˗Kwɛ ˈö bhë ˗a ˈka, Zoova ˗bha ˗kɔlokota ˗yö pë ˗꞊vadhɛ ˈwo dho Biblö draanmɛn ˗nu ˗kɔ kë ˈwɔn do ˗bha, ˗an ˗bho ˈˈgblʋʋ. Biblö ˈˈɲan ˗nu ˈwo dho ˗an ˗wɔn blɛɛˈˈ ˗bhɔkwëë ˗nu ˈwo ˈˈdhoogɔ ˈgü ˗an ˗ta, ˈwo ˗gban bhɛɛsü waa Zoova ˈtɔ ˗kë ꞊va ˗sü ˗bha ˈˈGladhiʋ̈ ˗tɔn ˗yö ˗an ˗wɔn ˗blɛɛ. ˗Ya ˈgo mü, Biblö ˈˈɲan ˗nu ˈwo dho ˗an draanˈˈ wo ˗de ˈˈpiʋ̈ waa wo ˗bha ˗Zlan ˗dhɔkë ˈkɔɔ ˗sü ˈgü ˗wo ˗an ˗ya kadhaŋdrie ˗ta.

Biblö draanmɛn ˗nu ˗wa nu ˗bhɔkwëë ˗ta ˗wo ˗bɔagüwɔn ˈbha ˗nu ˗blɛɛ, ˈwo Zoova ˈˈnuɛ bho, ˈwo ˈˈtan bho ɛɛnˈˈ ˈwo ꞊bhɛɛ. Eva Baanɛ ˈö bɔ ˈˈyi ꞊bhaa ˗kwɛ 1923 ˈgü kö ˗a ˗kwɛ ˗ya kë 15, ˗ya ˗pö: «ˈBha˗ pö ˈü ˗Zlan ˈˈnuɛ bho, ü dua ˗mü kö ˈü ˈˈluu ˈü˗ pö ‹a ˈˈpiʋ̈ kö ˗a Dëmɛn ˈˈnuɛ bho ˈwɔn ˗së ˈö˗ ˗kë n ˗dhɛ ˗a ˗wɔn ˈgü.› » ˗A ˗kë ˈˈdhʋ̈ ˗sü ˗dhɔ ˗yö kwa ꞊dhegblü ꞊vadhɛ ˗kë. ˗Ya ˗pö ˈzü: «ˈWɔn ꞊va ˗yö ˗kun kwa ꞊dhegblü dhɔɔbhaasü Gɔdöwinö ˗gɔ kö ˗yö Dëmɛn ˈˈnuɛ bho ˗a ˗wɔn ˈgü. ˈˈKɛɛ ˈdhɛ˗ ˗bha dhebɔ ˗ya yö ꞊dhɛ mɛn ˈö kun ˈˈdhiʋ̈sü ˗ni ˈgü ˗bhɔkwëë ˈka bhë ˗a ˈˈtʋ̈ŋ ˗ya ˈsü, ˈyö˗ ˗bha sɔ ˗gan ˈö kwa ꞊dhegblü to mü ˈö ö ˈˈdhi yö ˈkwëë˗.»

ˈˈSu ˈˈpɛpɛ ˈka, ˗zlanwokɔdhi ˗dhɛ ˈö ˗dhö ˗yö ˗bhɛɛ ˈö ˗Zlan ˈtɔ bhɔ, ˈö go mü ˈö ˗Zlan ˈˈnuɛ bho. ˗Kɔ ˈwo ˗bhɔkwëë ˗kë ˗a ˈka ˗kwɛ 1923 Avlidhö 1 ˈˈGlaadhiʋ̈ ˗tɔn ˗ya ˗blɛɛ, ˈö˗ pö: «˗Bhɔkwëë ˈˈpian do ˗yö ˗gban ˗bɔagüwɔn ˗nu waa mɛn ꞊faanmën ˗wo ˗nu ˈö ˗zlanwopösü ˈgü ˗an ˗ta. Yi˗ ˗pö ꞊dhɛ mɛn ꞊faanmën ˗bhɔkwëë ˈwo bhë, ˗wo ˗dho ˈˈtɔŋdë ˗nu ꞊ɲɔɔn ˈwo ˈkwëë˗.»

˗Bhɔkwëë ˗nu ˈwo ˈˈdhʋ̈, ˗wo ˈwɔn ˗së ˗kë Shalö Matɛn ˈö ˗kë Zoova ˗bha ꞊Gbɛkiö ˈö˗ ˗kwɛ ˗yö kun 19 Vankuvɛɛ, Kanada ˗sɛ ˈgü ˗a ˗dhɛ. ˗Ya ˗pö: «˗Bhɔkwëë ˗nu ˗ta ˈnën ˈpë ˈa dho ˗a pö ˈkɔ ˈgü ˈkɔ ˈgü ˗a ꞊draan mü. ˗Ya kë ꞊shiöŋ mɛn ˈbha ˗yö ˈwɔn ˗nu ˈö bɔ ˗an ˈgü ˗zlanwopösü ˈgü, ˗a ˗blɛɛ. ˗Yö n ˗takun kö pë ˈa dho ˗a pö ɛɛnˈˈ dhɛɛˈˈ ˗nu ˈa dho ˗an ˗yɔ bɔ ˈa ˗an dɔ.»

«Zlanwopö ˗yi ˗nu» ˗wa ˗kë ˈö kwa ꞊dhegblü ˗nu ˗kɔ ˗yö ˗ke ˈwɔn do ˗bha. ˗Kwɛ 1923 Avlidhö 1 ˈˈGlaadhiʋ̈ ˗tɔn ˗ya ˗pö: «˗Kwɛ 1923 ˈMɛn 1 ˈö ˗Tɛɛdhooʒiaando ˈka bhë, ˗wa ˗ya kö ˗yö kë mɛn ˈˈpɛpɛ ˗bha ˗zlanwopö ˗yi ˈka. ˈÖ sü yi ˈö bhë ˗a ˗bha, ˗Tɛɛdhooʒiaando ˗blɛɛsü ˈˈpɛpɛ ˈka ˈˈsü ˗bha, ˗zlanwokɔdhigümɛn ˈdhɛ ˗dhö ˗a dua ˗mü kö ˗yö ˗zlanwopö.

Biblö draanmɛn ˗nu ˗de ˗ʒiaan ˈwo wlüünën ˗nu ˈka ˗wo yö ˈö bhë ˗a ˗kë. Azɛlö Bëëfɔdö ˈö˗ ˗kwɛ  kun 16 ˈˈtʋ̈ŋ ˈö ˈˈdhʋ̈ ˗a ˈka, ˗ya ˗pö: «Kwa ˗bha Bulletin du périodique ˗yö ˈsëëdhɛ nu ˗kɔ ˈˈslö ˈbha ˗nu ˗zɔn, kë ˈˈdhʋ̈ kö ˗wo ˈto yi ˈˈɲaan. a Yaa n ˈziö˗ yi ˗kɔ ˗yö ˗kë yö ˈö bhë ˗a ˈgü ꞊dedewo.» ˈKö ˗kë ˈˈdhʋ̈, kwa ꞊dhegblü gɔɔn˗ do ˈö ˗ya kë zii ˗yö ˈwɔn ˈbha ˈö ˗shiö kwa ꞊dhegblüdhe ˈwo˗ ˗dhɛ Bëëfɔdö ˗a ˗dhɛ, ˗a ˗kë. Bëëfɔdö ˗pö: «Kwa ꞊dhegblü zii ˈö ˈˈdhʋ̈, ˗ya ˗pö n dua ˈyaa ˗mü kö ˈa ˈwɔn blɛɛˈˈ mɛn ˗nu ˗dhɛ. ˈˈTʋ̈ŋ ˈö bhë ˗a ˈgü, mɛn ˈbha ˗nu ˗kun ˗a ˗ga ˗ni ˈgü ꞊dhɛ ˈnëngɔɔnnën waa ˈnëndhiëŋ ˗nu dua ˈyaa ˗mü kö ˗wo kwa ˗Damɛn ˈKpii˗ ˈtɔ bhɔ ˗zlanwoposü ˈka.» (Ps. 148:⁠12, 13) ˈˈKɛɛ Bëëfɔdö ˗yö ö ˗kɔ ˗klu yö ˈö bhë ˗a ˗bha. ˗Yö ˗dho ꞊ʒiaan ˈö Galadö ꞊klaŋ ˈkɔdhi ꞊plɛ ˈbha ˗naan ˗kë ˈö ˈwo˗ bɔ Panama. ˈDhɛ ˈˈtʋ̈ŋ ˈbha ˗yö ˗ʒiö, kwa ꞊dhegblü ˗nu ˗wo wo ˗bha ˈwɔn yö ˗kɔ ˈö ˗gban wlüünën ˗nu ˗bha ˗zlanwopösü ˗bha, ˗a ˗bho ˈˈgblʋʋ.

˗Bhɔkwëë ˈkpii˗ ˗nu ˗wo kwa ꞊dhegblü ˗nu ˗kɔ ˗kë ˈwɔn do ˗bha ˈpö. ˗Bhɔkwëë ˗nu ˈwo ˈˈdhʋ̈ ˗an ˈˈtʋ̈ŋ ˈka, ˗wo ˗zlanwopö ˗yi ˗nu ˗ya. ˗A ˈwɔnzuan do ˈnën ˗tɔ ˗a ˗dhɛ ˈwo˗ ˗kë Winipɛgö Kanada ˗sɛ ˈgü. Mɛn ˈˈpɛpɛ ˈwo kun ˗bhɔkwëë ˈö bhë ˗a ˗ta, ˗wo ˗an ꞊faanmën kö ˗wo ˗zlanwopö ˈˈkwipö ˈö ˈˈdhʋ̈ ˗a ˈgü, Masö 31 ˈgü. ˗Zlanwopö ˗yi suu ˗nu ˈwo bhë, mɛn ꞊va ˗wo wo ˗kɔ ˗da ˗a ˈgü ˈö ˈwɔn ˗së ˗nu ˗wo go ˗a ˈgü. ˈUtö 5 ˈka, mɛn nu ˈwo ˗mɔn 7.000 ˗bha ˗wo ˗kë ˗bhɔkwëë ˈkpii˗ ˈˈwɛɛ do ˗ta Winipɛgö. ˗Bhɔkwëë ˈö kun Kanada, ˗a ˗dhɛ ˈö mɛn ˗nu kun ˗a ˗ta ꞊va ˈyö bhë.

Zoova ˗bha ꞊Gbɛkiö ˗nu ˗bha ˗bhɔkwëë ˈkpii˗ ˈö kun ˗kwɛ 1923 ˈUtö 18-26 ˈgü ˗yö ˗kun Lɔsanʒelɛsö, Kalifɔni. Zunalö ˗nu ˗wo ˗bhɔkwëë ˈö bhë ˗a kë ˗yi ˈˈdhoogɔ ˗to ꞊va ˈwo˗ ˗wɔn ꞊blɛɛ, ˈö Biblö draanmɛn ˗nu ˗wo mɛn ˗dhɛ ˗a ˈka ˈsëëdhɛ 500.000 ˗glu mɛn ˗nu ˗ta. ˗Wo pë ˗ya sɔ ˈˈpɛn ˗nu ˗ta ˈwo ˗an ꞊nënŋ gɔ ˗nu ˗bha ˗kpinŋ ˗nu ˈˈpiʋ̈.

ˈDhɛ ˈkwa dɔ ˈˈsɩyi ˈka ˈUtö 25 ˈgü, kwa ꞊dhegblü Lutɛɛfɔdö ˗yö ˈˈdhɛɛtadhiaŋ˗ ˈö˗ ˗gɔ ˗kë « Les brebis et les boucs » ˈka, ˗a ˗zë. ˗Ya ˗zɔn ˈˈpuu ˈka ꞊dhɛ mɛn kpɛnŋdhö ˗nu ˈwo ˗kë ꞊dhɛ ˈˈbhlaa ˗nu ˈdhö bhë ˈnën ˈwo dho kë ꞊bhɔɔ ˈˈsɛ ˗ta. ˗Yö ˈwɔn ˈbha ˈö˗ ˈˈpiʋ̈ kö ˈkwa˗ kë ˈö˗ ˗gɔ ˗kë « Un  avertissement à tous les chrétiens » ˈka, ˗a ˗wo pö ˈzü. ˗Wo ꞊sua ˗zlanwo ˗nu ˗wɔn ˗blɛɛ ˗a ˈgü, ˈwo˗ pö zuʋ̈puumɛn ˗nu ˗dhɛ ꞊dhɛ ˗wo ˈgo ‹Babidhɔnö ˗pö ˈkpii˗› ˈö bhë, ˗a ˈgü. (˗Dhɛ. 18:​2, 4) ꞊Taabha, Biblö draanmɛn ˗nu ˗wo ˈsëëdhɛ ˈö ˈˈdhʋ̈ ˗a ˈˈmliɲɔn ꞊va ˗glu ˈˈkpɔnŋtaadhɛ ˗todhʋ̈sü ˈgü, wo ꞊faan ˈka.

˗Bhɔkwëë ˈkpii˗ yi ˗totaabhasü ˈka, kwa ꞊dhegblü Lutɛɛfɔdö ˗yö ˈˈdhɛɛtadhiaŋ˗ ˈö˗ ˗gɔ ˗kë « Toutes les nations marchent vers Harmaguédon, mais des millions d’hommes actuellement vivants ne mourront jamais » ˈka, ˗a ˗zë mɛn 30.000 ˗dhɛ. ˈDhɛ ˗kë ꞊dhɛ ˗wo ˗kun wo ˈˈɲan ˈto ˗ni ˈgü mɛn ꞊va ꞊dede ˗gɔ bhë, Biblö draanmɛn ˗nu ˗wo balɔn ˗zuö ˗dhɛ ˈö kun Lɔsanʒelɛsö ˗a ˗sü. Kwa ꞊dhegblü ˗nu ˗wo ˗bɔ ˈˈslö ˗dɛɛ ˈö ˗kë mɛn ˗wo ˗kë ˈˈgbɩɩ˗ ˗pë ˈka bhë ˗a ˗ta kö mɛn ˈˈpɛpɛ ˗wo dhiaŋ ˗nu man. Mɛn ꞊va ˗wo wo ˈˈtʋ̈ ˗to ˗bhɔkwëë bhë ˗a ˗bha, Ladio ˈgü.

˗Kwɛ 1923 ˈgü, kwa ˗bha ˗zlanwopösü ˗yö ˗dhadhiʋ̈ Aflikö, Ɛndö, waa Amedhikö ˈˈshiaŋ ꞊ʒiaan. Kwa ꞊dhegblü do ˈwo˗ ˗dhɛ Zozɛfö ˈö kun ö ˗zokë ˗ni ˈgü ö ˗bha dhebɔ waa ö ˗bha ˈnën ˈˈsɔɔdo ˗an ˈˈpiʋ̈ Ɛndö, ˗yö ö ˗kɔ ˗da mɛn ˗nu ˈwo kwa ˗bha ˈsëëdhɛ yökë Ɛndi ˗wo, Tamilö ˗wo, Telugu ˗wo waa Uudu ˗wo ˈgü ˗an ˗dhɛ.

Sera Leɔnö ˗sɛ ˈgü, Zozɛfö waa Leona Blakömanö ˈwo kun Biblö draanmɛn ˗nu ˈka, ˗wo ˈsëëdhɛ ˗bɔ kwa ˗bha ˈkɔ ˈkpii˗ ˈgü Bluklinö Nuyɔɔkö ˗sɛ ˈgü, ˈwo ˗takundhe ˗dhɛ. ˗Kwɛ 1923 Avlidhö 14 ˈgü, ˗wa ˗yɔ ˗bɔ ˗an ˗gɔ. Aflɛdö ˗ya ˗pö: «ˈˈSɩyi do ˈka kö ˈbin ˗ya ˈmën ꞊dedewo, ˗wo n ˗dhɛ telefɔnö ˈˈdhiʋ̈.» Mɛn do ˈbha ˈö˗ ˗wo ˈdhö ˗gbinŋ, ˗ya ˗pö ˗a ˗dhɛ: «ˈKa ˈsëëdhɛ bɔ Watch Tower ˗dhɛ, ˈka˗ pö ˈka ˗bhawɔn ˗yö ˗zlanwopömɛn ˗nu ˗bha ˗ee?» ˈYö Aflɛdö ˗ya ˗yɔ bɔ ˈö˗ pö: «꞊Ii.» ˈDhɛ ˗kë ˈˈdhʋ̈, ˗yö ˗a ˗mɛn ˗ya pö: «˗Ao, man ˈnën ˈwo n bɔ.» Wiliamö Blaɔnö ˈnen kun ˗a ˈka. Waa ö ˗bha dhebɔ Antonia waa ˗an ˈdhu ˗nu ꞊plɛ Luizö waa Lusi ˗wo ˗go Karaibö ˈwo nu. Kwa ꞊dhegblü ˗nu ˗wo ˗to ˗mü ˈwo ˗kpan ˗an ˗bha.

Aflɛdö ˗ya ˗pö ˈzü: «Yaa Leona yi ˗kun Biblö ˗ta ˈˈdoodɔ ˗ni ˈgü ꞊dhɛ ˗kɔ yi ˗kë ˗a ˈka ˈˈdoogɔ ˈˈpɛpɛ ˈka ˗a ˈdhö, ˈyo to mü ˈyi ˗kpan ˗gɔndë ꞊gblɛɛn ˗bha yi ˗bha ˈˈkpandhiʋ̈. ˗Yö ˗kun kwa ꞊dhegblü Blaɔnö ˈka. ˗Yö ˗kun gagade ˗wɔn kun ˗ni ˈgü ˈö ꞊faan ˈka ꞊dedewo. ˗A ˗wɔn ˈgü, ˗yö ˗kun ˗a ˈˈpiʋ̈ kö ˈö ˈˈdhɛɛtadhiaŋ˗ zë yi ˈö dɔ ˗a ˈˈpiʋ̈ ˗a ˈka.» ˗Yö ˈti ˗mɔn ˈˈsu do ˗bha kö ˈsëëdhɛ nu ˈö ˗nu ˗an ˈka, ꞊yaa˗ ꞊gban nu mɛn ˗nu ˗dhɛ. ˗Dhɛ ˈö ˈˈtʋ̈ŋ ˗dɛdɛ ˗yö ˗ʒiö, ˈsëëdhɛ ˗be ˈö ˗ʒiö 5.000 ˗ta ˗wa ˗bɔ ˗a ˗dhɛ. ˗A ˗dhɛ ˈti ꞊gwëë ˈö˗ ˗bhawɔn yö ˈzü  ˈsëëdhɛ ˗be ˗nu ˗bha. ˈKö ˗kë ˈˈdhʋ̈, mɛn ˗nu ˈwaa kun Blaɔnö ˈsü ˗ni ˈgü ꞊dhɛ ˈsëëdhɛ ˗be ˈˈdoodɔmɛn ˈdhö. Zoova ˗bha yö ˈö˗ ˗kë ˈˈtʋ̈ŋ ꞊va ˈˈpiʋ̈ bhë ˗a ˈgü, ˗yö Biblö ˈˈɲan ˗nu ˗wo ˗pö ö ˗bha ˈˈdhɛɛtadhiaŋ˗ ˈgü ˗kplawo. ˗A ˗wɔn ˈgü, ˗wa ˗dhɛ Blaɔnö La Bible.

ˈˈTʋ̈ŋ ˈö ˈˈdhʋ̈ ˗a ˈka kö kwa ꞊dhegblü ˗nu ˗wa kë ꞊va Betɛdhö ˈö kun Bamɛnö, ˈˈLüman ˈˈsɛ ˈgü ˗a ˈgü. ˗A ˗wɔn ˈgü, ˗an dua ˗mü kö ˗wo ˈdho ˗dhɛ ˈˈwɛɛ ˈgü. ˗Ya ˈgo mü, Flansö ˈˈsɔdha ˗nu ˗kun nu ˗ni ˈgü ˈˈkwipö bhë ˗a ˗gɔ. Biblö draanmɛn ˗nu ˗wo ˈkɔ ˈkpii˗ do ˈwo dho wo ˗bha ˈsëëdhɛ ˈˈgan ꞊manŋzi dɔ mü ˗a ˗slɔɔ Madebugö. ˈDhɛ ˈkwa dɔ Ʒuɛn 19 ˈka, kö kwa ꞊dhegblü ˗nu ˗wa wo bo ꞊manŋzi waa ꞊kwɛɛ˗ ˈˈwɛɛ ˗nu ˗an ˗lo ˈkwëëdhö ˗sü ˈka Betɛdhö ꞊dɛɛ ˈö Madebugö ˗a ˈgü. ˗Dhɛkpaɔyi ˈwo˗ pö ˗a ˈka kwa ˗bha Betɛdhö ˗kɔ ˈkpii˗ ˈö ˈˈkpɔnŋ ꞊taa ˗a ˗dhɛ ꞊dhɛ ˈwa ꞊gbloo ˈˈkwipö bhë ˗a ˈgü, ˈyö zunalö ˗nu ˗wa pö ꞊dhɛ Flansö ˈˈsɔdha ˗nu ˗wa Bamɛnö ˗dhɛ ˈkun. Kwa ꞊dhegblü ˗nu ˗wo Zoova ˈˈnuɛ ˗bho ˗a ˗bha wo ˗takun ˗sü waa ö ˗kɔ ˗kpa wo ˗ta ˗sü ˗wɔn ˈgü.

Kwa ꞊dhegblü do ˈwo˗ ˗dhɛ Ʒɔʒö Ŋungö ˗yö ˗nu yi do ˈka Blezidhö kö ˈö nɔɔn˗ ˗së pö. ˗A ˗wɔn ˈgü, ˗yö Bɛtɛdhö ˗dɛɛ ˗ya mü ˈö ˈˈGladhiʋ̈ ˗tɔn ˈö Pɔɔtigɛ ˗wo ˈgü ˗a nu mɛn ˗nu ˗dhɛ. ˈDhɛ ˈˈsü ˈdɛdɛ ˗yö ˗ʒiö, kö ˈsëëdhɛ ˈö ˗ʒiö 7.000 ˗ta ꞊yaa˗ nu mɛn ˗nu ˗dhɛ. ˗A ˗bha ˗nu Blezidhö ˗sü ˗yö ˗kun ˗së ꞊dedewo dhebɔ do ˈwo˗ ˗dhɛ Saadha Fɛɛgusɔnö ˗a ˗bha ˈka. ˗Yö ˗ya ˈˈGladhiʋ̈ ˗tɔn ˗wopösü ˗bha ˗kwɛ 1899 ˈgü, ˈˈkɛɛ ˈyii ˗mɔn ö ˗de nu ˗sü ˗bha kö ˗yö bɔ ˈˈyi ꞊bhaa. ˈDhɛ ˈˈsü ˈbha ˗yö ˗ʒiö, kwa ꞊dhegblü Fɛɛgusɔnö waa ˈö ˗bha ˈnën ˗nu ˗yiishiö ˗wo ˗bɔ ˈˈyi ꞊bhaa.

ˈDhɛ ˈkwa dho yö ˗kwɛ 1923 ˈˈdhiʋ̈tadhɛ ˗bha Desanblö 15 ˈgü, ˈˈGladhiʋ̈ ˗tɔn ˗yö ˗kɔ ˈö ˗bhɔkwëë ˗nu, ˗zlanwopösü waa ˗bhɔkwëë ˈkpii˗ ˗nu ˗wo pa ˗a ˈka Biblö draanmɛn ˗nu ˈka ˗a ˗blɛɛ, ˈö˗ ˗pö: «ˈKwa˗ yö ꞊dhɛ ˗zlanwokɔdhigümɛn ˗nu ˗bha ˗zoyödhe ˗gɛn ˗ya ˗gban ꞊dedewo. ˗Kwa ˗kë baasu ˈka kö ˈkwa ˗Zlan ˗bha yö ꞊va kë ˗kplawo, ˈkwa˗ ˗dhɔkë kwa ꞊faan waa zuʋ̈gblüdhi ˈka ˗kwɛ 1924 ˈgü.»

˗Kwɛ ˈö dɔ ˗a ˈˈpiʋ̈ ˗a ˈgü, ˗yö ˗kun ˗së ꞊dedewo ˈzü Biblö draanmɛn ˗nu ˗bha ˈka. Kwa ꞊dhegblü ˗nu ˈwo kun Betɛdhö ˗kɔ ˈkpii˗ ˈgü Bluklinö ˗wo ˗zlanwopö ˈˈsü ꞊va ˈˈpiʋ̈ Satɛnö ˈö kun ˗ya ˗sü ˈka ˈˈyi ꞊zinŋgü Bɛtɛdhö ˗dhɛ ˈka ꞊klöö˗ bhë, ˗a ˈgü. Kwa ˗bha ˈkɔ ˗nu ˈwo kun ˗dhɛ ˈö bhë ˗a ˈgü, ˗wo wo bo ˗an dɔ ˗sü ˈka 1924 ˈgü. ˗Wo kwa ꞊dhegblü ˗nu ˗ɲɔɔn ˈkwëë˗ ˈö ˈwo nɔɔn˗ ˗së pö ꞊dedewo ˈö ˗ʒiö ˗a ˈka ˈˈdhiʋ̈ ˗be ˗ta.