Ka˗ ˈwɔn ˗dɔ ˗ee?
ˈÖ kun ꞊kwɛŋzü, ˗wo ˈˈyitagɔ ˗pë ˗kë sɛɛˈˈ ˈˈdhü ˈwo˗ papidhisö ˗kë bhë ˗a ˈka ˗ee?
Papidhisö ˗dhü ˗nu.
MƐN ꞊vadhɛ ˗wa ˈwɔn ˗dɔ ꞊dhɛ ꞊kwɛŋzü, Ezitömɛn ˗nu ˗wo ˈsëëdhɛ ˗yö ˗kë ˈˈdhü ˈwo˗ papidhisö ˗kë bhë ˗a ˈka, ˈwo pë ˗bɛn zë ˗a ˗ta. Glɛkömɛn ˗nu waa Wlɔmömɛn ˗nu ˗wo pë ˗ya papidhisö ˗ta ˈpö. * ˈˈKɛɛ mɛn ˗nu ˈwo˗ ˈwɔn dɔ ꞊dhɛ ˗wo ˈˈyitagɔ ˗pë ˗kë papidhisö ˈka ˈpö ˈwaa ꞊va.
ˈˈYitagɔ ˈwo˗ ˗pë ˗kë papidhisö ˈka ˗a suu ꞊plɛ ˈwo ˗kpan ˗a ˈˈbin ˗bha blɔɔntaa Ezitö.
˗Zlan ˗wodhiʋ̈lomɛn Izai ˗yö ˗kwɛ 2.500 ˗to ˈˈdhiʋ̈ ˈö˗ pö mɛn ˗nu ˈö ˈwo «Etiopi ˈˈyiga ˗nu ˈˈpiʋ̈», ˗wo «wo ˗bha mɛn ˗nu ˗bɔ ꞊weeyi ˗ta ˈö ˈwo ˈˈyi ˗kan ˈˈyitagɔ ˈwo˗ ˗yö ˗kë papidhisö ˈka, ˗a ˈgü.» ꞊Taabha, ˗Zlan ˗wodhiʋ̈lomɛn Zedhemi ˗ya ˗to ˈˈdhiʋ̈ ˈö˗ pö ꞊dhɛ Mɛdömɛn ˗nu waa Pɛsömɛn ˗nu ˗wo ˗dho Babidhɔnö ˗dhɛ ˈkun, ˈö ˈwo ˗an ˗bha «ˈˈyitagɔ ˗nu ˈwo ˗an ˗pë ˗kë papidhisö ˈka» ˗an ˗gʋ̈, kë ˈˈdhʋ̈ kö ˈwa ˗dho ꞊duëë˗.—Is. 18:1, 2; Jér. 51:32.
Biblö ˈö bhë ˗Zlan ˗Wo ˗mü. Biblö draanmɛn ˗nu ˗kun ˗a ˈˈpiʋ̈ kö pë ˈbha ˈö˗ ˗zɔn ꞊dhɛ ˗wo ˈˈyitagɔ ˗pë ˗kë papidhisö ˈka ꞊kwɛŋzü, pë zii mɛɛnˈˈ ˗mɛn ˗nu ˗wa yö. (2 Tim. 3:16) ˈMën ˈwo˗ yö? ˗Wa ˗yö ꞊taabha ꞊dhɛ ˈˈyitagɔ ˗nu ˈwo ˗an ˗pë ˗kë papidhisö ˈka, ˗wo ˗kun Ezitö ꞊kwɛŋzü.
˗WO ˈˈYITAGƆ ˗YÖ ˗KË PAPIDHISÖ ˈKA ˗KƆ ˗KË ꞊DHƐ?
˗Kɔ ˈö mɛn ˗nu ˗wo papidhisö sü ˈwo ˈˈyitagɔ ˗yö ˗kë ˗a ˈka, ˗wa ˈˈbin ˗sü blɔɔntadhɛ ˈbha ˗nu ˈgü Ezitö ˗sɛ ˈgü. ꞊Waa˗ ˈˈdhü ˗nu ˈˈkan, ˈwo ˗an ˗da ˈko ˈˈpiʋ̈ ˈwo˗ ˗be ˗kë. Papidhisö ˗dhü ˗nu ˗mën ˈkoo ˗dhɛ ˗së. ˗A ˗wɔn ˈgü ꞊waa ˗an ˗klu ˈkwëë˗, ˗a ˗be ˗kë ˈˈgbɩkɩgbɩkɩ. Ezitömɛn ˗nu ˗bha ˗kwɛzlan ˈsëëdhɛ ˗be do ˗ya ˗pö ꞊dhɛ ˈˈyitagɔ ˈwo˗ ˗yö ˗kë papidhisö ˈka, ˗a duaan ꞊mɔɔn˗ ˗bha ˈö yö mɛnŋtrö 17 ˗bha, ˗a ˗blü ˗a ˈka ˗pë 10 ɛɛnˈˈ 12 ꞊mɔɔn˗ ˗bha ˈwo ˗kë ˗a ˈˈpian do ˈˈpiʋ̈.
Ezitömɛn ˗nu ˈwo kun ˈˈyitagɔ ˗pë ˗kë ˗ni ˈgü Papidhisö ˈka ꞊kwɛŋzü, ˗an ˈˈbin ˈwo˗ sü ˈkɔ ˈˈbhaŋ ˗bha.
ˈMËN ˗KË ˈWO ˈˈYITAGƆ ˗PË ˗KË PAPIDHISÖ ˈKA?
Ezitö ˗sɛ ˈgü, papidhisö ˗dhü ˗kun bhɔ ˗ni ˈgü ˈˈyiga ˈwo˗ Nilö ˗kë bhë, ˗a ˈsaan˗ ˈgü. ˗Ya ˈgo mü, ˈˈyitagɔ ˗yö ˗kë ˗a ˈka ˗sü ˈyaa ˈˈgbɩɩ˗. ˗A ˗de ˗ʒiaan, ˈdhɛ mɛn ˗nu ˗wo ˗ya ˈˈyitagɔ ˈˈgblʋ̈ʋ̈gblʋ̈ ˗nu ˗yökësü ˗bha ˈˈdhü ˈka, kö piʋ̈damɛn ˗nu waa ˈˈblükëmɛn ˗nu ˗wo ꞊kun yö kë ˗ni ˈgü ˈˈyitagɔ ˈwo ˗pë ˗kë papidhisö ˈka bhë, ˗a ˈka ˗kplawo.
ˈˈYitagɔ ˈwo˗ ˗yö ˗kë papidhisö ˈka bhë, mɛn ˗nu ˗wo yö ˗kë ˗a ˈka pinŋpinŋdhö. Glɛkömi do ˈwo˗ ˗dhɛ Plutaakö ˈö kun Yesu ˗bha bɔmɛn ˗nu ˗bha ˈˈtʋ̈ŋ ˈgü, ˗ya ˗pö ꞊dhɛ ˈˈyitagɔ ˈwo ˗pë ˗kë papidhisö ˈka, ˗yö ˗kun mɛn ˈbha ˗nu ˗gɔ ˈˈtʋ̈ŋ bhë ˗a ˈka.
^ -Wo -bhüöö kpö 3 Papidhisö ˈö bhë, sɛɛˈˈ ˈˈdhü suu ˈö bhɔ ˈbaadhɛ ɛɛnˈˈ ˈˈyiga ˈsɛɛn˗ ˗nu ˈˈpiʋ̈, yö ˗mü. ˗A ˗gɔ ˗ta ꞊mɔɔn˗ ˗bha ˈö yö mɛnŋtrö 5 ˗bha, ˈö˗ ˗dhüga ˗kë ꞊dhɛ kwa klɔɔnˈˈ gɔn ˈdhö.
