˗Kɔ ˈö Biblö ˗yö dhɛɛˈˈ ˗nu ˈwo bhë ˗an ˗yɔ bɔ ˗a ˈka, ˗kwaa ˗ga.

Këwɔn ˗nu 24:15 ˗ya ˗pö ꞊dhɛ ˗Zlan ˗dho ‹mɛn kpɛnŋdhö ˗nu waa mɛn ˗nu ˈö ˈwaa kpɛnŋdhö ˗a ˗nu ˗bö ˈö ˈwo go ga ˈgü.› Mɛn kpɛnŋdhö ˗nu ˈnën ˈwo ˗tɔ mɛn ˗nu ˈwo ˈwɔn man ˗Zlan ˗ta ˈwo ꞊kun ga. ˗An ˈtɔ ˗yö ˗këdhösü ˈsëëdhɛ ˈgü. (Mal. 3:16) Mɛn ˗nu ˈö ˈwaa kpɛnŋdhö ˈnën ˈwo ˗tɔ mɛn ˗nu ˈö ˈwii Zoova dɔ ˗së ˈka ˈö to ˈwo ga. ˗A ˗wɔn ˈgü, ˗an ˈtɔ ˈyaa ˗këdhösü ˈsëëdhɛ ˈgü.

Zan 5:28, 29 ˗yö ˗wɩ mɛn kpö ꞊plɛ ˈö Këwɔn ˗nu 24:15 ˗yö ˗an ˗wɔn ꞊blɛɛ bhë, ˗an ˈka. Yesu ˗ya ˗pö ꞊dhɛ «ˈmɛ ˈwo ˈwɔn ˗së ˗kë» ˗wo ˗dho ˗bö ‹ˈö ˈwo ˗tosɛa ˗kë, ˈö ˈmɛ ˈwo ˈwɔn yaa ˗kë ˈwo ˗bö ˈpö kö ˗Zlan ˗yö za dɔ ˗an ˗bha.› Mɛn kpɛnŋdhö ˗nu ˗wo ˈwɔn ˗së ˗kë ˈwo ꞊kun ga. ˗Wo ˗dho ˈgo ga ˈgü kö ˗wo ˗tosɛta kë, ˈyö sü ꞊dhɛ ˗an ˈtɔ ˗yö ˗këdhösü ˈsëëdhɛ ˈgü ˗kplawo. ˈˈKɛɛ mɛn ˗nu ˈö ˈwaa kpɛnŋdhö bhë ˗wo ˈwɔn yaa ˗kë ˈwo ꞊kun ga. ˗Wo ˗dho ˈgo ga ˈgü kö za ˗yö dɔ ˗an ˗bha. ˗An ˈtɔ ˈyaa ˗këdhösü ˈsëëdhɛ ˈgü ꞊köŋ. ˗Wo ˗dho za dɔ ˗an ˗bha ˈˈtʋ̈ŋ ˈnën ˈbha ˈˈpiʋ̈. ˗A pö ˗sü ˗mü ꞊dhɛ ˗wo ˗dho ˗an ˈˈtakɔ ˗nu ˗ga ˗së ˈka. ˈˈTʋ̈ŋ ˈö bhë ˗a ˈka, ˈwɔn ˈö ˗gban Zoova ˗bha ˗wo ˗dho ˗a draanˈˈ, kë ˈˈdhʋ̈ kö ˗an ˈtɔ ˗yö ˗ya ˗këdhösü ˈsëëdhɛ ˈgü.

˗Dhɛkpaɔ dhiaˈˈ ˈsëëdhɛ 20:12, 13 ˗ya ˗pö ꞊dhɛ mɛn ˈˈpɛpɛ ˈwo dho ˈgo ga ˈgü bhë ˗an dua ˗mü kö ‹pë ˗nu ˈwo ˗ya ˗sü ˈka ˈsëëdhɛ ˈgü› ɛɛnˈˈ ˈtɔŋ˗ ˗dɛɛ ˗nu ˈö ˗Zlan dho ˗an dɔ ˈˈkpɔnŋtaadhɛ ˗dɛɛ ˈgü, ˗wo ˗an ˗ya ꞊bhlëë ˈgü. Mɛn ˗nu ˈö ˈwii ˗dho wo ˗gɔ ˈdho Zoova ˗dhɛ ˈˈshia ˗yö ˗dho ˗an ˈgü shiʋ̈ˈˈ.—Is. 65:20.

Daniel 12:2 ˗ya ˗pö ꞊dhɛ mɛn ˗nu ˈö ˗wa ga bhë, ˗a mɛn ˈbha ˗nu ˗dho wlüüˈˈ ‹kö ˗wo ˗tosɛta kë ˗toëpö ˈka, kö ˗a mɛn ˈbha ˗nu ˗de ˈpö ˈlëë˗ ˗yö dɔ ˗an ˗bha, ˗an ˗san ˗yö ˗Zlan kë.› Biblö ˈˈɲan ˈö bhë ˗ya ˗pö ꞊dhɛ mɛn ˗nu ˗dho ˈgo ga ˈgü kö ˗wo ˗tosɛta ˈö ˈyaa ɲën ˗a ꞊slɔɔ ɛɛnˈˈ kö ˗a mɛn ˈbha ˗nu ˗san ˗yö ˗Zlan kë ˗tokpa ˈka. ˈDhɛ ˈˈdhʋ̈, ˗kwɛ 1.000 ˈˈdhiʋ̈tadhɛ ˈgü, mɛn ˈbha ˗nu ˗dho ˗tosɛta ˈö ˈyaa ɲën ˗a ꞊slɔɔ, kö mɛn ˈbha ˗nu ˗de ˈpö ˗wo ˗an ˈgü shiʋ̈ˈˈ ˗toëpö ˈka.—˗Dhɛ. 20:15; 21:3, 4.

ˈWɔnzuan ˈö yö ˗kwaa ˗ga. Mɛn kpö ꞊plɛ ˈwo dho ˈgo ga ˈgü ˗wo ˗dho kë ꞊dhɛ mɛn ˗nu ˈwo˗ ˈˈpiʋ̈ kö ˈwo ˗ya ˈˈsɛ ˈˈwɛɛ ˈgü, ˗an ˈdhö. Mɛn kpɛnŋdhö ˗nu ˗dho kë ꞊dhɛ ˈmɛn ˈwo ˗kë ˈˈsɛ ˈö ˈˈdhʋ̈ ˗a ˈgünën ˈka ˗sü ˈsëëdhɛ ꞊slɔɔ, ˗an ˈdhö. ˈYö mɛn ˗nu ˈö ˈwaa kpɛnŋdhö ˈwo dho kë ˈpö ꞊dhɛ mɛn ˗nu ˈö ˗wa ˈsëëdhɛ ˈö dho ˗a kë kö ˗wo ˈˈtʋ̈ŋ ˈnën ˈbha kë ˈˈsɛ ˈö bhë ˗a ˈgü ˗a ꞊slɔɔ, ˗an ˈdhö. ꞊Waa˗ pö ˈwo ˗kë ˈˈsɛ ˈö bhë ˗a ˈgünën ꞊dede ˈka ˗sü ˈsëëdhɛ ꞊slɔɔ, ˗an dua ˗mü kö ˗wa ˗bha ˈtɔŋ˗ ˗nu ꞊bhlëë ˗ya. ˗Kɔ do ˈö bhë ˗a ˈka mɛn ˗nu ˈö ˈwaa kpɛnŋdhö ˗wa ˈgo ga ˈgü, ˗an dua ˗mü kö ˗wo Zoova ˗bha ˈtɔŋ˗ ˗nu ˗ya ꞊bhlëë ˈgü kö ˗an ˈˈtakɔ kë ˗së, kë ˈˈdhʋ̈ kö ˗wo ˈto ꞊bhɔɔ ˈˈsɛ ˗ta. ˈKö ˗kë ꞊dhɛ ˗dhɛŋ ˗nu ˗wo ˈsëëdhɛ suu ˈˈoo ˗su ˗slɔɔ ˈwo ꞊kun ˗da ˈˈsɛ ˈbha ˈgü, ˗wo ꞊mɔɔn˗ ˗bha ꞊taabha ˈwo˗ mɛn ˈbha ˗nu ˗kë ˈˈsɛgünën ˗nu ˈka ɛɛnˈˈ ˈwo˗ mɛn ˈbha ˗nu ˗kë. ˗Yö ˗dhö ˈsü ˗an ˈˈtakɔ ˗bha. ˗Kɔ do ˈö bhë ˗a ˈka mɛn ˗nu ˈwo dho ˈgo ga ˈgü, ˈpë dho kë ˗an ˈka ˗yö ˗dho ˈsü ˗an ˗bha ˗towotasü waa ˗an ˈˈtakɔ ˈö dho kë ꞊bhɔɔ ˈˈsɛ ˗ta, ˗an ˗bha.

Zoova ˈyaa ˗Zlan ˈö mɛn ˗nu ˗wëë ˗ya ˗kë ˗a ˈka dosɛnŋ. ˗Yö ˗Zlan ˈö ˈwɔn ˗nu ˗kë kpɛnŋdhödhɛ ˈgü ˗a ˈka ˈpö. (Deut. 32:4; Ps. 33:5) ˗Yö ˗dho mɛn kpɛnŋdhö ˗nu waa ˈmɛn ˈwaa kpɛnŋdhö ˗an bho ga ˈgü, kö ˈö˗ ˗zɔn ꞊dhɛ ˗an ˗dhɔ ˗yö ö ˗kë. ˈˈKɛɛ ˗ya ˈˈpiʋ̈ kö ˗an ꞊gban ˈˈpɛpɛ ˗wo ö ˗bha ˈtɔŋ˗ ˈö ˗gban ˈwɔn ˗së waa ˈwɔn yaa ˗an ˗bha ˗a ˗ya ꞊bhlëë ˈgü. Mɛn ˗nu ˈö˗ ˗dhɔ ˗yö ˗an ˗kë, ˈwo˗ ˗bha ˈtɔŋ˗ ˗nu ꞊bhlëë ˗ya, wo dosɛnŋ ˈnën dho ö ꞊kwaa ˗an ˗zü kö ˗wo ˗tosɛta kë ˗kplawo ꞊bhɔɔ ˈˈsɛ ˗ta.