ˈWƆN ˗GƆ 45
Zoova kwa ˗takun ˗kɔ ˗kë ꞊dhɛ kö ˈkwa ˗mɔn ˗zlanwopösü ˗bha?
«˗An ˗zo ˗dho ˗bo ꞊dhɛ ˗Zlan ˗wodhiʋ̈lomɛn do ˗kun wo kpö ˈgü.»—ÉZÉCH. 2:5.
ˈˈTAN 67 ‹˗Bhö ˗zlanwopö›
ˈPË ˈKWA DHO ˗A YÖ a
1. ˈMën kwa ˈˈɲaan ꞊dhɛ ˗yö ˗dho kë? ˈYö ˗mën ˈö˗ ˗wɔn dho ga kwa ˈgü?
˗A ˈWƆN kwa ˈˈɲaan ꞊dhɛ kwa ˗bha ˗zlanwopösü ˈgü, mɛn ˈbha ˗nu ˗dho ˗gban kwa ˗gɔ. ˗A ˈbha ˗ya kë ˗gban kwa ˗gɔ ˗sü ˗dho ˗dadhiʋ̈ ˈzü ˗dhɛkpaɔ dhiʋ̈ˈˈ ˈgü. (Dan. 11:44; 2 Tim. 3:12; ˗Dhɛ. 16:21) ˈˈKɛɛ ˗yö ꞊mɔɔn˗ ˗bha ˈpö ˈö ga kwa ˈgü ꞊dhɛ Zoova ˗dho kwa ˗takun. ˗Mën ˈö ˗kë? ˈYö ˗tɔ ꞊dhɛ ˗ya yo dɔ ö ˗dhɔkëmɛn ˗nu ˗kɔ ˈka, ˈkö ˗kë ꞊dhɛ ˈˈtʋ̈ŋ ˈbha ˗nu ˈka ˈyaa kë ˈˈplëëplë, ˗yö ˗an ˗takun ˗kplawo. ˈKwa˗ pö ˈkwa˗ ˈgüman ˗së ˈka, ˗kwa ˗Zlan ˗wodhiʋ̈lomɛn Ezekiɛdhö ˈö Zoova ˗bha nɔɔn˗ pö Zuifö ˗nu ˗dhɛ Babidhɔnö bhë, ˗a ˗bha ˈwɔnzuan ˗ga.
2. ˈMën Zoova ˗ya pö ˈö ˗gban mɛn ˗nu ˈwo kun Ezekiɛdhö ˗bha ˗zlanwopödhɛ ˈgü ˗an ˗bha? ˈYö ˈmën ˈkwa dho ˗a yö ˈwɔn ˗gɔ ˈö yö ˗a ˈgü? (Ézéchiel 2:3-6)
2 De ˗nu ˈö Ezekiɛdhö ˗yö ˗Zlan ˗bha nɔɔn˗ pö ˗an ˗dhɛ? Zoova ˗yö ˗an ˗wɔn ˗blɛɛ ˈö˗ pö «꞊gɔɔgbɩɩmɛn ˗nu» ˈö «˗an zuʋ̈ˈˈ ˈyaa ˈˈwɩ ˈˈtʋ ˗to ˗Zlan ˗wo ˗bha ˗sü ˗bha» waa «˗dɔ mɛn ˗nu ˗gɔ ˈˈɲënŋ ˗mɛn ˗nu» ˗mü ˗an ˈka. ˗Wo ˗kun ˈˈdhiʋ̈dhiʋ̈sü ꞊dhɛ ˈˈglɛɛn ˗kpɔɔ ˈdhö, ˈö ˗an ˈˈyi ˈdhö ˈˈdhiʋ̈˗ ꞊dhɛ gɛɛnˈˈ ˗nu ˈdhö. ˗A ˗wɔn ˈgü, Zoova ˗ya ˗pö Ezekiɛdhö ˗dhɛ ˈko ˗ta ꞊va ꞊dhɛ ‹ˈˈsuʋ̈ ˈya dho ˗a kë!› (Ézéchiel 2:3-6 ˗wo pö.) Ezekiɛdhö ˗yö ˗mɔn ˗Zlan ˗bha nɔɔn˗ pö ˗sü ˗bha ˈyö ˗tɔ ꞊dhɛ (1) Zoova ˈnën˗ bɔ, (2) ˗zuu ˈˈslʋ̈ʋ̈slʋ̈ ˗yö ꞊faan ˗nu ˗a ˗dhɛ, ˈö (3) ˗Zlan ˗Wo ˗ya ˗zogban. Pë ˗yaaga ˈwo bhë ˗wo Ezekiɛdhö ˗takun ˗kɔ ˗kë ꞊dhɛ? ˗Wo ˗dho kwa ˗takun ˈpö ꞊dɛɛ ˗kɔ ˗kë ꞊dhɛ?
ZOOVA ˈNËN EZEKIƐDHÖ BƆ
3. (1) ˗Wo ˗mɛɛn ˗nu ˈwo Ezekiɛdhö ꞊faanmën? (2) Zoova ˗ya ˗zogban ˗kɔ ˗kë ꞊dhɛ ꞊dhɛ ö ˗dho ˗a ˗takun?
3 Zoova ˗ya ˗pö Ezekiɛdhö ˗dhɛ: «A ˗dho ü bɔ.» (Ézéch. 2:3, 4) ˗Wo ˈö bhë ˗yö Ezekiɛdhö ˗zogban. ˈMën ˗kë? ˗A ˈbha ˗ya kë kö ˗a ˗zo ˗yö ˗bo ꞊dhɛ ˈdhɛ Zoova ö ˗kɔ ˗yɛ Moizö waa Izai ˗an ˗bha kö ˗wo kë ö ˗wodhiʋ̈lomɛn ˗nu ˈka, ˗yö ˗wo do ˈö bhë ˗a ˗pö ˗an ˗dhɛ. (Ex. 3:10; Is. 6:8) ˗Kɔ ˈö Zoova ˗yö ˗an ˗takun ˗a ˈka ˈwo ˗mɔn ˗a ˗bha yökësü ˗bha, Ezekiɛdhö ˗ya ˗dɔ. ˗A ˗wɔn ˈgü, ˗dhɛ ˈö Zoova ˗ya pö ˗a ˗dhɛ ˈko ˗ta ꞊plɛ ꞊dhɛ ‹ö ˗dho ˗a bɔ› bhë, ˗yö ˗kun Ezekiɛdhö ˈˈɲaan ꞊dhɛ ˗yö ˗dho ö ˗takun ˈpö. ꞊Ya ˈgo mü ˈzü Ezekiɛdhö yöö ꞊dede ˗ya ˗pö ˗gɛnɲan ˈka ꞊va ꞊dhɛ ‹Zoova ˗yö ˈwɔn ˗blɛɛ ö ˗dhɛ.› (Ézéch. 3:16) ˗Wo kpö ˈö ˗kë ꞊dhɛ ‹Zoova ˗yö ˈwɔn ˗blɛɛ n ˗dhɛ ˈzü› ˈka bhë, ˗ya ˗bɛnzë ˈzü ˈko ˗ta ꞊va ö ˗bha ˈsëëdhɛ ˗be ˈgü. (Ézéch. 6:1) ˈYaa za ˈgü ꞊dhɛ ˗a ˈwɔn ˗kun ˗a ˈˈɲaan ˈkpakpadhö ꞊dhɛ Zoova ˈnën ö bɔ. ꞊Ya ˈgo ˗a ˗dhɛ ˈö bhë ˗a ˈgü, Ezekiɛdhö dë ˗kun ˈˈsaabhomɛn ˈka. ˗A ˈbha ˗ya kë kö ˗a dë ˗ya ˗pö ˗a ˗dhɛ ꞊dhɛ Zoova ˗yö dhiaŋzë ö ˗wodhiʋ̈lomɛn ˗nu ˗dhɛ ˗kplawo, ˈö ˗an ˗takun. ˗A ˈwɔnzuan ˈnën ˗tɔ Zoova ˗ya ˗pö Izaakö, Zakɔbö waa Zedhemi ˗an ˗dhɛ: «A ü ˈˈpiʋ̈.»—ˈWun. 26:24; 28:15; Jér. 1:8.
4. Mɛn ˗zogban ˗wo ˗nu ˗mɛɛn ˈwo ꞊faan nu Ezekiɛdhö ˗dhɛ?
4 ˗Zlan ˗bha nɔɔn˗ ˈö Ezekiɛdhö dho ˗a pö bhë, Izraɛdhömɛn ꞊vadhɛ ˗dho ˗a ˈsü ˗kɔ ˗kë ꞊dhɛ? Zoova ˗ya ˗to ˈˈdhiʋ̈ ˈö˗ pö: «Izraɛdhö ˗bha ˈkɔɔmɛn ˗nu ˗dho ˗kɔ n ˗wo ˈka, ˈyö sü ꞊dhɛ ˈwaa˗ ˈˈpiʋ̈ kö ˈwo wo ˈˈtʋ ˈto n ˗wo ˗bha.» (Ézéch. 3:7) ˗Wa gɔɔgbɩɩdhɛ kë Ezekiɛdhö ˗ta, kö ꞊waa˗ kë Zoova ˗ta. ˗Wo ˗nu ˈwo bhë ˗wo Ezekiɛdhö ˗zogban ꞊dhɛ ˈˈsɛgümɛn ˗nu ˗bha gɔɔgbɩɩdhɛ kë ˗sü ˗gɛn ˈyaa ˈnën ˗tɔ ꞊dhɛ ˗Zlan ˗wodhiʋ̈lomɛn ˗së ˈyaa ˗mü ˗a ˈka. Zoova ˗yö Ezekiɛdhö ˗zogban ˈzü ꞊dhɛ ö ˗bha za nɔɔn˗ ˈö bhë yi ˈö dho yö˗ ˈka ˈkodhiʋ̈, ˈˈsɛgümɛn ˗nu «˗dho ˗a ˈwɔn dɔ ꞊dhɛ ˗Zlan ˗wodhiʋ̈lomɛn do ˈbha ˗kun wo kpö ˈgü.» (Ézéch. 2:5; 33:33) ˈYaa za ˈgü ꞊dhɛ ˗wo ˗nu ˈwo bhë ˗wo Ezekiɛdhö ꞊faanmën ˗Zlan ˗bha nɔɔn˗ pö ˗su ˗bha.
ZOOVA ˈNËN KWA BƆ ˈPÖ ꞊DƐƐ
꞊Dhɛ Ezekiɛdhö ˈdhö, mɛn ˗nu ꞊mɔɔn˗ ˗bha ˈwo ˗gban kwa ˗gɔ ɛɛnˈˈ ˈö ˈwaa wo ˈˈtʋ ˈto kwa ˗bha ˗zlanwopödhɛ ˈgü. ˈˈKɛɛ kwa˗ ˈwɔn ˗dɔ ꞊dhɛ Zoova ˗yö kwa ˈˈpiʋ̈. (Kpɔɔˈˈ ˗wo ˗bhüöö kpö 5-6 ˗bha, ˗an ˈgü.)
5. ˈKwa ˗dhɛ ˗ga Isaïe 44:8 ˈgü, ˗mën ˈö dho kwa ꞊faanmën?
5 Kwa ˗de ˈpö ˗a ˈwɔn dɔ ˗sü ö ꞊dhɛ Zoova ˈnën kwa bɔ bhë, ˗yö ꞊faan ˗nu kwa ˗dhɛ. ˗Yö kwa ˗sü ˗tiaandhö, ˈö kwa ˗dhɛ ö ˗bha «꞊gbɛkiö ˗nu.» (Is. 43:10) ꞊Bhlëëwɔn ˈkpii˗ ꞊dede ˗mü kwa ˗bha ˈka. ˗Ya ˗pö Ezekiɛdhö ˗dhɛ: «ˈˈSuʋ̈ ˈya dho ü kë.» ˗Wo do ˈö bhë ˈyö˗ pö ˗ni ˈgü kwa ˗dhɛ ˈpö ꞊dɛɛ. ˈMën ˗kë ˈö kwa dua ˈyaa ˗mü ˈkwa ˈˈsuʋ̈ ˗gban kwa ˗gɔ ˗mɛn ˗nu ˗gɔ? ˈYö ˗tɔ ꞊dhɛ Zoova ˈö kwa bɔ ˈpö ꞊dhɛ Ezekiɛdhö ˈdhö bhë, ˗yö kwa ˈˈpiʋ̈.—Isaïe 44:8 ˗wo pö.
6. (1) Zoova ˗ya ˗pö ö ˗dho kwa ˗takun ˗kɔ ˗kë ꞊dhɛ? (2) ˈWɔn ˗mɛɛn ˈö kwa ꞊faanmën?
6 Zoova ˗ya ˈˈplüün ˗bho ꞊dhɛ ö ˗dho kwa ˗takun. ˗A ˈwɔnzuan ˈnën ˗tɔ ˈˈsanni ˗ya pö: «Ka ˈnën ˈka ˗tɔ n ˗man ꞊gbɛkiö ˗nu,» ˗ya ˗pö: «Ka ˈˈyiga ˗nu ˈˈkan ˗ni ˈgü, a ˗dho kë ka ˈˈpiʋ̈. ˈWii ˗dho ˈsɔ ka ˗ta. Ka ˈˈtasü ˗ni ˈgü ˈˈshiʋ̈ ˈgü, ˈyii ˗dho ka ˈˈgʋ̈. ˗A ˈnɛɛn˗ ˈyii ˗dho ˈpa ka ˈka ˗ʒiaanwo.» (Is. 43:2) Kwa ˗zlanwopö ˗ni ˈgü ˈˈtʋ̈ŋ ˈbha ˗nu ˈka, ˈwɔn ˈˈgbɩɩ˗ ˗nu ˈkwa ꞊mɔɔn˗ ˗bha ˈkwa ˗an ˗zɔn ˈˈyi ˗gblü ɛɛnˈˈ ˈˈshiʋ̈ ˗nu ˈka ˗wo ˗nu kwa ˗ta. ˈˈKɛɛ Zoova ˗dho kwa ˗takun ˈö ˈkwa ˗zlanwopö ˗kplawo. (Is. 41:13) ꞊Dɛɛ ˈkwa ˗zlanwopö mɛn ˗nu ˗dhɛ, ˗a mɛn ꞊vadhɛ ˈwaa ˈˈwɩ ˗a ˗bha ꞊dhɛ Ezekiɛdhö ˗bha ˈˈtʋ̈ŋ ˈgü ˗mɛn ˗nu ˈdhö. ˈˈKɛɛ ˗yö kë kwa ˈˈɲaan ꞊dhɛ ˗an ˗bha ˗kɔ kwa ˗bha nɔɔn˗ ˗wo ˈka ˗sü ˗gɛn ˈyaa ˈnën ˗tɔ ꞊dhɛ ˈkwaa ˗zlanwopö ˗së ˈka. ˗A ˈwɔn dɔ ˗sü ˈö ꞊dhɛ ˈkwa Zoova ˗bha nɔɔn˗ ˗wo pö ˗klu ˗a ˗bha ˗sü ˈka ˗yö ˗kë ˗a ˗dhɛ ˗së bhë, ˗yö ꞊faan ˗nu kwa ˗dhɛ. Bɔmɛn Pɔdhö ˗ya ˗pö: «˗Zlan ˗dho ˈmɛ ˈö ˈˈdhʋ̈ ˗a ꞊trɔɔn ˈö ꞊mɔɔ yë ˈö˗ ˗kë bha˗ ˗bha ˗a nu˗ ˗mɛ ˗dhɛ.» (1 Ko. 3:8; 4:1, 2) Kwa ꞊dhegblüdhe do ˈö ˗yödhiʋ̈ ˈka ˈö˗ yi ˗ya ꞊gwëë, ˗ya ˗pö: «˗A ˈwɔn dɔ ˗sü ˈö ꞊dhɛ Zoova ˗yö ꞊trɔɔn ˈö ˗mɔn yö ˈkwa˗ ˗kë ˗a ˗bha ˗a ˗nu kwa ˗dhɛ bhë, ˗yö n zuʋ̈ˈˈ ˈˈgblü ˗dhi.»
˗ZUU ˈˈSLƲ̈Ʋ̈SLƲ̈ ˗YÖ ꞊FAAN ˗NÜ EZEKIƐDHÖ ˗DHƐ
ˈWɔn ˗gɔ ˈö yö ˗a ˈgü, pë ˗yaaga ˈwo ˗Zlan ˗wodhiʋ̈lomɛn Ezekiɛdhö ˗takun ˗zlanwopösü ˈgü, kwa ˗dho ˗an yö. ˗Kɔ ˈö Zoova ˗yö ö ˗wodhiʋ̈lomɛn ˈö bhë ˗a ˗takun ˗a ˈka kwa˗ draanˈˈ ˗ni ˈgü, ˗yö ˗dho kwa ˗zogban ˈpö ꞊dhɛ Zoova ˗dho kwa ˗takun ˈkwa ˗mɔn ˗zlanwopösü ˗bha. (Kpɔɔˈˈ ˗wo ˗bhüöö kpö 7 ˈgü.)
7. Ezekiɛdhö ˗ya ö ˗zota pë ˗nu ˈö ˗kpan ˗an ˗bha ˗an ˈgü, ˗yö ˗kë ö ˗de ˈgü ꞊dhɛ? (Pë ˈˈbin ˈö˗ kwi ˗ta bhë ˗a ˗ga.)
7 Ezekiɛdhö ˗yö ˗zuu ˈˈslʋ̈ʋ̈slʋ̈ ˗bha ˈˈpiigbɩɩdhɛ ˗yö. ˗A ˈˈɲan ˈgü ˗yö ˗da ˗dhɛkpaɔyi do ˈka, ˈö ˗kpan ˗zuu ˈˈslʋ̈ʋ̈slʋ̈ ˗bha kö ˗yö ʒiaan bho ˗ni ˈgü ˈˈkiö ˈgügbɩɩsü ˗nu waa gɔ ˈkpii˗ ˈö dhaŋ˗ ˈgü bhë ˗an ˈka. (Ézéch. 1:20, 21) ˈDhɛ ˗kë ˈˈdhʋ̈, ˈmën Ezekiɛdhö ˗ya ˗kë? ˈWɔn ˈö˗ ˗kë ˗a ˈˈpiʋ̈ ꞊taabha ˗ya ˗blɛɛ ˈö˗ pö: «ˈDhɛ ˈa ˗kpan ˗a ˗bha ˈyö ˈa ˈˈgblëënnu ˈˈshia˗.» Pë ˗nu ˈö ˗kpan ˗an ˗bha ˈˈdhʋ̈ ˗a ˈwɔn ˗ya ˗kun, ˈö ˈˈsuʋ̈ ˗kan ˗a ˈˈgblü ˈö ˗pö ˈˈshia˗. (Ézéch. 1:28) ꞊Taabha, ˈdhɛ Ezekiɛdhö ö ˗zota pë ˈˈmlünmlünsü ˗nu ˈö ˗an yö bhë ˗an ˈgü, ˗a ˗zo ˗yö ˗gban ꞊dhɛ ˗zuu ˈˈslʋ̈ʋ̈slʋ̈ ˗dho ö ˗takun kö ˈö ˗mɔn ˗zlanwopösü ˗bha.
8-9. (1) ˈDhɛ Zoova ˗ya pö ˗a ˗dhɛ ˗yö «luuˈˈ,» ˗mën ˈö ˗kë Ezekiɛdhö ˈka? (2) Zoova ˗yö Ezekiɛdhö ˗takun ˈzü ˗kɔ ˗kë ꞊dhɛ kö ˗yö ˗mɔn ˗zlanwopösü ˗bha?
8 Zoova ˗ya ˗pö Ezekiɛdhö ˗dhɛ: «Mɛn gbö, luuˈˈ ˈü dɔ ü ˗gɛn ˗ta kö ˈa dhiaŋzë ü ˗dhɛ.» ˈDhɛ Zoova ˗ya pö ˈˈdhʋ̈, Ezekiɛdhö ˗yö ꞊faan ˈö˗ ˗bhawɔn kun ˗a ˗bha ˗a ˗slɔɔ ˈö dɔ ö ˗gɛn ˗ta. Ezekiɛdhö ˗ya ˗pö: «꞊Faan ˗yö ˗da n ˈgü ˈyö ˈa dɔ n ˗gɛn ˗ta.» (Ézéch. 2:1, 2) ꞊Taabha, ˗zuu ˈˈslʋ̈ʋ̈slʋ̈ ˗yö ˈˈdhiʋ̈sü Ezekiɛdhö ˈka ˗a ˗bha ˗zlanwopösü ˈgü. (Ézéch. 3:22; 8:1; 33:22; 37:1; 40:1) ˗Zuu ˈˈslʋ̈ʋ̈slʋ̈ ˗yö ꞊faan ˗nu Ezekiɛdhö ˗dhɛ ˈö ˗zlanwopö ö ˗bha ˈˈsɛgümɛn ˗nu ˈwo ˗kë «꞊gɔɔgbɩɩmɛn ˗nu waa ˗dɔ mɛn ˗nu ˗gɔ ˈˈɲënŋ ˗mɛn ˗nu» ˈka bhë, ˗an ˗dhɛ. (Ézéch. 3:7) Zoova ˗ya ˗pö Ezekiɛdhö ˗dhɛ: «ˈMan ü ˈwëëdhɛ kë ˈˈgbɩɩ˗ ꞊dhɛ ˗an ˗bha ˈdhö. Ü ˗kpoŋgüdhɛ ˗de ˈpö ˈman˗ kë ˈˈgbɩɩ ꞊dhɛ ˗an ˗bha ˈdhö. ˈMan ü ˗kpoŋ kë ꞊dhɛ diaman ga ˈdhö. -Ya kë ˈˈgbɩkɩgbɩkɩ ꞊dhɛ ˗gwö ˈdhö. ˈDhɛ ˈˈdhʋ̈, ˈˈsuʋ̈ ˈya ˗dho ü kë ˗an ˗gɔ ˈü ꞊zii ˗an ˈˈdhiʋ̈.» (Ézéch. 3:8, 9) Pë ˈö Zoova kun ˗a ˈˈpiʋ̈ ˈö˗ pö Ezekiɛdhö ˗dhɛ ˈyö ˗tɔ: ‹ˈBha ˈdho ü ꞊kwaa mɛn ˗nu ˗bha ꞊gɔɔgbɩɩdhɛ ˗zü ˈö ü ˈgü ga. A ˗dho ꞊faan nu ü ˗dhɛ.›
9 ˈDhɛ ˗kë ˈˈdhʋ̈, ˗zuu ˈˈslʋ̈ʋ̈slʋ̈ ˗yö ˈˈdhiʋ̈sü ˗a ˈka ˈö dho ˗a ˈka ˗a ˗bha ˗zlanwopödhɛ ˈgü. Ezekiɛdhö ˗ya ˗pö: «Zoova ˗kɔ ˈˈpiigbɩɩsü ˗yö ˗to n ˗ta ꞊dedewo.» ˗Zlan ˗wodhiʋ̈lomɛn ˈö bhë, ˗yö ˈˈdhoogɔ do ˗sü ˈö ˗wo ˈö dho ˗a pö ˗a ꞊draan, ˈö˗ ˈgüman ˗së ˈka, kë ˈˈdhʋ̈ kö ˈö˗ blɛɛˈˈ ˗zogbandhe ˈka. (Ézéch. 3:14, 15) ˈDhɛ ˗ya ö bo, ˈyö Zoova ʒiaan bho ˗a ˈka ˈö dho ˗dhɛ ˈbha ˈgü, ˈyö ˗Zlan ˗bha «˗zuu ˗yö ˗da [˗a] ˈgü.» (Ézéch. 3:23, 24) ˗A ˈˈtʋ̈ŋ ˗ya ˗wo kö Ezekiɛdhö ˗ya ˗zlanwopösü ˗bha.
˗ZUU ˈˈSLƲ̈Ʋ̈SLƲ̈ ˗YÖ ꞊FAAN ˗NU KWA ˗DHƐ ˈPÖ ꞊DƐƐ
˗Mën ˈö kwa ˗takun ˈpö ꞊dɛɛ ˈö ˈkwa ˗mɔn ˗zlanwopösü ˗bha ꞊dhɛ Ezekiɛdhö ˈdhö. (Kpɔɔˈˈ ˗wo ˗bhüöö kpö 10 ˈgü.)
10. ˗Takundhe ˗mɛɛn ˈö kwa ˗bhawɔn ˈdhö˗ ˗bha kö ˈkwa ˗zlanwopö? ˈYö ˈmën ˗kë?
10 ˗Takundhe ˗mɛɛn ˈö kwa ˗bhawɔn ˈdhö˗ ˗bha kö ˈkwa ˗zlanwopö? ˈKwa˗ pö ˈkwa˗ dɔ, ˗kwa kwa ˗zota ˈzü ˈwɔn ˈö ˗kë Ezekiɛdhö ˈka ˗a ˈgü. ˈˈSanni ˗yö ˗zlanwopösü züdɔ, ˗zuu ˈˈslʋ̈ʋ̈slʋ̈ ˗yö ꞊faan ˈö˗ ˗bhawɔn kun ˗a ˗bha ˗a ˗nu ˗a ˗dhɛ. ꞊Dhɛ Ezekiɛdhö ˈdhö, ˗zuu ˈˈslʋ̈ʋ̈slʋ̈ ˈnën kwa ˗takun ˈkwa ˗mɔn ˗zlanwopö ˗sü ˗bha ˈpö ꞊dɛɛ. ˈMën ˗kë ˈkwa˗ pö ˈˈdhʋ̈? ˈYö ˗tɔ ꞊dhɛ Sɔtraan ˗yö ˗gblü gɔn ˗ni ˈgü kwa ˈka ˗kplawo, kö kwa ˗bha yö ˈö bhë ˗a kë ˗sü ˗yö ˈduaannu. (˗Dhɛ. 12:17) Mɛn ꞊vadhɛ ˗bha ˈgü Sɔtraan ˈgü ˗yö ˈˈgbɩɩ˗ ˈˈgbɛ ˈö ˗ʒiö ˗a ˈka kwa ˗ta, ˈkwaa ˗mɔn ˗a ˗bha. ˈˈKɛɛ kwa ˗bha ˗zlanwopösü ˗ya ˗kë ˈö kwa ˗kɔ ˗yö ˗ʒiö Sɔtraan ˗gɔ. (˗Dhɛ. 12:9-11) ˗Kɔ ˗kë ꞊dhɛ? Kwa ˗zlanwopö ˗ni ˈgü, kö kwa˗ ˗zɔn ꞊dhɛ ˗a ˗bha ˈˈsuʋ̈ ˗da kwa ˈgü ˗wɔn ˗nu ˈwaa pë ˈbha kë kwa ˈka. ˈKwa ˗zlanwopö do, ˈlëë˗ ˈnën dɔ Sɔtraan ˗bha. ˈKö ˗kë ꞊dhɛ kwa ˈyɔɔ˗ ˗nu ˗wo ˗gban ˗ni ˈgü kwa ˗gɔ, kwa ˗zlanwopö ˗kplawo. ˗Mën ˈö˗ ˗zɔn kwa ˗dhɛ? ˗Ya ˗zɔn ꞊dhɛ ˗zuu ˈˈslʋ̈ʋ̈slʋ̈ ˗yö ꞊faan ˗nu kwa ˗dhɛ, ˈö kwa ˈˈdhia ˈdhö Zoova ˈgü.—Mat. 5:10-12; 1 Piɛ. 4:14.
11. (1) ˈMën ˗zuu ˈˈslʋ̈ʋ̈slʋ̈ dho ˗a kë kwa ˗dhɛ? (2) Kwa ˗dho ˗a kë ꞊dhɛ kö ˗yö ˈto kwa ˗ta ˗kplawo?
11 ˈKwa kwa ˗zota ˗kɔ ˈö Zoova ˗yö ꞊faan nu ˗a ˈka Ezekiɛdhö ˗dhɛ kö ˗yö ˗zlanwopö bhë ˗a ˈgü, ˗gleŋ ˗mɛɛn ˈö˗ ˗da kwa ˗bha ˈzü? ˗Ya ˗zɔn ꞊dhɛ ˗zuu ˈˈslʋ̈ʋ̈slʋ̈ ꞊mɔɔn˗ ˗bha ˈö ꞊faan ˈö kwa ˗bhawɔn ˈdhö˗ ˗bha kö kwa bɔ ˈwɔn ˈˈgbɩɩ˗ suu ˈˈpɛpɛ ˈgü ˗zlanwopösü ˈgü, ˗a nu kwa ˗dhɛ. (2 Ko. 4:7-9) ˈMën kwa dua ˈdhö ˗mü ˈkwa˗ kë kö ˗zuu ˈö ˈˈdhʋ̈ ˈkwa˗ ꞊slɔɔ ˗kplawo? Kwa dua ˗mü ˈkwa˗ ˗dhɛ Zoova ˗gɔ ˈˈtʋ̈ŋ ꞊gban ˈka, kö ˗yö ga kwa ˈgü ꞊dhɛ ˗yö ˗dho kwa ˗bha bhɛɛwo ˗nu ˗daakë. Yesu ˗ya ˗pö ö ˗bha gwëëˈˈ ˗nu ˗dhɛ: «˗Ka pë ˗gba ˗dhɛ [˗Zlan] ˗gɔ [...], ˗ka pë mɔɔ˗ [...], ˗ka ˈˈkwɛɛ ˗ta ˗ma [...].» Yesu ˗ya ˗pö ˈzü ꞊dhɛ Zoova «ˈyii dho ˗kɔ ˈmɛ ˈwo ˈNii˗ ˈˈslʋ̈ʋ̈slʋ̈ ˗gba ˗dhɛ ˗gɔ ˗a ˗nu ˗dhɛ.»—Dhu. 11:9, 13; Këw. 1:14; 2:4.
˗ZLAN ˈˈDHIWO ˗NU ˗WO EZEKIƐDHÖ ˗BHA ˗ZOYÖDHE ˗GƐN ˗GBAN
12. ˈKwa ˗dhɛ ˗ga Ézéchiel 2:9–3:3 ˗bha ˗an ˈgü, ˈsëëdhɛ ˈö bhë ˗yö ˗go ˈˈmɛn? ˈYö ˈmën kun ˗ya ˗sü ˈka ˗a ˈgü?
12 ˗Zlan ˗bha ˗zuu dosɛnŋ ˈyaa ˈnën ꞊faan nu Ezekiɛdhö ˗dhɛ, ˗Zlan ˈˈdhiwo ˗nu ˗wa ˗bha ˗zoyödhe ˗gɛn ˗gban ˈpö. Ezekiɛdhö ˈˈɲan ˈgü ˗yö ˗da ˈö ˗kpan ˈsëëdhɛ ˗be do ˗bha mɛn ˈbha ꞊kwɛɛ˗. (Ézéchiel 2:9–3:3 ˗wo pö.) ˗A ˈsëëdhɛ ˗go ˈˈmɛn? ˈYö ˗mën ˈö˗ ˈgü? ˗Yö ꞊faan ˗nu Ezekiɛdhö ˗dhɛ ˗kɔ ˗kë ꞊dhɛ? ˈSëëdhɛ ˗be ˈö ˈˈdhʋ̈ ˗yö ˗go ˗Zlan ˗bha ˈˈgogbloo ˈgü ˗ʒian ˈka. ˗Yö ˗kë ꞊dhɛ ˈˈkiö ˗yiishiö ˈö Ezekiɛdhö ˗ya ˗kpan ˗an ˗bha ˗be bhë, ˈyö Zoova ˗ya dɔ ˗a mɛn do ˗gɔ kö ˗yö nu ˗a ˈka. (Ézéch. 1:8; 10:7, 20) ˗Zlan ˗bha za ˗nɔɔn ˈö˗ bɔ Zuifö ˗nu ˈwo kun ˈˈgan ˈgü ˗an ˗dhɛ ˈnën kun ˗a ˈgü. (Ézéch. 2:7) ˗A nɔɔn˗ ˗kun ˗bɛnzë ˗sü ˈka ˈsëëdhɛ ˈö ˈˈdhʋ̈ ˗a ˈˈpian ꞊plɛ ꞊gban ˗ta.
13. ˈMën Zoova ˗ya pö Ezekiɛdhö ˗dhɛ ˗ya kë ˈsëëdhɛ ˗be ˈö bhë ˗a ˈka? ˈYö ˈmën ˗kë ˈö ˈsëëdhɛ ˈö ˈˈdhʋ̈ ˈö ˗kë ˈˈnɛɛnnɛn ˗a ˈˈdhi?
13 Zoova ˗ya ˗pö ö ˗wodhiʋ̈lomɛn ˗dhɛ ˗yö ˈsëëdhɛ ˈö bhë ˗a ˗bhö kö «˗ya ˈgu dɔ.» Ezekiɛdhö ˗yö ö ˗gɔ ˗dho ˗a ˗dhɛ ˈˈshia˗, ˈö ˈsëëdhɛ ˈˈdhʋ̈ ˗a ˗bhö ˈpapadhö. ˈˈƝɛɛn ˈö bhë ˗a ˈklɔɔ˗ ˈtɔ˗ ˗mën? ˗Ya ˗zɔn ꞊dhɛ Ezekiɛdhö dua ˗mü kö nɔɔn˗ ˈö dho ˗a pö bhë, ˗ya ˈgüman ˗së ˈka. ˗A dua ˗mü kö ˗yö ˈdhaŋ˗ bho ˗wo ˈö bhë ˗a ˈˈdhiʋ̈, kë ˈˈdhʋ̈ kö ˗ya ˗blü ˗a ˗pö mɛn ˈˈwɛɛ ˗nu ˗dhɛ ˗sü ˗bha. ˈDhɛ ˗kë ˈˈdhʋ̈, ˗wɔnmɛnkunwɔn do ˈbha ˗yö ˗kë. Ezekiɛdhö ˗ya ˗yö ꞊dhɛ ˈsëëdhɛ ˈö bhë «˗a din ˗kun ˈˈnɛɛnnɛn ꞊dhɛ ˈˈzɔ ˈˈɲɔn ˈdhö.» (Ézéch. 3:3) ˈMën ˗kë ˈö ˗kë ˈˈdhʋ̈? ˈYö ˗tɔ ꞊dhɛ ꞊bhlëë ˈkpii˗ ˈö ˗kë Zoova ˗wɔn ˗blɛɛ mɛn ˗nu ˗dhɛ ˗sü ˈka bhë, ˗ya ˗sü ꞊dhɛ pë ˈˈnɛɛnnɛn ɛɛnˈˈ pë din ˗së ˗sü ˈdhö. (Ps. 19:8-11) ˗A kë ˗sü kö ˗a ˈˈdhia kë Zoova ˈgü, kö ˗ya kë ö ˗wodhiʋ̈lomɛn ˈka bhë, Ezekiɛdhö zuʋ̈ˈˈ ˈˈgblü ˗dhi ˗a ˗wɔn ˈgü.
14. ˈMën Ezekiɛdhö ˗takun ˈö ˗wɩ yö ˈwo˗ dɔ ˗a ˗kɔ ˈka bhë ˗a ˗bha?
14 ˈDhɛ go mü, Zoova ˗ya ˗pö Ezekiɛdhö ˗dhɛ: «Ü ˈˈtʋ ˈto ˗wo ˈˈpɛpɛ ˈa dho ˗a pö ü ˗dhɛ ˗an ˗bha, ˈü ˗an ˈkun ü zuʋ̈ˈˈ ˈˈpiʋ̈.» (Ézéch. 3:10) Pë ˈö kun ˗a ˈˈpiʋ̈ ˈö˗ pö Ezekiɛdhö ˗dhɛ ˈyö ˗tɔ ö ˗wo ˗nu ˈwo ˗bɛnzë ˗sü ˈka ˈsëëdhɛ ˈö˗ nu ˗a ˗dhɛ bhë ˗a ˈgü, ˗wo ˈto ˗a ˈˈɲaan, kö ˗yö ö ˗zota ˗an ˈgü ˗së ˈka. ˈDhɛ Ezekiɛdhö ˗ya ˗kë ˈˈdhʋ̈, ˗a ˗bha ˗zoyödhe ˗kë ˈˈgbɩɩ˗. ˗Ya ˗kë ˈpö ˈö nɔɔn˗ ˈö dho ˗a pö ˈˈsɛgümɛn ˗nu ˗dhɛ, ˈö˗ dɔ. (Ézéch. 3:11) ˈDhɛ Ezekiɛdhö ˗yö ˗Zlan ˗bha nɔɔn˗ ˈgüman ˗së ˈka, ˈö ˈdhaŋ˗ bho ˗a ˈˈdhiʋ̈, ꞊faan ˗yö ˗kë ˗a ˗gɔ kö yö ˈö bhë ˗ya züdɔ, ˗yö ˈdho ˗yö yö˗ ˈka ˗a ˈˈdhiʋ̈todhɛ ˗bha.—Ps. 19:14.
˗ZLAN ˈˈDHIWO ˗NU ˗WO KWA ˗BHA ˗ZOYÖDHE ˗GƐN ˗GBAN ˈPÖ ꞊DƐƐ
15. ˈKwa˗ pö ˈkwa bɔ ˈwɔn ˈˈgbɩɩ˗ ˗nu ˈgü, ˈwɔn ˗mɛɛn ˗nu ˈkwa dho ˗an «ˈkun kwa ˗zo ˈˈpiʋ̈»?
15 ˈKwa˗ pö ˈkwa ˈto ˗Zlan ˗bha yö ˈgü ˗kplawo, kwa dua ˗mü ˈpö ˈkwa kwa ꞊kwaa ˗a ˈˈdhiwo ˗nu ˗zü kö ˗wo kwa ˗bha ˗zoyödhe ˗gɛn ˗gban. ˗Wo ˈˈpɛpɛ ˈö Zoova ˗ya pö kwa ˗dhɛ, ˗kwa ˗an «ˈkun kwa ˗zo ˈˈpiʋ̈.» ꞊Dɛɛ, Zoova ˗bɔ ö ˗Wo ˈö ˗kë Biblö ˈka ˗a ˗ta ˈö dhiaŋzë kwa ˗dhɛ. ˈMën ˈkwa dho ˗a kë kö ˗yö kwa zuʋ̈piʋ̈wɔn ˗nu waa pë ˗nu ˈwo kwa ˗blü ˈwɔn ˗nu kë ˗sü ˗bha ˗an bho ˈˈgblʋʋ?
16. ˗Mën ˈö kwa dua ˈdhö ˗mü ˈkwa˗ kë ˗Zlan ˗Wo ˈka? ˈYö kwa ˗dho ˗a kë ꞊dhɛ kö ˗yö ö ˗yadhɛ ˈsü kwa zuʋ̈ˈˈ ˈgü?
16 ˈKwa ˗bhöpë ˗bhö, ꞊faan ˗yö ˗kë kwa ˗gɔ. ˗Kɔ do bhë ˗a ˈka ˈkwa ˗Zlan ˗Wo draanˈˈ, ˈkwa kwa ˗zota ˗a ˈgü, kwa ˗bha ˗zoyödhe ˗kë ˈˈgbɩɩ˗. Kwa ˗zo ˈya ˗dho bhɔ ˈsëëdhɛ ˈö Zoova ˗ya nu Ezekiɛdhö ˗dhɛ bhë, ˗gleŋ ˈö go ˗a ˈgü, ˗a ˈka. ˗Ya ˈˈpiʋ̈ kö kwa ˈgu ˗yö dɔ ˗Zlan ˗Wo ˈka, ˗a ˗gɛn ˗mü ꞊dhɛ ˈkwa˗ draanˈˈ, kö ˈkwa˗ ˈgüman ˗së ˈka. ˈKwa˗ pö ˗yö kë ˈˈdhʋ̈, kwa dua ˗mü ˈkwa bhɛɛˈˈ, ˈkwa Biblö ˗wo pö, ˈkwa kwa ˗zota ˗a ˈgü. ˗Kwa bhɛɛˈˈ ꞊köŋ ˗blɛɛsü, kö ˈkwa kwa zuʋ̈ˈˈ baaˈˈ ˈˈtʋ ˗to ˗Zlan ˗Wo ˗bha ˗sü ˗bha. ˈKwa kwa bo, ˗kwa Biblö ˗wo pö, ˈkwa ˈˈtʋ̈ŋ ˈsü ˈkwa kwa ˗zota pë ˈö ˈkwa˗ ˗wo pö, ˗a ˈgü ˗së ˈka. ˈKwa˗ kë ˈˈdhʋ̈, ˗a ꞊trɔɔn ˗mɛɛn ˈkwa dho ˗a ꞊slɔɔ˗? ˈKwa kwa ˗zota ˗Zlan ˗Wo ˈgü ˗kplawo, kwa ˗bha ˗a ˈgüman ˗sü ˗yö ˗dadhiʋ̈, ˈö kwa ˗bha ˗zoyödhe ˗kë ˈˈgbɩɩ˗.
17. ˈMën ˗kë ˈö ˗së kö pë ˗nu ˈkwa ˗an ˗wo pö Biblö ˈgü ˈkwa kwa ˗zota ˗an ˈgü?
17 ˈMën ˗kë ˈö ˗së kö ˈkwa Biblö ˗wo pö, ˈkwa kwa ˗zota ˗a ˈgü? ˈKwa˗ kë ˈˈdhʋ̈, ꞊faan ˈö kwa ˗bhawɔn ˈdhö˗ ˗bha kö ˈkwa ˗Zlan ˗bha ˗Gblüdëdhɛ ˗nɔɔn pö kwa ˗dho ˗a ꞊slɔɔ˗. ˗Ya ˈgo mü ˈzü ˈkwa ˗dho ˗mɔn ˗Zlan ˗bha za ˗nɔɔn ˈö dho kë ˗dhɛkpaɔ dhiʋ̈ˈˈ ˈgü bhë, ˗a pö ˗sü ˗bha. ˈKwa kwa ˗zota ˈzü Zoova ˗bha ˈˈklʋʋsë ˗nu ˈgü, kwaa˗ ˗nu kwa ˗bha ˈˈtɔŋdëdhɛ ˗dho kë ˈˈgbɩɩ˗ ꞊dedewo. ˗Ya kë ˈˈdhʋ̈ kwa ˗dho ˗a din yö. Kwa zuʋ̈ˈˈ ˗dho ˈwaannu, ˈö pë ˗nu ˈwo kwa ˗gɔ ˈwo kwa ˗zokun.—Ps. 119:103.
KWA ˗DHO PË ˈˈPƐPƐ KË ˈKWA BƆ ˈWƆN ˈˈGBƖƖ˗ ˗NU ˈGÜ
18. ˗Mën ˈö mɛn ˗nu ˈwo kwa ˗bha ˈˈyasa ˗nu ˈgü ˈwo dho ˗a ˈwɔn dɔ? ˈYö ˈmën ˗kë?
18 Ezekiɛdhö ˗kun ˗Zlan ˗wodhiʋ̈lomɛn ˈka, ˈˈkɛɛ kwa ˗zë ˈkwaa˗ ˈka. ˈKö ˗kë ˈˈdhʋ̈, kwa ˗dho pë ˈˈpɛpɛ kë ˈö ˈkwa Zoova ˗bha nɔɔn˗ ˈö Biblö ˈgü ˗a pö mɛn ˗nu ˗dhɛ, kö ˗yö ˈdho ˗yö yö˗ ˈka ˈˈtʋ̈ŋ ˈö Zoova dho ˗a pö ˗zlanwopösü ˗ya ɲën, ˗a ˗bha. ˗Zlan ˗bha zadɔyi ˈka, mɛn ˗nu ˈwo kwa ˗bha ˈˈyasa ˗nu ˈgü ˈwii ˗dho ˗a pö ꞊dhɛ ˈyii wo ꞊kpɔɔ ɛɛnˈˈ ˗a ˈˈtʋ ˈyaa kun wo ˗bha. (Ézéch. 3:19; 18:23) ˗Wo ˗dho ˗a yö ꞊ʒiaan ꞊dhɛ nɔɔn˗ ˈö ˈkwa˗ pö bhë, ˗yö ˗go ˗Zlan ˈˈpiʋ̈.
19. ˈMën dho kwa gba ꞊faan ˈka kö ˈkwa ˈdho kwa ˗bha ˗zlanwopösü ˈka ˈˈdhiʋ̈?
19 ˗Mën ˈö dho ꞊faan nu kwa ˗dhɛ kö ˈkwa ˗zlanwopö ˗kplawo? Pë ˗yaaga ˈwo ꞊faan nu Ezekiɛdhö ˗dhɛ ˈkpa bhë, ˗wo ꞊mɔɔn˗ ˗bha ˈwo kwa ˗takun. Kwa ˗zlanwopö ˗kplawo ˈyö ˗tɔ kwa ˈwɔn ˗dɔ ꞊dhɛ Zoova ˈnën kwa bɔ. ˈGö mü ˈzü ˗a ˗bha ˗zuu ˈˈslʋ̈ʋ̈slʋ̈ waa˗ ˗Wo, ˗wo ꞊faan ˗nu kwa ˗dhɛ. ˈDhɛ ˗kë ꞊dhɛ Zoova kwa ˈˈpiʋ̈ kö ˗yö kwa ˗takun, ˗kwa pë ˈˈpɛpɛ kë ˈkwa ˗zlanwopö, ˈkwa ˈwɔn ˈˈgbɩɩ˗ ˗nu bun ˈkwa ˈdho ˈkwa yö˗ ˈka ˗a «ˈˈdhiʋ̈todhɛ ˗bha.»—Mat. 24:13.
ˈˈTAN 65 ˗Kwa ˈdho kwa ˈˈdhiʋ̈!
a ˈWɔn ˗gɔ ˈö yö ˗a ˈgü, pë ˗yaaga ˈwo ˗Zlan ˗wodhiʋ̈lomɛn Ezekiɛdhö ˗takun ˗zlanwopösü ˈgü, kwa ˗dho ˗an yö. ˗Kɔ ˈö Zoova ˗yö ö ˗wodhiʋ̈lomɛn ˈö bhë ˗a ˗takun ˗a ˈka kwa˗ draanˈˈ ˗ni ˈgü, ˗yö ˗dho kwa ˗zogban ˈpö ꞊dhɛ Zoova ˗dho kwa ˗takun ˈkwa ˗mɔn ˗zlanwopösü ˗bha.