A ˗bhɔ ˗kwɛ 1935 ˈgü ˈˈkwipö ˈwo ˗dhɛ Dalastɔnö Angletɛɛ ˗sɛ ˈgü, ˗a ˈgü. Yi ˗bha ˈˈpian ˗ta, izinö ˗kun mü ꞊va, ˈö ˈˈwo ˈˈtöö kun ˗dhɛ ꞊gban ˈgü. ˈDhɛ n ˗mɛn ˗nu ˗ya Biblö draansü ˗bha Zoova ˗bha ꞊Gbɛkiö ˗nu ˈˈpiʋ̈, kö n ˗kwɛ ˗ya kë ˗yiishiö. ꞊Taabha, man ꞊dede gagade ˈö Biblö ˈgü ˗yö n zuʋ̈ˈˈ ˗sü. ˗A ˗wɔn ˈgü ˗kwɛ 1952 ˈgü a ˗bɔ ˈˈyi ꞊bhaa, kö n ˗kwɛ ˗ya kë 16.

˗Kwɛ ꞊dede ˈö bhë ˗a ˈka ˈyö ˈa ˗ya yö draansü ˗bha izinö do ˈwo yökë ˗a ˈka ꞊kwɛɛ˗ waa gɔ motëë ꞊kwɛɛ˗ ˗nu ˗yökë mü, ˗a ˈgü. ˗Wo ˗kun n ˗kian ˗ni ˈgü kö ˈa yö ˈkpii˗ ˈbha kë izinö bhë ˗a ˈgü, ˈö yö ˈö ˈˈdhʋ̈ ˈö˗ ˗dhɔ ˗yö n ˗kë ꞊dedewo.

˗Dhɛkpaɔyi do ˈka, ˈyö ˗maankëmɛn do ˗ya pö n ˗dhɛ ˈa ˈˈdhiʋ̈sü ˗zlanwokɔdhi ˗bha Biblö draansü ˈka yi ˗bha ˗zlanwokɔdhi ˈö Wilɛnö˗Ɔlö ˗a ˈgü. ˗Yö ˗kun pë ˗wɔngbɩɩsü ˈbha ˈö n dua ˈdhö ˗mü kö ˈa˗ kë, ˗a ˈka. ˈˈKɛɛ ˈyaa kun ˈˈplëëplë n ˗bha ˈka, ˈyö sü ꞊dhɛ ˈˈtʋ̈ŋ ˈö ˈˈdhʋ̈ ˗a ˈka, kö a ˗bhɔkwëë kë ˗ni ˈgü ˗zlanwokɔdhi ꞊plɛ ˈˈpiʋ̈. ˈˈDhɔɔgɔ ꞊zinŋgü, a ˗bhɔkwëë ˗kë ˗zlanwokɔdhi do ˈö n ˗man yökëdhɛ ˈˈsuee Blumsiglɔvö ˗a ˈgü. ˈGo mü ˈü ˈdho n ˗gɔ ˈkɔɔ, ˈö ˗tɔ ˈˈkɩdhʋŋ 32. ˈYö ꞊glooyi ˗nu ˈka ˈman ˈdho n ˗mɛn ˗nu ˈˈpiʋ̈, ˈa ˗bhɔkwëë ˗kë ˗zlanwokɔdhi ˈö Wilɛnö˗Ɔlö ˗a ˈgü.

ˈDhɛ ˗kë ꞊dhɛ ˗yö ˗kun n ˈˈpiʋ̈ kö ˈa n ˗kɔ ˗da Zoova ˗bha ˗kɔlokota ˗dhɛ, pë ˈö ˗maankëmɛn ˗ya pö bhë a ˗wɩ ˗a ˗bha, ˈyö yö ˈö˗ ˗dhɔ n ˗kë ꞊dedewo ˈa kun ˗a draanˈˈ ˗ni ˈgü izinö ˈgü bhë, ˈa go ˗a ˈgü. N ꞊kwaa ˈa˗ wo Zoova ˗zü ˈö ˈˈdhiʋ̈sü n ˈka bhë, n zuʋ̈ˈˈ ˈti ˈto ˈzlöö ˗a ˗bha toŋtoŋdhö, ˈyö sü ꞊dhɛ ˗ya ˗kë ˈö n ˗man ˗tosɛta ˗kë ˗së ꞊dedewo.

ˈDhɛ ˈa kun ˗bhɔkwëë kë ˗ni ˈgü ˗zlanwokɔdhi ˈö kun Blumsiglɔvö bhë ˗a ˈgü, a ˗kpan ˈnëndhiëŋ do ˗së ˈwo˗ ˗dhɛ Anö ˈö kun Zoova ˗bha yö ˗wɔn ˈkun ˗ni ˈgü ˈˈgbɩɩ˗ ˗a ˗bha, ˈyö ˗kwɛ 1957 ˈgü, ˈyi yi ˈko sü. Yi ˗kë ˈˈtʋ̈ŋ ꞊gban ˈgü ˗yödhiʋ̈ ˈka, ˈö go mü ˈyi ˗kë ˗yödhiʋ̈ ˗detasü ˈka. ꞊Taabha yi ˗kë ˗maankëmɛn ˈka, ˈyi dho ˗ʒiaanwo ˈyi yökë betɛdhö. Anö ˗yö n zuʋ̈ˈˈ ꞊nii ˗da n ˗man ˗tosɛta ˈgü.

˗Kwɛ 1966 gü, yi ˗dho Galaadö ꞊klaŋ ˈˈdhiʋ̈. ˗Yö ˗kun ꞊klaŋkɔdhi 42 ˗bha ˗naan ˈka. ˈDhɛ ˈyi yi bo, ˈyö ˈwo yi bɔ Malawi. Malawi ˈö bhë mɛn ꞊vadhɛ  ˗wa ˗pö mɛn tii ˈˈsɛ ˈö ˈwo wo ˗kɔ ˗ya ˗dhɛŋ ˗nu ˗gɔ ˈˈwowosü ˈka ˗a ˈgü, yö ˗mü. ˈYaa kun yi ˗zo ˈˈpiʋ̈ ˗be ꞊dhɛ yi ˈti ˗dho ꞊mɔɔn˗ ˗bha kö ˈyi ˈto ˈˈsɛ ˈö bhë ˗a ˈgü ˈˈtʋ̈ŋ ꞊gblɛɛn ˈˈpiʋ̈.

Yi ˗dho Malawi ˗kwɛ 1967 Fevlie 1 ˈgü. ˈˈSu ˗blɛɛsü ˈyi˗ ˗kë mü, yi ˗gloo ˗an ˗wo draansü ˗bha, ˈyö ꞊taabha ˈyi ˗kë ˗maankëmɛn ˈka. Gɔ do ˗kë yi ˗gɔ, ˈö mɛn ꞊vadhɛ ˗wa ˗ga ˗be ꞊dhɛ ˗yö ꞊mɔɔn˗ ˗bha ˈö bɔ ˗dhɛ ꞊gban ˈgü, ˈö bɔ ˗ʒiaanwo ˈˈyiga ˈˈgblʋ̈gblʋ̈ ˗nu ꞊bhaa. ˈˈKɛɛ ˈyaa kun ˈˈdhʋ̈, ˈˈyi pë ˈsɛnsɛn ˈnën ꞊mɔɔn˗ ˗bha kö ˗yö bɔ ˗a ꞊bhaa. ˈˈTʋ̈ŋ ˈbha ˗nu ˈka yi ˗wɔ tookɔ ˈgü, ˈö ˈkwa dɔ dhayi ˈˈtʋ̈ŋ ˈka, ˈyi ˈbasö kpa ˗a ˗ta kö ˈˈyi ˈya ˗dho bhɔ ˗a ˈgü. Yi ˗bha yö züdɔdhɛ ˈyaa kun ˈˈplëëplë, ˈˈkɛɛ ˗a ˗dhɔ ˗kun yi kë ˗ni ˈgü.

Avlidhö ˈˈsu ˈgü, a ˗kun ˗a yö ˗ni ˈgü ꞊dhɛ ˗a ˈˈtʋ̈ŋ ˈyaa ꞊gblɛɛn ˈzü kö ˈˈsɛkɔɔnmɛn ˗nu ˗wo ˈwɔn ˈˈgbɩɩ˗ wɔ yi ˗ta. Yi do ˈka ˈdhɛ ˈa n ˈˈtʋ to, kö ˈˈsɛkɔɔnmɛn Asinö Banda ˗yö dhiaŋ zë ˗ni ˈgü ꞊ladio ˈgü. ˗Yö ˗kun ˗a pö ˗ni ˈgü ꞊dhɛ Zoova ˗bha ꞊Gbɛkiö ˗nu ˈwaa ˈniisɔnŋ bho, ˈgo mü ˈzü ˗an ˈˈdhi ˗yö ˈˈsɛkɔɔwɔn ˗nu ˈgü, ˈˈkɛɛ ˈyaa kun gagade ˈka. ˈWɔn ˈö kun mü ˈyö ˗tɔ ˈyaa kun bɔ ˗ni ˈgü mɛn ˈˈwɛɛ ˈbha ˈka ɛɛnˈˈ ˈyaa kun ˗an ˗bha paati ˈsëëdhɛ ˈsü ˗ni ˈgü.

ˈDhɛ Sɛtanblö ˈˈsu ˗yö ˗wo, ˈyö ˈyi˗ yö zunalö ˗nu ˈgü ꞊dhɛ ˈˈsɛgɔdhiʋ̈mɛn ˗ya ˗pö Zoova ˗bha ꞊Gbɛkiö ˗nu ˗wa ˗bhluubhludhe ˗da ˗dhɛ ꞊gban ˈgü. ˈYö waa ö ˗kɔlöömɛn ˗nu ˈwo dho wo ˈkwëë˗ ˈwo˗ pö wo ˗dho Zoova ˗bha ꞊Gbɛkiö ˗nu ˗bha yö ꞊kɛɛ˗ ˈˈkan Malawi. ˗Kwɛ 1967 Ɔtɔblö 20 ˈgü, ˈyö ˈwo kwa ˗bha yö ꞊kɛɛ˗ ˗kan. ˗A ˗dhɛ ˈti ꞊gwëë ˈyö ˈˈsɔdha ˗nu ˗wo nu ˈwo kwa ˗bha betɛdhö ˈˈdhiʋ̈ta, ˈwo bɔmɛn ˗nu ˗kë ˈˈsɛ ˈö bhë ˗a ˈgü.

ˈDhɛ ˈyi ˗dhɛkpaɔyi ˗yaaga ˗kë ˗kasho ˈgü, ˗wo yi ˗bho mü ˈwo yi bɔ ˈˈsɛ ˈö Angletɛɛ ˗ya ꞊kɔɔn  ˈwo˗ Ilö Morisö ˗kë bhë ˗a ˈgü. ˈˈKɛɛ ˈˈsɛkɔɔnmɛn ˗nu ˈwo kun Ilö Morisö wo ˈti ˈˈwɩ ˗a ˗bha kö ˈyi kë bɔmɛn ˗nu ˈka ˗dhɛ ˈö bhë ˗a ˈgü. ˗A ˗wɔn ˈgü, yi ˗dho Lodezi ˈö ˗ya kë Zimbabwe ˈka ꞊dɛɛ ˗a ˈgü. ˈDhɛ ˈyi ˗lo mü, ˈˈsɔdha mi do ˈö ˈyaa kun ˗a ˈˈpiʋ̈ kö ˈyi ˗da ˈˈsɛ ˈö bhë ˗a ˈgü, ˗ya ˗pö yi ˗dhɛ: «˗Wa ka kë Malawi, ˈö ˈwii ˈˈwɩ ˗a ˗bha kö ˈka ˈto Ilö Morisö, ka ˗bha ˈgü ˗dhɛ ˈö yö ꞊nën ˈwo dho ˈˈwɩ ˗a ˗bha kö ˈka ˈto mü ˗ee?» ˈDhɛ ˗kë ˈˈdhʋ̈ ˈyö Anö ˗ya ˈˈgbʋ bɔ ˗sü ˗bha. ˈYö ˈa˗ yö ꞊dhɛ mɛn gbɛ˗ ˈyaa˗ ˈˈpiʋ̈ kö ˈyi ˈto ö ˗bha ˈˈsɛ ˈgü. ˈˈTʋ̈ŋ ˈö bhë ˗a ˈka, ˗yɛ ö ˈzü ˗sü ˈwo dho Angletɛɛ ˗yö ˗to mü ˈö ˗da n ˈgü. ꞊Taabha, ˗wo ˗dho ˈwo wo ꞊kwaa yi ˗zü kö ˈyi ˗dhɛkpaɔyi do kë betɛdhö ˈö ˈˈsɛ ˈö bhë˗ ˈgü ˗a ˈgü, kö ˗a ˗dhɛkpaɔyi ˈö dɔ ˗a ˈˈpiʋ̈ ˈyi kwa ˈˈdhiʋ̈ʒiöwomɛn ˗nu ꞊kpɔɔ. ˗Yö ˗kun ˗shiö ˗ni ˈgü yi ˗dhɛ ꞊dedewo, ˈˈkɛɛ yi˗ ꞊gban ˈˈpɛpɛ ˗sü ˈyi˗ ˗lo Zoova ꞊kwɛɛ˗. ˗A ˈˈdooka ˈö dɔ ˗a ˈˈpiʋ̈, ˈyi dho ˈˈkan yi ˗ta kö ˗wa ˈˈwɩ ˗a ˗bha kö ˈyi ˈto Zimbabwe ˈˈtʋ̈ŋ ˈnën ˈbha ˈˈpiʋ̈. ˗Kɔ ˈa ˗kë ˗a ˈka n ˗de ˈgü yi ˈö bhë ˗a ˈka, n ˗zo ˈyaa ꞊mɔɔn˗ ˗bha ˗yö bhɔ ˗a ˈka toŋtoŋdhö. ˗Yö ˗kun ga ˗sü ˈka n ˈgü ꞊dhɛ Zoova ˈnën ʒiaan bho yi ˈka.

Kö yi betɛdhö ˈö Zimbabwe ˗a ˈgü, a ˗kun yökë ˗ni ˈgü ˗Zlan ˗bha yö ˈwɔnyëë˗ ˗nu ˈˈpiʋ̈. ˗Wa ˗pö n ˗dhɛ ˈa n ˗zokë Malawi waa Mozanbikö ˗an ˈˈpiʋ̈. Kwa ꞊dhegblü ˗nu ˈwo kun Malawi ˗wo ˗kun ˗an ˈˈklʋʋ bhɔ ˗ni ˈgü ꞊dedewo. ˗Maankëmɛn ˗nu ˈwo kun Malawi ˗wa ˈsëëdhɛ bɔ betɛdhö ˗dhɛ, man ˈnën ˈa˗ ꞊dhiëë˗ ˗ta. Gbeŋ do ˈka, ˈsëëdhɛ ˗nu ˈwo˗ bɔ ˈˈdhʋ̈ a ˗kun yökë ˗ni ˈgü ˗a ˗bha, ˈˈkɛɛ ˈdhɛ pë ˈˈdhiʋ̈˗ ˗nu ˈwo ˗an kë ˗ni ˈgü kwa ꞊dhegblü ˗nu ˈka ˈmü ˈa˗ yö, ˗a ˗ya ˈˈgbʋ bɔ ˗sü ˗bha. * ˈKö ˗kë ˈˈdhʋ̈, pë ˈbha ˈö pa n zuʋ̈ˈˈ ˈka ꞊dedewo ˈyö ˗tɔ ˗an ˗bha ˗towotasü, ˗an ˗bha ˗zoyödhe waa ˗an ˗bha zuʋ̈saadhɛ.—2 Ko. 6:4, 5.

Yi pë ˈˈpɛpɛ ˗kë kö kwa ꞊dhegblü ˗nu ˈwo to Malawi waa˗ mɛn ˗nu ˈwo ꞊duëë ˈwo dho Mozanbikö ˗wo kwa ˗bha ˈsëëdhɛ ˗nu ꞊slɔɔ ˗kplawo. Sishewa ˗wo ˈö Malawi ˗mɛn ˗nu ꞊vadhɛ ˗wa pö bhë, kwa ꞊dhegblü ˗nu ˈwo˗ ꞊dhiëëta ˗wo ˗dho ˈwo ˗ya Zimbabwe kwa ꞊dhegblü do ˗gɔ ˈˈkanŋba ˈgü. Kwa ꞊dhegblü ˈö ˈˈdhʋ̈ ˗ya ˗kë ˗së ˈö ˈkɔ ˗nu, yökëdhɛ ˗nu dɔ mü ˗an ˗bha ˈka. ˗Wo ˗ya mü ˈwo kwa ˗bha ˈsëëdhɛ ˗nu ꞊dhiëëta.

Yi˗ ˗kë ˈö ˗maankëmɛn ˗nu ˈwo kun Malawi ˈwo nu ˗bhɔkwëë ˈkpii˗ ˗nu ˗ta Sishewa ˗wo ˈgü Zimbabwe ˗kwɛ ˈˈpɛpɛ ˈka. ˗Ya kë ˈˈdhʋ̈ ˈyö ˈwo ˗bhɔkwëë ˈkpii˗ bhë ˗a ˈˈdhɛɛtadhiaŋ˗ ˈˈsëëdhɛ ˗nu nu ˗an ˗dhɛ kö ˗wa wo ꞊yɛɛ˗ kë Malawi, ˗wo ˗an zë mɛn ˗nu ˈö ˈwii nu ˗an ˗dhɛ. ˗Kwɛ do ˈbha ˈka, ˈdhɛ ˗maankëmɛn ˗nu ˈwo ˈˈdhʋ̈ ˈwo nu Zimbabwe, yi˗ ˗kë ˈwo ˗Gblüdëdhɛ ˗yö ꞊klaŋ ˗kë, kë ˈˈdhʋ̈ kö ˗wo ꞊faanmëndhe ꞊slɔɔ.

˗Kwɛ 1975 Fevlie ˈˈsu ˈgü, a ˗dho ˈa ˗wo kwa ꞊dhegblü ˗nu ˈwo go Malawi ˈwo ꞊duëë ˈwo nu Mozanbikö ˈˈkanŋ˗ ˗nu ˈgü ˗an ˗dhɛ. ˗Wo ˗kun ˈto ˗ni ˈgü ꞊dedewo Zoova ˗bha ˗kɔlokota ˗bha ˗dhioo ˗nu ˈˈpiʋ̈ mɛn zii ˗nu ˗ya ˗zlanwokɔdhi ˗nu ˈgü ˗sü ˈka. Mɛn zii ˗nu ˈwo ˈˈdhʋ̈ ˗wo ˗kun ˈˈdhiʋ̈sü ˗ni ˈgü ˗Zlan ˗bha yö ꞊vadhɛ ˈö˗ ˈbha ˗nu ˗kë ˈˈdhɛɛtadhiaŋ˗ zë ˗sü, ˗dhɛkpaɔyi ˗bha Biblö ˈˈɲan ˗nu ˗wopösü, ˈˈGlaadhiʋ̈ ˗tɔn ˗nu ˗draan ˗bhɔkwëë ˗nu ˗ta ˗sü waa ˗bhɔkwëë ˈkpii ˗nu, ˗an ˈka. ˗Wo ˈwɔn ˗nu ˗kë ˈˈkanŋ˗ ˈgü ꞊dhɛ ˗kɔ ˈwo˗ ˗kë ˗a ˈka ˗bhɔkwëë ˈkpii˗ ˗nu ˗ta ˗a ˈdhö. Mɛn ˗nu ˈwo wo ˗zokë ˗dhɛ ˗nu ˗kun ˗së ˗sü ˈˈpiʋ̈ ˗wo ˗kun mü, ˈö mɛn ˗nu ˈö ˗an ˗bha ˗kë ˗bhöpë ˗gblü ˗sü waa ˈˈɲan ˗to mɛn ˗nu ˗bha ˗sü ˈka, ˈwo kun mü ˈpö. Kwa ꞊dhegblü ˗nu ˈwo to wo ˗wo ˗ta ꞊dhɛ ˗kɔ ˈö bhë ˗a ˈdhö, Zoova ˗yö ˈdhuëë˗ ˗kpɔ ˗an ˗bha. ˗A ˗wɔn ˈgü ˗yö n ꞊faanmën ꞊dedewo.

ˈDhɛ ˈkwa dɔ ˗kwɛ 1970 ˈka, betɛdhö ˈö Zanbi ˗yö ˗ya ö ˗zokë Malawimɛn ˗nu ˈˈpiʋ̈ ˗sü ˗bha. ˈKö ˗kë ˈˈdhʋ̈ a n ˗zota ˗kplawo kwa ꞊dhegblü ˈwo kun Malawi ˗an ˗wɔn ˈgü, ˈa ꞊bhɛɛ ˗an ˗bha ˈka ꞊dhɛ ˗kɔ ˈö mɛn ˗nu ˈwo to ˈwo˗ ˗kë ˗a ˈka ˗a ˈdhö. ˈDhɛ ˗kë ꞊dhɛ a ˗kun betɛdhö ˈö Zimbabwe ˗a ˈwɔnyëë do ˈka bhë, yaa kwa ꞊dhegblü ˗nu ˈwo kwa ˗bha Betɛdhö ˈkɔ ˈkpii˗ ˈö ˈˈkpɔnŋ ꞊taa ˗a ˈgü, ˈwɔnyëë ˗nu ˈwo go Malawi, Aflikö di Sidö waa Zambi yi ˗kpan yi ˈkwëë˗ zoodhö zoodhö. ˗Ya kë ˈˈdhʋ̈ ˈyö ˈyi yi ˗de dhɛɛˈˈ kpɔ ˈyi˗ pö: «˗Mën ˈˈwɛɛ ˈbha ˈkwa ꞊mɔɔn˗ ˗bha ˈkwa˗ kë kwa ꞊dhegblü ˗nu ˈwo Malawi ˗an ˗dhɛ?»

 ˈDhɛ ˈˈtʋ̈ŋ ˗nu ˗wa ʒiö, ˈö kwa ꞊dhegblü ˗nu ˈˈklʋʋbhɔsü ˗yö dho ˈˈshia˗. ˗A mɛn ˗nu ˈwo ꞊duëë, ˗wo ˗ya wo ꞊yɛɛkësü ˗bha ˈdɔɔni ˈdɔɔni ˈwo nu Malawi. ˗Ya ˈgo mü ˈˈsɛ ˗nu ˈwo kun ˗an ˗züzü ˗wo ˗kun wo ꞊kwaa ˗ni ˈgü Zoova ˗bha ꞊Gbɛkiö ˗nu ˗zü kö ˗wo wo ˗bha ˗zlanwopö, ˗wo ˗bhɔkwëë ˗nu kë. Pë ꞊dede ˈö Mozanbikö ˗ya ˗kë ˗kwɛ 1991 ˈgü ˈyö bhë. ˈˈKɛɛ yi ˗kun yi ˗de dhɛɛˈˈ ˈkpɔ ˗ni ˈgü ˈyi˗ pö: «Zoova ˗bha ꞊Gbɛkiö ˗nu ˈwo Malawi ˗wo ˗dho wo ˗kɔ bho ˗an ˗bha yö ˗ta ˈˈtʋ̈ŋ ˗mɛɛn ˈka?»

ˈDhɛ ˈˈsɛkɔɔnmɛn ˈˈwɛɛ ˈbha ˗nu ˗wo ˗ya Malawi ˗gɔ ˈˈdhiʋ̈, ˗wo wo ˗kɔ ˗bho Zoova ˗bha ꞊Gbɛkiö ˗nu ˗bha yö ˗ta ˗kwɛ 1993 ˈgü. ˗A yi ˈti ꞊gwëë, yaa bɔmɛn do yi ˗kun ˈˈdoodɔ ˗ni ˈgü, ˈyö n dhɛɛˈˈ kpɔ ˈö˗ pö: «Ü ˗dho ˈˈyɛ ü ˈzü ˈü dho Malawi ˗ee?» ˈˈKɛɛ ˈdhɛ ˗kë ꞊dhɛ ˈö ˗kë ˈˈdhʋ̈ kö n ˗kwɛ ˗ya kë 59 bhë, a˗ ˗yɔ ˗bɔ ˗a ˗gɔ ˈa˗ pö: «˗Abin, ˈman kë zii.» ˗Dhɛkpaɔyi ꞊dede ˈö bhë ˗a ˈka, ˈyö kwa ˈˈdhiʋ̈ʒiöwomɛn ˗nu ˗wo ˈsëëdhɛ bɔ yi ˗dhɛ, ˈwo˗ pö yi ˗dhɛ ˈyi yi ꞊yɛɛ˗ kë ˈyi ˈdho Malawi.

Yi ˗bha yö ˈyi kun ˗a kë ˗ni ˈgü Zimbabwe bhë, ˗yö ˗kun yi ˗dhɛ ˗së. ˗Go mü ˗sü ˗kë yi ˗kɔa ˈˈgbɩɩ˗ ˈyö sü ꞊dhɛ ˗kë Zimbabwe ˗sü ˗yö yi zuʋ̈ˈˈ ˈˈgblü ˗dhi, ˈö ˈyi yi ˈˈtɔŋdë ˗tiaandhö ˗nu ꞊slɔɔ mü. ˈˈKɛɛ kwa ˈˈdhiʋ̈ʒiöwomɛn ˗nu ˗wa ˗pö yi ˗dhɛ ˗dhɔkaadhe ˈgü ꞊dhɛ ꞊ya kë ꞊dhɛ ˈyaa˗ ˈˈpiʋ̈ kö ˈyi ˈdho Malawi, yi ꞊mɔɔn˗ ˗bha ˈyi to Zimbabwe. Yi ꞊mɔɔn˗ ˗bha ˗be ˈyi yi ˗de ˗bha ʒiaan ˈsü, ˈyi ˈto Zimbabwe. ˈˈKɛɛ a n ˗zota Ablaamö waa Saadha ˈwo kun zii, ˈˈkɛɛ ˈwo wo ˗bha ˈkɔ ˗së to kë ˈˈdhʋ̈ kö Zoova ˗yö ˈˈdhiʋ̈sü wo ˈka, ˗an ˗bha ˈwɔnzuan ˈgü.—ˈWun. 12:1-5.

Yi ˗wɩ ˗a ˗bha kö ˈyi ˈto ˈpë Zoova ˗bha ˗kɔlokota ˗ya pö bhë ˗a ˈˈpiʋ̈, ˈyö ˈyi yi ꞊yɛɛ˗ ˗kë ˈyi dho Malawi ˗kwɛ 1995 Fevlie 1 ˈka. ˈDhɛ ˗kë ˈˈdhʋ̈ kö yi ˗nu ˈˈsɛ ˈö bhë ˗a ˈgü ˗blɛɛsü ˈka ˗a ˗kwɛ ˗ya kë 28. ˗Wo wo ˗kɔ ˗yɛ yaa kwa ꞊dhegblü gɔɔn˗ ˗nu ꞊plɛ yi ˗bha kö ˈyi kë betɛdhö ˈwɔnyëë˗ ˗nu ˈka, ˈö ˈyi to mü ˈyi ˗ya ˗kɔ ˈö yö dho kë ˗a ˈka ˈˈsɛ ˈö bhë ˗a ˈgü, ˗a ˗yökodhiʋ̈ kë ˗sü ˗bha.

Zoova ˗ya ˗kë ˈö ˗zlanwopösü ˗yö dho ˈˈdhiʋ̈ ˈˈvaandhö, ˈö ˗zlanwopömɛn ˗nu kpö ˗yö ˗dadhiʋ̈. ˗Kwɛ 1993 ˈgü, ˗zlanwopömɛn ˗nu ˗kun 30.000. ˈˈKɛɛ ˈdhɛ ˈkwa dɔ ˗kwɛ 1998 ˈgü, kö ˗wa kë 42.000. * Kwa ˈˈdhiʋ̈ʒiöwomɛn ˗nu ˗wɩ ˗a ˗bha kö ˗wo betɛdhö ˗dɛɛ dɔ ˈˈsɛ ˈö bhë ˗a ˈgü, kë ˈˈdhʋ̈ kö ˗wo wo ˗zokë kwa ˗bha yö ˗nu ˈˈpiʋ̈. ˈDhɛ ˗kë ˈˈdhʋ̈, ˈyö ˈyi ˈˈblü ɛtaa 12 ꞊slɔɔ Lilɔnŋgwe, ˈyö ˈwo wo ˗kɔ ˗yɛ n ˗bha kö ˈa n ˗zokë ˗a ˈkɔdɔsü ˗yö ˈˈpiʋ̈.

 Kwa ꞊dhegblü Gai Piisö ˈö kun kwa ˈˈdhiʋ̈ʒiöwomɛn do ˈka, yö ˈnën˗ ˈkɔ ˈˈdhi ˈˈpʋ ˈˈdhɛɛtadhiaŋ˗ zë ˗kwɛ 2001 ˈMɛn ˈˈsu ˈgü. Kwa ꞊dhegblü ˗nu ˈwo ˗ʒiö ˈˈgblü ꞊plɛ ˗ta ˈö˗ mɛn ꞊vadhɛ bɔ ˈˈyi ꞊bhaa ˈö˗ ˗kwɛ ˗ya ʒiö 40 ˗ta, ˈnën ˈwo ˗kë ˗bhɔkwëë ˈö bhë ˗a ˗ta. ˗Kwɛ ꞊va ˈwo kwa ˗bha yö ꞊kɛɛ˗ ˗kan ˗a ˈka bhë ˗a ˈˈpiʋ̈, ˗wo ˗an ˈˈklʋʋ ˗bhɔ ꞊dedewo. ˗Wo ˗kun ˈˈflɛɛsü, ˈˈkɛɛ ˗an ˗bha ˗zoyödhe waa ˗mlɛɛn ˈö kun waa Zoova ˗an ꞊zinŋgü, ˗wo ˗kun ˈˈgbɩɩ˗. ˈDhɛ ˈwo ˗kpan wo ˗bha betɛdhö ˗bha, ˗an zuʋ̈ˈˈ ꞊nii ˗yö ˗da. -Dhɛ ˈˈpɛpɛ ˈwo bɔ ˗a ˗bha mü, ˗Gblüdëdhɛ ˗tan ˈnën ˈwo˗ bho ˗an ˗bha ˈˈtan bho ˗kɔ ˈka. ˗Ya ˗kë ˈö ˈwlaan˗ ˈö bhë n ˗zo ˈti bhɔ ˗a ˈka, ˈyö sü ꞊dhɛ ˗yö ˗pa n ˈka ꞊dedewo. ˗Ya ˗zɔn yi ˗dhɛ ꞊dhɛ Zoova ˗yö ˈdhuëë˗ ˗kpɔ ꞊dedewo mɛn ˗nu ˈwo ˈwɔn ˈˈgbɩɩ˗ ˗nu bun zuʋ̈saadhɛ ˈka ˗an ˗bha.

ˈDhɛ ˈwo wo bo betɛdhö dɔ ˗sü ˈka, ˗wo ˗bhɔkwëëkëgükɔ ꞊va ˗dɔ, ˈö ˈwo n ˗dhɛ ˗an ˈˈdhi ˈˈpʋ ˈwlaan˗ ˗ta kö ˈa ˈˈdhɛɛtadhiaŋ˗ zë. ˈDhɛ kwa ˈˈdhiʋ̈ʒiöwomɛn ˗nu ˗wo ˈˈsɛ ˗nu ˈö pë ˈyaa ˗an ˗gɔ ꞊va ˗an ˗bha ˗bhɔkwëëkëgükɔ dɔ ˗sü ˗yö zübho, ˗zlanwokɔdhi ˗nu ˈwo Malawi ˗wa ꞊trɔɔn ꞊dede ˗slɔɔ. ˈÖ kun ˗be kwa ꞊dhegblü ˗nu ˗kun ˗bhɔkwëë ˗nu kë ˗ni ˈgü ˈˈdhükɔ ˗nu ˈgü. ˗Wo ˗an ꞊gba ˗bho dɛn ˈka, ˈö ˈwo ˈˈkplʋʋ ˗nu ˗yökë ˗an ˈgü kö ˗wo kë ˗yadhɛ ˈka. ˈDhɛ yö mü, kwa ꞊dhegblü ˗nu ˗wo ˈˈblikö ˗nu ˗kë, ˈwo ˗bhɔkwëëkëgükɔ ˗sɛŋbɔ ˗nu dɔ ˗an ˈka. Kwa ꞊dhegblü ˗nu ˈti ˈˈwɩ ˗a ˗bha kö ˈwo ˗gbaanën ˗nu dɔ mü, ˈyö ˗tɔ ˗wa ˗pö ꞊dhɛ ˗ya kë ˈbaŋ ˈka, mɛn ꞊vadhɛ ˗yadhɛ ˗dho kë ˗kplawo.

˗Kɔ ˈö Zoova ˗yö mɛn ˗nu ˗takun ˗a ˈka ˈö ˗an ˗gɛn yö dho ˈˈdhiʋ̈ ˈdhɛ ˈa˗ yö, n zuʋ̈ˈˈ ꞊nii ˗yö ˗da ꞊dedewo. Wlüünën ˗nu ˈwo Aflikö ˗an këwɔn ˗nu ˈwɔn ˗yö n ˗kun, ˈyö sü ꞊dhɛ ˗wo wo ˗de ˗nu yö ˗dhɛ, ˈö ˈˈslö ˗nu ˈö Zoova ˗bha ˗kɔlokota ˗yö ˗an ˗zɔn ˈwo˗ ꞊draan ˈzozodhö, ˈwo˗ ˈgü ˗yö ˗nu ˗kë. ˗A ˗wɔn ˈgü ˗wo ˗kian ˈwo ˗kë ˗zokë betɛdhö waa ˗zlanwokɔdhi ˗nu ˈˈpiʋ̈ ˗mɛn ˗nu ˈka. ˈDhɛ mɛn ˈbha ˗nu ˈwo go ˈˈsɛ ˈö bhë ˗a ˈgü ˈwo ˗kë ˈˈpian do ˈˈpiʋ̈ ˗maankëmɛn ˗nu ˈka, ˗wo ˗zlanwokɔdhi ˗nu ˗gɛn ˗gban. Dhe ˗kun ˗a mɛn ꞊vadhɛ ˗gɔ, ˈˈkɛɛ ˗wo wo ˗zo ˗bho ˈnënkpɔsü ˗wɔn ˈˈpiʋ̈, ˈwo wo ˗de nu Zoova ˗bha yö ˗dhɛ, ˈkö ˗kë ˗ʒiaanwo ꞊dhɛ ˗an ˗bha wɔkɔ ˗nu ˈgü këpë ˈyaa ˗mü ɛɛnˈˈ ˈzü ˗an ˗bha ˈkɔdhigümɛn ˗nu ˗wa ˗fɛɛ ˗ya ˗an ˗bha.

ˈDhɛ ˈa ˗kwɛ 52 ˗kë Aflikö, ˈyö ˈˈyua ˗ya n ꞊sëëbho ˗sü ˗bha. Kwa ˈˈdhiʋ̈ʒiöwomɛn ˗nu ˗wɩ ˗a ˗bha kö ˈwo yi bɔ Angletɛɛ. Yi ˗bha yö ˈö˗ ˗dhɔ yi ˗kë ˈyi kun ˗a kë ˗ni ˈgü bhë, ˗a ˈto ˗sü ˗kë yi ˗kɔa ˈˈgbɩɩ˗. ˈˈKɛɛ mɛn ˗nu ˈwo betɛdhö Angletɛɛ ˗wo wo ˗zokë yi ˈˈpiʋ̈ ˗së ˈka yi ˗bha ziidhɛ ˈgü.

˗Yö ga ˗sü ˈka n ˈgü ꞊dhɛ n ꞊kwaa ˈa˗ wo Zoova ˗zü kö ˗yö ˈˈdhiʋ̈sü n ˈka n ˗bha ˗tosɛta ˈgü bhë, ˈwɔn ˗së ꞊dede ˈnën ˈa˗ ˗kë. ꞊Ya kë ꞊dhɛ ˗kɔ ˈö n ˗man yö ˗wɔn kun ˗a ˗bha ˈˈgbɩɩ˗ ˗be ˈya to ˗a ˗bha, kö a ˈˈmɛn ꞊dɛɛ? Pë ˈˈpɛpɛ ˈö n ˗bhawɔn kun ˗a ˗bha kö n ˗bha «ʒiaan ˗nu dɔ ꞊zinŋgü» Zoova ˗yö ˗an ˗dɔ. (Prov. 3:5, 6) Kö a ꞊kun wlüünën ˈka, ˗kɔ ˈö izinö ˈˈgblʋ̈gblʋ̈ ˗nu ˗wo yökë ˗a ˈka ˗a draansü ˗kun n ˗dhɛ ˗së ꞊dedewo. ˈˈKɛɛ Zoova ˗bha ˗kɔlokota ˗yö yö ˈö˗ kë ˗sü n zuʋ̈ˈˈ ˗zokun ˈgbɛ ˈö ˗ʒiö ˗a ˈka pë ꞊gban ˗ta, ˗a ˗nu n ˗dhɛ. N ˗bha ˈgü, Zoova ˗dhɔkësü ˈnën ˗tosɛta ˗së ꞊dede nu mɛn ˗dhɛ.