1. ˈMën ˗tɔ ˗zuugü ꞊bhɔɔ? ˈYö ˈmën ˈkwa dho kwa ˈgü dɔ ˈˈgbɩɩ˗ kö ˈkwa˗ kë?

 ꞊BHƆƆ ˈˈsɛ do ˗yö ˗dhö ˈˈkpɔnŋ ꞊taa ꞊dɛɛ ˈö pa ˗sü ˈka ˈwɔnsëkëmɛn ˗nu ˈka. Mɛn ˗nu ˈwo ˗mɔn ˈˈmliɲɔn ꞊va ˗bha ˈö ˗dhikodhɛ ꞊dede ˈdhö ˗an ꞊zinŋgü, wo ˗mü. ˗Wo pë ˈˈpɛpɛ kë ˗ni ˈgü kö ˈwa ˗dho ˈˈkan ˗a ˗bha toŋtoŋdhö. ˗Wa ˈˈpiʋ̈ ˈpö kö mɛn ꞊va ꞊dede ˗wo nu wo ˈˈpiʋ̈ ˗dhɛ ˗së ˈö ˈˈdhʋ̈ ˗a ˈgü. ˗Dhɛ ˗mɛɛn ˗mü? ˗Zuugü ꞊bhɔɔ ˗mü. a

2. ˗Wɔnmɛnkunwɔn ˗mɛɛn ˈö ˗gban ˗zuugü ꞊bhɔɔ ˗bha?

² ˗Wɔnmɛnkunwɔn ꞊dede ˈö -dhö ˈnën ˗tɔ Zoova ˗ya ˗yadeflëëgüsü waa ˗kɔ ˗bha ˗kë ˈwɔn do ˗bha ˗sü ˗da ö ˗dhɔkëmɛn ˗nu ꞊zinŋgü Sɔtraan ˗bha ˈˈkpɔnŋtaadhɛ ˈö pa ˗sü ˈka ˈko ˗san ˈka yö, ˗a ˈgü. (1 Zn. 5:19; ˗Dhɛ. 12:12) Kwa ˗bha ˗dhɔkaa ˗Zlan -yö ˈwɔn yaa ˗nu ˈwo kë ˗ni ˈgü ˈkwa ˈka ˗an ˗yö ˈö pë ˈö dho ˗a gbamɛn ˗nu ˗takun kö ˗wa ˗dhɔkë zuʋ̈gblüdhi ˈka ˗kplawo ˗a nu ˗an ˗dhɛ. ˗A ˈˈDhiwo ˗ya ˗pö ˗zuugü ꞊bhɔɔ ˗yö ꞊dhɛ «˗bindhɛ» waa «ˈˈdhüdhɛɛdhɛ ˈö ˈˈyi ˗lo ˗dhɛ ˗së ˈka» ˗a ˈdhö. (Is. 4:6; 58:11) Zoova ˗bha ˗takundhe ˈsaa˗ ˈgü mɛn ˗nu ˈwo ˗zuugü ꞊bhɔɔ ˈgü ˈˈdhʋ̈ ˗an zuʋ̈ˈˈ ˈˈgblü ˗yö dhi ˗sü ˈka, ˈö ˈˈsuʋ̈ ˈyaa ˗an kë ˈˈtʋ̈ŋ ˗totaabhasü yaa ˈkwa˗ ˈgü yö, ˗a ˈgü.—Is. 54:14; 2 Tim. 3:1.

3. ˗Wo ˈö Izai ˈˈɲan ˈˈgblʋ̈gblʋ̈ 65 ˈgü bhë ˗yö ˗yöködhiʋ̈ ˗kɔ ˗kë ꞊dhɛ ˗kwɛŋzü?

³ Zoova ˗yö ˗bɔ ö ˗wodhiʋ̈lomɛn Izai ˗ta kö ˗kɔ ˈö mɛn ˗nu ˈwo dho kë ˗zuugü ꞊bhɔɔ ˈgü ˈwo dho ˗tosɛta kë ˗a ˈka, ˈö˗ ꞊blɛɛ. Kwa ꞊mɔɔn˗ ˗bha ˈkwa ˗kpan ˗a ˗bha Izai ˈˈɲan ˈˈgblʋ̈gblʋ̈ 65 ˈgü.  ˗Wo ˈö bhë ˗a ˗yokodhiʋ̈sü ˗blɛɛsü ˗yö ˗kë ˗kwɛ 537 K.Y.B. ˈgü. ˈˈTʋ̈ŋ ˈö ˈˈdhʋ̈ ˗a ˈka Zuifö ˗nu ˈwo go wo ˗bha ꞊sɔnŋ yaa ˈgü bhë, ˗wo ˗go Babidhɔnö ˈwo nu wo ˗gɔ ˈˈsɛ ˈgü. Zoova ˗yö ˈdhuëë˗ ˗kpɔ ö ˗dhɔkëmɛn ˗nu ˈwo ˈˈdhʋ̈ ˗an ˗bha, ˈö ˗an ˗takun kö ˗wo Zedhizadhɛmö ˗pö ˈö kun ˈˈkpaandhɛ ˈka bhë waa ˗Zlan ˗dhɔkëgükɔ ˗an baaˈˈ kë ˈˈdhʋ̈ kö ˗wo ˗Zlan ˗dhɔkë ˗kɔ ꞊dede ˗ya Izraɛdhö.—Is. 51:11; Zach. 8:3.

4. Izai ˈˈɲan ˈˈgblʋ̈gblʋ̈ 65 ˗yökodhiʋ̈ ˗kɔ ˗kë ꞊dhɛ kwa ˗bha ˈˈtʋ̈ŋ ˈö yö ˗a ˈgü?

⁴ ˈWɔn ˈö Izai ˗ya to ˈˈdhiʋ̈ ˈö˗ ꞊blɛɛ bhë ˗a ˗yökodhiʋ̈sü ꞊plɛ ˗bha ˗naan ˗yö ˗kë ˗kwɛ 1919 K.Y. ˈgü, ˈˈtʋ̈ŋ ˈö Zoova ˗dhɔkëmɛn ˗nu ˈwo ꞊dɛɛ ˈwo go ˗a ˈka ˈˈgan ˈgü Babidhɔnö ˗pö ˈkpii˗ ˈgü bhë ˗a ˈka. ˈÖ sü yi ˈö bhë ˗a ˗bha, ˗zuugü ꞊bhɔɔ ˗yö ˗ya ˗dadhiʋ̈ ˗sü ˗bha ˈˈsɛtadhɛ ꞊gban ˈgü. ˗Gblüdëdhɛ ˗nɔɔnpömɛn ˗nu ˗wo ˗zlanwokɔdhi ꞊va ˗ya, ˈwo kletiɛn ˗nu ˗bha ˈˈklʋʋsë ꞊vadhɛ ˗zɔn. Gɔɔn˗ ˗nu waa dhebɔ ˗nu ˈwo kun ˈˈvaanvandhɛ waa ˈˈɲangüyaa kë ˗ni ˈgü ˈˈdhiʋ̈ ˗be bhë, ˗wo ‹˗gla ˈwo ˗kë mɛ suu ˗dee ˈö ˗Zlan ꞊yaa˗ ˗da ö bhɔ ˗bha ˈka bhë, ˗an ˈka.› (Efɛ. 4:24) ˈYaa za ˈgü ꞊dhɛ ˈwɔn ˗së ꞊va ˈö Izai ˗yö ˗wɩ ˗an ˈka bhë ˗wo ˗dho yökodhiʋ̈ ˈkpakpadhö ˗dhɛkpaɔ dhiʋ̈ˈˈ ˈgü ˈˈkpɔnŋtaadhɛ ˗dɛɛ ˈgü. ˈˈKɛɛ ꞊dɛɛ, kwa ˈwɔn ˗së ꞊va ꞊slɔɔ ˗ni ˈgü ˗zuugü ꞊bhɔɔ ˈgü. ˈWɔn ˗gɔ ˈö yö ˗a ˈgü, kwa ˗dho ˗kɔ ˈö ˗zuugü ꞊bhɔɔ ˗yö ˗gban ˗a ˈka kwa ˗bha waa ˈpë ˗kë ˈö kwa dua ˈyaa ˗mü kö ˈkwa ˈˈkan ˗a ˗bha toŋtoŋdhö ˗an yö.

MƐN ˗NU ˈWO ˗ZUUGÜ ꞊BHƆƆ ˈGÜ ˗WO ˗KË WO ˗DE ˈGÜ ꞊DHƐ?

5. ꞊Dhɛ ˗kɔ ˈö Isaïe 65:13 ˗ya ˈˈplüün bho ˗a ˈka ˗a ˈdhö, ˈwɔn ˗së ˗mɛɛn ˈö ˗zuugü ꞊bhɔɔ ˗ya ˗kë kwa ˗dhɛ?

⁵ ˗Kë ˈflëëgü ˗sü ˈö ˗zuu ˈgü. Izai ˗ya ˗to ˈˈdhiʋ̈ ˈö˗ pö ꞊dhɛ mɛn ˗nu ˈwo ˗zuugü ꞊bhɔɔ ˈgü waa mɛn ˗nu ˈö ˈwaa˗ ˈgü ˗an ˗bha ˗tosɛta kë ˗kɔ ˈyaa do toŋtoŋdhö. (Isaïe 65:13 ˗wo pö.) Zoova ˗yö pë ˈˈpɛpɛ ˈö˗ ˗dhɔkëmɛn ˗nu ˗bhawɔn ˈdhö˗ ˗bha ˗a ˗nu ˗an ˗dhɛ, kë ˈˈdhʋ̈ kö ˗wo ꞊ɲɔɔn ö ˈˈsuee. Zoova ˗yö ˗zuu ˈˈslʋ̈ʋ̈slʋ̈, Biblö waa ˗zuugü ˗bhöpë ꞊va ˈwo ˗gban Biblö ˗ta ˈwo˗ ˗yökë, ˗an ˗nu kwa ˗dhɛ kö ˈkwa ‹˗an mü, ˈkwa ˗an ˗bhö, ˗ya ˈgo mü kö ˗wo kwa zuʋ̈ˈˈ ꞊nii ˗da.› (˗Dhɛ. 22:17) ˈˈKɛɛ mɛn ˗nu ˈö ˈwaa ˗zuugü ꞊bhɔɔ ˈgü wo ˗zë «din˗ waa ˈˈyi mü ˗dhɔ ˗yö ˗an ˗bha.» ˗Mlɛɛn ˗së ˈyaa waa ˗Zlan ˗nu ˗an ꞊zinŋgü.—Amos 8:11.

6. ˗Kɔ ˗mɛɛn ˈö Joël 2:​21-24 ˗yö kwa ˗bha ˗zuugü ˗bhöpë ˗wɔn ꞊blɛɛ ˗a ˈka? ˈYö ˈwɔn ˗së ˗mɛɛn ˈkwa˗ ꞊slɔɔ ˗a ˈgü?

⁶ Pë ˈö Ʒoɛdhö ˗ya to ˈˈdhiʋ̈ ˈö˗ pö ˗a ˈgü, ˗yö pë ˗wɔngbɩɩsü ˗nu ˈwo ˗kë ꞊dhɛ pë ga ˗nu, we ˗nu waa odhivö ˈˈɲɔn ˗nu ˈdhö ˗an ˗wɔn ˗blɛɛ mü kö ˈö˗ ˗zɔn ꞊dhɛ Zoova ˗yö pë ˈˈpɛpɛ ˈö kwa ˗bhawɔn ˈdhö˗ ˗bha kö kwa ˗bha ˗zoyödhe ˗gɛn ˗yö ˗gban ˗a ˗nu kwa ˗dhɛ. (Joël 2:​21-24) ˗A ˈwɔnzuan ˗nu ˈnën ˈwo ˗tɔ Biblö waa pë ˗nu ˈwo ˗gban ˗a ˗ta ˈwo ˗an ˗yökë, kwa ˗bha ɛntɛnɛtö ˈˈnimlɔn, kwa ˗bha ˗bhɔkwëë, ˈˈpian do ˈˈpiʋ̈ ˗bhɔkwëë ˗nu waa ˗bhɔkwëë ˈkpii˗ ˗nu. Pë ˗nu ˈwo bhë ˗wo ꞊mɔɔn˗ ˗bha wo ˈwɔn ˗së ˗kë kwa ˗dhɛ ˗dhɛkpaɔyi ˈˈpɛpɛ ˈka, ˈkwa ˗kë kwa ˈflëëgü ꞊dedewo ˗zuu ˈgü.

7. ˗Mën ˈö kwa gba «zuʋ̈waannusü» ˈka? (Isaïe 65:14)

⁷ ˗Yö kwa zuʋ̈ˈˈ ˈˈgblü ˗dhi ꞊dedewo. ˗Zlan ˗dhɔkëmɛn ˗nu ꞊mɔɔn˗ ˗bha ˈwo «˗gbla zuʋ̈gblüdhi ˈka,» ˈyö sü ꞊dhɛ ˈwɔn ˈö Zoova ˗ya ˗kë ˗an ˗dhɛ bhë ˗yö ˗an ˗dhɛ ˗së ꞊dedewo. (Isaïe 65:14 ˗wo pö.) Gagade ˗nu waa ˈwɔn ˗së ˗nu ˈö ˗Zlan ˗yö ˗an ˈˈplüün bho ö ˈˈDhiwo ˈgü waa kwa ˗bha ˗zoyö ˗dhɛkpaɔ dhiʋ̈ˈˈ ˗së ˗dhɛ ˗sü ˈö go Klito ˗bha kwa ˗gɔtadhɔsü ˈgü bhë, ˗wo kwa ˗gba «zuʋ̈waannusü» ˈka. ˈWɔn ˗nu ˈwo bhë kwaa kwa ꞊dhegblü ˗nu kwa˗ ˈˈdoodɔ ˗ni ˈgü, kwa zuʋ̈ˈˈ ˈˈgblü ˗yö ˗dhi ꞊dedewo.—Ps. 34:8; 133:​1-3.

8. ˗Zuugü ꞊bhɔɔ dua ꞊plɛ ˗wɔngbɩɩsü ˈnën ˈwo ˗tɔ ˗mën?

⁸ ˗Zuugü ꞊bhɔɔ dua ꞊plɛ ˗wɔngbɩɩsü ˗nu ˈwo  ˈdhö ˈwo ˗tɔ ˗dhɔ waa ˗kɔ ˗bha ˗kë ˈwɔn do ˗bha ˗sü ˈö Zoova ˗dhɔkëmɛn ˗nu ꞊zinŋgü. Kwa ˗bha «˗kë mɛn do ˈka ˗sü» ˈö bhë ˗yö kwa ˗takun kö ˗kɔ ˈö ˗tosɛta dho ˗kë ˗a ˈka ˈˈkpɔnŋtaadhɛ ꞊dɛɛ ˈgü, ˈkwa kwa ˗zota ˗a ˈgü. Yi ˈö ˈˈdhʋ̈ ˗a ˈka, Zoova ˗dhɔkëmɛn ˗nu ˗dho ˗dhɔ waa wo ˗kɔ ˗bha ˗kë ˈwɔn do ˗bha ˗sü ꞊dede ˗zɔn. (Kodh. 3:14) Kwa ꞊dhegblüdhe do ˗yö pë ˈö˗ ˈsuan˗ bho ˗dhɛkpaɔyi ˗blɛɛsü ˈö ˗kpan ˗a ˈka Zoova ˗dhɔkëmɛn ˗nu ˗bha ˗a ˗blɛɛ, ˈö˗ pö: «ˈPë dho n zuʋ̈ˈˈ ˈˈgblü dhi ˈmaan kun ˗a dɔ ˗ni ˈgü. ˗A ˗de ꞊ʒiaan n ˗man ˈkɔdhigümɛn ˗nu ˗kɔ ˈyaa ˗mɔn n ˗takun ˗sü ˗bha ˗a ˈgü. Zoova ˗bha ꞊Gbɛkiö ˗nu ˈnën ˈwo ˗tɔ mɛn ˗blɛɛsü ˗a ˗kpan ˗an ˗bha kö ˗wo ˗dhɔ ꞊dede ˗zɔn ˗ni ˈgü wo ˈko ˗dhɛ.» Mɛn ˈö˗ ˈˈpiʋ̈ kö ö zuʋ̈ˈˈ ˈˈgblü ˗yö dhi ꞊dedewo, ˗a dua mü kö ˗yö kë kwa ˗bha ˗zuugü ꞊bhɔɔ ˈgü. ˈKö ˗kë ꞊dhɛ ˈˈkpɔnŋtaamɛn ˗nu ˗wo ˈwɔn suu ˈˈoo ˗sü ꞊blɛɛ ˗an ˗bha, Zoova ˗dhɔkëmɛn ˗nu ˈwo ˈˈsɛ ˗ta yö bhë ˗an ˈtɔ ˗së ˗yö waa ö ˗bha ˈˈkiö ˗nu ˈwo dhaŋ˗ ˈgü ˗an ˈˈdhi.—Is. 65:15.

9. ˈMën Isaïe 65:​16, 17 ˗ya ˈˈplüün bho ˈö ˗gban kwa ˗bha ˈwɔn ˈˈgbɩɩ˗ ˗nu ˗bha?

⁹ ˗Yö kwa zuʋ̈ˈˈ ˗kë ˗saa ꞊dedewo. Isaïe 65:14 ˗ya ˗pö ꞊dhɛ mɛn ˗nu ˈwo ˈti ˗dho kë ˗zuugü ꞊bhɔɔ ˈgü, ˗wo ˗dho «ˈˈgbʋ bɔ zuʋ̈dhiʋ̈tɛ ˈö dho kë [˗an] ˗bha bhë ˗a ˗wɔn ˈgü.» ˈYö pë ˗nu ˈwo nu saanˈˈ ˈka ˗Zlan ˗dhɔkëmɛn ˗nu ˗ta ˈpö ꞊wɛ? ˈYaa za ˈgü ꞊dhɛ «kwa ˗zo ˗dho bhɔ saanˈˈ ˗nu ˈka, ˈwo go [˗Zlan] ˈˈɲan ˈˈdhiʋ̈.» (Isaïe 65:​16, 17 ˗wo pö.) Zoova ˗dho kwa ˗bha ˈwɔn ˈˈgbɩɩ˗ ˗nu bho kwa ˗bha, ˈö kwa ˗zo ˗yö go pë ˗nu ˈwo ˗an ˗kë kwa ˈka ˗an ˈˈpiʋ̈.

10. ˈMën ˗kë ˈö kwaa kwa ꞊dhegblü ˗nu kwa ˗bha ˗kë kwa ˈkwëë˗ ˗sü ˈdhö ˈdhuëë˗ ꞊dede ˈka? (Kpɔɔˈˈ ˈzü pë ˈˈbin ˗bha.)

¹⁰ ˗A ˗de ꞊ʒiaan ꞊dɛɛ, ˈkwa kë kwa ˗bha ˗bhɔkwëë ˗nu ˗ta kwa zuʋ̈ˈˈ ˗yö ˗kë ˗saa ˈö kwa ˗zo ˗yö bhɔ ˈwɔn ˈˈgbɩɩ˗ ˗nu ˈwo kë ˗ni ˈgü kwa ˈka ˈˈkpɔnŋtaadhɛ yaa ˈö yö ˗a ˈgü bhë, ˗an ˈka. Kwa ˗zuu ˈˈslʋ̈ʋ̈slʋ̈ këyö ˗nu ˈwo ˗kë ꞊dhɛ ˗dhɔ, zuʋ̈gblüdhi, ˗dhikodhɛsü waa ˗desütɩtɩsü ˗nu ˈdhö bhë ˗an ˗zɔn kwa ꞊dhegblü ˗nu ˗dhɛ ˈö ˈkwa ˗an ˗takun kö ˗an zuʋ̈ˈˈ ˗yö ˗kë ˗saa. (Ga. 5:​22, 23) ˗Kë ˗Zlan ˗bha ˗kɔlokota ˈgü ˗sü ˈö bhë ˗yö kwa zuʋ̈ˈˈ ˈˈgblü ˗dhi ꞊dedewo. Mɛn ˗nu ˈwo dho ˈto ˗zuugü ꞊bhɔɔ ˈgü ˗wo ˗dho ˈˈtʋ̈ŋ ˈö ˗Zlan ˗dho «dhang˗ ˗nu ˗dëü waa˗ ˈsɛ ˗dëü» ˗an kë ˗a ˈka bhë ˗a yö.

11. ˈKwa ˗dhɛ ˗ga Isaïe 65:​18, 19 ˈgü, ˗zuugü ꞊bhɔɔ ˗yö pa kwa ˈka ˗kɔ ˗kë ꞊dhɛ?

¹¹ ˗Yö kwa ˗blü ˗Zlan ˈˈnuɛ bho ˗sü ˗bha. Izai ˗yö ˈpë ˗kë ˈö kwa ‹zuʋ̈ˈˈ ˈˈgblü dua ˈdhö ˗mü kö ˗yö dhi› ˗zuugü ꞊bhɔɔ ˗wɔn ˈgü, ˗a ˗blɛɛ kwa ˗dhɛ. Zoova ˈnën ꞊bhɔɔ ˈˈsɛ ˈö ˈˈdhʋ̈ ˗a ˗da. (Isaïe 65:​18, 19 ˗wo pö.) ˗Ya kë ˈˈdhʋ̈ kö ˈpë ˗kë ˈö bɔ kwa ˗ta kö ˈö mɛn ˗nu ˗takun ˗wo  ˈgo ˈˈkpɔnŋtaamɛn ˗nu ˗bha ˗kɔlokota ˗nu ˈgü ˗wo ˗nu ˗zuugü ꞊bhɔɔ ˈö bhë ˗a ˈgü, kwa˗ ˗dɔ. ˈDhuëë˗ ˗nu ˈkwa ˗an ꞊slɔɔ ˗wo kwa zuʋ̈ˈˈ ˈˈgblü ˗dhi, ˈwo kwa ˗blü kö ˈkwa˗ ˗wɔn blɛɛˈˈ mɛn ˈˈwɛɛ ˗nu ˗dhɛ.—Jér. 31:12.

12. Pë ˈö Zoova ˗ya ˈˈplüün bho Isaïe 65:​20-24 ˈgü bhë, kwa kë kwa ˗de ˈgü ꞊dhɛ ˗a ˗wɔn ˈgü? ˈYö ˈmën ˗kë?

¹² Kwa ˗bha ˗kë ˗zuugü ꞊bhɔɔ ˈgü ˗sü ˗wɔn ˈgü kwa zuʋ̈ˈˈ ˈˈgblü ˗yö dhi ˗sü ˈka, ˈyö sü ꞊dhɛ ˗dhikodhɛ ˗yö kwaa Zoova kwa ꞊zinŋgü. Pë ˗nu ˈkwa dho ˗an yö waa ˗a ˗dhɛ ˗nu ˈkwa dho ˗an kë ˗Zlan ˗bha ˈˈkpɔnŋtaadhɛ ˗dɛɛ ˈgü bhë, ˗kwa kwa ˗zota ˗an ˈgü. Biblö ˗ya pö: «ˈNën ˈˈpuu ˈˈwɛɛ ˈbha ˈö dho ˗dhɛkpaɔyi ˈdɛdɛ kë ˈyaa ˈdhö ɛɛnˈˈ mɛn ˗ya kë zii ˈyi ˗dho ga.» Kwa ˗dho «ˈkɔ ˗nu dɔ ˈö ˈkwa ˗wɔ ˗an ˈgü, kwa ˗dho ˗drɔɔndhü ˗nu ta ˈö kwa ˗an ga ˗bhö.» Kwa «ˈti ˗dho saanˈˈ ˈsü,» ˗a ˗gɛn ˗mü ꞊dhɛ kwa ˗dho kë mɛn ˗nu ˈö «Zoova ˗yö ˈdhuëë˗ kpɔ ˗an ˗bha» ˗an ˈka. ˗Yö ˗tosɛta ꞊dede ˈö ˗gɛn ˈdhö ˗dhö ˗a ˈˈplüün ˗bho kwa ˗dhɛ. «˗A ˗de ꞊ʒiaan ˈˈsanni ˗wo [Zoova] ˗dhɛ» ˗yö ˗dho mɛn ˈö ˗dhö ˗a ˗bhawɔnyëëpë waa pë ˈˈbhɩɩ˗ ˈˈpɛpɛ ˈwo ˗dhö, ˗an zuʋ̈bhɔbhapë nu ˗an ˗dhɛ.»—Is. 65:​20-24; Ps. 145:16.

13. Mɛn ˗nu ˈö ˗wa ˗ya Zoova ˗dhɔkësü ˗bha bhë, Isaïe 65:25 ˗yö ˗an ˗bha ˗tosɛta ˗bho ˈˈgblʋʋ ˗kɔ ˗zɔn ˗kɔ ˗kë ꞊dhɛ?

¹³ ˗Yö ˗yadeflëëgüsü ˗nu kwa ˗dhɛ. ˗Zlan ˗bha ˗zuu ˗bha ˗takundhe ˈsaa˗ ˈgü mɛn ˗nu ˈwo kun ˈˈvaanvan ɛɛnˈˈ ˈwo ꞊flüüwɔn ˗nu ˗kë ˈˈdhiʋ̈ ˗be bhë, ˗wa wo ˗bha ˗tosɛta bho ˈˈgblʋʋ. (Isaïe 65:25 ˗wo pö.) ˗Wo wo ˈgü ˗dɔ ˈˈgbɩɩ˗ ˈwo ˗kan ˈˈtakɔ yaa ˗nu ˗bha. (Wlɔ. 12:2; Efɛ. 4:​22-24) Gagade ˈka ˈwɔn yaa kë ˗dhii ˗yö ˗Zlan ˗dhɔkëmɛn ˗nu ˗bha. ˗A ˗wɔn ˈgü, ˈwɔn ˗nu ˗wo ˗zë kwa ˗gɔ ˗kplawo. ˈˈKɛɛ Zoova ˗yö «mɛ ˈˈpɛpɛ ꞊gban» ˈö˗ ˗dhɔ ˗yö ˗an ˗kë, ˈö ˗dhɔkaadhe ˈdhö ˗an ꞊zinŋgü, ˈwo ˗dhɔ ꞊dede ˗zɔn wo ˈko ˗dhɛ, ˈö ˗an ˗kɔ ˈdhö ˈwɔn do ˗bha bhë ˗an ˗lokota. (Tit. 2:11) ˗Dhidhaa suu ˈö ˈˈdhʋ̈ ˗Zlan ˈö˗ ˗bha ˈˈpiigbɩɩdhɛ ˈˈdhiʋ̈todhɛ ˈyaa ˈdhö bhë, ˈnën ˗mɔn ˗a kë ˗sü ˗bha.

14. Isaïe 65:25 ˗yökodhiʋ̈ ˗kɔ ˗kë ꞊dhɛ kwa ꞊dhegblü do ˗bha?

¹⁴ Mɛn ˗nu ꞊mɔɔn˗ ˗bha kö ˗wo ˗kë mɛn suu ˗dɛɛ ˈka ꞊dedewo ˗ee? ˗Kwa kwa ˗zota ˈwɔnzuan do ˈö yö ˗a ˈgü. Wlüünën do ˈö ˗kaso ˗kë ˗gɛnɲan ˈka ꞊va kö ˗a ˗kwɛ ˗yö 20, ˗yö ˗kun ˈˈɲangüyaa waa ˈˈvaanvandhɛ kë ˗sü ˈgü ꞊dedewo. ˗Wa ˗da ˗kaso ˈgü gɔ ꞊kwaansü, mɛn ˗nu ˗bha ˈkɔ ˈˈwü ˗sü waa ˈwɔn yaa ˈˈwɛɛ ˈbha ˗nu ˗wɔn ˈgü. ˈKozë ˗sü ˗kun ˗a ˗kɔa ˈˈplëëplë. ˈDhɛ gagade man ˈö ˗ya ˗dho Zoova ˗bha ꞊Gbɛkiö ˗nu ˗bha ˗bhɔkwëë ˗nu ˗ta ˗sü ˗bha, ˗yö ˗ga ˗a ˈgü ꞊dhɛ ö ˗bha ˗tosɛta kë ˗sü ˗gɛn ˗ya kë ˗dhö. ˗A ˗gɛn ˈnën ˗tɔ Zoova ˗dhɔkësü ˈö ˗zuugü ꞊bhɔɔ ˈgü. ˈDhɛ ˈö ö bo ˗bɔyibhaasü ˈka, ˗ya kë ꞊shiöŋ ˗yö ö ˗zota ˗kɔ ˈö Isaïe 65:25 ˗yö yö˗ ˈka ˈko ˈˈdhiʋ̈ ö ˗bha ˗tosɛta ˈgü, ˗a ˈgü. ˈYö ˈö kun mɛn ˈˈvaanvan ˈka ˗dhɛ ꞊laa ˈdhö bhë, ˗ya kë ꞊dhɔŋsü ꞊dhɛ ˈˈbhlaa ˈdhö.

15. ˈMën ˗kë ˈkwa mɛn ˈˈwɛɛ ˗nu ˗dhɛ kö ˗wo nu ˈkwa ˈˈpiʋ̈ ˗zuugü ꞊bhɔɔ ˈgü? ˈYö ˈkwa˗ ˗kë ˈˈdhʋ̈ ˗kɔ ˗kë ꞊dhɛ?

¹⁵ Isaïe 65:13 zü ˗yö ˗dɔ ˗wo ˈö yö ˗a ˗ta, ˈö˗ pö: «Pë ˈö Dëmɛn ˗Gblüdë Zoova ˗ya pö ˈyö ꞊nɛn.» ˗A ˈˈɲan ˈsɛɛn˗ 25 ˈˈdhiʋ̈ ˗yö ˗to ˗wo ˈö ˗yö ˗a ˗ta ˈö˗ pö: «Pë ˈö Zoova ˗ya pö» ˈyö bhë. ˗A ˗wo ˗nu ˗wo ˗yökodhiʋ̈ ˗kplawo. (Is. 55:​10, 11) ꞊Dɛɛ, ˗zuugü ꞊bhɔɔ ˗yö ˗dhö. Zoova ˗yö ö ˗dhɔkëmɛn ˗nu ˈö ˗an ˗zɔn ˈka ˈyaa ˈdhö bhë ˗an ˗ya ˗sü ˈka ˗dɛɛ. ˈDhɛ ˗kë ꞊dhɛ ˗a ˗bha ˈkɔdhigümɛn ˗nu ˗mü kwa ˈka bhë, ˗yadeflëëgüsü ˗yö kwa ˗gɔ ˈö ˈkwa ˗kë kwa ˗de ˈgü ˗së ˈˈkpɔnŋtaadhɛ ˈö pa ˗sü ˈka ˈˈvaanvandhɛ ˈka yö, ˗a ˈgü. (Ps. 72:7) Pë ˗nu ˈwo bhë ˗an ˗wɔn ˈgü, kwa˗ ˈˈpiʋ̈ ˈkwa mɛn ꞊va ꞊dede ˗takun kö ˗wo nu kö kwaa˗ ˗nu ˈkwa kë ꞊dhegblüzë ˗nu ˈka. ˈKwa˗ pö ˗yö kë ˈˈdhʋ̈, ˈkwa dua ˗mü kö ˈkwa kwa ˈˈɲan ˗klu mɛn ˗nu ˗kë Yesu ˗bha gwëëˈˈ ˈka ˗sü ˗bha.—Mat. 28:​19, 20.

 KWA ˗DHO MƐN ˗NU ˗TAKUN ˗KƆ ˗KË ꞊DHƐ KÖ KWAA˗ ˗NU ˈKWA KË ˗ZUUGÜ ꞊BHƆƆ ˈGÜ?

16. ˈMën dho mɛn ˗nu ˗takun kö ˗wo ꞊ɲɔɔn ˗zuugü ꞊bhɔɔ ˗bha?

¹⁶ ˗Kɔ ˈkwa˗ ˗bha do do ˈka, kwa ꞊mɔɔn˗ ˗bha ˈkwa mɛn ˗nu ꞊ɲɔɔn ˗zuugü ꞊bhɔɔ ˗bha. ˈKwa˗ pö ˈkwa˗ kë ˈˈdhʋ̈, kwa dua ˗mü kö ˈkwa ˈto Zoova ˗bha ˈwɔnzuan ˈˈpiʋ̈. ˈYaa ˈˈgbɩɩdhɛ wɔ mɛn ˗nu ˗ta kö ˗wo nu ö ˗bha ˗kɔlokota ˈgü. Pë ˈö˗ ˗kë ꞊ʒiaan ˈyö ˗tɔ mɛn ˗nu ‹˗gan› ö ˗bha ˗sü ˈö ˗dhɔkaadhe ˈka. (Zan 6:44; Jér. 31:3) Zuʋ̈puumɛn ˗nu ˗wa ˈwɔn ˈö ˗gban Zoova ˗bha ˗dhɔ waa˗ ˗bha ˈˈklʋʋsë ˗nu ˗bha ˗an draanˈˈ, ˗ya ˗kë ˈwo ꞊ɲɔɔn ˗a ˈˈsuee. Kwa ˗dho bɔ kwa ˗bha ˈˈklʋʋsë ˗nu waa kwa ˈˈtakɔ ˗nu ˗ta kö ˈkwa mɛn ˗nu ꞊ɲɔɔn ˗zuugü ꞊bhɔɔ ˗bha ˗kɔ ˗kë ꞊dhɛ?

17. Kwa ˗dho mɛn ˈˈwɛɛ ˗nu ꞊ɲɔɔn ˗zuugü ꞊bhɔɔ ˗bha ˗kɔ ˗kë ꞊dhɛ?

¹⁷ Pë ˗nu ˈö ˈkwa dho ˗an kë kö mɛn ˗nu ˗wo ꞊ɲɔɔn ˗zuugü ꞊bhɔɔ ˗bha ˗a ˈbha ˗nu ˈnën ˈwo ˗tɔ ˗dhɔ ˗zɔn kwa ꞊dhegblü ˗nu ˗dhɛ ˗sü waa ˈˈgblüsë ˗kë ˗an ˈka ˗sü. Mɛn ˗nu ˗wa ˗nu ˗dɛɛ ˈgü kwa ˗bha ˗bhɔkwëë ˗nu ˗ta, kwa˗ ˈˈpiʋ̈ kö ˗wo kë wo ˗de ˈgü ꞊dhɛ ˗kɔ ˈö mɛn ˗nu ˈwo nu ˗bhɔkwëë ˗nu ˗ta Kodhɛŋtö ˗kwɛŋzü ˈwo ˗kë ˗a ˈka wo ˗de ˈgü bhë ˗a ˈdhö. ˗Wa ˗pö: «ˈMɛ ˈka ya [˗Zlan] ˗yö ka kpö ˈgü ꞊dedewo tɛan˗ ˈka!» (1 Ko. 14:​24, 25; Zach. 8:23) ˈDhɛ ˈˈdhʋ̈, kwa dua ˗mü kö ˈkwa ˈto ˗dhioo ˈö ˗kë ꞊dhɛ «ˈka dhi ka ˈko ˗dhɛ ˗kpɛawo» ˈka bhë ˗a ˈˈpiʋ̈.—1 Tes. 5:13.

18. ˈMën ꞊mɔɔn˗ ˗bha kö ˗yö mɛn ˗nu ꞊ɲɔɔn kwa ˗bha ˗kɔlokota ˗bha?

¹⁸ Kwa dua ˗mü kö ˈkwa kwa ꞊dhegblü ˗nu yö ˗kplawo ꞊dhɛ ˗kɔ ˈö Zoova ˗yö ˗an yö˗ ˈka ˗a ˈdhö. Kwa˗ kë ˈˈdhʋ̈ kwa ˈˈɲan ˗klu ˗an ˗bha ˈˈklʋʋsë ˗nu ˗bha ˗sü ˈka, ˈkwa kwa ˈˈɲan bho ˗an ˗bha ˈˈtëëtëdhɛ ˗nu ˈwo dho go ˈˈshia yi do ˈka bhë ˗an ˈˈpiʋ̈. ˈWɔn ˗nu ˗wa da kwa ꞊zinŋgü ˗kwa ˗an baaˈˈ ˗dhɔ ˈgü kö ‹kwa ˈˈklʋ ꞊në ˗yö dhi kwa ˈko ˈka, kwa ˈko ˗wëë ˗yö kwa kë, ˈkwa kwa ˈko ˗nu ˗bhawɔn to kwa zuʋ̈ˈˈ ꞊gban ˈka.›  (Efɛ. 4:32) ˈKwa˗ kë ˈˈdhʋ̈, mɛn ˗nu ˈwo˗ ˈˈpiʋ̈ kö mɛn ˈˈwɛɛ ˗nu ˗wo ˗dhɔ ˗zɔn wo ˗dhɛ bhë, ˗wo ˗dho ꞊ɲɔɔn ˗zuugü ꞊bhɔɔ ˗bha. b

˗KWA KË ˗ZUUGÜ ꞊BHƆƆ ˈGÜ ˗KPLAWO

19. (1) ꞊Dhɛ ˗kɔ ˈö ˈkɔnën « ˗Wo ˗kan ˗a ˗bha ˈö ꞊taabha ˈwo wo ꞊yɛɛ˗ ˗kë» ˗ya pö ˗a ˈka ˗a ˈdhö, ˈmën mɛn ˈbha ˗nu ˗wa pö ˈö ˗gban ˗zuugü ꞊bhɔɔ ˗bha? (2) ˈMën ˈkwa dho ˈkwa ˈgü dɔ ˈˈgbɩɩ˗ kö ˈkwa˗ kë? (Kpɔɔˈˈ ˈzü pë ˈˈbin ˗bha.)

¹⁹ Kwa ˗Zlan ˈˈnuɛ ˗bho ꞊dedewo kwa ˗bha ˗zuugü ꞊bhɔɔ ˗wɔn ˈgü. ˗Ya kë ˗së ˈgbɛ ˗ya ʒiö ˗a ˈka ˈˈdhiʋ̈ ˗be ˗ta, ˈö Zoova ˗dhɔkëmɛn ˗nu ˗wa kë mü ꞊va ꞊dedewo. Kwa˗ ˈˈpiʋ̈ kö ˈkwa Zoova ˈˈnuɛ bho ˗kplawo ˗zuugü ꞊bhɔɔ ˈö˗ nu kwa ˗dhɛ, ˗a ˗bha. Mɛn ˈˈoo ˗mɛn ˈö˗ ˈˈpiʋ̈ kö ö zuʋ̈ˈˈ ˈˈgblü ˗yö dhi, ö zuʋ̈ˈˈ ˗yö kë ˗saa, ˈö kë ö de ˈgü ˗së, ˗a dua ˗mü kö ˗yö nu ˗zuugü ꞊bhɔɔ ˈgü, ˗yö ˈto mü ˗toëpö ˈka. Kwa ˗ya kwa ˈˈɲaan ˈyö sü ꞊dhɛ Sɔtraan ˗yö pë ˈˈpɛpɛ kë ˗ni ˈgü kö ˈö kwa bho mü. (1 Piɛ. 5:8; ˗Dhɛ. 12:9) ˈKwa ˗dho kwa ꞊kwaa˗ ˗zü kö ˗ya kë ˈˈdhʋ̈. ˗Kwa pë ˈˈpɛpɛ kë kö ˗zuugü ꞊bhɔɔ ˗yö kë ˗së, ˗yö kë ˈˈslʋ̈ʋ̈slʋ̈ kë ˈˈdhʋ̈ kö zuʋ̈waannusü ˗yö kë mü ˗kplawo.