1-2. ˈWɔn ˈˈgbɩɩ˗ ˗mɛɛn ˗nu ˈwo ꞊mɔɔn˗ ˗bha kö ˗wo nu Zoova gbamɛn ˗nu ˈwo ˗klu ˗a ˗bha, ˗an ˗ta?

 ˈWƆN ˈˈgbɩɩ˗ ˈbha ˗nu ˗wa ˈˈkan kwa ˈgü, kwa ˗bha ˗tosɛta ꞊mɔɔn˗ ˗bha ˈö to mü ˈö go bho ˈˈgblʋʋ. Kwa ꞊dhegblü do ˈwo˗ ˗dhɛ Luisö, a kanŋsɛɛ ˗yua ˗ya ˗kun. ꞊Dhɔtrɔɔmi ˗ya ˗pö ˗a ˗dhɛ ꞊dhɛ ˈˈsu ˈdɛdɛ ˈnën to ˗a ˗gɔ kö ˗yö ga. Kwa ꞊dhegblüdhe do ˈwo˗ ˗dhɛ Monika waa ö ꞊gɔɔn ˗an ˗kɔ ˗yö ˗kun ˗Zlan ˗bha yö ˈgü ꞊dedewo. ˈˈKɛɛ yi do ˈka, Monika ˗ya ˗man ꞊dhɛ ö ꞊gɔɔn ˈö mɛn zii ˈka bhë, ˗yö -kun ˈwɔn yaa kë ˗ni ˈgü ˗bindhe ˈgü ˗kwɛ ꞊va ˈˈpiʋ̈. Olivia ˈö yaa ꞊gwaan˗ ˗bha, ˗a dua ˗mü kö ˗yö ˈgo ö ˗bha ˈkɔɔ ˈˈtee ˈˈgbɩɩ˗ ˈö kun nu ˗ni ˈgü ˗a ˗wɔn ˈgü. ˈDhɛ ˈö ö ꞊yɛɛ˗ ˗kë, ˗ya ˗yö ꞊dhɛ ˈˈtee ˈö ˈˈdhʋ̈ ˗ya ö ˗bha ˈkɔ shiʋ̈ˈˈ. ˈˈTʋ̈ŋ ˈnën ˈdɛdɛ ˈˈpiʋ̈, mɛn ˗nu ˈwo bhë ˗an ˗bha ˗tosɛta ˗to mü ˈö go ˈˈgblʋʋ. ˈWɔn suu ˗nu ˈwo ˈˈdhʋ̈, ˗wa ka ꞊slɔɔ do ˈö ka ˗bha ˗tosɛta ˗ya ˈgo ˈˈgblʋʋ ˗ee?

² ˈKö ˗kë ꞊dhɛ kwa ˗klu Zoova ˗bha, ˈwɔn ˈˈgbɩɩ˗ waa ˈˈyua ˗nu ˗wo ˗nu kwa ˗ta ˈpö ꞊dhɛ mɛn ˗nu ˈwo to ˗an ˈdhö. Mɛn ˗nu ˈö ˗Zlan gbamɛn ˗nu ˗dhɔ ˈyaa ˗an kë ˗wo ꞊mɔɔn˗ ˗bha -ʒianwo ˈwo ˗gban kwa ˗gɔ ɛɛnˈˈ ˈwo kwa ˈˈklʋʋbhɔ. ˈKö ˗kë ꞊dhɛ Zoova ˈyaa kwa ˗takpa ˈˈtʋ̈ŋ ˈˈpɛpɛ ˈka ˈwɔn ˈˈgbɩɩ˗ ˗nu ˗gɔ, ˗ya ˗pö ꞊dhɛ ö ˗dho kwa ˗takun. (Is. 41:10) ˗A ˗bha ˗takundhe ˈsaa˗ ˈgü, kwa zuʋ̈ˈˈ ˈˈgblü ꞊mɔɔn˗ ˗bha ˈö ˗dhi ˗kpalwo, ˈkwa ˗da ˈwɔn ˗së ˗nu ˗ʒian ˗ta ˈö ˈkwa to ˗klu ˗sü ˈka ˗a ˗bha ˈˈtʋ̈ŋ ˈˈgbɩɩ˗ ˗nu ˈgü. ˈWɔn ˗gɔ ˈö yö ˗a ˈgü, kwa ˗dho ˗kɔ ˗yiishiö ˈö Zoova kwa ˗takun ˗a ˈka ˈˈtʋ̈ŋ ˈˈgbɩɩ˗ ˗nu ˈgü, ˗an yö. ˈPë ˈkwa dho ˗a kë kö ˈkwa Zoova ˗bha ˗takundhe ꞊trɔɔn ꞊slɔɔ, kwa ˗dho ˗a yö ˈpö.

 ZOOVA ˗DHO KWA ˗TAKPA

3. Kwa bɔ ˗ni ˈgü ˈwɔn ˈˈgbɩɩ˗ ˈgü, ˈmën kë ˗sü ꞊mɔɔn˗ ˗bha ˈö kë kwa ˗kɔa ˈˈgbɩɩ˗?

³ ˗A ˗dhɛ ˈˈgbɩɩdhɛ. ˈWɔn ˈˈgbɩɩ˗ ˗ya nu kwa ˗ta, ˗zotakɔ ˗së ˗bha ˗kë kwa ˗gɔ ˗sü waa ˗da ˈwɔn ˗së ˗nu ˗ʒian ˗ta ˗sü ꞊mɔɔn˗ ˗bha ˈö ˗kë kwa ˗kɔa ˈˈgbɩɩ. ˈMën ˗kë? ˈYö sü ꞊dhɛ ˈˈtʋ̈ŋ ˈö ˈˈdhʋ̈ ˗a ˈka, ˗a ˈbha ˗ya kë kö kwa zuʋ̈ˈˈ ˈˈklʋʋ ˗yö bhɔ ˗ni ˈgü, ˗wëë ˗ya bɔ kwa ˗ta ꞊dedewo. Kwa zuʋ̈ˈˈ ꞊mɔɔn˗ ˗bha ˈö ˗kaankwöö ˈö ˈpë ˈkwa dho ˗a kë ˈkwaa dɔ. ˗Kɔ ˈö kwa ꞊dhegblüdhe ˗nu ꞊plɛ ˈkwa ˗an ˗wɔn ꞊blɛɛ ꞊klöö˗ yö ˈwo ˗kë ˗a ˈka wo ˗de ˈgü kö ˈwɔn ˈˈgbɩɩ˗ ˗ya nu ˗an ˗ta, ˗kwaa ˗ga. Olivia ˗ya ˗pö: «ˈDhɛ ˈˈtee ˈˈgbɩɩ˗ ˗yö n ˗man ˈkɔ ˈwü, n zuʋ̈ˈˈ ˗kaankwöö ꞊dedewo ˈö ˈpë ˈa dho ˗a kë ˈmaan kun ˗a dɔ ˗ni ˈgü.» ˈDhɛ Monika ˗ya yö ꞊dhɛ ö ꞊gɔɔn ˗ya ˈˈkpënŋ kë ˈö ˗gɔ, ˗ya ˗pö: «N ˈgü ˗yö ˗ga ꞊dedewo. ˗Yö ˗mën n ˈka ˈö n zuʋ̈ˈˈ ˗gii. ˗A ˗wɔn ˈgü, n ˗kɔ ˈyaa kun ˗mɔn ˗ni ˈgü n ˗de ˗bha yö ˗nu kë ˗sü ˗bha. ˈYaa kun n ˗zo ˈˈpiʋ̈ toŋtoŋdhö ˗be ꞊dhɛ ˈwɔn suu ˈö bhë ˗yö ꞊mɔɔn˗ ˗bha ˈö ˗kë n ˈka.» ˈWɔn ˈˈgbɩɩ˗ ˗nu ˗wa nu kwa ˗ta, ˗kɔ ˗mɛɛn ˈö Zoova ˗ya pö ö ˗dho kwa ˗takun ˗a ˈka?

4. ˈKwa ˗dhɛ ˗ga Fidhipö 4:​6, 7 ˈgü, ˈmën Zoova ˗ya ˈˈplüün bho kwa ˗dhɛ?

⁴ Zoova ˗dho kwa ˗takun ˗kɔ ˗kë ꞊dhɛ? Pë ˈö Biblö ˗ya ˗dhɛ «zuʋ̈waannusü ˈö go ˗Zlan ˈˈpiʋ̈» bhë, ˗ya ˗pö ö ˗dho ˗a nu kwa ˗dhɛ. (Fidhipö 4:​6, 7 ˗wo pö.) Zuʋ̈waannusü ˈö ˈˈdhʋ̈ ˈnën ˗tɔ zuʋ̈saadhɛ ˈö mɛn ˗ya ꞊slɔɔ ˗a ˗bha ˗kë Zoova ˈˈtɔŋdë ˈka ˗sü ˗wɔn ˈgü. ˗Yö «˗ziö mɛbhɩɩdhe ˗zʋgɔngüwɔn ꞊gban ˈˈpɛpɛ ˈˈdhiʋ̈todhɛ ˗ta.» ˗Ya kë ˈˈdhʋ̈ kö ˗yö ˗ʒiö pë ˗së ꞊gban ˈˈpɛpɛ ˈkwa ꞊mɔɔn˗ ˗bha ˈkwa kwa ˗zota ˗an ˈgü, ˗an ˗ta. ˗A ˈwɔnzuan ˈnën ˗tɔ ˈkwa bhɛɛˈˈ Zoova ˗dhɛ ꞊dedewo ˈˈtʋ̈ŋ ˈbha ˗nu ˈka, kwa˗ ˗yö ꞊dhɛ kwa zuʋ̈ˈˈ ˗yö ˗kë ˗saa ˈyö ˗sü ꞊dhɛ Zoova ˗ya kwa ˈgba «zuʋ̈waannusü ˈö ˗Zlan ˈˈpiʋ̈» ˗a ˈka.

5. Zuʋ̈waannusü ˈö go ˗Zlan ˈˈpiʋ̈, ˗yö kwa ˗zogban ˗kɔ ˗kë ꞊dhɛ?

⁵ Fidhipö 4: 7 ˗ya ˗pö ˈzü ꞊dhɛ zuʋ̈waanusü ˈö go ˗Zlan ˈˈpiʋ̈ ˈˈdhʋ̈, ˗yö «˗dho kë ka ˗zʋ ˗gban ˗gɛn ˈka» ɛɛnˈˈ ˗yö ˗dho ka ˗takpa ˈö ka «˗zʋ ˗gɔn ˈka ˗wɔn ˈˈwɛɛ ˈbha ˈyaa kë» ˗dhö. ˗Wo ˈö ˗kë ‹˗takpa ˈka› bhë, ˗yö ˗gban ˈˈsɔdha ˗nu ˈwo wo ˈˈɲan ˈto ˗ni ˈgü ˈˈkwipö ˈbha ˗bha kë ˈˈdhʋ̈ kö mɛn ˈya ˗dho ˗nu ˗a ˗gɔ, ˗an ˗bha. Mɛn ˗nu ˈwo ˈˈkwipö ˈö ˈˈdhʋ̈ ˗a ˈgü ˗wo yi ˗zë wo ˈflëëgü, ˈyö ˗sü ꞊dhɛ ˗wa ˈwɔn ˗dɔ ꞊dhɛ ˈˈsɔdha ˗nu ˗wo ˈˈkwipö ˗takpa ˗ni ˈgü. ˗Kɔ do ˈö bhë ˗a ˈka zuʋ̈waannsü ˈö go ˗Zlan ˈˈpiʋ̈ ˗ya kë kwa ˗gɔ, kwa zuʋ̈ˈˈ ˗yö ˗kë ˗saa ˈyö sü ꞊dhɛ kwa˗ ˈwɔn ˗dɔ ꞊dhɛ ˗yö kwa ˗takpa ˗ni ˈgü. (Ps. 4:8) ꞊Dhɛ Anö ˈdhö, ˈkö ˗kë ꞊dhɛ ˈwɔn ˈö ˈkwa˗ ˈgü ˈyii ˈgo ˈˈgblʋʋ ꞊köŋ, kwa zuʋ̈ˈˈ ꞊mɔɔn˗ ˗bha ˈö ˗kë ˗saa. (1 Sam. 1:​16-18) Kwa zuʋ̈ˈˈ ˗ya kë ˗saa, ˗zotakɔ ˗së ˗dho kë kwa ˗gɔ ˈö ˈkwa ˗da ˈwɔn ˗nu ˗ʒian ˗ta ꞊kpɔɔdhɛ ˈka.

6. ˈMën ˈkwa dho ˗a kë kö zuʋ̈waannusü ˈö go ˗Zlan ˈˈpiʋ̈ ˗yö ˈwɔn ˗së kë kwa ˗dhɛ? (Kpɔɔˈˈ ˈzü pë ˈˈbin ˗bha.)

 ⁶ ˈPë ˈkwa dho ˗a kë. ˈWɔn ˈˈgbɩɩ˗ ˗nu ˗wa nu kwa ˗ta, ˗kwa Zoova ˗dhɛ kö ˗yö nu kwa ˗dhɛ. ˗Kɔ ˗kë ꞊dhɛ? ˗Kwa bhɛɛˈˈ kö ˗yö ˈdho ˗yö yo˗ ˈka Zoova ˗bha zuʋ̈waannusü ˗nu kwa ˗dhɛ ˗sü ˗bha. (Dhu. 11:9; 1 Tes. 5:17) Luisö ˈkwa˗ ˗wɔn ꞊blɛɛ ꞊klöö˗ yö waa ö ˗bha dhebɔ Ana ˈdhɛ ˈwo˗ man ꞊dhɛ ˈˈsu ˈö to Luisö ˗gɔ kö ˗yö ga ˈyaa ꞊va ˈzü, ˗kɔ ˈwo˗ kun ˗a ˈka wo ˗bha ˗ya ˗blɛɛ ˈö˗ pö: «ˈKwa kë wɔn suu ˗nu ˈwo ˈˈdhʋ̈ ˗an ˈgü, mɛn ˈˈdhɛkë ˗kɔ ˈkwa dho kwa ˗kɔ ˈˈyɛ ˗a ˗bha waa ˈwɔn ˈˈwɛɛ ˗nu kë ˗sü ꞊mɔɔn˗ ˗bha ˈwo ˗kë kwa ˗kɔa ˈˈgbɩɩ˗ ꞊dedewo. ˈˈKɛɛ bhɛɛsü ˗yö yi zuʋ̈ˈˈ ˈˈwaannu.» Luisö waa ö ˗bha dhebɔ ˗wa ˗pö ꞊dhɛ wo ꞊bhɛɛ ꞊dedewo gɛnɲan ˈka ꞊va kö Zoova ˗yö wo zuʋ̈ ˈˈwaannu, ˗yö wo zuʋ̈ˈˈ kë ˗saa, ˗yö wo gba ꞊kpɔɔdhɛ ˈka kö ˈwo ˈwɔn ˗së kë. ˈDhɛ ˗kë ˈˈdhʋ̈, ˗wa ˗yö ꞊dhɛ Zoova ˗yö wo ˗takun. Kwa bɔ ˗ni ˈgü ˈwɔn ˈˈgbɩɩ˗ ˈgü ˈkwa bhɛɛˈˈ ˗kplawo, zuʋ̈waannusü ˈö go Zoova ˈˈpiʋ̈ kwa ˗dho ˗a ꞊slɔɔ.—Wlɔ. 12:12.

ZOOVA ˗DHO ˗A KË KÖ ˈKWA ˈTO KWA ˈPINŊ˗ ˈGÜ

7. Kwa bɔ ˗ni ˈgü ˈwɔn ˈˈgbɩɩ˗ ˗nu ˈgü, kwa ꞊mɔɔn˗ ˗bha ˈkwa ˗kë kwa ˗de ꞊dhɛ?

⁷ ˗A ˗dhɛ ˈˈgbɩɩdhɛ. Kwa bɔ ˗ni ˈgü ˈwɔn ˈˈgbɩɩ˗ ˈgü, kwa ˗bha ˈwɔn yö ˗kɔ, kwa ˗zotakɔ waa kwa ˈwɔn kë ˗kɔ ˗nu ꞊mɔɔn˗ ˗bha ˈwo go ˈˈgblʋʋ. ꞊Dhɛ ˗kɔ ˈö ˈˈtee ˈˈgbɩɩ˗ ˗yö ˈˈyitagɔ bho ˗a ˈka ʒian ˗ta ˗a ˈdhö, ˈwɔn ˈˈgbɩɩ˗ ꞊mɔɔn˗ ˗bha ˈö kwa ˗bha ˈwɔn yö ˗kɔ bho ˈˈgblʋʋ. Ana ˈkwa˗ ˗wɔn ꞊blɛɛ ꞊klöö˗ yö ˈdhɛ ꞊gɔɔn Luisö ˗wɔn ˗yö ˗kë, zuʋ̈klʋʋbhɔdhe ꞊va ˗nu ˗a ˗ta. ˗Ya ˗pö: «ˈˈTʋ̈ŋ ˈbha ˗nu ˈka n ˗gɔ ˈgü ˗dɔ ˗gbɔudhö, ˈa˗ pö n ˗de ˗dhɛ ꞊dhɛ man ˈnën ˗a ˗kë. ˗A ˗bha ga ˗sü ˗yö ˗mën n ˈka ꞊dedewo.» ˈˈTʋ̈ŋ ˈbha ˗nu ˈka ˈzü, Ana ˗kë ö ˗de ˈgü ꞊dhɛ mɛn ˈö ö do ˈka ˗a ˈdhö. ˈDhɛ ˗kë ꞊dhɛ ˈwɔn ˗nu ˈö Luisö kun ˗an kë ˗ni ˈgü ˗së ˈka, yö ˗zë ˗a ˗kɔ ˈyaa ꞊mɔɔn˗ ˗bha bhë ˗a ˈgü ˗yö ˗ga. Ana ˗yö ˗kë ö ˗de ˈgü ꞊dhɛ mɛn ˈö ꞊weeyi ꞊bhaa ˈˈtee ˈˈgbɩɩ˗ ˈˈtʋ̈ŋ ˈka ˗a ˈdhö. ˈKwa kë ˈwɔn suu ˗nu ˈwo ˈˈdhʋ̈ ˗an ˈgü Zoova kwa ˗takun ˗kɔ ˗kë ꞊dhɛ?

8. ꞊Dhɛ ˗kɔ ˈö Isaïe 33:6 ˗ya pö ˗a ˈka bhë ˗a ˈdhö, ˈmën Zoova kwa ˗zogban ˗a ˈka?

⁸ Zoova ˗dho kwa ˗takun ˗kɔ ˗kë ꞊dhɛ? ˗Ya ˗pö ö ˗dho ˗a kë kö ˈkwa ˈto kwa ˈpinŋ˗ ˈgü. (Isaïe 33:6 ˗wo pö.) ˈˈTee ˈˈgbɩɩ˗ ˗yö ʒiö ˗ni ˈgü, ˗yö ꞊mɔɔn˗ ˗bha ˈö ˈˈyitagɔ bho ʒian ˗ta. ˈˈKɛɛ pë ˈbha ˗nu ˈwo ˗kë ꞊dhɛ ˗a gban ˗nu ˈdhö ˗wo ˗ya ˗sü ˈka ˗a ˗bha ˈˈyi ꞊löö, ˈö ˈwo˗ ˗kë kö ˈˈyitagɔ ˗yö ˈto ö ˈpinŋ˗ ˈgü. ˗Wa ˗kë ˈzü ˈö ˈˈyitagɔ ˈyaa ˗bhaŋbhaŋ, ˈö mɛn ˗nu ˈwo˗ ˈgü ˗an ˗bha ˈˈtakpɔsü ˗yö ˗kë ˗së ˈö pë ˈˈdhiʋ̈˗ ˈyaa kë ˗an ˈka. ˈKö ˗kë ˈˈdhʋ̈, ꞊waa˗ pö ˗a gban ˗nu ˗wo yökë ˗së ˈka, ˈˈyitagɔ dua ˗mü kö ˗yö ˈˈtasü. ˗Kɔ do ˈö bhë ˗a ˈka, ˈkwa ˈto ˗klu ˗sü ˈka Zoova ˗bha ˈwɔn ˈˈgbɩɩ˗ ˗nu ˈgü, kwa ˗dho ˈto kwa ˈpinŋ˗ ˈgü.

9. Kwa ˗bha pë mɛɛnˈˈ ˗dhɛ ˗yö kwa ˗takun kö ˈwɔn yö ˗kɔ ˗së ˗yö kë kwa ˗gɔ ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)

 ⁹ ˈPë ˈkwa dho ˗a kë. Zuʋ̈klʋʋbhɔwɔn ꞊va ˗wa nu kwa ˗ta, ˗kwa pë ˈˈpɛpɛ kë kö kwa ˗kɔ ˗yö ˈto ˗Zlan ˗dhɔkësü ˈgü. Gagade ˈka ˈˈtʋ̈ŋ ˈö ˈˈdhʋ̈ ˗a ˈgü, ˗a ˈbha ˗ya kë kö kwa ˈti ˗dho ˗a kë ꞊dhɛ ˗kɔ ˈö ˈkwa˗ ˗kë ˗a ˈka ˈˈdhiʋ̈ ˗be ˗a ˈdhö. ˈˈKɛɛ kwa ˗zo ˈya ˗dho bhɔ ꞊dhɛ Zoova ˗ya ˈgüman kwa ˗gɔ. (Dhu. 21:​1-4) Kwa dua ˗mü kö ˈkwa ˈˈtʋ̈ŋ ˈsü ˈkwa ˈsëëdhɛ draanˈˈ kwa ˗de ˈˈpiʋ̈, ˈkwa kwa ˗zota ˗a ˈgü. ˈMën ˗kë? Zoova ˗yö ˗bɔ ö ˗bha ˗kɔlokota ˗ta ˈö ˈwɔn ˗gɔ ˗sɛŋbɔ ˗nu ˈwo dho kwa ˗takun kö ˈkwa ˈto kwa ˗wo ˗ta ˗an nu kwa ˗dhɛ. ˗A ˗dhɛ ˈö kwa ˗bhawɔn ˈdhö˗ ˗bha ˈkwa˗ pö ˈkwa˗ ꞊slɔɔ, ˗kwa kpɔɔˈˈ kwa ˗bha pë mɛɛnˈˈ ˗dhɛ ˗nu ˈgü. ˗A ˈbha ˗nu ˈnën ˈwo ˗tɔ aplikashɔn JW Library, Index des publications des Témoins de Jéhovah waa Guide de recherche pour les Témoins de Jéhovah. Monika ˈkwa˗ ˗wɔn ꞊blɛɛ ꞊klöö˗ yö ˗ya ˗pö ꞊dhɛ ˈdhɛ ö zuʋ̈ˈˈ ˈˈklʋʋ kun bɔ ˗ni ˈgü, ö ˗dhioo ˗nu ˗mɛɛn pë mɛɛnˈˈ ˗dhɛ ˗nu ˈgü. ˗A ˈwɔnzuan do ˈnën ˗tɔ ˗wo ˈö ˗kë «colère» ˈka bhë, ˗ya ˗mɛɛn. ˈˈTʋ̈ŋ ˈbha ˗nu ˈka ˈzü ˗yö «trahison» ɛɛnˈˈ «loyauté» ˗mɛɛn. ˗Yö ˗an ˗wo ˗pö ˈö zuʋ̈waannusü ꞊slɔɔ. Monica ˗ya ˗pö: «A pë mɛɛnˈˈ ˗ni ˈgü, n zuʋ̈ˈˈ ˈˈdhiʋ̈ ˗yö ˗tɛ ꞊dedewo. ˈˈKɛɛ ˈman ꞊ɲɔɔn mü, a˗ ˗yö ꞊dhɛ Zoova ˗ya ö ˗kɔ ˗ya n ˗man. ˈMan˗ ˗wo pö, a˗ ˗yö ˈzü ꞊dhɛ ˈwɔn ˈa˗ ˈgü bhë Zoova ˗ya ꞊gban ˗dɔ, ˈö n ˗takun ˗ni ˈgü.» Takundhe suu ˈö bhë ˗yö ꞊mɔɔn˗ ˗bha ˈö˗ ˗kë ˈkwa to kwa ˗wo ˗ta ˈö kwa zuʋ̈ˈˈ ˗yö ˗kë ˗saa.—Ps. 119:​143, 144.

ZOOVA ˗DHO KWA ˗TAKUN

10. ˈWɔn ˈˈgbɩɩ˗ ꞊gbɔɔnsü ˗ya nu kwa ˗ta, kwa ꞊mɔɔn˗ ˗bha ˈkwa ˗kë kwa ˗de ˈgü ꞊dhɛ?

¹⁰ ˗A ˗dhɛ ˈˈgbɩɩdhɛ. ˈWɔn ˈˈgbɩɩ˗ ꞊gbɔɔnsü ˗ya nu kwa ˗ta ˗yö ꞊mɔɔn˗ ˗bha ˈö kwa ˗kë ˈˈtëëtë, ˈö kwa zuʋ̈ˈˈ ˗kaankwöö. Kwa ꞊mɔɔn˗ ˗bha ˈkwa ˗kë ꞊dhɛ ˗gɛn ˈˈgbɩɩ˗ ˗mɛn ˈö ˗ya ˗gi, ˈö ˈyaa ˈˈtasu ˗së ˈka ˗a ˈdhö. ˗A ˈbha ˗ya kë kö yö ˈö ˈkwa˗ kë ˗dhɛ dɔ ˗së ˈka ˗be bhë, ˈkwaa kë ˗së ˈka ˈzü ɛɛnˈˈ ˗a ˈbha ˈö˗ ˈkwa˗ ˗kë zuʋ̈gblüdhi ˈka ˈˈdhiʋ̈ ˗be, ˗a kë ˗sü ˗dhɔ ˗ya ˈgo kwa ˈgü. ꞊Dhɛ Edhi ˈdhö, ˗yö ꞊mɔɔn˗ ˗bha ˈö ˗kë kwa ˈgü ꞊dhɛ ˗go ˈyiöösü ˗yö ˈˈgbɩɩ˗ ˈö ˈkwa˗ pö ˈkwa ˈto yi ˈgü ˗kplawo. (1 Rois 19:​5-7) ˈKwa kë ˈˈtëëtë, ˈmën Zoova ˗ya pö ö ˗dho kë?

11. ˗Kɔ ˗mɛɛn ˈbha ˈö Zoova ˗yö kwa ˗takun ˗a ˈka? (Psaume 94:18)

¹¹ Zoova ˗dho kwa ˗takun ˗kɔ ˗kë ꞊dhɛ? ˗Ya ˗pö ö ˗dho nu kwa ˗dhɛ. (Psaume 94:18 ˗wo pö.) ˗Bialömɛn ˗ya ˗gi, ˗a ˗bhawɔn ˗yö mɛn ˈbha ˗bha kö ˗ya ˗takun ˗bialö ˗sü ˗bha. ˗Kɔ do ˈö bhë ˗a ˈka, kwa ˗bhawɔn ˗yö ˗takundhe ˗bha kö kwa ˗kɔ ˗yö ˈto Zoova ˗bha yö ˈgü.  ˗A ˗wɔn ˈgü, Zoova ˗yö kwa ˗zogban ˈö˗ pö: «Maan Zoova, ü ˗bha ˗Zlan, man ˈa˗ pö ü ˗dhɛ: «ˈˈSuʋ̈ ˈya ˗dho ü kë. A ˗dho ü ˗takun» bhë, ˗a ˗dho ˗ya ü ˗kɔ ˗së ˗bha.»» (Is. 41:13) ˗Gblüdë Davi ˗yö ö ˗bha ˗dhɛ ˗yö. ˈDhɛ ˈwɔn ˈˈgbɩɩ˗ ˗nu ˗wo nu ˗a ˗ta, ˈö ˈyɔɔ˗ ˗nu ˗wo nu ˗a ˗gɔ, ˗ya ˗pö Zoova ˗dhɛ: «Ü ˗kɔ ˗së ˗yö n ˗takun.» (Ps. 18:35) Zoova ˗yö ˗nu kwa ˗dhɛ ˗kɔ ˗kë ꞊dhɛ?

12. ˈKwa kë ˈˈtëëtë, de ˗nu ˈö Zoova ꞊mɔɔn˗ ˗bha ˈö bɔ ˗an ˗ta kö ˈö nu kwa ˗dhɛ?

¹² ˗Ya kë ꞊shiöŋ, Zoova ˗yö ˗bɔ mɛn ˗nu ˗ta ˈö nu kwa ˗dhɛ. ˗A ˈwɔnzuan do ˈnën ˗tɔ ˈˈtʋ̈ŋ ˈö Davi kun ˗a ˈka ˈˈtëëtë bhë, Zoova ˗ya ˈˈtɔŋdë Ʒonatan ˗bɔ ˗a ˈˈpiʋ̈ kö ˗ya ˗zogban, ˗ya ꞊faanmën. (1 Sam. 23:​16, 17) ˗Kɔ do ˈö bhë ˗a ˈka ˈpö Zoova ˗yö Edhize ˗bɔ kö ˗yö Edhi ˗takun. (1 Rois 19:​16, 21; 2 Rois 2:2) ꞊Dɛɛ Zoova ꞊mɔɔn˗ ˗bha ˈö bɔ kwa ˗bha ˈkɔdhigümɛn, kwa ˈˈtɔŋdë ˗nu ɛɛnˈˈ mɛn zii ˗nu ˗ta kö ˗yö kwa ˗takun. ˈˈKɛɛ ˈwɔn ˈˈgbɩɩ˗ ˗ya ˈmën kwa ˈka ˗yö ꞊mɔɔn˗ ˗bha ˈö˗ ˗kë ˈkwa ˗kan mɛn ˈˈwɛɛ ˗nu ˗bha ˈö ˈkwa˗ pö ˈkwa ˈto kwa do ˈka. ˗Yö ˗kë ˈˈdhʋ̈ mɛn ꞊vadhɛ ˈka. ˈMën ˈkwa dho ˗a kë kö ˈkwa Zoova ˗bha ˗takundhe ꞊slɔɔ?

13. ˈMën kwa dua ˈdhö ˗mü ˈkwa˗ kë kö ˈkwa Zoova ˗bha ˗takundhe ꞊trɔɔn ꞊slɔɔ? (Kpɔɔˈˈ ˈzü pë ˈˈbin ˗bha.)

¹³ ˈPë ˈkwa dho ˗a kë. ˗Kwa pë ˈˈpɛpɛ kë kö ˈkwa ˗dho ˈto kwa do ˈka. ˈKwa ˈˈkan mɛn ˈˈwɛɛ ˗nu ˗bha ˗yö ˗dho ˗a kë ˈö ˈkwa kwa ˗zota dosɛnŋ kwa ˗de ˈwɔn ˈgü ɛɛnˈˈ ˈwɔn ˈgbɩɩ˗ ˗nu ˈwo kwa ˗ta ˗an ˗wɔn ˈgü. ˈKwa˗ kë ˈˈdhʋ̈, kwa ˗dho ˗da ˈwɔn yaa ˗nu ˗ʒian ˗ta. (Prov. 18:1) Gagade ˗mü ꞊dhɛ ˈwɔn ˈˈgbɩɩ˗ ˗nu ˗wa nu kwa ˗ta, kwa ˗bhawɔn ˗yö ˗to kwa do ˈka ˗sü ˗bha ˈˈtʋ̈ŋ ˈbha ˗nu ˈka. ˈˈKɛɛ kö ˈkwa ˈˈkan mɛn ˗nu ˈwo to ˗an ˗bha ˈˈtʋ̈ŋ ꞊gblɛɛn ˈˈpiʋ̈, ˗yö ˗dho kë ꞊dhɛ pë ˈö ˈkwa ˗kɔ Zoova ˗bha ˗takundhe ˈka ˗a ˈdhö. ˈDhɛ ˈˈdhʋ̈ ˈkö ˗kë ꞊dhɛ ˗yö ˈˈgbɩɩ˗, ˗kwa ˈˈwɩ kwa ˗bha ˈkɔdhigümɛn ˗nu, kwa ˈˈtɔŋdë ˗nu waa mɛn zii ˗nu ˗an ˗bha ˗takundhe ˗bha. ˗Kwaa ˈwɔn dɔ ꞊dhɛ Zoova ˗yö ˗bɔ ˗an ˗ta kö ˈö kwa ˗takun.—Prov. 17:17; Is. 32:​1, 2.

ZOOVA ˗DHO KWA ˗ZOGBAN

14. ˈˈSuʋ̈damɛngüwɔn ˗mɛɛn ˗nu ˈwo ꞊mɔɔn˗ ˗bha kö ˗wo nu kwa ˗ta?

¹⁴ ˗A ˗dhɛ ˈˈgbɩɩdhɛ. ˈˈSuʋ̈damɛngüwɔn ˈbha ˗nu ꞊mɔɔn˗ ˗bha ˈwo ˗kë kwa ˈka. Biblö ˈgü, ˗klu ˗Zlan ˗bha ˗mɛn ˈbha ˗nu ˗wo ˈˈtʋ̈ŋ ˈwo kun ꞊zii ˗ni ˈgü ˗a ˈka kö ˗an ˈyɔɔ˗ ˗nu ˗wa nu ˗an gɔ ɛɛnˈˈ kö ˗wa ˗gban ˗an ˗gɔ ˗a ˗wɔn ˗blɛɛ. (Ps. 18:4; 55:​1, 5) ˗Kɔ do ˈö bhë ˗a ˈka, ˗wo ꞊mɔɔn˗ ˗bha ˈwo ˗gban kwa ˗gɔ ꞊klaŋplöö, kwa ˗bha yö ˈˈdhiʋ̈, kwa ˗bha ˈkɔdhi ˈgü ɛɛnˈˈ ˈˈsɛgɔdhiʋ̈mɛn ˗nu ꞊mɔɔn˗ ˗bha ˈwo ˗gban kwa  ˗gɔ. ˗A ˈbha ˗ya kë ˈˈyua ˈö ˈˈdhɛ ˈyaa ˈdhö ˗yö kwa ˗bha. ˈˈTʋ̈ŋ ˗nu ˈwo ˈˈdhʋ̈ ˗an ˈgü, kwa ꞊mɔɔn˗ ˗bha ˈkwa ˗kë ˈˈtëëtë ꞊dhɛ ˈnën ˈsɛɛn˗ ˗nu ˈdhö. Zoova ˗yö kwa ˗takun ˗kɔ ˗kë ꞊dhɛ ˈˈtʋ̈ŋ ˈwo ˈˈdhʋ̈ ˗an ˈgü?

15. ˈKwa ˗dhɛ ˗ga Psaume 94:19 ˈgü, ˈmën Zoova dho ˗a kë kwa ˗dhɛ?

¹⁵ Zoova ˗dho kwa ˗takun ˗kɔ ˗kë ꞊dhɛ?. ˗Yö kwa ˗zogban ˈö kwa zuʋ̈ˈˈ ˗dhuaa. (Psaume 94:19 ˗wo pö.) Psaume ˈö bhë ˗yö kwa ˗zo ˗bo ˈnëndhenën ˈˈtɩtɩ ˈö ˈˈsuʋ̈ ˗ya ˗kë ˈö ˈyaa ˗mɔn yi zë ˗sü ˗bha dha ˈˈwɩ ˈˈtʋ̈ŋ ˈgü, ˗a ˈka. ˗Kwa kwa ˗zota kö ˗a dë ꞊yaa˗ ˈsü ö ꞊kwɛɛ kö ˗yö yi zë. ˈKö ˗kë ꞊dhɛ dha ˗yö ˈˈwɩ ˗ni ˈgü ˗kplawo, ˈnën ˗bha ˗kë ö dë ꞊kwɛɛ ˗sü ˗ya ˗zogban ˈö ˗kë ö ˗de ˈgü ˗së. ˈˈSuʋ̈damɛngüwɔn ˗nu ˗wa nu kwa ˗ta, kwa Dë ˈö dhaŋ˗ ˈgü ˗a ˗bha kwa ˗zogban ˗sü ˈö ꞊dhɛ mɛn ˗kun ö ꞊kwɛɛ ˗sü ˈdhö bhë, ˗yö ˗dho kwa zuʋ̈ˈˈ kë ˗saa. Zoova ˗bha mɛn ˗zogbansü ˈö ˈˈdhʋ̈ kwa ˗dho ˗a ꞊slɔɔ ˗kɔ ˗kë ꞊dhɛ?

16. ˈMën kwa dua ˈdhö ˗mü ˈkwa˗ kë kö ˈkwa Zoova ˗bha mɛn ˗zogbansü ꞊trɔɔn ꞊slɔɔ? (Kpɔɔˈˈ ˈzü pë ˈˈbin ˗bha.)

¹⁶ ˈPë ˈkwa dho ˗a kë. ˗Kwa ˈˈtʋ̈ŋ ˈsü zoodhö zoodhö kö ˈkwa bhɛɛˈˈ Zoova ˗dhɛ, ˈkwa Biblö ˗wo pö. (Ps. 77:​1, 12-14) ˗Ya kë ˈˈdhʋ̈ ˈwɔn ˈˈgbɩɩ˗ ˗nu ˗wa nu kwa ˗ta, pë ˗blɛɛsü ˈö ˈkwa dho ˗a kë ˈyö ˗tɔ ˗bhɛɛ kwa Dë ˈö dhaŋ˗ ˈgü bhë ˗a ˗dhɛ ˗sü. ˗Kwa kwa ˗bha ˈˈsuʋ̈wɔn waa zuʋ̈dhiʋ̈tɛwɔn ˗nu blɛɛˈˈ Zoova ˗dhɛ. ˗Kwa kwa ꞊kwaa ˗a ˗zü kö ˗yö dhiaŋzë kwa ˗dhɛ, ˗yö kwa ˗zogban ö ˈˈDhiwo ˈka. (Ps. 119:28) ˈˈSuʋ̈ ˗ya kwa kë, Biblö ˈˈpian ˈbha ˗nu ꞊mɔɔn˗ ˗bha ˈwo kwa ˗zogban. ˗A ˈwɔnzuan ˈnën ˗tɔ kwa ꞊mɔɔn˗ ˗bha ˈkwa ꞊faanmëndhe ꞊slɔɔ Job, Psaume waa Proverbes ˈsëëdhɛ ˗be ˈgü. Kwa ˗dho ˗a ꞊slɔɔ ˈzü ˗wo ˈö Yesu ˗ya pö Matiö ˈˈɲan ˈˈgblʋ̈gblʋ̈ 6 ˈgü bhë, ˗a ˈgü. ˈKwa bhɛɛˈˈ Zoova ˗dhɛ, ˈkwa Biblö ˗wo pö kwa ˗dho ˗zogbandhe ꞊slɔɔ˗.

17. ˈMën ˗dho kë ga ˗sü ˈka kwa ˈgü?

¹⁷ -Yö ꞊mɔɔn˗ ˗bha ˈö ga kwa ˈgü ꞊dhɛ Zoova ˗dho kwa ˗takun ˈˈtʋ̈ŋ ˈˈgbɩɩ˗ ˗nu ˈgü ˗kplawo. Kwa ˈti ˗dho ˈto kwa do ˈka toŋtoŋdhö. (Ps. 23:4; 94:14) Zoova ˗ya ˗pö ꞊dhɛ ö ˗dho kwa ˗takpa ˈkwa to ˈpinŋ˗ ˈgü, ˈö kwa ˗takun. ˈWɔn ˈö ˗gban Zoova ˗bha, Isaïe 26:3 ˗ya ˗blɛɛ ˈö˗ pö: «Ü ˗dho ü ˗kɔ kpa mɛn ˗nu ˈö ˈwo wo ˗zo tën ü ˗dhɛ ꞊dedewo, ˗an ˗ta. Ü ˗dho ˗yadeflëëgüsü nu ˗an ˗dhɛ ˗kplawo ˈyö ˗tɔ ꞊dhɛ ˗wo wo ˗zoyö bhi ꞊nën ü ˗dhɛ.» ˈDhɛ ˈˈdhʋ̈, ˗kwa kwa ˗zo yö Zoova ˗dhɛ kö ˈkwa˗ ˗bha ˗takundhe ꞊trɔɔn ꞊slɔɔ. ˈKwa˗ kë ˈˈdhʋ̈, kwa ˈgü ˗dhö kë ˈˈgbɩɩ˗ ˈwɔn ˈˈgbɩɩ˗ ˗nu ˈˈtʋ̈ŋ ˈgü.