A ˗bhɔ ˗kwɛ 1955 ˈgü, ˈa ˗kë n ˗mɛn ˗nu ˗bha ˈnën ˗yaaga ˗bha ˗naan ˈka. A ˗gla ꞊weeyi ˈˈsuee Fɛnlandö ˈˈshiaŋ ꞊ʒiaan, ˗dhɛ ˈö ˗ya kë ꞊dɛɛ Vantaa ˈˈkwipö ˈka bhë ˗a ˈgü.

N dhe ˗yö ˗bɔ ˈˈyi ꞊bhaa ˈö ˗kë Zoova ˗bha ꞊Gbɛkiö do ˈka, ˈö ˗kwɛ ꞊va ˗yö ˗ʒiö ˗a ꞊kun bhɔ. ˈˈKɛɛ n dë ˗yö ˗gban gagade ˗gɔ ˗sü ˗bha, ˈö ˈti ˈˈwɩ ˗a ˗bha kö yi dhe ˗yö yi ꞊klaŋkë Biblö ˈka ɛɛnˈˈ kö ˗yö ˈdho yi ˈka ˗bhɔkwëë ˗nu ˗ta. ˈKö ˗kë ˈˈdhʋ̈ yi ˈö i dë ˈyaa ˈka yi ˈˈsuee, yi dhe ˗yö gagade ˗wɔn ˈˈgbɩɩ˗ ˗sü ˗nu ˈwo Biblö ˈgü ˗an ˗zɔn yi ˗dhɛ.

ˈÖ sü n ˈnëndhɛ ˗bha, n ˈti ˈˈwɩ ˗a ˗bha toŋtoŋdhö kö ˈa Zoova ˗wo ˗lögü. ˗A ˈwɔnzuan ˈnën ˗tɔ ˗dhɛkpaɔyi do ˈka kö n ˗kwɛ ˗ya kë ˈˈsɔɔplɛ, a ˗kɔ verilatija ˗bhö ˗sü ˈka ˈyö sü ꞊dhɛ ˗yö ˗kun gato ˈwo ꞊ɲɔɔn ˗da ˗a ˈˈpiʋ̈ ˗a ˈka. ˗A ˗wɔn ˈgü, ˈwɔn ˗yö ˗shiö n ˗man ꞊klaŋgɔmɛn ˗dhɛ ꞊dedewo. ˈDhɛ ˗kë ˈˈdhʋ̈, ˗yö ö ˗kɔ do ˗sü ˈö n ˈˈdhi ꞊bhloo kö ˈö˗ bho ˈkwëë˗ kë ˈˈdhʋ̈ kö ˈö ˗piö ˈˈsaŋ ˈö gato kun ˗a ˈgü bhë ˗a ˗da n ˈˈdhi. A n ˈgü ˗dɔ ˈˈgbɩɩ˗ ˈa˗ ˗kɔ ˗blü ˈö ˈˈsaŋ ˗puö ˈˈshia˗.

N dë ˗wɔn ˗yö ˗kë kö n ˗kwɛ ˗ya kë 12. ˈDhɛ ˗kë ˈˈdhʋ̈ ˈyö ˈa ˗ya ˗dho ˗bhɔkwëë ˗nu ˗ta ˗sü ˗bha. Kwa ꞊dhegblü ˗nu ˈwo kun ˗zlanwokɔdhi ˈgü mü ˗wo wo ˈˈtʋ̈ŋ ˗kë n ˈgü ꞊dedewo. ˗A ˗kë ˈˈdhʋ̈ ˗sü n ˗takun ˈa ꞊ɲɔɔn Zoova ˈˈsuee. A ˗ya Biblö ˗wopösü ˗bha ˗dhɛkpaɔyi ˈˈpɛpɛ ˈka, ˈa kwa ˗bha ˈsëëdhɛ ˗nu ꞊draan n ꞊sɔbhɛɛ ˈka. ˗A ˗wɔn ˈgü, ˗a ˗bɔ ˈˈyi ꞊bhaa kö n ˗kwɛ ˗ya kë 14 ˗kwɛ 1969 ˈUtö 8 ˈgü.

 ˈDhɛ ˈa n bo ꞊klaŋ ˈka, a ˗kë ˈˈtʋ̈ŋ ꞊gban ˈgü ˗yödhiʋ̈ ˈka ˈˈdhoogɔ ˗nu ˈwo dɔ ˗a ˈˈpiʋ̈ ˗an ˈgü. A ˗dho Pielavesi ˈˈkwipö ˈgü Fɛnlandö ˗sɛ ꞊zinŋgü ˈdhɛ ˈö ˗zlanwopömɛn ˗nu ˈwaa ˗bha ꞊va ˗a ˈgü.

ˈNëndhe do ˈwo˗ ˗dhɛ Siika ˈö dho kë n ˗man dhebɔ ˈka ꞊taabha bhë, a ˗kpan ˗a ˗bha Pielavesi. ˗A ˗dhɔ ˗kun n kë ˗ni ˈgü ꞊dedewo, ˈyö sü ꞊dhɛ ˗yö ö de ˗kë ˈˈtɩtɩ ˈö Zoova ˗dhɔ ˗ya ˗kë ˈgbɛ. ˈYaa kun ˈtɔbhɔdhe ɛɛnˈˈ ꞊nɔɔnpë ˗nu mɛɛnˈˈ ˗ni ˈgü. ˗Kɔ ˈyi˗ ˗bha ꞊plɛ yi ˗kun ˗a ˈˈpiʋ̈ kö ˈyi yi ˗de nu Zoova ˗bha yö ˗dhɛ ꞊dedewo. Yi zuʋ̈ˈˈ ˗kun ˈˈwɩ ˗sü ˈka ˗a ˗bha kö ˗a suu ˈˈpɛpɛ ˈwo dho ˗a nu yi ˗dhɛ, ˈyi˗ kë. Yi yi ˈkosü ˗kwɛ 1974 Masö 23 ˈgü. ˈDhɛ ˈyi yi bo yi ˈkosü ˗sü ˈka ˈˈsanni ˈyi ˈdho yi ˈˈtɛɛpa ˗dhɛ ˈbha ˈgü, yi ˗dho ꞊ʒiaan Katula ˗dhɛ ˈö ˗zlanwopömɛn ˗nu ˈwaa mü ꞊va ˗a ˈgü.

ˈDhɛ ˈyi yi bo yi ˈkosü ˗sü ˈka, Zoova ˗ya ˗zɔn yi ˗dhɛ ꞊dhɛ ˈya ö ˗bha ˗Gblüdëdhɛ ˗wɔn bɔ ˈˈdhiʋ̈ ö ˗dho yi ˗bhawɔnyëëpë ˗nu ˈˈɲan bhɔ. (Mat. 6:33) ˗A ˈwɔnzuan do ˈnën ˗tɔ kö yi Katula ˈˈkwipö ˈgü, gɔ ˈyaa kun yi ˗gɔ. ˗A züdɔdhɛ ˈgü yi ˗ya ˗piö ꞊soo ˗nu ꞊taa. ˈˈKɛɛ ˈˈnɛɛnnɛn ˈˈtʋ̈ŋ ˈgü, ˗dhɛ ꞊gban ˈˈpɛpɛ ˗kun ˗saa ˈö ˈˈnɛnnɛn kpö ˗nu ˗wo ˗ya ˗lo ˗sü ˗bha. ˗A wɔn ˈgü ˈya˗ pö ˈyi ˗zlanwopö yi ˗bha ˈˈyasa ˈkpii˗ ˈö bhë ˗a ˈgü, yi ˗bhawɔn ˗kun gɔ ˗bha. ˈˈKɛɛ ˈwëëga ˈyaa kun yi ˗gɔ kö ˈyi˗ ˈdhɔ.

Yi do ˈka, n dhoo do ˗yö ˗nu yi ˈˈpiʋ̈ ˈö ö ˗bha gɔ gbɔɔkë yi ˗gɔ. Gɔ ˈö ˈˈdhʋ̈ ˗a sülansö kun ˗dhö. Pë dosɛnŋ ˈö yi dua ˈdhö ˗mü kö ˈyi˗ ˈdhɔ ˈyö ˗tɔ ˈˈwo ˈˈyi. ˈDhɛ ˗kë ˈˈdhʋ̈ gɔ ˈö yi ˗bhawɔn kun ˗a ˗bha bhë, ˈyi˗ ꞊slɔɔ.

Zoova ˗ya ˗zɔn yi ˗dhɛ ꞊dhɛ ö yi ˗bhawɔnyëëpë ˗nu ˈˈɲan ˗bhɔ. Yi ˗bha ˈö yi dua ˈka ˈyö ˗tɔ ˈyi˗ ˗bha ˗Gblüdëdhɛ ˗wɔn bɔ ˈˈdhiʋ̈.

ˈDhɛ ˈyi kun ˗yödhiʋ̈ ˗nu ˗bha ꞊klaŋ ˈˈdhiʋ̈ ˗kwɛ 1978 ˈgü, Remo Kuokanɛnö a ˈö kun yi ˗bha ꞊klaŋgɔmɛn do ˈka bhë ˗yö yi ꞊faanmën kö ˈyi yi ˈtɔ ˗ya Galaadö ꞊Klaŋ ˗bha. ˗A ˗wɔn ˈgü, yi ˗ya ꞊Glee˗ ˗wo draansü ˗bha kö yi ˗mɔn ꞊klaŋ ˈö bhë ˗a kë ˗sü ˗bha. ˈˈKɛɛ ˈdhɛ ˈkwa dɔ 1980 ˈgü, kö yi ˈti yi ˈtɔ ya ꞊klaŋ ˈö ˈˈdhʋ̈ ˗a ˗bha ꞊kun. ˗Wo yi ˗dhɛ kö ˈyi nu yökë Betɛdhö ˈö Fɛnlandö ˗a ˈgü. ˈˈTʋ̈ŋ ˈö bhë ˗a ˈgü, Betɛdhömɛn ˗nu ˈwaa wo ˈtɔ ˗ya Galaadö ꞊klaŋ ˗bha. ˈˈKɛɛ yi ˗kun ˗a ˈˈpiʋ̈ kö Zoova ˗yö yi bɔ ˗dhɛ ˈö˗ ˗dhɛ ˗së ˗a ˗bha. ˈYaa ˗dho kë ꞊ʒiaan ˗a ˗dhɛ ˈö yi ˗dhɛ ˗së ˗a ˈka. ˗A ˗wɔn ˈgü,  yi ˗wɩ ˈdho ˗sü ˗bha Betɛdhö. ˈKö ˗kë ˈˈdhʋ̈ yi ꞊Glee˗ ˗wo ˗draan ˗kplawo kö yi do ˈka ꞊waa˗ pö Betɛdhömɛn ˗nu ꞊mɔɔn˗ ˗bha kö ˗wo wo ˈtɔ ˗ya Galaadö ꞊klaŋ ˗bha, ˈyi yi ˈtɔ ˗ya.

ˈDhɛ ˗kwɛ ˗nu ˗wo ˗ʒiö ꞊taabha, kwa ˈˈdhiʋ̈ʒiöwomɛn ˗nu ˗wa ˗pö Betɛdhömɛn ˗nu ꞊mɔɔn˗ ˗bha ˈwo wo ˈtɔ ˗ya Galaadö ꞊klaŋ ˗bha. Yi ˗to mü ˈyi yi ˈtɔ ya. ˈˈKɛɛ ˗a ˗gɛn ˈyaa ˈnën ˗tɔ ꞊dhɛ ˗kë Betɛdhö ˗sü ˗dhɔ ˈyaa yi kë ˈzü. ˗A ˗dhɔ yi ˗kë ꞊ʒiaan ꞊dedewo. ˈPë yi kun ˗a ˈˈpiʋ̈ ˈyo ˗tɔ ˗wa yi ˗kian, yi ˗dho ꞊mɔɔn˗ ˗bha kö ˈyi Zoova ˗bha yökë ˗dhɛ ˈö mɛn ˗nu ˗bhawɔn ˈdhö ˗takundhe ꞊dede ˗bha ˗a ˈgü. ˗Wo ˗wɩ ˗a ˗bha kö ˈyi ˈdho Galaadö ꞊klaŋ ˈˈdhiʋ̈. Yi ꞊klaŋ ˈkɔ 79 ˗bha ˗naan ˗kë ˗kwɛ 1985 Sɛtanblö ˈˈsu ˈgü, ˈwo yi bɔ Kolɔnbi.

˗Dhɛ ˗blɛɛsü ˈwo yi bɔ ˗a ˗bha Kolɔnbi ˈyö ˗tɔ Betɛdhö ꞊bidhoŋ ˈgü. A n ˈgü ˗dɔ ˈˈgbɩɩ˗ kö ˈa n ˗man yökë. ˈˈKɛɛ ˈdhɛ ˈyi ˗kwɛ do ˗kë Betɛdhö, a˗ ˗yö ꞊dhɛ yi ˗bhawɔn ˗kun ˈwɔn ˗nu ˗bho ˈˈgbʋʋ ˗sü ˗bha. A˗ ˗pö ˗an ˗dhɛ ꞊dhɛ ˗wo yö ˈˈwɛɛ dɔ yi ˗kɔ ˈka. N ˗man ˗a ˗kë ˈˈdhʋ̈ ˗sü ˗blɛɛsü ˗mü. ˈDhɛ go mü, n ˈti˗ kë ˈˈdhʋ̈ ˈzü ˗n ˗man ˗tosɛta ˈgü. ˈDhɛ ˗kë ˈˈdhʋ̈, yi ˗kë bɔmɛn ˗nu ˈka ˈˈkwipö ˈwo˗ Neva ˗kë bhë ˗a ˈgü Wila ˈˈpian ˗ta.

˗Zlanwopösü ˗kun n ˗dhɛ ˗së ˗kplawo. ˈDhɛ ˈa kun ˗yödhiʋ̈ ˈka kö dhe ˈyaa n ˗gɔ Fɛnlandö, ˗a ˗soo ˗a ˗ya ˗zlanwopösü ˗bha ˈö to ˈˈdhʋ̈ ˈö ˈˈbin ˗yö mën ˗a ˈka. ˗Dhɛ ˈö yaa Siika ˈyi yi ˈkosü ˗dɛɛ ˈgü, yi ꞊mɔɔn˗ ˗bha kö yi ˗dhɛkpaɔyi do ˗todhʋ̈sü ˗sü ˈyi ˗zlanwopö. ˈYa ˈdho ˗zlanwopö ʒian ꞊gblɛɛn ˈˈpiʋ̈ ˈˈtʋ̈ŋ ˈbha ˗nu ˈka, yi ˗wɔ yi ˗bha gɔ ˈgü. ˗A ˗kë ˈˈdhʋ̈ ˗sü ˗yö yi ˗takun ˈö ˈyaa ˈˈtasü pinŋdhö ˈyi ˗soo ˈˈdhiapiʋ̈ ˈyi ˗ya ˗zlanwopö ˗sü ˗bha.

ˈDhɛ yi ˗kë bɔmɛn ˗nu ˈka, ˗zlanwopö ˗kɔ ˈyi˗ ˗kë ˗a ˈka ˈˈdhiʋ̈ ˗be bhë ˗a ˈˈshiʋ̈ ˗yö ˗kë yi ˗ta ˈzü. Yi ˗bha ˗zlanwokɔdhi ˗yö ˗dadhiʋ̈, ˗ya ˈgo mü kwa ꞊dhegblü ˗nu ˈwo kun kolɔnbi bhë ˗wo mɛn ꞊bhlëë ˗ya ˈö ˗dhɔkaadhe kun ˗an ꞊zinŋgü, ˈwo mɛn ˗nu ˈˈnuɛ bho.

ˈˈKwipö ˗nu ˈö ˈwaa kun yi ˗bha ˗zlanwopö ˗dhɛ ˈka ꞊gblɛɛn bhë ˗an ˈgü, Zoova ˗dhɔkëmɛn gbɛ˗ ˈyaa kun mü. ˗Kɔ ˈö nɔɔn˗ ˗së dho ˗lo ˗a ˈka ˗dhɛ ˗nu ˈwo bhë ˗an ˈgü ˗yö ˗kun n zuʋ̈dhiʋ̈tɛ ˗ni ˈgü. ˗Ya ˈgo mü mɛn ˈö ˈyaa ˈˈsɛ ˗nu ˈwo ˈˈdhʋ̈ ˗an ˗wopömɛn ˈka, ˗a dua ˈyaa ˗mü kö ˗yö ˈdho mü. ˈˈKɛɛ a ˗bhɛɛ kö mɛn do ˗yö ˈgo ˈˈkwipö ˗nu ˈwo ˈˈdhʋ̈ ˗an ˈgü ˗yö kë Zoova ˗bha ꞊Gbɛkiö ˈka. A˗ ˗pö n ˗de ˗dhɛ ꞊dhɛ mɛn ˈö ˈˈdhʋ̈ ˗a dua ˗mü kö ˗yö nu ˗yö ˗ya Neva, kë ˈˈdhʋ̈ kö ˗yö gagade draanˈˈ. ˗A ˗bhɛɛ ˈzü kö ˗a ˗mɛn ˗ya ö bo ˗bɔ ˈˈyi ꞊bhaa ˗sü ˈka, ˗yö ˗kian kö ˗yö ꞊kun ö ꞊yɛɛ˗ kë ö ˗gɔ ˈplöö ˗yö ˗zlanwopö. N dua ˗mü ˗be kö ˈa˗ ˈwɔn dɔ ꞊dhɛ ˈwɔn ˈö bhë ˗a ˈˈɲan bhɔ ˗kɔ ˗së ꞊dede ˗yö Zoova ˗gɔ ˈö ˗ʒiö ˗a ˈka n ˗ta.

˗A yi ˈti ꞊gwëë ˈyö ˈa ˗ya wlüünën do ˈwo˗ ˗dhɛ Fɛɛnando Gɔnzalɛsö ˗a ꞊klaŋkë ˗sü ˗bha Biblö ˈka. ˗Yö ˗kun ˗ya ˗sü ˈka Agesirasö, ˈˈkwipö ˈö Zoova ˗dhɔkëmɛn ˈyaa mü ˗a ˈgü. Fɛɛnando ˗yö ˗go ˈˈkidhʋŋ 50 ˗naan ꞊taa ˈö nu yökë Neva. ˗Yö ö ˗de ˗baa ˗së ˈka Biblö draansü ˗bha, ˈö to mü ˈö ˗ya ˗nu ˗bhɔkwëë ˈˈpɛpɛ ˗ta ˗sü ˗bha. ˈˈDhoogɔ ˗blɛɛsü ˈö Biblö ꞊draan ˈka ˗a ˈgü, ˗dhɛ ˈö Fɛɛnando ˗yö ö ꞊yɛɛ˗ ˗kë ö ˗gɔ ˈplöö, ˗yö mɛn ˗nu ˗lo ˈkwëë˗ ˈö pë ˈö˗ ꞊draan Biblö ˈgü bhë ˗a ˗zɔn ˗an ˗dhɛ.

Fɛɛnando ˗yö ˗bɔ ˈˈyi ꞊bhaa ˗kwɛ 1990 Zanvie ˈˈsu ˈgü kö ˗ya Biblö draanˈˈ ˈˈsu ˈˈsɔɔdo ˈˈpiʋ̈. ˗Dhɛ ˈö ˗kë ˈˈdhʋ̈, ˗yö ˗kë ˈˈtʋ̈ŋ ꞊gban ˈgü ˗yödhiʋ̈ ˈka. ˗Dhɛ ˈö ˗ke ꞊dhɛ Zoova ˗dhɔkëmɛn do ˗ya kë Agesirasö  bhë, Betɛdhö ˗yö ˗yödhiʋ̈ ˗detasü ˗nu ˗bɔ mü. ˗Kwɛ 1992 Fevlie ˈˈsu ˈgü, ˗wo ˗zlanwokɔdhi do ˈˈdhi ˗pʋ mü.

Fɛɛnando ˗yö ö ˗bha ˗zlanwopösü ˈˈdhiʋ̈to ö ˗gɔ ˈplöö ˗ee? ˗Abin. ˗Dhɛ ˈö dhe ˈsü, waa ö ˗bha dhebɔ ˗wo ˗dho ˈwo ˗ya San Vesɛnte, ˈˈkwipö ˈö Zoova ˗dhɔkëmɛn gbɛ˗ ˈyaa kun mü ˗a ˈgü. ˗Dhɛ ˈö bhë ˗a ˈgü, ˗wo ˗zlanwokɔdhi do ˗ya. ˗Kwɛ 2002 ˈgü, Fɛɛnando ˗yö kë ˈˈpian do ˈˈpiʋ̈ ˗maankëmɛn ˈka ˈö waa ö ˗bha dhebɔ Ɔga ˈwo yö ˈö ˗bhë ˗a kë ˗ni ˈgü ˗kplawo ꞊dɛɛ.

ˈÖ sü yi ˈö bhë ˗a ˗bha ˈman˗ yö ꞊dhɛ pë ˈbha ˈö ˗gban yö ˈö kwa ˗kɔ ˈka ˗a ˗bha, ˗bhɛɛ ˗a ˗wɔn ˈgü ˗sü ˗wɔn ˗yö ˈˈgbɩɩ˗ ꞊dedewo. ˈPë kwa ˗kɔ ˈyaa ˗mɔn ˗a kë ˗sü bha, Zoova ˗ya ˗kë. ˗A ˗kë ˈˈdhʋ̈ ˗dhɛ ˗mü ˈyö sü ꞊dhɛ ˗zlanwopösü ˈö bhë yö ˈnën ˈö˗ ˗bha yö ˈdhö ˗mü, kwa ˗bha ˈyaa ˗mü.—Mat. 9:38.

˗Kwɛ 1990 ˈgü, ˗wo yi ˗kë ˈˈpian do ˈˈpiʋ̈ ˗maankëmɛn ˈka. ˈDhɛ ˈwo yi bɔ ˗a ˗bha ˈyö ˗tɔ Bogota, Kolɔnbi ˗bha ˈˈkwipö ˈkpii˗ gü. Yö ˈö bhë ˗a kë ˗sü ˈˈsuʋ̈ ˗kun yi ˈgü ꞊dedewo. Yaa n ˗man dhebɔ yi ˈti ꞊klaŋ ꞊gblɛɛn kë. ˗A ˗wɔn ˈgü, ˈyaa pë ꞊vadhɛ kë ˗dhɛ dɔ. ˈÖ go mü, yi ˈti kë ˈˈkwipö ˈkpii˗ ˈgü do. ˈKö ˗kë ˈˈdhʋ̈ Zoova ˗yö ˗wo ˈö˗ ˈˈplüün bho Fidhipö 2:13 ˈgü bhë ˗a yökodhiʋ̈. ˗Ya ˗pö: «˗A ˗gɛn ˗mü ꞊dhɛ ˗yö ˗dhi yöö ꞊dede ˈö ˈˈdhʋ̈ bha ꞊në˗ ˗dhɛ ˈyö yë bha˗ kë ˗faan waa˗ kë zuëga ˗da ka ˈˈgblʋ̈ʋ̈˗.»

꞊Taabha ˗wo yi ˗bɔ kö ˈyi kë ˈˈpian do ˈˈpiʋ̈ ˗maankëmɛn ˈka Medelinö, ˈˈkwipö ˈa˗ ˗wɔn ꞊blɛɛ ˗kwɛzlan ˈö yö ˗a zübhodhɛ ˈgü bhë, ˗a ˈgü. Mɛn ˗nu ˈwo ˗dhɛ ˈö bhë ˗a ˈgü, ˈˈvaanvandhɛ ˈö ˗kpinŋ ˈˈpiʋ̈ ˈyaa ˗an ˈgü ˈwɔn ˈbha ˈka ˈzü. ˗A ˈwɔnzuan ˈnën ˗tɔ ˗dhɛkpaɔyi do ˈka a ˗kun mɛn ˈbha ꞊klaŋkë ˗ni ˈgü Biblö ˈka, ˈö to mü ˈö mɛn ˗nu ˗wo ˗ya bu ˗da wo ˈko ˗bha ˗sü ˗bha ˈˈkpɛnŋdhö. A ˗kun ˗a ˈˈpiʋ̈ kö ˈa ˗puö ˈˈshia˗, ˈˈkɛɛ kö n ˗man Biblö ꞊klaŋnën ˗zë ˗yö ˗wo ˗bhüöö kpö ˗nu pö ˗ni ˈgü ˗kplawo zuʋ̈ˈˈ ˗saa ˈka. ˗Dhɛ ˈö ɲën ˗a ˗wopösü ˗bha ˗yö ˗bhawɔntodhe ˗dhɛ ˈö yö ˈˈkpɛnŋ. ˈDhɛ ˈˈtʋ̈ŋ ˈbha ˗yö ˗ʒiö, ˈyö ˗nu ˈkɔɔ ˈnën ˈsɛɛn˗ ꞊plɛ ˈka ˈö˗ pö n ˗dhɛ ꞊dhɛ «ˈa ö ˗bhawɔn to, ö ˗go ö ˗bha ˈnën ˗nu ˗gɔ ꞊ʒiaan.»

ˈˈTʋ̈ŋ ˈbha ˗nu ˗wo ˗lo ˈzü ˈyi dɔ ga ˗yɛ ˈˈdhiʋ̈. ˗Dhɛkpaɔyi do ˈka kö yi ˗zlanwopö ˗ni ˈgü ˈkɔ ˈgü ˈkɔ ˈgü, n ˗man dhebɔ ˗nu ˗bia ˈka n ˈˈpiʋ̈ kö ˗a ˈwëëdhɛ ˗ya kë yaa ˈö˗ pö n ˗dhɛ ꞊dhɛ mɛn ˈbha ˗ya bu ˗da ö ˗bha. ˗A ˈwɔn ˗yö n ˗kun ꞊dedewo. ˈˈKɛɛ ꞊taabha yi˗ ˗man ꞊dhɛ mɛn ˈö bu ˗da bhë, yö ˈti˗ ˗da Siika ˗bha. ˗Ya ˗da ꞊ʒiaan gɔndë do ˈö kun bɔ ˗ni ˈgü Siika ˈˈsuee ˗a ˗bha.

ˈDhɛ ˈˈtʋ̈ŋ ˗nu ˗wo ˗ʒiö kö ˈˈsuʋ̈ ˈyaa yi ke ˈzü ˈˈvaanvandhɛ ˗gɔ. ˈKwa ꞊dhegblü ˗nu ˈwo ˗kë mü, wo yi ꞊faanmën kö ˈyi bɔ ˈwɔn ˈˈgbɩɩ˗ ˗nu ˈwo ˈˈdhʋ̈ ˗an ˈgü. Yi˗ ˗pö yi ˗de ˗dhɛ ˗ya kë ꞊dhɛ Zoova ˗yö ˗an ˗takun, kö ˗yö ꞊mɔɔn˗ ˗bha ˈpö ˈö yi ˗takun. Yi mɛn zii ˗nu ˈwo kun mü ˗an ˗bha ˗dhioo ˗nu ˗ya ꞊bhlëë ˈgü, ˈyi ˈwɔn ˗nu ˗kë yi ˈsuan˗ ˈka ˈyö˗ ˗dhɛ ˗nu ˈwo to ˈyi ˗an ˗lo Zoova ˈkwëë˗.

ˈKö ˗kë ˈˈdhʋ̈ ˈwɔn ˈbha ˗nu ˈwaa kun ˈya˗ ꞊dhɛ ˗kɔ ˈö ˈyi yi ˗zogɔn ˗a ˈka ˗a ˈdhö. ˗Dhɛkpaɔyi do ˈka, a˗ ˗ga ˗be ꞊dhɛ dhebɔ ꞊plɛ ˈnën ˈwo kun ˈˈsi bho ˗ni ˈgü wo ˈko ˗gɔ ˈkɔ ˈa kun ˈdho ˗ni ˗a ˈgü bhë, ˗a ˈgü. ˈMaan kun ˗a ˈˈpiʋ̈ kö mɛn ꞊plɛ ˈwo ˈˈdhʋ̈ ˈa ˗an ˗ga.  ˈˈKɛɛ ˈyö ˈkɔdë ˗ya pö ˈa ꞊ɲɔɔn ö ˗bha ˈˈkpandhiʋ̈. A ˗to mü ˈa˗ yö ꞊dhɛ ˗slaan ꞊plɛ ˈnën ˈwo kun ˗ʒiö ˗ni ˈgü «dhoo ˗nu» ˗bha ˗dɔn ˈwo˗ bho ˗a ˈˈpiʋ̈.

˗Kwɛ 1997 ˈgü, a ˗kë ꞊klaŋgɔmɛn ˈka l’École de formation ministérielle ˈgü. b ˗Zlan ˗bha yö ꞊klaŋ ˗nu ˗wo n ˗dhɛ ˗së ˗kplawo, ˈˈkɛɛ n ˈti n ˗zota toŋtoŋdhö do ꞊dhɛ a ꞊mɔɔn˗ ˗bha ˈa kë ˗a ꞊klaŋgɔmɛn do ˈka.

꞊Taabha ˗bha a ˗kë ˈˈpian ꞊va ˈˈpiʋ̈ ˗maankëmɛn ˈka. ˈDhɛ yö ˈö bhë ˈö go ˈˈshia˗, a ˗kë ˈzü ˈˈpian do ˈˈpiʋ̈ ˗maankëmɛn ˈka. ˗Kwɛ 30 ˈˈpiʋ̈ a ˗kë ꞊klaŋgɔmɛn ˈka, ˈa ˗kë ˈzü ˈˈpian do ˈˈpiʋ̈ ˗maankëmɛn ˈka. Yö ˗nu ˈwo bhë ˗wo ˗kun ˈdhuëë˗ ꞊dede ˈka n ˗bha ˈka. ˈKö ˗kë ˈˈdhʋ̈, pë ꞊gban ˈti kë ˈˈplëëplë. A ˗dho ˗a ˈbha ˗gɛn dɔ ka ˗dhɛ.

Mɛn ꞊faan ˈdhö˗ ˗gɔ ˈö˗ ˈˈpiʋ̈ kö ˈö ˈwɔn ˗nu kë ö ˗naan ˈka ˗a ˗mɛn ˗mü n ˈka. ˗A ˗kë ˈˈdhʋ̈ ˗sü ˗yö n ˗takun ˈa bɔ ˈwɔn ˈˈgbɩɩ˗ ˗nu ˈgü. ˗A ˗wɔn ˈgü, ˗ya kë ꞊shiöŋ a˗ ˈˈpiʋ̈ kö ˈa ˈwɔn ˗nu baaˈˈ ˈˈgbɩɩdhɛ ˈka ˗zlanwokɔdhi ˗nu ˈgü. Yi do ˈka a˗ ˗pö mɛn ˈbha ˗nu ˗dhɛ ˗wo pë ˈˈpɛpɛ kë kö ˗wo ˗dhɔ ˗zɔn, ˗wo ˈwɔn ˈgüman mɛn ˈˈwɛɛ ˗nu ˗gɔ. ˈˈKɛɛ kö ˈˈtʋ̈ŋ ˈö ˈˈdhʋ̈ ˗a ˈka, ˈmaan kun ˈˈklʋʋsë ˗nu wo bhë ˗an ˗zɔn ˗ni ˈgü.—Wlɔ. 7:​21-23.

ˈDhɛ ˗kë ꞊dhɛ ˈwɔn ˗nu ˗wo ˗zë n ˗gɔ bhë, ˈˈtʋ̈ŋ ˈbha ˗nu ˈka n ˈgü ˗yö ˗ga ꞊dedewo. (Wlɔ. 7:24) ˗Dhɛ ˈö yö mü, a ˗bhɛɛ Zoova ˗dhɛ ˈa˗ pö ˗a ˗dhɛ ꞊dhɛ ˗yö ˗dho kë ˗së kö ˗yö ö ꞊kwaa n ˗zü kö ˈa ˈgo bɔmɛn ˗dhɛ ˈgü, ˈa n ꞊yɛɛ˗ kë Fɛnlandö. Gbeŋ ˈö bhë ˗a ˈka, a ˗dho ˗bhɔkwëë ˗ta ˗zlanwokɔdhi do ˈgü. ꞊Faanmëndhe ˈa˗ ꞊slɔɔ mü ˗ya ˗kë ˈö ga n ˈgü ꞊dhɛ n dua ˗mü kö ˈa ˈto n ˗man yö ˈgü, ˈa ˈkozë ˗kplawo n ˗man ˈˈtëëtëdhɛ ˗nu ˈka. ˈÖ dho ˈö yö ˗a ˈka ꞊dɛɛ ˗bha, ˗kɔ ˈö Zoova ˗yö n ˗man bhɛɛwo ˗daakë ˗a ˈka ˗yö ˗kun ˈpa ˗sü ˈka n ˈka ˗kplawo. ˗Ya ˈgo mü ˈzü, ˗kɔ ˈö n ˗takun ˗a ˈka kö n ˗kɔ ˗yö ˗mɔn n ˗man ˈˈtëëtëdhɛ ˗nu bun ˗sü ˗bha ˗yö ˗kë n ˗dhɛ ˗së ꞊dedewo.

Yaa Siika yi Zoova ˈˈnuɛ ˗bho ꞊dedewo yi ˗bha ˗tosɛta kë ˗sü ˈö ˗bha ˈˈtʋ̈ŋ ꞊gban ˈgü yö ˈgü bhë, ˗a ˗wɔn ˈgü. A Zoova ˈˈnuɛ ˗bho ˈzü dhebɔ ˗së ˈö to ö ˗wo ˗ta ˗kwɛ ꞊va ˈwo bhë ˗an ˈˈpiʋ̈, ˗a ˗nu n ˗dhɛ ˗sü ˗bha.

˗A ˈˈtʋ̈ŋ ˈyaa ꞊gblɛɛn ˈzü kö n ˗kwɛ ˗yö yo 70 ˗bha kö ˈa n ꞊kɔa ˈˈdhiʋ̈sü ˗Zlan ˗bha ꞊klaŋ ˈkɔ ˈka ˗sü waa ˗kë ˈˈpian do ˈˈpiʋ̈ ˗maankëmɛn ˈka ˗sü ˗an ˗zü. ˈKö ˗kë ˈˈdhʋ̈, ˗wëë ˈyaa bɔ n ˗ta ˗an ˗wɔn ˈgü. ˈMën ˗kë? ˈYö sü ꞊dhɛ pë ꞊dede ˈö Zoova ˈtɔ ˗kë ꞊va ꞊dedewo ˈyö ˗tɔ ˗a ˗dhɔkësü ˈö ˗dekëtɩtɩsü ˈka, ˈö go mü ˈkwa˗ ˈtɔ bhɔ kwa zuʋ̈ˈˈ ꞊gban ˈka, ˈkwa˗ ˈˈnuɛ bho. (Mich. 6:8; Mak. 12:​32-34) Pë Zoova ˈtɔ ˗kë ꞊va ˈyaa ˈnën ˗tɔ yö ˗wɔngbɩɩsü ˗bha ˗dɔ kwa ˗kɔ ˈka ˗sü.

ˈMan n ˗zota yö ˗nu ˈwo kun n ˗kɔ ˈka ˗an ˈgü, a˗ ˗yö ꞊dhɛ ˗wo ˈti˗ nu n ˗dhɛ n ˗man ˗kë ˗tiaandhösü ˈö ˗ʒiö ˗a ˈka mɛn ˈˈwɛɛ ˗nu ˗ta ˗a ˗wɔn ˈgü ɛɛnˈˈ ˈzü n ˗man ˈwɔn ˈbha kë ˗dhɛ dɔ ˗sü ˗wɔn ˈgü. Zoova ˗yö n ˗gba yö ˗nu ˈwo bhë ˗an ˈka ˗a ˗bha ˗gasitɛ ˗wɔn ˈgü ꞊ʒiaan. ˈKö ˗kë ꞊dhɛ a ˈˈtëëtë, Zoova ˗yö yö ˗nu ˈwo bhë ˗an ˗dɔ n ˗kɔ ˈka. A˗ ˗yö ˈzü ꞊dhɛ Zoova ˗bha ˗takundhe dosɛnŋ ˈsaa˗ ˈgü ˈnën ˈa ˗mɔn yö ˗nu wo bhë ˗an kë ˗sü ˗bha. ˗Kɔ ˈö bhë ˗a ˈka ˈnën ˗Zlan ˗yö bɔ n ˗man ˈˈtëëtëdhɛ ˗nu ˗ta ˈö ö ˗bha ˈˈpiigbɩɩdhɛ ˗zɔn.—2 Ko. 12:9.