1. ꞊Dhɛ ˗gblüdë Davi ˈdhö, dhɛɛˈˈ ˗mɛɛn ˈö ˗ya kë ꞊shiöŋ ˈkwa˗ kpɔ kwa ˗de ˗gɔ?

MƐN ˈˈPƐPƐ kwa˗ ˈˈpiʋ̈ ˈkwa kë zuʋ̈waannudhe ˈgü. Mɛn ˈbha ˈyaa˗ ˈˈpiʋ̈ kö zuʋ̈dhiʋ̈tɛ ˗nu ˗wo kë ö ˗bha. ˈˈKɛɛ ˈˈtʋ̈ŋ ˈbha ˗nu ˈka, zuʋ̈dhiʋ̈tɛ ꞊gbɔɔnsü ˗yö ˗kë kwa ˗bha. ˗A ˗wɔn ˈgü, Zoova ˗dhɔkëmɛn ˈbha ˗nu wo ˗de dhɛɛˈˈ ˗kpɔ ꞊dhɛ Davi ˈdhö, ˈwo˗ pö: «˗Dhɛkpaɔyi ˈˈpɛpɛ ˈka n zuʋ̈ˈˈ ˈˈklʋ ˗yö ˗bhɔ, n ˗bha zuʋ̈dhiʋ̈tɛ ˗dho ɲën ˈˈtʋ̈ŋ ˗mɛɛn ˈka?»​—Ps. 13:2.

2. ˈMën ˈkwa ˗dho ˗a yö ˈwɔn ˗gɔ ˈö yö ˗a ˈgü?

² Zuʋ̈dhiʋ̈tɛ ˗nu ˈwaa ꞊mɔɔn˗ ˗bha kö ˗wo ɲën kwa ˗bha ꞊dɛɛ. ˈˈKɛɛ kwa ꞊mɔɔn˗ ˗bha ˈkwa ˗an ˈkun kwa ˗bha ˗dhɛ dɔ. ˈWɔn ˗gɔ ˈö yö ˗a ˈgü, kwa ˗dho pë ˈbha ˗nu ˈö ˈwo zuʋ̈dhiʋ̈tɛ ˗ya kwa ˗bha ˗an ˗wɔn blɛɛˈˈ, ˈö ˗ya ˈgo mü, pë ˈˈsɔɔdo ˈö kwa ꞊mɔɔn˗ ˗bha ˈkwa ˗an kë kö kwa zuʋ̈ˈˈ ˗yö ˈto ˈwaannu ˗sü ˈka ˈwɔn ˈˈgbɩɩ˗ ˗nu ˈgü, ˈkwa ˗an yö.

3. ˗Mën ˗wɔn ˗nu ˈö ˈwaa ˈsü kwa ˗bha, ˈˈkɛɛ ˈö ˈwo zuʋ̈dhiʋ̈tɛ ˗ya kwa ˗bha?

³ Zuʋ̈dhiʋ̈tɛ ˗wɔn ˈbha ˗nu ˗gɛngodhɛ ˗nu ˈwaa ˈsü kwa ˗bha. ˈKwaa ˈnën ˈkwa˗ ˗kë ˈö ˗bhöpë ˗nu, sɔ waa ˈkɔ ˗nu ˗an ꞊sɔnŋ ˗yö ˗dadhiʋ̈ ˗kwɛ ˈˈpɛpɛ ˈka. ˈKwaa ꞊mɔɔn˗ ˗bha ˈkwa˗ kë ˈpö kö kwa yökëyoo ˗nu ɛɛnˈˈ kwa ˈˈtɛɛbɔ ˗nu ˈwo ꞊klaŋplöö, ˗wo wo bo kwa ˗blü ˈwɔn yaa ˗bha ˗sü ˈka. ˈKwaa ꞊mɔɔn˗ ˗bha ˈkwa˗ kë kö mɛn zë ˗sü ˗yö ɲën ˗dhɛ ˈö ˈkwa˗ ˗bha ˗a ˈgü. ˈWɔn ˈˈgbɩɩ˗ ˗nu bhë ˗wo ˗nu kwa ˗ta, ˈyö sü ꞊dhɛ ˈˈkpɔnŋtaadhɛ ˈö ˈkwa˗ ˈgü ꞊dɛɛ yö, mɛn ꞊vadhɛ ˈwaa Biblö ˗bha ˈtɔŋ˗ ˗gɛngbandhɛ ˗nu ˗ya ꞊bhlëë ˈgü. Sɔtraan ˈö ˗kë  ˈˈkpɔnŋtaadhɛ ˈö yö ˗a ꞊kɔɔnmɛn ˈka bhë, ˗ya ˈwɔn ˗dɔ ꞊dhɛ «˗zʋ ˗gɔn ˈˈkpʋng ꞊taa ˗wɔn ˗nu ˈka ˗sü» ꞊mɔɔn˗ ˗bha ˗ya kë kö mɛn ˈbha ˗nu ˗wo ˈˈkan Zoova ˗dhɔkësü ˗bha. (Mat. 13:22; 1 Zn. 5:19) ˗A ˗wɔn ˈgü, ˗a kë ˗sü kö kwa zuʋ̈dhiʋ̈tɛ ˗wɔn ˗nu ˗wo kë ꞊va bhë, ˗a ˈwɔn ˈyaa kwa ˈkun.

4. ˗Tosɛta ꞊gbɔɔn ˗ni ˈgü kwa ˗ta, ˗mën ˈö ꞊mɔɔn˗ ˗bha ˈö ˗kë kwa ˈka?

⁴ ˗Tosɛta ꞊gbɔɔn ˗ni ˈgü kwa ˗ta, ˗yö ꞊mɔɔn˗ ˗bha ˈö zuʋ̈dhiʋ̈tɛ ˗ya kwa ˗bha. ˗A ˈwɔnzuan ˈnën ˗tɔ ꞊dhɛ kwa ꞊mɔɔn˗ ˗bha ˈkwa ˗ya ˈweëga ˈö ˈkwa dho kwa ˗bhawɔn ˗nu ˈˈɲanbhɔ ˗a ˈka, ˗a ꞊slɔɔ ˗sü, ɛɛnˈˈ ˈˈyua, ɛɛnˈˈ yö ˗wɔn ˗nu ꞊zɔnŋ ˗ta. ˗Kɔ ˈö ˈkwa ˗dho ˗a kë˗ ˈka kö ˈkwa ˗dho ˗Zlan ˗bha ˈtɔŋ˗ ˗nu ˗lögü ˈgüdandhe ˗nu ˈgü, ˗a zuʋ̈dhiʋ̈tɛ ꞊mɔɔn˗ ˗bha ˈpö ˈö ˗kë kwa ˗bha. Kwa˗ ˈwɔn ˗dɔ ꞊dhɛ ˗a ˈˈtʋ̈ŋ ˈyaa ꞊gblɛɛn ˈzüdho kö Sɔtraan ˗yö ö ˗bha mɛn ˗nu ˗blü, kö ˗wo nu kwa ˗gɔ. ˗Kɔ ˈö ˈkwa ˗dho ˈwɔn ˗nu kë ˗a ˈka ˈˈtʋ̈ŋ bhë ˗a ˈgü, ˗a zuʋ̈dhiʋ̈tɛ ꞊mɔɔn˗ ˗bha ˈö ˗kë kwa ˗bha. ˗Ya ˈwɔn ˗nu suu ˈwo ˈˈdhʋ̈ ˗an ꞊zɔnŋ ˗ta ˗sü ˗yö ˈya˗ ˗ee?

5. ˈMën ˗kë ˈö Yesu ˗ya pö ‹ˈkwa ˈdho ˗ya pë ˈbha ˗wɔn zuën ˗ta›?

⁵ Yesu ˗ya ˗pö ö ˗bha gwëëˈˈ ˗nu ˗dhɛ: ‹ˈKa ˈdho ˗ya pë ˈbha ˗wɔn zuën ˗ta.› (Mat. 6:25) ˈPë kun ˗a ˈˈpiʋ̈ ˈö˗ pö ˈyö ˗tɔ ꞊dhɛ zuʋ̈dhiʋ̈tɛ dua ˈyaa ˗mü kö ˗yö kë kwa ˗bha toŋtoŋdhö ˗ee? ˗Abin. ˗A ˗de ˗ʒiaan Zoova ˗dhɔkëmɛn ˗nu ˈwo kun ꞊kwɛŋzü, zuʋ̈dhiʋ̈tɛ ꞊gbɔɔnsü ˗kun ˗a mɛn ˈbha ˗nu ˗bha. ˈˈKɛɛ ˗wo ˈti kë Zoova ˗dhɛ ˈya˗. * (1 Rois 19:4; Ps. 6:3) ˈPë Yesu kun ˗a ˈˈpiʋ̈ ˈyö ˗tɔ ˈö kwa ˗zo ˗gban. ˈYaa kun ˗a ˈˈpiʋ̈ kö ˗ya ˗tosɛta ˗wɔn ꞊zɔnŋ ˗ta ˗sü ˗yö kwa ˗kɔ ꞊zɔɔ ˗Zlan ˗dhɔkësü ˗bha. ˗Dhɛ ˈö ˈˈdhʋ̈, ˗mën ˈö ˗dho kwa ˗takun kö ˈkwa kwa ˗bha zuʋ̈dhiʋ̈tɛ ˗nu ˈkun kwa ˗bha ˗dhɛ dɔ?—Kpɔɔˈˈ ˈkɔnën ˈö˗ ˗gɔ ˗kë: « Kwa ˗dho ˗a kë ˗kɔ ˗kë ꞊dhɛ?» ˈka bhë, ˗a bha.

6. ˈKwa ˗dhɛ ˗ga Fidhipö 4:6, 7 ˈgü, ˈmën ꞊mɔɔn˗ ˗bha ˈö kwa zuʋ̈ˈˈ ˈwaannu?

⁶ (1) ˗Kwa bhɛɛˈˈ. ˈWɔn ˈbha zuʋ̈dhiʋ̈tɛ ˗ya kë kwa ˗bha, kwa ꞊mɔɔn˗ ˗bha ˈö ˈkwa ꞊bhɛɛ Zoova ˗dhɛ kwa zuʋ̈ˈˈ ꞊gban ˈka, kö ˗yö kwa ˗takun. (1 Piɛ. 5:7) ˈKwa˗ kë ˈˈdhʋ̈, «[˗Zlan] ˗dho kwa zuʋ̈ˈˈ ˈwaannu ˈö ˗ziö mɛnbhɩɩdhe ˗zʋgɔngüwɔn ˗zë ꞊gban ˈˈpɛpɛ ˈˈdhiʋ̈todhɛ ˗ta.» (Fidhipö 4:6, 7 ˗wo pö.) Zoova ˗dhö bɔ ö ˗bha ˗zuu ˈˈslʋ̈ʋ̈slʋ̈ ˗ta ˈö zuʋ̈waannusü nu kwa ˗dhɛ.​—Ga. 5:22.

7. Kwa bhɛɛˈˈ ˗ni ˈgü Zoova ˗dhɛ, ˈmën kwa ˗zo ˈti ˗dho bhɔ ˗a ˈka?

⁷ Kwa bhɛɛˈˈ ˗ni ˈgü Zoova ˗dhɛ, ˗kwa kwa zuʋ̈piʋ̈wɔn ꞊gban blɛɛˈˈ ˗a ˗dhɛ. Pë ꞊dede ˈö kwa ˗bhawɔn ˈdhö˗ ˗bha, ˗kwaa pö. ˈWɔn ˈö kwa ˗bha waa ˗kɔ ˈö ˗yɛ ˗a ˈka kwa zuʋ̈ˈˈ ˗bha, ˗kwaa blɛɛˈˈ ˗a ˗dhɛ. ˗Kwaa pö ˗a ˗dhɛ ˗ya kë ꞊dhɛ ˗a ˈˈɲan bhɔ ˗kɔ ˗yö ˗dhö, ˗yö ꞊kpɔɔdhɛ waa ꞊faan nu kwa ˗dhɛ kö ˈkwa˗ kë. ˗Ya kë ꞊dhɛ ˈkwaa ꞊mɔɔn˗ ˗bha kö ˈkwa pë ˈbha kë ˗a ˈgü, ˗kwaa pö ˗a ˗dhɛ ˗yö kwa ˗takun kö ˈkwa ˗dho kwa ꞊kwaa ˗a zuʋ̈dhiʋ̈tɛ ˗zü ˈö kwa ˈgü ga. Pë ꞊dede ˈö ˈkwa˗ ˈˈpiʋ̈ ˈkwa˗ ˗dhɛ Zoova ˗gɔ, ˗kɔ ˈö ˗dho kwa ˗bha bhɛɛwo ˗daa kë ˗a ˈka, kwa ˗dho ˗a yö. ˈKwa bhɛɛˈˈ, yö ˈti ˈto ˈˈshia˗ mü kö ˗ya ˗daa kë, kwa ˈgü ˈya ˗dho ga. ˈPë Zoova ˈdhö˗ ˈˈpiʋ̈ ˈyö ˗tɔ pë ꞊dede ˈö kwa ˗bhawɔn ˈdhö˗ ˗bha ˈkwa˗ ˗dhɛ, ˈˈkɛɛ ˗ya ˈˈpiʋ̈ ˈzü ˈkwa bhɛɛˈˈ ˗a ˗wɔn ˈgü ˗kplawo.​—Dhu. 11:8-10.

8. Kwa bhɛɛˈˈ ˗ni ˈgü Zoova ˗dhɛ, ˗mën ˈö dho kë ˗së kö ˈkwa˗ kë?

⁸ Kwa kwa ˗bha zuʋ̈dhiʋ̈tɛ ˗nu ˗lo ˗ni ˈgü Zoova ꞊kwɛɛ˗, ˗yö ˗dho kë ˗së ˈpö kö ˈkwa˗ ˈˈnuɛ bho. ˈKö ˗kë ꞊dhɛ kwa ˗kë ˈwɔn ˈˈgbɩɩ˗ ˈgü, ˗yö ˗dho kë ˗së kö ˈwɔn ˗së ˗nu ˈö Zoova ˗an ˗kë kwa  ˗dhɛ, ˈkwa kwa ˗zota ˗an ˈgü. ˗Ya kë ꞊dhɛ ˗kɔ ˈö ˈwɔn ˈbha ˗yɛ ˗a ˈka ü ˗bha, ˗kɔ ˈü dho ˗a pö˗ ˈka Zoova ˗dhɛ ˈbhaa˗ dɔ, ˗yö kë ü ˈˈɲan ꞊dhɛ, ˈkö ˗kë ꞊dhɛ ü˗ ˗pö ˗a ˗dhɛ: ‹˗Bhö dɔ ˈˈgbɩɩ˗ ˈü n ˗takun,› ˗yö ꞊mɔɔn˗ ˗bha ˈö˗ ˗daa ˗kë.​—2 Chron. 18:31; Wlɔ. 8:26.

9. Zuʋ̈dhiʋ̈tɛ ˗ya kë kwa ˗bha, ˗mën ˈö ˈkwa dho ˗a kë?

⁹ (2) ˗Kwa ꞊kpɔɔdhɛ ˈö go Zoova ˈˈpiʋ̈ ˗a mɛɛnˈˈ, ˈkwa ˗dho kwa ˗zo yö kwa ˗de ˗dhɛ. ˗Kwɛ 800 ˗bha ˗naan ˈgü K.Y.B., ˈˈsuʋ̈ ˗kun Zudamɛn ˗nu kë ˗ni ˈgü Asidhimɛn ˗nu ˗gɔ. ˈDhɛ ˗kë ꞊dhɛ ˈwaa kun ˗a ˈˈpiʋ̈ kö ˗an ˗kɔ ˗yö ʒiö wo ˗gɔ, ˗wo ˗takundhe ˗mɛɛn Ezitömɛn ˗nu ˈö ˈwaa Zoova ˗dhɔkëmɛn ˗nu ˈka bhë, ˗an ˈˈpiʋ̈. (Is. 30:1, 2) Zoova ˗yö ö ˗bha ˈˈsɛgümɛn ˗nu ˗kpɔɔ ꞊dhɛ ˈwɔn ˈwo ˗da ˗a ˗ʒian ˗ta bhë, ˗a ˈˈdhiʋ̈ ˈti ˗dho ˈto ˗së. (Is. 30:7, 12, 13) Zoova ˗bɔ Izai ˗ta, ˈyö ˗kɔ ˈwo ˗dho ˗a kë˗ ˈka kö ˗wo ˗yadeflëëgüsü ꞊dede ꞊slɔɔ, ˗a ˗zɔn ˗an ˗dhɛ. ˗Ya ˗pö ˗an ˗dhɛ: «˗Ka ka zuʋ̈ˈˈ kë ˗saa, ˈka ka ˗zo yö n ˗dhɛ. Kö ˈka˗ kë ˈˈdhʋ̈, ꞊faan ˗dho kë ka ˗gɔ.»​—Is. 30:15b

10. ˈWɔn ˗mɛɛn ˗nu ˈö ˈkwa dho kwa ˗bha ˗zo ˗yö Zoova ˗dhɛ ˗sü ˗zɔn ˗an ˈgü?

¹⁰ ˗Kɔ ˗mɛɛn ˈö ˈkwa dho ˗a ˗zɔn ˗a ˈka ꞊dhɛ kwa kwa ˗zo ˗yö Zoova ˗dhɛ? ˗Kwaa ˈwɔnzuan ˈbha ˗nu ˗ga. ˗Bhö ü ˗zota kö ˗wo yö ˈö˗ ꞊saa ˈdhö ꞊va ˗a kë ˗sü ˗zɔn ü ˈka, ˈˈkɛɛ kö ˗a yö ˈö ˈˈdhʋ̈ bhë, ˗yö kë yö ˈö ˗yö ˈti ˗dho ˈˈtʋ̈ŋ ˈto ü ˗gɔ kö ˈü ˗Zlan ˗dhɔkë ˗së ˈka, ˗a ˈka. Ɛɛnˈˈ ü ˗zota kö ü yökëyoo do ˈö ˈyaa Zoova ˗dhɔkëmɛn ˈö ˗ya bɔ ˈˈyi ꞊bhaa ˗a ˈka, ü ˗dhɔ ˗da ˗a zuʋ̈ˈˈ ˈgü. Ɛɛnˈˈ ˈzü ü ˗zota kö ü ˗bha ˈkɔdhigümɛn ˈbha ˈö˗ ˗wɔn ˈdhö ü ˗gɔ ˈˈgbɩɩ˗ ꞊dedewo, ˗ya pö ü ˗dhɛ waa Zoova mɛn ˈü dho ˈto ˗a ˈˈpiʋ̈ ˈü ü ˗kɔ ˈˈyɛ ˗a ˗bha. ˈBha kë ˈwɔn suu ˗nu ˈwo ˈˈdhʋ̈ ˗an ˈgü, ˈpë ˈü ˗dho ˗a kë, ˗yö ꞊mɔɔn˗ ˗bha ˈö ˗kë ü ˗kwaa ˈˈgbɩɩ˗. ˈˈKɛɛ Zoova ˗dho ü ˗takun kö ˈpë ˈü dho ˗a kë, ˈü˗ dɔ. (Mat. 6:33; 10:37; 1 Ko. 7:39) Ü ˗dho ü ˗zo yö ˗a ˗dhɛ ü zuʋ̈ˈˈ ꞊gban ˈka kö ˈü ˈwɔn man˗ ˗ta ˗ee?

11. ˗Wo ˗gban ˗ni ˈgü kwa ˗gɔ, ˗kwɛzlan ˗mɛɛn ˗nu ˈwo Biblö ˈgü, ˈwo ꞊mɔɔn˗ ˗bha ˗wo kwa ˗takun?

¹¹ (3) ˗Kwa ˗gleŋ ˈsü ˈwɔnzuan ˗së ˗nu waa ˗a yaa ˗nu ˗bha. ˗Kwɛzlan ꞊vadhɛ ˈwo Biblö ˈgü, ˗wa ˗zɔn ꞊dhɛ kwa zuʋ̈ˈˈ ˗kë ˗saa ˗sü kö ˈkwa kwa ˗zo yö Zoova ˗dhɛ bhë, ˗a ˗wɔn ˗yö ˈˈgbɩɩ˗. Kwa ˗an draanˈˈ ˗ni ˈgü, ˈpë ˗Zlan ˗dhɔkëmɛn ˗nu bhë ˗an ˗takun, ˈö ˗dhɛ ˈö ˈwo ˗gban ˗an ˗gɔ, ˗an zuʋ̈ˈˈ ˗yö to ˗saa, ˗kwa kwa ˈˈtʋ̈ŋ kë ˗a ˈgü. ˗A ˈwɔnzuan ˈnɛn: ˈDhɛ Zuifö ˗nu ˗bha zakanmɛn ˈkpii˗ ˗nu ˗wa pö bɔmɛn ˗nu ˗dhɛ ˈwa ˗dho ˗zlanwo pö, ˈˈsuʋ̈ ˈti ˗an kë. ˗Wo wo ˈgü ˗gban ˈyö ˈwo˗ pö: ‹˗A ˗dhɛa ˗bha ꞊dhɛ ˈyi ˗Zlan ꞊në˗ ꞊bhlëë ˗ya kö ˗yö ziö˗ mɛ ˈˈbhɩɩ˗ ˗zë ˗ta!.› (Këw. 5:29) ˈDhɛ ˈwo ˗an ˗man ˗klaaga ˈka, ˗an zuʋ̈ˈˈ ˈti ˈˈkaankwöö, ˈyö ˗tɔ ˗a ˈwɔn ˗kun ˗an ˈˈɲaan ꞊dhɛ Zoova ˗yö wo ˈˈpiʋ̈, ˈö˗ ˗a zuʋ̈ˈˈ ˗nii ˈdhö ˗da ˗sü ˈka wo ˗bha. ˗A ˗wɔn ˈgü, ˗wo ˗zlanwo ˗pö ˈwo dho ˗a ˈka ˈˈdhiʋ̈. (Këw. 5:40-42) ˗Kɔ do bhë˗ ˈka, ˗dhɛ ˈwo Yesu ˗bha gwëëˈˈ Etiɛnö kun kö ˈwo˗ zë, ˗a zuʋ̈ˈˈ ˗to ˈwaannu ˗sü ˈka. ˈˈSuʋ̈ ˈti ˈˈkan ˗a ˈˈgblü. ‹˗A wë ˈgü ˗kun ˈbhü sië ꞊dhɛ ˗Zlan ˗bha ˈˈkië wë ˈdhö.› (Këw. 6:12-15) ˈMën ˗kë? ˈYö ˗tɔ ˗a ˈwɔn ˗kun ˗a ˈˈɲaan ꞊dhɛ ˗a ˈˈdhia ˗yö Zoova ˈgü.

12. ˗Wo ˗gban ˗ni ˈgü kwa ˗gɔ, ˈmën ˗kë ˈö ˗së kö kwa zuʋ̈ ˈˈ ˈˈgblü ˗yö dhi ꞊dhɛ ˗kɔ ˈö 1 Piɛdhö 3:14 waa˗ 4:14 ˗wa pö˗ ˈka bhë, ˗a ˈdhö?

¹² ˗Yö ˗kun ga ˗sü ˈka Yesu ˗bha bɔmɛn ˗nu ˈgü ꞊dhɛ Zoova ˗yö wo ˈˈpiʋ̈, ˈö sü ꞊dhɛ ˗yö ˗dhidha kë ˗sü ꞊faan ˗nu ˗an ˗dhɛ. (Këw. 5:12-16; 6:8) Kwa ˗zë, ˈyii ꞊faan bhë ˗a nu kwa ˗dhɛ. ˈˈKɛɛ ˗yö ˗bɔ ö ˈˈDhiwo ˗ta ˈö kwa ˗zo ˗gban ꞊dhɛ ˗wo kwa ˈˈklʋʋ bhɔ ˗ni ˈgü ˈwɔn ˗së ˈö ˈkwa˗ ˗kë ˗a ˗wɔn ˈgü, ö zuʋ̈ˈˈ ꞊nii ˗yö ˗da kwa ˗bha, ˈö kwa gba ö ˗bha ˗zuu ˈˈslʋ̈ʋ̈slʋ̈ ˈka. (1 Piɛdhö 3:14; 4:14 ˗wo pö.) ˗Dhɛ ˈö ˈˈdhʋ̈, ˈpë ˈkwa ˗dho ˗a kë ˈˈklʋʋbhɔdhe ˈö ˗dho nu kwa ˗ta dhiʋ̈ˈˈ ˗a ˈgü, ˈkwa ˗dho ˗ya ˗a ˗wɔn ꞊zɔnŋ ˗ta. ˗Kwaa ˈˈslö mɛɛnˈˈ kö kwa ˗bha ˗zo ˗yö Zoova ˗dhɛ ˗sü kë ˈˈgbɩɩ˗, kö ˗yö ga kwa ˈgü ꞊dhɛ ˗yö ꞊mɔɔn˗ ˗bha  ˈö kwa ˗takun, ˈö ˈkwa dha. ꞊Dhɛ Yesu ˗bha gwëëˈˈ ˗blɛɛsü ˗nu ˈdhö, ˗kwa ˈdhaŋ˗ bho ˈwɔn ˈö Yesu ˗ya ˈˈpluun bho bhë ˗a ˈˈdhiʋ̈. ˗Ya ˗pö: ‹Dhiang ˈö kaa˗ zë ma ꞊në ˈa dho˗ dɔ ka ˈˈdhi. ˈWɔndɔdhe ˈa dho˗ nu ka ˗dhɛ, ˗yö ˗dho ziö ka ˗wɔn ˗da ˗mɛ ˗nu ˗bha ˗ta.› ˗Yö kwa ˗zo ˗gban ˈzü ˈö˗ pö: ‹ˈKii ka bo n ˈka, ka ˗dho ꞊sii ˈö ˈyaa yën ˗a ꞊slɔɔ.› (Dhu. 21:12-19) Kwa ˗zo ˈya ˗dho ˗bhɔ ꞊dhɛ Zoova ˗dhɔkëmɛn ˗nu ˈwo to ˗klu ˗sü ˈka˗ ˗bha, ˗yö ꞊mɔɔn˗ ˗bha kö ˗yö ˗an bho ga ˈgü, ˈö sü ꞊dhɛ ˗yö ˗an ˗dɔ ˈkpakpadhö.

13. Mɛn ˗nu ˈö ˈwii wo ˗zo ˗yö Zoova ˗dhɛ ˗an ˗bha ˗kwɛzlan ˗nu ˗wopösü ꞊trɔɔn ˗mɛɛn ˈö ˈdhö?

¹³ Mɛn ˗nu ˈö ˈwii wo zuʋ̈ˈˈ kë ˗saa kö ˗wo wo ˗zo ˗yö Zoova ˗dhɛ bhë, kwa ꞊mɔɔn˗ ˗bha ˈpö ˈkwa ˗gleŋ sü ˗an ˗bha ˈwɔnzuan ˈgü. ˈKwa ˗an ˗bha ˗kwɛzlan ˗nu draanˈˈ, ˗yö ˗dho kwa ˗takun kö ˈkwa ˗dho ʒiö ˗an ˗bha ˈwɔnzuan ˈˈpiʋ̈. ˗A mɛn do ˈnën ˗tɔ Aza, ˈö kun ˗gblüdë ˈka Zuda ˗sɛ ˈgü ꞊kwɛŋzü. ˈDhɛ ˈsɔdha kpö ˗ziisü do ˗yö nu ˗an ˗gɔ, ˗yö ˗takundhe ˗mɛɛn Zoova ˈˈpiʋ̈, ˈyö Zoova ˗ya ˗takun ˈö to ˗a ˈˈgbɩɩ˗ ˈka. (2 Chron. 14:9-12) ˈˈKɛɛ ꞊taabha, ˈdhɛ Izraɛdhö ˗gblüdë Basa waa ö ˗bha ˈsɔdha kpö ˈˈtɩtɩ ˈwo nu ˗a ˗gɔ, ˈyii ˗takundhe mɛɛnˈˈ Zoova ˈˈpiʋ̈. ˗Yö ˗dho ꞊ʒiaan ˈö ˈwëë˗ waa ˈˈsënŋ ˗nu sü, ˈö˗ nu Sidhi ˗gblüdë ˗dhɛ kö ˗yö wo ˗takun. (2 Chron. 16:1-3) ˗A ˗bha ˗tosɛta ˈˈdhiʋ̈todhɛ ˈgü ˈzü, ˈdhɛ ˈˈyua ˈˈgbɩɩ˗ ˗ya kun, ˗yö ˈti ˗takundhe ˗dhɛ Zoova ˗gɔ.​—2 Chron. 16:12.

14. ˈWɔn yaa ˈö Aza ˗ya ˗kë bhë, ˗gleŋ ˗mɛɛn ˈö ˈkwa dho ˗a ˈsü ˗a ˈgü?

¹⁴ ˗A zübhodhɛ ˈgü, ˈdhɛ ˈwɔn ˈˈgbɩɩ˗ ˗nu ˗wo nu Aza ˗ta, ˗yö ˗takundhe ˗mɛɛn Zoova ˈˈpiʋ̈. ˈˈKɛɛ ꞊taabha, ˗yö ö ˗zo ˗yö ö ˗de ˗bha ˈwɔndɔdhe ˗dhɛ. Kwa ꞊mɔɔn˗ ˗bha ˈkwa˗ pö ˗be ꞊dhɛ ˗a ˗bha ˗takundhe ˗dhɛ Sidhimɛn ˗nu ˗gɔ ˗sü bhë, ˈˈslö ˗së ˈö ˗ɲan ˗a ˗gɔ yö ˗mü. ˈˈKɛɛ ˈyii ˗yadeflëëgüsü ˈö ꞊gwëë ˗a nu ˗an ˗dhɛ. Zoova ˗bɔ ö ˗wodhiʋ̈lömɛn do ˗ta ˈö˗ pö ˗a ˗dhɛ: «˗Kë ˈö˗ ˈwo ꞊dhɛ ü ü ˗zo ˗yö Sidhi ˗gblüdë ˗dhɛ, ˈö ü ˈti ü ˗zo yö Zoova ü ˗bha ˗Zlan ˗dhɛ bhë, ˈyö˗ ˗wɔn ˈgü ü ˗kɔ ˈti ˗mɔn Sidhi ˗gblüdë ˗bha ˈsɔdha ˗nu ˗bha.» (2 Chron. 16:7) ˈYaa ˗së kö ˈkwa kwa ˗zo yö kwa ˗de ˗dhɛ, kö ˗yö kë kwa ˈgü ꞊dhɛ kwa ꞊mɔɔn˗ ˗bha ˈkwa kwa ˗ta yö Zoova ˗bha ˗dhioo ˗nu ˗bha, ˈö ˈkwa kwa ˗bha ˈwɔn ˗nu ˈˈɲan bhɔ. ˈKö ˗kë ꞊dhɛ kwa dua ˗mü ˈkwa pë ˈbha kë ˈzozodhö, ˗kwa kwa zuʋ̈ˈˈ kë ˗saa, ˈkwa kwa ˗zo yö Zoova ˗dhɛ, kö ˗yö kwa ˗takun ˈkwa ˈwɔn ˗nu kë ꞊kpɔɔdhɛ ˈka.

15. Kwa Biblö ˗wo pö ˗ni ˈgü, ˗mën ˈö ˗dho kë ˗së kö ˈkwa˗ kë?

¹⁵ (4) ˗Kwa Biblö ˈˈɲan ˗nu ˈkun kwa ˗zo ˈˈpiʋ̈. Biblö ˈˈɲan ˈbha ˗nu ˗wa ˗zɔn ꞊dhɛ kwa zuʋ̈ˈˈ ˗kë ˗saa ˗sü, ˈö ˈkwa kwa ˗zo yö Zoova ˗dhɛ bhë, ˗yö ˗së. Kwa Biblö ˗wo pö ˗ni ˈgü, ˈkwa ˗kpan ˗an ˗bha, ˗yö ˗dho kë ˗së kö ˈkwa ˗an ˈkun kwa ˗zo ˈˈpiʋ̈. Kwa ꞊mɔɔn˗ ˗bha ˈkwa ˗an ˗wo pö kwa ˗wo ˗ta, ˈö ˈkwa ˗an ˗bɛnzë ˗dhɛ ˈbha ˈgü, kö ˗ya kë ꞊shiöŋ ˈkwa ˗an ˗wo pö zoodhö zoodhö. Zoova ˗ya ˗pö Ʒozue ˗dhɛ ꞊dhɛ ˗wo ˗nu ˈwo ˈtɔŋ˗ ˈsëëdhɛ ˗be ˈgü bhë, ˗yö ˗an ˗wo pö kö ˗yö ö ˗zota ˗an ˈgü, kë ˈˈdhʋ̈ kö ˗yö ˈwɔn ˗nu kë ꞊kpɔɔdhɛ ˈka. Zoova ˗bha mɛn ˗zo ˗bö ˗wo ˗nu ˗dho ˗a ˗takun ˈpö kö ˈˈsuʋ̈ ˗yö ˈgo ˗a ˈgü, kö ꞊faan ˈö˗ ˗bhawɔn ˈdhö˗ ˗bha ˗yö kë ˗a ˗gɔ. (Jos. 1:8, 9) ˈKwa kë mɛn zuʋ̈ˈˈ ˈˈklʋʋ bhɔ ˗wɔn, ɛɛnˈˈ ˈˈsuʋ̈ ˗da mɛn ˈgü ˗wɔn ˗nu ˈgü, Biblö ˈˈɲan ꞊vadhɛ ˈwo ˈdhö, ˗wo ꞊mɔɔn˗ ˗bha ˈwo kwa ˗zo ˗gban.​—Ps. 27:1-3; Prov. 3:25, 26.

16. Zoova ˗yö ˗bɔ ˗zlanwokɔdhi ˗ta ˈö kwa ˗takun ˗kɔ ˗kë ꞊dhɛ kö kwa zuʋ̈ˈˈ ˗yö kë ˗saa, ˈkwa kwa ˗zo ˗yö ö ˗dhɛ?

¹⁶ (5) ˗Kwa ꞊nëŋ Zoova ˗dhɔkëmɛn ˗nu ˗bha. Zoova ˗yö ˗bɔ kwa ꞊dhegblü ˗nu ˗ta ˈö kwa ˗takun kö kwa zuʋ̈ˈˈ ˗yö kë ˗saa, ˈkwa kwa ˗zo yö ö ˗dhɛ. Kwa ˗bha ˗bhɔkwëë ˗nu ˗ta, ˈˈdhɛɛtadhiaŋ˗ ˗nu ˈwo ˗an zë ˗ni, kwa ꞊dhegblü ˗nu ˗bha ˈwɔn ˗daa ˗nu ˈwo ˗an kë ˗ni, waa  ˈˈdoo ˈö kwaa˗ ˗nu ˈkwa ˗a dɔ ˗ni bhë, ˗wo ˈwɔn ˗së ˗kë kwa ˗dhɛ. (Ebl. 10:24, 25) Kwa ꞊mɔɔn˗ ˗bha ˈpö ˈkwa kwa ˗zopiʋ̈wɔn ꞊blɛɛ kwa ꞊dhegblü do ˈö ˗ya ˗kian ˗zlanwo ˈgü ˗a ˗dhɛ. Kwa ˈˈtɔŋdë ˗nu ˗wa «˗wo ˗së» pö kwa ˗dhɛ, ˗yö kwa ꞊faanmën, ˈö kwa ˗bha zuʋ̈dhiʋ̈tɛ ˗yö dho ˈˈshiaŋ.​—Prov. 12:25.

17. Kwa bɔ ˗ni ˈgü ˈwɔn ˈˈgbɩɩ˗ ˈgü, Eblö 6:19 ˗dho kwa ˗bha ˗zo ˗yö ˗dhɛkpaɔ dhiʋ̈ˈˈ ˗dhɛ ˗sü ˗gɛn ˗gban ˗kɔ ˗kë ꞊dhɛ?

¹⁷ (6) ˗Kwa kwa ˗bha ˗zo ˗yö ˗dhɛkpaɔ dhiʋ̈ˈˈ ˗dhɛ ˗sü ˗gɛn ˗gban. ˗Zo ˗yö ˗Zlan ˗bha ˗Gblüdëdhɛ ˗dhɛ ˗sü ˗yö ꞊dhɛ «˗piö kpö ˈö ˈˈyitagɔ ˗bha ˗a ˈdhö.» ˗Yö kwa ˗takun ˈyö ˈkwa kë ˈˈsuʋ̈ ˗da mɛn ˈgü ˗wɔn ˗nu ˈgü, ˈkwaa ˈzëzë ˈkun. (Eblö 6:19 ˗wo pö.) ˗Kwa kwa ˗zota ˗dhɛkpaɔ dhiʋ̈ˈˈ ˗së ˈö Zoova ˗ya ˈˈpluun bho ˗a ˈgü. (Is. 65:17) ˗Kwa kwa ˗zota kö ˈˈkpɔnŋtaadhɛ ˗dɛɛ, ˈö mɛn zuʋ̈ˈˈ ˈˈklʋʋ bhɔ ˗wɔn ˈbha ˈti ˗dho kë ˗a ˈgü bhë, kwa˗ ˈgü. (Mich. 4:4) Kwa ꞊mɔɔn˗ ˗bha ˈpö ˈkwa kwa ˗bha ˗zoyödhe ˗gɛn ˗gban ˗a ˗wɔn ˗blɛɛ mɛn ˈˈwɛɛ ˗nu ˗dhɛ ˗sü ˈka. ˗Kwa pë ˈˈpɛpɛ kë kö ˈkwa ˗zlanwo pö, ˈkwa mɛn ˗nu ꞊klaŋ kë, kë ˈˈdhʋ̈ kö ˈwɔn ‹ˈdhɛ ˈö kwa ˗zʋ ˈdhö˗ ˈgü bha ˗yö kë kwa ꞊dhɛ ˈˈdhiʋ̈ ꞊mɔɔ ˗sü ˈka.›​—Ebl. 6:11.

18. ˗Mën ˗wɔn ˗nu ˈwo ꞊mɔɔn˗ ˗bha ˈwo nu kwa ˗ta ˗dhɛkpaɔ dhiʋ̈ˈˈ ˈgü? ˈYö ˈmën dho kwa ˗takun kö ˈkwa ˈto ˗a ˈˈgbɩɩ˗ ˈka?

¹⁸ Kë ˈö˗ wo ꞊dhɛ ˈˈkpɔnŋtaadhɛ ˈˈdhiʋ̈toyi ˗yö ˗wo ˗ni ˈgü bhë, ˗yö kë kwa ˈˈɲaan ꞊dhɛ ˈwɔn ˗nu ˈwo dho zuʋ̈dhiʋ̈tɛ ˗ya kwa ˗bha, kwa ˗dho bɔ ˗an ˈgü. ˗A ˗wɔn ˈgü ˗kwɛ 2021 ˈö yö, ˗a ˗bha Biblö ˈˈɲan ˗dho kwa ˗takun kö ˈkwa kë ˈwɔn ˗nu bhë ˗an ˈgü, kwa zuʋ̈ˈˈ ˗yö kë ˗saa, kö ˈkwa ˗dho ˗a pö ˈkwa kwa ˗zo yö kwa ˗de ꞊faan ˗dhɛ, ˈˈkɛɛ kö ˈkwa kwa ˗zo yö Zoova ˗dhɛ. ˈˈSu ˗nu ˈwo nu ˗ni ˈyö ˗an ˈgü, ˗kwaa ˗zɔn kwa këwɔn ˗nu ˈgü ꞊dhɛ kwa ˈdhaŋ˗ ˗bho ˗wo ˈö Zoova ˗ya pö yö ˗a ˈˈdhiʋ̈: «˗Ka ka zuʋ̈ˈˈ kë ˗saa, ˈka ka ˗zo yö n ˗dhɛ. Kö ˈka˗ kë ˈˈdhʋ̈, ꞊faan ˗dho kë ka ˗gɔ.»​—Is. 30:15.