1. ˈKwa kwa ˗zota Zoova ˗bha ˗dhɔ ˈgü, ˗mën ˗nu ˈwo nu kwa ˗zo ˈˈpiʋ̈?

 MƐN ˈö Zoova ˈdhö˗ ˈka, ˈkwa kwa ˗zota ˗a ˈgü do ˗ee? Kwa bhɛɛˈˈ ˗ni ˈgü ˗a ˗dhɛ, ˗mën nu ˈwo nu kwa ˗zo ˈˈpiʋ̈? ˈKö ˗kë ꞊dhɛ ˈkwaa ˗kpan ˗a ˗bha, Biblö ˗yö mɛn ˈö˗ ˈka ˗a ˗zɔn kwa ˗dhɛ ˗kɔ ꞊va ˗ta. ˗Ya ˗pö ꞊dhɛ Zoova ˈnën ˗tɔ «ˈˈwo ˈbhü waa ˗gblü ˈdhaa˗», ˈö˗ ˗kë ˈzü «pɛng ˈö mɛ ˗bhö» ˗a ˈka. (Ps. 84:11; Ebl. 12:29) ˈDhɛ Ezekiɛdhö ˈˈɲan ˈgü ˗yö ˗da, ˗ya ˗pö Zoova ˗yö kë ˗sü ˈka ꞊dhɛ Safii ˗gwö ˈdhö, ˈö˗ ˈbhü ˗yö bhɔ, ˈö˗ ˗kë ˈzü ꞊dhɛ dha ˈkpoŋ˗ ˈdhö. (Ézéch. 1:​26-28) ˗Wö ˗nu ˈwo bhë ˗wo ꞊mɔɔn˗ ˗bha ˈwo kwa ˗ta ˈˈmliin bhɔ ɛɛnˈˈ ˈwo ˈˈsuʋ̈ ˗da kwa ˈgü.

2. ˈMën ꞊mɔɔn˗ ˗bha kö ˗yö mɛn ˈbha ˗nu ˗kɔ ˈkun ˗ɲɔɔn Zoova ˈˈsuee ˗sü ˗bha?

² ˈDhɛ ˗kë ꞊dhɛ ˈkwaa ˗kpan Zoova ˗bha bhë, ˗a pö ˗sü ˈö ꞊dhɛ kwa ˗dhɔ ˗ya ˗kë ˗yö ꞊mɔɔn˗ ˗bha ˈö ˗kë kwa ˗kɔa ˈˈgbɩɩ˗. Mɛn ˈbha ˗nu ˗de ˈpö ˗wa ˗pö ꞊dhɛ wo ˗dhɔ ˈyaa ꞊mɔɔn˗ ˗bha kö ˗yö Zoova kë toŋtoŋdhö, ˈyö sü ꞊dhɛ ˈwɔn yaa ˗nu ˗wo ˗nu wo ˗ta. ˗A ˈbha ˗ya kë ˈzü kö kwa ˈkpɔ ˗dë ˈti ˗dhɔ ˗zɔn kwa ˗dhɛ do. ˈWɔn yö ˗kɔ suu ˗nu ˈwo ˈˈdhʋ̈ Zoova ˗yö ˗an ˈgüman kwa ˗gɔ. ˗A ˗wɔn ˈgü, ˗yö ö ˗bha ˈˈklʋʋsë ˗nu ˗zɔn kwa ˗dhɛ Biblö ˈgü.

3. ˈMën ˗kë ˈkwa dho kwa ˈˈtʋ̈ŋ kë ˗së ˈka Zoova ˗bha ˗dhɔ ˈgü?

³ Biblö ˗ya ˗pö ꞊dhɛ «waa˗ pö ˗dhɔ kö ˗wo ˗wɩ [Zoova] ꞊nɛ˗ ˈka.» ˗Dhɔ ˈnën ˗tɔ Zoova ˗bha ˈˈklʋʋsë ˈkpii˗. (1 Zn. 4:8) Pë ˈˈpɛpɛ ˈö˗ ˗kë, ˗dhɔ ˈnën˗ ˗blü ˗a kë ˗sü ˗bha. ˗A ˗bha ˗dhɔ ˈˈpii ˗yö ˈˈgbɩɩ˗, ˈyö sü ꞊dhɛ ˗ya ˗zɔn ˗ʒianwo mɛn ˗nu ˈö ö ˗dhɔ ˈyaa ˗an kë, ˗an ˗dhɛ. (Mat. 5:​44, 45) ˈWɔn ˗gɔ ˈö yö ˗a ˈgü, ˈpë ˗gban Zoova waa ö ˗bha ˗dhɔ ˗an ˗bha kwa ˗dho ˗a yö. Kwa ˗Zlan dɔ ˗së ˈka, ˗a ˗dhɔ ˈö kwa ˈgü ˗yö ˗dho ˗dadhiʋ̈.

 KWA ˗DHƆ ˗YÖ ZOOVA ˗KË ꞊DEDEWO

4. Zoova ˗bha ˗dhɔ ꞊dede ˗ya ˗kë ˈkwa ˗kë kwa ˗de ˈgü ꞊dhɛ? (Kpɔɔˈˈ ˈzü pë ˈˈbin ˗bha.)

⁴ «[Zoova ˈö bhë] mɛ ˗wëë ˗ya ˗kë ꞊dedewo.» (Zak. 5:11) Biblö ˈgü, ˗yö ö ˗de ˗zɔn dhebɔ ˈö˗ ˗bha ˈnën ˗dhɔ ˗ya ˗kë ˗a ˈka. (Is. 66:​12, 13) ˗Kwa kwa ˗zota dhebɔ ˈö ö ˗zokë ˗ni ˈgü ö ˗bha ˈnën ˈˈtɩtɩ ˈˈpiʋ̈ ˗a ˈgü. ˗Ya ˗ya ö ˈgban ˗ta ˗së ˈka, ˈö ˈwɔn ꞊blɛɛ ˗a ˗dhɛ dhɔŋsü ˈka. ˈNën ˈö bhë ˗yö ˈˈgbʋ bɔ ˗ni ˈgü ɛɛnˈˈ pë ˈˈdhiʋ̈˗ ˗ya kë ˗a ˈka, ˗a dhö ˗yö pë ˈˈpɛpɛ ˗kë kö ˈö ö ˗zokë ˗a ˈˈpiʋ̈. Kwa ˗de ˈpö ˈkwa kë ˈwɔn ˈˈgbɩɩ˗ ˗nu ˈgü, ˗yö ꞊mɔɔn˗ ˗bha ˈö ga kwa ˈgü ꞊dhɛ kwa ˗dhɔ ˗yö Zoova ˗kë. Psaume ˗bɛnzëmɛn ˗ya ˗pö: «ˈDhɛ n zuʋ̈dhiʋ̈tɛ ˗wɔn ꞊va ˗wo ˗kë n ˗bha, ü n ˗zo ˗gban, ˈü n zuʋ̈ˈˈ ˈwaannu.»—Ps. 94:19.

5. Kwa Zoova ˗bha ˗dhɔ ꞊dede ˗sü ˗kɔ ˗kë ꞊dhɛ?

⁵ Zoova ˗yö ˗to ö ˗wo ˗ta. (Ps. 103:8) ˈWɔn ˗nu ˗wa zë kwa ˗gɔ, ˈyaa ˈˈkan kwa ˗bha. ˈDhɛ Izraɛdhömɛn ˗nu ˗wo ˈwɔn yaa kë Zoova ˈka ˗gɛnɲan ˈka ꞊va, ˈwo go wo ˗bha ꞊sɔnŋ yaa ˈgü, ˗yö ˗dhɔ ˈö˗ ˈˈyi ˈyaa ˈˈbhʋʋ ˗a ˗zɔn ˗an dhɛ ˈö˗ pö: «Ka ˗wɔn ˗ya kë ˈˈgbɩɩ˗ n ˗gɔ, ka ꞊bhlëë ˗ya kë ꞊va, ka ˗dhɔ ˗yö n ˗kë.» (Is. 43:​4, 5) ˗Dhɔ do ˈö bhë ˈnën Zoova ˈgü ꞊dɛɛ. Kwa ꞊mɔɔn˗ ˗bha ˈkwa kwa ˗zo yö ˗a ˗dhɛ ˗kplawo. ˈKö ˗kë ꞊dhɛ kwa ˈwɔn yaa ꞊gbɔɔnsü ˗kë, Zoova ˈyaa ˈˈkan kwa ˗bha. ˈKwa ˈgo kwa ˗bha ꞊sɔnŋ yaa ˈgü, ˈkwa kwa ꞊yɛɛ˗ kë Zoova ˈˈpiʋ̈ kwa ˗dhɔ ˈö˗ ˈgü ˗yö ˗to ö ˈpinŋ˗ ˈgü. ˗Ya ˗pö ꞊dhɛ ‹ö ˗dho kwa ˗bhawɔn ˈto ˈgbɛ ꞊dedewo.› (Is. 55:7) Biblö ˗ya ˗pö ꞊dhɛ ‹˗kwa kwa wë ˗ya ˗Zlan ˈˈpiʋ̈ kö ˗yö kwaa˗ ˈwɔn yaa ˗nu ˗mawɔn ˈto.›—Këw. 3:19.

6. ˈMën Zacharie 2:8 ˗ya ˗zɔn kwa ˗dhɛ ˈö ˗gban Zoova ˗bha?

⁶ ˗Bhö Zacharie 2:8 ˗wo pö. ˈDhɛ ˗kë ꞊dhɛ kwa ˗dhɔ ˗ya ˗kë bhë, Zoova ˗yö ö ˈˈtʋ̈ŋ ˗kë kwa ˗bha ˈwɔn yö ˗kɔ ˈgü, ˈö˗ zuʋ̈ˈˈ ˈdhö ˈˈwɩ ˗sü ˈka˗ ˗bha kö ˈö kwa ˗takpa. ˗Wëë ˗ya bɔ kwa ˗ta, ˗yö ˗bɔ ˗a ˗ta ˈpö. ˗A ˗wɔn ˈgü, kwa ꞊mɔɔn˗ ˗bha ˈkwa ꞊bhɛɛ ˈkwa˗ pö: «˗Bhö ü ˗kɔ kpa n ˗ta ꞊dhɛ ü ˈˈɲan ˗dhɛtiidhɛ ˈdhö.» (Ps. 17:8) Kwa ˈˈɲanga ˗yö pë wɔngbɩɩsü ꞊dede ˈka kwa dɔɔ ˗nu ˈwo to ˗an ˗bha. ˈDhɛ ˈˈdhʋ̈, Zoova ˗ya kwa ˗zɔn ö ˈˈɲan ˗dhɛtiidhɛ ˈka kö ˗a ꞊tɛɛ ˗kë ꞊dhɛ pë ˈö˗ pö ˗ni ˈgü «mɛn ˈö ˗ya ˈpa n ˗dhɔkëmɛn ˗nu ˈka, kö ˗ya ˈpa n ˗man pë ˗wɔngbɩɩsü ꞊dede ˈka» ˗a ˈdhö.

7. ˈMën ˗kë ˈkwa dho kwa ˗bha ˈdhaŋ ˗bho Zoova ˗bha ˗dhɔ ˈˈdhiʋ̈sü ˗gɛn ˗gban?

⁷ Zoova ˗ya ˈˈpiʋ̈ kö ˗yö ga kwa ˈgü ꞊dhɛ kwa ˗dhɔ ˗yö ö ˗kë. ˈˈKɛɛ ˗ya ˈwɔn ˗dɔ ˈpö ꞊dhɛ pë ˗nu ˈö ˈkwa bɔ ˗an ˈgü ˈˈdhiʋ̈ ˗be bhë,  ˗wo ꞊mɔɔn˗ ˗bha ˈwo kwa dɔ ˈdudhö ꞊dhɛ kwa ˗dhɔ ˗ya ˗kë. Ɛɛnˈˈ ˈzü ˈwɔn ˈˈgbɩɩ˗ ˗nu ˈwo kwa ˗ta ꞊dɛɛ ˗an ˗wɔn ˈgü, ˈyaa ga ˗sü ˈka kwa ˈgü ꞊dhɛ kwa ˗dhɔ ˗yö Zoova ˗kë. ˈMën dho kwa ˗bha ˈdhaŋ˗ ˗bho ˗a ˈˈdhiʋ̈sü ˗gɛn ˗gban? ˗Kɔ ˈö Zoova ˗yö ˗dhɔ ˗zɔn ˗a ˈka Yesu, ˈˈɲɔn ˗a ꞊troo ˗nu waa mɛn ˈˈpɛpɛ kwa ˗dhɛ, ˗kwaa ˗ga.

ZOOVA ˗YÖ ˗DHƆ ˗ZƆN ˗KƆ ˗KË ꞊DHƐ?

8. ˈMën ˗kë ˈö kun ga ˗sü ˈka Yesu ˈgü ꞊dhɛ ö ˗dhɔ ˗yö ö Dë ˗kë?

⁸ Zoova waa ö Gbö dhɔɔbhaasü ˗wo ˗kwɛ ˈö˗ ˈtɔ ˈyaa ˈdhö ˗a ˗kë wo ˈkwëë˗. ˈˈTʋ̈ŋ ꞊gblɛɛn ˈö ˈˈdhʋ̈ ˗a ˈˈpiʋ̈, ˗dhɔ ꞊dede ˗yö ˗da ˗an ꞊zinŋgü. ˗Mlɛɛn ˈö ˗an ꞊zinŋgü bhë ˗a ˗zɔn ˈka ˈyaa ˈdhö ˈˈkpɔnŋtaadhɛ ˗todhʋ̈sü ˈgü. ˈKwa Matiö 17:5 (NTBL) ˗wo pö, Zoova ˗ya ˗pö ˈˈpuu ˈka ꞊dhɛ Yesu ˗dhɔ ˗yö ö ˗kë. Zoova ꞊mɔɔn˗ ˗bha ˗be ˈö˗ pö «n ꞊zuögludhi ˗wun ˈplɛ [˗yö Yesu] kwɛɛ.» ˈˈKɛɛ ˗yö ˗kun ˗a ˈˈpiʋ̈ kö ˈkwa˗ ˈwɔn dɔ ꞊dhɛ Yesu ˗dhɔ ˗yö ö ˗kë ˈgbɛ. ˗A ˗wɔn ˈgü, ˗ya ˗pö ꞊dhɛ «Mɛ ˈö ꞊nɛ ˈö tɔɔ n Gbö (do ˈö n ˗gɔ) ˈö˗ ˗dhɔ ˗yö n ˗kë.» ˗A ˈˈdhiaa ˗kun Zoova ˈgü, ˈyö sü ꞊dhɛ Yesu ˗yö ˗kun ˗a ˈˈpiʋ̈ kö ˈö ö ˗bha ˗tosɛta nu. (Efɛ. 1:7) Yesu ˗ya ˈwɔn ˗dɔ ˈkpakpadhö ꞊dhɛ ö ˗dhɔ ˗yö ö Dë ˗kë, ˈyaa kun dɔ ˗sü ˈka ˈdudhö ˗a ˈgü. ˗Ya ˗pö ˗gɛnɲan ˈka ꞊va ꞊dhɛ ö ˗dhɔ ˗yö ö Dë ˗kë.—Zan 3:35; 10:17; 17:24.

9. ˗Wo kpö ˗mɛɛn ˗nu ˈwo Zoova ˗bha ˗dhɔ ˈö˗ kë ˈˈɲɔn ˗a ꞊troo ˗nu ˈka ˗a ˗zɔn? ˗A ˈgü ˈˈpʋ. (Wlɔmö 5:5)

⁹ Zoova ˗ya ˗zɔn ˈpö ˈˈɲɔn ˗a ꞊troo ˗nu ˗dhɛ ꞊dhɛ ˗an ˗dhɔ ö ˗kë. (Wlɔmö 5:5 ˗wo pö.) ˗Wo ˗nu ˈwo ˗kë «˗a ˗bha ˈNii˗ ˈö ˈˈdhʋ̈ bha ꞊në kwa pa» ˈka bhë, ˗kwa ˗an ˗ga. ˈSëëdhɛ ˗be do ˗ya ˗pö ˗yö ˗kë ꞊dhɛ «ˈˈyiga ˈö nu kwa ˗ta ˗a ˈdhö.» ˈWɔnzuan ˈö bhë ˗yö ˈˈɲɔn ˗a ꞊troo ˗nu ˗dhɔ ˈö Zoova ˈgü, ˗a ˗zɔn ˗së ˈka. ˈˈƝɔn ˗a ꞊troo ˗nu ˗wa ˈwɔn ˗dɔ ꞊dhɛ ‹wo ˗dhɔ ˗yö ˗Zlan ˗kë.› (Zud. 1) ˗Kɔ ˈwo˗ ˈka wo ˗de ˈgü, bɔmɛn Zan ˗ya ˗blɛɛ ˈö˗ pö: «Kwa ˗dhɔ ˈö˗ ˈˈsinma ˗yö kwa Dë [˗Zlan] ˗kë, ˈö˗ ˗wɔn ˈgü ˈwo kwa ˗dhɛ ˗zianwo ˗a bhang ˗nu bha kaa ꞊dede ˗kaa ˗ga bha.» (1 Zn. 3:1) Zoova ˗bha ˗dhɔ ˈˈdhiʋ̈ ˗yö ˗to ˈˈɲɔn ˗a ꞊troo ˗nu dosɛnŋ ˗ta ˗ee? ˗Abin. Zoova ˗yö ö ˗bha ˗dhɔ ˗zɔn mɛn ˈˈpɛpɛ kwa ˗dhɛ.

10. Zoova ˗bha ˗dhɔ ˗zɔn kwa ˗dhɛ ˗kɔ ˈkpii˗ ˈnën ˗tɔ ˗mën?

¹⁰ Zoova ˗bha ˗dhɔ ˗zɔn ˗kɔ ˈkpii˗ do ˈnën ˗tɔ ˗mën? Kwa ˗gɔ ˗ta ˈdhɔ ˗sü ˗mü. Zoova ˗yö ˗bɔ ˗gɔtadhɔpë ˗ta ˈö ˗dhɔ suu ˈö mɛn gbɛ˗ ˈti˗ kë do ˗a ˗zɔn. (Zan 3:16; Wlɔ. 5:8) Zoova ˗yö ö Gbö ˗wɔngbɩɩsü ˗nu kö ˗yö ga mɛn ˈˈpɛpɛ ˗wɔn ˈgü kë ˈˈdhʋ̈ kö kwa ˗bha ˈwɔn yaa ˗nu ˗bhawɔn ˗yö ˈto, ˈkwa kë ö ˈˈtɔŋdë ˗nu ˈka. (1 Zn. 4:10) Kwa kwa ˗zota ˗ni ˈgü pë ˈö Zoova waa Yesu ˈwo˗ nu kwa ˗wɔn ˈgü ˗a ˈgü, ˗dhɔ ꞊dede ˈwo˗ ˗zɔn mɛn ˈˈpɛpɛ kwa ˗dhɛ bhë, kwa ˗dho ˗a dɔ. (Ga. 2:20) Zoova ˈti kwa ˗gɔtadhɔ dosɛnŋ kö ˈö ö ˗bha ˈtɔŋ˗ ˗nu ˗ya ꞊bhlëë ˈgü. ˈˈKɛɛ gbɔɔdhe ˈö˗ ˗kë ˗dhɔ ˈgü yö ˗mü. Zoova ˗yö Yesu ˈö ˗kë ˗a ˗bha mɛn ˗wɔngbɩɩsü ˈka bhë ˗a ˗nu kö ˈö˗ ˗zɔn ꞊dhɛ kwa ˗dhɔ ˗yö ö ˗kë. ˗Yö ö ˗kwaa ö Gbö ˗zü kö ˗yö saanˈˈ ˈsü ˗yö ga kwa ˗wɔn ˈgü.

11. ˗Gleŋ ˗mɛɛn ˈö ˈkwa˗ sü Jérémie 31:3 ˈgü?

¹¹ Zoova ˈti kwa ˗dhɔ ˈkun ö zuʋ̈ˈˈ ˈˈpiʋ̈ dosɛnŋ, ˗ya ˗bho ö ˈˈdhi ˈö˗ pö kwa ˗dhɛ. (Jérémie 31:3 ˗wo pö.) Zoova ˗yö kwa ˗ɲɔɔn ö ˗bha ˈyö sü ꞊dhɛ kwa ˗dhɔ ˗ya ˗kë. (Deut. 7:​7, 8) Pë ɛɛnˈˈ mɛn ˈˈwɛɛ ˗bha ˈyaa ꞊mɔɔn˗ ˗bha kö ˗yö kwa ˈˈkan ˗dhɔ ˈö ˈˈdhʋ̈ ˗a ˗bha. (Wlɔ. 8:​38, 39) ˗Dhɔ ˈö bhë ˗a ˗wɔn ˈgü, kwa ˗kë kwa ˗de ˈgü ꞊dhɛ? ˗Kwa Psaume 23 ˗wo pö kö ˗kɔ ˈö Davi ˗yö ˗kë ˗a ˈka ö ˗de ˈgü kö ꞊yaa˗ yö ꞊dhɛ ö ˗dhɔ ˗yö Zoova ˗kë ˈö ö ˗zokë ö ˈˈpiʋ̈ bhë, ˈkwa˗ dɔ. ˗Ya ˈgo mü, kö ˗kɔ ˈö ˈkwa dho kë ˗a ˈka kwa ˗de ˈpö ˈkwa˗ dɔ.

ZOOVA ˗BHA ˗DHƆ ˗YA ˗KË ˈÖ ˈKWA ˗KË KWA ˗DE ˈGÜ ꞊DHƐ?

12. ˗Mën ˈö Psaume 23 ˗ya pö?

¹² ˗Bhö Psaume 23:​1-6 ˗wo pö. Psaume 23 ˗yö ˈˈtan do ˈö˗ ˗zɔn ꞊dhɛ kwa ˗dhɔ ˗yö Zoova  ˗kë ˈö ö ˗zokë kwa ˈˈpiʋ̈ ꞊dedewo, ˗a ˈka. ˗A ˗wɔn ˈgü, Davi ˗yö ˗mlɛɛn ꞊dede ˈö kun waa ˈö ˗Maankëmɛn Zoova wo ꞊zinŋgü ˗a ˗wɔn ˗blɛɛ. Zoova ˗bha ˈˈdhiʋ̈süsü ˗yö Davi zuʋ̈ˈˈ ˗kë ˗saa, ˈö Davi ˗ya ˗zɔn ˈpö ꞊dhɛ ö ö ˗zoyö ˗a ˗dhɛ ˈwɔn ˈˈpɛpɛ ˈgü. Davi ˗ya ˈwɔn ˗dɔ ˈzü ꞊dhɛ Zoova ˗dho ˗dhɔ ˗zɔn ö ˗dhɛ yi ˈˈpɛpɛ ˈka, ö ˗bha ˗tosɛta ꞊gban ˈgü. ˈMën Davi ˗blü ˈdhaŋ˗ ˗dho Zoova ˈˈdhiʋ̈ ˗sü ˗bha?

13. ˈMën ˗kë ˈö kun ga ˗sü ˈka Davi ˈgü ꞊dhɛ Zoova ˗dho ö ˗zokë ö ˈˈpiʋ̈?

¹³ «Pë gbɛ˗ ˗wɔn ˈti ˗dho n kë.» Davi ˗yö ˗kë ö ˗de ˈgü ˗së, ˈyö sü ꞊dhɛ Zoova ˗ya ˗bhawɔnyëëpë ˗nu ˈˈɲan ˗bhɔ ˗kplawo. Davi ˗ya ˗yö ˈzü ꞊dhɛ Zoova ˈˈtɔŋdë ˗mü ö ˈka ˈö ö ˈˈdhiaa ˈdhö˗ ˈgü. ˗A ˗wɔn ˈgü, ˗yö ˗kun ga ˗sü ˈka ˗a ˈgü ꞊dhɛ ˈwɔn suu ˈˈoo ˗sü ˈö dho nu ö ˗ta ˗dhɛkpaɔ dhiʋ̈ˈˈ ˈgü, Zoova ˗dho ö ˗zokë ö ˈˈpiʋ̈ ˗kplawo. ˗Yö ˗kun ga ˗sü ˈka ˗a ˈgü ˈzü ꞊dhɛ Zoova ˗bha ˗dhɔ ˈˈpii ˗yö ˈˈgbɩɩ˗ ˈö ˗ʒiö ˗a ˈka ö ˗bha zuʋ̈dhiʋ̈tɛwɔn ˗nu ˗ta. ˗A ˈwɔn ˗dɔ ˗sü ˈö ˈˈdhʋ̈ ˗ya ˗takun ˈö zuʋ̈ˈˈ ˈˈgblü ˗yö ˗dhi.—Ps. 16:11.

14. Zoova ˗yö ö ˗zokë kwa ˈˈpiʋ̈ ˗dhɔ ˈgü ˗kɔ ˗kë ꞊dhɛ?

¹⁴ Zoova ˗yö ö ˈˈtʋ̈ŋ ˗kë kwa ˈgü ˗dhɔ ˈgü. ˗Ya ˗kë ˈˈdhʋ̈ ꞊dedewo yi ˈö ˈwɔn ˈˈgbɩɩ˗ ˗nu ˗wa nu ˗a ˈka kwa ˗ta, ˗a ˈgü. Kwa ꞊dhegblüdhe do ˈwo˗ ˗dhɛ Klɛɛ a ˈö yökë Betɛdhö ˗kwɛ 20 ˈˈpiʋ̈ bhë, ˈdhɛ ˈwɔn ˈˈgbɩɩ˗ ꞊va nu ˗a ˗bha ˈkɔdhigümɛn ˗nu ˗ta, ˗a ˈˈsɩ ˈyaa kun ˗a ˗dhɛ kö ˗yö ˗an ˗takun. ˈˈTrʋʋn ˗yua ˗ya dë ˗kun, ˈwo ˈzlaa˗ ˈnëndhe do bho kwa kpö ˈgü, ˈö˗ ˗bha ˈkɔdhigümɛn ˗nu ˗bha yö ˗yö ꞊shiʋ̈, ˈö go mü ˈö ˗an ˗bha ˈkɔ ˗yö dha ˗an ˗gɔ. Zoova ˗yö ö ˗zokë ˗an ˈˈpiʋ̈ ˗dhɔ ˈgü ˗kɔ ˗kë ꞊dhɛ? Klɛɛ ˗ya ˗pö: «Zoova ˗yö pë ˈˈpɛpɛ ˗kë kö ˈö n ˗man  ˈkɔdhigümɛn ˗nu ˗bhawɔnyëëpë ˗nu ˈˈɲan bhɔ yi ꞊gban ˈka. Zoova ˗yö kwa ˗bhawɔnyëëpë ˗nu ˈˈɲan ˗bhɔ ˗kplawo ˈö ˗ya kë ꞊shiöŋ ˈö ˗ʒiö mü. A n ˗zota ˗kplawo ˈˈtʋ̈ŋ ˗nu ˈö Zoova ˗yö ö ˗zokë ˗a ˈka yi ˈˈpiʋ̈ ˗dhɔ ˈgü bhë, ˗an ˈgü. N ˗zo ˈyaa bhɔ ˗an ˈka toŋtoŋdhö. ˗Ya ˗kë ˈö ˈwɔn ˈˈgbɩɩ˗ ˗nu ˗wa nu yi ˗ta, ˈa Zoova ˗dhɔkë ˗kplawo zuʋ̈gblüdhi ˈka.»

15. ˈMën ˗kë ˈö Davi zuʋ̈ˈˈ ˗yö ˗kë ˗saa? (Kpɔɔˈˈ ˈzü pë ˈˈbin ˗bha.)

¹⁵ «˗Yö n zuʋ̈ˈˈ ˗kë ˗saa.» ˈˈTʋ̈ŋ ˈbha ˗nu ˈka, Davi ˗yö ˗kë ö ˗de ˈgü ˈya˗ ˈwɔn ˈˈgbɩɩ˗ ˗nu waa ˈgüdandhe ˗nu ˈwo nu ˗a ˗ta, ˗an ˗wɔn ˈgü. (Ps. 18:​4-6) ˈˈKɛɛ Zoova ˗bha ˗dhɔ ꞊dede waa˗ ˗bha ö ˗zokë ˗a ˈˈpiʋ̈ ˗sü ˗yö Davi zuʋ̈ˈˈ ˗kë ˗saa. Zoova ˗yö ö ˈˈtɔŋdë ˈö zuʋ̈ˈˈ ˈˈdhiʋ̈ kun ˈˈtɛ ˗ni ˈgü ˈˈdhʋ̈ ˗a ˗sü ˈö dho ˗a ˈka ˗dhɛ ˈö «blëëdhɛ ˗nu» waa «ˈˈyi ˗nu ˈwo mü ꞊va ˗an ˈgü.» ˗A ˗wɔn ˈgü, Davi ˗yö ꞊faan ꞊slɔɔ ˈzü ˈö Zoova ˗dhɔkë zuʋ̈gblüdhi ˈka.—Ps. 18:​28-32.

16. Zoova ˗bha ˗dhɔ ˗yö kwa zuʋ̈ˈˈ ˗kë ˗saa ˗kɔ ˗kë ꞊dhɛ?

¹⁶ ˗Kɔ do ˈö bhë ˗a ˈka ꞊dɛɛ «Zoova ˗bha ˗dhɔ ꞊dede ˈsaa˗ ˈgü, ˈyö kwa suu ˈti ˈgo ˈˈshia ꞊köŋ.» (Lam. 3:22; Kodh. 1:11) Kwa ꞊dhegblüdhe do ˈwo˗ ˗dhɛ Dhashɛdhö, ˗kwaa ˗bha ˈwɔnzuan ˗ga. Kolona virisö ˈˈtʋ̈ŋ ˈgü ˗a ꞊gɔɔn ˗yö ˗kan ˗a ˗bha, ˈö ˗kan ˈpö Zoova ˗bha. ˈMën Zoova ˗ya ˗kë Dhashɛdhö ˗dhɛ? ˗Ya ˗pö: «Zoova ˗ya ˗kë ˈa˗ yö ꞊dhɛ n ˗dhɔ ˗ya ˗kë ꞊dedewo. N ˈˈtɔŋdë ˗nu ˗wo ˈˈtʋ̈ŋ sü ˈwo˗ ˗kë n ˈˈpiʋ̈, ˈwo ˗ bhöpë dhɔ n ˗dhɛ, ˈwo mɛn ˗zogban nɔɔn˗ ˗nu waa Biblö ˈˈɲan ˗sɛŋbɔ ˗nu bɔ n ˗dhɛ, ˈwo ˈˈyɩɩto n ˈˈpiʋ̈, ˈwo˗ pö n ˗dhɛ ꞊dhɛ n ˗dhɔ ˗yö Zoova ˗kë ˈö ö ˗zokë ˗ni ˈgü n ˈˈpiʋ̈. ˗A kë ˗sü kö Zoova ˗yö ˈkɔdhi ˈkpii˗ ˈgümɛn ˗nu ˈö n ˗dhɔ ˗yö ˗an ˗kë ˗a nu n ˗dhɛ bhë, a˗ ˈˈnuɛ ˗bho ˗a ˗bha ˈˈtʋ̈ŋ ꞊gban ˈka.»

17. ˈMën ˗kë ˈö Davi ˈti «ˈˈsuʋ̈ pë ˈbha ˗gɔ»?

¹⁷ «N ˈti ˗dho ˈˈsuʋ̈ pë ˈbha ˗gɔ, ˈyö sü ꞊dhɛ ü n ˈˈpiʋ̈.» ˗Ya kë ꞊shiöŋ Davi ˗bha ˗tosɛta ˗yö ˗dɔ ga ˗yɛ ˈˈdhiʋ̈, ˈö˗ ˈyɔɔ˗ ˗nu ˗wo kë ꞊va. ˈKö ˗kë ˈˈdhʋ̈ Zoova ˗bha ˗dhɔ ˗ya ˗kë ˈö Davi ˗yö ˗kë ö ˗de ˈgü ˗së, ˈö˗ yö ꞊dhɛ Zoova ˗yö ö ˗takpa. Davi ˗ya ˈwɔn ˗dɔ ˈzü ꞊dhɛ Zoova ˗kun ö ˈˈpiʋ̈ ˈwɔn ꞊gban ˈgü. ˗A ˗wɔn ˈgü, ˗ya ˗zogban. ˗Yö ˈˈtan ˗bho ˈö˗ pö: «[Zoova] ˗yö ˗nu n ˗dhɛ n ˗man ˈˈsuʋ̈wɔn ˈˈpɛpɛ ˈgü.» (Ps. 34:4) ˗A ˗dhɛ ˗mü kö ˈˈsuʋ̈ ˗yö Davi kë, ˈˈkɛɛ Zoova ˗bha ˗dhɔ ˈsaa˗ ˈgü ˈˈsuʋ̈ ˗yö ˗go ˗a ˗ta.

18. ˈˈSuʋ̈ ˗ya ˗da kwa ˈgü, ˗kɔ ˗mɛɛn ˈö Zoova ˗bha ˗dhɔ ˗yö kwa ˗zogban ˗a ˈka?

 ¹⁸ ˈKwa˗ ˈwɔn dɔ ꞊dhɛ kwa ˗dhɔ ˗yö Zoova ˗kë, kwa ꞊faan ˗yö ˗kë ꞊va ˈˈsuʋ̈wɔn ˗nu ˈgü ˗kɔ ˗kë ꞊dhɛ? ˗Yödhiʋ̈ do ˈwo˗ ˗dhɛ Suzi ˗yö ˗kɔ ˈö waa ö ꞊gɔɔn ˈwo ˗kë ˗a ˈka wo ˗de ˈgü kö ˗an gbö ˗ya ˈˈkan Zoova ˗bha ˗a ˗blɛɛ, ˈö˗ pö: «ˈWɔn ˈˈgbɩɩ˗ ˈbha ˗ya ˈˈkan kwa ˈgü, ˗yö ˗mën kwa ˈka ꞊dedewo ˈö ˈpë ˈkwa dho ˗a kë ˈkwaa dɔ. ˈˈKɛɛ Zoova ˗bha ˗dhɔ ꞊dede ˈsaa˗ ˈgü yi ˗dho ˈyi ˗kë yi ˗de ˈgü ˗së, ˈyi˗ yö ꞊dhɛ Zoova ˗yö yi ˗takun.» Dhashɛdhö ˈkwa˗ ˗wɔn ˗blɛɛ ꞊klöö˗ yö, ˗ya ˗pö: «Gbeŋ do ˈka ˗wëë ˗yö ˗bhɔ n ˗ta ꞊dedewo ˈö ˈa ꞊bhɛɛ Zoova ˗dhɛ ˈˈgbʋ ˈka n ˗wo ˗ta. ˈDhɛ ˗kë ˈˈdhʋ̈ a˗ ˗yö ꞊dhɛ ˗yö n zuʋ̈ˈˈ ˗dhuaa, ˈö n zuʋ̈ˈˈ ˗kë ˗saa ꞊dhɛ ˗kɔ dhebɔ ˗yö ö ˗bha ˈnën ˈˈpuu zuʋ̈ˈˈ ˗kë ˗a ˈka ˗saa ˗a ˈdhö, ˈa yi ˗zë. N ˗zo ˈti ˗dho bhɔ ˈwɔn ˈö bhë ˗a ˈka toŋtoŋdhö.» Mɛn zii do ˈwo˗ ˗dhɛ Tasɔsö ˗yö ˗kwɛ ˗yiishiö ˗kë kaso ˈgü ˈyö sü ꞊dhɛ ˈyii ˈˈwɩ ˗kë ˈˈsɔdha ˈka ˗sü ˗bha. ˗Kɔ ˗mɛɛn ˈö Zoova ˗bha ˗dhɔ waa˗ ˗bha ˗zokë mɛn ˈˈpiʋ̈ ˗sü yö ˗a ˈka? -Ya ˗pö: «Zoova ˗yö n ˗bhawɔnyëëpë ꞊gban ˈˈpɛpɛ ˈˈɲan ˗bhɔ ˈö ˗ʒiö ˗a ˈka mü. ˗A ˗wɔn ˈgü, n ˗man ˗zoyö ˗a ˗dhɛ ˗sü ˗gɛn ˗yö ˗gban ꞊dedewo. Zoova ˗yö ˗bɔ ö ˗bha ˗zuu ˈˈslʋ̈ʋ̈slʋ̈ ˗ta ˈö n zuʋ̈ˈˈ ˈˈgblü dhi n ˗bha ˈwɔn ˈˈgbɩɩ˗ nu ˈgü. -Yö n ˗zogban ꞊dhɛ ˈman yökë Zoova ˈˈpiʋ̈, a˗ ˗bha ˗dhɔ ˗yö. ˈDhɛ ˗kë ˈˈdhʋ̈, a ˗kë ˈˈtʋ̈ŋ ꞊gban ˈgü ˗yodhiʋ̈ ˈka kaso ˈgü mü.»

˗KWA ꞊ƝƆƆN KWA ˗BHA ˗ZLAN ˈÖ KWA ˗DHƆ ˗YA ˗KË ꞊DEDEWO BHË ˗A ˗BHA

19. (1) ˈKwa˗ ˈwɔn dɔ ꞊dhɛ kwa ˗dhɔ ˗yö Zoova ˗kë, ˗kɔ ˗mɛɛn ˈkwa dho bhɛɛˈˈ ˗a ˈka? (2) Zoova ˗bha ˗dhɔ ˗kë mɛnbhɩɩdhe ˗nu ˈka ˗kɔ ˗mɛɛn ˈö ü ˗dhɛ ˗së ꞊dedewo? (Kpɔɔˈˈ ˈkɔnën « ˗Wo ˗nu ˈwo kwa ˗takun kö ˈkwa Zoova ˗bha ˗dhɔ ꞊dede yö» ˗bha.)

¹⁹ ˗Bɔagüwɔn ˗nu ˈwo bhë ˗wa ˗zɔn ꞊dhɛ Zoova ˗yö «[˗Zlan] ˈö mɛbhɩɩdhe ˗dhɔ ˗ya ˗kë» ˗a ˈka. (2 Ko. 13:11) ˗Kɔ ˈö ˈkwa˗ ˗bha do do ˈka, ˗yö ö ˈˈtʋ̈ŋ ˗kë kwa ˈgü. ˗Yö ga ˗sü ˈka kwa ˈgü ꞊dhɛ «mɛn ˈö ö ˗zo yö Zoova ˗dhɛ, ˗yö ö ˗zoto ˗a ˈˈpiʋ̈ ˗dhɔkaadhe ꞊dede ˈgü.» (Ps. 32:10) ˈKwa kwa ˗zota ˗kplawo ˗kɔ ˈö ˗dhɔ ˗zɔn ˗a ˈka kwa ˗dhɛ ˗a ˈgü kwa ˗dho ˗a yö ꞊dhɛ ˗yö ö ˗zokë kwa ˈˈpiʋ̈ ꞊dedewo, ˈö ˈkwa˗ yö ˈzü ꞊dhɛ ˗yö kwa ˈˈsuee. Kwa ꞊mɔɔn˗ ˗bha ˈkwa ꞊ɲɔɔn ˗a ˗bha bhɛɛsü ˈka kö ˈkwa˗ pö ˗a ˗dhɛ ꞊dhɛ kwa ˗bhawɔn ˗yö ˗a ˗bha dhɔ ˗bha ꞊dedewo. Kwa ꞊mɔɔn˗ ˗bha ˈzü ˈkwa kwa ˗bha zuʋ̈dhiʋ̈tɛwɔn ˗nu ꞊blɛɛ ˗a ˗dhɛ ˈyö sü ꞊dhɛ ˈkwa˗ ˈwɔn ˗dɔ ꞊dhɛ ˗yö ˗dho kwa ˗takun.—Ps. 145:​18, 19.

20. Zoova ˗bha ˗dhɔ ˗yö kwa ˗ɲɔɔn ˗a ˈˈsuee ˗kɔ ˗kë ꞊dhɛ?

²⁰ ꞊Dhɛ ˗kɔ ˈö ˈˈnɛnnɛn ˈˈtʋ̈ŋ ˈgü ˈkwa ꞊ɲɔɔn ˗a ˈka ˈˈwo ˗bha ˗a ˈdhö, ˗kwa ꞊ɲɔɔn ˈpö Zoova ˗bha ˗dhɔ ꞊dede ˗bha. Zoova ˗bha ˗dhɔ ˈˈpii ˗yö ˈˈgbɩɩ˗ ˈö ˗së ꞊dedewo. ˈDhɛ ˈˈdhʋ̈, ˗kwa kwa ˗kɔ ˗ya ˗a ˗gɔ kwa ˗bha ˗tosɛta ˈgü. Mɛn ˈˈpɛpɛ kwa ꞊mɔɔn˗ ˗bha ˈkwa kwa ˗kɔ ˗ya ˗a ˗gɔ, ˈkwa˗ pö: «Zoova ˗dhɔ ˗yö n ˗kë!»—Ps. 116:1.