1. ˈKwa ˗dhɛ ˗ga Matiö 24:9 ˈgü, ˈmën ˗kë ˈö kwa ˗san ˗bha mɛn ˗nu kë ˗sü ˈwɔn ˈyaa kwa ˈkun?

ZOOVA ˗yö kwa ˗da kö ˗dhɔ ˗yö kë kwaa mɛn ˈˈwɛɛ ˗nu kwa ꞊zinŋgü. ˗A ˗wɔn ˈgü, kwa ˗san ˗ya mɛn ˗nu kë, kwa ˗kë kwa ˗de ˈgü ˈya˗, ˈö ˈˈsuʋ̈ kwa ˗kë. Kwa ꞊dhegblü do ˈwo˗ ˗dhɛ Ʒɔɔʒina * ˈö Edhɔpö ˗ya ˗pö: «Kö n ˗kwɛ ꞊kun 14, n ˗san ˗yö n dhö ˗kë n ˗bha Zoova ˗dhɔkësü ˗wɔn ˈgü. A ˗kë n ˗de ˈgü ˗wëësü, ˈa˗ pö ꞊dhɛ mɛn ˗tiaandhö ˈyaa ˗mü n ˈka.» Kwa ꞊dhegblü do ˈwo˗ ˗dhɛ Danilo ˗ya ˗pö: «ˈDhɛ ˈˈsɔdha ˗nu ˗wo n ˗man, ˈwo ˈsi bho n ˗gɔ, ˈö ˈwo ˈˈsuʋ̈ ˗da n ˈgü n ˗bha ˗kë Zoova ˗bha ꞊Gbɛkiö ˈka ˗sü ˗wɔn ˈgü, ˗yö n zuʋ̈ˈˈ ˗kaan ˈˈkwöö, ˈö ꞊bhlëë bho n ˗bha.» Kwa ˗san ˗ya mɛn ˗nu kë, ˗yö ˗mën kwa ˈka, ˈˈkɛɛ ˗a ˈwɔn ˈyaa kwa ˈkun. Yesu ˗ya ˗to ˈˈdhiʋ̈ ˈö˗ pö kwa ˗san ˗dho mɛn ˗nu kë.​—Matiö 24:9 ˗wo pö.

2-3. ˈMën ˗kë ˈö kwa ˗san ˗yö mɛn ˗nu ˗kë?

² Yesu ˗bha gwëëˈˈ ˗nu ˗san ˈˈkpɔnŋtaamɛn ˗nu ˗kë. ˈMën ˗kë? ˈYö ˗tɔ ꞊dhɛ ˈkwaa «ˈkpongtaamɛ ˗nu ˈka gbɔ», ꞊dhɛ Yesu ˈdhö. (Zan 15:17-19, NTBL) ˈKö ˗kë ꞊dhɛ kwa ˈˈsɛgɔdhiʋ̈mɛn ˗nu ꞊bhlëë ˗ya, ˈkwaa ˗an gba, ɛɛnˈˈ ˈkwaa ˗an ˗bha pë ˈˈbin ˗nu gba. Zoova yöö dosɛnŋ ˈnën ˈkwa˗ ˗dhɔkë. ˈKö ˗kë ꞊dhɛ Sɔtraan waa ö ‹suugünën› ˗nu ˈwaa ˈˈwɩ Zoova ˗bha mɛnkɔɔnsü ˗bha, kwa ˗zë kwa ˗we ˗a ˗bha. (ˈWun. 3:1-5, 15) Kwa˗ ˗zɔn ꞊dhɛ ˗Zlan ˗bha ˗Gblüdëdhɛ dosɛnŋ ˈnën dho kwa ˗bha ˈwɔn ˈˈgbɩɩ˗ ˗nu ˈˈɲanbhɔ, ˈö˗ ˈˈtʋ̈ŋ ˈyaa ꞊gblɛɛn ˈzü kö mɛn ˈˈpɛpɛ ˈwo ˗gban ˗a ˗gɔ, ˗yö ˗an ˈgü shiʋ̈ˈˈ. (Dan. 2:44; ˗Dhɛ. 19:19-21) ˗Dekëtɩtɩmɛn ˗nu ˗bha nɔɔn˗ ˗së ˗mü, ˈˈkɛɛ ˈyaa ˗së ˈwɔnyaakëmɛn ˗nu ˗bha ˈka.​—Ps. 37:10, 11.

 ³ ˈPë ˗kë ˈö kwa ˗san ˗yö mɛn ˗nu ˗kë ˈzü, ˈyö ˗tɔ kwa ˗Zlan ˗bha ˈtɔŋ˗ ˗nu ˗ya ꞊bhlëë ˈgü. ˈTɔŋ˗ ˗nu ˈwo ˈˈdhʋ̈, ˗wo ˈgo ˗sü ˈka ˈˈkpɔnŋtaamɛn ˗nu ˗bha ˈˈpiʋ̈. ˗A ˈwɔnzuan ˈnën ˗tɔ ꞊dhɛ ˈˈɲangüyaa ˗ɲënŋsü, ˈö˗ ˗wɔn ˈgü ˗Zlan ˗yö Sodɔmö waa Gomɔɔ ˗dhɛ ˗an ˈgü ꞊shiʋ̈ ˈkpa bhë, mɛn ˗nu ˈwaa˗ ˈsü pë yaa ˈka ꞊dɛɛ. (Zud. 7) ˈDhɛ ˗kë ꞊dhɛ Biblö ˗bha ˈö˗ pö kwa˗ ˗ya ꞊bhlëë ˈgü, mɛn ꞊vadhɛ ꞊wɛɛ ˗dɔ kwa ˗bha, ˈö ˈwo kwa sü suuyaamɛn ˗nu ˈka.​—1 Piɛ. 4:3, 4.

4. Kwa ˗san ˗ya mɛn ˗nu kë, ˈˈklʋʋsë ˗nu ˗mɛɛn ˈwo ˗dho kwa ˗takun?

⁴ ˈMën dho ˗a kë kö kwa ˗san ˗ya mɛn ˗nu kë, ˗wa ˈsi bho kwa ˗gɔ, ˈkwa˗ ˈkun kwa ˗bha? Kwa dua ˗mü ˈkwa kwa ˗zo yö ꞊dhɛ Zoova ˗dho kwa ˗takun. ꞊Dhɛ ˈˈsɔdha ˗nu ˗bha dhɛga ˈdhö, ˗zoyödhe ˗dho kwa ˗takun ‹kö Sɔtraan ˗bha ꞊saaga ˗nu ˈö pɛng ˈdhö˗ ˈˈdhiʋ̈ ˈö dho˗ ˗zuö kwa ˗bha bha, ˗wo ˈto yö ꞊në˗ ˗bha.› (Efɛ. 6:16) ˈˈKɛɛ ˗ya ˈˈkan ˗zoyödhe ˗bha, kwa ˗bhawɔn ˗yö ˗dhɔ ˗bha ˈpö. ˈMën ˗kë? ˈYö ˗tɔ ꞊dhɛ ˗dhɔ ˗ya kë mɛn ˈgü, ‹ˈwɔn ˈyaa ˗siö ˗dhɛ mɛ kwi ˗bha.› ˗Yö ˈwɔn ˈˈdhiʋ̈˗ ˈˈpɛpɛ ˗kun ö ˗bha zuʋ̈saadhɛ ˈka. (1 Ko. 13:4-7, 13) ˗Kɔ ˈö Zoova, kwa ꞊dhegblü ˗nu, waa kwa ˈyɔɔ˗ ˗nu, ˗an ˗dhɔ dho kwa ˗takun ˗a ˈka kö ˗wa kwa ˗san kë ˈkwa˗ ˈkun kwa ˗bha, ˗kwaa ˗ga.

5. Yesu Dë ˗dhɔ ˈö kun ˗a ˈgü bhë, ˗yö ꞊faan ˗nu ˗a ˗dhɛ ˗kɔ ˗kë ꞊dhɛ?

⁵ Gbeŋ ˗kaanta ˈö Yesu ˗ya ˗kë kö ˗yö ꞊kun ga bhë ˗a ˈgü, ˗ya ˗pö ö ˗bha gwëëˈˈ ˗nu ˗dhɛ: «N Dë ˗dhɔ ˗yö n ˗kë, [˗a ˗wɔn ˈgü] ˈpë ˈö˗ pö n ˗dhɛ ꞊në ˈa˗ ˗kë.» (Zan 14:31) ˈDhɛ ˗kë ꞊dhɛ Zoova ˗dhɔ Yesu ˗kë, ˈwɔn ˈˈgbɩɩ˗ ˗nu ˈwo nu ˗a ˗ta, ˗yö ˗bɔ ˗an ˈgü. Kwa ˗de ˈpö Zoova ˗dhɔ ˗ya kwa kë, kwa ˗dho ꞊mɔɔn˗ ˗bha ˈkwa˗ ˗kë ˈˈdhʋ̈.

6. Kwa ˗san ˗ya ˈˈkpɔnŋtaamɛn ˗nu kë, Wlɔmö 5:3-5 ˗ya ˗pö ˈkwa˗ ˈsü ˗kɔ ˗kë ꞊dhɛ?

⁶ Zoova ˗dhɔ ˗ya ˗dhɔkëmɛn ˗nu ˗takun ˗kplawo, ˈwo bɔ ˈˈklʋʋbhɔdhe ˗nu ˈgü. ˗A ˈwɔnzuan ˈnën ˗tɔ, ˈdhɛ Zuifö ˗nu ˗bha zakanmɛn ˈkpii˗ ˗nu ˗wa pö bɔmɛn ˗nu ˗dhɛ ˈwa ˗dho ˗zlanwopö, ˗Zlan ˗dhɔ ˗yö ˗an ˗blü, ˈyö ˈwo˗ pö: ‹˗A ˗dhɛa ˗bha ˈyi ˗Zlan ꞊bhlëë ˗ya kö ˗yö ziö˗ mɛ ˈˈbhɩɩ˗ ˗zë ˗ta!› (Këw. 5:29; 1 Zn. 5:3) ˗Dhɔ suu ˈö ˈˈdhʋ̈ bhë, ˗yö ꞊faan ˗nu ˈpö kwa ꞊dhegblü ˗nu ˗dhɛ ꞊dɛɛ, ˈyö ˈwɔn yaa ˗nu ˈö ˈˈsɛgɔdhiʋ̈mɛn ˗nu ˈdhö ˗an kë ˗ni ˗an ˈka bhë, ˈwo ˗an bun. Kwa ˗san ˗ya ˈˈkpɔnŋtaamɛn ˗nu kë, kwa ˈgü ˈya ˗dho ga. Kwa zuʋ̈ˈˈ ꞊nii ˗yö ˗da ꞊ʒiaan kö ˈkwa˗ ˈsü ꞊bhlëëwɔn ˈka.​—Këw. 5:41; Wlɔmö 5:3-5 ˗wo pö.

7. Kwa ˗bha ˈkɔdhigümɛn ˗nu ˗wa ˗gban kwa ˗gɔ, ˈmën ˈkwa ˗dho ˗a kë?

⁷ Kwa ˗de ˗bha ˈkɔdhigümɛn ˗nu ˗bha ˗gban kwa ˗gɔ ˗sü ˗yö ˈwɔn ˈˈgbɩɩ˗ ꞊dede do ˈbha ˈka. Gagade ˗nu ˈwo ˗gban Zoova ˗bha ˈkwa ˗ya ˗an draanˈˈ ˗sü ˗bha, ˗yö ꞊mɔɔn˗ ˗bha ˈö ˗kë kwa ˗bha mɛn ˈbha ˗nu ˈgü ꞊dhɛ ˈkwa ʒiaan yaa ˈsü, ɛɛnˈˈ slaaˈˈ ˗ya ˗da kwa ˈgü. (Mak. 3:21) ˗Wo ꞊mɔɔn˗ ˗bha ˈwo kwa ˗man, ɛɛnˈˈ ˈwo ˗wɩ kwa ˗dhɛ. ꞊Ya kë ˈˈdhʋ̈, ˗a ˈwɔn ˈya ˗dho kwa ˈkun. Yesu ˗ya ˗pö: «ˈKɔ do ˈgü ˗mɛ ˗nu ˗dho ˗siö wo ˈko ˗dhɛ n ˗wɔn ˈgü.» (Mat. 10:36) ˈKö ˈwo pë ˈˈoo ˗pë ˗kë kwa ˈka, ˈkwaa ˗an ˈsü ꞊dhɛ kwa ˈyɔɔ˗ ˗nu ˈdhö. Kwa ˗bha Zoova ˗dhɔ ˗yö ˗da ˗ni ˈgü ˈˈdhiʋ̈, kö mɛn ˈˈwɛɛ ˗nu ˗dhɔ ˈö kwa ˈgü ˗yö ˗da ˗ni ˈˈdhiʋ̈ ˈpö. (Mat. 22:37-39) ˈˈKɛɛ ˈkwa ˗dho ˗Zlan ˗bha ˈtɔŋ˗ ˗nu ˗lögü toŋtoŋdhö kwa ˗de ˈˈɲaan, kë ˈˈdhʋ̈ kö ˈkwa kë mɛnbhɩɩdhe ˗nu ˗dhɛ ˗së.

8-9. ˈDhɛ ˈwo ˗gban Ʒɔɔʒina ˗gɔ, ˗mën ˈö˗ ˗takun ˈyö bɔ ˗a ˈgü?

⁸ Ʒɔɔʒina ˈö ˈkwa˗ ˗wɔn ꞊blɛɛ ꞊klöö yö, ˗a dhö ˗yö pë ˈˈpɛpɛ ˗kë, ˈˈkɛɛ ˗yö ˗to ö ˗wo ˗ta.  ˗Ya ˗pö: «Yaa n dhö yi ˗ya Biblö draansü ˗bha Zoova ˗bha ꞊Gbɛkiö ˗nu ˈˈpiʋ̈ yi ˈˈkwöö. ˈˈKɛɛ ˈdhɛ ˈˈsu ˈˈsɔɔdo ˗ʒiö, ˈa˗ pö ˈa ˈdho ˗bhɔkwëë ˗nu ˗ta, ˈyö n dhö ˗ya ˗gban n ˗gɔ ˗sü ˗bha. A˗ ˗yö ꞊dhɛ ꞊taa ˗yö ˗Zlan ˗bha ˗mɛn ˈbha ˗nu ˈnën ˈwo ꞊sua ˗da ˗a ˗gɔ ˈgü, ˈyö ˗gban ˗a ˗ta ˈö ˈwɔn ꞊blɛɛ n ˈka. ˗Yö ˈsi ˗bho n ˗gɔ, ˈö n ˗bha wundhɛ ˗nu ˗gan, ˈö n kun n bhɔɛɛˈˈ, ˈö n ˗bha ˈsëëdhɛ ˗nu ˗pɛn. ˈDhɛ n ˗kwɛ ˗kë 15 ˈya bɔ ˈˈyi ꞊bhaa. N dhö ˗yö ˗dho n ˈka wlüünën ˗nu dɔɔˈˈ ˗dhɛ ˈbha ˈgü, ˈö yaa ˈnëndhiëŋ ˈbha ˗nu ˈwo ˗kë ˈtaakpɛɛmümɛn ˗nu, mɛnzëmɛn ˗nu ˈka, ˈyi ˗kë ˈkɔ do ˈgü, kë ˈˈdhʋ̈ kö ˈa ˈˈkan Zoova gba ˗sü ˗bha. Mɛn ˈbha ˈö˗ dua ˈdhö ˗mü ˗be kö kwa ˗dhɔ ˗ya kë, kö ˗yö ö ˗zokë kwa ˈˈpiʋ̈, ˗ya kë ˗gban kwa ˗gɔ ˗mɛn ˈka, ˗a bun ˗sü ˗kë ˈˈgbɩɩ˗ ꞊dedewo.»

⁹ ˈMën Ʒɔɔʒina ˗takun? ˗Ya ˗pö: «˗Dhɛkpaɔyi ˈö n dhö ˗yö ˗gban n ˗gɔ ˗sü züdɔ ˗a ˈka, kö ˈman ˈgo Biblö ˗be ˗todhʋ̈sü ˗wo pö ˗dɛɛ ˈgü. ˗Yö ˗kun ga ˗sü ˈka n ˈgü ˈkpakpadhö ꞊dhɛ ˈman gagade ꞊slɔɔ, ˈö ˈa Zoova ˈˈsuee ꞊dedewo. ˈMan bhɛɛˈˈ ˗a ˗dhɛ ꞊shiöŋ, ˗ya ˗daa ˗kë. ˈDhɛ ˈa kun wlüünën ˗nu dɔɔˈˈ ˗dhɛ bhë ˗a ˈgü, kwa ꞊dhegblüdhe do n ˗dhɛ ö ˗gɔ ˈkɔɔ, ˈö yaa˗ ˗nu ˈyi Biblö ꞊draan yi ˈkwëë˗. ˗A ˈˈtʋ̈ŋ bhë˗ ˈgü ˈman ˈdho ˗bhɔkwëë ˗ta, kwa ꞊dhegblü ˗nu n ꞊faanmën, ˈö ˈwo n sü ꞊dhɛ wo ˗bha ˈkɔdhigümɛn ˈdhö. A˗ ˗yö ˈˈpuu ˈka ꞊dhɛ, ˈkö mɛn ˈˈoo ˗mɛn dho ˗gban kwa ˗gɔ, ˈyaa ˈˈgbɩɩ˗ ˈyaa ʒiö˗ ˈka Zoova ˗ta.»

10. ˗Mën ˈö dho ga kwa ˈgü ꞊dhɛ kwa ˗bha ˗Zlan Zoova ˗dho ˗a kë?

¹⁰ Bɔmɛn Pɔdhö ˗ya ˗pö pë ˈbha ‹˗kɔ ˈyii ˈdho ꞊mɔɔ˗ ˗bha kö ˗yö kwa ˈˈkan ˗dhɔ ˈö ˗Zlan ˗ya ˗kë kwa ˈka kwa Dëmɛ Yesu Klisi ˈsaa˗ ˈgü bha˗ ˗bha.› (Wlɔ. 8:38, 39) ˈKö ˈkwa dho saanˈˈ ˈsü ˈˈtʋ̈ŋ ˈbha ˗nu ˈka, Zoova ˗dho kë kwa ˈˈpiʋ̈ ˗kplawo kö ˗yö kwa ˗zo ˗gban, ˗yö ꞊faan nu kwa ˗dhɛ. ꞊Dhɛ ˗kɔ ˈö Ʒɔɔʒina ˗bha ˈwɔnzuan ˗ya ˗zɔn ˗a ˈka bhë ˗a ˈdhö, Zoova ˗bɔ ˈpö kwa ꞊dhegblü ˗nu ˗ta ˈö kwa ˗takun.

11. ˗Dhɔ suu ˈö Yesu ˗ya ˗wɔn ꞊blɛɛ Zan 15:12, 13 ˈgü bhë, ˗ya ˗bha gwëëˈˈ ˗nu ˗takun ˗kɔ ˗kë ꞊dhɛ? ˗A ˈwɔnzuan ˗zɔn.

¹¹ Yesu ˗bha gbeŋ ˗yi ˗kaanta ˈgü, ˗yö ö ˗bha gwëëˈˈ ˗nu ˗zo ˗bö ꞊dhɛ ˗wo ˗dhɔ kë wo ˈko ˗nu ˈka. (Zan 15:12, 13 ˗wo pö.) ˗Yö ˗kun ˗a ˈˈɲaan ꞊dhɛ ˗dhɔ ꞊dede ˗dho ˗an ˗takun kö ˗an ˗kɔ ˈto ˈwɔn do ˗bha, kö mɛn ˗nu ꞊waa˗ ˗an ˗san kë, ˗wo bɔ ˗a ˈgü. ˗Zlanwokɔdhi ˈö kun Tesadhonikö ˗kwaa ˗bha ˈwɔnzuan ˗ga. ˈDhɛ ˈwo˗ ˗ya ˗a ˗dhɛ ˈti ꞊gwëë, ˈyö ˗a ˈgümɛn ˗nu ˗ya bɔ ˗sü ˗bha ˈˈklʋʋbhɔdhe ˈgü. ˈˈKɛɛ ˗wo ˗kë ˗klu ˗Zlan ˗bha ˗sü waa ˗dhɔ, ˗a  ˈwɔnzuan ˗së ˈka. (1 Tes. 1:3, 6, 7) Pɔdhö ˗an ꞊faanmën kö ˗wo ˗dhɔ kë wo ˈko ˗nu ˈka ˗kplawo, ˗yö «ziö ˗a ˗blɛɛzë ˗ta.» (1 Tes. 4:9, 10, NTBL) ˗Dhɔ dua ˗mü kö ˗yö ˗an ˗blü mɛn ˗nu ˈö ˗wa kë ˈˈtëëtë ˗an ˗zo ˗gban ˗sü ˗bha, kö ˈmɛn ˈˈsɩ ˈyaa˗ ˗dhɛ, ˗wa ˗takun. (1 Tes. 5:14) ˗Wo ˗to Pɔdhö ˗bha ˗dhioo ˗nu ˈˈpiʋ̈, ˈyö ˗tɔ ꞊dhɛ ˈsëëdhɛ ꞊plɛ ˗bha ˗naan ˈö˗ bɔ kö ˗kwɛ do ˗ya ʒiö bhë ˗a ˈgü, ˗ya ˗pö ˗an ˗dhɛ: ‹Ka ˗bha ˗dhɔ ˈbha ꞊në ˗da sië˗ ˗ta do ˈö dho˗ ˈka.› (2 Tes. 1:3-5) ˗Dhɔ ˗an ˗takun, ˈyö ˈwo bɔ ˈwɔn ˈˈgbɩɩ˗ waa ˈˈklʋʋbhɔdhe ˗nu ˈgü.

12. ˈDhɛ ˗gblü ˗yö ˗da ˈˈsɛ do ˈbha ˈgü, kwa ꞊dhegblü ˗nu ˗dhɔ ˗zɔn wo ˈko ˗nu ˗dhɛ ˗kɔ ˗kë ꞊dhɛ?

¹² Pë ˈö ˗kë Danilo waa ö ˗bha dhebɔ ˗an ˈka, kwaa ˗ga. ˈDhɛ ˗gblü ˗yö ˗da ˗an ˗bha ˈˈsɛ ˈgü, ˗wo pë ˈˈpɛpɛ ˗kë ˈwo dho ˗bhɔkwëë ˗nu ˗ta, ˈwo ˗zlanwopö. ˗Bhöpë ˗nu ˈwo ˗kë ˗an ˗gɔ, ˗wo ˗an ˗gblü wo ꞊dhegblü ˗nu ˈka ˈpö. ˈˈKɛɛ yi do ˈka, ˈˈsɔdha ˗nu ˈö bu ˈdhö ˗an ˗gɔ ˗wo ˗nu ˗an ˗gɔ ˈˈkwɛnŋdhö. ˗Ya ˗pö: «˗Wa ˗pö n ˗dhɛ ˈa˗ pö ˈmaan Zoova ˗bha ꞊Gbɛkiö ˈka ˈzüdho. ˈDhɛ n ˈti ˈˈwɩ ˗a ˗bha, ˗wo n ˗man, ˈö ˈwo bu ˗da n ˗gɔ ˗ta ˈˈdhuŋ. ˈˈSanni ˗wo ʒiö, ˗wa ˗pö n ˗dhɛ ˈwa wo ꞊yɛɛ˗ kë ˈwa nu, wo ˗dho wɔ n ˗bha dhebɔ ˈka. ˈˈKɛɛ kwa dhegblü ˗nu yi ˗da ꞊trɛŋ do ˈgü ˈzozodhö, ˈyö ˈyi dho ˈˈkwipö ˈˈwɛɛ ˈgü. ˗Dhɔ suu ˈö bhë, n ˗zo ˈti ˗dho bhɔ ˗a ˈka toŋtoŋdhö. ˗Dhɛ ˈyi ˗lo ˈˈkwipö ˈö bhë ˗a ˈgü, kwa ꞊dhegblü ˗nu ˈwo ˈmü ˗wo yi ˗gba ˗bhöpë ˈka, ˈö ˈwo n ˗takun ˈa yö waa ˈkɔ ꞊slɔɔ. ˗Ya ˗kë ˈyö ˈdhɛ kwa ꞊dhegblü ˈbha ˗nu ˗wo ꞊duëë ˗gblü ˗dhɛ ˈwo nu ˈˈkwipö bhë ˗a ˈgü, ˈa n ˗kɔ kpɔ ˗an ˗dhɛŋ ˗gɔ.» ˈWɔn ˗nu ˈwo bhë ˗wa ˗zɔn ꞊dhɛ ˗dhɔ ˈö kwa ꞊zinŋgü ˗yö ˗dho kwa ˗takun kö mɛn ˗nu ˗wa kwa ˗san kë, ˈkwa bɔ ˗a ˈgü.

13. ˗Zuu ˈˈslʋ̈ʋ̈slʋ̈ kwa ˗takun ˗kɔ ˗kë ꞊dhɛ kö kwa ˗san ˗ya mɛn ˗nu kë, ˈkwa˗ ˈkun kwa ˗bha?

¹³ Yesu ˗ya ˗pö ö ˗bha gwëëˈˈ ˗nu ˗dhɛ ˗an ˈyɔɔ˗ ˗nu ˗dhɔ ˗yö ˗an kë. (Mat. 5:44, 45) ˗A kë ˗sü ˈyaa ˈˈplëëplë. ˈˈKɛɛ ˗Zlan ˗bha ˗zuu ˈˈslʋ̈ʋ̈slʋ̈ ˈsaa˗ ˈgü, kwa ꞊mɔɔn˗ ˗bha. ˗Zuu ˈˈslʋ̈ʋ̈slʋ̈ këyö ˈbha ˗nu ˈtɔ˗ ˗dhɔ, zuʋ̈saadhɛ, ˈˈgblüsë, ˗kë dhɔŋsü ˗sü waa ˗mɔn ö ˗de ꞊sɔŋ ˗bha ˗sü. (Ga. 5:22, 23) ˈˈKlʋʋsë ˗nu ˈwo bhë, ˗wo ˗dho kwa ˗takun kö ˗wa kwa ˗san kë, ˈkwa˗ ˈkun kwa ˗bha. Mɛn ꞊vadhɛ ˗wa wo ꞊kwaa ˗gban kwa ˗gɔ ˗sü ˗zü, ˈyö sü ꞊dhɛ ˗an ꞊gɔɔn, ˗an ˗bha dhebɔ, ˗an ˗bha ˈnën, ɛɛnˈˈ ˗an ˗yayoo ˈö Zoova ˗bha ꞊Gbɛkiö ˈka, ˗ya ˈˈklʋʋsë ˗nu bhë, ˗an ˗zɔn ˗an ˗dhɛ. ˗A mɛn ꞊vadhɛ ˗wa kë ꞊dɛɛ kwa ꞊dhegblü ˗nu ˈka.  ˗Dhɛ ˈö ˈˈdhʋ̈, ꞊ya kë ꞊dhɛ mɛn ˗nu ˈwo kwa ˗san ˗kë Zoova gba ˗sü ˗wɔn ˈgü, ˗dhɔ ˗kë ˗an ˈka ˗sü kwa ˗gɔ ˈˈgbɩɩ˗, ˗kwa ˗zuu ˈˈslʋ̈ʋ̈slʋ̈ ˗dhɛ Zoova ˗gɔ. (Dhu. 11:13) ˗Yö kë kwa ˈˈɲaan ꞊dhɛ ˗to ˗Zlan ˗bha ˗dhioo ˗nu ˈˈpiʋ̈ ˗sü ˗yö ˗së ˗kplawo.—Prov. 3:5-7

14-15. ˈKö ˗kë ꞊dhɛ Yasiminö ꞊gɔɔn ˗yö ˗gban ˗a ˗gɔ, Wlɔmö 12:17-21 ˗bha ˗ya ˗takun ˗kɔ ˗kë ꞊dhɛ, ˈyö ˗dhɔ ˗zɔn ö ꞊gɔɔn ˗dhɛ?

¹⁴ Kwa ꞊dhegblüdhe do ˈwo˗ ˗dhɛ Yasiminö, ˗kwaa ˗bha ˈwɔnzuan ˗ga. ˈDhɛ ˗kë Zoova ˗bha ꞊Gbɛkiö ˈka, ˗yö ˗kë ˗a ꞊gɔɔn ˈgü ꞊dhɛ ˗ya ʒiaan yaa ˈsü, ˈyö˗ ˈˈslö ꞊mɛɛn kö ˈö˗ ˈˈkan ˗Zlan gba ˗sü ˈbha. ˗Yö ˗wɩ ˗a ˗dhɛ, ˈyö yö ö ˗bha ˈkɔdhigümɛn ˈbha ˗nu, ˗zlanwogɔdhiʋ̈mɛn do, waa ˈˈzʋʋmi do ˗bha, kö ˗wo ˈˈsuʋ̈ ˗da ˗a ˈgü, ˗wa pö ˗a ˗dhɛ ˗yö ˈdho˗ wo ˗bha ˈkɔdhi ˈwü. ˗A ꞊gɔɔn ˗dho, ˈö ˈsi bho kwa ꞊dhegblü ˗nu ˗gɔ ˗bhɔkwëë ˗ta. ˈˈTʋ̈ŋ ˈbha ˗nu ˈka, Yasiminö ˗yö ˈˈgbʋ ˗bɔ ˈpë ˈwo kun ˗a kë ˗ni ˗a ˈka bhë, ˗a ˗wɔn ˈgü.

¹⁵ Yasiminö ˗ya nu ˗bhɔkwëë ˗ta, ˗a ꞊dhegblü ˗nu ˗wa ˗zo ˗gban, ˈö ˈwo˗ ꞊faanmën. Mɛn zii ˗nu ˗a ꞊faanmën kö ˗yö Wlɔmö 12:17-21 ˗bha, ˗a ˗ya ꞊bhlëë ˈgü. (˗A ˗wo pö.) Yasiminö ˗ya ˗pö: «˗Yö ˗kun ˈˈgbɩɩ˗, ˈˈkɛɛ a ˗takundhe ˗dhɛ Zoova ˗gɔ, ˈyö pë ˈö Biblö ˗ya pö bhë, ˈa pë ˈˈpɛpɛ ˗kë ˈa˗ ˗ya ꞊bhlëë ˈgü. N ꞊gɔɔn ˗ya ˈˈgblu bho yi ˗bha ꞊gbabukɔ ˈgü ö ˗de ˈˈɲaan, a ˗dho ˈa˗ ˗dhɛ ˗gwö. ˗Ya ˈsi bho n ˗gɔ, ˈmaan˗ ˗daa yaa kë ˗a ˗gɔ. ˈDhɛ ˈˈyua ˗ya kun, a n ˗zo ˗kë ˗a ˈˈpiʋ̈.»

16-17. ˗Gleŋ ˗mɛɛn ˈö Yasiminö ˗bha ˈwɔnzuan ˗ya ˗da kwa ˗bha?

¹⁶ ˗Dhɔ ˈö Yasiminö ˗ya ˗zɔn ö ꞊gɔɔn ˗dhɛ bhë, ˗ya ˈgü ˗wɔn ˗së ˗slɔɔ. ˗Ya ˗pö: «N ꞊gɔɔn ˗yö ˗ya ˈdhaŋ˗ bho ˗sü ˗bha n ˈˈdhiʋ̈ ˈzü ˈgbɛ, ˈyö ˗tɔ ˗ya ˗yö ꞊dhɛ a gagade ˗pö ˗kplawo. ˈWɔn ˈö ˗gban ˗zlanwo ˗bha a˗ blɛɛˈˈ ˗ni ˈgü, ˗yö ö ˈˈtʋ ˗to n ˗bha ˗së ˈka, n ꞊bhlëë ˈgü. ˗Yö ˗wɩ ˗a ˗bha kö ˈkowogümandhe kë yi ꞊zinŋgü. ꞊Dɛɛ, ˗yö n ꞊faanmën ˗dho ˗bhɔkwëë ˗nu ˗ta ˗sü ˗bha. ˈKowogümandhe ꞊dede ˗ya kë yi ꞊zinŋgü, yi ˗bha ˈkɔdhi ˗ya ˈwaannu. Pë ˈa˗ ˈˈpiʋ̈ ˈyö ˗tɔ n ꞊gɔɔn ˗yö ö zuʋ̈ˈˈ ˈˈdhiʋ̈ ˈˈpʋ gagade ˗gɔ, kö ˗yö nu ˈyi Zoova ˗dhɔkë.»

¹⁷ Yasiminö ˗bha ˈwɔnzuan ˗ya ˗zɔn ꞊dhɛ ˗dhɔ ˗yö ‹ˈwɔn ꞊gban ˗mawɔn ˗to, ˈö ö ˗zʋ ˗së gɔn ˈwɔn ꞊gban ˈka, ˈö ˈwɔn ꞊gban kun ö ˗bha.› (1 Ko. 13:4, 7) Kwa ˗san ˈö mɛn ˈgü ˗yö ꞊mɔɔn˗ ˗bha ˈö ˗kë ˈˈgbɩɩ˗, ˈö ˗kë ˈˈdhiʋ̈˗, ˈˈkɛɛ ˗dhɔ ꞊faan ˈˈgbɩɩ˗ ˈö ˗ʒiö ˗a ˈka ˗a ˗ta. ˗Dhɔ ˗yö ˗pa mɛn zuʋ̈ˈˈ ˈka, ˈö ˈkwa˗ ˗zɔn ˗kplawo, Zoova zuʋ̈ˈˈ ꞊nii ˗yö ˗da. ˈKö ˈzü mɛn ˗nu ˈti wo bo kwa ˗san kë ˗sü ˈka, kwa ꞊mɔɔn˗ ˗bha ˈkwa kë zuʋ̈gblüdhi ˈgü. ˗Kɔ ˗kë ꞊dhɛ?

18. ˈMën ˗kë ˈö ˗wa kwa ˗san kë, kwa zuʋ̈ˈˈ ꞊nii dho ˗da?

¹⁸ Yesu ˗ya ˗pö ‹mɛ ˈˈbhɩɩ˗ ˗nu ˗wa ˗ya kwa ˗san ˈka ö ˗wɔn ˈgü, kö kwa ˗bha ˗së.› (Dhu. 6:22) ˈKwaa˗ ˈˈpiʋ̈ ˗wo kwa ˗san kë, ɛɛnˈˈ ˗wo kwa ˈˈklʋʋ bhɔ kwa ˗bha ˗zoyödhe ˗wɔn ˈgü. ˈˈKɛɛ ˈmën ˗kë ˈö ꞊waa˗ kë, kwa zuʋ̈ˈˈ ꞊nii dho ˗da? ˗Kwaa ˗gɛn ˗yaaga ˗ga. ˗A ˗blɛɛsü ˈnën ˗tɔ, ˈkwa bɔ ˈwɔn ˈˈgbɩɩ˗ ˗nu ˈgü, kwa ˈˈdhia ˗yö ˗kë ˗Zlan ˈgü. (1 Piɛ. 4:13, 14) ˗A ꞊plɛ ˗naan ˈtɔ˗, ˗yö kwa ˗bha ˗zoyödhe ˗kë ˈˈgbɩɩ˗. (1 Piɛ. 1:7) ˈYö˗ ˗yaaga ˗naan ˗kë ꞊dhɛ kwa ˗dho ˗tosɛta ˈö ˈyaa ɲën ˗a ꞊slɔɔ.​—Wlɔ. 2:6, 7.

19. ˈDhɛ ˈwo bɔmɛn ˗nu ˗man, ˈmën ˗kë ˈö ˗an zuʋ̈ˈˈ ꞊nii ˗yö ˗da?

¹⁹ ˈDhɛ Yesu go ga ˈgü, ˗a ˗dhɛ ˈti ꞊gwëë ˈyö zuʋ̈gblüdhi ˈö˗ ˗wɔn ꞊blɛɛ bhë, ˗a ˗bha gwëëˈˈ ˗nu ˗ya ˗a ꞊slɔɔ ˗sü ˗bha. ˈDhɛ ˈwo ˗an ˗man, ˈwo˗ pö ˗an ˗dhɛ ˈwa ˗dho ˗zlanwopö, ˗an zuʋ̈ˈˈ ꞊nii ˗to ˗da ˗sü ˈka. ˈMën ˗kë? «˗A ˗gɛn ˗mü ꞊dhɛ ˈyiʋ̈˗ ˗dɔ ˗nu ˗bha ˗sü ˈö Yesu ˈtɔ ˗wɔn ˈgü bha ꞊në˗ ˗nu ꞊bhlëë ˗kë [˗Zlan] wëëdhö.» (Këw. 5:40-42) Yesu ˗dhɔ ˈö kun ˗an ˈgü, ˗yö ˗kë ˈˈgbɩɩ˗, ˈö ˗ʒiö ˗a ˈka ˈˈsuʋ̈ ˈö kun ˗an ˈgü ˗a ˗ta. ˗Dhɔ ˈö ˈˈdhʋ̈ ˗wa ˗zɔn nɔɔn˗ ˗së pö ˗sü ˈka «˗kpɛawo.» Kwa ꞊dhegblü ˗nu ꞊vadhɛ ˈwo ꞊dɛɛ, ˗wo ˗ya ˈwɔn ˈˈgbɩɩ˗ ˗nu ˈgü, ˈwo Zoova ˗dhɔkë ˗kplawo. ˗Yö ˗an ˈˈɲaan ꞊dhɛ yö ˈwo˗ ˗kë, waa ˗dhɔ ˈwo˗ ˗zɔn Zoova ˈtɔ ˗wɔn ˈgü, ˗a ˗zo ˈti ˗dho bhɔ ˗an ˈka.​—Ebl. 6:10.

20. ˈMën ˈkwa dho ˗a yö ˈwɔn ˗gɔ ˈö dɔ ˗a ˈdhɛ ˈyö˗ ˈˈpiʋ̈, ˗a ˈgü?

²⁰ Kwa ˗san ˗dho mɛn ˗nu kë, ˈö to˗ ˈka ˈˈdhʋ̈ ˈö ˈˈkpɔnŋtaadhɛ ˗yö ɲën. (Zan 15:19) ˈˈKɛɛ ˈˈsuʋ̈ ˈya ˗dho kwa kë. Kwa ˗dho ˗a yö ˈwɔn ˗gɔ ˈö dɔ ˗a ˈdhɛ yö˗ ˈˈpiʋ̈ ˗a ˈgü ꞊dhɛ, ˈmɛn ˗ya ˈto ˗klu ˗sü ˈka Zoova ˗bha, ‹˗yö ˗dho ˗a gba ꞊faan ˈka, ˈö˗ dha.› (2 Tes. 3:3) ˗Dhɛ ˈö ˈˈdhʋ̈, Zoova, kwa ꞊dhegblü ˗nu, waa kwa ˈyɔɔ˗ ˗nu, ˗an ˗dhɔ ˗yö kwa kë ˗kplawo. ˈKwa ˈto ˗dhioo ˈö bhë ˗a ˈˈpiʋ̈, kwa ˗kɔ ˗dho kë ˈwɔn do ˗bha, ˈö kwa ˗bha ˗zoyödhe ˗kë ˈˈgbɩɩ˗. Kwa ˗dho Zoova ˈtɔ bhɔ, ˈö ˈkwa˗ ˗zɔn ꞊dhɛ ˗dhɔ ꞊faan ˗yö ˈˈgbɩɩ˗ ˈö ˗ʒiö ˗a ˈka mɛn ˗san kë ˗sü ˗ta.