1. ˈMën ˗kë ˈö Yesu ˗ya pö Zoova ˗dhɛ ˗yö ö ˗zokë ö ˗bha gwëëˈˈ ˗nu ˈˈpiʋ̈?

 GBEŊ ˗totaabhasü ˈö Yesu ˗ya ˗kë ˈö ꞊kun ga bhë ˗a ˈgü, ˗yö ˗bhɛɛ ö Dë ˈö dhaŋ˗ ˈgü ˗a ˗dhɛ ˈö˗ pö ˗a ˗dhɛ ˗yö ö ˗zokë ö ˗bha gwëëˈˈ ˗nu ˈˈpiʋ̈. (Zan 17:15, 20) ˗Yö ˈˈdhʋ̈ ꞊dhɛ Zoova ˗yö ö ˗zokë ö ˗dhɔkëmɛn ˗nu ˈˈpiʋ̈, ˈö ö ˗kɔ kpa ˗an ˗ta ˗kplawo. ˈˈKɛɛ ˗a ˈwɔn ˗kun Yesu ˈˈɲaan ꞊dhɛ Sɔtraan ˗dho ö ˗bha gwëëˈˈ ˗nu ˈˈklʋʋ bhɔ ˈzü. Yesu ˗ya ˈwɔn ˗dɔ ˈzü ꞊dhɛ ö ˗bha gwëëˈˈ ˗nu ˗bhawɔn ˗yö Zoova ˗bha ˗takundhe ˗bha, kö Sɔtraan ˗ya nu ˗an ˗gɔ, ˗wo ˗mɔn ˗gban ˗a ˗gɔ ˗sü ˗bha.

2. ˈKwa ˗dhɛ ˗ga Psaume 33:18-20 ˈgü, ˈmën ˗kë ˈö ˈˈsuʋ̈ dua ˈyaa ˗mü kö ˗yö kwa kë ˈwɔn ˈˈgbɩɩ˗ ˗nu ˗gɔ?

² Sɔtraan ˗bha ˈˈkpɔnŋtaadhɛ ˈö yö, ˗yö ˈwɔn ˈˈgbɩɩ˗ ꞊va wɔ ˗ni ˈgü kletiɛn ꞊dede ˗nu ˗ta. ˈˈTʋ̈ŋ ˈbha ˗nu ˈka ˈwɔn ˈˈgbɩɩ˗ ˗nu ˈwo ꞊mɔɔn˗ ˗bha ˗wo kwa ˈgü ga ɛɛnˈˈ ˗wo kwa ˗bha ˗klu Zoova ˗bha ˗sü ˗da ˈgüdandhe ˈgü, ˗wo ˗nu kwa ˗ta. ˈˈKɛɛ ꞊dhɛ ˗kɔ ˈkwa dho ˗a yö ˗a ˈka ˈwɔn ˗gɔ ˈö yö ˗a ˈgü bhë ˗a ˈdhö, ˈˈsuʋ̈ dua ˈyaa ˗mü kö ˗yö kwa kë. Zoova ˈˈɲan ˗yö kwa ˗bha. ˈWɔn ˈˈgbɩɩ˗ ˗nu ˈö ˈkwa bɔ ˗ni ˈgü ˗an ˈgü ˗yö ˗an ˗yö, ˈö˗ ˈˈpiʋ̈ ˈö kwa ˗takun. ˗Kɔ ˈö ‹Zoova ˗yö ö ˗zokë ˗a ˈka mɛn ˗nu ˈwo ˗suʋ̈ ˗a ˗gɔ ˗an ˈˈpiʋ̈,› ˗kwaa ˈwɔnzuan ˗nu ˈwo Biblö ˈgü ˗a ꞊plɛ ˗ga.—Psaume 33:18-20 ˗wo pö.

3. ˈWɔn ˗mɛɛn ˗nu ˈö ˈkwa kë ˗an ˈgü ˈö ꞊mɔɔn˗ ˗bha ˗yö kë kwa ˈgü ꞊dhɛ kwa kwa do ˈka?

³ ˈKö ˗kë ꞊dhɛ kwa ꞊dhegblü ˗nu ꞊va ˗wo ˗zlanwokɔdhi ˈgü, ˈˈtʋ̈ŋ ˈbha ˗nu ˈka ˗yö ꞊mɔɔn˗ ˗bha ˈö ˗kë kwa ˈgü ꞊dhɛ kwa kwa do ˈka. ˗A ˈwɔnzuan ˈnën ˗tɔ wlüünën ˗nu ˗wo wo ˗bha ˗zoyödhe ˗wɔn blɛɛˈˈ ˗ni ˈgü ꞊klaŋplöö, ɛɛnˈˈ ˈzü ˗wa ˈdho ˗zlanwokɔdhi ˈˈwɛɛ ˈgü, ˗yö ꞊mɔɔn˗ ˗bha ˈö ˗kë ˗an ˈgü ꞊dhɛ wo wo do ˈka. Mɛn ˈbha ˗nu ˈgü ꞊mɔɔn˗ ˗bha ˈö ga, ɛɛnˈˈ ˈwo ˈkozë ˗zotadhe yaa ˗nu ˈka, ˈö ˗kë ˗an ˈgü ꞊dhɛ wo dosɛnŋ ˈnën wo dua ˈdhö ˗mü kö ˈwo ˈwɔn ˈˈgbɩɩ˗ bhë ˗a bun. ˈWɔn ˈö kwa zuʋ̈ˈˈ ˈgü ˗a ˗blɛɛ mɛn ˈˈwɛɛ ˗nu ˗dhɛ ˗sü ꞊mɔɔn˗ ˈö ˗kë kwa ˗kɔa ˈˈgbɩɩ˗, ˈyö ˗tɔ kwa ꞊mɔɔn˗ ˗bha ˈkwa˗ pö  kwa ˗de ˗dhɛ ꞊dhɛ ˗a ˈbha ˗ya kë ˗wo ˈti ˗dho ˗a ˈgüman kwa ˗gɔ. Kwa ꞊mɔɔn˗ ˗bha ˗ʒiaanwo ˈkwa˗ ˗ga ꞊dhɛ mɛn gbɛ˗ ˈyaa ö ˗zota kwa ˗wɔn ˈgü. ˈKö ˗kë ˈwɔn ˈˈoo ˗wɔn ˈka, ˈkwa kë kwa ˗de ˈgü ꞊dhɛ mɛn ˈö ö do ˈka ˗a ˈdhö, kwa ˗dho ˗a pö kwa ˗de ˗dhɛ kwa ˗takunmɛn ˈyaa ˈdhö, ˈö zuʋ̈dhiʋ̈tɛ ˗ya kwa ˗bha. Zoova ˈyaa˗ ˈˈpiʋ̈ toŋtoŋdhö kö ˈkwa kwa ˗zota ˈˈdhʋ̈. ˈMën ˗kë ˈkwa˗ pö ˈˈdhʋ̈?

4. ˈMën ˗kë ˈö ˗kë Edhi ˈgü ꞊dhɛ yö dosɛnŋ ˈnën ˈya ˈto?

⁴ ˗Kwa ˗klu ˗Zlan ˗bha ˗mɛn Edhi ˗bha ˈwɔnzuan ˗ga. Ʒezabɛdhö ˗ya ˗pö ö ˗dho ˗a zë. ˗A ˈwɔn ˈgü, Edhi ˗yö ˗duëë ˈö ˗dhɛkpaɔyi ˈö ˗ʒiö 40 ˗ta ˗a ˗kë ˗a ˈgü. (1 Rois 19:1-9) ꞊Taabha, kö yö dosɛnŋ ˗yö ˗gwë ꞊duudhɛ do ˈgü, ˗yö ˈˈgbʋ ˗bɔ ˈö˗ pö Zoova ˗dhɛ: «Man dosɛnŋ ˈnën ˈman ˈto ü ˗wodhiʋ̈lomɛn ˈka.» (1 Rois 19:10) ˗Zlan ˗wodhiʋ̈lomɛn ˈbha ˗nu ˗kun ˈˈsɛ ˈö bhë ˗a ˈgü. ˗A ˈwɔnzuan ˈnën ˗tɔ Abdiasö ˗yö ˗Zlan ˗wodhiʋ̈lomɛn 100 ˗takpa Ʒezabɛdhö ˗gɔ. (1 Rois 18:7, 13) ˈMën ˗kë ˈsa ˈö ˗kë Edhi ˈgü ꞊dhɛ ˈya ˈto ö do ˈka? ˗A ˗bha ˈgü ˗be ˗Zlan ˗wodhiʋ̈lomɛn ˗nu ˈö Abdiasö ˗an ˗takpa bhë, ˗an ꞊gban ˗wa ga ˗ee? ˈDhɛ Zoova ˗ya ˗zɔn ˗an ˗dhɛ ꞊dhɛ ˗Zlan ꞊dede ˗mü ö ˈka Kaamɛdhö ˗tɔn ꞊troo, mɛn ˈbha ˈti kpa Edhi ˗bha kö waa˗ ˗nu ˗wa ˗dhɔkë ˈyö˗ ˗wɔn ˈgü ˈö˗ pö ˈˈdhʋ̈ ˗ee? ˗Ya ˗pö ö ˗de ˗dhɛ ꞊dhɛ ˈwɔn ˈˈgbɩɩ˗ ˗nu ˈö bɔ ˗ni ˈgü ˗an ˈgü bhë mɛn gbɛ˗ ˈyaa˗ ˈwɔn dɔ ɛɛnˈˈ mɛn gbɛ˗ ˈyaa ö ˗zota ö ˗wɔn ˈgü ˗ee? Pë ꞊dede ˈö ˗kë, ˗wo ˈti˗ pö ˗kwɛzlan ˈö bhë ˗a ˈgü. ˈˈKɛɛ kwa ˈwɔn ˗dɔ ꞊dhɛ ˈpë ˗kë ˈö ˗kë Edhi ˈgü ꞊dhɛ yö do ˈnën ˈya ˈto, Zoova ˗ya ˗dɔ, ˈö ˗kɔ ˈö dho ˗a ˗takun ˗a ˈka ˈö kun ˗a ˈˈɲaan ˈka.

5. Zoova ˗yö Edhi ˗zogban ꞊dhɛ ˈyaa ö do ˈka ˗kɔ ˗kë ꞊dhɛ?

⁵ Zoova ˗yö Edhi ˗takun ˗kɔ ꞊va ꞊dede ˗ta. ˗Ya ꞊faanmën kö ˗yö ö zuʋ̈piʋ̈wɔn ˗nu blɛɛˈˈ. ˗Ya dhɛɛˈˈ ˗kpɔ ˈko ˗ta ꞊plɛ ˈö˗ pö: «˗Mën ˈü˗ kë ˗ni ˈgü ˗dhɛ ˈö yö ˗a ˈgü?» (1 Rois 19:9, 13) ˈDhɛ Edhi ö zuʋ̈piʋ̈wɔn ˗nu ꞊blɛɛ ˗a ˗dhɛ, Zoova ˗yö ö ˈˈtʋ ˗to ˗a ˗bha. Zoova ˗ya ˗zɔn Edhi ˗dhɛ ꞊dhɛ ö˗ ˈˈpiʋ̈, ˈgo mü ˈzü ö ˈˈpii ˗yö ˈˈgbɩɩ˗. ˗Yö Edhi ˗zogban ˈpö ꞊dhɛ ö ˗dhɔkëmɛn ˗nu ꞊va ˗wo ꞊kun Izraɛdhö ˗sɛ ˈgü. (1 Rois 19:11, 12, 18) ˈYaa za ˈgü ꞊dhɛ ˈdhɛ Edhi ˗yö ö zuʋ̈piʋ̈wɔn ˗nu ꞊blɛɛ Zoova ˗dhɛ, ˈö Zoova ö ˈˈtʋ to ˗a ˗bha ˗së ˈka ˈö˗ ˗daa ˗kë ˗a ˗gɔ bhë, ˗ya zuʋ̈ˈˈ ˗foo ˗lo. Zoova ˗go mü ˈzü ˈö yö ꞊va dɔ Edhi ˗kɔ ˈka. ˗Ya ˗pö ˗a ˗dhɛ ˗yö ˈˈɲɔn ˗lo Azaɛdhö ꞊troo kö ˗yö kë ˗gblüdë ˈka Sidhi ˗sɛ ˈgü, ˗yö Ʒeu kë Izraɛdhömɛn  ˗nu ˗bha ˗gblüdë ˈka, kö ˗yö Edhize kë ˗Zlan ˗wodhiʋ̈lomɛn ˈka. (1 Rois 19:15, 16) Yö dɔ ˈö Zoova ˗ya wo Edhi ˗kɔ ˈka bhë ˗ya ˗takun ˈyö˗ ˗zo ˗yö to ˈwɔn ˗së ˗nu ˈˈpiʋ̈. ˗Zlan ˗go mü ˈzü ˈö ˈˈtayoo ˗tiaandhö do ˈö ˗kë Edhize ˈka ˗a nu ˗a ˗dhɛ. ˗Ya kë kwa ˈgü ˈpö ꞊dhɛ kwa kwa do ˈka, Zoova ˗dho kwa ˗takun ˗kɔ ˗kë ꞊dhɛ?

6. ˗Ya kë kwa ˈgü ꞊dhɛ kwa kwa do ˈka, ˗mën ˈö ˈkwa ꞊mɔɔn˗ ˗bha ˈkwa˗ ˗dhɛ Zoova ˗gɔ? (Psaume 62:8)

⁶ Zoova ˗ya ˗pö kwa ˗dhɛ ˈkwa bhɛɛˈˈ ö ˗dhɛ. ˈWɔn ˗nu ˈö ˈkwa bɔ ˗ni ˈgü ˗an ˈgü ˗yö ˗an ˗yö, ˈö kwa ˗zogban ꞊dhɛ ö ˗dho ö ˈˈtʋ ˈto kwa ˗bha bhɛɛwo ˗nu ˗bha ˈˈtʋ̈ŋ ꞊gban ˈgü. (1 Tes. 5:17) ˈˈTʋ ˗to ö ˗dhɔkëmɛn ˗nu ˗bha bhɛɛwo ˗nu ˗bha ˗sü ˗ya ˗dhɛ ˗së. (Prov. 15:8) ˗Ya kë kwa ˈgü ꞊dhɛ kwa kwa do ˈka, ˈmën ˈkwa dho bhɛɛˈˈ ˗a ˗wɔn ˈgü? ˗Kwa kwa zuʋ̈piʋ̈wɔn ꞊gban blɛɛˈˈ Zoova ˗dhɛ ꞊dhɛ ˗kɔ ˈö Edhi ˗ya ˗kë ˗a ˈka bhë ˗a ˈdhö. (Psaume 62:8 ˗wo pö.) ˈWɔn ˗nu ˈwo kwa zuʋ̈ˈˈ ˈˈdhiʋ̈ ˈˈtɛ ˗ni ˈgü waa ˗kɔ ˈwo ˗yɛ ˗a ˈka kwa ˗bha, ˗kwaa ꞊gban blɛɛˈˈ ˗a ˗dhɛ. ˗Kwaa pö Zoova ˗dhɛ ˗yö kwa ˗takun kö pë ˗nu ˈö ˈkwa dho ˗an kë ˈˈtʋ̈ŋ ˗nu ˈwo ˈˈdhʋ̈ ˗an ˈgü, ˈkwa ˗an dɔ. ˗A ˈwɔnzuan ꞊nɛn: Ka ˈˈtɛɛbɔ ˗nu ˈwo ꞊klaŋplöö ˗wa dhɛɛˈˈ ˗nu ˈwo ˗gban ka ˗zoyödhɛwɔn ˗nu ˗bha ˗an ˈkpɔ ka ˗gɔ, ˗a ˗daakësü ˈˈsuʋ̈ ˗ya ka kë, ˗ka bhɛɛˈˈ Zoova ˗dhɛ kö ˗yö ꞊faan nu ka ˗dhɛ kö ˈka ˗mɔn ˗zlanwopösü ˗bha ˗an ˗dhɛ. Ka ꞊mɔɔn˗ ˗bha ˈka˗ pö ˗a ˗dhɛ ˗yö ꞊kpɔɔdhɛ nu ka ˗dhɛ kö ˈka dɔ ˗a ˗daakë ˗dhɛ ˈka ˗an ˗gɔ ˗së ˈka. (Dhu. 21:14, 15) ˈGügadhe ˗ya nu ka ˗ta, ˗ka bhɛɛˈˈ Zoova ˗dhɛ kö ˗yö ka ˗takun, kö ˈka ˗mɔn ˗a ˗blɛɛ kletiɛn ˈbha ˈö ˗ya ˗kian ˗a ˗dhɛ ˗sü ˗bha. Ka ꞊mɔɔn˗ ˗bha ˈka˗ pö Zoova ˗dhɛ ˗yö mɛn ˈö ˈka dho dhiaŋzë ˗a ˗dhɛ bhë ˗a ˗takun kö ˈwɔn ˗nu ˈwo ka ˗bha ˗ya ˈgüman ka ˗gɔ. ˈKwa kwa zuʋ̈piʋ̈wɔn ꞊gban blɛɛˈˈ Zoova ˗dhɛ, ˗kɔ ˈö kwa ˗bha bhɛɛwo ˗nu ˗daakë ˗a ˈka, ˗kwa kwa ˈˈtʋ̈ŋ kë ˗a ˈgü. ˗Kwa ˈˈwɩ kwa ꞊dhegblü ˗nu ˗bha ˗takundhe ˗bha ˈpö. ˈKwa˗ kë ˈˈdhʋ̈, ˈyii ˗dho kë kwa ˈgü ꞊dhɛ kwa kwa do ˈka.

7. ˗Gleŋ ˗mɛɛn ˈö ˈkwa˗ sü Modhisio ˗bha?

⁷ Zoova ˗yö yö ꞊bhlëësü dɔ ˗sü ˈka mɛn ˈˈpɛpɛ kwa ˗kɔ ˈka. ˗Yö ga kwa ˈgü ꞊dhɛ pë ˈˈpɛpɛ ˈö ˈkwa˗ kë ˗ni ˈgü ˗a ˗dhɛ ˗zlanwokɔdhi ˈgü ɛɛnˈˈ ˗zlanwopö ˗yö ˈgü bhë ˗ya ˗yö, ˈö ˈwo˗ ˗dhɛ ˗së. (Ps. 110:3) Kwa ˗kɔ ˗ya kë ˗a ˗bha yö ˈgü, ˗yö ˗dho kwa ˗takun ˗kɔ ˗kë ꞊dhɛ kö ˈya ˗dho kë kwa ˈgü ꞊dhɛ kwa kwa do ˈka? Kwa ꞊dhegblü do ˈwo ˗dhɛ Modhisio * ˗kwaa ˗bha ˈwɔnzuan ˗ga. ˈDhɛ Modhisio bɔ ˈˈyi ꞊bhaa ˗a ˗dhɛ ˈti ꞊gwëë ˈyö˗ ˈˈtɔŋdë ˈˈgbɩɩ˗ do ˗ya ˈˈkan ˗sü ˗bha gagade ˗bha. Modhisio ˗ya ˗pö: «ˈDhɛ ˈa˗ yö ꞊dhɛ ˗ya ˈˈkan Zoova ˗bha, n zuʋ̈ˈˈ ˈˈdhiʋ̈ ˗ya ˈˈtɛ ˗sü ˗bha. A˗ ˗pö n ˗de ˗dhɛ n ˗kɔ ˈti ˗dho ꞊mɔɔn˗ ˗bha kö n ˗wo ˈa˗ ˗bhö Zoova ˗dhɛ bhë ˈa˗ ˈgü ˗wɔn kë, kö ˈa ˈto ˗klu ˗sü ˈka ˗a ˗bha ˈkɔdhigümɛn ˗nu ˗bha. A ˗kë n ˗de ˈgü ꞊dhɛ mɛn ˈö ö do ˈka ˗a ˈdhö, ˈa˗ ˗ga ꞊dhɛ mɛn gbɛ˗ ˈti ˗dho ꞊mɔɔn˗ ˗bha kö ˈwɔn ˈö n ˗bha ˗ya ˈgüman.» ˗Mën ˈö Modhisio ˗takun? Yö ꞊dede ˗ya ˗pö: «A n ˗man ˗zlanwopösü ˗dadhiʋ̈. ˗A ˗kë ˈˈdhʋ̈ ˗sü n ˗takun ˈyö ˈmaan ˗ya n ˗de ˗wɔn ꞊zɔnŋ ˗ta ꞊gbɔɔnsü ɛɛnˈˈ ˈö ˈmaan yi zë ˗zotadhe yaa ˗nu ˈka. ˗Zlanwopö mɛn ˈˈwɛɛ ˗nu ˈˈpiʋ̈ ˗sü  ˗ya ˗kë ˈö n ˈti kë n ˗de ˈgü ˈzüdho ꞊dhɛ mɛn ˈö ö do ˈka ˗a ˈdhö.» ˈKö ˗kë ꞊dhɛ kwaa kwa ꞊dhegblü ˗nu ˈkwaa ꞊mɔɔn˗ ˗bha ˈkwa yö ˈˈkpɛɛn ˗zlanwopösü ˈka, kwaa˗ ˗nu ˈkwa ˗zlanwopö kwa ˈkwëë˗ ˈsëëdhɛ ˗nu bɔ ˗sü ˈka ɛɛnˈˈ telefɔnö ˈˈdhiʋ̈, ˗yö kwa ꞊faanmën. ˗Mën ˈbha ˈö Modhisio ˗takun ˈzü? ˗Ya ˗pö: «A n ˗de ˗nu yö ˗dhɛ ˗zlanwokɔdhi ˈgü. A n ˈgü ˗dɔ ˈˈgbɩɩ˗ ˈa n ˗de ꞊baa ˗së ˈka, ˈö ˗wa yö ˗nu nu n ˗dhɛ ˈa˗ ˗kë. ˗Ya ˗kë ˈa˗ yö ꞊dhɛ n ˈˈdhia ˗yö Zoova waa n ꞊dhegblü ˗nu ˗an ˈgü.»

8. ˈWɔn ˈˈgbɩɩ˗ ˗nu ˗wa nu kwa ˗ta, ˗mën ˈö ꞊mɔɔn˗ ˗bha ˗yö kë kwa ˈka?

⁸ ˈˈTʋ̈ŋ ˗totaabhasü ˗nu ˈwo yö ˗an ˈgü, kwa˗ ˈwɔn ˗dɔ ꞊dhɛ kwa ˗dho bɔ ˈwɔn ˈˈgbɩɩ˗ ˗nu ˈgü. (2 Tim. 3:1) ˈˈKɛɛ ˈwɔn ˈˈgbɩɩ˗ ˈbha ꞊mɔɔn˗ ˗bha ˈö ˗kan kwa ˈgü. ˈWëëga ˗wɔn ɛɛnˈˈ ˈˈyua ˈˈgbɩɩ˗ ˈbha, ɛɛnˈˈ ˈzü mɛn ˈbha ˈö˗ ˗dhɔ ˗yö kwa ˗kë ˗a ˗bha ga ˗sü ꞊mɔɔn˗ ˗bha ˈö ˗kan kwa ˈgü. ˈWɔn ˗nu ˗wa yö wo ˈko ˈˈpiʋ̈ ˗wa nu kwa ˗ta, ˗yö ꞊mɔɔn˗ ˗bha ˈö kwa ˈgü ga, ˈö kwa zuʋ̈ˈˈ ꞊kaankwöö. ˈˈKɛɛ kwa ˗zo ˈya ˗dho bhɔ ꞊dhɛ Zoova ˗yö ˈwɔn ˈö ˈkwa˗ ˈgü ˗a ˗yö. ˗A ˗bha ˗takundhe ˈsaa˗ ˈgü, kwa ꞊mɔɔn˗ ˗bha ˈkwa bɔ ˈwɔn ˈˈgbɩɩ˗ suu ˈˈoo ˗suu ˈgü ˗zogbandhe ˈka.

9. ˈWɔn ˈˈgbɩɩ˗ ˗mɛɛn ˗nu ˈwo nu Zɔbö ˗ta?

⁹ ˗Kɔ ˈö Zoova ˗yö ö ˗dhɔkëmɛn Zɔbö ˗takun ˗a ˈka ˗kwa kwa ˗zota ˗a ˈgü. ˈWɔn ˈˈgbɩɩ˗ ˗nu ˗dɔ wo ˈko ˈˈpiʋ̈ ˈwo nu ˗a ˗ta ˈˈtʋ̈ŋ dosɛnŋ ˈgü. Zɔbö ˗bha ˗topë ˗nu ˗wo ˗ga, ˈö ˗a ˈdhɛ to ˈwo˗ ꞊kwaan, ˈö ˗a ˗bha yökëmɛn ˗nu waa˗ ˗bha ˈnën ˗nu ˈwo ga. ˈWɔn ˗nu bhë ˗an ꞊gban ˈˈpɛpɛ ˗wo ˗kë ˗dhɛkpaɔyi dosɛnŋ ˈgü. (Job 1:13-19) Zɔbö ˈti ö bo ˗an ˗gbʋ bɔ ˗sü ˈka, ˈyö ˈˈyua yaa, ˈˈdhiʋ̈dhiʋ̈sü do ˗yö ˗ya ˗a ˗bha. (Job 2:7) ˈWɔn ˈˈgbɩɩ˗ ˗nu bhë ˗an ˗wɔn ˈgü, Zɔbö ˗ya ˗pö: «˗Tosɛta ˗san ˗ya yö n ˈgü, a˗ ˈˈpiʋ̈ ˈa ga.»—Job 7:16.

10. Zoova Zɔbö ˗takun ˗kɔ ˗kë ꞊dhɛ ˗a ˗bha ˈwɔn ˈˈgbɩɩ˗ ˗nu ˈgü? (Pë ˈˈbin ˈö˗ kwi ˗ta bhë ˗a ˗ga.)

¹⁰ Zoova ˈˈɲan ˗kun Zɔbö ˗bha. ˈDhɛ ˗kë ꞊dhɛ ˗a ˗dhɔ ˗ya ˗kë, ˗yö pë ˗nu ˈö˗ ˗bhawɔn kun ˗an ˗bha kö ˈwɔn ˈˈgbɩɩ˗ ˗nu bhë ˗yö bɔ ˗an ˈgü ˗yö ˈto ˗klu ˗sü ˈka ö ˗bha, ˗an ˗nu ˗a ˗dhɛ. Zoova dhiaŋzë Zɔbö ˗dhɛ, ˈö˗ ˗zo ˗bo ꞊dhɛ ö ˗bha ꞊kpɔɔdhɛ ˈˈdhiʋ̈todhɛ ˈyaa ˈdhö, ˈgo mü ˈzü ö ö ˗zokë ö ˗dapë ˗nu ˈˈpiʋ̈. ˗Yö wü ˈˈmlünmlünsü ˗nu ꞊va ˗wɔn ˗blɛɛ. (Job 38:1, 2; 39:9, 13, 19, 27; 40:15; 41:1, 2) ˈYö ˗bɔ ˈzü wlüünën ˈwo˗ ˗dhɛ Edhiu bhë ˗a ˗ta ˈö Zɔbö ˗zogban, ˈö˗ ꞊faanmën. Edhiu Zɔbö ˗zogban ꞊dhɛ Zoova ˗dhɔkëmɛn ˗nu ˗wa ˈto ˗klu ˗sü ˈka ˗a ˗bha ˈwɔn ˈˈgbɩɩ˗ ˗nu ˈgü, ˗yö ˈdhuëë˗ ˗kpɔ ˗an ˗bha ˗kplawo. ˗Yö Zɔbö ˗takun kö ˈya ˗dho ö ˗zota ö ˗de ˗wɔn ˈgü ꞊gbɔɔnsü, ˗a ˗zo ˗bo ˗sü ˈka ꞊dhɛ Zoova ˈö ˈˈkpɔnŋtaadhɛ ˗todhʋ̈sü ˗Damɛn ˈka, ˗yö ˈkpii˗ fɔnŋfɔnŋdhö ˈö ˗ʒiö ˗a ˈka ˗a ˗ta. (Job 37:14) Zoova ˗yö yö ˈbha ˗dɔ ˈpö Zɔbö ˗kɔ ˈka. ˗Ya ˗pö ˗a ˗dhɛ ˗yö bhɛɛˈˈ ˗a ˈˈtɔŋdë ˗nu ˗yaaga ˈwo kun ˈwɔn yaa kë ˗ni ˈgü bhë ˗an ˗bha ˈka. (Job 42:8-10) ˈKwa kë ˈwɔn ˈˈgbɩɩ˗ ˗nu ˈgü ˈpö ꞊dɛɛ, Zoova kwa ˗takun ˗kɔ ˗kë ꞊dhɛ?

11. Kwa bɔ ˗ni ˈgü ˈwɔn ˈˈgbɩɩ˗ ˗nu ˈgü, Biblö kwa ˗takun ˗kɔ ˗kë ꞊dhɛ?

¹¹ Zoova ˈyaa ˈwɔn blɛɛˈˈ kwa ˗dhɛ vɛɛdhö ꞊dhɛ ˗kɔ ˈö˗ ˗kë ˗a ˈka Zɔbö ˈka bhë ˗a ˈdhö. ˈˈKɛɛ ˗yö ˗bɔ ö ˈˈDhiwo ˈö ˗kë Biblö ˈka ˗a ˗ta ˈö dhiaŋzë kwa ˗dhɛ. (Wlɔ. 15:4) ˗Yö ˗bɔ ˗zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗ta ˈö kwa ˗zogban. ˗Wo ˗nu ˈwo Biblö ˈgü ˈö ˈkwa kë ˈwɔn ˈˈgbɩɩ˗ ˗nu ˈgü ˈwo ꞊mɔɔn˗ ˗bha ˗wo kwa ˗zogban, ˗kwaa ˈbha ˗nu ˗ga. Biblö ˈgü, Zoova kwa ˗zogban ꞊dhɛ pë ˈbha ˗bha ˈbha, ˈö yö˗ ˈka ˈwɔn ˈˈgbɩɩ˗ ˗nu ˗bha, ‹ˈyii ˈdho ꞊mɔɔ˗ ˗bha kö ˗yö kwa ˈˈkan ˗dhɔ ˈö˗ ˗kë kwa ˈka bha˗ ˗bha.› (Wlɔ. 8:38, 39) ˗Yö kwa ˗zogban ˈpö ꞊dhɛ ‹mɛn ˈˈpɛpɛ ˈwo ö ˗dhɛ, ˈö ˈwo ꞊bhɛɛ ö ˗dhɛ zuʋ̈ˈˈ ˈˈpuu ˈka, ö ˗an ˈˈsuee.› (Ps. 145:18) Zoova ˗ya ˗pö kwa ˗dhɛ ꞊dhɛ ˈkwa kwa ˗zo yö ö ˗dhɛ, kwa ꞊mɔɔn˗ ˗bha ˈkwa ˈwɔn ˈˈgbɩɩ˗ suu ˈˈpɛpɛ bun, ˈö ˈkwa ˗ya ˗an ˈˈyi ꞊bhaa ˈö zuʋ̈gblüdhi ˗kë kwa ˗gɔ. (1 Ko. 10:13; Zak. 1:2, 12) ˗Zlan ˗Wo kwa ˗zogban ˈzü ꞊dhɛ ˈwɔn ˈˈgbɩɩ˗ ˗nu ˈö kwa bɔ ˗ni ˈgü  ˗an ˈgü ꞊dɛɛ ˗wo ˗dho ɲën, ˈˈkɛɛ ˈwɔn ˗së ˗nu ˈö ˈkwa dho ˗an ꞊slɔɔ ˗dhɛkpaɔ dhiʋ̈ˈˈ ˈgü ˗wo ˗dho ˈto ˗toëpö ˈka. (2 Ko. 4:16-18) Zoova ˗ya ˗pö ꞊dhɛ kwa ˗bha ˈwɔn ˈˈgbɩɩ˗ ˗nu ˈwo ꞊dɛɛ ˗an ˗gɛngodhɛ ˗nu ˈwo ˗kë Sɔtraan Dügɔmɛn waa ˈwɔnyaakëmɛn ˗nu ˈˈpɛpɛ ˗an ˈka bhë, ö ˗dho ˗an ˈgü shiʋ̈ˈˈ. (Ps. 37:10) Biblö ˈˈɲan ˗nu ˈwo ꞊mɔɔn˗ ˗bha ˗wo kwa ˗takun kö ˈwɔn ˈˈgbɩɩ˗ ˗nu ˈwo dho nu kwa ˗ta dhiʋ̈ˈˈ ˈkwa ˗mɔn ˗bɔ ˗an ˈgü ˗sü ˗bha, ˗wo kwa ˈˈɲaan ˗ee?

12. ˈMën Zoova ˈdhö˗ ˈˈpiʋ̈ ˈkwa˗ kë kö ö ˗Wo ˗yö kwa ˗takun?

¹² Zoova ˗ya ˈˈpiʋ̈ kö ˈkwa ˈˈtʋ̈ŋ ˈsü ˈkwa Biblö ˗wo pö zoodhö zoodhö, ˈkwa kwa ˗zota ˗a ˈgü. Pë ˗nu ˈö ˈkwa ˗an draanˈˈ ˗ni ˈgü ˈkwa ˗an ˗ya ꞊bhlëë ˈgü, kwa ˗bha ˗zoyödhe ˗kë ˈˈgbɩɩ˗, ˈö kwaa kwa Dë ˈö dhaŋ˗ ˈgü kwa ˗bha ˈˈtɔŋdëdhɛ ˗yö yɔ. ˗A ˗kë ˈˈdhʋ̈ ˗sü ˗dho ꞊faan nu kwa ˗dhɛ ˈö ˈkwa kwa ˗bha ˈwɔn ˈˈgbɩɩ˗ ˗nu bun. Zoova ˗yö ö ˗bha ˗zuu ˈˈslʋ̈ʋ̈slʋ̈ ˗nu ˈpö mɛn ˗nu ˈwo ˈdhaŋ˗ bho ˗a ˗Wo ˈˈdhiʋ̈ ˗an ˗dhɛ. ˗A ˗bha ˗zuu ˈˈslʋ̈ʋ̈slʋ̈ ꞊mɔɔn˗ ˗bha ˈö «gügbɩɩdhɛ ˗ziisü» nu kwa ˗dhɛ kö ˈkwa kwa ˗bha ˈwɔn ˈˈgbɩɩ˗ ˗nu bun.—2 Ko. 4:7-10.

13. ˗Zuu ˈgü ˗bhöpë ˈö gwëëmi ˗towotasü ˈdhö˗ nu ˗ni ˈgü kwa ˗dhɛ bhë, ˗yö ˗dho kwa ˗takun ˗kɔ ˗kë ꞊dhɛ ˈwɔn ˈˈgbɩɩ˗ ˗nu ˈgü?

¹³ Zoova ˗bha ˗takundhe ˈsaa˗ ˈgü, «gwëëmi ˗towotasü ˈö ꞊kpaɔsü» ˗ya ˈsëëdhɛ ˗nu, video ˗nu, waa ˈˈtan ˗nu ˈwo dho kwa ˗bha ˗zoyödhe kë ˈˈgbɩɩ˗ kö ˈkwa ˈto kwa ˈˈɲaan ˗Zlan ˗dhɔkësü ˈgü, ˗an nu kwa ˗dhɛ. (Mat. 24:45) Kwa dua ˗mü kö ˈkwa yö ˗së kë pë ˈˈpɛpɛ ˈö Zoova ˗an nu kwa ˗dhɛ bhë ˗an ˈka. ˗A yi ˈti ꞊gwëë ꞊köŋ, kwa ꞊dhegblüdhe do ˈö Zeta zuni ˗yö kwa ˈˈdhiʋ̈ʒiöwomɛn ˗nu ˈˈnuɛ ˗bho ˗zuu ˈgü ˗bhöpë ˈwo˗ nu ˗ni ˈgü kwa ˗dhɛ bhë, ˗a ˗bha. ˗Ya ˗pö: «˗Kwɛ 40 ˈö ˈman˗ kë Zoova ˗dhɔkësü ˈgü bhë ˗a ˈgü, n ˗man ˗klu ˗a ˗bha ˗sü ˗yö ˗da ˈgüdandhe ˈgü ˈko ˗ta ꞊va.» ˗Yö ˗bɔ ˈwɔn ˈˈgbɩɩ˗ ꞊va ˈgü. Mɛn do ˈö we ˗ya kun, ˗yö ˗gban ˗a ˈʒiö˗ ˗bha gɔ ˈka, ˈö˗ zë. ˈˈYua ˈˈgbɩɩ˗ ˗nu ˗wa ˗mɛn ˗nu ˗kë, ˈö ˈwo to ˗an ꞊kwaa. Yö ꞊dede ˈˈyua ˈwo˗ kanŋsɛɛ ˗kë bhë, ˗ya ˗kë ˈko ˗ta ꞊plɛ. ˗Mën ˈö˗ ˗takun ˈö bɔ ˈwɔn ˈˈgbɩɩ˗ ˗nu ˈwo ˈˈdhʋ̈ ˗an ˈgü? ˗Ya ˗pö: «Zoova ˗yö ö ˗zokë n ˈˈpiʋ̈ ˈˈtʋ̈ŋ ꞊gban ˈka. ˗Zuu ˈgü ˗bhöpë ˈö bɔ gwëëmi ˗towotasü ˈö ꞊kpaɔsü ˗a ˗ta ˈö˗ nu ˗ni ˈgü kwa ˗dhɛ bhë, ˗yö n ˗takun ꞊dede ˈyö ˈa n ˗man ˈwɔn ˈˈgbɩɩ˗ ˗nu bun. ˗A ˗wɔn ˈgü, ꞊dhɛ Zɔbö ˈdhö a ꞊mɔɔn˗ ˗bha ˈa˗ pö: ‹ˈÖ dho ˈö yö ˗a ˈka n ga ˗yi ˗bha, n ˈti ˗dho n ꞊kwaa n ˗man ˗klu ˗Zlan ˗bha ˗sü ˗zü!›»—Job 27:5.

14. Zoova ˗bɔ kwa ꞊dhegblü ˗nu ˗ta ˈö kwa ˗takun kwa ˗bha ˈwɔn ˈˈgbɩɩ˗ ˗nu ˈgü ˗kɔ ˗kë ꞊dhɛ? (1 Tesadhonikö 4:9)

¹⁴ Zoova ˗yö ˗dhɔ ˗kë wo ˈko ˗nu ˈka ˗sü waa wo ˈko ˗nu ˗zogban ˗sü ˈö ˈˈtʋ̈ŋ ˈˈgbɩɩ˗ ˗nu ˈgü ˗a ˗zɔn ö ˗dhɔkëmɛn ˗nu ˗dhɛ. (2 Ko. 1: 3, 4; 1 Tesadhonikö 4:9 ˗wo pö.) ꞊Dhɛ Edhiu ˈdhö, kwa ꞊dhegblü ˗nu ˗wa ˈˈpiʋ̈ ꞊dedewo ˈwo kwa ˗takun kö ˈkwa ˈto ˗klu ˗sü ˈka ˗Zlan ˗bha ˈwɔn ˈˈgbɩɩ˗ ˗nu ˈgü. (Këw. 14:22) ˈDhɛ ˈˈyua ˈˈgbɩɩ˗ ˗yö ˗ya Dianö ꞊gɔɔn ˗bha, ˗a ˗bha ˗zlanwokɔdhigümɛn ˗nu ˗wa ꞊faanmën, ˈwo ˗takun kö ˗yö ˈto ˗klu ˗sü ˈka Zoova ˗bha. ˗Ya ˗pö: «ˈYaa kun ˈˈplëëplë, ˈˈkɛɛ a˗ ˗yö ꞊dhɛ Zoova ˗yö yi ˗takun ˈˈtʋ̈ŋ ˈˈgbɩɩ˗ ˗nu bhë ˗a ˈgü. Yi ˗bha ˗zlanwokɔdhigümɛn ˗nu ˗wo pë ꞊va ꞊dede ˗kë kö ˈwo yi ˗takun. ˗Wo ˗wo yi ˗dhɛ, ˈwo yi ˗dhɛ telefɔnö ˈˈdhiʋ̈, ˈö ˗wa ˗kpan yi ˗bha ˈwo wü yi ˗bha ˈˈwowosü ˈka. ˗Yö yi ˗takun ˈyö ˈyi bɔ ˈwɔn ˈˈgbɩɩ˗ ˗nu bhë ˗an ˈgü. ˈDhɛ ˗kë ꞊dhɛ ˈmaan gɔ ˗blü ˗dhɛ dɔ, kwa ꞊dhegblü ˗nu pë ˈˈpɛpɛ ˗kë ˈwo nu n ˗gɔ ʒiaan˗ kö ˈyi ˈdho ˗bhɔkwëë ˗nu ˗ta ɛɛnˈˈ ˈzü ˗zlanwopö.» ˗A kë ˗sü kö kwa ꞊dhegblü ˗nu ˈö kwa ˗dhɔ ˗yö ˗an ˗kë ˗wo kë kwa ˗bha ˗zlanwokɔdhi ˗nu ˈgü bhë, ˗yö kwa zuʋ̈ˈˈ ꞊nii ˗da ꞊dedewo.

15. ˈMën ˗kë ˈö ga kwa ˈgü ꞊dhɛ kwa ꞊mɔɔn˗ ˗bha ˈkwa ˈwɔn ˈˈgbɩɩ˗ ˗nu bun?

¹⁵ Mɛn ꞊gban ˈˈpɛpɛ kwa ˗dho bɔ ˈwɔn ˈˈgbɩɩ˗ ˗nu ˈgü. ˈˈKɛɛ ꞊dhɛ ˗kɔ ˈkwa˗ yö ˗a ˈka bhë ˗a ˈdhö, ˗yö kë kwa ˈˈɲaan ꞊dhɛ ˈkwaa kwa do ˈka. ꞊Dhɛ ˈnëndë ˈö˗ ˗bha ˈnën ˗nu ˗dhɔ ˗ya ˗kë ˗a ˈdhö, Zoova ˗zo ˗yö kwa ˈˈpiʋ̈. ˗Yö kwa ꞊kee˗, ˈö˗ ˈˈpiʋ̈ ꞊dedewo kö ˈö ö ˈˈtʋ ˈto kwa ˗bha bhɛɛwo ˗nu ˗bha, ˈö kwa ˗takun. (Is. 43:2) ˗Yö ga ˗sü ˈka kwa ˈgü ꞊dhɛ kwa ꞊mɔɔn˗ ˗bha ˈkwa bɔ ˈwɔn ˈˈgbɩɩ˗ ˗nu ˈgü, ˈyö ˗tɔ ꞊dhɛ pë ˈˈpɛpɛ ˈö kwa ˗bhawɔn ˈdhö˗ ˗bha kö ˈkwa ˗an bun, Zoova ꞊yaa˗ nu kwa ˗dhɛ. ˗Yö ꞊bhlëëwɔn ˈkpii˗ ˈö ˗kë ˗bhɛɛ ˗a ˗dhɛ ˗sü ˈka ˗a ˈˈsɩ kë kwa ˗dhɛ, ˈö Biblö nu kwa ˗dhɛ. ˗Yö ˗go mü ˈzü ˈö ˗zuu ˈgü ˗bhöpë ꞊va waa kwa ꞊dhegblü ˗nu ˈö kwa ˗dhɔ ˗yö ˗an ˗kë ˗an ˗nu kwa ˗dhɛ, kö ˗wo kwa ˗takun ˈˈtʋ̈ŋ ˈˈgbɩɩ˗ ˗nu ˈgü.

16. Kwa ˗dho ˗a kë ꞊dhɛ kö ˈkwa ˈto Zoova ˗kɔ ꞊wlöö?

¹⁶ ˗A kë ˗sü kö kwa Dë ˈö dhaŋ˗ ˈgü ˗yö ö ˗zokë kwa ˈˈpiʋ̈ bhë, kwa˗ ˈˈnuɛ ˗bho ˗a ˗bha ꞊dedewo. «Kwa zuʋ̈ˈˈ ꞊nii ˗yö ˗da ˗sü ˈka ˗a ˗wɔn ˈgü.» (Ps. 33:21) ˈKwa˗ pö ˈkwa˗ ˗zɔn ꞊dhɛ ö ˗zo ˈö˗ kë ˗ni kwa ˈˈpiʋ̈ ˗dhɔ ˈgü bhë kwa˗ ˈˈnuɛ ˗bho ˗a ˗bha, kwa dua ˗mü kö pë ˈˈpɛpɛ ˈö˗ nu kwa ˗takunpë ˈka, ˈkwa˗ ˗wɔn ˈkun kwa ˗kɔ ꞊plɛ ˈka. Kwa dua ˗mü ˈpö kö ˈkwa pë ˈˈpɛpɛ kë ˈkwa ˈto ˗Zlan ˗kɔ ꞊wlöö. ˗A ˗pö ˗kɔ ˈˈwɛɛ ˈgü ˗sü ˈka, ˈkwa kwa ˈgü dɔ ˈˈgbɩɩ˗ ˈkwa ˈwɔn man Zoova ˗ta, ˈwɔn ˗nu ˈwo˗ ˗dhɛ ˗së ˈkwa ˗an kë, ˗yö ˗dho ö ˗zokë kwa ˈˈpiʋ̈ ˗toëpö ˈka.—1 Piɛ. 3:12.