1. ˈMën ˗kë ˈö ˈwɔn ˗man mɛn ˗nu ˗ta ˗sü ꞊mɔɔn˗ ˗bha ˈö ˗kë ˗kwa ˗kɔa ˈˈgbɩɩ˗, ꞊dɛɛ?

 ˈˈTƲ̈Ŋ ˈbha ˗nu ˈka, ˗gɔ ˗dho ˈˈshiaŋ ˗sü ˗kë ka ˗kɔa ˈˈgbɩɩ˗ ee? ˗Yö ˗kë ˈˈdhʋ̈ ˈpö ˗gblüdë Davi ˈka. ˗A ˗wɔn ˈgü, ˗yö ˗bhɛɛ ˗Zlan ˗dhɛ ˈö˗ pö: «˗Bhö ˈwɔnman ü ˗ta ˗sü zuʋ̈ga nu n ˗dhɛ.» (Ps. 51:12) Zoova ˗dhɔ ˗kun Davi kë ˗ni ˈgü. ˈˈKɛɛ ˈˈtʋ̈ŋ ˈbha ˗nu ˈka, ˈwɔnman ˗a ˗ta ˗sü ˗kun Davi ˗kɔa ˈˈgbɩɩ˗. ˗Yö ˗kë ˈˈdhʋ̈ ˈpö kwa ˈka. ˈMën ˗kë? ˈPë ˗kë ˈö ˗kë ˈˈdhʋ̈ ˗a ˗blɛɛsü ˈnën ˗tɔ kwa ˗bhɔ ˗gɔɔgbɩɩdhɛ ˈka. ˗A ꞊plɛ ˗bha ˗naan ˈnën ˗tɔ Sɔtraan ˗ya ˈˈslö ˗mɛɛn ˗kplawo kö ˈö kwa ˗blü ˗gban ˗Zlan ˗gɔ ˗sü ˗bha ꞊dhɛ ö ˈdhö. (2 Ko. 11:3) ˗A ˗yaaga ˗bha ˗naan ˈnën ˗tɔ ˈpö ‹mɛn ˗nu ˈwo ˈˈkpʋng ya˗ ꞊taa ˈö ˈwaa ˗Zlan dɔ bhë ˗an ˗bha ˗tosɛa kë ˗kɔ› ꞊mɔɔn˗ ˗bha ˈö pa kwa ˈka. (Efɛ. 2:2) ˈDhɛ ˈˈdhʋ̈, kwa dua ˗mü kö ˈkwa ˈkozë ˈwɔn yaa kë ˗dhii ˈö kwa ˗bha, Sɔtraan waa ˈˈkpɔnŋtaadhɛ yaa ˈka, kë ˈˈdhʋ̈ kö ˈkwa ˈwɔnman Zoova waa mɛn ˗nu ˈö ˗an ˗ya ˗an ˗ta.

2. ˈMën ˗tɔ «ˈwɔn ˗man mɛn ˗ta ˗sü zuʋ̈ga» ˗bha ˗kë kwa ˗gɔ ˗sü? (Zakö 3:​17, NWT)

² ˗Bhö Zakö 3:17 ˗wo pö, NWT. Zakö ˗ya ˗pö mɛn ˗nu ˈwo ꞊kpɔɔsü ˗wo wo ‹˗gɔ ˗dho ˈˈshiaŋ.› ˗Kwa kwa ˗zota pë ˈö kun ˗a ˈˈpiʋ̈ kö ˈö˗ pö ˗a ˈgü. Kwa dua ˗mü kö ˈkwa ˈwɔnman mɛn ˗nu ˈö Zoova ˗yö ˗an ˗ya ˗an ˗ta kwa zuʋ̈ˈˈ ꞊gban ˈka. ˈˈKɛɛ Zoova ˈti˗ pö ˈkwa ˈwɔnman mɛn ˗nu ˈwo˗ ˈˈpiʋ̈ kö ˈkwa ö ˗bha ˈtɔŋ˗ ˗nu ˗lögü ˗an ˗ta.—Këw. 4:​18-20.

3. ˈMën ˗kë ˈö kwa ˗bha ˈwɔn ˗man mɛn ˗nu ˈö ˗wogbiŋdhɛ ˈdhö ˗an ˗gɔ ˗an ˗ta ˗sü ˈdhö Zoova ˗dhɛ ˗së?

³ ˈWɔnman Zoova ˗ta ˗sü ˗yö ˈˈplëëplë ˈö ˗ʒiö ˗a ˈka ˈwɔnman mɛnbhɩɩdhe ˗nu ˗ta ˗sü ˗ta. ˈYö sü ꞊dhɛ Zoova ˗yö kwa ˗dɔɔ ˗ʒian ˗së ˗ta ˗kplawo. (Ps. 19:7) ˈˈKɛɛ mɛnbhɩɩdhe˗ ˗nu ˗zë ˈwaa˗ kë ˈˈdhʋ̈. ˈKö ˗kë ˈˈdhʋ̈, Zoova ˗yö ˗kɔmɔnwɔnbhasü ˗nu ˈnënmɛn ˗nu, ˈˈsɛkɔɔnmɛn ˗nu waa mɛn zii ˗nu ˗dhɛ kö ˗wo ˈˈdhiʋ̈sü kwa  ˈka. (Prov. 6:20; 1 Tes. 5:12; 1 Piɛ. 2:​13, 14) ˈKwa ˈwɔnman ˗an ˗ta, kö ˈkwa ˈwɔnman Zoova yöö ꞊dede ˗a ˗ta. ˗Kɔ ˈkwa dho ˈwɔnman ˗a ˈka mɛn ˗nu ˈö Zoova ˗yö ˗an ˗ya ˈˈdhʋ̈ ˗an ˗ta, ˈkö ˗kë ꞊dhɛ ˗wɩ ˗an ˗bha ˗dhioo ˗nu ˗bha ˗sü waa ˗an ˗ya ꞊bhlëë ˈgü ˗sü ˗wo kwa ˗kɔa ˈˈgbɩɩ˗ ˈˈtʋ̈ŋ ˈbha ˗nu ˈka, kwa ˗dho ˗a yö ˈwɔn ˗gɔ ˈö yö ˗a ˈgü.

4. ˈMën ˗kë ˈö ˈnën ˗nu ꞊vadhɛ ˈwaa wo ˗mɛn ˗nu ˗woman?

⁴ Mɛn ˗nu ˈö ˈwaa wo «ˈkpɔmɛn ˗nu ˗woman» ˗wo ꞊klëën ˗sü ˈka wlüünën ˗nu ˗zü. (2 Tim. 3:​1, 2) ˈMën ˗kë ˈö ˈnën ˗nu ꞊vadhɛ ˈwaa ˈwɔnman wo ˗mɛn ˗nu ˗ta? ˈNënmɛn ˈbha ˗nu ˈwaa pë ˈö ˈwo˗ pö wo ˗bha ˈnën ˗nu ˗dhɛ ˗wa kë bhë, ˗a ˗ya ꞊bhlëë ˈgü. ˗A ˗wɔn ˈgü, ˗an ˗bha ˈnën ˗nu ˗wo ˗an ˗sü ꞊dhɛ ꞊suamɛn ˗nu ˈdhö. ˈNën ˈbha ˗nu ˗bha ˈgü ˈpö ˈˈkpɔnŋtaadhɛ ˗ya ˈgo ˈˈgblʋʋ. ˗A ˗wɔn ˈgü, ˗wa ˗pö ꞊dhɛ wo ˗mɛn ˗nu ˗bha ˗dhioo ˗nu ˈwaa ꞊mɔɔn˗ ˗bha kö ˗wo wo ˗takun ɛɛnˈˈ ˈzü ˗an ˈkun ˗dhɛ ˗yö ˈˈgbɩɩ˗. ꞊Ya kë ꞊dhɛ wlüünën ˗mü ü ˈka, ˗kɔ ˈü ˈwɔn yö ˗a ˈka ˈyö bhë ˗ee? Zoova ˗ya ˗pö: «ˈNë ˗nu, ˗ka ka ˈkpɔmɛ ˗nu ˗wʋ ma, yö ꞊në kwa Dëmɛ ˗dhidhɛwɔn ˈka, ˈyö këwɔn ˈka ˈpö.» (Efɛ. 6:1) ˈMën ˗dho ü ˗takun ˈtɔŋ˗ ˈö bhë, ˗a ˗ya ꞊bhlëë ˈgü ˗sü ˗bha?

5. ˈMën ˗kë ˈö Yesu ˈdhö ˈwɔnzuan ˗së ˈka ˈnen ˗nu ˈwo˗ ˈˈpiʋ̈ kö ˈwo ˈwɔnman wo ˗mɛn ˗nu ˗ta, ˗an ˗bha ˈka? (Dhukö 2:​46-52)

⁵ Ka ꞊mɔɔn˗ ˗bha ˈka ˈwɔnman ˗sü ˈwɔnzuan ˗së ˈsü Yesu ˗bha. (1 Piɛ. 2:​21-24) ˗Yö ˗kun ˈˈslʋ̈ʋ̈slʋ̈. ˈˈKɛɛ ˈwɔn yaa kë ˗dhii ˗kun ˗a ˗mɛn ˗nu ˗bha. Yesu ˗yö ö ˗mɛn ˗nu ꞊bhlëë ˗ya, ˈkö ˗kë ꞊dhɛ ˈwɔn ˗nu ˗wo ˗zë ˗an ˗gɔ ɛɛnˈˈ ˈwaa ˈwɔn ˗nu ˈgüman ˗a ˗gɔ ˈˈtʋ̈ŋ ˈbha ˗nu ˈka. (Ex. 20:12) ˈWɔn ˈö ˗kë kö Yesu ˗kwɛ ˗ya kë 12, ˗kwaa ˗ga. (Dhukö 2:​46-52 ˗wo pö.) ˗A ˗mɛn ˗nu ˗wa ˗to wo ꞊zlöö Zedhizadhɛmö ˈwo dho. Zozɛfö waa Madhi ˗an dua ˗mü ˗be kö ˈwlaan˗ ˗ya ɲën ˗wa ˈwɔn dɔ ꞊dhɛ wo ˗bha ˈnën ˗nu ˈˈpɛpɛ ˗wo wo ˈˈpiʋ̈. ˈˈKɛɛ ˗dhɛ ˈwo ˗kpan Yesu ˗bha ꞊taabha, Madhi ˗ya ˗pö ˗a ˗dhɛ ꞊dhɛ ˈto ˈö˗ wo Zedhizadhɛmö bhë ˗ya ˈwɔn ˗shiö ö ˗bha ˈkɔdhigümɛn ˗nu ˗dhɛ. Yesu ꞊mɔɔn ˗bha ˗be ˈö˗ pö ꞊dhɛ ˈwɔn ˈwo˗ ꞊blɛɛ ö ˈka bhë, ˈyaa ˗së. ˈˈKɛɛ ˈyii˗ kë ˈˈdhʋ̈, ˗yö ˈwɔn ˗blɛɛ ˗an ˗dhɛ ˗an ꞊bhlëë ˈgü. ˈKö ˗kë ꞊dhɛ Zozɛfö waa Madhi ˈwɔn ˈö Yesu ˗ya ꞊blɛɛ ˗an ˗dhɛ «ˈwii˗ ˈgüman ö ˈklɔɔ˗ ˈka,» Yesu «˗gun ˗a ˗nu ꞊bhlëë ˗ya sië ꞊dedewo.»

6-7. ˗Mën ˈö ˗dho ˗wo wlüünën ˗nu ˗takun kö ˗wo ˈwɔnman wo ˗mɛn ˗nu ˗ta?

⁶ Wlüünën ˗nu, ˈwɔn ˗nu ˗wa zë ka ˗mɛn ˗nu ˗gɔ ɛɛnˈˈ ˈwii ka ˗wo ˈgüman, ˈwɔnman ˗an ˗ta ˗sü ˗kë ka ˗kɔa ˈˈgbɩɩ˗ ˗ee? ˈMën ˗dho ka ˗takun? ˗Blɛɛsü ˈka, ˗ka ka ˗zota ˗kɔ ˈö Zoova ˗ya yö ˗a ˗bha ˗a ˈgü. Biblö ˗ya ˗pö ꞊dhɛ «ˈmɛ ˈö ˈbha ˗kplü kwa Dëmɛ ˗bha, ˈbha˗ kë ˗kɔ bha ꞊në˗ ˈgü, ˈyö ˗dhi [˗Zlan] ˗dhɛ.» (Kodh. 3:20) Zoova ˗ya ˈwɔn ˗dɔ ꞊dhɛ ˈˈtʋ̈ŋ ˈbha ˗nu ˈka, ka ˗mɛn ˗nu ˈwaa ka ˗wo ˈgüman ɛɛnˈˈ ˈzü ˈtɔŋ˗ ˗nu ˈö ˗an ˈkun ˗sü ˈdhö ˈˈgbɩɩ˗, ˗wo ˗an ˗dɔ ka ˗ta. ˈˈKɛɛ ˈka ka ˈgü dɔ ˈˈgbɩɩ˗ kö ˈka ˈwɔnman ˗an ˗ta, ˗yö ˗kë Zoova ˗dhɛ ˗së.

⁷ ˗A ꞊plɛ ˗bha ˗naan ˈnën ˗tɔ ˗ka ka ˗zota ˗kɔ ˈö ka ˗mɛn ˗nu ˗wo ˈwɔn ˗nu yö ˗a ˈka, ˗a ˈgü. ˈKa ˈwɔnman ˗an ˗ta, ˗yö ˗an zuʋ̈ˈˈ ˈˈgblü ˗dhi ˈwo ˈdhaŋ˗ bho ka ˈˈdhiʋ̈. (Prov. 23:​22-25) ˈKa˗ kë ˈˈdhʋ̈, ka ˗dho ꞊ɲɔɔn ˗an ˗bha ꞊dedewo. Kwa ꞊dhegblü do ˈwo˗ ˗dhɛ Alɛzandö ˈö Bɛlüʒikö ˗ya ˗pö: «˗Dhɛ ˈa ˗ya ˈwɔnman n ˗mɛn ˗nu ˗ta ˗sü ˗bha yi ꞊gban ˈka, yaa˗ nu yi ˗bha ˗mlɛɛn ˗yö ˗yɔ ˈö yi zuʋ̈ˈˈ ˈˈgblü ˗yö dhi.» b ˗A ˗yaaga ˗bha ˗naan ˈnën ˗tɔ ˗ka ka ˗zota ˗kɔ ˈö ka ˗bha ˈwɔn ˗man ˗an ˗ta ˗sü dho ka ˗takun ˗a ˈka ˗dhɛkpaɔ dhiʋ̈ˈˈ ˈgü, ˗a ˈgü. Paolo ˈö Blezidhö ˗ya ˗pö: «˗Dhɛ ˈa ˈwɔn ˗man n ˗mɛn ˗nu ˗ta ˗sü ꞊draan, ˗yö n ˗takun ˈa ˈwɔnman Zoova waa  mɛn ˗nu ˈö ˗kɔmɔnwɔnbhasü ˈdhö ˗an ˗gɔ, ˗an ˗ta.» ˈPë ˗wɔngbɩɩsü ˈbha ˈö˗ ˗wɔn ˈgü ˈka dho ˈwɔnman ka ˗mɛn ˗nu ˗ta, Biblö ˗ya ˗blɛɛ ˈö˗ pö: ‹Ka ˗dho ˗tosɛa kë zuëˈˈ ꞊nii ˗da ˈgü, ö ka ꞊sii ˗yö kë ꞊gblɛɛn ˈˈkpʋng ꞊taa.› —Efɛ. 6:​2, 3.

8. ˈMën ˗kë ˈö wlüünën ˗nu ꞊vadhɛ ˗wo ˈwɔnman ˗wo ˗mɛn ˗nu ˗ta?

⁸ Wlüünën ˗nu ꞊vadhɛ ˗wa ˗yö ꞊dhɛ ˈwa ˈwɔnman wo ˗mɛn ˗nu ˗ta, ˈwɔn ˗së ꞊va ˗go ˗a ˈgü. Luiza ˈö˗ ˗kwɛ ˈdhö 16 ˈö Blezidhö, ˗ya ˗yö ꞊dhɛ ˗a züdɔdhɛ ˈgü ˈpë ˗kë ˈö ö dua ˈyaa ˗mü kö telefɔnö ˗yö kë ö ˗gɔ, ˈyaa kun ˗a ˈgüman ˗ni ˈgü. ˗A ˗bha ˈgü, mɛn ˗nu ˈö waa˗ ˗nu ˗an ˗kwɛ ˈdho do bhë, telefɔnö ˗ya mɛn ꞊vadhɛ ˗gɔ. ˈˈKɛɛ ꞊taabha, ˗ya ˗yö ꞊dhɛ ö ˗mɛn ˗nu ˗wa ˗kë ˈˈdhʋ̈ kö ˗wo ö ˗takpa. ꞊Dɛɛ, ˗ya ˗pö: «A˗ ˈwɔn ˗dɔ ꞊dhɛ ˈman ˈwɔnman n ˗mɛn ˗nu ˗ta, n dua ˈyaa ˗mü kö ˈa˗ ˈsü ꞊dhɛ pë ˈö ˗wa ˗pötaadhe ˈkun n ˗gɔ ˗a ˈdhö. ˈYö sü ꞊dhɛ n ˗bhawɔn ˗yö ˗an ˗bha ˗dhioo ˗nu ˗bha ꞊dedewö.» Kwa ꞊dhegblüdhe do ˈö wlüünen ˈka ˈwo˗ ˗dhɛ Edhizabɛtö ˈö Zeta zuni ˗yö ˗kun ö ˈgü dɔ ˗ni ˈgü ˈˈgbɩɩ˗ ˗kplawo kö ˈö ˈwɔnman ö ˗mɛn ˗nu ˗ta. ˗Ya ˗pö: «ˈPë ˗kë ˈö n ˗mɛn ˗nu ˗wo ˗dhioo ˈbha dɔ n ˗ta n ˈti ˈgüman ˗së ˈka, a n ˗zota ˗kɔ ˈö ˗an ˗bha ˗dhioo ˗yö n ˗takpa ˗a ˈka ˈˈdhiʋ̈ ˗be ˗a ˈgü.» Monika ˈö Ameni ˗ya ˗pö ꞊dhɛ ˈya ˈwɔnman ö ˗mɛn ˗nu ˗ta ˈwɔn ˗së ˗go ˗a ˈgü ˗kplawo, ˈö ˗ʒiö ˗a ˈka ˗an ˗wo ˗lögü ˗sü ˗ta.

9. ˗Kɔ ˗mɛɛn ˈö mɛn ꞊vadhɛ ˗wo ˈtɔŋ˗ ˗ya ꞊bhlëë ˈgü ˗sü yö ˗a ˈka?

⁹ Mɛn ꞊vadhɛ ˗wa ˈwɔn ˗dɔ ꞊dhɛ kwa ˗bhawɔn ˗yö «ˈˈsɛgɔdhiʋ̈mɛ ˗nu» ˗bha, ˈö kwa dua ˈdhö ˗mü kö ˈkwa ˗an ˗bha ˈtɔŋ˗ ˈbha ˗nu ꞊bhlëë ˗ya. (Wlɔ. 13:1) ˈˈKɛɛ ˈwaa ˈˈwɩ ˗a ˗bha kö ˗an ˗bha ˈtɔŋ˗ ˗nu ˈö ˈwaa ˗an ˗dhɛ ˗së ˈwo ˗an ˗ya ꞊bhlëë ˈgü. ˗A ˈwɔnzuan ˈnën ˗tɔ ˈnii˗ ꞊sɔnŋ ˗nu bho ˗sü. ˈˈSɛ do ˈö Edhɔpö, ˗a ˈgümɛn ˗nu ˗wa ˗pö ꞊dhɛ «ˈnii˗ ꞊sɔnŋ ˈö ˈyaa ˗së kwa dua ˈyaa mü kö ˈkwa˗ bho.» ˗A ˗wɔn ˈgü, mɛn ˗nu ˈwo mü ˈwaa ˈnii˗ ꞊sɔnŋ ˈˈpɛpɛ bho ˈˈsɛgɔdhiʋ̈mɛn ˗nu ˗gɔ.

10. ˈMën ˗kë ˈö ˈkwa ˈtɔŋ˗ ˗nu ˈö ˈwaa kwa ˗dhɛ ˗së ˗ʒiaanwo ˗an ˗ya ꞊bhlëë ˈgü?

¹⁰ ˗Biblö ˗ya ˗pö ꞊dhɛ ˈˈsɛgɔdhiʋ̈mɛn ˗nu ˈwo Sɔtraan ˗kɔ ꞊löö ˗wo saanˈˈ ˗wɔ mɛn ˗nu ˗ta, ˈö go mü ˗an ˈgü shiʋ̈ˈˈ ˗yi ˈyaa ꞊gblɛɛn ˈzü. (Ps. 110:​5, 6; Eccl. 8:9; Dhu. 4:​5, 6) Biblö ˗ya ˗pö ˈzü ꞊dhɛ «mɛ ˈˈʋʋ mɛ ˈö gɔɔgbɩɩdhɛ ˗kë mɛdhɛkëmɛ ˗nu ˗gɔ, kö ˗yö gɔɔgbɩɩdhɛ ˗kë [˗Zlan] ꞊në˗ ˗gɔ bha.» ꞊Dɛɛ, Zoova ˗yö ö ˗kwaa ˈˈsɛgɔdhiʋ̈mɛn ˗nu ˈzü kö ˗wo kwa ꞊kɔɔn, kë ˈˈdhʋ̈ kö ˗wo ˈwɔn ˗nu ˗mɔnkwëë˗. ˗A ˗wɔn ˈgü, ˗ya ˈˈpiʋ̈ kö ˈkwa ˈwɔnman ˗an ˗ta. ˈDhɛ ˈˈdhʋ̈,«˗a mɛ ˈdhɛ ˗a ˗bha ˈwɔn ꞊ya kë k[w]a ˗bha, ˗k[w]aa bho k[w]a ˗bha.» ˗Yö ꞊mɔɔn˗ ˗bha ˈö ˗kë ˈnii˗ ꞊sɔnŋ bho ˗sü, ꞊bhlëë ˗ya ˗an ˗bha ˗sü waa ˈwɔn ˗man ˗an ˗ta ˗sü ˈka. (Wlɔ. 13:​1-7) ˗An ˗bha ˈtɔŋ˗ ˈbha ꞊mɔɔn˗ ˗bha ˈö ˗kë kwa ˈgü ꞊dhɛ mɛn ˈˈtʋ̈ŋ ˈsü ˗pë, ɛɛnˈˈ pë ˈö ˈyaa kpɛnŋdhö, ɛɛnˈˈ ˈzü pë ˈö˗ ˗ya ꞊bhlëë ˈgü ˗sü ˈdhö ˈˈgbɩɩ˗ ˗a ˈdhö. ˈˈKɛɛ ˈkö ˗kë ˈˈdhʋ̈ kwa ˈwɔnman ˈˈsɛgɔdhiʋ̈mɛn ˗nu ˗ta, ˈyö sü ꞊dhɛ Zoova ˈnën˗ pö ˈkwa˗ kë ˈˈdhʋ̈. Kö ˗wa  pö ˈkwa ˈwɔn ˈbha ˈö ˈyaa Zoova ˗bha ˈtɔŋ˗ ˗lögü ˗a kë, kwa dua ˗mü ˈkwa˗ ˈwɔnman ˗an ˗ta.—Këw. 5:29.

11-12. ˈKwa ˗dhɛ ˗ga Dhukö 2:​1-6 ˈgü, ˗men ˈö Madhi waa Zozɛfö ˈwo˗ ˗kë kö ˈtɔŋ˗ ˈö ˈyaa kun ˈˈplëëplë, ˈwo˗ ˗ya ꞊bhlëë ˈgü? ˈYö ˗wɔn ˗së ˗mɛɛn go ˗a ˈgü? (Kpɔɔˈˈ ˈzü Pë ˈˈbin ˗bha.)

¹¹ Kwa ꞊mɔɔn˗ ˗bha ˈkwa ˗gleŋ ˈsü Madhi waa Zozɛfö ˗an ˗bha. ˗Dhɛ ˈö ˈˈsɛgɔdhiʋ̈mɛn ˗nu ˗wa pö ˗wo pë do ˈö ˈyaa ˈˈplëëplë ˗a kë, ˗wo ˗to mü ˈwo ˗wɩ ˗a ˗bha. (Dhukö 2:​1-6 ˗wo pö.) Kö Madhi ˈgu ˈˈsu ˗ya kë ˈˈseishiö, ˈˈsɛgɔdhiʋ̈mɛn ˗nu ˗wo pë do ˈˈgbɩɩ˗ ˈbha ˗dhɛ ˗an ˗gɔ. Sezaa Wogisi ˈö kun Wlɔmö ˈˈsɛ ꞊kɔɔn ˗ni ˈgü bhë, ˗ya ˗pö ˗an ˗dhɛ ˗wo ˈgo wo ˗gɔ ˈplöö kö ˗wo ˈdho wo ˗tɔ ˗ya wo bhɔ ˗a ˈgü ˗pö ˈgü. Zozɛfö waa Madhi ˗wo ˗go Betedhɛmö ˈˈkidhʋŋ 150 ˗naan ꞊taa ˈwo bɔ googüdhɛ ˗nu ˗bha. ˈˈTa suu ˈö ˈˈdhʋ̈, ˈyaa kun ˈˈplëëplë Madhi ˗bha ˈka. ˗A ˈbha ˗ya kë kö mɛn ꞊plɛ ˈwo bhë ˗an zuʋ̈ˈˈ ˈˈdhiʋ̈ ˗kun ˈˈtɛ ˗ni ˈgü Madhi waa ˈnën ˈö ˗dho bhɔ ˗an ˗wɔn ˈgü. Koyinan ˗ya Madhi ˈkun ʒian ˗ta, ˗mën ˈwo ˗dho ˗a kë? Mesi dho bhɔ ˈnën ˈö kun ˗a ˈguzë. ˈWɔn ˗nu bhë ˗wo ˗dho ˗a kë kö ˗wo wo bo ˈwɔn ˗man ˈˈsɛgɔdhiʋ̈mɛn ˗nu ˗ta ˗sü ˈka ˗ee?

¹² ˈKö ˗kë ꞊dhɛ Zozɛfö waa Madhi ˗an zuʋ̈ˈˈ ˈˈdhiʋ̈ ꞊mɔɔn˗ ˗bha ˈö ˗tɛ, ˗wo ˈtɔŋ˗ ˈö bhë ˗a ˗ya ꞊bhlëë ˈgü. Zoova ˗yö ˈdhuëë˗ ˗kpɔ ˗an ˗bha wo ˗gɔ ˗dho ˈˈshia ˗sü ˗wɔn ˈgü. Madhi ˗yö ˗lo ˗së ˈka Betedhɛmö ˈö ˈnën ˈö ö ˈflëëgü ˗a kpɔ, ˈö Biblö ˗wo yökodhiʋ̈.—Mich. 5:2.

13. ˈKwa kwa ˗gɔ ˈdho ˈˈshia, ˈwɔn ˗së ˗mɛɛn ˈö kwa ꞊dhegblü ˗nu ˗wa ꞊slɔɔ?

¹³ Kwa ˈwɔnman ˈˈsɛgɔdhiʋ̈mɛn ˗nu ˗ta, kwaa mɛn ˈˈwɛɛ ˗nu kwa ˈwɔn ˗së ꞊slɔɔ ˗a ˈgü. ˗Kɔ ˗kë ꞊dhɛ? ˈˈKlʋʋbhɔdhe ˈwo˗ ˗wɔ mɛn ˗nu ˈö ˈwaa ˈwɔnman ˗an ˗ta, ˈyaa nu kwa ˗ta. (Wlɔ. 13:4) Kwa ˗bha ˈwɔn ˗man ˈˈsɛgɔdhiʋ̈mɛn ˗nu ˗ta ˗sü, ˗ya ˗kë ˈwo Zoova ˗bha ꞊Gbɛkiö ˗nu yö ˗së. ˈWɔn do ˈbha ˈö ˗kë Niʒeria ˈö ˗ya ˗mɔn ˗kwɛ ꞊va ˗bha ꞊dɛɛ, ˗kwaa ˗ga. ˗Dhɛkpaɔyi do ˈka kö kwa ꞊dhegblü ˗nu ˗wo ˗bhɔkwëë ˗ta, ˈˈsɔdha ˗nu ˗wo ˗sɔ ˗an ˗ta mü. ˗Wo ˗kun mɛn ˗nu ˈö ˈwaa˗ ˈˈpiʋ̈ kö ˈwo ˈnii˗ ꞊sɔnŋ bho ˗an mɛɛnˈˈ ˗ni ˈgü. ˈˈKɛɛ ˈyö ˗an ˗gɔmɛn ˗ya pö: «Zoova ˗bha ꞊Gbɛkiö ˗nu ˗wo ˈnii˗ ꞊sɔnŋ bho ˗kplawo.» ˈDhɛ  ˗kë ˈˈdhʋ̈, ˗ya ˗pö ö ˗bha ˈˈsɔdha ˗nu ˗dhɛ ˗wo yö ˈˈkpɛnŋ. ˈKwa ˈtɔŋ˗ ˗nu ˗ya ꞊bhlëë ˈgü, ˗yö Zoova ˗bha ꞊Gbɛkiö ˗nu kwa ˈtɔ ˗së ˗to, ˈö ꞊mɔɔn˗ ˗bha ˗ʒiaanwo kö ˗yö kwa ꞊dhegblü ˗nu ˗takpa.—Mat. 5:16.

14. ˗Mën ˈö kwa ꞊dhegblüdhe do ˗takun ˈö˗ zuʋ̈ˈˈ ˗yö ˗wɩ ˗a ˗bha kö ˈö ö ˗gɔ ˈdho ˈˈsɛgɔdhiʋ̈mɛn ˗nu ˗dhɛ ˈˈshia?

¹⁴ ˗Yö ˈˈdhʋ̈ gagade ˈka ꞊dhɛ ˈwɔn ˗man ˈˈsɛgɔdhiʋ̈mɛn ˗nu ˗ta ˗sü ˈö yi ꞊gban ˈka bhë, ˈyaa ˈˈplëëplë. Kwa ꞊dhegblüdhe do ˈwo˗ ˗dhɛ Ʒoana ˈö Zeta zuni, ˗ya ˗pö: «ˈWɔn ˗man ˈˈsɛgɔdhiʋ̈mɛn ˗nu ˗ta ˗sü ˗yö ˗kë n ˗kɔa ˈˈgbɩɩ˗ ꞊dedewo. ˈYö sü ꞊dhɛ ˗wo pë ˈˈdhiʋ̈˗ ˗kë n ˗man ˈkɔdhigümɛn ˈbha ˗nu ˈka.» ˈˈKɛɛ Ʒoana ˗yö pë ˈˈpɛpɛ ˗kë kö ˈö ö ˗bha ˈˈsɛgɔdhiʋ̈mɛn ˗nu yö ˗kɔ bho ˈˈgblʋʋ. Pë ˗blɛɛsü ˈö˗ kë ˈyö ˗tɔ ˈwɔn ˗nu ˈwo ˗an ꞊blɛɛ ˈˈsɛgɔdhiʋ̈mɛn ˗nu ˗bha ɛntɛnɛtö ˗ta bhë, ˗yö ö ˗kwaa ˗an ˗wo pö ˗sü ˗zü. (Prov. 20:3) ˗A ꞊plɛ ˗bha ˗naan ˈnën ˗tɔ ˗yö ˗bhɛɛ Zoova ˗dhɛ kö ˗yö ö ˗takun ˈö ö ˗zoyö ˗a ˗dhɛ, kë ˈˈdhʋ̈ kö ˈya ˗dho ˗a pö ö ˗de ˗dhɛ ꞊dhɛ ˗wa ˈˈsɛgɔdhiʋ̈mɛn ˈbha ˗ya, yö ˈnën ˗dho ˈwɔn ˗së kë wo ˗dhɛ. (Ps. 9:​9, 10) ˗A ˗yaaga ˗bha ˗naan ˈnën ˗tɔ ˈwɔn ˗gɔ ˗nu ˈwo˗ ˗zɔn ꞊dhɛ ˈkwaa bɔ mɛn ˈbha ˈka bhë, ˗yö ˗an ˗wo ˗pö kwa ˗bha ˈsëëdhɛ ˗nu ˈgü. (Zan 17:16) ꞊Dɛɛ, Ʒoana ˗ya ˗pö ꞊dhɛ ö ˗bha ˈˈsɛgɔdhiʋ̈mɛn ˗nu ꞊bhlëë ˗ya ˗sü waa ˈwɔn ˗man ˗an ˗ta ˗sü ˗ya ö zuʋ̈ˈˈ kë ˗saa.

15. ˈMën ˗kë ˈö ˈˈtʋ̈ŋ ˈbha ˗nu ˈka, ˗dhioo ˈö Zoova ˗bha ˗kɔlokota ˗ya dɔ kwa ˗ta ˗a ˗ya ꞊bhlëë ˈgü ˗sü ˗kë kwa ˗kɔa ˈˈgbɩɩ˗?

¹⁵ Zoova ˗ya ˗pö kwa ˗dhɛ ꞊dhɛ ‹ˈkwa ꞊bhlëë ˗ya ˗zun kwa ˗dhɛ ˈˈdhiʋ̈ ˗mɛ ˗nu ˗bha› ˗zlanwokɔdhi ˈgü. (Ebl. 13:17) ˈWɔn yaa kë ˗dhii ˈyaa Yesu ˗bha, ˈˈkɛɛ mɛn ˗nu ˈö ˗an ˗ya kö ˗wo ˈˈdhiʋ̈sü kwa ˈka bhë ˈwɔn yaa kë ˗dhii ˗yö ˗an ˗bha. Pë ˈbha ˈö ˈkwaa˗ ˈˈpiʋ̈ kö ˈkwa˗ kë ꞊waa˗ pö ˈkwa˗ kë, ˈwɔn ˗man ˗an ˗ta ˗sü ꞊mɔɔn˗ ˗bha ˈö ˗kë kwa ˗kɔa ˈˈgbɩɩ˗. ˈWɔn ˈbha ˈö bɔmɛn Piɛdhö ˈyaa kun ˗a ˈˈpiʋ̈ kö ˈö˗ kë, ˗wa ˗pö ˗a ˗dhɛ ˗ya kë. ˈDhɛ ˈˈkiö do ˗ya pö ˗a ˗dhɛ ˗yö wü ˗nu ˈö Moizö ˗bha ˈtɔŋ˗ ˗yö ˗an ꞊kɛɛ˗ ˗kan ˗an ˗bha ˗an ˗bhö bhë, ˗yö ˗kɔ ˗a ˗kë ˈˈdhʋ̈ ˗sü ˈka ˈko ˗ta ˗yaaga. (Këw. 10:​9-16) ˈMën ˗kë? ˈYö ˗tɔ ꞊dhɛ ˈpë ˈwo˗ pö ˗ya kë bhë ˈyaa kun ˗a ˈgü ˗së, ˈwaa˗ ˗dhɛ ˈö kun ˗a kë ˗ni ˈgü ˗be ˈwaa do. ꞊Ya kë ꞊dhɛ ˈˈkiö ˈö ˈwɔn yaa kë ˗dhii ˈyaa kun ˗a ˗bha ˈwɔn ˗man ˗a ˗ta ˗sü ˗kun Piɛdhö ˗kɔa ˈˈgbɩɩ˗, ˈyö mɛnbhɩɩdhe ˗nu ˈö ˈwɔn yaa kë ˗dhii ˈdhö ˗an ˗bha bhë, ˈwɔn ˗man ˗an ˗ta ˗sü dho kë ˈˈplëëplë ˗ee?

16. ˈKö ˗kë ꞊dhɛ ˗dhioo ˈwo˗ dɔ bɔmɛn Pɔdhö ˗ta ˈyaa kun ˗a ˈgü ˗së, ˗mën ˈö˗ ˗takun kö ˗ya ya ꞊bhlëë ˈgü? (Këwɔn ˗nu 21:​23, 24, 26)

¹⁶ ˈKö ˗kë ꞊dhɛ pë ˈwo˗ pö bɔmɛn Pɔdhö ˗dhɛ ˗ya kë ˈyaa kun ˗a ˈgü ˗së, ˗a zuʋ̈ˈˈ ˗yö ˗wɩ ˗a ˗bha kö ˈö ˈwɔnman ˗an ˗ta. Kletiɛn ˗nu ˈwo kun Zuifö ˗nu ˈka bhë ˗wa ˗man ꞊dhɛ Pɔdhö ˗kun ˗a pö ˗ni ˈgü mɛn ˗nu ˗dhɛ« ˗wo wo kwaa˗ ˈtɔng˗ ˈö Moizö ˗ya nu» ˗a ˗zü, ˈwa ˗dho ˗a ˗ya ꞊bhlëë ˈgü. (Këw. 21:21) Mɛn zii ˗nu ˈwo kun Zedhizadhɛmö ˗wa ˗pö Pɔdhö ˗dhɛ ˗yö ˈnëngɔɔn˗ ˗nu ˗yiishiö ˈsü kö ˗wo ˈdho ˗Zlan ˗dhɔkëgükɔ ˈgü, kö ˗yö ˗dhii bho ö ˗bha ꞊dhɛ mɛn ˈö ˈto ˗ni ˈgü ˗an ˗bha ˈtɔŋ˗ ˗nu ˈˈpiʋ̈, ˗a ˈdhö. ˈˈKɛɛ, Pɔdhö ˗ya ˈwɔn ˗dɔ ꞊dhɛ kletiɛn ˗nu ˈwaa Moisö ˗bha ˈtɔŋ˗ ˗nu ˗ya ꞊bhlëë ˈgü ˈzu, ˈö go mü ˗yö ꞊dede ˈyii pë yaa ˈbha kë. ˈKö ˗kë ˈˈdhʋ̈, Pɔdhö ˗yö ˗to mü ˈö ˈwɔnman ˗an ˗ta. ꞊Taabha, «Pɔlö waa˗ gɔɔn˗ ˗nu ˗yiisië ˈwo bhë ˗wo ˗dho. ꞊Dhɛ ˈö ˗dhɛ ꞊ya ꞊kpaɔ, ˈö wo ˈplɛ ˈwo ˗kë ˈslööslö.» (Këwɔn ˗nu 21:​23, 24, 26, NTBL ˗wo pö.) Pɔdhö ˗bha ˈwɔnmansü ˗yö ˗an ˗kɔ ˗kë ˈwɔn do ˗bha.—Wlɔ. 14:​19, 21.

17. ˗Gleŋ ˗mɛɛn ˈö Sefani ˗bha ˈwɔnzuan ˗ya ˗da kwa ˗bha?

¹⁷ ˈWɔn ˗man kwa ꞊dhegblü ˗nu ˈwo ˈˈdhiʋ̈ ˈsü ˗ni ˈgü kwa ˗bha kolota ˈka ˗a ˗gɔ ˈˈsɛ  ˈgü, ˗yö ˗kun kwa ꞊dhegblüdhe do ˈwo˗ ˗dhɛ Sefani ˗a ˗kɔa ˈˈgbɩɩ˗. ˈWaa ö ꞊gɔɔn ˗wo ˗kun ˗wo ˈˈwɛɛ pömɛn ˗nu ˗bha ˗zlanwokɔdhi ˈgü, ˈö ˗an zuʋ̈ˈˈ ˈˈgblü kun dhi ˗sü ˈka. ꞊Taabha, ˗an ˗bha Betɛdhö ˗yö ˗an ˗bha ˗zlanwokɔdhi ˗da ˗an ˗de ˗wopömɛn ˗nu ˗bha ˈˈpiʋ̈. Sefani ˗ya ˗pö: «˗Yö ˗shiö n ˗dhɛ ꞊dedewo. ˈMaan kun a yö ˗ni ˈgü ꞊dhɛ zlanwokɔdhi ˈö bhë ˗a ˗bhawɔn ˗kun ˗takundhe ˗bha.» ˈˈKɛɛ ˈkö ˗kë ˈˈdhʋ̈, ˗yö ö ˗kɔ ˗ya ˈwɔn ˈö bhë ˗a ˗gɔ. ˗Ya ˗pö: «ˈDhɛ ˈˈtʋ̈ŋ ˗yö ˗ʒiö, a˗ ˗yö ꞊dhɛ kwa ꞊dhegblü ˗nu ˗wo ˈwɔn ˈö bhë ˗a ˗kë ꞊kpɔɔdhɛ ˗bha. Yi ˈˈtɔŋdhɛ ˗kun kwa ꞊dhegblü ꞊vadhɛ ˗nu ˈö ˗an ˗bha ˈkɔdhigümɛn ˗nu ˈwaa gagade ˈgü, ˗an ˈka. ꞊Dɛɛ, a Biblö ˗zɔn ˗ni ˈgü kwa ꞊dhegblü do ˈö˗ ˗kɔ ˗ya ˗zɔɔ ˗be ˗a ˗dhɛ. ˗Ya ˈgo mü, ˈˈtʋ̈ŋ ˗yö n ˗gɔ kö ˗a Biblö draanˈˈ n ˗de ˈˈpiʋ̈. ˈDhɛ ˗kë ꞊dhɛ a n ˈgü ˗dɔ ˈˈgbɩɩ˗ kö ˈa ˈto kwa ꞊dhegblü ˗nu ˗bha ˗dhioo ˈˈpiʋ̈ bhë, n zuʋ̈ga ˈyaa zadɔ n ˗bha.»

18. ꞊Trɔɔn ˗së ˗mɛɛn ˈkwa˗ ꞊slɔɔ ˈwɔnman ˗sü ˈgü?

¹⁸ Kwa ꞊mɔɔn˗ ˗bha ˈkwa ˈwɔn ˗man mɛn ˗ta ˗sü draanˈˈ. Yesu ˗yö ˗bɔ «sëë suu ꞊gban ˈˈpɛpɛ [ . . . ] bho» ˗sü ˗ta kö ˈö «˗gɔ ˗dho [˗Zlan] ˗dhɛ ˈˈsia˗ ˗sü draan˗.» (Ebl. 5:8) ꞊Dhɛ Yesu ˈdhö, ˈˈtʋ̈ŋ ˈbha ˗nu ˈka kwa ˗gɔ ˗dho ˗Zlan ˗dhɛ ˈˈshia ˗sü ˗draan ˈwɔn ˈˈgbɩɩ˗ ˗nu ˈgü. ˗A ˈwɔnzuan ˈnën ˗tɔ ˈdhɛ Korona virisö ˗yö ˗pɛn, ˈwo˗ pö ˈkwa ˈˈkan ˗bhɔkwëë kë ˗sü ˗bha kwa ˗bha ˗bhɔkwëëkëgükɔ ˗nu ˈgü, ˗ya ˈgo mü ˈkwa ˈˈkan ˗zlanwopö ˈkɔ ˈgü ˈkɔ ˈgü ˗sü ˗bha, kwa kwa ˗gɔ ˗dho ˈˈshia ˗ee? ˗A ˗kë ˈˈdhʋ̈ ˗sü ˗yö kwa ˗takpa, ˈö kwa ˗kɔ ˗kë ˈwɔn do ˗bha ˈö Zoova zuʋ̈ˈˈ ˈˈgblü ˗dhi. ꞊Dɛɛ, kwa ˈˈpɛpɛ kwa baasü ˈka ˗së ˈka kö ˗dhioo suu ooˈˈ ˗sü ˈwo dho ˗a ˗dɔ kwa ˗ta ˈˈklʋʋbhɔdhe ˈˈgbɩɩ˗ ˈˈtʋ̈ŋ ˈgü, ˈkwa˗ ˗ya ꞊bhlëë ˈgü. ˈˈTʋ ˗to ˗dhioo ˗nu ˗bha ˗sü ˗dho kwa dha.—Job 36:11.

19. ˈMën ˗kë ˈö ˈkwa˗ ˈˈpiʋ̈ kö ˈkwa kwa ˗gɔ ˈdho ˈˈshia?

¹⁹ ˈKwa˗ yö ꞊dhɛ ˈdhuëë˗ ꞊va ˗yö ˈwɔn ˗man mɛn ˗nu ˗ta ˗sü ˈgü. ˈˈKɛɛ pë ˗blɛɛsü ˈö˗ ˗wɔn ˈgü ˈkwa ˈwɔnman Zoova ˗ta ˈyö ˗tɔ ꞊dhɛ ˗a ˗dhɔ ˗yö kwa ˗kë ˈö˗ ˈkwa˗ ˈˈpiʋ̈ kö ˈkwa˗ zuʋ̈ˈˈ ˈˈgblü dhi. (1 Zn. 5:3) ˈWɔn ˗së ˈˈpɛpɛ ˈö Zoova ˗ya ˗kë kwa ˗dhɛ bhë, ˈkwaa ꞊mɔɔn˗ ˗bha kö ˈkwa˗ ˈˈyɔɔ bho ˗a ˗gɔ. (Ps. 116:12) ˈˈKɛɛ kwa ꞊mɔɔn˗ ˗bha ˈkwa ˈwɔnman ˗a ˗ta, ˈkwa ˈwɔnman ˈpö mɛn ˗nu ˈö ˈwo kwa ꞊kɔɔn ˗ni ˈgü ˗an ˗ta. ˈKwa˗ kë ˈˈdhʋ̈, kö ˈkwa˗ ˗zɔn ꞊dhɛ kwa ꞊kpɔɔsü. Mɛn ˈö ꞊kpɔɔsü, ˗yö Zoova zuʋ̈ˈˈ ˈˈgblü ˗dhi.—Prov. 27:11.