˗KWƐ 2023 Zanvie 18, ˗tɛɛdhooʒiaanplɛ ˈka, kwa ꞊dhegblü Geʒö Fligɛlö waa Ʒefle Windɛ ˗wo ˗kë Zoova ˗bha ꞊Gbɛkiö ˗nu ˈˈdhiʋ̈ʒiöwomɛn ˗nu ˈka. ˗Kɔ ˈwo˗ ˗bha ꞊plɛ, ˗wo ˗ya Zoova ˗bha yökësü ˗bha ˗a yi ˗ya ꞊gwëë.

Kwa ꞊dhegblü Fligɛlö ˗yö ˗gla Pɛnsivani ˈɲɛɛn˗ ˗pö ꞊ʒiaan ˈka, Zeta Zuni. ˗A ˗mɛn ˗nu ˗kun Zoova ˗dhɔkëmɛn ˗nu ˈka, ˈwo˗ ˗to gagade ˈgü. Kö ˗yö ꞊kun wlüünën ˈka, waa ö ˗mɛn ˗nu ˗wo ˗dho ˈwo ˗ya pö ˈnën ˈdɛdɛ ˈö ˗zlanwopömɛn ˗nu ˈwaa mü ꞊va ˗a ˈgü. ˈDhɛ ˈwo ˗lo mü ˗a yi ˈti ꞊gwëë, ˈö bɔ ˈˈyi ꞊bhaa ˗kwɛ 1988 Novanblö 20 ˈgü.

Kwa ꞊dhegblü Fligɛlö ˗mɛn ˗nu ˗wa ꞊faanmën ˗kplawo kö ˗yö ˗Zlan ˗bha ˈˈtʋ̈ŋ ꞊gban ˈgü ˗yö kë. ˗Ya kë ꞊shiöŋ ˗wo wo ˗kɔ ˗ya ˈˈpian do ˈˈpiʋ̈ ˗maankëmɛn ˗nu waa Betɛdhömɛn ˗nu ˗dhɛŋ ˗gɔ wo ˗gɔ ˈkɔɔ. ˗A ˗wɔn ˈgü, kwa ꞊dhegblü Fligɛlö ˗ya ˗yö ꞊dhɛ mɛn ˗nu ˈwo bhë ˗an zuʋ̈ˈˈ ˈˈgblü ˗yö dhi ˗sü ˈka. ˗Dhɛ ˈö bɔ ˈˈyi ꞊bhaa, ˗a yi ˈti ꞊gwëë ˈö ˗kë ˈˈtʋ̈ŋ ꞊gban ˈgu ˗yödhiʋ̈ ˈka ˗kwɛ 1989 Sɛtanblö 1 ˈgü. ˗Dhɛ ˈö ˗kwɛ ꞊plɛ ˗yö ˗ʒiö, ˈwɔn ˈö˗ ˗ya ö ˗zo ˈˈpiʋ̈ kö ˗a ˗kwɛ ˗ya kë 12 bhë ˗yö ˗yökodhiʋ̈ ö ˈdho Betɛdhö. ˗Kwɛ 1991 Ɔtɔblö ˈˈsu ˈgü, ˈyö yö züdɔ Betɛdhö ˈö Bluklinö ˗a ˈgü.

Betɛdhö ˈgü, kwa ꞊dhegblü Fligɛlö ˗yö yökë ˗kwɛ ˈˈsaaga ˈˈpiʋ̈ kwa ˗bha ˈsëëdhɛ pëkë ˗dhɛ ˈgü, ˈö go mü ˈö yökë ˗Zlan ˗bha yö ˈwɔnyëë˗ ˗nu ˈˈpiʋ̈. ˈˈTʋ̈ŋ ˈö ˈˈdhʋ̈ ˗a ˈgü, ˗yö ˗kun Rusi ˗wopömɛn ˗nu ˗bha ˗zlanwokɔdhi ˈgü ˗kwɛ ˈbha ˈˈpiʋ̈. ˗Kwɛ 2006 ˈgü, ˈyö Nadia sü dhe ˈka ˈö waa˗ ˗nu ˈwo ˗ya yökë ˗sü ˗bha Betɛdhö. ˗Kɔ ˈwo˗ ˗bha ꞊plɛ ˗wo ˗zlanwopö Pɔɔtigɛ ˗wopömɛn ˗nu ˗dhɛ, ˈwo go mü ˈwo˗ pö Ɛspaɲɔlö ˗wopömɛn ˗nu ˗dhɛ, ˗kwɛ ˗kɔŋ do ˈˈpiʋ̈. ˗Dhɛ ˈö kwa ꞊dhegblü Fligɛlö ˗yö yökë ˗Zlan ˗bha yö ˈwɔnyëë˗ ˗nu ˗dhɛ ˗kwɛ ꞊va ˈˈpiʋ̈, ˗wa ˗bɔ kwa ꞊klaŋkësü ˈwɔnyëë˗ ˗nu ˈˈpiʋ̈, ˈö ꞊taabha ˈö ˗kë ˗Zlan ˗bha yö ꞊bidhoŋ ˈgümɛn do ˈka. ˗Kwɛ 2022 Masö ˈˈsu ˈgü, ˗yö ˗kë ˗Zlan ˗bha yö ˈwɔnyëë˗ ˗nu ˗takunmɛn do ˈka kwa ˈˈdhiʋ̈ʒiöwomɛn ˗nu ˈˈpiʋ̈.

 Kwa ꞊dhegblü Windɛ ˗yö ˗gla Mureta Kalifɔni ˈˈpian ˗ta, Zeta Zuni. ˗A mɛn ˗nu ˗wa ˗to gagade ˈgü, ˈö bɔ ˈˈyi ꞊bhaa ˗kwɛ 1986 Masö 29 ˈgü. ˈˈSu ˈö dɔ ˗a ˈˈpiʋ̈ ˗a ˈgü, ˗yö ˗kë ˗yödhiʋ̈ ˗kɔ ꞊löö ˈka. ˗Yö ˗kë ˗a ˗dhɛ ˗së ꞊dedewo, ˈö kun ˗a ˈˈpiʋ̈ kö ˈö ˈdho ˗a ˈka ˈˈdhiʋ̈. ˗Dhɛ ˈö ˗kë ˗yödhiʋ̈ ˗kɔ ꞊löö ˈka ˈˈsü ꞊va ˈˈpiʋ̈, ˗yö ˗dho ˈö ˗ke ˈˈtʋ̈ŋ ꞊gban ˈgü ˗yödhiʋ̈ ˈka ˗kwɛ 1986 Ɔtɔblö 1 ˈgü.

Kö ˗yö ꞊kun wlüünën ˈka, ˗yö ˗dho ˈö ˗wo ö dhoo ˗nu ꞊plɛ ˈwo kun Betɛdhö ˈˈtʋ̈ŋ ˈö bhë ˗a ˈgü, ˗an ˗dhɛ. ˈWɔn ˈö ˈˈdhʋ̈, ˗ya ˗kë ˈö ꞊taabha ˗dhɛ ˈö˗ ˗kwɛ ˗yö ˗kë ꞊va, ˈö ˈsëëdhɛ bɔ Betɛdhö kö ˈö ˗yökë mü. ˗Kwɛ 1990 ˈMɛn ˈˈsu ˈgü, ˗wa ˗dhɛ kö ˗yö nu ˗yö yökë Betɛdhö ˈö Wɔɔwikö ˗a ˈgü.

˗Dhɛ ˈö kwa ꞊dhegblü Windɛ ˗yö ˗lo Betɛdhö, ˗yö yökë ˗dhɛ ꞊vadhɛ ˈgü. ˗A ˈbha ˗nu ˈnën ˗tɔ Betɛdhö ˈkɔɔdhɛ baasü, yökë ˈbhlaa ˗sü waa yökë ꞊bidhoŋ ˈgü ˗sü. ˗Kwɛ 1997 ˈgü, ˈyö Anʒela sü dhe ˈka. ˈÖ sü ˈˈtʋ̈ŋ ˈö bhë ˗a ˗bha, waa˗ ˗nu ˗wo Betɛdhö ˗kplawo. ˗Kwɛ 2014 ˈgü, ˗wo ˗dho ˗an ˈka Wɔɔwikö ˈö kwa ꞊dhegblü Windɛ ˗yö ö ˗kɔ ˗da kwa ˗bha Betɛdhö ˈkɔ ˈkpii˗ ˈö ˈˈkpɔnŋ ꞊taa ˗a baasü ˈgü. ˗Kwɛ 2016 ˈgü, kwa ꞊dhegblü ˗yö ˗dho Watchtower ˗bha mɛn ꞊klaŋkëdhɛ ˈö Patɛɛsɔnö bhë ˗a ˈgü ˈö ˗kë ˈˈtʋtobhapë waa video ˗yökëmɛn ˈka mü. ˗Dhɛ ˈö ˗kwɛ ˗yiishiö ˗yö ˗ʒiö, ˗wo wo ꞊yɛɛ˗ ˗kë Wɔɔwikö ˈö kwa ꞊dhegblü ˗yö ö ˗kɔ ˗da yökë ˈˈtʋ̈ŋ ꞊gban ˈgümɛn ˗nu ˗bha ˈwɔnyëë˗ ˗bha ꞊bidhoŋ ˗dhɛ. ˗Kwɛ 2022 Masö ˈˈsü ˈgü, ˗yö ˗kë yökë ˈˈtʋ̈ŋ ꞊gban ˈgümɛn ˗nu ˗bha ˈwɔnyëë˗ ˗takunmɛn ˈka kwa ˈˈdhiʋ̈ʒiöwomɛn ˗nu ˈˈpiʋ̈.

Kwa ˗bhɛɛ Zoova ˗dhɛ kö ˗yö ˈdhuëë˗ ꞊dede ˈkpɔ ‹mɛn ˗nu ˈwo wo ˗de ˗kë gbɔɔdhe ˈka› bhë ˗an ˗bha, kö ˗wo wo ˈgü dɔ ˈˈgbɩɩ˗ ˗wa ˗bha ˗Gblüdëdhɛ ˗yö kë wo ꞊faan ˈka ˗kplawo.—Efɛ. 4:8.