1. ˈMën ˗kë ˈkwa ˈwɔn ˗daakë ˗bhɔkwëë ˗nu ˗ta?

 ˈMËN ˗kë ˈkwa nu ˗bhɔkwëë ˗nu ˗ta? ˗A ˗gɛn ˗blɛɛsü ˈnën ˗tɔ kwa ˗nu kö ˈkwa Zoova ˈtɔ bhɔ. (Ps. 26:12; 111:1) Kwa nu ˈzü kö ˈkwa kwa ˈko ˗nu ꞊faan dɔ ˈˈtʋ̈ŋ ˈˈgbɩɩ˗ ˈö yö ˗a ˈgü. (1 Tes. 5:11) ˈKwa ˈwɔn ˗daakë ˗bhɔkwëë ˗nu ˗ta, kö pë ꞊plɛ ˈwo bhë kwa ˗an kë ˗ni ˈgü.

2. ˗Bhɔkwëë ˈˈpian ˗mɛɛn ˗nu ˈö ˈkwa ꞊mɔɔn˗ ˗bha ˈkwa ˈwɔn ˗daakë ˗an ˗ta?

² ˈˈDhoogɔ ˈˈpɛpɛ ˈka, kwa kwa ˗kɔ ˗luu kö ˈkwa ˈwɔn ˗daakë kwa ˗bha ˗bhɔkwëë ˗nu ˗ta. Kwa ˈˈGlaadhiʋ̈ ˗tɔn draanˈˈ ˗ni ˈgü ꞊glooyi ˗nu ˈka, kwa ˈwɔn ˗daakë. ˗Ya ˈgo mü ˈzü ˈˈdhoogɔ ꞊zinŋgü ˗bhɔkwëë ˈˈpian ˗nu ˈwo ˗kë ꞊dhɛ Pë ˗sɛŋbɔ ˗nu ˈwo Biblö ˈgü, ˗Zlanwokɔdhi ˗bha Biblö draansü waa˗ ˈˈwɛɛ ˈbha ˗nu ˈdhö bhë, kwa ˈwɔn ˗daakë ˗an ˗ta.

3. (1) ˗Mën ˗nu ˈwo ꞊mɔɔn˗ ˗bha kö ˗wo ˈwɔn ˗daakësü kë kwa ˗kɔa ˈˈgbɩɩ˗? (2) ˗Kɔ ˗mɛɛn ˈö Eblö 10:24, 25 ˗yö kwa ˗takun ˗a ˈka?

³ Mɛn ꞊gban ˈˈpɛpɛ kwa˗ ˈˈpiʋ̈ kö ˈkwa Zoova ˈtɔ bhɔ, ˈkwa kwa ꞊dhegblü ˗nu ꞊faanmën. ˈˈKɛɛ pë ˈbha ˗nu ꞊mɔɔn˗ ˗bha ˈwo kwa ˗kɔ kun ˈwɔn ˗daakë ˗sü ˗bha. ˈˈSuʋ̈ ꞊mɔɔn˗ ˗bha ˈö kwa ˗kë ɛɛnˈˈ kwa ꞊mɔɔn˗ ˗bha ˈkwa kwa ˗kɔ ˗luu ˈö ˈwaa wo ˗kɔ ˈˈyɛ kwa ˗bha. ˗Ya kë kwa ˈka ˈˈdhʋ̈, ˈmën ˈkwa dho ˗a kë? Dhɛɛˈˈ ˈö bhë ˗a ˗yɔ ˗yö ˈsëëdhɛ ˈö bɔmɛn Pɔdhö ˗ya bɔ Eblö ˗nu ˗dhɛ, ˗a ˈgü. ˈDhɛ kun wɔn ˗së ˗nu ˈwo go ˗nu ˗bhɔkwëë ˗nu ˗ta ˗sü ˈgü ˗a ˗wɔn blɛɛˈˈ ˗ni ˈgü, Pɔdhö ˗ya ˗pö ꞊dhɛ kwa ˗dua ˗mü kö «ˈkwa kwa ˈko ˗nu  faan dɔ.» (Eblö 10:24, 25 ˗wo pö.) ˈKwa˗ ˈwɔn dɔ ꞊dhɛ kwa ˗bha dhiaŋ ˗nu ꞊mɔɔn˗ ˗bha ˈwo mɛn ˈˈwɛɛ ˗nu ꞊faanmën, kwa ˗kɔ luuˈˈ ˗sü kö ˈkwa ˈwɔn ˗daa kë bhë, ˗a ˈˈsuʋ̈ ˈti ˗dho kwa kë. ˗Ya kë ˈzü ꞊dhɛ ˗wo ˈti wo ˗kɔ ˈˈyɛ kwa ˗bha ˈˈtʋ̈ŋ ˈbha ˈka, ˗yö ˗dho kë kwa ˗dhɛ ˗së ˈyö sü ꞊dhɛ mɛn ˈˈwɛɛ ˗nu ˗de ˈpö ˗an dua ˗mü kö ˗wo ˈwɔn ˗daakë.—1 Piɛ. 3:8.

4. Pë ˗yaaga ˗mɛɛn ˈkwa ˗dho ˗a yö ˈwɔn ˗gɔ ˈö yö ˗a ˈgü?

⁴ ˈWɔn ˗gɔ ˈö yö ˗a ˈgü, ˗kɔ ˈkwa ˗dho kwa ˈko ˗nu ꞊faan dɔ ˗a ˈka ˗zlanwokɔdhi ˈsɛɛn˗ ˈö mɛn ˗nu ˈwaa mü ꞊va ˗an ˈgü, kwa ˗dho ˗a yo. ˗Ya ˈgo mü ˈzü, ˗kɔ ˈkwa ˗dho kwa ˈko ˗nu ꞊faan dɔ ˗a ˈka ˗zlanwokɔdhi ˈkpii˗ ˈö mɛn ˗nu ˈwo mü ꞊va ˗an ˈgü, kwa ˗dho ˗a yö. ˗A ˗totaabhasü ˈgü, pë ˈkwa ꞊mɔɔn˗ ˗bha ˈkwa˗ pö kwa ˗bha ˈwɔn ˗daa ˗nu ˈgü kö ˈkwa mɛn ˗nu ꞊faan dɔ, kwa ˗dho ˗a yö ˈpö.

5. Mɛn ˗nu ˈwaa ꞊va ˗bhɔkwëë ˗ta, kwa ˗dho ˗an ꞊faanmën ˗kɔ ˗kë ꞊dhɛ?

⁵ ˗Zlanwokɔdhi ˈsɛɛn˗ ɛɛnˈˈ ˗zlanwopömɛn ˈkpö do ˈgü, mɛn ˗nu ˈwo˗ ˈˈpiʋ̈ kö ˈwo ˈwɔn ˗daakë ˈwaa kë ꞊va. ˗Ya kë ꞊shiöŋ ˈˈdhiʋ̈sü ˗bhɔkwëë ˈka ˗mɛn dua ˗mü kö ˗yö ˗dhɛ ˈˈdhiʋ̈ ˈˈgan ˈdɔɔni kö mɛn ˈbha ˗yö ˗kun ö ˗kɔ luuˈˈ. ˗A ˗wɔn ˈgü, ˗a ˗bhɔkwëë ꞊mɔɔn˗ ˗bha ˈö yö mɛn ˗nu ˈgü, ˈö ˗an ˈgü ga. ˗Ya kë ˈˈdhʋ̈, ˈmën ˈkwa ˗dho ˗a kë? ˗Kwa dɔ ˈˈgbɩɩ˗ ˈkwa kwa ˗kɔ luuˈˈ zoodhö zoodhö, kë ˈˈdhʋ̈ kö ˈkwa mɛn ˈˈwɛɛ ˗nu ˗blü ˈpö ˈwɔn daakësü ˗bha.

6-7. ˈMën ˈkwa ˗dho ˗a kë kö ˗daakësü ˈˈsuʋ̈ ˈya ˗dho kwa kë?

⁶ ˈWɔn ˗daakësü ˈˈsuʋ̈ ˗ya ka kë, ˈmën ˈka ˗dho ˗a kë? ˗Kaa ˈwɔn dɔ ꞊dhɛ ˗yö ˗kë ˈˈdhʋ̈ ˈpö mɛn ꞊vadhɛ ˈka. ˈKwa˗ pö ˈkwa kwa ꞊dhegblü ˗nu ꞊faan dɔ, ˗yö ˗dho kë ˗së kö pë ˗nu ˈwo ˗dho ˈwɔn ˗daakësü ˈˈsuʋ̈ bho kwa zuʋ̈ˈˈ ˗ta, ˈkwa ˗an kë. Kwa ˗dho ˗a kë ꞊dhɛ?

⁷ ˗Gleŋ ˗sɛŋbɔ ˗nu ˈwo kwa ˗bha ˈˈGlaadhiʋ̈ ˗tɔn ˈgü, ˗wo ꞊mɔɔn˗ ˗bha ˈwo ka ˗takun. b ˗A ˈwɔnzuan do ˈnën ˗tɔ ka dua ˗mü ˈka ka ˗de baaˈˈ ˗së ˈka. (Prov. 21:5) ˈWɔn ˗gɔ ˗nu ˈkwa ˗dho ˗an draanˈˈ ˗bhɔkwëë ˗ta, ˈkwa ˗an dɔ ˗së ˈka ˈwɔn ˗daakësü ˗dho kë kwa ˗kɔa ˈˈplëëplë. ˗Ya ˈgo mü ˈzü, kwa ˗bha ˈwɔn ˗daa ˗nu ˗wo kë ꞊klöö˗. (Prov. 15:23; 17:27) ˈWɔn ˗daa ꞊klöö˗ kë ˗sü ˈyaa ˈˈsuʋ̈ ˗da mɛn ˈgü. ˗Yö ꞊mɔɔn˗ ˗bha ˈö ˗kë ˗wo kpö do ɛɛnˈˈ ꞊plɛ ˈka. ˗A ˈbha ˗ya kë, kwa ꞊dhegblü ˗nu ˗dho ˗a ˈgüman ˗së ˈka ˈö ˗ʒiö ˗a ˈka ˈwɔn ˗daa ꞊gblɛɛn ˈkwa pë ꞊va ˗wɔn ꞊blɛɛ ˗a ˈgü, ˗a ˗ta. Kwa ˈwɔn ˗daa ꞊klöö˗ ˗nu kë kwa ˗de ˗bha ˈwɔn blɛɛˈˈ ˗kɔ ˈgü, kwa ˗dho ˗a ˗zɔn ꞊dhɛ kwa kwa ˗de ˗baa ˗së ˈka, ˈö ˈwɔn ˗gɔ ˈö bhë ˈkwa˗ ˈgüman ˈkpakpadhö.

8. Zoova ˗yö kwa ˗bha ˈgüdɔgbɩɩsü ˗yö ˗kɔ ˗kë ꞊dhɛ?

⁸ ˈˈSlö ˗nu ˈwo ˗an ˗zɔn ka ˗dhɛ ˈˈdhʋ̈ ˈka ˗an kë, ˈˈsuʋ̈ ꞊kun ka zuʋ̈ˈˈ ˗ta ˗kplawo, ˗mën ˈbha ˈka ˗dho ˗a kë? ˈPë kwa ˗kɔ ˗mɔn ˗a kë ˗sü ˗bha ˈkwa˗ kë, ˗yö ˗kë Zoova ˗dhɛ ˗së. (Dhu. 21:1-4) ˈPë kwa ˗kɔ ˈyaa ˗mɔn ˗a kë ˗sü ˗bha, Zoova ˈyaa ˗dhɛ kwa ˗gɔ. (Fdh. 4:5) Pë ˗nu ˈö ka ˗kɔ ˗mɔn ˗a kë ˗sü ˗bha, ˗ka ˗an dɔ kö ˗a ˈdhɛ ˈka ˗dho ˗a kë ˈka˗ ˗wɔn ˗ya ka ˗zo ˈˈpiʋ̈. ˗Ya ˈgo mü, ˗kaa pö Zoova ˗dhɛ ˗yö ka ˗zogban. ˗A ˗züdɔdhɛ ˈgü, ka ꞊mɔɔn˗ ˗bha ˈka ˈwɔn ˗daa ꞊klöö˗ do ˗kë.

9. ˈMën ˗kë ˈö ˗kɔ ˗yɛ kwa ˗bha ˗dhɛ ˈdhö ˈˈgbɩɩ˗ ˗zlanwokɔdhi ˈkpii˗ ˈgü?

⁹ ˗Ya ˗kë ꞊dhɛ mɛn ꞊va ˗wo ka ˗bha ˗zlanwokɔdhi ˈgü, kö ˈyaa za ˈgü ꞊dhɛ mɛn ˗nu ˈwo wo ˗kɔ ꞊luu ˗bhɔkwëë ˗ta ˗wo ꞊va. ˗A ˗wɔn ˈgü, ˈwaa wo ˗kɔ ˈˈyɛ ˈka ˗bha ˈˈtʋ̈ŋ ꞊gban  ˈka. Kwa ꞊dhegblüdhe do ˈwo˗ ˗dhɛ Daniɛdhö ˗yö ˗kun ˗a ˈˈpiʋ̈ kö ˈö ˈwɔn ˗daakë zoodhö zoodhö ˗bhɔkwëë ˗nu ˗ta. c ˗Ya ˗yö ꞊dhɛ ˈwɔn ˗daakësü ˈö bhë Zoova ˗dhɔkësü ˗mü. ˗Ya ˈgo mü, ˗yö mɛn ˈˈwɛɛ ˗nu ꞊faanmën ˈö˗ ˗kë ˈzü kö gagade ˗nu ˈwo Biblö ˈgü ˗wo ˈto kwa ˈˈɲaan pinŋdhö. ˈˈKɛɛ ˈdhɛ dho ˗zlanwokɔdhi do ˈkpii˗ ˈgü, ˈwaa kun wo ˗kɔ ˈˈyɛ ˗ni ˈgü ˗a ˗bha ˈˈtʋ̈ŋ ꞊gban ˈka. ˗A ˗de ꞊ʒiaan yi ˈbha ˗nu ˈka, ˈyaa ˈwɔn ˗daakë ˗bhɔkwëë ˗ta. ˗Ya ˗pö: «A ˗kë n ˗de ˈgü ˈya˗, ˈyö ˗tɔ ꞊dhɛ n ˗man ˈgü, ˗wa n ˗man ꞊bhlëëwɔn ˈkpii˗ do ˈkun n ˗gɔ. ˈWɔn suu ˈö bhë ˗ya kë ˈko ˗ta ꞊va, ˗a ˗mɛn ˗mɔn ˗bha ˈö˗ pö ö ˗de ˗dhɛ ꞊dhɛ ˗wa ˗kë wo ˗de ˈˈɲaan.»

10. Ka ˗dho ˗a kë ꞊dhɛ kö ˈka ˈwɔn ˗daakë ˗bhɔkwëë ˗nu ˗ta?

¹⁰ ˗Ya kë ꞊shiöŋ, ka ˗kë ka ˗de ˈgü ꞊dhɛ Daniɛdhö ˈdhö ˈpö ˗ee? ˗Ya kë ˈˈdhʋ̈ ka ˈgü ꞊mɔɔn˗ ˗bha ˈö ga, ˈka˗ pö ka ˗de ˗dhɛ ꞊dhɛ ka ˗dho ka ˈˈtʋ to dosɛnŋ. ˈˈKɛɛ ˈka ˗dho ˈˈkan ˈwɔn ˗daakësü ˗bha. ˈMën ˈka ꞊mɔɔn˗ ˗bha ˈka˗ kë? ˗Ka ka ˗de baaˈˈ dhɛɛˈˈ ꞊va ˗yɔ bɔ ˗sü ˗bha ˗bhɔkwëë ˈˈpɛpɛ ˗bha ˈka, ˈyö sü ꞊dhɛ ˗wo ˈti wo ˗kɔ ˈˈyɛ ka ˗bha ˗a züdɔdhɛ ˈgü, ka ꞊ɲɔɔn ˗ni ˈgü ˈˈdhiʋ̈ ˗wo ˗dho wo ˗kɔ ˈˈyɛ ka ˗bha. Ka ka ˗de baaˈˈ ˗ni ˈgü ˈˈGlaadhiʋ̈ ˗tɔn ˗bha, ˗kɔ ˈö˗ ˗wo ˗bhüöö kpö ˗nu ˗wo ˗gban ˗a ˈka ˗a ˈwɔn ˗gɔ ˗bha, ˗ka ka ˗zota ˗a ˈgü. ˈKa˗ kë ˈˈdhʋ̈, ka ˗dho ˗mɔn ˈwɔn ˗daa ˗së kë ˗sü ˗bha ˗bhɔkwëë ˗todhʋ̈sü ˈgü. Gagade ˗nu ˈwo ˗wo ˗bhüöö kpö ˈbha ˗nu ˈgü ˈö ˗an ˈgüpʋdhɛ ˈdhö ˈˈgbɩɩ˗ bhë, ˗ka ka ˗de baaˈˈ ˗an ˗bha ˗së ˈka. (1 Ko. 2:10) ˈMën ˗kë? ˈYö ˗tɔ ꞊dhɛ ˗a ˈbha ˗ya kë mɛn ꞊vadhɛ ˈwii ˗dho wo ˗kɔ luuˈˈ mü. ˈKa ˈˈslö ˗nu ˈwo bhë ˗an kë ˗bhɔkwëë ꞊va ˗ta ˈwii wo ˗kɔ ˈˈyɛ ka ˗bha, ˈmën ˈka ˗dho ˗a kë ˈzü? Ka ꞊mɔɔn˗ ˗bha ˈka ˗bhɔkwëë ˈˈtʋ̈ŋ to ˈˈdhiʋ̈ ˈö ˈmɛn ˗dho ˈˈdhiʋ̈sü ˗a ˈka bhë ˈka˗ ꞊kpɔɔ ꞊dhɛ ka˗ ˈˈpiʋ̈ kö ˈka dhɛɛˈˈ ˈbha ˗yɔ bɔ.

11. ˈMën Fidhipö 2:4 ˗yö kletiɛn ˗nu ꞊faanmën ˗a kë ˗sü ˗bha?

¹¹ ˗Bhö Fidhipö 2:4 ˗wo pö. Zoova ˗yö ˗bɔ bɔmɛn Pɔdhö ˗ta ˈö kletiɛn ˗nu ꞊faanmën kö ˗wo wo ˗zota wo ˈko ˗nu ˗wɔn ˈgü. Kwa ˗dho ˗a kë ˈˈdhʋ̈ ˗kɔ ˗kë ˗bhɔkwëë ˗nu ˗ta? ˗A kë ˗kɔ do ˈnën ˗tɔ ˗a ˈwɔn dɔ ˗sü ˈö ꞊dhɛ mɛn ˗nu ˈwo to ˗wa ˈˈpiʋ̈ ˈpö kö ˈwo ˈwɔn ˗daa ˗nu kë.

12. Mɛn ˈˈwɛɛ ˗nu ꞊faanmën ˗kɔ ˗së do ˈnën ˗tɔ ˗mën? (Kpɔɔˈˈ ˈzü pë ˈˈbin ˗bha.)

 ¹² ˗Kwa kwa ˗zota ˈwɔn ˈö yö ˗a ˈgü: Kwaa kwa ˈˈtɔŋdë ˗nu kwa ˈˈdoodɔ ˗ni ˈgü, kwa ˈwɔn ˗blɛɛ ꞊va ˈö ˈkwaa ˈˈtʋ̈ŋ ˗nu ˗an ˗dhɛ kö ˗wo wo ˗bha blɛɛˈˈ ˗ee? ˗Abin! Kwa˗ ˈˈpiʋ̈ kö ˗wo ˈwɔn blɛɛˈˈ ˈpö. Kɔ do ˈö bhë ˗a ˈka ˗bhɔkwëë ˗nu ˗ta, kwa˗ ˈˈpiʋ̈ kö mɛn ꞊vadhɛ ˗wo ˈwɔn ˗daakë. Gagade ˈka, kwa ꞊dhegblü ˗nu ꞊faanmën ˗kɔ do ˈnën ˗tɔ ˈˈtʋ̈ŋ ˗nu ˗an ˗dhɛ ˗sü kö ˗wo wo ˗bha ˗zoyödhe ˗wɔn blɛɛˈˈ. (1 Ko. 10:24) ˗Kɔ ˈkwa ꞊mɔɔn˗ ˗bha ˈkwa˗ ˗kë ˗a ˈka, ˗kwaa ˗ga.

13. ˈMën ˈkwa ˗dho ˗a kë kö mɛn ꞊vadhɛ ˗wo ˈwɔn ˗daakë?

¹³ ˗A züdɔdhɛ ˈgü, ˗kwa kwa ˗bha ˈwɔn ˗daa ˗nu kë ꞊klöö˗, kë ˈˈdhʋ̈ kö ˈkwa ˈˈtʋ̈ŋ ꞊va ˈto mɛn ˈˈwɛɛ ˗nu ˗gɔ kö ˗wo dhiaŋzë ˈpö. Mɛn zii ˗nu waa kwa ꞊dhegblü ˗nu ˈö ˗wa ˗kian bhë, ˗wo ꞊mɔɔn˗ ˗bha ˈwo˗ ˈwɔnzuan ˗zɔn. ˈKö ˗kë ꞊dhɛ kwa ˈwɔn ˗daa ꞊klöö˗ ˗kë, ˈkwa ˗dho pë ꞊va ˗wɔn blɛɛˈˈ ˗a ˈgü. ˈWɔn ˗nu ˈwo ˗wo ˗bhüöö kpö do ˈgü ˈkwa ˗an ꞊gban blɛɛˈˈ, ˗a ˈbha ˈti ˗dho ˈto mɛn ˈˈwɛɛ ˗nu ˗gɔ. ˗A ˈwɔnzuan ˈnën ˗tɔ ˗wo bhüöö ˈö yö, ˈwɔn ꞊plɛ ˈnën ˈwo˗ ˈgü. ˗A ˗blɛɛsü ˈnën ˗tɔ kwa ˗bha ˈwɔn ˗daa ˗nu ˗wo kë ꞊klöö˗. ˗A ꞊plɛ ˗bha ˗naan ˈnën ˗tɔ kwa dua ˈyaa mü kö ˈkwa pë ꞊va ˗wɔn blɛɛˈˈ. ˈKwa kë mɛn ˗blɛɛsü ˈka ˗wa wo ˗kɔ ˈˈyɛ kwa ˗bha, ˈwɔn ga do ˈnën kwa dua ˈdhö ˗mü kö ˈkwa˗ ˗wɔn blɛɛˈˈ.

14. ˈMën ˗dho kwa ˗takun kö ˈˈtʋ̈ŋ ˈkwa ˗dho kwa ˗kɔ luuˈˈ ˗a ˈka, ˈkwa˗ dɔ? (Kpɔɔˈˈ ˈzü pë ˈˈbin ˗bha.)

¹⁴ ˈKwa˗ pö ˈkwa ˈwɔn ˗daakë, ˗kwa kwa ˗de dhɛɛˈˈ ˈkpɔ ˗ni ˗ya kë ꞊dhɛ kwa kwa ˗kɔ ˗luu zoodhö zoodhö. ˈKwa kwa ˗kɔ luuˈˈ ˈˈtʋ̈ŋ ꞊gban ˈka, ˗yö ˗dho ˈˈdhiʋ̈ ˗sü ˗bhɔkwëë ˈka ˗mɛn ˈˈtënŋ sü ˈö ö ˗kɔ ˈˈyɛ kwa dosɛnŋ kwa ˗bha, ˈˈkɛɛ kö mɛn ˈˈwɛɛ ˗nu ˗bhawɔn ˗yö ˈwɔn ˗daakësü ˗bha ˈpö. ˗Ya kë ˈˈdhʋ̈ mɛn ˗nu ˈwo to ˗an ˈgü ˗dho ga, ˈwii ˗dho wo ˗kɔ luuˈˈ ˈzü.—Eccl. 3:7.

15. (1) ˈWii wo ˗kɔ ˈˈyɛ kwa ˗bha, kwa ˗dho ˗a ˈsü ˗kɔ ˗kë ꞊dhɛ? (2) ˈˈDhiʋ̈sü ˗bhɔkwëë ˈka ˗mɛn ˗dho ˗a ˗zɔn ˗kɔ ˗kë ꞊dhɛ ꞊dhɛ ö mɛn ˈˈpɛpɛ ˗sü ˗së? (Kpɔɔˈˈ ˈkɔnën « Kwa ˈˈdhiʋ̈sü ˗ni ˈgü ˗bhɔkwëë ˈka, ˈmën ˈkwa ˗dho ˗a kë» ˗bha.)

¹⁵ Mɛn ꞊va ˗wa wo ˗kɔ luuˈˈ ˗bhɔkwëë ˗ta, ˗a ˈbha ˗ya kë ˈwii ˗dho wo ˗kɔ ˈˈyɛ kwa ˗bha ꞊dhɛ ˗kɔ ˈkwa˗ ˈˈpiʋ̈ ˗a ˈdhö. ˗Ya kë ꞊shiöŋ, ˈˈdhiʋ̈sü  ˗bhɔkwëë ˈka ˗mɛn ˈyii ˗dho ö yɛ kwa ˗bha toŋtoŋdhö. ˗Yö ꞊mɔɔn˗ ˗bha ˗ʒiaanwo ˈö mën kwa ˈka. ˈKö ˗kë ˈˈdhʋ̈, kwa dua ˈyaa ˗mü kö ˈkwa˗ pö ꞊dhɛ ˗ya ˗kë ö ˗de ˈˈɲaan ˈö ˗kë kwa ˗dhɛ ˈya˗.—Eccl. 7:9.

16. Mɛn ˗nu ˈwo ˈwɔn ˗daakë, kwa ˗dho ˗an ꞊faanmën ˗kɔ ˗kë ꞊dhɛ?

¹⁶ Kwa ˈti ˈwɔn ˗daa ꞊va kë ꞊dhɛ ˗kɔ ˈö ˈkwa˗ ˈˈpiʋ̈ ˗a ˈˈdhö, ˗yö ˗dho kë ˗së kö ˈkwa kwa ˈˈtʋ ˈto mɛn ˈˈwɛɛ ˗nu ˗bha, kë ˈˈdhʋ̈ kö ˗bhɔkwëë ˗ya ɲën ˈkwa ˗an ˈˈnuɛ bho ˗an ˗bha ˈwɔn ˗daa ˗nu ˗bha. Kwa ꞊dhegblü ˗nu ˈˈnuɛ bho ˗sü ꞊mɔɔn˗ ˗bha ˈö ˗an ꞊faanmën ꞊dedewo ˈö ˗ʒiö ˗a ˈka kwa ˗bha ˈwɔn ˗daakë ˗sü ˗ta. (Prov. 10:21) Mɛn ˗nu ꞊faanmën kɔ do ˈnën ˗tɔ ˗an ˈˈnuɛ bho ˗sü.

17. (1) ˈNënmɛn ˗nu ˗dho wo ˗bha ˈnën ˗nu ˗takun ˗kɔ ˗kë ꞊dhɛ kö ˗wo wo ˗de baaˈˈ ˈwɔn ˗daakë ˗sü ˗bha? (2) ˈKwa video ˈö bhë ˗a ˗ga, kwa kwa ˗de baaˈˈ ˗ni ˈgü ˈwɔn ˗daakë ˗sü ˗bha, pë ˗yiishiö ˗mɛɛn ˈkwa ˗dho ˗an kë? (Kpɔɔˈˈ ˈzü ˗zoto ˗a ˈˈpiʋ̈ ˗wɔn ˗bha.)

¹⁷ Kwa ˗dho ˈkwa ˈko ꞊faanmën ˗bhɔkwëë ˗nu ˗ta ˗kɔ ˗kë ꞊dhɛ ˈzü? ˗Ya kë ꞊dhɛ ˈnën ˗nu ka ˗gɔ, ˗a mɛn ˗nu ˈwo ꞊kun ˈsɛɛn˗ bhë ˗ka ˗an takun kö ˗wo wo ˗de baaˈˈ ˈwɔn ˗daa ˗nu ˈwo dan ˗an ˈka ˗an ˗bha. (Mat. 21:16) ˈˈTʋ̈ŋ ˈbha ˗nu ˈka, ˈwɔn ˗gɔ ˗nu ˗wo ˗gban ˈkosümɛn ˗nu ɛɛnˈˈ ˈˈtakɔ ˈˈslʋ̈ʋ̈slʋ̈ ˗bha kwa ˗an ˗draan. ˈˈKɛɛ ˗ya kë ꞊shiöŋ, ˗wo ˗bhüöö kpö do ɛɛnˈˈ ꞊plɛ ˈö ˈnën ˗nu ꞊mɔɔn˗ ˗bha kö ˗wo ˈwɔn ˗daakë ˗an ˈgü, ˗wo ˗kë ˗an ˈgü. ˗Ka ka ˗bha ˈnën ˗nu ˗takun kö ˗wa yö ꞊dhɛ ˈˈtʋ̈ŋ ˈˈpɛpɛ ˈwo wo ˗kɔ  ꞊luu ˗a ˈka, ˈyaa ˈnën ˈwo ˗dho wo ˗kɔ ˈˈyɛ ˗an ˗bha. ˈKa˗ kë ˈˈdhʋ̈, ˗waa ˗an ˈto ˗wa wo ˗kɔ ˈˈyɛ mɛn ˈˈwɛɛ ˗nu ˗bha, ˈyii ˗dho kë ˗an ˗dhɛ ˈya˗.—1 Tim. 6:18. d

18. Kwa ˈwɔn ˗daakë ˗ni ˈgü, ˈmën ˈkwa ˗dho ˗a kë kö mɛn ˈˈɲan ˈya ˗dho bɔ kwa ˗ta? (Proverbes 27:2)

¹⁸ Mɛn ˈˈpɛpɛ kwa ꞊mɔɔn˗ ˗bha kö ˈkwa kwa ˗de baaˈˈ ˗së ˈka ˈwɔn ˗daa ˗nu ˈwo ˗dho Zoova ˈtɔ bhɔ, ˈwo ˗dho kwa ꞊dhegblü ˗nu ꞊faanmën ˈpö ˗an ˗bha. (Prov. 25:11) ˈKö ˗kë ꞊dhɛ ˈˈtʋ̈ŋ ˈbha ˗nu ˈka, kwa ꞊mɔɔn˗ ˗bha ˈkwa ˈwɔn dɛdɛ ˈö ˗gban kwa ˗bha ˗a blɛɛˈˈ, kwa dua ˈyaa ˗mü kö ˈkwa kwa ˗de ˗wɔn blɛɛˈˈ ˗kplawo kwa ˗bha ˈwɔn ˗daa ˗nu ˈgü. (Proverbes 27:2 ˗wo pö; 2 Ko. 10:18) ˗Kwaa ˈˈslö mɛɛnˈˈ ꞊ʒiaan ˈkö ˈkwa Zoova, ˗a ˈˈDhiwo waa˗ ˗dhɔkëmɛn ˗nu ˗lokotasü ˗wɔn blɛɛˈˈ. (˗Dhɛ. 4:11) ˈˈKɛɛ ˗wo ˗bhüöö kpö do ˗bha dhɛɛˈˈ ꞊yaa˗ pö ꞊dhɛ ˈkwa kwa ˗de ˗bha ˈwɔn yö ˗kɔ blɛɛˈˈ, kwa ꞊mɔɔn˗ ˗bha ˈkwa˗ blɛɛˈˈ. ˗Kwaa ˈwɔnzuan ˗ga ˗wo ˗bhüöö kpö ˈö dɔ ˗a dhɛ ˈö yö ˗a ˈˈpiʋ̈, ˗a ˈgü.

19. (1) ˈKwa kwa ˈˈtʋ̈ŋ kë mɛn ˈˈwɛɛ ˗nu ˈgü ˗bhɔkwëë ˗ta, ˈwɔn ˗së ˗mɛɛn ˈö ˗dho ˈgo ˗a ˈgü? (Wlɔmö 1:11, 12) (2) Ka ꞊dede, ˈmën ka ˗dhɛ ˗së ˗bhɔkwëë ˗nu ˗ta?

¹⁹ ˈTɔŋ˗ ˈö ˗gban ˈwɔn ˗daakë ˗kɔ ˗bha ˈyaa ˈdhö, ˈˈkɛɛ mɛn ˈˈpɛpɛ kwa ꞊mɔɔn˗ ˗bha ˈkwa kwa ˈgü dɔ ˈˈgbɩɩ˗ kö ˈkwa kwa ˈko ˗nu ꞊faanmën. ˗A ˗wɔn ˈgü, ˗kwa kwa ˗de ˈkun ˈwɔn ˗daakësü ˈö ˈˈtʋ̈ŋ ꞊gban ˈka ˗a ˗gɔ. Ɛɛnˈˈ ˈkö ˗kë ꞊dhɛ ˗wo wo ˈkɔ yɛ kwa ˗bha ˗gɛnɲan ˈka ꞊va ɛɛnˈˈ ˈwii˗ kë ˈˈdhʋ̈, kwa zuʋ̈ˈˈ ˈˈgblü ˗yö dhi ˗a ˗wɔn ˈgü. ˗Ya ˈgo mü ˈzü ˗wa wo ˗kɔ ˈˈyɛ mɛn ˈˈwɛɛ ˗nu ˗bha, ˗yö kë kwa ˗dhɛ ˗së. ˈKwa kwa ˈˈtʋ̈ŋ kë kwa ˈko ˗nu ˈgü ˗bhɔkwëë ˗nu ˗ta, mɛn ˈˈpɛpɛ kwa ˗dho ˗mɔn «kwa ˈko ˗nu faan dɔ» ˗sü ˗bha.—Wlɔmö 1:11, 12 ˗wo pö.