ˈWɔn ˗gɔ ˈö bhë ˗a ˈgü, kwa˗ yö ꞊dhɛ pë dosɛnŋ ˈö˗ wɔn ˈdhö ˈˈgbɩɩ˗ ꞊dedewo mɛnbhɩɩdhe ˗nu waa ˈˈkiö ˗nu ˗an ˗bha ˈka ˈyö ˗tɔ Zoova ˈtɔ ˗kë ˈˈslʋ̈ʋ̈slʋ̈ ˗sü. ˗A pö ˗sü ˈö ꞊dhɛ Zoova ˗bha mɛnkɔɔnsü ˗yö ˗së ɛɛnˈˈ ˈyaa ˗së bhë, ˗yö ˗pa ˗a ˈtɔ ˈka. ˗Kɔ do ˈö bhë ˗a ˈka mɛn ˗ya ˈto ˗klu ˗sü ˈka ˗Zlan ˗bha ɛɛnˈˈ ˈyii˗ kë ˈˈdhʋ̈, ˗yö ˗pa Zoova ˈtɔ ˈka.

ˈMën ˗kë ˈkwa˗ pö pë dosɛnŋ ˈö˗ ˗wɔn ˈdhö ˈˈgbɩɩ˗ ˈyö ˗tɔ Zoova ˈtɔ ˗kë ˈˈslʋ̈ʋ̈slʋ̈ ˗sü? ˈPë ˗kë, ˗kwaa ˗yaaga ˗wɔn blɛɛˈˈ.

˗A ˗blɛɛsü ˈnën ˗tɔ Sɔtraan ˗yö ˗dhii ˗ya Zoova ˈtɔ ˗bha Edɛnö ˈˈdhüdhɛɛdhö. Dhɛɛˈˈ ˈö Sɔtraan ˗ya kpɔ Ɛvö ˗gɔ ˗a ˈgü, ˗yö ˗kun ˗a ˈˈpiʋ̈ kö ˈö˗ pö ꞊dhɛ Zoova ˈˈgblü ˈyaa ˗së, ˗a ˗bha ˈtɔŋ˗ ˗nu ˗wo ˈˈgbɩɩ˗. Sɔtraan ˗yö ˗go mü ˈzü ˈö Zoova ˗wo bho ˈˈgblʋʋ, ˈö˗ pö ꞊dhɛ ꞊suamɛn ˗mü ˗a ˈka. ˗A ˗wɔn ˈgü, ˗yo ˗dhii ˗ya Zoova ˈtɔ ˗bha ˈö ö ˗de ˗kë ‹Dügɔmɛn› ɛɛnˈˈ ‹꞊suamɛn ˈka.› (Zan 8:44) Ɛvö ˗bha Zoova ˗wo ˗lögü ˗sü ˗ya ˗zɔn ꞊dhɛ ˈyaa kun ˗a ˈˈpiʋ̈ kö Zoova ˗yö ˈˈdhiʋ̈sü ö ˈka. (ˈWun. 3:1-6) ˈÖ sü yi ˈö bhë ˗a ˗bha, Sɔtraan ˗yö ˗dhii ˗ya Zoova ˈtɔ ˗bha ˈö ꞊suawɔn ˗nu ꞊blɛɛ ˗a ˗bha. Mɛn ˗nu ˈwo ˈdhaŋ˗ bho ˗a ˗bha ꞊sua ˗nu ˈˈdhiʋ̈, ˗wo Zoova ˗wo ˗lögü. ˈˈKɛɛ Zoova ˗dhɔkëmɛn ˗nu ˗zë ˗an ˗bha ˈgü, ˗dhii ˗ya ˗a ˈtɔ ˗bha ˗sü ˈö ˈˈdhʋ̈ ˗yö ˈwɔn yaa ꞊gbɔɔnsü ˈka. ˗A ˗wɔn ˈgü, saanˈˈ waa ˈwɔn ˈˈgbɩɩ˗ ˗nu ˗wo ˗pɛn ˗sü ˈka ˈˈkpɔnŋ ꞊taa.

˗A ꞊plɛ ˗bha ˗naan ˈnën ˗tɔ ˈwɔn ˗së ˗kë ö ˗dapë ˗nu ˗dhɛ sü ˗wɔn ˈgü, Zoova ˗dho pë ˈˈpɛpɛ kë kö ˗dhii ˈwo˗ ˗ya ö ˈtɔ ˗bha bhë, ˈö˗ ꞊gban bho mü. ˗A ˗kë ˈˈdhʋ̈ ˗sü ˗wɔn ˗yö ˈˈgbɩɩ ꞊dedewo ˗a ˗bha ˈka. ˗A ˗wɔn ˈgü, ˗ya ˗pö: «A ˗dho n ˈtɔ ˈkpii˗ ˈö ˗bhë ˗a kë ˈˈslʋ̈ʋ̈slʋ̈.» (Ézéch. 36:23) Yesu ˗ya ˗pö Zoova ˗dhɔkëmɛn ˗nu ˈwo ˗klu ˗a ˗bha ˗an ˗dhɛ ꞊dhɛ ꞊waa˗ pö ˈwo bhɛɛˈˈ, ˗wo pë ˗wɔngbɩɩsü ˗wɔn blɛɛˈˈ ˗wa pö: «I ˈtɔ ˈö ˈˈslʋ̈ʋ̈slʋ̈ bha ˗yö bhɔ ˗dhɛ ꞊gban ˈˈpɛpɛ ˈgü.» (Mat. 6:9) Biblö ˗yö ˈpë ˗kë ˈö Zoova ˈtɔ bhɔ ˗sü ˗wɔn ˈdhö ˈˈgbɩɩ˗ ˗a ˗blɛɛ ˈko ˗ta ꞊va. ˗A ˈwɔnzuan ˈbha ˗nu ꞊nɛn: Biblö ˗ya ˗pö: «ˈTɔbhɔdhe ˈö Zoova dua ˈka, ˗kaa nu ˗a ˗dhɛ.» (1 Chron. 16:29; Ps. 96:8) ˈÖ go mü ˈö˗ pö: «˗Kwa ˈˈwɩ ˗a ˈtɔ ˈˈpiʋ̈ ˈˈtan ˈgü.» (Ps. 66:2) ˗Ya ˗pö ˈzü: «A ˗dho ü ˈtɔ bhɔ ˗toëpö ˈka.» (Ps. 86:12) ˈˈTʋ̈ŋ ˈö Zoova yöö ꞊dede ˈö ˈwɔn ꞊blɛɛ ˗a ˈka, ˗a do ˗yö ˗kë ˗a ˗dhɔkëgükɔ ˈgü Zedhizadhɛmö. Yi ˈö ˈˈdhʋ̈ ˗a ˈka, Yesu ˗ya ˗pö: «N Dë, bhi ꞊në ˗bhö i ˈtɔ bhɔ!» Zoova ˗ya ˗daakë ˈö˗ pö: «A ˗bhɔ n ˈtɔ ˗zë bhɔ ˗sü ˈka zii ˈnu ˗blɛɛsü, ˈˈkɛɛ a ˗dho ˗a ˈbha bhɔ ˈzü ˗deewo.»—Zan 12:28. a

˗A ˗yaaga ˗bha ˗naan ˈnën ˗tɔ Zoova dhɔɔbhaawɔn waa˗ ˈtɔ ˗wo ˗gban ˗sü ˈka wo ˈkwëë˗. Klito ˗bha ˗kwɛ ˈˈgblü do ˗Gblüdëdhɛ kë ˗sü ˈˈtʋ̈ŋ ˗ya ʒiö, ˈkwa bɔ ˈgüdandhe ˗totaabhasü ˈgü ˗kɔ ˈö Zoova ˈtɔ dho bhɔ ˗a ˈka, ˗kwa kwa ˗zota ˗a ˈgü. Pë ˈö ˗gban Zoova ˈtɔ ˗bha ˗kë ˈˈslʋ̈ʋ̈slʋ̈sü ˗bha bhë, ˈˈkiö ˗nu waa mɛnbhɩɩdhe ˗nu ˗an ˗wo ˈti ˗dho kë ˗a ˈgü do ˈzü ˗ee? ˈWɔn  ꞊plɛ ˈwo dho kwa ˗takun kö ˈkwa˗ ˗yɔ bɔ ˈnën ˈwo ˗tɔ mɛnbhɩɩdhe ˗nu ˗bha ˗to ˗wo ˗ta ˗sü waa Zoova ˗bha ˗kë mɛnkɔɔnmɛn ˗së ˈka ˗sü. ˈˈTʋ̈ŋ ˈö ˈˈdhʋ̈ ˗a ˈka, mɛnbhɩɩdhe ˗nu ˗bhawɔn ˈti ˗dho yö ˈzu ˗a ˗zɔn ˗sü ˈö ꞊dhɛ ˗wo ˗to wo ˗wo ˗ta ˗a ˗bha, ˈyö sü ꞊dhɛ ˈwɔn yaa kë ˗dhii ˗ya ˈgo ˗an ˗bha, ˗wa bɔ ˈgüdandhe suu ꞊va ˈgü. ˗Wo ˗dho ˗tosɛta ˈö ˈyaa ɲën ˗a kë. Zoova ˗bha ˗kë mɛnkɔɔnmɛn ˗së ˈka ˗sü ˗dho ˗da zɔɔdhe ˈgü ˈzü kö ˗ya ˗dapë ˗nu ˈˈpɛkoo ˗ee? ˗Abin. Mɛn ꞊gban ˈˈpɛpɛ ˗dho ˈˈwɩ ˗a ˗bha mɛnkɔɔnsü ˗bha. ˈYö Zoova ˈtɔ ˗zë ꞊wɛ?

Zoova ˈtɔ ˗dho kë ˈˈslʋ̈ʋ̈slʋ̈ ˈö ˗dhii ˗yö go ˗a ˗bha ˈpapadhö. ˗A ˗dhɔkëmɛn ˗nu ˈwo dho kë dhaŋ˗ ˈgü waa ˈˈsɛ ˗ta yö, ˗wo ˗dho ˗a ˈtɔ ˈsü ꞊dhɛ pë ˗wɔngbɩɩsü ˈdhö ˗kplawo. ˈMën ˗kë? ˈYö ˗tɔ ˗wo ˗dho ˗a yö ꞊dhɛ Zoova ˗yö ˈwɔn ˈˈmlünmlünsü ˗nu kë ˗ni ˈgü ˈˈtʋ̈ŋ ꞊gban ˈka. Yesu ˗dho ö ˗gɔ ˈdho ö Dë ˗dhɛ ˈˈshia˗ ˈö ˗Gblüdëdhɛ ˗nu ˗a ˗dhɛ kö Zoova ‹˗yö ˗ya pë ꞊gban ˈˈpɛpɛ ˗gɔ ˈˈdhiʋ̈.› (1 Ko. 15:28) -Ya bo ˗kë ˈˈdhʋ̈ ˗sü ˈka, mɛnbhɩɩdhe ˗nu zuʋ̈ˈˈ ˈˈgblü ˗dho dhi ‹ˈö ˈwo ˗ya wo ˗dɩ ˈflëë˗ ˈgü [˗Zlan] ˗bha ˈnë ˗nu mɛdhɛkëyi ˈka.› (Wlɔ. 8:21) Zoova dhɔɔbhaawɔn ˗nu ˈö ˗gban ˗a ˗bha ˈnën ˗nu ˈwo dhaŋ˗ ˈgü waa˗ mɛn ˗nu ˈwo ˈˈsɛ ˗ta ˗an ˗kɔ ˗bha ˗kë ˈwɔn do ˗bha ˗sü ˗bha bhë, ˗dho yökodhiʋ̈.—Efɛ. 1:10.

ˈWɔn ˗nu ˈwo bhë ˗an ꞊gban ˗wa kë, Zoova ˗bha ˈnën ˗nu ˈwo dhaŋ˗ ˈgü waa˗ mɛn ˗nu ˈwo ˈˈsɛ ˗ta ˗wo ˗dho kë wo ˗de ˈgü ꞊dhɛ? ˈYaa za ˈgü ꞊dhɛ Zoova ˈtɔ bhɔ ˗sü ˗dhɔ ˗dho ˗da kwa ˈgü ˈzü ꞊dedewo. Psaume ˗bɛnzëmɛn Davi ˗ya ˗pö: «Zoova ˗Zlan ˈtɔ ˗yö bhɔ. ˗A ˈtɔ ˈkpii˗ ˗yö bhɔ ˗toëpö ˈka.» (Ps. 72:18, 19) Pë ˗nu ˈwo dho kwa ˗blü kö ˈkwa˗ ˈtɔ bhɔ ˗toëpö ˈka, kwa ˗dho ˗a ˈbha ˗nu dɔ ˗kplawo.

Zoova ˈtɔ ˗yö ˗gban ˗sü ˈka pë ˈˈpɛpɛ ˈö˗ ˈka ˗a ˗bha. ˈKwa kwa ˗zota ˗a ˈtɔ ˗wɔn ˈgü, pë ˗blɛɛsü ˈö kwa ˗zo ˗yö ˗da ˗a ˈˈpiʋ̈ ˈyö ˗tɔ ˗a ˗bha ˗dhɔ. (1 Zn. 4:8) Kwa ˗zo ˗dho ˗bo ˗kplawo ꞊dhɛ ˗dhɔ ˈnën Zoova ˗blü ˈö kwa ˗da, ˈö kwa ˗gɔ ˗ta dhɔ, ˈö go mü ˈzü ˈö ˈtɔŋ˗ ˗sɛŋbɔ ˗nu nu kwa ˗dhɛ. ˈˈKɛɛ kwa ˗dho ˗a yö ˈˈtʋ̈ŋ ꞊gban ˈka ꞊dhɛ kwa ˗dhɔ ˗yö Zoova ˗kë. Kwa ˗dho ꞊ɲɔɔn kwa Dë ˈö dhaŋ˗ ˈgü bhë ˗a ˗bha ˗toëpö ˈka.—Ps. 73:28.