1. ˈMën ˗kë ˈö Yesu ˗ya pö Zoova ˗dhɛ ˗yö ö ˗bha gwëëˈˈ ˗nu ˗maan kë?

YESU ˗bha gbeŋ ˗yi ˗kaanta ˈö˗ ˗kë ˈˈsɛ ˗ta ˗a ˈgü, ˗yö ˗kun ö ˗zota ˗ni ˈgü ˈwɔn ˈgbɩɩ˗ ˗nu ˈö˗ ˗bha gwëëˈˈ ˗nu dho bɔ ˗an ˈgü, ˗a ˗wɔn ˈgü. ˈDhɛ ˗kë ꞊dhɛ ˗a ˈˈtɔŋdë ˗nu bhë ˗an ˗dhɔ ˗ya ˗kë, ˗yö ˗bhɛɛ ö Dë ˗dhɛ ˈö˗ pö ˗yö ˗an ‹˗maa kë mɛ yaa bha˗ ˗gɔ.› (Zan 17:14, 15) ˗Yö ˗kun Yesu ˈˈɲaan ꞊dhɛ ˈya ˈdho dhaŋ˗ ˈgü, Sɔtraan Dügɔmɛn ˗dho ˈko ˗ya mɛn ˈˈpɛpɛ ˈwo˗ ˈˈpiʋ̈ ˈwo Zoova ˗dhɔkë, ˗an ˗bha. ˗Ya ˗zɔn ꞊dhɛ Zoova ˗dhɔkëmɛn ˗nu ˗bhawɔn ˗ya ˗bha ˗takpadhe ˗bha.

2. ˈMën ˗kë ˈö ga kwa ˈgü ꞊dhɛ Zoova ˗dho kwa ˗bha bhɛɛwo ˗nu ˗daa kë?

² Zoova ˗yö Yesu ˗bha bhɛɛwo ˗daa ˗kë, ˈyö sü ꞊dhɛ ˗a ˗dhɔ ˗ya ˗kë. ˈKwa pë ꞊gban ˈˈpɛpɛ kë kö ˈkwa kë Zoova ˗dhɛ ˗së, kwa ˗dhɔ ˗dho ˗a kë ˈpö. ˈKwa ˗takundhe ˗dhɛ ˗a ˗gɔ, ˗yö ˗dho ˗a ˗daa kë, ˈö ö ˗kɔ kpa kwa ˗ta. Zoova ˗dho ö ˗zo kë kwa ˈˈpiʋ̈ ꞊dhɛ ˈnëndë ˈö˗ ˗bha ˈnën ˗nu ˗dhɔ ˗ya ˗kë, ˗a ˈdhö. ˗Yö ˈti˗ kë ˈˈdhʋ̈, kö ˗ya ö ˗de ˈtɔ ˗shiö.

3. ˈMën ˗kë ˈö kwa ˗bhawɔn ˈdhö Zoova ˗bha ˗takundhe ˗bha ꞊dɛɛ?

³ Kwa ˗bhawɔn ˗yö Zoova ˗bha ˗takundhe ˗bha ˈgbɛ ˈˈtʋ̈ŋ ˈö yö ˗a ˈgü ˈö ˗ʒiö ˗a ˈka mü, ˈyö sü ꞊dhɛ ˗wa Sɔtraan kë dhaŋ˗ ˈgü, «bhlɔɔ ꞊yaa˗ pa.» (˗Dhɛ. 12:12) ˗Ya mɛn ˈbha ˗nu ˗blü kö ˗wo kwa ˈˈklʋʋbhɔ, ˈö ˗an ˗bha ˈgü, ˈwo ‹˗Zlan ˗dhɔ ꞊në˗ kë sië bha.› (Zan 16:2) Mɛn ˈbha ˗nu ˈö ˈwaa ˈdhaŋ˗ bho ˗Zlan ˈˈdhiʋ̈, ˗wo kwa ˈˈklʋʋ ˗bhɔ ˈyö sü ꞊dhɛ ˈkwaa kë ꞊dhɛ ˗an ˈdhö. ˈKö ˗kë ˗kɔ ꞊gban ˈgü, ˈˈsuʋ̈ ˈya ˗dho kwa kë. ˈMën ˗kë? ˈYö ˗tɔ ꞊dhɛ ˗Zlan ˗Wo ˗ya ˗pö: ‹Kwa Dëmɛ bha ˈyaa ˗wʋ ꞊plɛ pö, ˗yö ˗dho kwa gba faan ˈka, ˈö kwa dha Sɔtraan ˗gɔ.› (2 Tes. 3:3) Zoova ˗dho kwa dha ˗kɔ ˗kë ꞊dhɛ? ˗Kwaa ꞊plɛ ˗ga.

4. ˈKwa ˗dhɛ ˗ga Efɛzö 6:13-17 ˈgü, kwa ˗takpa ˗pë ˗nu ˗mɛɛn ˈö Zoova ˗an nu kwa ˗dhɛ?

⁴ Zoova ˗yö ˗gblü ˗gɔn ˗a ˈka ˗kwɛɛ ꞊gban ˈwo dho kwa ˗takpa Sɔtraan ˗gɔ, ˗an ˗nu kwa ˗dhɛ. (Efɛzö 6:13-17 ˗wo pö.) ˗Kwɛɛ ˗nu bhë ˗an ꞊faan ˗yö ˈˈgbɩɩ˗, ˈö ˈwo yökë ˗së ˈka. ˈˈKɛɛ ˈkwa˗ pö ˗wo kwa dha, kwa dua ˗mü ˈkwa ˗an ꞊gban ˈˈpɛpɛ ˗ya kwa ˗bha, kö ˗wo ˈto kwa ˗bha ˗kplawo. ˗Kwɛɛ ˗nu ˈwo ˈˈdhʋ̈, ˈyö ˈwo ˗tɔ ˗mën? ˗Kwa ˗an ˈsü do do kö ˈkwa ˗an ˗wɔn blɛɛˈˈ.

5. Kwa ˗bha kwi ˈˈpɛn ˈnën ˗tɔ ˗mën? ˈYö ˈmën ˗kë ˈö ˈkwa dho ˗a ˗da?

⁵ Kwi ˈˈpɛn ˈö ˈˈsɔdha ˗nu ˗wa dɔ sɔ ˗ta bhë, kwa ˗bha ˈnën ˗tɔ gagade ˗nu ˈwo Biblö ˈgü. ˈMën ˗kë ˈkwa dho ˗a ˗da? ˈYö ˗tɔ ꞊dhɛ Sɔtraan ˗yö «꞊sua dë ˈka.» (Zan 8:44, NWT) ˈÖ ˗ya ꞊sua kë ˗sü ˗bha, ˗a ˗kwɛ ˈˈgblü ꞊va ˈnën yö. ˗Ya ˈˈkpënŋ˗ kë ‹ˈˈkpʋngtaadhɛ ˗todhʋ̈sü ˗gɔ.› (˗Dhɛ. 12:9) ˈˈKɛɛ gagade ˗nu ˈwo Biblö ˈgü, ˗wo kwa ˗gɔ ˗bho ˗a ˗bha ˈˈkpënŋ˗ ˗nu ˗gɔ. Kwi ˈˈpɛn ˈö bhë, kwa ˗dho ˗a dɔ kwa ˗bha sɔ ˗ta ˗kɔ ˗kë ꞊dhɛ? ˗Kwa gagade ˗nu ˈwo ˗gban Zoova ˗bha ˗an draanˈˈ, ˈkwa˗ gba «˗zuu ˈslööslö waa˗ ˈwun giagia ˗an ˈgü.» ˗Kwa kë ˈpö kpɛnŋdhö ˈwɔn ˈˈpɛpɛ ˈkwa˗ ˗kë, ˗a ˈgü.​—Zan 4:24, NTBL; Efɛ. 4:25; Ebl. 13:18.

6. Kwa ˗bha ˗piö ˈˈbhɛɛ ˈnën ˗tɔ ˗mën? ˈYö ˈmën ˗kë ˈö ˈkwa dho ˗a ˗da?

⁶ ˗Piö ˈˈbhɛɛ. Kwa ˗bha ˗piö ˈˈbhɛɛ ˈnën ˗tɔ Zoova ˗bha ˈtɔŋ˗ kpɛnŋdhö ˗nu. ˈMën ˗kë ˈö kwa dua ˈdhö ˗mü ˈkwa˗ ˗da kwa ˗bha? ˗Piö ˈˈbhɛɛ ˈö kë ˗ni ˈˈsɔdha ˗bha bhë, ˗ya zuʋ̈ga ˗takpa ˈyö ˗a ˈyɔɔ˗ ˗bha ˗piö ˈyaa yö ˗a ˗bha. ˗Kɔ do bhë ˗a ˈgü, kwa ˗bha ˗piö ˈˈbhɛɛ ˈö ˗kë Zoova ˗bha ˈtɔŋ˗ kpɛnŋdhö ˗nu ˈka bhë, ˗wa ˗kë ˈö ˈwɔn yaa ˗nu ˈwo ˈˈkpɔnŋ ꞊taa ꞊dɛɛ ˈwaa kwa zuʋ̈ˈˈ ˈsü. (Prov. 4:23) Zoova ˗ya ˈˈpiʋ̈ ˈkwa ö gba kwa zuʋ̈ˈˈ ꞊gban ˈka. (Mat. 22:36, 37) ˈˈKɛɛ Sɔtraan ˗ya ˈˈpiʋ̈ ˈö kwa zuʋ̈ˈˈ ˈˈpɛ ˈgü, kö ˈˈkpɔnŋtaapë ˗nu ˈö ˗an ˗san Zoova ˗kë bhë, ˗an ˗dhɔ ˗yö kwa kë. (Zak. 4:4; 1 Zn. 2:15, 16) ꞊Yaa˗ yö ꞊dhɛ ˈyaa ˈwɔn ˈkun ˗ni, ˗yö ˗dho ˈˈklʋʋbhɔdhe wɔ kwa ˗ta kö ˈkwa Zoova ˗bha ˈtɔŋ˗ ˗nu ˗lögü.

7. Kwa ˗dho kwa ˗bha ˗piö ˈˈbhɛɛ bhë ˗a ˗da kwa ˗bha ˗kɔ ˗kë ꞊dhɛ?

⁷ ˗Piö ˈˈbhɛɛ ˈö bhë ˗a ˗da kwa ˗bha ˗kɔ ˈnën ˗tɔ Zoova ˗bha ˈtɔŋ˗ ˗nu ˈwo ˗gban ˈwɔn ˗së waa ˈwɔn yaa ˗an ˗bha, ˗an dɔ ˗sü, ˈö ˈkwa ˗an ˗ya ꞊bhlëë ˈgü. (Ps. 97:10) Mɛn ˈbha ˗nu ꞊mɔɔn˗ ˗bha ˈwo˗ ˗ga ꞊dhɛ Zoova ˗bha ˈtɔŋ˗ ˗nu ˗wo mɛn ˗nënŋ. ˈˈKɛɛ kwa ˈti Biblö ˗bha ˈtɔŋ˗ ˗gɛngbandhɛ ˗nu ˗ya ꞊bhlëë ˈgü, kö kwa ꞊tɛɛ˗ ˗yö ꞊dhɛ ˈˈsɔdha ˈö ö ˗bha ˗piö ˈˈbhɛɛ bho ö ˗bha ˗gblü ˈˈpiʋ̈, ˗a ˗bha ˗kë ˈgbinŋ˗ ˗sü ˗wɔn ˈgü, ˗a ˈdhö. ꞊Yaa˗ kë ˈˈdhʋ̈ kö ˗ya ˈˈblɔɔn˗ kë ö ˗de ˈka! Mɛn ˗nu ˈö Zoova ˗dhɔ ˗yö ˗an ˗kë, ˈwaa˗ ˗bha ˈtɔŋ˗ ˗nu ˈsü ꞊dhɛ pë «ˈˈgbɩɩ˗» ˈdhö, ˗wa ˗sü ꞊ʒiaan ꞊dhɛ wo dha ˗pë ˈdhö.​—1 Zn. 5:3.

8. ꞊Waa˗ pö nɔɔn˗ ˗së pö ˗sü kë ꞊dhɛ ˗sabha ˈdhö kwa ˗gɛn ˗bha, ˗a ˗gɛn ˈtɔ˗ ˗mën?

⁸ Pɔdhö ˗ya ˗pö kwa ˗dhɛ ˈpö ꞊dhɛ nɔɔn˗ ˗së ˈö mɛn zuʋ̈waannu bhë, ˗a pö ˗sü ˗yö kë kwa ˗bha ˗gblügɔɔn ˈka ˗sabha ˈka. ˗A ˗pö ˗kɔ ˈˈwɛɛ ˈgü ˗sü ˈka, ˈkwa ˗Zlan ˗bha ˗Gblüdëdhɛ ˗nɔɔn ˗së pö ˗kplawo. ˗Zlanwo ˗pö mɛn ˗nu ˗dhɛ ˗sü kwa ˗bha ˗zoyödhe ˗gɛn ˗gban. ˈKwa Zoova ˗dhɔkëmɛn ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an yö kö ˗wo ˗zlanwopö ˗ni ˈgü, kwa zuʋ̈ˈˈ ꞊nii ˗yö ˗da ꞊dedewo. ˗A mɛn ˈbha ˗nu ˗zlanwo ˗pö yö ˈˈdhiʋ̈, ꞊klaŋplöö, ˈˈdhoodɔdhɛ ˗nu ˈgü, ˈkɔ ˈgü ˈkɔ ˈgü, kö ˗wa ˈdho ˗wo wo ˗mɛn ˗nu ˗dhɛ, ɛɛnˈˈ kö ˗wa ˗kpan wo dɔmɛn ˗nu ˗bha. ˈKö ˗kë ˗ʒiaanwo ꞊dhɛ pë ˈbha ˗yö ˗an ˗nënŋ ˈkɔɔ, ˗wo ˗zlanwo ˗pö. ˈMɛn zë ˈˈsuʋ̈ ˗wɔn ˗dhɛ ˈö ˗zlanwopösü ˈduannu, kö ˗ya kë ꞊dhɛ ˈˈsɔdha ˈö ö ˗bha ˗sabha bho ö ˗gɛn ˗bha ˗gblü ˈˈpiʋ̈, ˗a ˈdhö. ˗Yö ˗dho ˗gi ö ˗gɛn ˗bha ˈˈvaandhö,  ˈö ˗wa ˈko ˗ya ˗a ˗bha, ˗a ˗kɔ ˈti ˗dho ˗mɔn ö ˗de ˗ta kɔɔˈˈ ˗sü ˗bha. ˈGo mü ˈzü, ˈyii ˗dho ꞊mɔɔn˗ ˗bha kö pë ˈö˗ ˗gɔmɛn ˗ya pö, ˗ya kë.

9. Dhɛga ˈö ˗kë ˗zoyödhe ˈka bhë, ˈmën ˗kë ˈö kwa ˗bhawɔn ˈdhö˗ ˗bha?

⁹ Dhɛga. Kwa ˗bha dhɛga ˈnën ˗tɔ ˗zoyö Zoova ˗dhɛ ˗sü. ˗Yö ga ˗sü ˈka kwa ˈgü ꞊dhɛ pë ˈˈpɛpɛ ˈö˗ ˈˈplüün bho, ˗yö ˗dho ˗a kë. ˗Zoyödhe ˗dho kwa ˗takun ‹kö Sɔtraan ˗bha ꞊saaga ˗nu ˈö pɛng ˈdhö˗ ˈˈdhiʋ̈ ˈö dho˗ ˗zuö kwa ˗bha bha, ˈwa ˈdho yö kwa ˗bha.› ˈMën ˗kë ˈkwa ˗dho dhɛga ˈö bhë ˗a ˈkun ˈˈgbɩɩ˗? ˈYö ˗tɔ ꞊dhɛ ˗yö ˗dho kwa ˗takun kö ꞊taa ˗yö ˗Zlan ˗bha ˗mɛn ˗nu ˗bha ꞊klaŋwo ˗nu ˈwa ˗dho kwa zuʋ̈ˈˈ ˈsü, ɛɛnˈˈ kö ˗wa ꞊sua ˗nu dɔ kwa ˗bha, kwa ˈgü ˈya ˗dho ga. ˗Zoyödhe ˈti kë kwa ˗gɔ, mɛn ˗nu ˗wa kwa ˗blü Zoova ˗bha ˈtɔŋ˗ ˗nu ˗lögü ˗sü ˗bha, kwa ˈti ˗dho ꞊mɔɔn˗ ˗bha ˈkwa ˗gban ˗an ˗gɔ. ˈˈKɛɛ ˈwɔn ˗nu ˈö ˈwaa Zoova ˗dhɛ ˗së, ˈkwa ˗kɔ ˗an kë ˗sü ˈka yö ˈˈdhiʋ̈, ɛɛnˈˈ ꞊klaŋplöö, kö kwa ˗bha dhɛga ˗yö kwa ˈˈdhiʋ̈. (1 Piɛ. 3:15) ˈKwa ˗kɔ yö ˈbha ˈö dho kwa ˗kɔ ꞊zɔɔ ˗Zlan ˗dhɔkësü ˗bha ˗a ˈka, kö kwa ˗kɔ ˗yö kwa ˗bha dhɛga ˗bha ˈˈgbɩɩ˗. (Ebl. 13:5, 6) ˈKwa ˗ya ˈˈklʋʋbhɔdhe ˈgü ˈkwa Zoova ˗dhɔkë, kö kwa ˗bha dhɛga ˗yö kwa ˗takpa ˗ni.​—1 Tes. 2:2.

10. ˗Mën ˈö ˗tɔ kwa ˗bha ˗piö gblaa˗? ˈYö ˈmën ˗kë ˈö ˈkwa dho ˗a ˗ya?

 ¹⁰ Kwa ˗bha ˗piö gblaa˗ ˈnën ˗tɔ ˗dhɛkpaɔ dhiʋ̈ˈˈ ˗së ˈö Zoova ˗ya ˗ya kwa ˗gɔ. Kwa kwa ˗zoyö ꞊dhɛ mɛn ˈˈpɛpɛ ˈwo ˈwɔn man˗ ˗ta, ˗yö ˗dho ˗an bho ga ˈgü, ˈö ˈwɔn ˗së ˗kë ˗an ˗dhɛ. (1 Tes. 5:8; 1 Tim. 4:10; Tit. 1:1, 2) ˗Piö gblaa˗ ˗yö ˈˈsɔdha ˗gɔ ˗takpa. ˗Kɔ do bhë ˗a ˈgü, kwa ˗bha dha ˗sü ˈö ˗dhɛkpaɔ dhiʋ̈ˈˈ ˈgü ˗a ˗zoyödhe ˗yö kwa ˗bha ˗zotadhe ˗takpa. ˗Kɔ ˗kë ꞊dhɛ? ˗Ya ˗kë ˈyö kwa ˗zo ˗yö to ˈwɔn ˗nu ˈö ˗Zlan ˗an ˈˈplüün bho ˗an ˈˈpiʋ̈, ˈyö ˈwɔn ˈˈgbɩɩ˗ ˗nu ˈwaa kwa ˈgü ga. Kwa ˗dho ˗a ˗ya kwa ˗gɔ ˗bha ˗kɔ ˗kë ꞊dhɛ? ˗Kwaa kë kö kwa ˗zotagüwɔn ˗nu ˗wo ˗bɛ ˗Zlan ˗bha ˗bha ˗kplawo. ˗A ˈwɔnzuan ˈnën ˗tɔ ˈkwaa kwa ˗zo yö ꞊nɔɔnpë ˗nu ˗dhɛ. ˗Zlan ˈnën ˈkwa kwa ˗zo yö ˗a dhɛ.​—Ps. 26:2; 104:34; 1 Tim. 6:17.

11. Kwa ˗bha ˈko ˗zë ˗a ˈka ˗piö ˈnën ˗tɔ ˗mën? ˈYö ˈmën ˗kë ˈkwa dho ˗a ˈsü?

¹¹ ˈKo ˗zë ˗a ˈka ˗piö. Kwa ˗bha ˈko ˗zë ˗a ˈka ˗piö ˈnën ˗tɔ ˗Zlan ˗Wo, ˈö ˗kë Biblö ˈka. ˗Piö ˈö bhë ˗yö ˈˈdhɛ ˗bho ꞊sua suu ˈˈpɛpɛ ˗ta, ˈö mɛn bho ꞊klaŋwo ꞊suasü waa ˈˈtakɔ yaa ˗nu ˗gɔ ˈˈgan ˈgü. (2 Ko. 10:4, 5; 2 Tim. 3:16, 17; Ebl. 4:12) Biblö ˗draan kwa ˗de ˈˈpiʋ̈ ˗sü waa Zoova ˗bha ˗kɔlokota ˗bha kwa ꞊klaŋkësü ˗wo kwa ˗takun, ˈyö ˈkwa yökë ˗piö ˈö bhë ˗a ˈka ˗dhɛ dɔ. (2 Tim. 2:15) ˗Ya ˈˈkan ˗gblü ˗gɔn ˗a ˈka ˗kwɛɛ ˗nu bhë ˗an ˗bha, Zoova ˗yö kwa ˗takpapë ˈˈgbɩɩ˗ do ˈbha ˗nu. ˗Mën ˗mü?

12. ˗Mën ˈbha ˈö kwa ˗bhawɔn ˈdhö˗ ˗bha? ˈYö ˈmën ˗kë?

¹² ˈKö dho kë ˗gblügɔnmɛn ˈˈgbɩɩ˗ ˈka, ˗ya ˈˈɲaan ꞊dhɛ yö dosɛnŋ ˈyaa ꞊mɔɔn˗ ˗bha ˈö ˈko zë mɛn ꞊va ˈka, kö ö ˗kɔ ˗yö ʒiö ˗an ˗gɔ. ˗A ˗bhawɔn ˗ya ˈˈtɛɛbɔ ˗nu ˗bha ˗takundhe ˗bha. ˗Kɔ do bhë ˗a ˈka, kwa dosɛnŋ kwa ˗kɔ ˈyaa ˗mɔn Sɔtraan waa ö ˗bha mɛn ˗nu ˗an ˗bha. Kwa ˗bhawɔn kwa ꞊dhegblü ˗nu ˗bha ˗takundhe ˗bha. Zoova ˗yö «꞊dhegblü» ˗nu ˗nu kwa ˗dhɛ ˈˈkpɔnŋtaadhɛ ˗todhʋ̈sü ˈgü, kö ˗wo kwa ˗takun.​—1 Piɛ. 2:17.

13. ˈKwa ˗dhɛ ˗ga Eblö 10:24, 25 ˈgü, kwa ˗bha ˗bhɔkwëë ˗nu kwa ˗takun ˗kɔ ˗kë ꞊dhɛ?

¹³ ˈKwa˗ pö ˈkwa ˗takundhe ꞊slɔɔ, kwa dua ˗mü ˈkwa nu kwa ˗bha ˗bhɔkwëë ˗nu ˗ta. (Eblö 10:24, 25 ˗wo pö.) Mɛn ˈˈpɛpɛ, ˈgügadhe ˗nu kwa ˗ta ˈˈtʋ̈ŋ ˈbha ˗nu ˈka. ˈˈKɛɛ kwa ˗bha ˗bhɔkwëë ˗nu kwa ˗takun. Kwa ꞊dhegblü ˗nu ˗bha ˈwɔn ˗daa ˗nu ˗wo kwa ꞊faanmën. ˈˈDhɛɛtadhiaŋ˗ ˗nu waa ꞊klaŋnën ˗nu ˗bha yö ˗nu ˗wo ꞊faan ˗nu kwa ˗dhɛ ˈö ˈkwa ˗klu Zoova ˗dhɔkësü ˗bha. ˈˈDoo ˗nu ˈö ˈkwa ˗an dɔ ˗ni ˗bhɔkwëë ˈˈlɛlɛ ˈˈdhiʋ̈ ɛɛnˈˈ kö ˗ya ɲën bhë, ˗wo kwa ꞊faanmën. (1 Tes. 5:14) ˗Bhɔkwëë ˗nu ˗wa ˗kë ˈpö ˈö ˈkwa mɛn ˈˈwɛɛ ˗nu ˗takun, ˈö kwa zuʋ̈ˈˈ ꞊nii ˗yö ˗da. (Këw. 20:35; Wlɔ. 1:11, 12) ˗Bhɔkwëë ˗nu ˗wa ˗kë ˈzü ˈö ˈkwa ˗kë ˗zlanwopömɛn waa mɛn ꞊klaŋkëmɛn ˗tiaandhö ˗nu ˈka. ˗Kɔ ˈö ˈkwa dho yö kë ˗a ˈka ˗së ˈka kwa ˗bha mɛn ꞊klaŋ ˗kë ˗a ˈka ˗pë ˗nu ˈka, ˗wa ˗zɔn kwa ˗dhɛ. ˗Dhɛ ˈö ˈˈdhʋ̈, ˗kwa kwa ˗de baaˈˈ ˗së ˈka kwa ˗bha ˗bhɔkwëë ˗nu ˗bha. ˈKwa kë ˗an ˗ta, ˗kwa kwa ˈˈtʋ ˈto ˗së ˈka. ˗Wa ɲën, pë ˗nu ˈö ˈkwa ˗an ꞊draan, ˗kwa ˗an ˗ya ꞊bhlëë ˈgü. ˈKwa˗ kë ˈˈdhʋ̈, kwa ˗dho kë ‹Yesu Klisi ˗bha ˈˈsɔdha ˈö ö ˗gɔ ˗dho ˗dhɛ ˈˈsia˗› ˗a ˈka.​—2 Tim. 2:3.

14. De ˗nu ˈwo kwa ˈˈpiʋ̈ kö ˗wo kwa ˗takun ˈzü?

¹⁴ ˗Zlan ˗bha ˈˈkiö ˈgügbɩɩsü ˗nu ˈwo ˗mɔn ˈˈmliɲɔn ꞊va ˗bha, ˗wo kwa ˗takun ˈpö. ˈPë ˈˈkiö dosɛnŋ ˗mɔn ˗a kë ˗sü ˗bha, ˗kwa kwa ˗zota ˗a ˈgü. (Is. 37:36) ˗Sanman ˈˈsanman ˈˈkiö ˈgügbɩɩsü ˗nu ˗lokwëësü! Mɛnbhɩɩdhe ɛɛnˈˈ ˗zuu yaa ˈbha ˈyaa ˗mɔn ˗an ˗bha. Mɛn ˈbha ˈnën˗ pö ꞊dhɛ mɛn ˈˈkee dosɛnŋ ˈö Zoova ˈdhö˗ ˈˈpiʋ̈, ˗a ꞊faan ˗ʒiö mɛn ꞊va ꞊faan ˗ta. (Juges 6:16) Gagade ˗mü. ˗Dhɛ ˈö ˈˈdhʋ̈, kwa yökëyoo ˗nu, kwa ˈˈtɛɛbɔ ˗nu ˈwo ꞊klaŋplöö,  ɛɛnˈˈ kwa ˗mɛn ˗nu ˈö ˈwaa Zoova ˗dhɔkë ˗wa ˈˈsuʋ̈ ˗da kwa ˗bha, kwa ˗zo ˗yö ˗bö ꞊dhɛ Zoova kwa ˈˈpiʋ̈. ˈKwa ˈto ˗a ˗bha ˗dhioo ˗nu ˈˈpiʋ̈, ˗yö ˗dho ˈˈdhiʋ̈sü kwa ˈka.

15. ˈKwa ˗dhɛ ˗ga Isaïe 54:15, 17 ˈgü, ˈmën ˗kë ˈkwa˗ pö ꞊dhɛ mɛn ˈbha ˈyaa ꞊mɔɔn˗ ˗bha kö ˗yö kwa ˗bha ˗zlanwopösü ˈduannu?

¹⁵ Sɔtraan ˈˈpiʋ̈ ˗mɛn ˗nu ˗bha kwa ˗san kë ˗gɛn ˗yö ꞊va. ˈKwaa kwa ˗kɔ ˗da ˈˈsɛ kɔɔˈˈ ˗wɔn, ɛɛnˈˈ ˗gblü gɔn ˗sü ˈgü. ˗Zlan ˈnën ˈkwa˗ ˗wɔn ꞊blɛɛ, ˈö ˈkwa˗ ˗zɔn mɛn ˗nu ˗dhɛ ꞊dhɛ ˗a ˗bha ˗Gblüdëdhɛ dosɛnŋ ˈnën dho nu ˗yadeflëëgüsü ˈka, ˈyö ˈkwa˗ ˗bha ˈtɔŋ˗ ˗nu ˗ya ꞊bhlëë ˈgü. Kwa˗ ˗zɔn ꞊dhɛ ˈˈkpɔnŋtaadhɛ ꞊kɔɔnmɛn ˈö bhë, ꞊suamɛn, ˈö mɛn zë yö ˗mü. (Zan 8:44) ˈYö ˈkwa˗ ˗zɔn ˈzü ꞊dhɛ ˗a ˗bha ˈˈkpɔnŋtaadhɛ ˈgü shiʋ̈ˈˈ ˈˈtʋ̈ŋ ˗ya yö ꞊klöö˗. Sɔtraan waa ö ˗bha mɛn ˗nu ˈwii ˗dho ꞊mɔɔn˗ ˗bha toŋtoŋdhö kö ˗wo kwa ˗bha ˗zlanwopösü ˈduannu. Kwa ˗dho pë ˈˈpɛpɛ kë kö ˈkwa Zoova ˈtɔ bhɔ ˗kplawo. Sɔtraan ꞊faan ˗yö ˈˈgbɩɩ˗, ˈˈkɛɛ ˈyii ꞊mɔɔn˗ ˗bha kö ˗yö kwa ˈkun ˗Zlan ˗bha ˗Gblüdëdhɛ ˗nɔɔn pö ˗sü ˗bha ˈˈkpɔnŋtaadhɛ ˗todhʋ̈sü ˈgü. Zoova ˈnën kwa ˗takpa, ˈyö ˈkwa ˗mɔn ˗a kë ˗sü ˗bha.​—Isaïe 54:15, 17 ˗wo pö.

16. ˈˈKlʋʋbhɔdhe ˈkpii˗ ˈˈtʋ̈ŋ ˈka, Zoova ˗dho kwa dha ˗kɔ ˗kë ꞊dhɛ?

¹⁶ ˈˈKlʋʋbhɔdhe ˈkpii˗ ˈˈtʋŋ ˈka, Zoova ˗dho kwa dha ˈwɔn ˈˈgbɩɩ˗ ꞊plɛ ˗gɔ. ˗Blɛɛsü ˈka, ˈˈtʋ̈ŋ ˈö dho ˗gblüdë ˗nu ˈwo ˈˈkpɔnŋ ꞊taa ˗an ˗blü ˗a ˈka kö ˗wo Babidhɔnö ˗pö ˈkpii˗, ˈö ˗kë ꞊sua ˗zlanwo ˗nu ˈka bhë ˗an ˈgü shiʋ̈ˈˈ, ˗yö ˗dho ö ˗kɔ kpa kwa ˗ta. (˗Dhɛ. 17:16-18; 18:2, 4) ˗A ꞊plɛ ˗bha ˗naan ˈtɔ˗ ˈˈtʋ̈ŋ ˈö dho Sɔtraan ˗bha ˈˈkpɔnŋtaadhɛ ˈö yö ˗a ˈgü shiʋ̈ˈˈ ˗a ˈka, Aamagedɔn ˗gblü yi ˈka, ˗yö ˗dho kwa dha.​—˗Dhɛ. 7:9, 10; 16:14, 16.

17. ˗Klu Zoova ˗bha ˗sü ˗dho kwa ˗takun ˗kɔ ˗kë ꞊dhɛ?

¹⁷ ˈKwa ˈto ˗klu ˗sü ˈka Zoova ˗bha, Sɔtraan ˈti ˗dho ꞊mɔɔn˗ ˗bha kö pë ˈˈdhiʋ̈˗ ˈö dho ꞊gwëë kwa ˗bha, ˗ya kë kwa ˈka. Yö ˈnën˗ ˈgü dho shiʋ̈ˈˈ ꞊toëpö ˈka. (Wlɔ. 16:20) ˈDhɛ ˈö ˈˈdhʋ̈, ˗glü ˗gɔn ˗a ˈka ˗kwɛɛ ˈˈpɛpɛ ˈö ˗Zlan ˗ya nu kwa ˗dhɛ bhë, ˗kwa ˗an ˈsü, ˗wo ˈto kwa ˗bha ˗kplawo! ˈKwa ˗dho kwa ˗zo yö kwa ˗de ˗dhɛ ˈko ˈö bhë ˗a ˈgü. ˗Kwa kwa ꞊dhegblü ˗nu ˗takun. ˗Kwa kwa ꞊kwaa Zoova ˗zü kö ˗yö ˈˈdhiʋ̈sü kwa ˈka. ˈKwa˗ kë ˈˈdhʋ̈, kwa Dë ˈö kwa ˗dhɔ ˗ya ˗kë bhë, ˗yö ˗dho ꞊faan nu kwa ˗dhɛ, ˈö ö ˗kɔ kpa kwa ˗ta.​—Is. 41:10.