Ka˗ ˈwɔn ˗dɔ ˗ee?
ˈMën ˗kë ˈö ˗dhɛŋ ˗nu kun Davi ˗bha ˈˈsɔdha ˗nu ˈˈpiʋ̈?
MƐN ˗nu ˈö ˈwaa kun Izraɛdhömɛn ˗nu ˈka ˗wo ˗kun Davi ˗bha ˈˈsɔdha ˗nu ˈˈpiʋ̈. ˗A mɛn ˈbha ˗nu ˈnën ˈwo ˗tɔ Zelɛkö ˈö kun Amonitö ˈka, Uri ˈö kun Ititö ˈka waa Itöma ˈö kun Moabömi ˈka. a (1 Chron. 11:39, 41, 46) Davi ˗bha ˈˈsɔdha ˗nu ˈˈpiʋ̈ ˈzü mɛn ˈbha ˗nu ˈwo ˗kë ꞊dhɛ «Kerɛtömɛn ˗nu, Pelɛtömɛn ˗nu waa Gatömɛn ˗nu» ˈdhö bhë, ˗wo ˗kun mü. (2 Sam. 15:18) ˗Yö pö ˗sü ˈka ꞊dhɛ Kerɛtömɛn ˗nu waa Pelɛtömɛn ˗nu ˈwo bhë, ˗wo ˗kun ˗gban ˗sü ˈka Fidhitɛn ˗nu ˗bha. (Ézéch. 25:16) Gitömɛn ˗nu ˗kun ˗ya ˗sü ˈka Gatö ˈö Fidhitɛn ˗nu ˗bha ˈˈkwipö ˈka bhë, ˗a ˈgü.—Jos. 13:2, 3; 1 Sam. 6:17, 18.
ˈMën ˗kë ˈö Davi ˗yö ˗dhɛŋ ˗nu ˈwo ˈˈdhʋ̈ ˗an ˗kë ö ˗bha ˈˈsɔdha ˗nu ˈka? ˗Yö ˗kun ga ˗sü ˈka Davi ˈgü ꞊dhɛ ˗wo ˗kun ˗klu ˗sü ˈka ö ˗bha. ˈÖ go mü ˈzü ˗wo ˗kun ˗klu ˗sü ˈka Zoova ˗bha. ˗A ˈwɔnzuan ˈnën ˗tɔ dishiɔnnɛɛ do ˈö Biblö ˈgü ˗pʋ ˗ya ˗pö ꞊dhɛ Kerɛtömɛn ˗nu waa Pelɛtömɛn ˗nu «˗wo ˗to ˗klu ˗sü ˈka ˗gblüdë Davi ˗bha kö ˗yö ˈwɔn ˈˈgbɩɩ˗ ˗nu ˈgü.» ˗Kɔ ˗kë ꞊dhɛ? ˗Dhɛ ˈö «Izraɛdhömɛn ˗nu ˗wo ˗kan» ˗gblüdë Davi ˗bha, ˗wo ˗ʒiö ˗bhluubhludhe ˗damɛn do ˈwo˗ ˗dhɛ Sabe ˗a ˈˈpiʋ̈. Kerɛtömɛn ˗nu waa Pelɛtömɛn ˗nu ˗wo ˗to Davi ˈˈpiʋ̈, ˈwo Sabe ˗bha ˗bhluubhludhe bho ˈˈshia. (2 Sam. 20:1, 2, 7) ˗Dhɛkpaɔyi do ˈka, Davi gbö Adoniya ˗yö ˗kun ˗a ˈˈpiʋ̈ kö ˈö ˗gblüdëdhɛ ˈkun ö dë ˗gɔ. ˈˈKɛɛ Kerɛtömɛn ˗nu waa Pelɛtömɛn ˗nu ˗wo ˗bɔ Davi ˈka, ˈwo˗ gbö Sadhomɔn ˗takun ˈö ˗kë ˗gblüdë ˈka ö dë ꞊ʒiaan ˈgü ꞊dhɛ ˗kɔ ˈö Zoova ˗ya pö ˗a ˈka ˗a ˈdhö.—1 Rois 1:24-27, 38, 39.
˗Dhɛŋ do ˈbha ˈö to ˗klu ˗sü ˈka Davi ˗bha ˈnën ˗tɔ Itai ˈö kun Gatömi ˈka. ˗Dhɛ ˈö Asalɔn ˗yö nu ö dë Davi ˗gɔ ˈö ˈˈsɛgümɛn ˗nu ˗wo ˗ʒiö ˗a ˈˈpiʋ̈, Itai waa ˈˈsɔdha 600 ˗wo ˗nu Davi ˗dhɛ. Davi ˗ya ˗pö Itai ˗dhɛ ꞊dhɛ ˈdhɛ ˗kë ꞊dhɛ ˗dhɛŋ ˗mü ˗a ˈka bhë, ˗a dua ˈyaa ˗mü kö ˗yö ˈkozë ö ˗bha ˈka. ˈˈKɛɛ ˈyö Itai ˗ya pö: «ˈDhɛ ˗kë ꞊dhɛ Zoova ˗yö ˈˈbhɩɩ˗ ˈö n ˗man ˗gblüdë ˈdhö ˈˈbhɩɩ˗ ˈpö, ˈdhɛ n dëmɛn ˗gblüdë dho kë ˗a ˗bha, ˗yö kë ga ˗dhɛ ˈka ɛɛnˈˈ ˗tosɛta kë ˗dhɛ ˈka, ˈdhɛ bhë ˈyö ü ˗bha yökëmɛn dho kë mü ˈpö.»—2 Sam. 15:6, 18-21.
Itai ˗kun ˗klu ˗sü ˈka ˗gblüdë ˈö Zoova ˗ya ˗ya ˈö ˗kë Davi ˈka bhë, ˗a ˗bha.
ˈKö ˗kë ꞊dhɛ Kerɛtömɛn ˗nu, Pelɛtömɛn ˗nu waa Gatömɛn ˗nu ˗wo ˗kun ˗dhɛŋ ˗nu ˈka, ˗yö ˗kun ga ˗sü ˈka ˗an ˈgü ꞊dhɛ Zoova ˈö bhë ˗Zlan ꞊dede ˗mü. ˈÖ go mü, yö ˈnën Davi ˗ya. Gɔɔn˗ ˗nu ˈwo bhë ˗an ˗bha Davi ˗takun ˗sü ˗kë ˗a ˗dhɛ ˗së ꞊dedewo.
a ˗Zlan ˗bha ˈtɔŋ˗ ˈö ˗ya ˗sü ˈka Deutéronome 23:3-6 ˈgü bhë, Amɔnömɛn ˗nu waa Moabömɛn ˗nu dua ˈyaa ˗mü kö ˗wo kë Izraɛdhömɛn ˗nu kpö ˈgü. Pë ˈö ˈtɔŋ˗ kun ˗a ˈˈpiʋ̈ kö ˈö˗ pö ˈyö ˗tɔ ꞊dhɛ ˗an dua ˈyaa ˗mü kö ˗wo kë Izraɛdhömɛn ˗nu ˈka. ˈˈKɛɛ ˗yö ˈti˗ pö ꞊dhɛ ˗an dua ˈyaa ˗mü kö waa Izraɛdhömɛn ˗nu ˗wo ˗ya wo ˈkwëëdhö ɛɛnˈˈ kö ˗wo nu ˗wo ˗ya ˈˈsɛgümɛn ˗nu ˈˈpiʋ̈. Kpɔɔˈˈ Étude perspicace des Écritures, Volume 1, ˈˈp. 95 ˗bha.
