N dë ˗kun Église unie du Canada ˗gɔmɛn do ˈka. ˗A ˗wɔn ˈgü ˗Tɛɛdhoowayi dhiapiʋ̈ ˈˈpɛpɛ ˈka, ˗yö yaa n ˈzlaa˗ ˈnëndhe yi ˗sü ˈö dho yi ˈka ˗zlanwokɔɔdhö ˈnën ˈsɛɛn˗ ˗nu ˗bha ˗bhɔkwëë ˗ta. ˈYö ˈˈlɛlɛ ˗ya kë 11, ˈyi dho yi dë ˈˈpiʋ̈ ˈyi ˗bhɔkwëë ˗kë. ˈˈDooka, yaa yi dhe ˗nu yi ˗dho Zoova ˗bha ꞊Gbɛkiö ˗nu ˗bha ˗bhɔkwëëkëgükɔ ˈgü. ˗A ˗wɔn ˈgü, ˗zlanwo ꞊plɛ ˈwo bhë yi ˗an ˗bhokopiʋ̈dhɛ ˗yö.

N dhe ˗yö ö ˗bha ˗zlanwo ˗dɛɛ ˗wɔn ˗blɛɛ ö ˈˈtɔŋdë ˈˈgbɩɩ˗ ˗nu Bɔbö waa Mariɔn Ɔshesɔnö ˗an ˗dhɛ ˈö ˈwo ˗wɩ ˗a ˗bha. ˗Kwɛ 1958 ˈgü, Ɔshesɔnö ˗nu ˗wo n ˗kpa wo ˗bha ˈnën ˗nu ˗yaaga ˗bha ˈyi dho ˗dhɛkpaɔyi ˈˈsaaga ˗bhɔkwëë ˈö˗ ˗gɔ ˗kë « La volonté divine » ˈka bhë ˗a ˗ta, Nuyɔɔkö. ꞊Dɛɛ ˈman n ˗zota, a˗ ˗yö ꞊dhɛ pë ˈˈgbɩɩ˗ ꞊dede ˈnën ˈwo˗ ˗kë kö ˈyi kë ˗bhɔkwëë ˈö ˈˈdhʋ̈ ˗a ˗ta. ˈˈKɛɛ ˗yö ˗kun ˈwɔn ˗së ˈkpii˗ do ˈka n ˗man ˗tosɛta ˈgü.

Kö a wlüünën ˈka, yi ˗kun ˈˈkanŋba do ˈgü ˈö ˈyi ˗du ˗nu, ˗bhɔ ˗nu, ˈˈbhlaa ˗nu, ˗tɔ ˗nu ˗to mü. Ö ˗zokë ˗an ˈˈpiʋ̈ ˗sü ˗yö ˗kun n ˗dhɛ ˗së. ˗A ˗wɔn ˈgü, a kun ˗a ˈˈpiʋ̈ kö ˈa wü ˗nu ˈˈdhɛkësü ꞊klaŋkë. N dhe ˗ya ˗blɛɛ mɛn zii do ˗dhɛ ˗zlanwokɔdhi ˈgü. Mɛn zii ˈö bhë ˗yö n ˗zo ˗bo ꞊dhɛ kwa «ˈˈkpʋngtaadhɛ yën ˈˈtʋ̈ng» ˈgü, ˈö n ˗takun kö ˈa n ˗zota ˗kɔ ˈö ˗kwɛ ꞊va ˗kë nivɛsite ˗sü dho ˗mlɛɛn ˈö yaa Zoova yi ꞊zinŋgü ˗a shiʋ̈ˈˈ ˗a ˈka, ˗a ˈgü. (2 Tim. 3:1) ˈDhɛ ˗kë ˈˈdhʋ̈, ˈyö ˈa˗ pö n ˈti ˗dho ꞊klaŋ ꞊gblɛɛn kë ˈzü.

 ˈMan n bo ꞊klaŋ ˈka kolɛʒö, pë ˈa dho ˗a kë ˗a zuʋ̈dhiʋ̈tɛ ˗kun n ˗man. ˈKö ˗kë ꞊dhɛ a ˗zlanwopö ꞊glooyi ˈˈpɛpɛ ˈka, n zuʋ̈ˈˈ ˈˈgblü ˈyaa kun dhi ˗sü ˈka ɛɛnˈˈ ˈyaa kun n ˗zo ˈˈpiʋ̈ ꞊dhɛ a ꞊mɔɔn˗ ˗bha ˈa kë ˗yödhiʋ̈ ˈka. ˈˈKɛɛ ˈˈtʋ̈ŋ do ˈö bhë ˗a ˈgü, n dë waa ö ˈzlaa˗ ˈö ˈwaa Zoova ˗dhɔkëmɛn ˈka ˗wo n ꞊faanmën kö ˈa yökë soete do ˈkpii˗ ˈgü Torɔnto. N dë ˈzlaa˗ ˗kun soete ˈö ˈˈdhʋ̈ ˗a ˗gɔmɛn ˈkpii˗ do ˈka. A ˗wɩ yö ˈö ˈˈdhʋ̈ ˗a ˗bha.

A ˗kun ˗yökë ˗ni ˈgü ˈˈlɛlɛ ꞊va ˈˈpiʋ̈, ˈö go mü ˈa ꞊nënŋ mɛn ˗nu ˈö ˈwaa Zoova ˗dhɔkë ˗an ˗bha. ˗A ˗wɔn ˈgü, ˈmaan ˈdho ˗bhɔkwëë ˗nu ˗ta ɛɛnˈˈ ˈmaan ˗zlanwopö zoodhö zoodhö. Yaa n ˈʒiö˗ ˈö ˈyaa Zoova ˗dhɔkëmɛn ˈka ˈnën yi kun ˈkɔ do ˈgü. ˈˈKɛɛ ˗dhɛ ˈö˗ ˗wɔn ˗yö ˗kë, a ˗ya ˈkɔ ˈˈwɛɛ mɛɛnˈˈ ˗sü ˗bha.

Kwa ꞊dhegblü Ɔshesɔnö ˗nu ˈwo dho n ˈka ˗bhɔkwëë ˈkpii˗ ˗ta ˗kwɛ 1958 ˈgü bhë, ˗wo ˗kun ꞊dhɛ n ˗mɛn ˗nu ˈdhö. ˗Wo ˗wɩ ˗a ˗bha kö ˈa nu wo ˗gɔ ˈkɔɔ, ˈö ˈwo n ˗takun kö yaa Zoova yi ˗bha ˈˈtɔŋdhɛ ˗gɛn ˗yö ˗gban ˈzü. ˗Kwɛ 1960 ˈgü, ˈö yaa ˗an gbö Zan ˈyi ˗bɔ ˈˈyi ꞊bhaa. Zan ˗yö ˗kë ˗yödhiʋ̈ ˈka. ˗A ˗bha ˈwɔnzuan ˗yö n ꞊faanmën ˈa n ˗man ˗zlanwopösü ˗dadhiʋ̈. ˗A ˗wɔn ˈgü, ˗wo n ˗kë ˗zlanwopösü ꞊klaŋ ˈwɔnyëë˗ ˈka yi ˗bha ˗zlanwokɔdhi ˈgü. a

˗Kwɛ 1966 ˈgü, yaa Randi ˈyi yi ˈkosü. -Yö ˗kun ˗zlanwopö ˗ni ˈgü ö ꞊faan ˈka ˗dhɛ ˈbha ˈö ˗zlanwopömɛn ˗nu ˈwaa˗ mü ꞊va ˗a ˈgü. Yi ˗bha ˈˈpian do ˈˈpiʋ̈ ˗maankëmɛn ˗yö ö ˈˈtʋ̈ŋ ˗kë yi ˈgü ꞊dedewo ˈö yi ꞊faanmën kö ˈyi ˗zlanwokɔdhi ˈö kun Orilia Ɔntario bhë, ˗a ˗takun. Yi yi ˗bha ꞊kwɛɛ˗ ˗nu ˗baa ˈyi to mü ˈyi dho.

ˈDhɛ ˈyi ˗lo Orilia, ˗a ˗dhɛ ˈyii ꞊gwëë ˈa ˗kë ˈpö ˈˈtʋ̈ŋ ꞊gban ˈgü ˗yödhiʋ̈ ˈka ꞊dhɛ Randi ˈdhö. A ˗to Randi ˗bha ˈwɔnzuan ˈˈpiʋ̈ ˈa ˗zlanwopö zuʋ̈gblüdhi ˈka. ˈDhɛ ˈa n zuʋ̈ˈˈ ꞊gban nu ˗kë ˗yödhiʋ̈ ˈka ˗sü ˗dhɛ, ˗bɔ Biblö ˗ta ˗sü kö ˈa mɛn ˗nu ˗takun bhë ˗yö ˗kun n zuʋ̈ˈˈ ˈˈgblü dhi ˗ni ˈgü ꞊dedewo. A ˈkosümɛn ꞊plɛ ˗takun ˈwo wo ˗bha ˗tosɛta bho ˈˈgblʋʋ ˈwo ˗kë Zoova ˗dhɔkëmɛn ˗nu ˈka Orilia. ˗Yö ˗kun ˈdhuëë˗ ˈkpii˗ ˈka n ˗bha ˈka.

ˈˈTʋ̈ŋ do ˈbha ˈka, yi ˗dho Torɔnto ˈyi ˗kpan kwa ꞊dhegblü ˈwo˗ ˗dhɛ Anɔdö Makö Namara ˈö kun Betɛdhö ˈwɔnyëë˗ do ˈka, ˗a ˗bha. ˗Dhɛ ˈö yi dhɛɛˈˈ kpɔ ꞊dhɛ yi˗ ˈˈpiʋ̈ kö ˈyi kë ˗yödhiʋ̈ ˗detasü ˈka, a ˗to mü ˈa˗ pö: «˗Dhɛ ˈö ˗dhi ka ˗dhɛ ˗ka yi bɔ ˗a ˗bha, ˈˈkɛɛ ˈyaa˗ ˈˈpiʋ̈ kö ˈyi ˈdho Kebɛkö!» Kanada ˗sɛ ˈgü, ꞊gleewopömɛn ˗nu ˗wo ˗kun ˈˈkwiwopömɛn ˗nu yö ˗ni ˈgü ˈya˗. ˗Zotakɔ suu ˈö bhë ˈnën ˗kë n ˗gɔ ˈpö. ˈˈTʋ̈ŋ ˈöˈˈdhʋ̈ ˗a ˈgü, kö Kebɛkömɛn ˗nu ˗wa ˗gban ˈˈsɛgɔmɛn ˗nu ˈwo Kanada ˗an ˗gɔ, ˗wa ˈˈpiʋ̈ ˈwo ˗ya wo ˗de ˗ta.

Anɔdö ˗ya ˗pö yi ˗dhɛ: «Kebɛkö ˗dhɛ dosɛnŋ ˈnën Betɛdhö ˈdhö ˗yödhiʋ̈ ˗nu bɔ ˗ni ˈgü ˗a ˗bha ˈˈtʋ̈ŋ ˈö yö ˗a ˈgü.» A ˗wɩ ˈdho ˗sü ˗bha. ˗A ˈwɔn ˗kun n ˈˈɲaan ꞊dhɛ ˗zlanwopö mü ˗sü ˗dhɔ ˗kun Randi ˈgü. ꞊Taabha, a˗ ˗yö ꞊dhɛ ˗yö ˗kun ˈwɔn ˗së ˗nu ˈyi ˗da ˗an ˗ʒian ˗ta yi ˗bha ˗tosɛta ˈgü ˗a do ˈka.

ˈDhɛ ˈyi ˈˈkwi ˗wo ꞊draan ˈˈdhoogɔ ˈˈsoodhu ˈˈpiʋ̈, yaa Randi waa ˈkosümɛn ˗nu ꞊plɛ ˈbha yi ˗dho Rimuski ˈˈkidhʋŋ 540 ˗naan ꞊taa Mɔnreadhö ˈˈpian ˗ta. Yi dua ˗mü kö ˈyi pë ꞊va draanˈˈ. A n ˗bha ˗dhɛ ˗yö ˗bhɔkwëë do ˗ta kö a nɔɔn˗ ˗nu ˗wo pö ˗ni ˈgü. A ˗kun ˗a ˈˈpiʋ̈ kö ˈa˗ pö kwa ꞊dhegblü ˗nu ˗dhɛ ꞊dhɛ yi ˗bha ˗bhɔkwëë ˗nu ˈwo dho kë bhë, mɛn ꞊va ˗dho ˈgo Otrishö ˗sɛ ˈgü ˈwo nu ˗a ˗ta. ˈˈKɛɛ ˗a pö ˗kɔ ˈa˗ pö ˗a ˈka bhë, ˗yö ˗kë ꞊dhɛ ˈpë ˈa˗ ˈˈpiʋ̈ kö ˈa˗ pö «꞊soo˗ ˗man ꞊va ˗dho nu ˗bhɔkwëë ˗ta, ˗a ˈdhö.»

Kwa ꞊dhegblüdhe ˗nu ˗yiishiö ˈö ˈwaa ꞊gwaan˗ ˗wo ˗nu Rimuski ˈwo kpa mɛn ˗yiishiö ˈyi kun mü, yi ˗bha. ˗Ya ˈgo mü, kwa ꞊dhegblü Ubɛdo waa ö ˈdhu ˗nu ꞊plɛ ˗wo ˗nu ˈpö. Ubɛdo ˗nu ˗wo ˈkɔ ˈkpii˗ do ˈö˗ ˈˈdhi ˈdhö ˈˈsɔɔplɛ ˗a ˗sü ˈö mɛn ˈˈpɛpɛ ˈyi kun ˗yödhiʋ̈ ˈka ˈyi ˗kë ˗a ˈgü, ˈyi dho yi ˈkwëë˗ ˈyi˗ ꞊saa˗ bho. ˈKɔ ˈö ˈˈdhʋ̈ yi˗ ˗dhɛ «ˈKɔ ˈˈPuu,» ˈyö sü ꞊dhɛ ˈˈyɔɔ ˈˈpuu ˗kun ˗a ˈˈbhaŋ waa˗ ˗gbandhü ˗nu ˗bha. Mɛn ˈyi ˗mɔn 12 ɛɛnˈˈ mɛn 14 ˗bha ˈnën ˈyi kun ˗a ˈgü. ˈDhɛ ˗kë ꞊dhɛ yi ˗kun ˗yödhiʋ̈ ˗detasü ˈka bhë, yaa Randi yi ˗zlanwopö dhiapiʋ̈, ˈɲaan˗ ˈgü waa ˈˈdooka. Yi zuʋ̈ˈˈ ˈˈgblü ˗kun dhi ˗sü ˈka, ˈyö sü ꞊dhɛ mɛn ˈö yaa˗ ˗nu ˈyi dho ˗zlanwopö ˗yö ˗dhö ˗kplawo. ˈKö ˗kë ˈˈnɛnnɛn ˈˈtʋ̈ŋ ˈgü ˈˈdooka, yi yi yökëyɔɔ ˗slɔɔ.

˗Yödhiʋ̈ ˗nu ˈwo bhë yaa˗ ˗nu yi ˗bha ˈˈtɔŋdhɛ ˗gɛn ˗yö ˗gban ˈyi ˗kë ꞊dhɛ ˈkɔdhi do ˈgümɛn ˗nu ˈdhö. ˗Ya kë ꞊shiöŋ, yi ˗dho ˈyi ˈˈwo yö ˈkwëë˗ ˈˈblüblü ˈyi ˗ya ˗a ˗zü ɛɛnˈˈ ˈzü yi ˈbha ˗nu ˈka ˈyi ˗bhöpë ˗nu ˗kpa yi ˈko ꞊bhaa. Kwa ꞊dhegblü do ˈö kun yi ˈˈpiʋ̈ mü, ˗yö ˈˈtan ˗bho ˗a ˈka ˗pë ˗nu ˈˈɲan ˗dɔ. ˗A ˗wɔn ˈgü, ˈˈSɩyi ˈˈdooka ˈbha ˗nu ˈka yi ˈˈtan ˗bho, ˈyi ˈˈtan ˗kë.

Biblö ˗dhɔ ˗yö Rimuskimɛn ꞊vadhɛ ˗kë. ˗Kwɛ ˈˈsoodhu ˈˈpiʋ̈, Biblö ꞊klaŋnën ꞊vadhɛ ˗gɛn ˗yö ˗dho ˈˈdhiʋ̈ ˈwo bɔ ˈˈyi ꞊bhaa ˈö ˗zlanwopömɛn ˗nu ˈyi ˗kë 35.

˗Zlanwopösü ˈö kun Kebɛkö bhë, ˗yö ˗kun ꞊klaŋ ˗tiaandhö ꞊dede ˈka yi ˗bha ˈka. Yi˗ ˗yö ꞊dhɛ Zoova ˗kun yi ˗takun ˗ni ˈgü ˗zlanwopösü waa yi ˗bhawɔnyëëpë ˗nu ˈˈɲan bhɔ ˗sü ˗bha. ˗Ya ˈgo mü ˈˈkwiwopömɛn ˗nu ˗dhɔ ˗yö ˗ya yi kë ˗sü ˗bha, ˈö ˗an ˗wo waa ˗an wɔkɔ ˗nu ˗wo ˗kë yi ˗dhɛ ˗së ˈpö.—2 Ko. 6:13.

˗Dhɛkpaɔyi do ˈka, ˈyi dho ˈˈkan yi ˗ta kö Betɛdhö ˗ya yi ˗dhɛ, ˈö˗ pö yi ˗dhɛ ˈyi ˈdho Trakadi, ˈˈkwipö ˈö Nu Blɔnswikö ˗dhɛ ˈˈsuee ˗a ˈgü. ˈYaa kun ˈˈplëëplë yi ˗bha ˈka, ˈyö ˗tɔ ˈˈtʋ̈ŋ ˈö ˈˈdhʋ̈ ˗a ˈka kö ˈkɔ do ˈbha ˈyi˗ sü ˈya˗ ˈˈsu ꞊va ꞊saa˗ bho. ˗Ya ˈgo mü, a kun mɛn ˗nu ꞊klaŋkë ˗ni ˈgü kolɛʒö ˈˈtʋ̈ŋ ˈö ˈmaan ˗zlanwopö ˗a ˈka, ˗a ˈgü. ˈÖ go mü ˈzü kö yi ˗bha Biblö ꞊klaŋnën ˈbha ˗nu ˗wa ˗ya ˗zlanwopösü ˗bha ˗dɛɛ ˈgü. ˗A ˗kaanta ˈnën ˗tɔ kö yi ˗bha ˗bhɔkwëëkëgükɔ dɔ ˗sü ˗ya yö ꞊zinŋgü.

꞊Glooyi ˈö dɔ ˗a ˈˈpiʋ̈ ˗a ˈka, yi ˗to bhɛɛsü ˗bha ˗dho Trakadi ˗sü ˗wɔn ˈgü ˈö ˈyi dho yi ˗wo ˗a ˈˈkwipö ˈgü. Yi˗ ˗yö ꞊dhɛ waa Rimuski ˗dhɛ ˈwaa do  toŋtoŋdhö. ˈˈKɛɛ ˈyi˗ pö yi ˗de ˗dhɛ ˈdhɛ ˗kë ꞊dhɛ Zoova ˈnën yi bɔ bhë, yi dua ˗mü kö ˈyi ˈdho. Yi Zoova ˈgüdan, ˈyi˗ yö ꞊dhɛ ˗yö yi ˗bha ˈwɔn ˈˈgbɩɩ˗ ˗nu ˈˈɲan ˗bhɔ do do ˈka. (Mal. 3:10) Randi ˗bha Zoova ˗wɔn ˗kun ˈˈgbɩɩ˗, ˗yö ö ˗de nu ˗a ˗bha yö ˗dhɛ, ˈö go mü ˈzü ˈö ˈwɔn ˗nu ˗da ˈˈgbɛɛta ˈgü. ˗A ˗wɔn ˈgü, ˗tosɛta ˗kë Trakadi ˗sü ˗kë yi ˗kɔa ˈˈplëëplë.

Mɛn zii dosɛnŋ ˈö kun yi ˗bha ˗zlanwokɔdhi ˗dɛɛ ˈö bhë ˗a ˈgü ˈnën ˗tɔ Lobɛɛ Lɔsö. Waa ö ˗bha dhebɔ ˗wo ˗kun ˗yödhiʋ̈ ˈka mü. ˈDhɛ ˗an ˗bha ˈnëngɔɔn ˗blɛɛsü ˗yö bhɔ ˈwo to mü ꞊klöö do. ˈKö ˗kë ꞊dhɛ ˗wo ˗kun wo ˗zokë ˗ni ˈgü wo ˗bha ˈnën ˈˈpiʋ̈, ˗wo yaa Randi yi ꞊faanmën ꞊dedewo wo ˗kɔ ˗ya yi ˗dhɛŋ ˗gɔ ˗sü waa ˗zlanwopö wo ꞊faan ˈka ˗sü ˈka.

ˈDhɛ ˈya ˗kwɛ ꞊plɛ kë ˗zlanwopösü ˗bha Trakadi, ˈyi ˗dho ˈˈkan yi ˗ta ˈzü kö ꞊waa˗ pö ˈa kë ˈˈpian do ˈˈpiʋ̈ ˗maankëmɛn ˈka. Yi ˗wo ꞊gleewopömɛn ˗nu ˗bha ˗zlanwokɔdhi ˗nu ˗dhɛ ˗kwɛ ˈˈsɔɔplɛ ˈˈpiʋ̈. ꞊Taabha, ˗wo yi ˗bɔ ˈzü ˈˈkwiwopömɛn ˗nu ˗bha ˈˈpian ˗ta Kebɛkö. Leɔnsö Krepɔlö b ˈnën kun ˈˈpian ꞊va ˗maankëmɛn ˈka mü. ˗Yö ˗kun n ˈˈnuɛ bho ˗ni ˈgü n ˗man ˈˈdhɛɛtadhiaŋ˗ ˗nu ˗bha. ˈˈKɛɛ ˗ya ö bo ˗yö n dhɛɛˈˈ ˗kpɔ ˗kplawo ˈö˗ pö: «Ü ˗dho ˗a kë ꞊dhɛ kö ˈˈtʋtomɛn ˗nu ˗wa ˈgüman ˗së ˈka?» ˗A ˗bha ö ˈˈtʋ̈ŋ ˗kë n ˈgü ˗sü ˗yö n ˗takun ˈö n ˗man ˈˈdhɛɛtadhiaŋ˗ ˗nu ˈgümandhɛ ˗kë ˗së.

N ˗zo ˈti bhɔ toŋtoŋdhö ˗bhɔkwëë ˈkpii˗ ˈö ˗kë ˗kwɛ 1978 ˈgü Mɔnreadhö ˈö˗ ˗gɔ ˗kë « La foi victorieuse » ˈka bhë ˗a ˗ta, ˗a ˈka. A ˗kun ˗bhöpë ˈwɔnyëë˗ do ˈka. Mɛn 80.000 ˈnën yi kun ˗an ˈˈdhiʋ̈ ˈˈgan ˗ni ˈgü, ˈö go mü ˗bhöpë ˗kpa ˗a ˈka ˗pë ˗nu, pë ˗nu ˈyi dho ˗a ˈkpa waa ˗an ˗kpa ˗kɔ ˗nu ˗kun ˈˈslö ˗dɛɛ ˗nu ˈka yi ˗bha ˈka. Fliʒidɛ ˈˈgblʋ̈gblʋ̈ 20 ˈwo kun mü, ˗a ˈbha ˗nu ˈwaa kun ˗së. ˈˈSanni ˗dhɛkpaɔyi ˗blɛɛsü zü ˗yö dɔ, ˈyaa kun ˗mɔn ˗ni ˈgü ˗a ˗bha kö yi ˗da balɔn ˗zuö ˗dhɛ ˈö ˗bhɔkwëë dho kë mü bhë ˗a ˈgü, ˈyi pë ˗nu ˗mɔn ˈˈkwöö. ˗Wo ˗kun ˗bha balɔn ˗zuö ˗ni ˈgü mü. ˗A ˗wɔn ˈgü, yi yi ˈˈɲan ˗to ˈö gbeŋ ꞊zinŋgü ˗yö ˗lö ˈyi ꞊kun ˗a ˗dhɛ baaˈˈ. Yi dua ˗mü kö ˈyi ˈˈwo ˗nu ˗ya, ˈyi diapiʋ̈ ˗bhöpë ˗kpa kö ˗dhɛ ˗yö ꞊kun ꞊kpɔɔ. Yi ꞊sëë ˗yö ˗bhɔ ꞊dedewo. ˈKö ˗kë ˈˈdhʋ̈, kwa ꞊dhegblü ˗nu ˈö yaa˗ ˗nu yi yökë yi ˈkwëë˗ bhë ˗wo ˗kun kletiɛn ˗kiansü ˗nu, ˈö ˈwo yö ˗wɔn kun ˈˈgbɩɩ˗, ˈwo ˈwɔn ˗nu ˗da ˈˈgbɛɛta ˈgü ˗an ˈka. ˈKwa dɔ ꞊dɛɛ, yi ꞊kun ˈˈtɔŋdë ˈˈgbɩɩ˗ ˗nu ˈka ˗kplawo. ˗Bhɔkwëë ˈkpii˗ ˈö bhë ˗yö yi zuʋ̈ˈˈ ꞊nii ˗da, ˈyö sü ꞊dhɛ kwa ꞊dhegblü ˗nu ˈwo kun Kebɛkö, ˗wo ˗an ˈˈklʋʋ ˗bhɔ ꞊dedewo ˗kwɛ 1940 waa ˗kwɛ 1960 ˗an ꞊zinŋgü.

˗Bhɔkwëë ˈkpii˗ ˗nu ˈwo kun Mɔnreadhö bhë, a gleŋ ꞊va ꞊dede ˗sü ˈˈpian do ˈˈpiʋ̈ ˗maankëmɛn ˈˈwɛɛ  ˗nu ˈwo to ˗an ˗bha. ˗Kwɛ do ˈbha ˈka, kwa ꞊dhegblü Davi Splenö ˈö kwa ˈˈdhiʋ̈ʒiöwomɛn do ˈka ꞊dɛɛ ˗yö ˗kë yi ˗bha ˗bhɔkwëë ˈkpii˗ ˈwɔnyëë˗ ˈka. ˗A ˗bhɔkwëë ˈkpii˗ ˗dhɛ ˈö dɔ ˗a ˈˈpiʋ̈, ˗wo yö ˈö bhë ˗a ˗nu n ˗dhɛ ˈpö, Davi n ˗takun ꞊dedewo ˗a ˈgü.

˗Kwɛ 2011 ˈgü, kö yaa Randi ˈya ˗kwɛ 36 kë ˗maankëmɛn ˗dhɛ ˈgü, ˗wo wo ˗kɔ ˗yɛ n ˗bha kö ˈa kë mɛn zii ˗nu ˗bha ꞊klaŋgɔmɛn do ˈka. Kwɛ ꞊plɛ ˈˈpiʋ̈, ˈkɔ 75 ˈnën ˈyi ˗wɔ ˗an ˈgü. ˈˈKɛɛ ˗a ˗dhɛ ˗kun ˗a ˗bha kö ˈˈsaa˗ suu ˈö bhë, ˈyi˗ bho. ˈˈDhoogɔ ˈˈpɛpɛ ˈka mɛn zii ˗nu ˗wo Zoova ˈˈnuɛ ˗bho, ˈyö ˗tɔ ˗wa ˗yö ꞊dhɛ kwa ˈˈdhiʋ̈ʒiöwomɛn ˗nu ˗wo wo ˗zota ꞊dedewo ˗mlɛɛn ˈö mɛn zii ˗nu waa Zoova ˗an ꞊zinŋgü ˗a ˗wɔn ˈgü.

꞊Taabha, ˗wo wo ˗kɔ ˗yɛ n ˗bha kö ˈa kë ˗Gblüdëdhɛ ˗nɔɔnpömɛn ˗nu ˗bha ꞊klaŋgɔmɛn do ˈka. ꞊Klaŋ ˈö bhë ˗a ploglamö ˗yö kwa ꞊dhegblü ˗nu ꞊sëëbho, ˈö zuʋ̈dhiʋ̈tɛ ˗ya ˗an ˗bha. ˈˈƝaannu ˗sü ˈö ö ko ˗ta ˈˈlɛlɛ ˈˈsɔɔplɛ ˈˈpiʋ̈ ꞊klaŋkɔɔdhö kö ˈü ü ˗bha ˈˈkwɛnŋdhö ˗yökë ˈˈlɛlɛ ˈö ˗mɔn ˗yaaga ˗bha ˗a ˈka gbeŋ, kö ˗wo yö ˈö ˗mɔn ˗yiishiö ɛɛnˈˈ ˈˈsɔɔdhu ˗bha ˗an nu ü ˗dhɛ ˈzü ˈˈdhoogɔ ˈˈpɛpɛ ˈka bhë, ˈyaa ˈwɔn ˈˈplëëplë ˈka. Yaa kwa ꞊dhegblü do ˈyi kun ꞊klaŋgɔmɛn ˈka bhë yi˗ ˗pö ˗an ˗dhɛ Zoova ˈti ˗an ˗takun, ˈwaa ꞊mɔɔn˗ ˗bha kö ˗wo pë ˈbha kë. N ˗zo ˗yö ˗bo ˗kplawo ꞊dhɛ ꞊klaŋnën ˗nu ˗wa wo ˗zoyö Zoova ˗dhɛ, pë ˗nu ˈwo ˗an ˗ga ˗be ꞊dhɛ ˈwaa ˗mɔn ˗an kë ˗sü ˗bha bhë, ˗wa ˗kë ˈö˗ ˈwɔn yö ˗an kun.

N dhe ˗bha ö ˈˈtʋ̈ŋ ˗kë mɛn ˈˈwɛɛ ˗nu ˈgü ˗sü ˗ya ˗bha Biblö ꞊klaŋnën ˗nu ˗takun ˈö ˗an ˗gɛn dho ˈˈdhiʋ̈. ˗A ˗de ˗ʒiaan ˗yö n dë ˗takun ˈö˗ ˗bha gagade yö ˗kɔ ˗yö go ˈˈgblʋʋ. Kö n dhe ˗wɔn ˗ya kë ˗a ˗kwɛ ˗ya kë ˗yaaga, n dë ˗yö ˗kanmɛngüwɔn do ˗kë. ˗Yö ˗ya nu ˗sü ˗bha ˗bhɔkwëë ˗nu ˗ta ˈö ö ˈˈtʋ to ˈˈdhɛɛtadhiaŋ˗ ˗nu ˗bha, ˈö ˈwɔn ˗daa ˗nu ˗kë, ˈö to ˗a kë ˗sü ˗bha ˈˈdhʋ̈ ˗kwɛ 26 ˈˈpiʋ̈. ˈKö ˗kë ꞊dhɛ ˗yö ˈti bɔ ˈˈyi ꞊bhaa, mɛn zii ˗nu ˗wa ˗pö n ˗dhɛ ꞊dhɛ ˈyö ˈnën ˗tɔ mɛn ˗blɛɛsü ˈö nu ˗bhɔkwëë ˗nu ˗ta ˈˈdhoogɔ ˈˈpɛpɛ ˈka.

N dhe ˗kë ˈpö ˈwɔnzuan ˗së ˈka yaa n ꞊dhegblüdhe yi ˗bha ˈka. ꞊Dɛɛ, n ˈzlaa˗ dhebɔ ˗nu ˗yaaga waa wo ꞊gɔɔn ˗nu ˗wo Zoova ˗dhɔkëmɛn ˗nu ˈwo ˗klu ˗a ˗bha ˗an ˈka. ˗A mɛn do ˗yö Betɛdhö Pɔtigadhö, ˈö˗ mɛn do ˈdhö Betɛdhö Aiti.

ˈˈTʋ̈ŋ ˈö yö ˗a ˈgü yaa Randi yi ˗yödhiʋ̈ ˗detasü ˈka Amitɔnö, Ɔntario ˈˈpian ˗ta. Kö yi kun ˗maankëmɛn ˗dhɛ ˈgü, ˗dɔ mɛn ˈˈwɛɛ ˗nu ˗gɔ ˗sü kö ˈyi ˈdho ˗wo mɛn ˗nu ˗dhɛ ɛɛnˈˈ kö ˈyi ˗an ꞊klaŋkë Biblö ˈka bhë, ˗yö ˗kun yi ˗dhɛ ˗së ꞊dedewo. ˈˈKɛɛ, ꞊dɛɛ yi ˗de ˗bha Biblö ꞊klaŋnën ˗nu ˗gɛn ˗bha ˗dho ˈˈdhiʋ̈ ˗sü ˗yö yi zuʋ̈ˈˈ ˈˈgblü ˗dhi ˈzü ꞊dedewo. Kwa ꞊dhegblü ˗nu ˈwo yi ˗bha ˗zlanwokɔdhi ˗dɛɛ ˈgü, yaa˗ ˗nu yi ˗bha ˈˈtɔŋdhɛ ˗gɛn ˗yö ˗gban ˗ni ˈgü. ˗Kɔ ˈö Zoova ˗yö ˗an ˗takun ˗a ˈka ˈˈtʋ̈ŋ ˈˈgbɩɩ˗ waa ˈˈtʋ̈ŋ ˗së ˗nu ˈgü ya yö, ˗yö yi ꞊faanmën ꞊dedewo.

꞊Dɛɛ, ˈya yi ˗zota mɛn ˗nu ˗bha wo ˈˈtʋ̈ŋ ˗kë yi ˈgü ˗sü ˈgü, yi ˗an ˈˈnuɛ ˗bho ˗a ˗wɔn ˈgü. Yi ˗de ˈpö, yi˗ ˈˈslö ˗mɛɛn kö mɛn ˈˈwɛɛ ˗nu ‹˗ta ˗ko zë ˗pɛng ˗yö kë yi ˗ta,› ˈyi ˗an ꞊faanmën kö ˗wo wo ˈgü dɔ ˈˈgbɩɩ˗ ˗wo Zoova ˗dhɔkë wo züʋ̈ˈˈ ꞊gban ˈka. (2 Ko. 7:6, 7) ˗A ˈwɔnzuan ˈnën ˗tɔ kwa ꞊dhegblüdhe do, ˗a gbö waa ˗a ˈdhu ˗wo ˗kun ˗Zlan ˗bha ˈˈtʋ̈ŋ ꞊gban ˈgü ˗yö ˈgü bhë, a˗ ꞊gɔɔn ꞊faanmën kö ˗yö kë ˗yödhiʋ̈ ˈka ˈpö. ˗Ya ˗pö n ˗dhɛ ꞊dhɛ yö ˈnën ˈö ö ˗zokë ˗ni ˈgü ˗yödhiʋ̈ ˗yaaga ˈwo ˈˈdhʋ̈ ˗an ˈˈpiʋ̈. ˈDhɛ ˗kë ˈˈdhʋ̈, ˈyö ˈa˗ pö ˗a ˗dhɛ: «Ü ˗an ˗takun ˗kɔ ˗së ˗dɔ ˈü ˗ʒiö ˗a ˈka Zoova ˗ta ˗ee?» ˈA˗ ˗pö ˗a ˗dhɛ ˈzü zuʋ̈gblüdhi ˈö ˗an ˗gɔ ˗ya din ˗ga. ˈDhɛ ˈˈsu ˈˈsɔɔdo ˗yö ˗ʒiö, yö ꞊dede ˗yö ˗kë ˗yödhiʋ̈ ˈka ˈpö.

Yaa Randi yi ˗dho Zoova ˗bha «yö ˈˈmlünmlünsü» ˗wɔn blɛɛˈˈ «mɛn ˗nu ˈwo dho yö yi ꞊ʒiaan ˈgü» ˗an ˗dhɛ, kë ˈˈdhʋ̈ kö ˗a ˗dhɔkësü ˈˈdhiaa ˗yö kë ˗an ˈgü ꞊dedewo.—Ps. 71:17, 18.