, ɛɛnˈˈ ˈwaa˗ yö ꞊dhɛ ˈˈtʋ̈ŋ ˗yö ʒiö ˗ni ˈgü. ˗A ˈwɔn ˈgü, ˗kɔ ˈö ˈˈkpɔnŋtaawɔn ˗nu ˈdhö ˈdho ˗ni ˈgü ˗a ˗bha ɛɛnˈˈ pë ˈö ˗an dua ˈdhö ˗mü ˗wa kë ˈwaa˗ dɔ. Mɛn ꞊vadhɛ ˈwo ꞊dɛɛ, ˗wo ꞊dhɛ mɛn ˗nu ˈwo yi ˈgü ˗an ˈdhö. (Wlɔ. 11:8) ˈWaa ˈdhaŋ˗ bho ꞊dhɛ kwa ‹ˈˈtʋ̈ŋ ˗totaabhasü ˈgü,› ˈˈklʋʋbhɔdhe ˈkpii˗ nu ˗yi ˈyaa mü ꞊gblɛɛn. ˈWɔn ˈˈgblʋ̈gblʋ̈ ˗nu ˗wa ˈgo ˈˈgblʋʋ ˈˈkpɔnŋ ꞊taa, mɛn ˗nu ˗wo wo ˈˈtʋ ˗to kwa ˗bha ˗Gblüdëdhɛ ˗nɔɔn ˗bha. ˈˈKɛɛ ˗a mɛn ꞊vadhɛ ˗go mü ˈzü ˈwo ˗ya yi zë ˗sü ˗bha, ˈö ˈwaa ˈto wo ˈˈɲaan. ˗A ˗de ˗ʒiaan mɛn ˈbha ˗nu ˈö ˈwo ˈdhaŋ˗ bho ꞊dhɛ ˗Zlan ˗bha zadɔyi ˗dho ˗wo bhë, ˗wa ˗ga ꞊dhɛ ˗yö ꞊kun mü ꞊gblɛɛn. (2 Piɛ. 3:3, 4) ˈˈKɛɛ ˗dhɛkpaɔyi ˈˈpɛpɛ ˈka, kwa dua ˗mü ˈkwa˗ ˈwɔn dɔ ꞊dhɛ ˗a ˈˈtʋ̈ŋ ˈnën yö kö ˈkwa ˗ya kwa ˈˈɲaan.

7. ˈMën ˗kë ˈö mɛn ˗nu ˈö ˗Zlan dho ˗an ˈgüshiʋ̈ ˈwo ˗an ˗zɔn mɛn ˗nu ˈö we ꞊yaa˗ ˗an ˈkun ˗an ˈka?

⁷ ‹Mɛn ˗nu ˈö we ꞊yaa˗ ˗an ˈkun.› Bɔmɛn Pɔdhö ˗yö mɛn ˗nu ˈö ˗Zlan dho ˗an ˈgüshiʋ̈ ˗an ˗zɔn mɛn ˗nu ˈö we ꞊yaa˗ ˗an ˈkun ˗an ˈka. Mɛn ˈö we ꞊yaa˗ ˈkun, ˗a ˈˈtʋ ˈyaa kë ˈwɔn ˗nu ˈwo kë ˗ni ˈgü ˗a ˗züzü ˗an ˗bha, ɛɛnˈˈ ˈyaa ˗da ˈwɔn ˗së ˗nu ˗ʒian ˗ta. ˗Kɔ do ˈö bhë ˗a ˈka, ˈwɔnyaakëmɛn ˗nu ˈˈtʋ ˈyaa ˗Zlan ˗bha mɛn ꞊kpɔɔ ˗wo ˗nu ˗bha. ˗Tosɛta kë ˗kɔ ˈö dho ˗a kë kö ˗Zlan ˗yö ˗an ˈgüshiʋ̈, ˈnën ˈwo ˗da ˗a ˗ʒian ˗ta. ˈˈKɛɛ ˈmɛn ˈkwa kletiɛn ˗nu ˈka, kwa dua ˗mü ˈkwa ˗ya kwa ˈˈɲaan, ˈkwa kwa ˗zokë kwa ˗de ˈˈpiʋ̈. (1 Tes. 5:6) Biblö ˈgüpʋmɛn do ˗ya ˗pö ꞊dhɛ mɛn ˈö ö ˗zokë ö ˗de ˈˈpiʋ̈, «˗a zuʋ̈ˈˈ ˈyaa kaanˈˈ ˈˈkwöö ˈˈvaandhö. ˗A ˗mɛn ˗yö ö ˗zota ˗së ˈka ˈwɔn ˗nu ˈgü, kë ˈˈdhʋ̈ kö ˈö ˗da ˈwɔn ˗së ˗ʒian ˗ta.» ˈMën ˗kë ˈö ˈkwa dho kwa zuʋ̈ˈˈ kë ˗saa, kö ˈkwa ˈwɔn ˗së kë ˗kplawo? Kwa˗ ˗kë ˈˈdhʋ̈ kö kwa ˗kɔ ˈya ˗dho ˗da ˈˈsɛkɔɔwɔn ˗nu ɛɛnˈˈ ˗gban ˈˈsɛgɔmɛn ˗nu ˗gɔ ˗sü ˈgü. Zoova ˗bha ˗dhɛkpaɔyi ˗ya yö ꞊klöö˗, ˗wo ˗dho ˈˈgbɩɩdhɛ wɔ kwa ˗ta kö ˈkwa kwa ˗kɔ ˗da ˈwɔn ˗nu ˈwo bhë ˗an ˈgü. ˈˈKɛɛ ˈˈsuʋ̈ ˈya ˗dho kwa kë. ˗Zlan ˗bha ˗zuu ˈˈslʋ̈ʋ̈slʋ̈ ꞊mɔɔn˗ ˗bha ˈö kwa ˗takun ˈö kwa zuʋ̈ˈˈ ˗yö ˗kë ˗saa, ˈö ˈkwa ˗da ˈwɔn ˗së ˗nu ˗ʒian ˗ta.—Dhu. 12:11, 12.

8. ˈKwa ˗dhɛ ˗ga 1 Tesadhonikö 5:8 ˈgü, ˈˈklʋʋsë ˗nu ˗mɛɛn ˈwo dho kwa ˗takun kö ˈkwa ˗ya kwa ˈˈɲaan? ˈYö Pɔdhö ˗yö ˗an ˗zɔn ˗mën ˈka? (Kpɔɔˈˈ ˈzü pë ˈˈbin ˗bha.)

⁸ ‹˗Kwa ˗piö ˈˈbhɛɛ ˗da kwa ˗bha, ˈkwa ˗piö gblaa˗ ˗ya kwa ˗gɔ ˗bha.› Bɔmɛn Pɔdhö ˗yö kwa ˗zɔn ˈˈsɔdha ˗nu ˈö ˈwo ˗ya ˗sü ˈka wo ˈˈɲaan, ˈö ˗wa ˗gblü ˗gɔn ˗a ˈgü ˗sɔ ˗da wo ˗bha, ˗an ˈka. (1 Tesadhonikö 5:8 ˗wo pö.) ˗Gblü ˈˈtʋ̈ŋ ˈgü, ˈˈsɔdha dua ˗mü kö ˗yö kë baasü ˈka ˈkozësü ˗bha ˗kplawo. Kwa dua ˗mü ˈkwa˗ kë ˈˈdhʋ̈ ˈpö. ˈKwa kwa ˗bha ˗piö ˈˈbhɛɛ ˈö ˗kë ˗zoyödhe waa ˗dhɔ ˗an ˈka bhë ˗an ˗da, ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗ya kë kwa ˗bha gblaa˗ ˈka, kö kwa˗ ˗zɔn ꞊dhɛ kwa baasü ˈka Zoova ˗bha ˗dhɛkpaɔyi ˗bha. ˈˈKlʋʋsë ˗nu ˈwo bhë, ˗wo ˗dho kwa ˗takun ꞊dedewo.

9. Kwa ˗bha ˗zoyödhe ˗yö kwa ˗takpa ˗kɔ ˗kë ꞊dhɛ?

⁹ ˗Piö ˈˈbhɛɛ ˗yö ˈˈsɔdha zuʋ̈ˈˈ ˗takpa. ˗Zoyödhe waa ˗dhɔ ˗wo kwa zuʋ̈ga ˗takpa ˈpö. ˗Wo ˗dho kwa ˗takun kö kwa ˗kɔ ˈto ˗Zlan ˗dhɔkësü ˗bha, ˈkwa ʒiö Yesu ꞊kee˗ ˗kplawo. ˗Zoyödhe kwa ˗zogban ꞊dhɛ Zoova ˗dho kwa ꞊saan nu ˗a mɛɛnˈˈ ˈö ˈkwa˗ wo kwa zuʋ̈ˈˈ ꞊gban ˈka bhë, ˗a ˗wɔn ˈgü. (Ebl. 11:6) ˗Yö ˗dho ˗a kë ˈö ˈkwa kë ˈwɔn ˈˈgbɩɩ˗ ˗nu ˈgü, ˈkwa to ˗klu ˗sü ˈka kwa ˗Gɔmɛn Yesu ˗bha. Kwa ꞊dhegblü ˈbha ˗nu ˈwo ꞊dɛɛ, ˈö ˈwo to ˗klu ˗sü ˈka ˗Zlan ˗bha ˈˈklʋʋbhɔdhe ˗nu ɛɛnˈˈ ˈˈflɛɛdhɛ ˗nu ˈgü bhë, kwa ˈˈtʋ̈ŋ ˗kë ˗an ˗bha ˈwɔnzuan ˗nu  ˈgü ˗sü ꞊mɔɔn˗ ˗bha ˈö kwa ˗bha ˗zoyödhe ˗gɛn ˗gban ˈpö. ˗A mɛn ˗nu ˈwo wo ˗bha ˗tosɛta ˗kë ˗bhaasü kö ˈwo ˗Zlan ˗bha ˗Gblüdëdhɛ ˗wɔn bɔ ˈˈdhiʋ̈ bhë ˈkwa ˈto ˗an ˗bha ˈwɔnzuan ˈˈpiʋ̈, kwa ˗dho ˈˈkan ꞊nɔɔn ˗dhɔ ˗bha. b

10. ˗Zlan waa kwa këyɔɔ ˗nu ˗dhɔ ˗yö kwa ˗takun ˗kɔ ˗kë ꞊dhɛ ˈö kwa ˈgü ˈyaa ga?

¹⁰ Pë do ˈö˗ ˗wɔn ˈdhö ˈˈgbɩɩ˗ ˈzü kö ˈkwa ˈto kwa ˈˈɲaan, ˈyö ˗tɔ ˗dhɔ. (Mat. 22:37-39) ˗Zlan ˗dhɔ ˗ya kwa kë, ˈkö ˗kë ꞊dhɛ ˗zlanwopö mɛn ˗nu ˗dhɛ ˗sü ˗dho nu ˈwɔn ˈˈgbɩɩ˗ ˈka kwa ˗ta, kwa ˈgü ˈyaa ga ˗a ˈka. (2 Tim. 1:7, 8) ˈDhɛ ˗kë ꞊dhɛ kwa ˗dhɔ ˗zɔn mɛn ˗nu ˈö ˈwaa Zoova gbamɛn ˗nu ˈka ˗an ˗dhɛ bhë, kwa ˗zlanwopö ˗kplawo ˗dhɛ ˈö ˈkwa˗ ˗bha ˗a ˈgü, ˈö ꞊ya kë ꞊shiöŋ ˈkwa bɔ ˗a ˈka telefɔnö ɛɛnˈˈ lɛtrö ˗nu ˗ta. Kwa kwa ˗zoyö ˗kplawo ꞊dhɛ mɛn ˗nu ꞊mɔɔn˗ ˗bha ˈwo wo ˈˈtakɔ ˗nu bho ˈˈgblʋʋ, ˈwo ˗ya ˈwɔn ˗së kë ˗sü ˗bha yi do ˈka.—Ézéch. 18:27, 28.

11. Kwa ꞊dhegblü ˗nu ˗dhɔ ˗yö kwa ˗takun ˗kɔ ˗kë ꞊dhɛ? (1 Tesadhonikö 5:11)

¹¹ Kwa ꞊dhegblü ˗nu ˗dhɔ ˗yö kwa ˗kë ˈpö. ˗Dhɔ ˈö ˈˈdhʋ̈ kwa˗ ˗zɔn ‹kwa ˈko ˗nu ˗zʋ ˗gban ˗sü waa kwa ˈko ˗nu faan dɔ ˗sü ˈka.› (1 Tesadhonikö 5:11 ˗wo pö.) ꞊Dhɛ ˈˈsɔdha ˗nu ˈwo wo ˈko ˈˈsuee ˗gblü ˈˈpiʋ̈ ˗an ˈdhö, kwa kwa ˈko ˗nu ꞊faan ˗mën. ˗Yö ˈˈdhʋ̈ gagade ˈka ꞊dhɛ ˈˈsɔdha do ꞊mɔɔn˗ ˗bha ˈö ö ˗gblü gɔn ˈˈyoo ˗gi ˗gblü ˈˈpiʋ̈. ˈˈKɛɛ ˈyaa ꞊mɔɔn˗ ˗bha toŋtoŋdhö kö ˗ya kë ˈˈdhʋ̈ ö ˗de ˈˈɲaan. ˗Kɔ do ˈö bhë ˗a ˈka, ˈkwaa˗ ˈˈpiʋ̈ toŋtoŋdhö kö ˈkwa pë ˈˈdhiʋ̈˗ kë kwa ꞊dhegblü ˗nu ˈka kwa ˗de ˈˈɲaan ɛɛnˈˈ kö ˈkwa ˈwɔn yaa ˈˈpɔ bho ˗an ˗gɔ ˈwɔn yaa ˈka. (1 Tes. 5:13, 15) ˗Ya ˈgo mü ˈzü, kwa ꞊dhegblü ˗nu ˈwo ˈˈdhiʋ̈sü ˗ni ˈgü ˗zlanwokɔdhi ˈka ˈkwa ˗an ꞊bhlëë ˗ya, kö kwa˗ ˗zɔn ꞊dhɛ ˗an ˗dhɔ ˗yö kwa ˗kë. (1 Tes. 5:12) ˈDhɛ bɔmɛn Pɔdhö ˗yö ˈsëëdhɛ bɔ ˗zlanwokɔdhi ˈö kun Tesadhonikö ˗a ˗dhɛ, kö ˗wa ˈˈdhi ˗pʋ ˗a ˗kwɛ ˈyii ˗mɔn do ˗bha ꞊köŋ. ˈDhɛ ˗kë ꞊dhɛ ˈˈtʋ̈ŋ ˈö ˈˈdhʋ̈ ˗a ˈgü kö ˈˈdhiʋ̈sü ˗a ˈka ˗mɛn ˗nu ˈwaa pë ꞊va dɔ ꞊köŋ, ˗a ˈbha ˗ya kë kö ˈwɔn ˗nu ˗kun zë ˗ni ˈgü ˗an ˗gɔ. ˈˈKɛɛ ˈkö ˗kë ˈˈdhʋ̈, ˗an dua ˗mü kö ˗wo ˗an ꞊bhlëë ˗ya. Kwa ꞊ɲɔɔn ˗ni ˈgü ˈˈklʋʋbhɔdhe ˈkpii˗ yi ˗bha, ˗a ˈbha ˗ya kë ˗dhioo ˗nu ˈwo  dho ˈgo kwa ˈˈdhiʋ̈ʒiöwomɛn ˗nu ɛɛnˈˈ kwa ˗bha Betɛdhömɛn ˗nu ˈˈpiʋ̈, kwa ˈti ˗dho ˗an ꞊slɔɔ. ˗Ya kë ˈˈdhʋ̈, mɛn zii ˗nu ˈnën ˈwo dho ʒiaan ˗nu ˗zɔn kwa ˗dhɛ. ˗A ˗wɔn ˈgü ˗yö ˗dho kë ˗së kö ˗an ˗dhɔ ˗yö kwa kë, kö ˈkwa ˗an ꞊bhlëë ˗ya ˗sü draanˈˈ ꞊dɛɛ. ˈKö ˈwɔn suu ˈˈoo ˗su ˗yö ˗kë, ˗kwa ˗klu ˈwɔn ˗së kë ˗sü ˗bha. ˈKwa ˗dho kwa ˈˈtʋ̈ŋ kë mɛn zii ˗nu zaadhɛ ˈgü. ˗A kë ˗sü kö Zoova ˗yö bɔ Yesu ˗ta ˗yö ˈˈdhiʋ̈sü ˗klu ö ˗bha ˗mɛn ˗nu ˈwo bhë ˗an ˈka, ˈnën kwa dua ˈdhö ˗mü ˈkwa kwa ˈˈtʋ̈ŋ kë ˗a ˈgü.

12. ˗Zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö kwa ˗bha ˗zotadhe ˗nu ˗takpa ˗kɔ ˗kë ꞊dhɛ?

¹² ˗Piö gblaa˗ ˗yö ˈˈsɔdha ˗gɔ ˗takpa. ˗Kɔ do ˈö bhë ˗a ˈka, kwa ˗bha ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö kwa ˗bha ˗zotadhe ˗takpa. ˗Zoyödhe ꞊dede ˗ya ˗kë ˈö ˈkwa˗ yö ꞊dhɛ ˈˈkpɔnŋtaadhɛ ˈö yö ˗a ꞊trɔɔn gbɛ˗ ˈyaa ˈdhö. (Fdh. 3:8) ˗Yö kwa ˗takun ˈzü ˈö kwa zuʋ̈ˈˈ ˗kë ˗saa, ˈö ˈkwa ˈwɔn ˗së ˗kë ˗kplawo. Pë ꞊dede ˈö ˗kë Walasö waa Lorinda ˈwo Aflikö ˗an ˈka, ˈyö bhë. ˈˈDhoogɔ ˗yaaga ˈˈkpaan ˈgü, ˗kɔ ˈwo˗ ˗bha ꞊plɛ ˗an ˗mɛn ˗nu ˗wɔn ˗yö ˗kë. ˈˈKɛɛ Kolona virisö ˗wɔn ˈgü, wo ˈti ˗mɔn ˗a ˗bha kö ˗wo ˈdho ˗wo wo ˗bha ˈkɔdhigümɛn ˗nu ˗dhɛ. Walasö ˗ya ˗pö: «˗Zo ˗yö ˗go ga ˈgü ˗sü ˗dhɛ ˗sü ˗yö n ˗takun ˈö ˈmaan n ˗zota ˗kɔ ˈö ˈwo ˗kë ˗a ˈka kö ˗wo ꞊kun ga bhë, ˗a ˈgü. Pë ˈa n ˗zota ˗a ˈgü ꞊ʒiaan ˈyö ˗tɔ ˈˈtʋ̈ŋ ˈö ˈwo dho ˈgo ˗a ˈka ga ˈgü kö ˗wo ˗da ˈˈkpɔnŋtaadhɛ ˗dɛɛ ˈgü. ˗Wëë ˗ya ˗da n ˗ta ɛɛnˈˈ pë ˈa dho ˗a kë ˈmaan˗ dɔ ˗ni ˈgü, ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö n ˗takun ꞊dedewo.»

13. ˈMën ˈkwa dho ˗a kë kö ˈkwa ˗zuu ˈˈslʋ̈ʋ̈slʋ̈ ꞊slɔɔ?

¹³ ‹ˈKwa ˈdho zian ta ˗a ˗bha ˈNii˗ ˗gɔ ˈö ö bo pɛng dɔ ˗sü ˈka.› (1 Tes. 5:19) Pɔdhö ˗yö ˗zuu ˈˈslʋ̈ʋ̈slʋ̈ ˗zɔn ˈˈshiʋ̈ ˈö kwa ˈgü ˗a ˈka. ˗Zuu ˈˈslʋ̈ʋ̈slʋ̈ ˗ya kë kwa ˗ta, ˈwɔn ˗së kë ˗sü ˈˈshiʋ̈ ˗yö ˗kë kwa ˗ta, ˈö ˈkwa Zoova ˗bha yö ˗kë kwa ꞊faan ˈka. (Wlɔ. 12:11) ˈMën ˈkwa dho ˗a kë kö ˈkwa ˗zuu ˈˈslʋ̈ʋ̈slʋ̈ ꞊slɔɔ? Kwa dua ˗mü ˈkwa˗ ˗dhɛ Zoova ˗gɔ, ˈkwa ˗Zlan ˗Wo draanˈˈ, ˈkwa kpa ˗kɔlokota ˈö ˗zuu ˈˈslʋ̈ʋ̈slʋ̈ ˈˈdhiʋ̈sü ˗a ˈka ˗a ˗bha. ˈKwa˗ kë ˈˈdhʋ̈, kwa ˗dho ‹˗zuu ˈˈslʋ̈ʋ̈slʋ̈ kë ˗yö ˗nu› ꞊trɔɔn ꞊slɔɔ.—Ga. 5:22, 23.

14. ˈKwa˗ pö ˗zuu ˈˈslʋ̈ʋ̈slʋ̈ ˗yö kë kwa ˗ta ˗kplawo, ˈmën ˈkwa dho ˈˈkan ˗a kë ˗sü ˗bha? (Kpɔɔˈˈ ˈzü pë ˈˈbin ˗bha.)

 ¹⁴ ˗Zlan ˗ya ö bo ˗zuu ˈˈslʋ̈ʋ̈slʋ̈ ˗nu kwa ˗dhɛ ˗sü ˈka, ˗kwaa kë ˗së kö ‹ˈkwa ˈdho zian ta ˗a ˗gɔ ˈö ö bo pɛng dɔ ˗sü ˈka kwa ˈgü.› Mɛn ˈö ˗zotakɔ waa ˈˈtakɔ ˗së ˈdhö˗ ˗gɔ, ˈyö ˗Zlan ö ˗bha ˗zuu ˈˈslʋ̈ʋ̈slʋ̈ nu ˗a ˗dhɛ. Kwa ˗zotakɔ waa kwa ˈˈtakɔ ˗nu ˗wa kë ˈya˗, ˈyii ˗dho ö ˗bha ˗zuu ˈˈslʋ̈ʋ̈slʋ̈ ˈto kwa ˗ta ˗kplawo. (1 Tes. 4:7, 8) ˈKwa˗ pö ˗Zlan ˗bha ˗zuu ˗yö kë kwa ˗ta ˈˈtʋ̈ŋ ꞊gban ˈka, kwa dua ˈyaa ˗mü ˈzü ˈkwa «˗ya ˗wʋ [ˈö ˗Zlan] ˗ya dɔ ö ˗wʋdhiʋ̈loomɛ [˗nu] ˈˈdhi bha˗ ˗san ˈka.» (1 Tes. 5:20) ‹˗Wʋ ˗nu› ˈö Biblö ˈˈɲan bhë ˈö ˗we ˗an ˈka ˈyö ˈwo ˗tɔ nɔɔn˗ ˗nu ˈö Zoova bɔ ˗zuu ˈˈslʋ̈ʋ̈slʋ̈ ˗ta ˈö ˗an pö kwa ˗dhɛ, ˈö ˈwo ˗gban ˗a ˗bha ˗dhɛkpaɔyi ˈö ˗ya yö kwa ˈka ꞊klöö˗ bhë, ˗a ˗bha. Kwa dua ˈyaa ˗mü kö ˈkwa kwa ˗zota ꞊dhɛ Zoova ˗bha ˗dhɛkpaɔyi ɛɛnˈˈ Aamagedɔn ˗gblü ˈti ˗dho nu kwa ˗bha ˈˈtʋ̈ŋ ˈgü. ˗Kwaa ˗zɔn ꞊ʒiaan ꞊dhɛ ˗a ˗wɔn ˗yö kwa ˗zo ˈˈpiʋ̈, ˈwɔn ˗së waa ‹ˈˈtakɔ ˗së ˈö pö ˈyaa˗ ˗bha› ˗an kë ˗sü ˈka ˗kplawo.—2 Piɛ. 3:11, 12.

15. ˈMën ˈkwa dho ˗a kë kö ꞊suawɔn ˗nu waa ˗zuu yaa ˗nu ˗bha dhiaŋ ˗nu ˈwa ˗dho kwa ˗gɔ bho ʒiaan˗? (1 Tesadhonikö 5:21)

¹⁵ ˗A ˈˈtʋ̈ŋ ˈyaa ꞊gblɛɛn ˈzü kö ˗Zlan ˈyɔɔ˗ ˗nu ˗wa pö: «ˈAa ˈˈsɛ ꞊ya ˈwaanu, ˈkwa ˗ya kwa ˗dɩ ˈflëë˗ ˈgü.» (1 Tes. 5:3) ˗Zuu yaa ˗nu ˗dho ꞊sua ˗pɛn ˗dhɛ ꞊gban ˈgü ˈˈsɛ ˗ta, ˈö ˈwo ˈˈkpënŋ˗ ˗kë mɛn ꞊vadhɛ ˗gɔ. (˗Dhɛ. 16:13, 14) ˈˈKɛɛ kö kwa ˗zë ‹ˈkwa ˈwɔn ˈˈpɛpɛ ꞊gban ˗ga ˈkpakpadhö ˗së ˈka,› mɛn ˈbha ˈti ˗dho ˈˈkpɛnŋ˗ kë kwa ˗gɔ. (1 Tesadhonikö 5:21 ˗wo pö.) Glɛkö ˗wo kpö ˈwo˗ ꞊dhiëëta ˈö ˗kë «˗ga ˈkpakpadhö» ˈka bhë, ˗yö ˗gban ˈˈsënŋ ɛɛnˈˈ zën ˗ga ˗sü ˗bha kö ˗ya kë ꞊dhɛ ˗a ꞊dede ˗mü ˗wa ˈwɔn dɔ. ˗Dhɛ ˈö ˈˈdhʋ̈, ˈkwa pë ˈbha man ɛɛnˈˈ ˈkwa˗ ˗wo pö, kwa dua ˗mü kö ꞊ya kë ꞊dhɛ gagade ɛɛnˈˈ ꞊sua ˗mü, ˈkwa˗ ˈwɔn dɔ ˗ʒian mɛɛnˈˈ. ˗A ˗dhɛ ˗kun ˗a ˗bha ꞊dedewo kö Tesadhonikömɛn ˗nu ˗wa kë ˈˈdhʋ̈, ˈö˗ ˗dhɛ ˈdhö˗ ˗bha ˈpö kö ˈkwa˗ kë ˈˈdhʋ̈, ˈyö sü ꞊dhɛ ˈˈklʋʋbhɔdhe ˈkpii˗ ˗ya yö ꞊klöö˗. ˈˈSanni ˈkwa ˈdhaŋ˗ bho mɛn ˈˈwɛɛ ˗nu ˗wo ˈˈdhiʋ̈, pë ˗nu ˈö ˈkwa ˗an ˗wo pö ɛɛnˈˈ ˈkwa ˗an man waa˗ ˗dhɛ ˗nu ˈö Biblö ɛɛnˈˈ Zoova ˗bha ˗kɔlokota ˗yö ˗an pö ˗kwa kwa ˗zota ˗an ˈgü, ˈkwa ˗an dan ˈkwöö. ˈKwa˗ kë ˈˈdhʋ̈, ˗zuu yaa ˗nu ˗bha ˈˈkpënŋ˗ ˗kɔ ˈti ˗dho ˗mɔn kwa ˗bha.—Prov. 14:15; 1 Tim. 4:1.

16. ˗Dhɛkpaɔ dhiʋ̈ˈˈ ˗së ˗mɛɛn ˈö dɔ ˗ni ˈgü kwa ˗gɔ? ˈYö ˈmën kwa ˗blü ˗a kë ˗sü ˗bha?

¹⁶ Kwa˗ ˈwɔn ˗dɔ ꞊dhɛ Zoova ˗dhɔkëmɛn ˗nu ˗dho dha ˈˈklʋʋbhɔdhe ˈkpii˗ ˗gɔ. ˈˈKɛɛ ˗kɔ ˈö ˈkwa˗ ˗bha do do ˈka, ˈwɔn ˈö dho kë kwa ˈka ˗dhɛkpaɔ dhiʋ̈ˈˈ ˈgü, ˈkwaa˗ dɔ. (Zak. 4:14) ˈKö ˗kë ꞊dhɛ kwa ˗bɔ ˈˈklʋʋbhɔdhe ˈkpii˗ ˈgü ɛɛnˈˈ kwa˗ nu ˗yi ˗to ˈˈdhiʋ̈ ˈkwa ga, ˈkwa ˈto ˗klu ˗sü ˈka ˗Zlan ˗bha, ˗yö ˗dho ˗tosɛta ˈö ˈyaa ɲën ˗a nu kwa ˗dhɛ. ˈˈƝɔn ˗a ꞊troo ˗nu ˗dho kë Yesu ˈˈpiʋ̈ dhaŋ˗ ˈgü, ˈö ˗tuëë ˈˈwɛɛ ˗nu ˗wo to ꞊bhɔɔ ˈˈsɛ ˗ta yö. Mɛn ˈˈpɛpɛ ˗kwa kwa ˈˈɲan ˗klu kwa ˗bha ˗dhɛkpaɔ dhiʋ̈ˈˈ ˗së ˈö bhë ˗a ˗bha, kö ˈkwa kë baasü ˈka Zoova ˗bha ˗dhɛkpaɔyi ˗bha.