1. Mɛn ˗nu ˗wa nu ˗blɛɛsü ˈka kwa ˗bha ˗bhɔkwëë ˗nu ˗ta, ˈmën ˈwo˗ ˈsuan˗ bho? (Kpɔɔˈˈ ˈzü pë ˈˈbin ˗bha.)

 ˗KWA kwa ˗zota kö dhebɔ do waa ö ꞊gɔɔn ˗wo ˈdho ˗blɛɛsü wo ˗ni ˈgü kwa ˗bha ˗bhɔkwëë ˗ta. ˗Wa ˗yö ꞊dhɛ mɛn ˗nu wo ˗kɔ ˗ya wo ˗gɔ ˈˈwowosü ˈka. ˗Wa ˗yö ˈzü ꞊dhɛ ˗dhɔ ꞊dede ˗yö ˗zlanwokɔdhigümɛn ˗nu ꞊zinŋgü mü, ˈö pa ˗an zuʋ̈ˈˈ ˈka. ˈDhɛ ˈwo wo ꞊yɛɛ˗ kë ˗ni ˈgü wo ˗gɔ ˈkɔɔ, dhebɔ ˗ya ˗pö ö ꞊gɔɔn ˗dhɛ ꞊dhɛ «mɛn ˗nu ˈwo bhë, ˈwaa ꞊dhɛ mɛn ˗nu ˈwo to ˗an ˈdhö, ˗kë ˗an ˈˈpiʋ̈ ˗sü ˗ya kë n ˗dhɛ ˗së ꞊dedewo.»

2. ˈMën ˗kë ˈö mɛn ˈbha ˗nu ˗gɛn ˈˈdhiʋ̈ ˗yö ˗zuö?

² ˗Dhɔ ˈö Zoova gbamɛn ˗nu ꞊zinŋgü ˗yö ö ˗de ˗ta ꞊dedewo. ˈKö ˗kë ˈˈdhʋ̈, ˈwɔn yaa kë ˗dhii ˗yö Zoova ˗bha ꞊Gbɛkiö ˗nu ˗bha. (1 Zn. 1:8) ˗A ˈwɔn ˈgü, mɛn ˗nu ˈwo ˗zlanwokɔdhi ˈgü bhë kwa ˗an dɔ ˗ni ˈgü ˗së ˈka, kwa ˗dho ˗a yö ꞊dhɛ ˗an zaadhɛ ˗nu ˗wo ˗an ˗bha. (Wlɔ. 3:23) ˗Wëëwɔn ˈö mü ˈyö ˗tɔ mɛn ˈbha ˗nu zaadhɛ ˗wɔn ˈgü, mɛn ˈˈwɛɛ ˗nu ˗wa ˈˈkan Zoova ˗dhɔkë ˗sü ˗bha.

3. ˈMën ˈwo Yesu ˗bha gwëëˈˈ ꞊dede ˗nu dɔ ˗a ˗bha? (Zan 13:34, 35)

³ Biblö ˈˈɲan ˈö kwa ˗bha ˈwɔn ˗gɔ ˈö yö ˈö ˗gban ˗a ˗ta bhë, ˗kwaa ˗ga. (Zan 13:34, 35 ˗wo pö.) Mɛn ˗nu ˗dho kletiɛn ꞊dede ˗nu dɔ ˗kɔ ˗kë ꞊dhɛ? ˗An ˗bha ˗dhɔ ˗kë wo ˈko ˈka ˗sü ˈnën ˈwo ˗dho ˗an dɔ ˗a ˗bha. Biblö ˈti˗ pö ꞊dhɛ ˈwɔn yaa kë ˗dhii ˈya ˗dho kë ˗an ˗bha. Yesu ˈyii˗ pö: ‹Ka dho˗ ˈwɔn dɔ ꞊dhɛ ma ꞊klang ˗nu ˗mü ka ˈka.› ˗Ya ˗pö ꞊ʒiaan: ‹Mɛ ꞊gban˗ dho˗ ˈwɔn dɔ ꞊dhɛ ma ꞊klang ˗nu ˗mü ka ˈka.› Yesu ˗ya ˗zɔn ꞊dhɛ mɛn ˈˈpɛpɛ ˈö dho ˈö yö ˗a ˈka mɛn ˗nu ˈö ˈwaa ö ˗bha gwëëˈˈ ˗nu ˈka ˗an ˗bha, ˗wo ˗dho ö ˗bha ꞊klaŋ ˗nu dɔ ˗dhɔ ˈö ˗an ꞊zinŋgü ˗a ˗bha.

4. Dhɛɛˈˈ ˗mɛɛn ˗nu ˈö mɛn ˈbha ˗nu ꞊mɔɔn˗ ˗bha ˗wo ˗an kpɔ?

 ⁴ Mɛn ˈbha ˗nu ˈö ˈwaa Zoova ˗dhɔkëmɛn ˗nu ˈka, ˗wo ꞊mɔɔn˗ ˗bha ˈwo˗ pö: «꞊Waa˗ pö ˗dhɔ ˈnën ˗tɔ Yesu ˗bha gwëëˈˈ ꞊dede ˗nu dɔ ˗a ˈka ˗pë, ˗a ˗gɛn ˈnën ˗tɔ ˗mën? Yesu ˗yö ˗dhɔ ˗zɔn ö ˗bha bɔmɛn ˗nu ˗dhɛ ˗kɔ ˗kë ꞊dhɛ? ꞊Dɛɛ, kwa ˗dho ˈto Yesu ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?» Zoova ˗bha ꞊Gbɛkiö ˗nu, kwa dua ˗mü kö ˈkwa kwa ˗zota dhɛɛˈˈ ˗nu ˈwo bhë ˗an ˗yɔ ˈgü. ˈKwa˗ kë ˈˈdhʋ̈, ˗yö ˗dho kwa ˗takun kö mɛn ˈˈwɛɛ ˗nu ˗dhɔ ˈö kwa ˈgü ˗yö ˗dadhiʋ̈, ˈkö ˗kë ˗ʒiaanwo ꞊dhɛ ˗an zaadhɛ ˗yö ˗an ˗bha.—Efɛ. 5:2.

5. ˈPë Yesu ˗ya pö Zan 15:12, 13 ˈgü bhë, ˗a ˈgü ˈˈpʋ.

⁵ Yesu ˗ya ˗pö ˈˈpuu ꞊dhɛ ˗wo ˗dho ö ˗bha gwëëˈˈ ꞊dede ˗nu dɔ ˗dhɔ ˈö ˗an ꞊zinŋgü ˗a ˗bha. (Zan 15:12, 13 ˗wo pö.) ˗Ya ˗pö: «Ka ˗dhɔ ˗yö ka ˈko kë ꞊dhɛ ˗kɔ ˈö ka ˗dhɔ ˗yö n ˗kë ˈka bha˗ ˈdhö.» ˈMën kun ˗a ˈˈpiʋ̈ kö ˈö˗ pö? ˗Ya ˗pö ꞊dhɛ mɛn ˈˈwɛɛ ˗nu ˗dhɔ ˗yö kwa kë ˈgbɛ kö ˗yö ʒiö ˗a ˈka kwa ˗de ˗dhɔ ˗ta. Ɛɛnˈˈ ˈzü ˗dhɔ suu ˈö ˈˈdhʋ̈ ˗yö ꞊mɔɔn˗ ˗bha ˈö kwa ˗blü kö ˈkwa kwa ˗de nu ˗an ˗wɔn ˈgü. b

6. ˗Zlan ˈˈDhiwo ˗ya ˗zɔn ꞊dhɛ ˗dhɔ ˗wɔn ˗yö ˈˈgbɩɩ˗ ˗kɔ ˗kë ꞊dhɛ?

⁶ ˗Zlan ˈˈDhiwo ˗ya ˗zɔn kwa ˗dhɛ ꞊dhɛ ˗dhɔ ˗wɔn ˗yö ˈˈgbɩɩ˗. ˗A ˈwɔnzuan ˈnën ˗tɔ mɛn ꞊vadhɛ ˗wa ˗pö Biblö ˈˈɲan ˗nu ˈö wo ˗dhɛ ˗së ꞊dedewo ˗a ˈbha ˗nu ˈnën ˈwo ˗tɔ: «Waa˗ pö ˗dhɔ, kö ˗wo ˗wɩ [˗Zlan] ꞊në˗ ˈka.» (1 Zn. 4:8) «I këyɔɔ ˗dhɔ ˗yö i kë ꞊dhɛ ˗kɔ ˈö i ˗dɩ ˗dhɔ ˗yö i ˗dɩ kë˗ ˈka bha˗ ˈdhö.» (Mat. 22:39) «˗Dhɔamɛkë bha ˗yö ˈwɔn yaa ˈgbɛ ꞊dede ˗ta ˗kpa.» (1 Piɛ. 4:8) «˗Dhɔ bha ꞊në˗ ˈˈyi ˈyaa ˈˈbhʋ̈ʋ̈.» (1 Ko. 13:8) Biblö ˈˈɲan ˗nu ˈwo bhë waa˗ ˈˈwɛɛ ˈbha ˗nu ˗wa ˗zɔn ˈˈpuu ˈka ꞊dhɛ ˗yö ˗dho kë ˗së ꞊dedewo kö ˈˈklʋʋsë ˈö ˈˈdhʋ̈,ˈkwa˗ ˗zɔn kwa ˈko ˗nu ˗dhɛ.

7. ˈMën ˗kë ˈö Sɔtraan ˈyaa ꞊mɔɔn˗ ˗bha kö ˗yö ˗dhɔ ꞊dede ˗da mɛnbhɩɩdhe ˗nu ꞊zinŋgü?

 ⁷ Mɛn ꞊vadhɛ ˗wa ˗pö: «A ˗dho ˗zlanwo ꞊dede dɔ ˗kɔ ˗kë ꞊dhɛ? ˗Zlanwo ˈˈpɛpɛ ˗wa ˗pö wo mɛn ˗nu ꞊klaŋkë gagade ˈka, ˈˈkɛɛ kö ˗an ˗bha ꞊klaŋwo ˗nu ˈwo ˗gban ˗Zlan ˗bha, ˈwaa do.» Sɔtraan ˗ya ˗kë ˈö ꞊sua ˗zlanwo ˗nu ˗wo ˗kë ꞊va, kë ˈˈdhʋ̈ kö mɛn ˗nu ˈwa ˗dho ˗a ꞊dede dɔ. ˈˈKɛɛ, ˈyaa ꞊mɔɔn˗ ˗bha kö ˗yö mɛnbhɩɩdhe ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an ˗lokota kö ˗dhɔ ꞊dede ˗yö kë ˗an ꞊zinŋgü. Zoova dosɛnŋ ˈnën ˗mɔn ˗a ˗bha. Kwa˗ ˈwɔn ˗dɔ ˈˈdhʋ̈, ˈyö sü ꞊dhɛ ˗dhɔ ˗yö ˗go ˗a ˈˈpiʋ̈. Mɛn ˗nu ˈwo˗ ˈˈpiʋ̈ kö ˗dhɔ suu ˈö bhë ˈwo˗ zɔn, ˗an ˗bhawɔn ˗yö ˗a ˗bha ˗zuu ˈˈslʋ̈ʋ̈slʋ̈ waa˗ ˗bha ˈdhuëë˗ ˗bha. (1 Zn. 4:7) ˗A pö ˈö Yesu ˗ya wo ꞊dhɛ ˗dhɔ ꞊dede ˈnën ˗tɔ ö ˗bha gwëëˈˈ ˗nu ˗dɔ ˗a ˈka ˗pë bhë, ˗a ˈwɔn ˈyaa kwa ˈkun.

8-9. ˗Dhɔ ˈö Zoova ˗bha ꞊Gbɛkiö ˗nu ꞊zinŋgü, ˗yö ˗pa mɛn ˈbha ˗nu zuʋ̈ˈˈ ˈka ˗kɔ ˗kë ꞊dhɛ?

⁸ ꞊Dhɛ ˗kɔ ˈö Yesu ˗ya pö ˗a ˈka ˗a ˈdhö, mɛn ꞊vadhɛ ˗wa ˗bha gwëëˈˈ ˗nu ˗dɔ ˗dhɔ ꞊dede ˈö ˗an ꞊zinŋgü ˗a ˗bha. ˗A ˈwɔnzuan ꞊nɛn: Kwa ꞊dhegblü do ˈwo˗ ˗dhɛ Yanö, ˗a ˗zo ˗yö ˗bo ˈdho ˗blɛɛsü ˈö˗ wo ˗bhɔkwëë ˈkpii˗ do ˈö kun ˗a ˗bha ˈkɔ ˈˈsuee ˗a ˗ta, ˗a ˈka. ˗Yö ˗kun balɔn ˗zuö ˗dhɛ ˈka. Yanö ˗ya balɔn ˗ga ˗dhɛ ˈö bhë ˗a ˈgü ˈˈdhiʋ̈ ˗be. ˗Ya ˗pö: «Mɛn ˗nu ˈwo kun ˗bhɔkwëë ˈkpii˗ ˗ta waa mɛn ˗nu ˈwo kun balɔn ˗zuö ˗dhɛ ˈgü zii ˈka bhë, ˗an ˗bha ˈwɔn kë ˗kɔ ˈyaa do toŋtoŋdhö. Zoova ˗bha ꞊Gbɛkiö ˗nu ˗kun mɛn ˗nu ꞊bhlëë ˗ya ˗ni ˈgü, ˈwo sɔ ˗së ˗da wo ˗bha, ˈö ˗an ˗bha ˈnën ˗nu kun ˈˈkpaakpa.» ˗Ya ˗pö ˈzü: «˗Wo ˗kun wo ˗de ˈgü ˗së, ˈö ˗an zuʋ̈ˈˈ kun ˈˈwaannu ˗sü ˈka. Pë ꞊dede ˈa kun ˗a mɛɛnˈˈ ˗ni ˈgü n ˗man ˗tosɛta ˈgü ˈyö bhë. ˈˈDhɛɛtadhiaŋ˗ ˗nu ˈwo ˗an zë yi ˈö bhë ˗a ˈka, ˗a gbɛ˗ ˈti ˈto n ˈˈɲaan, ˈˈkɛɛ Zoova ˗bha ꞊Gbɛkiö ˗nu ˈˈtakɔ ˈnën pa n zuʋ̈ˈˈ ˈka ꞊dedewo.» c ˈYaa za ˈgü ꞊dhɛ ˈˈtakɔ ˈö ˈˈdhʋ̈ ˗yö ˗sü ˗dhɔ ꞊dede ˈkwa˗ ˗zɔn kwa ˈko ˗nu ˗dhɛ ˗a ˗bha. ˈDhɛ ˗kë ꞊dhɛ kwa ꞊dhegblü ˗nu ˗dhɔ ˗yö kwa ˗kë bhë, kwa ˈˈgblüsë ˗kë ˗an ˈka ˈö ˈkwa ˗an ꞊bhlëë ˗ya.

⁹ Kwa ꞊dhegblü do ˈwo˗ ˗dhɛ Zan ˗a ˗bha ˗nu ˗bhɔkwëë ˗ta ˗sü ˗blɛɛsü ˈka, pë do ˈö bhë ˈyö˗ pö. ˗Ya ˗pö: «Mɛn ˗nu ˈwo kun ˗bhɔkwëë ˗ta, ˗an ˈˈgblü ˗kun ˗së. ˗A ˗wɔn ˈgü, a˗ ˗pö n ˗de ˗dhɛ ˗be ꞊dhɛ ˈwɔn yaa kë ˗dhii ˈyaa ˗an ˗bha. ˗Dhɔ ꞊dede ˈö kun ˗an ꞊zinŋgü bhë, ˗ya ˗kë ˈa˗ yö ꞊dhɛ ˈman ˗kpan ˗zlanwo ꞊dede ˗bha.» d ˗Bɔagüwɔn ˗së suu ˗nu ˈwo ˈˈdhʋ̈ ˗wa ˗zɔn ꞊dhɛ Zoova ˗bha ꞊Gbɛkiö ˗nu ˗wo kletiɛn ꞊dede ˗nu ˈka.

10. ˈˈTʋ̈ŋ ˗mɛɛn ˈbha ˗nu ˈka ˈkwa ˗dho ˗dhɔ ꞊dede ˗zɔn kwa ꞊dhegblü ˗nu ˗dhɛ? (Kpɔɔˈˈ ˈzü ˗zoto ˗a ˈˈpiʋ̈ ˗wɔn ˗bha.)

¹⁰ ꞊Dhɛ ˗kɔ ˈö ˈkwa˗ yö ˗a ˈka ꞊klöö˗ yö ˗a ˈdhö, ˈwɔn yaa kë ˗dhii ˗yö kwa ꞊dhegblü ˗nu ˈˈpɛpɛ ˗bha. ˈˈTʋ̈ŋ ˈbha ˗nu ˈka, ˗wo ꞊mɔɔn˗ ˗bha ˈwo ˈwɔn ˈbha pö ɛɛnˈˈ ˗a ˗kë ˈö mën kwa ˈka. e (Zak. 3:2) ˗Ya kë ˈˈdhʋ̈, kwa ꞊mɔɔn˗ ˗bha ˈkwa˗ ˗zɔn kwa ˗bha ˈwɔn kë ˗kɔ ˗nu ˈgü ꞊dhɛ ˗an ˗dhɔ ˗yö kwa ˗kë ꞊dedewo. ˈDhɛ bhë˗ ˈgü, ˗gleŋ ˗mɛɛn ˈö Yesu ˗ya ˗da kwa ˗bha?—Zan 13:15.

11. ˈWɔn yö ˗kɔ yaa ˗mɛɛn ˈö kun Zakö waa Zan ˗an ˗gɔ? (Kpɔɔˈˈ ˈzü pë ˈˈbin ˗bha.)

¹¹ Yesu ˈyii˗ pö ö ˗bha gwëëˈˈ ˗nu ˗dhɛ ˗wo kë ꞊dhɛ mɛn ˗nu ˈö ˈwɔn yaa kë ˗dhii ˈyaa ˗an ˗bha ˗an ˈdhö. ˗Yö ˗an ˗takun ꞊ʒiaan kö ˗wo wo ꞊kwaa wo ˈˈtakɔ yaa ˗nu ˗zü, ˗wo wo ˗bha ˗tosɛta bho ˈˈgblʋʋ kö ˗wo kë Zoova ˗dhɛ ˗së. Yi do ˈka Yesu ˗bha gwëëˈˈ ˗nu ꞊plɛ, Zakö waa Zan ˗wo wo dhe ˗bɔ Yesu ˈˈpiʋ̈ kö ˗ya pö ˗a  ˗dhɛ ˗yö ˗yɛɛ ꞊bhlëësü nu wo ˗dhɛ ˗Zlan ˗bha ˗Gblüdëdhɛ ˈgü. (Mat. 20:20, 21) ˗Wo ˗kun ˗a ˗zɔn ˗ni ˈgü ꞊dhɛ ˗wo wo ˗de ˗sü ˈkpii˗, wo dua ˗mü kö wo ˗duɛɛ ˗yö kë ˈkpii˗ mɛn ˗nu ˈwo to ˗an ˗bha.—Prov. 16:18.

12. Zakö waa Zan dosɛnŋ ˈnën ˈwɔn yö ˗kɔ yaa kun ˗an ˗gɔ ˗ee? ˗A ˈgü ˈˈpʋ.

¹² ˈWɔn yö ˗kɔ yaa ˈö bhë Zakö waa Zan dosɛnŋ ˈyaa ˈnën kun ˗an ˗gɔ ˈˈtʋ̈ŋ ˈö ˈˈdhʋ̈ ˗a ˈka. Bɔmɛn ˗nu ˈwo to ˈpë ˈwo˗ ˗kë, ˗kwaa ˗ga. Biblö ˗ya ˗pö: «꞊Dhɛ ˈö˗ ˗bha ꞊klang ˗nu bha˗ mɛ ˗kaɔng do ˈwo to ˈwo ˈwɔn bha˗ ma, ˈyö ˗siö ˗nu ˗dhɛ mɛ ꞊plɛ ˈdhɛ ˈwo bha˗ ˗nu kwi ˗bha.» (Mat. 20:24) Kwa ꞊mɔɔn˗ ˗bha ˈkwa kwa ˗zota ꞊dhɛ Zakö, Zan waa Yesu ˗bha gwëëˈˈ ˗nu ˈwo to ˗wo ˗dɔn ˗bho wo ˈˈkwöö. ˗A mɛn ˈbha ˗nu ꞊mɔɔn˗ ˗bha ˈwo˗ pö ˗an ˗dhɛ: «Ka ˗bha ˈgü ka ˗tiaandhö ˈgbɛ ˈka ˗ʒiö ˗a ˈka yi ˗ta, ˈyö ˈka ˗duɛɛ ˈkpii˗ ˗dhɛ Yesu ˗gɔ ˗ee? Ka do ˈkaa ˈnën ˈka yö ˈˈgbɩɩ˗ ˗kë Yesu ˈˈpiʋ̈. ˗Duɛɛ ˈkpii˗ ˈö bhë, yi ˗de ˈpö yi ꞊mɔɔn˗ ˗bha ˈyi˗ ꞊slɔɔ.» Yi ˈö bhë ˗a ˈka, ˗an ˗zo ˗yö ˗bhɔ ˗dhɔ ꞊dede ˗zɔn wo ˈko ˗nu ˗dhɛ ˗sü ˈka.

13. ˗Dhɛ ˈö Yesu ˗bha bɔmɛn ˗nu ˗wo ˗duɛɛ ꞊kɔɔ, ˗mën ˈö˗ ˗kë? (Matiö 20:25-28)

¹³ ˈMën Yesu ˗ya ˗kë? ˈYii ö ˗naan yö. ˈYii˗ pö ꞊dhɛ ö ˗dho bɔmɛn ˈˈwɛɛ ˗nu ˈwo ˗dho wo ˗de ˈsü ˈˈtɩtɩ ɛɛnˈˈ ˈwo ˗dho ˗dhɔ ˗zɔn wo ˈko ˗nu ˗dhɛ ˈˈtʋ̈ŋ ꞊gban ˈka, ˗an mɛɛnˈˈ. ˗Yö ö zuʋ̈ˈˈ ˗kë ˗saa ꞊ʒiaan ˈö ˈwɔn ˗blɛɛ ˗an ˗dhɛ, ˈyö sü ꞊dhɛ ˗ya ˈwɔn ˗dɔ ꞊dhɛ ˈwɔn ˗së kë ˗dhɔ ˗yö ˗an ˈgü. (Matiö 20:25-28 ˗wo pö.) ˈKö ˗kë ꞊dhɛ ˗a  ˗bha bɔmɛn ˗nu ˗wo mɛn ˈö ˈkpii˗ wo ꞊zinŋgü ˗a zɔɔdhe ˗man ˗kplawo, Yesu ˗yö ˈwɔn ˗nu ˗kë ˗an ˈˈpiʋ̈ ˗dhɔ ˈgü ˈˈtʋ̈ŋ ꞊gban ˈka.—Mak. 9:34; Dhu. 22:24.

14. Wɔkɔ suu ˗mɛɛn ˈö Yesu ˗bha bɔmɛn ˗nu ˗wo ˗gla ˗a ˈgü?

¹⁴ Yesu ˗ya ˈwɔn ˗dɔ ꞊dhɛ ö ˗bha bɔmɛn ˗nu ˈˈtakɔ ˗yö ˗sü ˗an ˗bha wɔkɔ ˗bha. (Zan 2:24, 25) Zuifö ˗nu ˗bha ˈtɔŋgɔmɛn ˗nu waa Fadhiziɛn ˗nu ˗wo ˗kun ˗a pö ˗ni ˈgü ꞊dhɛ mɛn ˈö ˗duɛɛ ˈkpii˗ ˈdho˗ ˗gɔ kö ˗yö ˗tiaandhö. (Mat. 23:6; kpɔɔˈˈ video ˈö˗ ˗gɔ ˗kë Les premiers sièges dans les synagogues ˈka ˈö ˗gban Matiö 23:6 ˗bha bhë, ˗a ˗bha.) ˗A ˗wɔn ˈgü ˗zlanwo ˗gɔdhiʋ̈mɛn ˗nu ˈwo ˈˈdhʋ̈, ˗wo ˗kë wo ˗de ˈgü ꞊bhlëësü mɛn ˗nu ˈwo to ˗an ˗bha. f (Dhu. 18:9-12) Yesu ˗ya ˈwɔn ˗dɔ ꞊dhɛ ö ˗bha bɔmɛn ˗nu ˗bha wɔkɔ ꞊mɔɔn˗ ˗bha ˈö˗ ˗kë kö mɛn ˈˈwɛɛ ˗nu yö ˗kɔ yaa ˗yö kë ˗an ˗gɔ. (Prov. 19:11) Yesu ˈyii ö ˗zota ꞊dhɛ ˈwɔn ˈti ˗dho zë ˗an ˗gɔ toŋtoŋdhö. ˗A ˗wɔn ˈgü ˈwɔn ˗ya zë ˗an ˗gɔ, ˗yö ö zuʋ̈ˈˈ ˗kë ˗saa ˗an ˈˈpiʋ̈. ˗Ya ˈwɔn ˗dɔ ꞊dhɛ ˗an zuʋ̈ˈˈ ˈˈpiʋ̈ ˗dhɛ ˗yö ˗së. ˗Ya ˗pö ˗an ˗dhɛ ꞊dhɛ ˗wo wo ˗de kë ˈˈtɩtɩ kö ˗wo ˈˈkan ˗duɛɛ ˈkpii˗ mɛɛnˈˈ ˗sü ˗bha, ˗wo ˗dhɔ ˗zɔn wo ˈko ˗nu ˗dhɛ.

15. ˈWɔn ˈö ˗kë Zakö, Zan waa Yesu ˗bha bɔmɛn ˗nu ˈwo to ˗an ꞊zinŋgü bhë, ˗gleŋ ˗mɛɛn ˈö˗ ˗da kwa ˗bha?

¹⁵ ˈWɔn ˈö Zakö, Zan waa bɔmɛn ˗nu ˈwo to ˈwo˗ ˗kë bhë, kwa ꞊mɔɔn˗ ˗bha ˈkwa ˗gleŋ ꞊va ˈsü ˗a ˈgü. ˗Duɛɛ ꞊bhlëësü ˗dhɛ Yesu ˗gɔ ˗sü ˈö ˗Zlan ˗bha ˗Gblüdëdhɛ ˈgü bhë, ˈyaa kun ˈwɔn ˗së ˈka. ˈˈKɛɛ bɔmɛn ˗nu ˗dhɛ ˈwo to ˈpö ˗an dua ˈyaa ˗mü kö ˗wo wo ꞊kwaa ˈwɔn ˈö bhë ˗a ˗zü kö ˗yö ˗an ˗bha ˗kë mɛn do ˈka ˗sü ˈˈshiʋ̈. ˈKö ˗kë ˈˈdhʋ̈, Yesu ˈˈgblü ˗kun ˗së ˈö ˗dhɔ ˗zɔn ö ˗bha bɔmɛn ˗nu 12 bhë, ˗an ˗dhɛ. ˗Gleŋ ˗mɛɛn ˈö˗ ˗da kwa ˗bha? ˈKwa ˗dho kwa ˈˈtʋ̈ŋ kë ˈwɔn ˗nu ˈwo zë mɛn ˈˈwɛɛ ˗nu ˗gɔ ˗an ˈgü dosɛnŋ. ˈˈKɛɛ ˈwɔn ˗ya zë ˗an gɔ, pë ˈö ˈkwa ˗dho ˗a kë ꞊ʒiaan ˈnën ˈkwa ˗dho kwa ˈˈtʋ̈ŋ kë ˗a ˈgü. ˈMën ˗dho kwa ˗takun? Kwa ꞊dhegblü ˈbha ˗ya ˈwɔn ꞊shiö kwa ˗dhɛ ˗kwa kwa ˗de dhɛɛˈˈ kpɔ, ˈkwa˗ pö: «˗Wɔn ˈö˗ ˗kë yö, ˈmën ˗kë ˈö ˗shiö n ˗dhɛ ˈgbɛ? ˗Yö n ˗man ˈˈtëëtëdhɛ ˈbha ˈö n dua ˈdhö ˗mü kö ˈa baaˈˈ ˗a ˗bha ˗a ˗zɔn ˗ee? N ꞊dhegblü ˈö ˈˈdhʋ̈, ˈyaa bɔ ˗ni ˈgü ˈwɔn ˈˈgbɩɩ˗ ˈbha ˈgü ˗ee? ˈKö ˗kë ꞊dhɛ ˗yö ˈwɔn yaa ˗kë n ˈka, ˈmaan ꞊mɔɔn˗ ˗bha kö ˈa ˗dhɔ ꞊dede ˗zɔn ˗a ˗dhɛ, ˈa˗ ˗bhawɔn to ˗ee?» ˈKwa ˗dhɔ ˗zɔn kwa ˈko ˗nu ˗dhɛ, kö ˈkwa˗ ˗zɔn ꞊dhɛ Yesu ˗bha gwëëˈˈ ꞊dede ˗nu ˗mü kwa ˈka.

16. ˗Gleŋ ˗mɛɛn ˈö Yesu ˗bha ˈwɔnzuan ˗ya ˗da kwa ˗bha ˈzü?

¹⁶ Yesu ˗bha ˈwɔnzuan ˗yö kwa ˗takun kö ˈkwa kwa ˈgü dɔ ˈˈgbɩɩ˗ ˈkwa ˈwɔn ˈgüman kwa ꞊dhegblü ˗nu ˗gɔ. (Prov. 20:5) Yesu ˗dhɛ ˗yö mɛn ˗nu zuʋ̈ˈˈ ˈgü, kwa ˗zë ˈkwaa˗ ˗mɔn ˗a ˗kë ˈˈdhʋ̈ ˗sü ˗bha. ˈˈKɛɛ kwa ꞊dhegblü ˗nu ˗wa kwa ˗shiödhɛwɔn kë, kwa ꞊mɔɔn˗ ˗bha ˈkwa kwa zuʋ̈ˈˈ kë ˗saa ˗an ˈˈpiʋ̈. (Efɛ. 4:1, 2; 1 Piɛ. 3:8) ˈWɔn ˗nu ˈwo ˗gban ˗an ˗bha ˈkwa ˗an dɔ, ˗a ˗kë ˈˈdhʋ̈ ˗sü ˈti ˗dho kë kwa ˗kɔa ˈˈgbɩɩ˗. ˗Kwaa ˈwɔnzuan do ˗ga.

17. ˈWɔn ˗së ˗mɛɛn ˈö ˗maankëmɛn do ˗ya ꞊slɔɔ kwa ꞊dhegblü do dɔ ˗sü ˈgü?

¹⁷ ˗Maankëmɛn do ˈö kun yökë ˗ni ˈgü Aflikö ˈˈshiaŋ ꞊ʒiaan, ˗a ˗zo ˈyii bhɔ kwa ꞊dhegblü ˈbha ˈö kun ˗zlanwokɔdhi do ˈgü ˗a ˈka. ˗A züdɔdhɛ ˈgü, ˗maankëmɛn ˗ya ˗ga ꞊dhɛ kwa ꞊dhegblü ˈö ˈˈdhʋ̈ ˗a ˈˈgblü ˗yö ˈya˗. ˗Mën ˈö ˗maankëmɛn ˗ya ˗kë? ˗Ya ˗pö: «ˈˈSanni kö ˈa n ˗de ˈkun ˗a ˗bha, a pë ˈˈpɛpɛ ˗kë kö kwa ꞊dhegblü ˈö bhë ˗a dɔ ˗së ˈka.» ˗Maankëmɛn ˗yö  ˗kɔ ˈö kwa ꞊dhegblü ˗mɛn ˗nu ˗wa ˗to ˗a ˈka waa ˈpë ˗kë ˈö˗ ˈwɔn kë ˗kɔ ˗yö ˗kë ˈˈdhʋ̈, ˗an ˗dɔ. ˗Ya ˗pö: «ˈDhɛ ˈa˗ yö ꞊dhɛ ˗ya ö ˈgü dɔ ˈˈgbɩɩ˗ ꞊dedewo kö ˈö ö ˈˈtakɔ yaa ˗nu bho ö ˗bha, ˗yö ˗kë n ˗dhɛ ˗së. Yaa˗ ˗nu yi ˗kë ˈˈtɔŋdë ˈˈgbɩɩ˗ ˈka.» ꞊Dhɛ ˗kɔ ˈö bhë ˗a ˈdhö, ˗ya kë ꞊shiöŋ ˈkwa kwa ˈgü dɔ ˈˈgbɩɩ˗ kö ˈkwa ˈwɔn ˈgüman kwa ꞊dhegblü ˗nu ˗gɔ, ˗dhɔ ˗zɔn ˗an ˗dhɛ ˗sü ˈyaa kë kwa ˗kɔa ˈˈgbɩɩ˗.

18. Kwa ꞊dhegblü ˈbha ˗ya kwa ˗shiödhɛwɔn kë, dhɛɛˈˈ ˗mɛɛn ˗nu ˈö ˈkwa ꞊mɔɔn˗ ˗bha ˈkwa ˗an ˈkpɔ kwa ˗de ˗gɔ? (Proverbes 26:20)

¹⁸ Kwa ꞊dhegblü do ˗ya kwa ˗shiödhɛwɔn kë, kwa˗ ˈˈpiʋ̈ kö ˈkwa ꞊ɲɔɔn ˗a ˗bha ˈkwa˗ ˈˈɲan bhɔ. Pë ˗blɛɛsü ˈö kwa dua ˈdhö ˗mü kö ˈkwa˗ kë ˈyö ˗tɔ ˗kwa kwa dhɛɛˈˈ ˈkpɔ, ˈkwa pö: «ˈWɔn ˈö˗ ˗kë yö, a˗ ˈgüman ˈkpakpadhö ˗ee?» (Prov. 18:13) «˗Ya ˗kë ö ˗de ˈˈɲaan ˗ee?» (Eccl. 7:20) «ˈWɔn suu ˈö ˈˈdhʋ̈, ˈyii zë n ˗gɔ do ˗ee?» (Eccl. 7:21, 22) «ˈMan ˈwɔn ˈö ˈˈdhʋ̈ ˗a blɛɛˈˈ, ˈyii ˗dho kë ˈwɔn ˈˈgbɩɩ˗ ˈka ˈzü ˗ee?» (Proverbes 26:20 ˗wo pö.) ˈKwa ˈˈtʋ̈ŋ ˈsü kö ˈkwa dhɛɛˈˈ ˗nu ˈwo bhë ˗an ˈkpɔ kwa ˗de ˗gɔ, ˈkwa kwa ˗zota ˗an ˈgü, kwa ˗dho ˗a yö ꞊dhɛ kwa ꞊dhegblü ˗dhɔ ꞊mɔɔn˗ ˗bha ˈö kwa ˗blü ˈkwa˗ to ˈˈdhʋ̈.

19. ˈMën ˈkwa ˗dho kwa ˈgü dɔ ˈˈgbɩɩ˗ kö ˈkwa˗ kë?

¹⁹ Zoova ˗bha ꞊Gbɛkiö ˗nu ˗wa ˗zɔn ꞊dhɛ Yesu ˗bha gwëëˈˈ ˗nu ˗mü wo ˈka. ˈˈKɛɛ ˗kɔ ˈö ˈkwa˗ ˗bha do do ˈka kwa˗ ˗zɔn ꞊dhɛ Yesu ˗bha gwëëˈˈ ˗nu ˗mü kwa ˈka ˈö kwa ꞊dhegblü ˗nu ˗dhɔ ˗yö kwa ˗kë, ˈkö ˗kë ꞊dhɛ ˈwɔn ˗nu ˗wo ˗zë ˗an ˗gɔ. ˈKwa˗ kë ˈˈdhʋ̈, mɛn ˈˈwɛɛ ˗nu ˗dho ˗zlanwo ꞊dede dɔ, ˈwo nu kwa ˈˈpiʋ̈ kö kwaa˗ ˗nu ˈkwa Zoova ˈö ˗kë ˗dhɔkaa ˗Zlan ˈka bhë, ˗a gba. ˈDhɛ ˈˈdhʋ̈, ˗kwa pë ˈˈpɛpɛ kë kö ˗dhɔ ˈö Kletiɛn ꞊dede ˗nu ꞊zinŋgü, ˈkwa˗ ˗zɔn.