ˈˈSanni ˈwɔn ˈö ˗kë ꞊taabha ˈa˗ blɛɛˈˈ, ˗ka dɔ ꞊köŋ kö ˗kɔ ˈa ˈˈtʋ̈ŋ ꞊gban ˈgü ˗yö züdɔ ˗a ˈka ˈa˗ blɛɛˈˈ.

A ˗bhɔ ˗kwɛ 1942 ˈgü, Kadhaibö ˈˈsɛ do ˗së ˈö ˈˈyi ꞊zinŋgü ˈwo˗ ˗dhɛ Kulasao bhë ˗a ˈgü. N dë ˗go Sidhinamö, ˈyö nu ˈö ˗ya Kulasao kö ˈö yökë mü. Kö n ˈti bhɔ ꞊köŋ, n dë ˗yö ˗kë Zoova ˗bha ꞊Gbɛkiö ˈka. Zoova ˗bha ꞊Gbɛkiö ˗blɛɛsü ˗nu ˈwo ˗kë ˗dhɛ ˈö bhë ˗a ˈgü, ˗yö ˗kun ˗a mɛn do ˈka. a ˈˈDhoogɔ ˈˈpɛpɛ ˈka, ˗yö ˗kun Biblö ˗zɔn ˗ni ˈgü ö ˗bha ˈnën ˗nu yi ˗dhɛ, ˈkö ˗kë ˗ʒiaanwo ꞊dhɛ ˈˈtʋ̈ŋ ˈbha ˗nu ˈka ˈyaa ˈˈwɩ ˗a ˗bha. ˗Dhɛ ˈö n ˗kwɛ ˗kë 14, yi ˗dho ˈyi ˗ya Sidhinamö kö n dë ˗yö ö ˗zokë ö dhe ˈö ˗ya kë zii ˗a ˈˈpiʋ̈.

ˈDhɛ ˈyi ˗lo Sidhinamö, ˗a ˗ya ꞊nënŋ ˗sü ˗bha wlüünën ˗nu ˈwo kun Zoova ˗bha yö ˈsü ˗ni ˈgü wo ꞊faan ˈka, ˗an ˗bha. ˗Wo ˗bhɔ n ˗gɔ ˈdɛdɛ ˈka, ˈö ˈwo kun ˈˈtʋ̈ŋ ꞊gban ˈgü ˗yödhiʋ̈ ˗nu ˈka. ˗Wo ˈwɔn ˗së ˗nu ˈwo ˗an ꞊slɔɔ ˗an ˗bha ˗zlanwopösü ˈgü ˗an blɛɛˈˈ ˗ni ˈgü, a˗ ˗yö ˗an wë ˗bha ꞊dhɛ ˗an zuʋ̈ˈˈ ˈˈgblü dhi ˗sü ˈka. ˈˈTʋ̈ŋ ˈbha ˗nu ˈka ˈya yi bo ˗bhɔkwëë ˗nu ˈka, yi ˈˈdoo ˗nu ˈwo ˗gban Biblö ˗ta ˗an ˗dɔ, ˈö˗ ˈbha ˗nu ˗wa kë ˈyi ˈɲaannu ˈˈkpɛɛndhö gbeŋ, kö yi ˗gbɔdënën ˗nu ˗ga ˗ni ˈgü. N ˈtɔŋdë ˗nu ˈwo bhë ˗wo n ˗takun ꞊dedewo kö Zoova ˗bha yökësü ˗wɔn ˈö kun n ˗zo ˈˈpiʋ̈, ˈa˗ kë. ˗A ˗wɔn ˈgü, a ˗bɔ ˈˈyi ꞊bhaa kö n ˗kwɛ ˗ya kë 16. ꞊Taabha, ˈdhɛ n ˗kwɛ ˗kë 18, a ˗kë ˈˈtʋ̈ŋ ꞊gban ˈgü ˗yödhiʋ̈ ˈka.

ˈDhɛ ˈa kun ˗yödhiʋ̈ ˈka, ˗a ˗gleŋ ˗sɛŋbɔ ˗nu ˈwo n ˗takun ꞊taabha n ˗man ˈˈtʋ̈ŋ ꞊gban ˈgü ˗yö ˈgü, ˗an ˗sü. ˗A ˈwɔnzuan ˈnën ˗tɔ, a˗ ˗yö ꞊dhɛ mɛn ˈˈwɛɛ ˗nu ˗kiansü ˗wɔn ˗yö ˈˈgbɩɩ˗. ˈDhɛ ˈa ˗kë ˗yödhiʋ̈ ˈka, bɔmɛn do ˈwo˗ ˗dhɛ Wilɛmö vanö Seiʒö ˗yö ö ˗zokë n ˈˈpiʋ̈. b ˗Yö ˗kɔ ˈa dho yö ˗nu kë ˗a ˈka ˗zlanwokɔdhi ˈgü,  ˗a ˗zɔn n ˗dhɛ. ˈˈTʋ̈ŋ ˈö bhë ˗a ˈka, ˈyaa kun n ˈˈɲaan ꞊dhɛ n ˗bhawɔn ˗yö n ˗kian ˗sü ˗bha ꞊dedewo. ˗A ˗kwɛ ˗dhɛ ˈö dɔ ˗a ˈˈpiʋ̈ ˈyö ˈa ˗kë ˗yödhiʋ̈ ˗detasü ˈka, ˈyö ꞊taabha ˈa ˗ya n ˗zokë ˗sü ˗bha ˗zlanwopömɛn kpö ˗nu ˈwo kun ˈmü ꞊gblɛɛn, ˈˈblü tii ˈgü Sidhinamö ˗an ˈˈpiʋ̈. N ˗kian ˈö kwa ꞊dhegblü ˗nu ˗wa wo bhë, a ˗an ˈˈnuɛ ˗bho ˈgbɛ ˗a ˗wɔn ˈgü. ˈÖ sü yi ˈö bhë ˗a ˗bha, a ˗to ˗an ˗bha ˈwɔnzuan ˈˈpiʋ̈ ˈa mɛn ˈˈwɛɛ ˗nu ˗kian ˈpö.

˗Gleŋ ꞊plɛ ˗bha ˗naan ˈa˗ sü ˈyö ˗tɔ ˗tosɛta ˗bhaasü kë ˗sü, ˈö ˈwo ˈwɔn ˗nu ˗kë ö ˗naan ˈka ˗së ˈka bhë, ˗yö ˈwɔn ˗së ˗kë mɛn ˗dhɛ. ˈˈSu ga ˗yi ˈˈpɛpɛ ˈka, yaa n yökëyɔɔ ˗bhöpë waa ꞊kwɛɛ˗ ˗nu ˈö yi ˗bhawɔn dho yö ˗an ˗bha ˈˈsu ˗dɛɛ bhë ˗a ˈgü yi ˗a ˗yökodhiʋ̈ ˗kë, ˈyö mɛn do dho ˈˈkwipö ˈkpii˗ ˈgü ꞊kwɛɛ˗ ˗nu ˈwo ˈˈdhʋ̈ ˗an ˈdhɔ. ˗Yö ˗kun ˈˈta ꞊gblɛɛn ˈka. Yi dua ˗mü ˈyi yi ˗bha ˈwëëga waa yi ˗bha ꞊kwɛɛ˗ ˗nu ɛɛnˈˈ ˗bhöpë ˗nu ˈkun ˗së kö ˈˈsu ˈdho ˗yö ga ˗a ˈka, ˈyö sü ꞊dhɛ ˗wa ɲën yi ˗gɔ ˈˈblü tii ˈgü ˗dhɛ ˈyi˗ ˗bha bhë ˗a ˈgü, mɛn ˈˈwɛɛ ˈbha ˈyaa ˈdhö kö ˗yö yi ˗takun. A˗ ˈwɔn ˗dɔ ꞊dhɛ ˈto ˈa˗ wo ˈˈtɩtɩ ˈa ˗tosɛta ˗bhasü kë ˗sü waa ˈwɔn ˗nu ˗kë ö ˗naan ˈka ˗sü ꞊draan bhë, ˗yö n ˗takun ˈö n ˈˈɲan to ˗klu ˗sü ˈka Zoova ˗bha yö ˗bha.

˗Gleŋ ˗yaaga ˗bha ˗naan ˈa˗ sü ˈyö ˗tɔ mɛn ˗nu ꞊klaŋ ˗kë Biblö ˈka ˗sü ˈö ˗an ˗de ˗wo ˈgü, ˗yö ˗së. ˗Wo ˗nu ˈa ˗an ꞊draan kö a ꞊kun ˈˈtɩtɩ ˈyö ˈwo ˗tɔ Neɛlandɛ ˗wo, ꞊Gle˗ ˗wo, Papiamɛnto, waa Sranantɔngo (ɛɛnˈˈ Sranan) ˈö ˗kë Sidhinamömɛn ˗nu ꞊vadhɛ ˗wo ˈka. ˈˈKɛɛ a˗ ˈsuan˗ ˗bho ꞊dhɛ ˗dhɛ ˈyi˗ ˗bha bhë mɛn ˗nu ˈwo mü ˈya ˗zlanwopö ˗an ˗dhɛ ˗an ˗de ˗wo ˈgü, ˗wo wo ˈˈtʋ ˗to ˗së ˈka. ˈYaa kun ˈˈplëëplë, yö ˈsü ꞊dhɛ ˗an ˗wo ˈö ˗kë Sadhamakan ˈka bhë, ˗wo ˈö˗ ˈdho ˗kɔ ˗nu ˈdhö ˗dhö, yö ˗mü. ˈˈKɛɛ ˈdhɛ ˈa n ˈgü dɔ ˈˈgbɩɩ˗ ˈa˗ ꞊draan, n zuʋ̈ˈˈ ˈˈgblü ˗yö ˗dhi. ˗Kwɛ ꞊va ˈˈpiʋ̈, ˗a mɛn ꞊vadhɛ ˗takun gagade dɔ ˗sü ˗bha ˗an ˗de ˗wo ˈgü.

ˈYaa za ˈgü ꞊dhɛ ˈˈtʋ̈ŋ ˈbha ˗nu ˈka a mɛn ˈˈtëŋ ˈsü ˗wɔn ˗nu ˗blɛɛ. ˗A ˈwɔnzuan ˈnën ˗tɔ ˗dhɛkpaɔyi do ˈka a ˗kun ˗a ˈˈpiʋ̈ ˈa n ˗man Biblö ꞊klaŋnën do ˈö kun dhebɔ ˈka ˗a dhɛɛˈˈ ˈkpɔ Sadhamakan ˗wo ˈgü ꞊dhɛ ˈkwa˗ man ˗a ˈˈpiʋ̈, ˈyö sü ꞊dhɛ ˗a ˈˈgblüüdhɛ ˗kun ˗a kë ˗ni ˈgü. ˈˈKɛɛ ˈyö ˈa˗ dhɛɛˈˈ kpɔ ꞊ʒiaan ꞊dhɛ ˗yö ˈgbiödhe ˈka ˗ee? ˗A dhebɔnën ˗kë ö ˗de ˈgü ˈya˗. ˈKö ˗kë ꞊dhɛ ˈwɔn suu ˗nu ˈwo ˈˈdhʋ̈ ˗wo ˗kë n ˈka, a n ˈgü ˗dɔ ˈˈgbɩɩ˗ ˗kplawo ˈa mɛn ˗nu ꞊klaŋkë ˗an ˗de ˗wo ˈgü.

˗Kwɛ 1970 ˈgü, ˗wo n ˗kë ˈˈpian do ˈˈpiʋ̈ ˗maankëmɛn ˈka. ˗Kwɛ ꞊dede ˈö bhë ˗a ˈka ˈˈdhɛɛtadhiaŋ˗ do ˈa˗ zë ˗a ˈgü, a video ˈö ˗gɔ ˗kë: « Une visite au siège mondial des Témoins de Jéhovah » ˈka bhë, ˗a ˗zɔn ˗zlanwopömɛn ˗nu kpö ꞊vadhɛ ˈwo kun ˈˈblü tii ˈgü mü ꞊gblɛɛn, ˗an ˗dhɛ. Yaa kwa ꞊dhegblü ˗nu yi ˈdho ˗ni ˈgü ˗an ˈˈpiʋ̈, yi ˗ya ˈˈyitagɔ ꞊gblɛɛn ˈwo˗ ˗yökë ˈˈdhü ˈka ˗a ˈgü. Yi ˈdho ˗ni ˈgü, ˈˈshiʋ̈ bhʋ̈ʋ̈ˈˈ ˗da ˗a ˈka motëë, sansö ˈˈyi, ꞊laŋba ˗nu waa parɛ ˗nu ˈyi dho pë ˈˈbin ˗zɔn ˗an ˈka, ˗wo ˗kë yi ˗gɔ. ˈYa ˈgo ˈˈyitagɔ ˈgü, yi ꞊kwɛɛ˗ ˗nu bhë ˗an ˗sü ˈyi bɔ ˗an ˈka ˈˈblüblü ˈyi dho ˗an ˈka ˗dhɛ ˈö ˈyi dho video ˗zɔn ˗a ˗bha, ˗a ˈgü. Pë ˗dhɛ ˈö pa n ˈka ꞊dedewo ˈˈta ˗nu bhë ˗an ˈsü ˗sü ˈgü, ˈyö ˗tɔ mɛn ˗nu ˈyi kun ˗wo ˗ni ˈgü ˗an ˗dhɛ ˈˈdhʋ̈, ˗bhɔkwëë suu ˗nu ˈwo bhë ˗yö ˗kun ˗an ˗dhɛ ˗së. Mɛn ˗nu ˗takun ˗sü kö ˗wo Zoova waa ö ˗bha ˗kɔlokota ˗an dɔ bhë, ˗yö ˗kun n zuʋ̈ˈˈ ˈˈgblü dhi ˗ni ˈgü. ˗Kɔ ˈö mɛn ˗nu  kun ꞊ɲɔɔn ˗ni ˈgü ˗a ˈka Zoova ˗bha ˗dhɛ ˈa˗ yö, ˗yö ˗kë n ˗dhɛ ˗së, ˈö n ꞊faanmën yö ˈˈgbɩɩ˗ ˗bhë ˗a kë ˗sü ˗bha.

ˈKö ˗kë ꞊dhɛ ˗kë ꞊kɛgbɔɔ ˈka ˗sü ˗yö n ˗takun ꞊dedewo n ˗man ˗zlanwopö ˗yö ˈgü, a ˗kun ˗a ˈˈpiʋ̈ kö ˈa dhe ˈsü. ˗A ˗wɔn ˈgü, a˗ ˗pö Zoova ˗dhɛ ˗yö n ˗takun kö dhebɔ ˈö dho ˈˈwɩ ˗a ˗bha kö yaa˗ ˗nu ˈyi ˗Zlan ˗bha yö kë ˈˈblü tii ˈgü zuʋ̈gblüdhi ˈka, ˈa˗ ꞊slɔɔ. ˈDhɛ ˗kwɛ do ˗yö ˗ʒiö, ˈyö ˗a ˗kpan ˈnëndhiëŋ do ˈwo ˗dhɛ Etɛlö ˗a ˗bha, ˈyö ˈyi ˗ya yi ˈko ˗ga ˗sü ˗bha. ˗Yö ˗kun ˗yödhiʋ̈ ˗detasü ˈka, ˈö˗ zuʋ̈ˈˈ kun ˈˈwɩ ˗sü ˈka˗ ˗bha kö ˈö yö ˈˈgbɩɩ˗ kë Zoova ˗dhɛ. Etɛlö ˗to ˈˈtɩtɩ ˈö bɔmɛn Pɔdhö ˗bha ˈwɔnzuan ˗kë ˗a ˗dhɛ ˗së ꞊dedewo, ˈyö kun ˗a ˈˈpiʋ̈ kö ˈö ö ˗de nu ˗zlanwopösü ˗dhɛ ˈpö ꞊dhɛ ˗a ˈdhö. ˗Kwɛ 1971 Sɛtanblö ˈˈsu ˈgü ˈyi yi ˈko ˗sü, ˈö ˈyi ˗ya ˈˈpian do ˈˈpiʋ̈ ˗maankëmɛn ˗dhɛ kë ˗sü ˗bha.

Etɛlö ˈti ˈˈgla ꞊bhɔɔmɛn ˗nu ˗bha ˈkɔdhi ˈgü. ˗A ˗wɔn ˈgü, n ˗man ˗kë ˗maankëmɛn ˈka ˗sü ˈö ˈˈblü tii ˈˈpian ˗ta bhë, ˗yö ö ˗bha ˗tosɛta ˗bɛ ˗a ˗bha ˈzodhö. ˈYa˗ pö ˈyi ˈdho ˗wo ˗zlanwokɔdhi ˗nu ˈwo ˈˈblü ˈgü ˈmü ꞊gblɛɛn ˗an ˗dhɛ, ˈyaa ꞊kwɛɛ˗ ꞊va ˈsü. Yi yi ˗zu, ˈyi yi ˗bha sɔ ˗nu ˗zu ˈˈyigaadhö. ˗Bhöpë suu ˈˈoo ˗su ˈö kwa ꞊dhegblü ˗nu ˗wa nu yi ˗dhɛ, yi˗ ˗bhö. ˗A ˈbha ˗nu ˗kun ˈˈblü ˗zo ˗nu, ˈyuö˗ ˗nu ɛɛnˈˈ wü suu ˈˈoo ˗su ˈwo˗ ꞊slɔɔ˗ ˈˈblü, ˗an ˈka. ˗A ˈdhɛ ˈtɛa˗ ˈyii kë ˗dhö, yi ˗bhöpë ˗bhö glɔɔ ˈˈdhɛ ˗nu ˗ta ɛɛnˈˈ ˈzü ˗an ˗bhö ˗a ˈka ˗pë ˈyaa ˈdhö, yi ˗an ˗bhö yi ꞊kwaa. Yaa Etɛlö kpa ˈyi˗ wo yi ˈkwëë˗ ˈyi yi ˗de nu Zoova ˗bha yö ˗dhɛ bhë, ˗yö yi ˗kë ꞊dhɛ bhuʋ̈ˈˈ ˈö gën ˈdhö ˗yaaga ˗a ˈdhö. (Eccl. 4:12) ˈYaa ꞊mɔɔn˗ ˗bha kö ˈyi ˗an ˗ta ˗bɔ pë ˈˈwɛɛ ˈbha ˗bha.

ˈWɔn ˈö ˗kë yi ˈka ˈa˗ ꞊blɛɛ n ˗man ˗kwɛzlan ˈö yö ˗a züdɔdhɛ ˈgü bhë, ˗yö ˗kë ˈˈdhʋ̈ kö yi ˈgo ˗ni ˈgü ˗wo kwa ꞊dhegblü ˗nu ˗dhɛ ˈˈblü tii ˈˈpian ˗ta. ˈDhɛ yi ˗bha ˈˈyitagɔ ˗yö mën ˈˈyi ꞊wlöö, ˗a ˗dhɛ ˈti ꞊gwëë ˈyö ˗wo ˈˈyi ˗ta ˈzü. Sɔ ˈö ˈyaa mɛn ˈto ˈˈyi ꞊bhaa ˗yö ˗kë yi ˗bha, ˈgo mü ˈzü mɛn gbɛ˗ ˈti ˈgo ˈˈyitagɔ ˈgü. ˈˈKɛɛ ˗a ˈˈyitagɔ ˗zë,  ˈˈyi ˗ya ˗pa. Yi yi ˗bha ˗bhöpë ˗nu ˗lo ˈˈyi ꞊bhaa, ˈö ˈyi˗ ˈtɛa˗ ˈˈföö ˗nu sü ˈyi ˈˈyi bho ˗an ˈka ˈˈyitagɔ ˈgü.

˗Bhöpë ˈbha ˈyaa kun yi ˗gɔ ˈzü, ˗a ˗wɔn ˈgü yi ˗ya piʋ̈ˈˈ ˗da ˗sü ˗bha, kö yi ˈdho ˗ni ˈgü, ˈˈkɛɛ ˈyii pë gbɛ˗ ˈkun. ˈDhɛ ˗kë ˈˈdhʋ̈, ˈyö ˈyi ꞊bhɛɛ Zoova ˗dhɛ kö ˗yö ˗bhöpë ˈö yi ˗bhawɔn ˈdhö˗ ˗bha ˗a nu yi ˗dhɛ. ˗Dhɛ ˈyi yi bo bhɛɛsü ˈka, ˈyö kwa ꞊dhegblü do ˈö ˗kë yi ˈˈpiʋ̈ ˈö ˈyuö˗ ˈkpii˗ do ˈö ˗mɔn mɛn ˈˈsoodhu yi ˗bha ˗bhöpë ˗bha, ˗a sü piʋ̈ˈˈ ˈka.

ˈDhɛ ˈyi ˗kwɛ ˈˈsoodhu ˗kë ˈˈpian do ˈˈpiʋ̈ ˗maankëmɛn ˗dhɛ ˈgü, ˈwɔn ˗së do ˈbha ˗kan yi ˈgü. N ˗man dhebɔ ˗yö ˈgwü ˗sü. ˗Yö ˗kun zuʋ̈gblüdhi ˗wɔn ˈka, ˈkö ˗kë ꞊dhɛ ˈmaan kun pë ˈö dho kë yi ˈka ˗dhɛkpaɔ dhiʋ̈ˈˈ ˈgü ˗a dɔ ˗ni ˈgü. Yaa Etɛlö yi ˗kun ˗a ˈˈpiʋ̈ ꞊dedewo kö ˈyi ˈto yi ˗bha ˈˈtʋ̈ŋ ꞊gban ˈgü ˗yö ˈgü. ˗Kwɛ 1976 ˈgü, ˈyö yi gbö Etiniɛlö ˗yö bhɔ. ˈDhɛ ˗kwɛ ꞊plɛ waa ö ˈgbu ˈwo ˗ʒiö, ˈyö yi gbö ꞊plɛ ˗bha ˗naan Ʒiovani ˗yö bhɔ ˈpö.

ˈDhɛ ˗kë ꞊dhɛ ˈˈtʋ̈ŋ ˈö bhë ˗a ˈka yö ˗kun Sidhinamö ꞊va, Betɛdhö ˗yö ˗wɩ ˗a ˗bha kö ˈyi yi ˗zokë yi ˗bha ˈnën ˗nu ˈˈpiʋ̈, kö ˈa ˈto ˗maankëmɛn ˈka ˗kplawo. Kö yi ˗bha ˈnën ˗nu ꞊kun ˈˈtɩtɩ, ˈˈpian ˗nu ˈö ˗zlanwokɔdhi ˗nu ˈwaa˗ ˈka ꞊va ˈyö ˈwo kun ˗an ˈˈklɔɔn bho ˗ni ˈgü n ˗bha. ꞊Ya kë ˈˈdhʋ̈, ˈˈsu do ˈgü ˈya ˈˈdhoogɔ ˈnën ˈbha ˈsü ˈya ˗wo ˗zlanwokɔdhi ˗nu ˗dhɛ, ˈyö ˈˈtʋ̈ŋ ˈdhɛ to ˈa˗ ˗kë ˈpö n ˗man ˗zlanwokɔdhi ˈgü, ˈyö sü ꞊dhɛ a ˗kun ˗yödhiʋ̈ ˈka mü. ˗Zlanwokɔdhi ˗nu ˈa dho ˗wo ˗an ˗dhɛ ˗wa kë yi ˈka ꞊klöö˗, Etɛlö waa yi ˗bha ˈnën ˗nu ˗wo ˗ʒiö n ꞊keŋ. ˈˈKɛɛ ˈman ˈdho ˗wo ˗zlanwokɔdhi ˗nu ˗dhɛ ɛɛnˈˈ ˗bhɔkwëë ˈˈkpii˗ ˗nu ˗ta ˈˈblü tii ˈˈpian ˗ta, ˈwaa ʒiö n ˈˈpiʋ̈.

N dua ˗mü kö ˈa n ˗man ˈwɔn ˗nu kë ö ˗naan ˈka ˗së ˈka, kë ˈˈdhʋ̈ kö yö ˗nu ˈwo n ˗kɔ ˈka ˈa ˗mɔn ˗an kë ˗sü ˗bha. ˗A n ˈgü ˗dɔ ˈˈgbɩɩ˗ kö ˈyi yi ˗bha ˗Zlan ˗dhɔkë ˈkɔɔ ˗sü kë ˈˈdhoogɔ ꞊gban ˈˈpɛpɛ ˈka. ˈˈTʋ̈ŋ ˈö ˈman ˈdho ˗wo ˗a ˈka ˗zlanwokɔdhi ˗nu ˈwo mü ꞊gblɛɛn ˗an ˗dhɛ, Etɛlö ˈnën ˈˈdhiʋ̈sü ˗Zlan ˗dhɔkë ˈkɔɔ ˗sü ˈka. Yaa Etɛlö yi ˈˈtʋ̈ŋ ˗nu ˗sü zoodhö zoodhö ˈö yaa yi ˗bha ˈnën ˗nu ˈyi trʋʋˈˈ ˗nu ˗kë ɛɛnˈˈ ˈzü ˈyi dho ˗wo ˗dhɛ ˗së ˗nu ˈgü yi ˗bha ˈkɔ ˈˈsuee. ˈKwa dɔ gbeŋ ˈmaan yi zë ˈˈvaandhö, a ˗to n ˗de baasü ˗bha ˗zlanwokɔdhi ˗bha yö ˗nu ˗bha. ꞊Dhɛ dhebɔ ˈö ˗kɔmɔnwɔnbhasü ˈdhö˗ ˗gɔ ˈö Proverbes 31:15 ˗ya ˗wɔn ꞊blɛɛ bhë ˗a ˈdhö, Etɛlö ˗yö ˗bö kö ˗dhɛ ˈti ˈˈpʋ ꞊köŋ ˗së ˈka ˈö pë ꞊gban ˈˈpɛpɛ ꞊baa, kë ˈˈdhʋ̈ kö ˈyi ˗dhɛkpaɔyi ˗bha Biblö ˈˈɲan ˗wo pö yi ˈkwëë˗, ˈyi ˗bhöpë  ˗bhö, kö ˈnën ˗nu ꞊kun ˈdho ꞊klaŋplöö. Dhebɔ ˈö ö ˗de nu Zoova ˗bha yökësü ˗dhɛ, ˈö n ˗takun kö yö ˗nu ˈö Zoova ˗ya dɔ n ˗kɔ ˈka ˈa ˗an kë ˈˈtʋ̈ŋ ꞊gban ˈka bhë, a˗ ˈˈnuɛ ˗bho ˗a ˗bha.

Yi yi ˗bha ˈnën ˗nu ˗takun ꞊dedewo kö Zoova waa˗ ˗bha yö ˗dhɔ ˗yö ˗an kë. Yi ˗kun ˗a ˈˈpiʋ̈ kö ˈyi ˗an ˗takun kö ˗wo wo ˗de nu ˈˈtʋ̈ŋ ꞊gban ˈgü ˗yö ˗dhɛ. ˈYaa kun ˗a ˈˈpiʋ̈ kö ˈyi ˈˈgbɩɩdhɛ wɔ ˗an ˗ta, pë ˈyi kun ˗a ˈˈpiʋ̈ ˈyö ˗tɔ kö wo ꞊dede ˗wo wo ˗kɔ ˈˈyɛ ˗a kë ˗sü ˗bha. ˗Kɔ ˈö ˈˈtʋ̈ŋ ꞊gban ˈgü ˗yö dho ˗an zuʋ̈gblüdhi ˗a ˈka, yi ˗a ˗wɔn ˗blɛɛ ˗an ˗dhɛ ˗kplawo. ˈWɔn ˈˈgbɩɩ˗ ˗nu ˈyi bɔ ˗an ˈgü ˈyaa˗ ˗bin ˗an ˗gɔ, ˈˈkɛɛ ˗kɔ ˈö Zoova yi ˗takun, ˈö ˈdhuëë˗ kpɔ ˗a ˈka yi ˗bha ˈkɔdhi ˗bha ˈyö ˈyi ꞊gbɔɔn ˗a ˗ta. Yi pë ˈˈpɛpɛ ˗kë kö ˗an ˈˈtɔŋdë ˗nu ˗wo kë mɛn ˈwo Zoova ˗dhɔkësü ˗wɔn bɔ ˈˈdhiʋ̈ ˗blɛɛsü, ˗an ˈka.

Pë ˈˈpɛpɛ ˈö yi ˗bha ˈkɔdhi ˗bhawɔn kun ˗a ˗bha, Zoova ˗ya ˗nu yi ˗dhɛ. Man ˗de ˈpö ˗a ˗dhɛ ˈö kun n dua ˈka, a˗ ˗kë. ˈDhɛ ˈa kun ˗yödhiʋ̈ ˗detasü ˈka ˈˈblü tii ˈgü, kö n ˈti dhe ˈsü ꞊köŋ, ˈwɔn ˗nu ˈa bɔ ˗an ˈgü ˗wa ˗kë ˈö ˈwëëga ˗ya kë n ˗gɔ, ˈa n ˗zota dhiʋ̈ˈˈ ˗wɔn ˈgü. ˈˈKɛɛ ˈˈtʋ̈ŋ ˈbha ˗nu ˈka ˈpö, ˈkö˗ ˗de ˈö ˈyi pë ˈˈpɛpɛ ˗kë, pë ˗nu ˈö yi ˗bhawɔn yö ˗an ˗bha ˗a ꞊gban ˈyaa kë yi ˗gɔ. Yi ˗nu ˈwo ˈˈdhʋ̈ ˗an ˈka, Zoova ˗nu yi ˗dhɛ. ˗A ˈwɔnzuan ˈnën ˗tɔ, ˈö sü ˗kwɛ 1986 ˗bha ˈö yö˗ ˈka ˗kwɛ 1992 ˗bha, ˗gblü ˗yö ˗da Sidhinamö ˗sɛ ˈgü. ˗Kwɛ ˗nu ˈwo bhë ˗an ˈgü, pë ˗nu ˈö mɛn ˗nu ˗bhawɔn yö ˗an ˗bha kö ˗wo ˗tosɛta kë ˗an ˗ta ˗an ꞊slɔɔdhɛ ˈyaa kun ˈˈplëëplë. ˈKö ˗kë ˈˈdhʋ̈, Zoova ö ˗zokë yi ˈˈpiʋ̈.—Mat. 6:32.

Yi ˗bha ˗tosɛta ˈgü, Zoova ˗yö ö ˗zokë yi ˈˈpiʋ̈ ˗kplawo, ˈö yi zuʋ̈ˈˈ ˈˈgblü ˗yö dhi, ˈö pë ˗nu ˈwo yi ˗gɔ ˈwo yi ˗zokun. Yi ˗bha ˈnën ˗nu ˗wo yi zuʋ̈ˈˈ ˈˈgblü ˗dhi ꞊dedewo, ˈö ˗an ˗to ˗sü kö ˗wo Zoova dɔ bhë, ˈyi˗ ˈˈnuɛ bho ˗a ˗bha. ˗Wo wo ˗kɔ ˗yɛ ˗Zlan ˗bha ˈˈtʋ̈ŋ ꞊gban ˈgü ˗yö kë ˗sü ˗bha. ˗Yö yi zuʋ̈ˈˈ ꞊nii ˗da ˈzü ꞊dedewo. Etiniɛlö waa Ʒiovani waa wo ˗bha dhebɔ ˗nu ˗wo ˗Zlan ˗bha yö ꞊klaŋkë, ˈö dɔ ˈkwa˗ wo ꞊dɛɛ, ˈwo betɛdhö ˈö Sidhinamö ˗a ˈgü.

Yaa Etɛlö ˈya kë zii, ˈˈkɛɛ yi ˗yödhiʋ̈ ˗detasü ˈka ˗kplawo, ˈö ˈyi Zoova ˗bha yökë ˗ni ˈgü yi ꞊faan ˈka. Yö ˈö ˗kë yi ˗kɔ ˗ta ꞊va bhë ˗a ˗wɔn ˈgü, n ˈti ˈˈtʋ̈ŋ ꞊slɔɔ kö ˈa ˈˈyikësü draanˈˈ. ˈˈKɛɛ n zuʋ̈ˈˈ ˈyaa ˈto ˗sü ˈka ˈzlöö. ˈMan n ˗zota ˈˈtʋ̈ŋ ꞊gban ˈgü ˗yö ˈa to ˈˈtɩtɩ ˈa˗ kë ˗sü ˗wɔn ˗da n zuʋ̈ˈˈ ˈˈpiʋ̈ bhë ˗a ˈgü, a˗ ˗yö ꞊dhɛ ˈwɔn ˗së ꞊dede ˈa ˗da ˗a ˗ʒian ˗ta n ˗man ˗tosɛta ˈgü ˈyö bhë.