1. ˈKwa ˗dhɛ ˗ga 1 Piɛdhö 5:2 ˈgü, yö ˗wɔngbɩɩsü ˗mɛɛn ˈö dɔ ˗sü ˈka mɛn zii ˗nu ˗kɔ ˈka?

 MƐN zii ˗nu ˈnën Zoova ö ˗bha ˈˈbhlaanën ꞊bhlëësü ˗nu ˈˈklɔɔnbho ˗an ˗bha kö ˗wo wo ˗zokë ˗an ˈˈpiʋ̈. ˗Klu ˗Zlan ˗bha ˗mɛn ˗nu ˈwo bhë, yökë wo ꞊dhegblü ˗nu ˗dhɛ ˗sü ˗yö ˗an ˗dhɛ ˗së ꞊dedewo, ˈö ˈwo wo ˈgü dɔ ˈˈgbɩɩ˗ kö ˈwo «wo ˗zo kë ˗an ˈˈpiʋ̈ ˗së ˈka.» (Jér. 23:4; 1 Piɛdhö 5:2 ˗wo pö.) Kwa ˗Zlan ˈˈnuɛ ˗bho mɛn zii ˗nu ˗ya kwa ˗bha ˗zlanwokɔdhi ˗nu ˈgü ˗sü ˗bha.

2. ˈWɔn ˈˈgbɩɩ˗ ˗mɛɛn ˗nu ˈwo ꞊mɔɔn˗ ˗bha ˗wo nu mɛn zii ˗nu ˗ta?

² Mɛn zii ˗nu ˗wo ˈˈdhiʋ̈sü ˗ni ˈgü ˗zlanwokɔdhi ˗nu ˈka, ˗wo ˗bɔ ˈwɔn ˈˈgbɩɩ˗ ˗nu ˈgü. ˗A do ˈnën ˗tɔ yö ꞊va ˗bha ˗kë ˗an ˗kɔ ˗ta ˗sü. Mɛn zii do ˈwo˗ ˗dhɛ Toni ˈö Zeta zuni, ˗ya ˗yö ꞊dhɛ ö dua ˈyaa ˗mü kö ˈö ö ˗kɔ ˈkpɔ yö ꞊gban ˈˈpɛpɛ kë ˗sü ˗gɔ. ˗Ya ˗pö: «ˈDhɛ Korona virisö zü ˗yö dɔ, a n ˈgü ˗dɔ ˈˈgbɩɩ˗ kö yi ˗bha ˗zlanwokɔdhi ˗yö ˗mɔn ˗bhɔkwëë ˗nu kë ˗sü waa ˗zlanwopösü ˗bha. ˈˈKɛɛ ˈkö ˗kë ˈˈdhʋ̈, a˗ ˗yö ˗kplawo ꞊dhɛ ˗da ˈnën yö ˗ya wo ˈˈdhiʋ̈. ˗Dhɛ ˈö yö mü kö ˈˈtʋ̈ŋ ˈyaa n ˗gɔ ˈzü kö ˈa Biblö ˗wo pö, ˈa˗ draanˈˈ n ˗de ˈˈpiʋ̈, ɛɛnˈˈ ˈa bhɛɛˈˈ.» Idhi ˈö mɛn zii ˈka Kosovo ˗yö ˗bɔ ˈwɔn ˈˈgbɩɩ˗ ˈˈwɛɛ ˈbha ˈgü. ˗Dhɛ ˈö ˗gblü ˗yö ˗da ˗an ˗bha ˈˈpian ˗ta, ˗to Zoova ˗bha ˗kɔlokota ˗bha ˗dhioo ˗nu ˈˈpiʋ̈ ˗sü ˗kë ˗a ˗kɔa ˈˈgbɩɩ˗. ˗Ya ˗pö: «˗Dhɛ ˈö Betɛdhömɛn ˗nu ˗wa pö n ˗dhɛ ˈˈpian ˈö ˗gblü ˈdhö ꞊gbɔɔn ˗ni ˈgü ˗a ˈka bhë, ˈa kwa ꞊dhegblü ˗nu ˈwo mü ˗an ˗takun, ˗yö ˗kë n ˗kɔa ˈˈgbɩɩ˗ ꞊dedewo. ˈˈSuʋ̈ ˗yö n ˗kë, ˈö ˈa˗ pö n ˗de ˗dhɛ ˈˈslö ˗së ˈyaa ˗mü.» Timö ˈö bɔmɛn ˈka Azi ˗ya ˗yö ꞊dhɛ ˗to ˗dhioo ˗nu ˈˈpiʋ̈ ˗sü ˈö yi ꞊gban ˈka, ˗yö ˈˈgbɩɩ˗. ˗Ya ˗pö: «ˈˈTʋ̈ŋ ˈbha ˗nu ˈka, n ˈgü ˗yö ˗ga n ˗zokë kwa ꞊dhegblü ˗nu ˈˈpiʋ̈ ˗sü ˈka.» Mɛn zii ˗nu ˗wa kë ˈwɔn suu ˗nu ˈwo ˈˈdhʋ̈ ˗an ˈgü, ˗mën ˈö dho ˗an ˗takun?

3. ˗Gleŋ ˗mɛɛn ˈö Ʒedeɔn ˗ya ˗da mɛn ˈˈpɛpɛ kwa ˗bha?

³ Mɛn zii ˗nu ꞊mɔɔn˗ ˗bha ˈwo ˗gleŋ sü Ʒedeɔn ˗bha. (Ebl. 6:12; 11:32) ˗Yö ˗Zlan ˗bha ˈˈsɛgümɛn ˗nu ˗takpa, ˈö ˈˈdhiʋ̈sü ˗an ˈka. (Juges 2:16; 1 Chron. 17:6) ꞊Dhɛ Ʒedeɔn ˈdhö,  mɛn zii ˗nu dua ˗mü kö ˗wo wo ˗zokë ˗Zlan ˗bha ˈˈsɛgümɛn ˗nu ˈˈpiʋ̈, ˈˈtʋ̈ŋ ˈˈgbɩɩ˗ ˗nu ˈgü. (Këw. 20:28; 2 Tim. 3:1) Kwa ꞊mɔɔn˗ ˗bha ˈkwa ˗gleŋ sü Ʒedeɔn ˗bha ö ˗de ˗naan dɔ ˗sü, ˗a ˗bha ˗dekëtɩtɩsü waa˗ ˗bha ˈwɔn ˗man ˗Zlan ˗ta ˗sü ˗bha. Kö ˗yö yö ˈö ˗Zlan ˗ya dɔ ˗a ˗kɔ ˈka bhë ˗a kë ˗ni ˈgü, ˗a ˗bha zuʋ̈saadhɛ ˗yö ˗da ˈgüdandhe ˈgü. ˈKö ˈkwa ˗kë mɛn zii ˈka ɛɛnˈˈ ˈö ˈkwaa˗ ˈka, kwa dua ˗mü kö mɛn zii ˗nu ˈˈnuɛ bho zuʋ̈ga ˗yö kë kwa ˗gɔ. Kwa ꞊mɔɔn˗ ˗bha ˈkwa ˗an ˗takun ˗an ˗bha yö ˈˈgbɩɩ˗ ˈö bhë ˗a kë ˗sü ˗bha.—Ebl. 13:17.

4. Ʒedeɔn ˗yö ö ˗bha ˗de ˗naan dɔ ˗sü waa ˗dekëtɩtɩsü ˗zɔn ˗kɔ ˗kë ꞊dhɛ?

⁴ Ʒedeɔn ˗kun mɛn ˈö ö ˗de ˗naan dɔ, ˈö ö ˗de ˗kë ˈˈtɩtɩ ˗a ˈka. b ˗Dhɛ ˈö ˗Zlan ˗bha ˈˈkiö do ˗ya pö ˗a ˗dhɛ ꞊dhɛ ˗Zlan ˗ya ö ˗kɔ ˈˈyɛ ˗a ˗bha kö ˗yö Izraɛdhömɛn ˗nu bho Madianmɛn ˗nu ˗gɔ ˈˈgan ˈgü, Ʒedeɔn ˗yö ö ˗de ˗kë ˈˈtɩtɩ ˈö˗ pö: «N ˗man ˈˈkwɛnŋgɔ ˗yö ˈˈtɩtɩ Manase ˗bha ˈkɔɔmɛn ˗nu ꞊zinŋgü, ˈö n dë ˗bha ˈkɔdhi ˈgü ˈmaan pë ˈbha ˈka.» (Juges 6:15) ˗A ˗bha ˈgü ˗be ˈyaa ˗mɔn yö ˈö bhë ˗a ˗bha. ˈˈKɛɛ Zoova ˗zë ˗ya ˈwɔn ˗dɔ ꞊dhɛ ˗a ˗kɔ ˗mɔn ˗a ˗bha. ˗A ˈsaa˗ ˈgü, Ʒedeɔn ˗yö yö ˈö bhë ˗a ˗kë, ˈö˗ ˈˈdhiʋ̈ta ˗së ˈka.

5. ˗Mën ˈö ꞊mɔɔn˗ ˗bha ˗yö mɛn zii ˗nu ˗bha wo ˗de ˗naan dɔ ˗sü waa ˗an ˗bha ˗dekëtɩtɩsü ˗da ˈgüdandhe ˈgü?

⁵ Mɛn zii ˗nu ˗wo pë ˈˈpɛpɛ ˗kë kö ˗de ˗naan dɔ ˗sü waa ˗dekëtɩtɩsü ˗wo kë wo ˗gɔ ˈwɔn ꞊gban ˈgü. (Mich. 6:8; Këw. 20:18, 19) ˈWaa wo ˗de ˗wɔn blɛɛˈˈ ˗desüva ˈka, ˗kɔ ˗mɔn ˈwɔn ˗bha ˗sü ɛɛnˈˈ pë ˗nu ˈwo ˗an ˗kë ˗an ˗wɔn ˈgü. ˈWaa wo ˗de ˈsü ˈpö ˗bhaasü ˈwɔn ˗nu ˈwo zë ˗an ˗gɔ ˗an ˗wɔn ˈgü. ˈˈKɛɛ ˈˈtʋ̈ŋ ˈbha ˗nu ˈka, ö ˗de ˗naan dɔ ˗sü waa ˗dekëtɩtɩsü ꞊mɔɔn˗ ˗bha ˈö ˗kë mɛn zii ˈbha ˗kɔa ˈˈgbɩɩ˗. ˗Yö ꞊mɔɔn˗ ˗bha ˈö ö ˗kɔ kpɔ yö ꞊va ˗gɔ, ˈö˗ ꞊gban kë ˗sü ˗kë ˗a ˗kɔa ˈˈgbɩɩ˗. Mɛn ˗nu ꞊waa˗ ˗wɔn yaa blɛɛˈˈ ɛɛnˈˈ ˈzü ꞊waa˗ ˗bha yökë ˗së ˈka ˗sü ˗wɔn blɛɛˈˈ, ö ˗de ˗naan dɔ ˗sü ɛɛnˈˈ ˗dekëtɩtɩsü ꞊mɔɔn˗ ˗bha ˈö ˗kë ˗a ˗kɔa ˈˈgbɩɩ˗. Mɛn zii ˗nu ˗wa kë ˈwɔn suu ˗nu ˈwo ˈˈdhʋ̈ ˗an ˈgü, Ʒedeɔn ˗bha ˈwɔnzuan ˗dho ˗an ˗takun ˗kɔ ˗kë ꞊dhɛ?

6. ˗Gleŋ ˗mɛɛn ˈö mɛn zii ˗nu ꞊mɔɔn˗ ˗bha ˈwo˗ sü Ʒedeɔn ˗bha ö ˗de ˗naan dɔ ˗sü ˗bha? (Kpɔɔˈˈ ˈzü pë ˈˈbin ˗bha.)

⁶ ˗Ka ˗takundhe ˗dhɛ. Mɛn ˈö ö ˗de ˗naan dɔ, ˗yö pë ˗nu ˈö˗ ˗kɔ ˈyaa ˗mɔn ˗an kë ˗sü ˗bha ˗an ˗dɔ. Ʒedeɔn ˗ya ˗zɔn ꞊dhɛ ö ö ˗de ˗naan ˗dɔ,  ˈö ˗takundhe ˗dhɛ mɛn ˈˈwɛɛ ˗nu ˗gɔ. (Juges 6:27, 35; 7:24) Mɛn zii ˗nu ˈwo ꞊kpɔɔsü, ˗wo ˗to ˗a ˗bha ˈwɔnzuan ˈˈpiʋ̈. Toni ˈö ˈkwa˗ ˗wɔn ꞊blɛɛ ꞊klöö˗ yö ˗ya ˗pö: «A n ˗kɔ ˗kpɔ yö ꞊va ˈö n ˗kɔ ˈyaa ˗mɔn ˗an kë ˗sü ˗bha ˗an ˗gɔ, ˈyö ˗tɔ ꞊dhɛ ˗kɔ ˈwo n ˗to ˗a ˈka ˈyö bhë. ˈˈKɛɛ ˈdhɛ ˈa˗ yö ˈˈdhʋ̈, yi ˈwɔn ˈö ˗gban ö ˗de ˗naan dɔ ˗sü ˗bha ˗a ˗draan yi ˗bha ˗Zlan ˗dhɔkë ˈkɔɔ ˗sü ˗ta, ˈa˗ pö n ˗man dhebɔ ˗dhɛ ˈpö ˗kɔ ˈö˗ yö ˗a ˈka ˗ya blɛɛˈˈ. ˗Ya ˈgo mü ˈzü, a video ˈö jw.org ˗ta ˈö˗ ˗gɔ ˗kë: « Comme Jésus, formons les autres, faisons-leur confiance et rendons-les capables » ˈka bhë, ˗a ˗ga. Toni ˗yö ˗ya ˗takundhe ˗dhɛ ˗sü ˗bha mɛn ˈˈwɛɛ ˗nu ˗gɔ. ˈWɔn ˗së ˗mɛɛn ˈö˗ ꞊slɔɔ ˗a ˈgü? ˗Ya ˗pö: «Yö ˗nu ˈwo ˗zlanwokɔdhi ˈgü yi ˗ya ˗an kë ˗sü ˗bha ˗së ˈka, ˈö ˈa ˈˈtʋ̈ŋ ꞊slɔɔ kö ˈa yaa Zoova yi ˗bha ˈˈtɔŋdëdhɛ ˗gɛn ˗gban ˈzü.»

7. ˗Wa mɛn zii ˗nu këwɔn ˗nu ˗zëpiʋ̈dhɛ pö, ˗wo ˗dho ˈto Ʒedeɔn ˗bha ˈwɔnzuan ˈˈpiʋ̈ ˗kɔ ˗kë ꞊dhɛ? (Zakö 3:13)

⁷ ˗Wa ka këwɔn ˗nu ˗zëpiʋ̈dhɛ pö, ˈya ˗dho ˗shiö ka ˗dhɛ. ꞊Waa˗ pö mɛn zii ˗nu ˈti ˈwɔn ˈbha kë ˗së, ˗wɩ ˗a ˗bha ˗sü ꞊mɔɔn˗ ˗bha ˈö ˗kë ˗an ˗gɔ ˈˈgbɩɩ˗. ˈˈKɛɛ Ʒedeɔn ˗bha ˈwɔnzuan ꞊mɔɔn˗ ˗bha ˈö ˗an ˗takun ˈzü. ˗A ˈwɔn ˗kun ˗a ˈˈɲaan ꞊dhɛ ˈwɔn yaa kë ˗dhii ˗yö ö ˗bha. ˗A ˗wɔn ˈgü ˗dhɛ ˈö Eflaimömɛn ˗nu ˗wa pö ˈyii ˈwɔn ˈbha kë ˗së, ˗yö ö zuʋ̈ˈˈ ˗kë ˗saa. (Juges 8:1-3) Ʒedeɔn ˈti˗ ˗daakë ˗an ˗gɔ ˗naandhe ˈka. ˗Ya ˗zɔn ꞊dhɛ ö ö ˗de ˗kë ˈˈtɩtɩ, ˈö ö ˈˈtʋ to ˗an ˗bha, ˈö˗ ˗daakë ˗an ˗gɔ ˗së ˈka. ˗Ya ˗kë ˈö ˗an zuʋ̈ˈˈ ˗yö dho ˈˈshia˗. Mɛn zii ˗nu ˈwo ꞊kpɔɔsü ˗wo ˗to Ʒedeɔn ˗bha ˈwɔnzuan ˈˈpiʋ̈. Mɛn ˗nu ꞊waa ˗an ˈwɔn kë ˗kɔ ˗nu ˗zëpiʋ̈dhɛ yö ˗wa blɛɛˈˈ ˗ni ˈgü, ˗wo wo ˈˈtʋ ˗to ˗së ˈka, ˈö ˈwo˗ ˗daakë dhɔŋdhɔŋsü ˈka. (Zakö 3:13 ˗wo pö.) ˗A ˗kë ˈˈdhʋ̈ ˗sü ˗yö ˗nu ˗dhikodhɛ ˈka ˗zlanwokɔdhi ˈgü.

8. ˗Wa mɛn zii ˗nu ˈˈnuɛ bho ˗an ˗bha yö ˗bha, ˗mën ˈö ˗an dua ˈdhö ˗mü kö ˗wa kë? ˗A ˈwɔnzuan ˗zɔn.

⁸ ˗Ka ˈtɔbhɔdhe ˈˈpɛpɛ nu Zoova ˗dhɛ. ˈDhɛ Ʒedeɔn ˗kɔ ˗yö ˗ʒiö Madianmɛn ˗nu ˗gɔ, ˈö mɛn ˗nu ˗wo ˗ya ˗a ˈtɔ bhɔ ˗sü ˗bha, ˗ya ˗zɔn ˗an ˗dhɛ ꞊dhɛ Zoova ˈnën ˗an dua ˈdhö ˗mü kö ˗wa ˈtɔ bhɔ. (Juges 8:22, 23) Mɛn zii ˗nu ˗dho ˈto ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ? ˗An dua ˗mü kö ˗wo Zoova ˈtɔ bhɔ yö ˈˈpɛpɛ ˈwo˗ ˗kë ˗an ˗wɔn ˈgü. (1 Ko. 4:6, 7) ˗A ˈwɔnzuan do ˈnën ˗tɔ, ꞊ya kë ꞊dhɛ ˗wa mɛn zii ˈbha ˈˈnuɛ bho ˗a ˗bha mɛn ꞊klaŋkë ˗së ˈka ˗sü ˗bha, ˗a dua ˗mü kö ˗ya ˗zɔn ꞊dhɛ ö˗ ˗sü ˗Zlan ˗Wo ˈgü, ɛɛnˈˈ ˈzü ˗ya pö ꞊dhɛ Zoova ˗bha ˗kɔlokota ˈnën mɛn ꞊gban kwa ˗kian. Mɛn zii ˗nu dua ˗mü kö ꞊ya kë ꞊dhɛ ˗an ˗bha mɛn ꞊klaŋkë ˗kɔ ˗yö Zoova ˈtɔ ˗bhɔ ɛɛnˈˈ ˗yö mɛn ˗nu ˈˈɲan ˗bɔ wo ˗zë ˗an ˗ta, ˗wo wo ˗zota ˗a ˈgü. ˗A mɛn do ˈwo˗ ˗dhɛ Timote ˗kwaa ˗bha ˈwɔnzuan ˗ga. ˗Dhɛ ˈö ˗kë mɛn zii ˈka ˗dɛɛ ˈgü, ˈˈdhɛɛtadhiaŋ˗ ˗nu zë ˗sü ˗dhɔ ˗kun ˗a kë ˗ni ˈgü. ˗Ya ˗pö: «N ˗man dhiaŋ züdɔdhɛ ˗nu waa ˈwɔnzuan ˗nu ˈa kun ˗an ˈsü ˗ni ˈgü ˗wo ˗kë ꞊gblɛɛn, ˈö ˗an ˈgüman ˗dhɛ ˈyaa kun ˈˈplëëplë. ꞊Ya kë ꞊shiöŋ mɛn ˗nu ˗wo n ˈˈnuɛ ˗bho, ˈˈkɛɛ ˈyaa ˗an wëë bɔ Biblö ɛɛnˈˈ Zoova ˈˈpiʋ̈.» Timote ˗ya ˗yö ꞊dhɛ ö dua ˗mü kö ˈö ö ˗bha mɛn ˗nu ꞊klaŋkë ˗kɔ bho ˈˈgblʋʋ, kö ˈya ˗dho mɛn ˗nu ˈˈɲan bɔ yö ˗zë ö ˈˈpiʋ̈ ˈgbɛ. (Prov. 27:21) ˈWɔn ˗së ˗mɛɛn ˈö go ˗a ˈgü? ˗Ya ˗pö: «꞊Dɛɛ, kwa ꞊dhegblü ˗nu ˗wa ˗pö n ˗man ˈˈdhɛɛtadhiaŋ˗ ˗nu wo ˗takun ˈwo bɔ ˈwɔn ˈˈgbɩɩ˗ ˗nu ˈgü zuʋ̈saadhɛ ˈka, ɛɛnˈˈ ˈö ˈwo ꞊ɲɔɔn ˈzü Zoova ˈˈsuee. N zuʋ̈ˈˈ ˈˈgblü ˗ya dhi ˈgbɛ ˗ya ʒiö ˗a ˈka ˈˈtʋ̈ŋ ˈwo kun man ˗zë n ˈtɔ bhɔ ˗ni ˈgü ˗a ˈka bhë, ˗a ˗ta.»

9. Ʒedeɔn ˗bha ˈwɔn ˗man ˗Zlan ˗ta ˗sü waa˗ ˗bha ˈgüdɔgbɩɩsü ˗wo ˗da ˈgüdandhe ˈgü ˗kɔ ˗kë ꞊dhɛ? (Pë ˈˈbin ˈö˗ kwi ˗ta bhë, ˗a ˗ga.)

⁹ ˈDhɛ ˗Zlan ˗yö Ʒedeɔn ˗kë Izraɛdhömɛn ˗nu ˗bha ˈˈdhiʋ̈sümɛn ˈka, ˗a ˗bha ˈwɔn ˗man ˗Zlan ˗ta ˗sü waa ˈgüdɔgbɩɩsü ˗wo ˗da ˈgüdandhe ˈgü. Zoova ˗ya ˗pö ˗a ˗dhɛ ˗yö ö dë ˗bha Baadhö gbadhɛ shiʋ̈ˈˈ. (Juges 6:25, 26) ꞊Taabha, ˈdhɛ  Ʒedeɔn ö ˗bha ˈˈsɔdha ˗nu ꞊kpaa ˈkwëë˗ kö ˈwo ˈdho ˗gblü ˈˈpiʋ̈, Zoova ˗ya ˗pö ˗a ˗dhɛ ˗gɛnɲan ˈka ꞊plɛ ꞊dhɛ ˗yö ˗an ˈˈkan ˈˈpiʋ̈. (Juges 7:2-7) ˗Ya ˗pö ˗a ˗dhɛ ˈzü ˗yö ˈko ˗ya ö ˈyɔɔ˗ ˗nu ˗bha gbeŋ ꞊zinŋgü.—Juges 7:9-11.

10. Mɛn zii ˗nu ˗bha ˈwɔn ˗man ˗Zlan ˗ta ˗sü ꞊mɔɔn˗ ˗bha ˈö ˗da ˈgüdandhe ˈgü ˗kɔ ˗kë ꞊dhɛ?

¹⁰ Mɛn zii ˗nu dua ˗mü kö «ˈwɔn ˗man ˗Zlan ˗ta ˗sü zuʋ̈ga» ˗yö kë ˗an ˗gɔ. (Zak. 3:17, NWT) Mɛn zii ˈö ˈwɔn man ˗Zlan ˗ta, ˗yö ö ˗gɔ ˗dho ˈˈshia˗ pë ˈˈpɛpɛ ˈö Biblö ɛɛnˈˈ ˈö Zoova ˗bha ˗kɔlokota ˗ya pö, ˗a ˗dhɛ. ˗Yö ˈwɔnzuan ˗së ˗zɔn mɛn ˈˈwɛɛ ˗nu ˗dhɛ. ˈˈKɛɛ ˗a ˗bha ˈwɔn ˗man ˗Zlan ˗ta ˗sü ꞊mɔɔn˗ ˗bha ˈö ˗da ˈgüdandhe ˈgü. ˗Wa yökë ˗kɔ ˗dhioo ꞊va nu ˗a ˗dhɛ, ɛɛnˈˈ ˗a ˗dhioo ˗nu ˗wa ˈgo ˈˈgblʋʋ ˈˈvaandhö, ˗to ˗an ˈˈpiʋ̈ ˗sü ꞊mɔɔn˗ ˗bha ˗yö kë ˗a ˗kɔa ˈˈgbɩɩ˗. ˈˈTʋ̈ŋ ˈbha ˗nu ˈka, ˗a zuʋ̈ˈˈ ꞊mɔɔn˗ ˗bha ˗yö dɔ ˈdudhö ˈwɔn ˗nu ˈwo˗ pö ˗a ˗dhɛ ˗yö ˗an kë bhë, ˗an ˗bha ˗kë ˗së ˗sü ˗wɔn ˈgü. Ɛɛnˈˈ ˈzü ˗wo ꞊mɔɔn˗ ˗bha ˈwo yö ˈbha ˈö ˈwo ꞊mɔɔn˗ ˗bha ˗wa ˗da ˗kasho ˈgü ˗a ˗wɔn ˈgü, ˗a dɔ ˗a ˗kɔ ˈka. ˈWɔn suu ˗nu ˈwo ˈˈdhʋ̈ ˗an ˈgü, mɛn zii ˗nu ˗dho ˈto Ʒedeɔn ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

11. ˈMën dho mɛn zii ˗nu ˗takun kö ˗wo ˈwɔn man ˗Zlan ˗ta?

¹¹ ˗Ka ka ˈˈtʋ ˈto ˗dhioo ˗nu ˗bha ˗së ˈka, ˈka ˗an ˗ya ꞊bhlëë ˈgü. ˗Kɔ ˈö Ʒedeɔn dho ö dë ˗bha Baadhö ˗dhɔkëdhɛ shiʋ̈ˈˈ ˗a ˈka, ˗dhɛ ˈö dho Zoova ˗dhɔkëdhɛ dɔ ˗a ˗bha waa wü ˈö dho ˗a ˈˈsaa˗ bho, Zoova ˗ya ꞊gban ˗pö ˗a ˗dhɛ. Pë ˗nu ˈö ˗Zlan ˗ya pö ˗a ˗dhɛ bhë Ʒedeɔn ˈyii˗ ˗zëpiʋ̈dhɛ mɛɛnˈˈ, ˗yö ˗to ˗an ˈˈpiʋ̈. ꞊Dɛɛ, Zoova ˗bha ˗kɔlokota ˗yö ˈsëëdhɛ ˗nu, nɔɔn˗ ˗nu waa yökë ˗kɔ ˗nu ˗bɔ mɛn zii ˗nu ˗dhɛ, kë ˈˈdhʋ̈ kö ˗wo kwa ˗takun kö ˈkwa ꞊ɲɔɔn Zoova ˈˈsuee. Mɛn zii ˗nu ˗dhɔ ˗yö kwa ˗kë, ˈyö sü ꞊dhɛ ˗wo ˗to ˗Zlan ˗bha ˗dhioo ˗nu ˈˈpiʋ̈. ˗Yö ˈwɔn ˗së ꞊dede ˈka ˗zlanwokɔdhi ˗nu ˗bha ˈka.—Ps. 119:112.

12. Zoova ˗bha ˗kɔlokota ꞊yaa˗ pö mɛn zii ˗nu ˗dhɛ ˗wo ˈwɔn ˈbha bho ˈˈgblʋʋ, ˗kɔ ˗mɛɛn ˈwo dho Eblö 13:17 ˗ya ˗a ˈka ꞊bhlëë ˈgü?

¹² ˗Ka ˈˈwɩ ˈwɔn ˗nu ˗bho ˈˈgblʋʋ ˗sü ˗bha. Kwa ˗zo ˗yö ˗bo ꞊dhɛ Zoova ˗ya ˗pö Ʒedeɔn ˗dhɛ ˗yö ö ˗bha ˈˈsɔdha ˗nu ꞊vadhɛ bho ö ˈˈpiʋ̈. (Juges 7:8) Ʒedeɔn ꞊mɔɔn˗ ˗bha ˈö ö ˗zota ˗be ˈö˗ pö: «ˈMan˗ kë ˈˈdhʋ̈ ˗yö ˗dho kë ˗së ˗ee?» ˈˈKɛɛ ˈkö ˗kë ˈˈdhʋ̈, ˗yö ˈwɔn ˗man ˗Zlan ˗ta. ꞊Dɛɛ ˈpö, mɛn zii ˗nu ˗wo ˗to Ʒedeɔn ˗bha ˈwɔnzuan ˈˈpiʋ̈. Zoova ˗bha ˗kɔlokota ꞊yaa˗ pö ˗an ˗dhɛ ˗wo ˈwɔn ˈbha kë ˗kɔ bho ˈˈgblʋʋ, ˗wo ˗to mü ˈwo˗ ˗kë. (Eblö 13:17 ˗wo pö.) ˗A ˈwɔnzuan ˈnën ˗tɔ ˗kwɛ 2014 ˈgü, ˈwëëga ꞊slɔɔ ˗kɔ kö ˈkwa ˗bhɔkwëëkëgükɔ ˗nu dɔ bhë, kwa ˈˈdhiʋ̈ʒiöwomɛn ˗nu ˗wa ˗bho ˈˈgblʋʋ. (2 Ko. 8:12-14) ˗Wa ˗pö ˗zlanwokɔdhi ˗nu dua ˈyaa ˗mü ˈzüdhö kö ˗wo ˈˈpɔ ˈkun kwa ˗bha ˗kɔlokota ˗gɔ, kö ˗wo wo ˗bha ˗bhɔkwëëkëgükɔ dɔ. Gbɔɔdhe ˈö kwa ꞊dhegblü ˗nu ˗wa ˗kë ˈˈkpɔnŋtaadhɛ ˗todhʋ̈sü ˈgü ˈyö ˈwo dho ˗a ˈbha ˈsü, kö ˗dhɛ ˗nu ˈö ˗bhɔkwëëkëgükɔ ˗nu ˈwaa˗ ˗bha, ˈkö ˗kë ꞊dhɛ ˈwëëga ˈyaa ˗an ˗gɔ, ˗wo ˗an  ˗bha ˈkɔ dɔ. ˗Dhɛ ˈö Ʒoze ˗ya man ˈˈdhʋ̈, ˗a zuʋ̈ˈˈ ˗to ˈzlöö ˈö˗ pö: «꞊Ya ˈto ˗a ˈdhɛ ˈkö bhë ˗a ˗bha, kö kwa ˗kɔ ˈti ˗dho ˗mɔn ˗bhɔkwëëkëgükɔ dosɛnŋ ˗ʒiaan dɔ ˗sü ˗bha. ˗Yö ˈti ˗dho ˈwɔn ˈkun ˈˈsɛ ˈˈpian ˈö yö ˗a ˈgü.» ˈMën Ʒoze ˗takun ˈö to ˗dhioo ˈö bhë ˗a ˈˈpiʋ̈? ˗Ya ˗pö: «Proverbes 3:5, 6 ˗yö n ˗zo ˗bö ꞊dhɛ n dua ˗mü kö ˈa n ˗zoyö Zoova ˗dhɛ. A ˈwɔn ˗së ꞊dede ˗slɔɔ ˗a ˈgü. Yi ˗bhɔkwëëkëgükɔ ꞊va dɔ ˗ni ˈgü, ˈˈkɛɛ ˈya˗ yö ˈpö ꞊dhɛ yi dua ˗mü kö ˈyi gbɔɔdhe ˗nu kë, kö ˗wa ˗lo ˈko ˗ta ˗yö ˗mɔn ˈˈkwëë.»

13. (1) ˈMën ˈö˗ ˗wɔn kun ga ˗sü ˈka Ʒedeɔn ˈgü? (2) Mɛn zii ˗nu ˗dho ˈto Ʒedeɔn ˗bha ˈwɔnzuan ˈˈpiʋ̈ ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)

¹³ ˗Ka ka ˈgü dɔ ˈˈgbɩɩ˗ kö ˈka Zoova dhɔɔbhaawɔn kë. ˈKö ˗kë ꞊dhɛ ˈˈsuʋ̈ ˗kun Ʒedeɔn ˈgü, ˈö˗ ˗bha yö ˗ya dɔ ga ˗yɛ ˈˈdhiʋ̈, ˗yö ˈwɔn ˗man Zoova ˗ta. (Juges 9:17) ˈDhɛ Zoova ˗yö Ʒedeɔn ˗zo ˗gban, ˗a zuʋ̈ˈˈ ˗kë ˗saa, ˈö ga ˗a ˈgü ꞊dhɛ ˗yö ˗dho ö ˗takun kö ˈö˗ ˗bha ˈˈsɛgümɛn ˗nu ˗takpa. Mɛn zii ˗nu ˈwo ˗dhɛ ˗nu ˈö ˗wa kwa ˗bha yö ꞊kɛɛ˗ ˈˈkan ˗a ˗bha ˗an ˈgü, ˗wo ˗to Ʒedeɔn ˗bha ˈwɔnzuan ˈˈpiʋ̈. ˈKö ˗kë ꞊dhɛ ˗wo ꞊mɔɔn˗ ˗bha ˈwo ˗an kun, ˈwo ˗an dhɛɛˈˈ kpɔ, ˈö ˗an ˗bha yö ˗yö ꞊shiʋ̈, ɛɛnˈˈ ˈwo pë ˈˈdhiʋ̈˗ ˗kë ˗an ˈka, mɛn zii ˗nu ˗wo ˈˈdhiʋ̈sü ˗bhɔkwëë ˗nu waa ˗zlanwopösü ˈka. c ˈˈKlʋʋbhɔdhe ˈkpii˗ ˈˈtʋ̈ŋ ˈka, mɛn zii ˗nu ˗bhawɔn ˗dho yö ˈgüdɔgbɩɩsü ˗bha kö ˗wo ˈto ˗dhioo ˗nu ˈˈpiʋ̈, ˈkö ˗kë ˗ʒiaanwo ꞊dhɛ ˗an ˗bha ˗tosɛta ˗dɔ ga ˗yɛ ˈˈdhiʋ̈. ˗Wo ꞊mɔɔn˗ ˗bha ˈwo ˗kɔ ˈö ˈkwa dho ˗Zlan ˗bha za ˗nɔɔn pö ˗a ˈka waa ˈpë ˈkwa dho ˗a kë kö ˈkwa dha ˈGɔgö ˈö go Magɔgö ˗a ˗gɔ, ˗a ˗dhioo ˗nu dɔ kwa ˗ta.—Ézéch. 38:18; ˗Dhɛ. 16:21.

14. Ʒedeɔn ˗bha ˈgügbɩɩdhɛ ˗yö ˗da ˈgüdandhe ˈgü ˗kɔ ˗kë ꞊dhɛ?

¹⁴ Ʒedeɔn ˗bhawɔn ˗kun ˈgügbɩɩdhɛ ˗bha kö ˗yö ˈˈdhiʋ̈sü Izraɛdhö ˈka. ˗Dhɛ ˈö ˈko ˗ya Madianmɛn ˗nu ˗bha, ˈö ˈwo ˗ya ꞊duëë ˗sü ˗bha gbeŋ, Ʒedeɔn ˗yö ˗to ˗an ˈˈpiʋ̈ ˈö go ˗a ˈka Ʒezreɛdhö goo ˈgü, ˈö yö˗ ˈka Zuudɛn ga ꞊bhaa. ˗A ˈbha ˗ya kë kö ˗a ˗dhɛ ˗kun ˈˈblü tii ˈgü ˗dhɛ ˈka. (Juges 7:22) Ʒedeɔn ˈˈdhiʋ̈ ˗to Zuudɛn ga  ˗bha ˗ee? ˗Abin. ˈKö ˗kë ꞊dhɛ waa ö ˗bha ˈˈsɔdha ˗nu 300 bhë ˗wo ˗kun blɔ ˗sü ˈka, ˗wo ˈˈyi ˗kan ˈö ˈwo to Madianmɛn ˗nu ꞊kee˗ ˈwo dho ˈwo ˈko bhë ˗a ga sü.—Juges 8:4-12.

15. ˗Mën ˈö ꞊mɔɔn˗ ˗bha ˗yö mɛn zii ˗nu ˗bha ˈgügbɩɩdhɛ ˗da ˈgüdandhe ˈgü?

¹⁵ ˈˈTʋ̈ŋ ˈbha ˗nu ˈka mɛn zii ꞊mɔɔn˗ ˗bha ˈö blɔ ö ˗zokë ˗zlanwokɔdhigümɛn ˗nu waa ö ˗de ˗bha ˈkɔdhigümɛn ˗nu ˈˈpiʋ̈ ˗sü ˈka. ꞊Ya kë ˈˈdhʋ̈, ˗yö ˗dho ˈto Ʒedeɔn ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

16-17. ˈMën Ʒedeɔn ˗takun ˈö bɔ ˈwɔn ˈˈgbɩɩ˗ ˗nu ˈgü? ˈMën dho kë ga ˗sü ˈka mɛn zii ˗nu ˈgü? (Isaïe 40:28-31) (Kpɔɔˈˈ ˈzü pë ˈˈbin ˗bha.)

¹⁶ ˗Yö ga ka ˈgü ꞊dhɛ Zoova ˗dho ꞊faan nu ka ˗dhɛ. ˗Yö ˗kë ga ˗sü ˈka Ʒedeɔn ˈgü ꞊dhɛ Zoova ˗dho ꞊faan nu ö ˗dhɛ. Pë ꞊dede ˈö Zoova ˗ya ˗kë ˈyö bhë. (Juges 6:14, 34) ˈDhɛ ˈˈtʋ̈ŋ ˈbha ˗yö ˗wo, Ʒedeɔn waa ö ˗bha ˈˈsɔdha ˗nu ˗wo Madian ˗gblüdë ꞊plɛ ˈwo kun ꞊ɲɔɔnmɛan ꞊taa ˗an ˗kë ˗bia. (Juges 8:12, 21) Zoova ˗bha ˗takundhe ˈsaa˗ ˈgü, ˗wo ˗gblüdë ˗nu ˈwo bhë ˗an ˗kun, ˈö ˗gblü ˗yö dhi ˗an ˗gɔ. Mɛn zii ˗nu ꞊mɔɔn˗ ˗bha ˈwo wo ˗zoyö Zoova ‹ˈö˗ ˈgü ˈyaa ga toŋtoŋdhö bhë ˗a ˗dhɛ.› ˗An ˗bhawɔn ˗ya yö ꞊faan ˗bha, Zoova ˗dho ˗a nu ˗an ˗dhɛ.—Isaïe 40:28-31 ˗wo pö.

¹⁷ ˗Kwa Matiö ˈö kwa ˈˈdhɛkësü ˈwɔnyëë do ˈka ˗a ˗bha ˈwɔnzuan ˗ga. ˗Mën ˈö˗ ˗takun ˈö bɔ ˈwɔn ˈˈgbɩɩ˗ ˗nu ˈgü? ˗Ya ˗pö: «A faanmëndhe ˗slɔɔ ˗wo ˈö ˗ya ˗sü ˈka Fidhipö 4:13 ˈgü bhë, ˗a ˈgü. A˗ ˗yö ˗gɛnɲan ˈka ꞊va ꞊dhɛ a ˗kun blɔ ˗sü ˈka ꞊dedewo. ˈˈKɛɛ ˈˈtʋ̈ŋ ˗nu ˈwo ˈˈdhʋ̈ ˗an ˈka, a ˗bhɛɛ ˗Zlan ˗dhɛ, ˈa˗ pö ˗a ˗dhɛ ˗yö ꞊faan ˈö n ˗bhawɔn ˈdhö˗ ˗bha ˗a nu n ˗dhɛ kö ˈa n ꞊dhegblü ˗nu ˗takun. ˗Ya kë ˈˈdhʋ̈ Zoova ˗yö ꞊faan ˗nu n ˗dhɛ, ˈö ˈa dho yö ˈö bhë ˗a kë ˗sü ˈka ˈˈdhiʋ̈.» ꞊Dhɛ Ʒedeɔn ˈdhö, ˈkö ˗kë ꞊dhɛ ˈyaa kë ˈˈplëëplë ˈˈtʋ̈ŋ ꞊gban ˈka, mɛn zii ˗nu ˗wo wo ˈgü ˗dɔ ˈˈgbɩɩ˗ ˈwo wo ˗zokë Zoova ˗dhɔkëmɛn ˗nu ˈˈpiʋ̈. ˈˈKɛɛ ˗an dua ˗mü ˈpö kö ˗wo wo ˗de ˗naan dɔ, kö ˗wa ˈwɔn dɔ ꞊dhɛ wo dosɛnŋ ˈwaa ˗mɔn yö ˈˈpɛpɛ kë ˗sü ˗bha. ˗Yö ꞊mɔɔn˗ ˗bha ˈö ga ˗an ˈgü ˈpö ꞊dhɛ Zoova ˗dho wo ˗bha bhɛɛwo ˗nu man, ˈö ꞊faan nu wo ˗dhɛ ˈwɔn ˈˈgbɩɩ˗ ˗nu ˈgü.—Ps. 116:1; Fdh. 2:13.

18. Mɛn zii ˗nu ˗dho ˈto Ʒedeɔn ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

¹⁸ Mɛn zii ˗nu ꞊mɔɔn˗ ˗bha ˈwo ˗gleŋ ˗së ꞊va ꞊dede sü Ʒedeɔn ˗bha. ꞊Waa˗ pö ˈwo wo ˗kɔ ˈkpɔ yö ˗nu ˗gɔ, ɛɛnˈˈ ˈkö˗ ˗de ˈö mɛn ˗nu ˗wo ˗an ˈwɔn kë ˗kɔ ˗nu ˗zëpiʋ̈dhɛ ꞊mɛɛn ɛɛnˈˈ ˈzü ˈwo ˗an ˗wɔn ˗së ꞊blɛɛ, ˗an dua ˗mü kö ˗wo wo ˗de ˗naan dɔ, ˗wo wo ˗de kë ˈˈtɩtɩ. ˗An dua ˗mü kö ˗wo ˈwɔn man ˗Zlan ˗ta, kö ˗an ˈgü ˗yö kë ˈˈgbɩɩ˗ ˈˈkpɔnŋtaadhɛ ɲën ˈˈtʋ̈ŋ ˈö yö ˗a ˈgü. ˗An dua ˗mü ˈzü kö ˗wo ˈdhaŋ˗ bho ꞊dhɛ ˈwɔn ˈˈgbɩɩ˗ suu ˈˈoo ˗su ˈgü, ˗Zlan ˗dho ꞊faan nu wo ˗dhɛ. ˈYaa za ˈgü ꞊dhɛ kwa ˗maankëmɛn ˗tiaandhö ˗nu ˈwo bhë, ‹kwa ꞊bhlëë ˗ya ˗nu ˗bha.›—Fdh. 2:29.