1 Kodhɛngtö 15:8 ˈgü, Pɔdhö ˗ya ˗pö: «Ma ˈa bhë n ꞊tɛiˈ ˗yö ˗kë ꞊nɛ ˈnë ˈö yaa bhɔ ö bhɔ ˈtöng ˈka ˗a ˈdhö.» ˈˈDhiʋ̈ ˗be kwa ˗kun ˗a pö ˗ni ˈgü ꞊dhɛ ˈwɔn ˈö Pɔdhö bɔ ˗a ˈgü kö ˗a ˈˈɲan ˈgü ˗ya ˗da ˗ya ˗kpan Yesu ˗bha kö ˗ya kë ˗gblüdë ˈka dhaŋ˗ ˈgü bhë, ˈyö kun ˗a ˗wɔn blɛɛˈˈ ˗ni ˈgü. ˈYö ˈkwa˗ pö ˗a ꞊tɛɛ˗ ˗kë ꞊dhɛ mɛn ˈö ö bhɔ ˈˈtʋ̈ŋ to ˈˈdhiʋ̈ ˈö bhɔ, ɛɛnˈˈ ˈö ˗kwɛ këŋ ꞊va to ˈˈdhiʋ̈ ˈö ˗go ga ˈgü ˗sü kö ˗wo kë ˗zuu ˈka bhë ˗a ꞊slɔɔ, ˗a ˈdhö. ˈˈKɛɛ ˈkwa Biblö ˈö ˈˈɲan bhë ˗a ˈˈpiʋ̈ ˈpɔn ˗së ˈka, kwa˗ ˗yö ꞊dhɛ kwa dua ˗mü ˈkwa˗ ˈgüman ˗kɔ ˗dɛɛ kë.

˗Yö ˈˈdhʋ̈ ꞊dhɛ Pɔdhö ˗kun ˈwɔn ˈö bɔ ˗a ˈgü ˈö ö zuʋ̈ˈˈ ꞊slëë, ˗a blɛɛˈˈ ˗ni ˈgü. ˈˈKɛɛ ˈmën ˗kë ˈo˗ pö ꞊dhɛ ö ˈti bhɔ ö «bhɔ ˈtöng ˈka»? ˈPë ˗kë ˈö˗ pö ˈˈdhʋ̈, ˗a ˗gɛn ˗yö ꞊va.

˗A ˗bha ö zuʋ̈ˈˈ slëëˈˈ ˗sü ˗yö ˗kan mɛn ˗nu ˈgü, ˈö˗ ˈwɔn mɛn ˗nu kun. ˈNën ˈö˗ bhɔ ˈˈtʋ̈ŋ ˈti ˗wo ˗ya bhɔ, ˗yö ˗kan mɛn ˗nu ˈgü. Sɔdhö (ˈwo˗ ˗dhɛ ꞊taabha Pɔdhö bhë,) ˗yö ˗kun ˈdho ˗ni ˈgü kletiɛn ˗nu ˈˈklʋʋ bhɔ Damasö. ˈYaa kun ˗a ˈˈɲaan ꞊dhɛ ö ˈˈɲan ˈgü ˗dho ˗da, ˈö ˗kpan Yesu ˗bha kö ˗ya ˈgo ga ˈgü. Pɔdhö ˗bha ö zuʋ̈ˈˈ slëëˈˈ ˗sü ˗yö ˗kan yö ꞊dede ˗a ˈgü, ˈö ˗kan ˈpö kletiɛn ˗nu ˈö kun ˈdho ˗ni ˈgü ˗an ˈˈklʋʋ bhɔ Damasö bhë, ˗an ˈgü. ˗Ya ˈgo mü ˈzü pë ˈö ˗kë ˗a ˈka bhë ˗a ˈwɔn ˗ya ˗kun ꞊dedewo, ˈö˗ ˈˈɲɛɛn ˗trö.—Këw. 9:1-9, 17-19.

ˈˈTʋ̈ŋ ˈö ö zuʋ̈ˈˈ ꞊slëë ˗a ˈka bhë, «ˈyaa kun ˈˈtʋ̈ŋ ˗së ˈka.» ꞊Waa˗ pö Glɛkö ˗wo ˈgü ꞊dhɛ ˈnën ˈbha ˈti «bhɔ ö bhɔ ˈtöng ˈka,» ˗a ˗gɛn ˈnën ˗tɔ ꞊dhɛ ˈnën ˈö ˈˈdhʋ̈ «˗yö ˗bhɔ ˈˈtʋ̈ŋ yaa ˈgü.» Biblö do ˈbha ˈgü, ˗wa ˗pö: «˗Yö ˗kë ꞊dhɛ pë ˈa bhɔ kö mɛn ˈbha ˈˈɲan ˈyaa n ˗gɔ ˗a ˈdhö.» ˈˈTʋ̈ŋ ˈö Pɔdhö ˗yö ö zuʋ̈ˈˈ ꞊slëë ˗a ˈka, kö Yesu ˗ya ˈdho ˈsaadhö dhaŋ˗ ˈgü. ˈDhɛ Yesu go ga ˈgü, kö ˗yö ˈti ˈdho dhaŋ˗ ˈgü ꞊köŋ, Pɔdhö ˈti ˗kpan ˗a ˗bha ꞊dhɛ ˗a ˗bha gwëëˈˈ ˗nu ˈö ˗wɩ ˗an ˈka Biblö ˈˈɲan ˈˈwɛɛ ˈgü bhë, ˗an ˈdhö. (1 Ko. 15:4-8) Yesu ˗bha ˈˈkan ˈö˗ wo Pɔdhö ˈgü bhë, ˗ya ˗kë ˈö Pɔdhö ˗yö ˗kpan ˗a ˗bha, ˈkö ˗kë ꞊dhɛ «ˈyaa kun ˈˈtʋ̈ŋ ˗së ˈka.»

ˈYaa kun ö ˗de ˗wɔn blɛɛˈˈ ˗ni ˈgü ˗desüva ˈka. Biblö ˈgüpʋmɛn ˈbha ˗nu ˗wa ˗pö ꞊dhɛ ˗wo ˈö Pɔdhö ˗ya pö bhë, ˗yö ˗kë ꞊dhɛ pë ˈö ꞊bhlëë bho ö ˗de ˗bha ˗a ˈgü, ˗a ˈdhö. Pɔdhö ˗kun ˗a ˈˈpiʋ̈ ˈö˗ pö ꞊dhɛ ˗kë bɔmɛn ˈka ˗sü ˈyaa ö ˗man ˈkun ˗be. ˗A ˗wɔn ˈgü, ˗ya ˗pö: «Ma ꞊në ˈa˗ ˗nu ꞊gban ˗bha ˈnë tɔɔ ˈka, ˗a ˗dhɛ ˗zian ˈyaa˗ ˗bha ꞊dhɛ ma ˗zë ˗wo n ˗dhɛ Yesu ˗bha bɔmɛ, ˗a ˈklɔɔ˗ ˗mü ꞊dhɛ a kë [˗Zlan] ˗bha ˈkɔdhigümɛ ˗nu ˗wëëdhɛ ˗bho ꞊dedewo. ˈˈKɛɛ ˗a ˗bha ˗gasitɛ ꞊në˗ ˈsaa˗ ˈgü, ˈyö ˗duɛ ˈdhɛ ˈa˗ ˈgü ꞊dɛɛ ya ˈa˗ ˈgü.»—1 Ko. 15:9, 10.

˗Dhɛ ˈö ˈˈdhʋ̈, ˗a ˈbha ˗ya kë kö Pɔdhö ˗kun ˗a ˈˈpiʋ̈ ˈö˗ pö ꞊dhɛ Yesu ˗bha ö ˗de ˗zɔn ö ˗dhɛ ˗kɔ bhë ˗yö ˗kan ö ˈgü ˈö˗ ˈwɔn ˗yö ö kun, ɛɛnˈˈ ö ˗bha ö zuʋ̈ˈˈ slëëˈˈ ˗sü ˈyaa kun mɛn ˈbha ˈˈɲaan. Ɛɛnˈˈ ˈzü pë ˗nu ˈö ˗kpan ˗an ˗bha bhë, ˗an yö ˗sü ˈyaa ö ˗man ˈkun ˗bë. ˗Yö ˗kë ˗kɔ ˈˈoo ˗kɔ ˈgü, ˈwɔn ˈö Pɔdhö bɔ ˗a ˈgü bhë ˗ya ˗sü ꞊bhlëëwɔn ˈkpii˗ ˈka. ˗Ya ˗kë ˈö ˈdhaŋ˗ bho Yesu ˗bha ˗go ga ˈgü ˗sü ˈˈdhiʋ̈ ꞊dedewo. ˗Yö Yesu ˗bha ˗go ga ˈgü ˗sü ˗wɔn blɛɛˈˈ ˗ni ˈgü ˈˈtʋ̈ŋ ˈbha ˗nu ˈka, ˗yö ˈwɔn ˈö yö ꞊dede ˈö bɔ ˗a ˈgü bhë ˗a ˗blɛɛ ˈpö. ˗A ˈwɔn dua ˈyaa ˗mü kö ˗yö kwa ˈkun.—Këw. 22:6-11; 26:13-18.