Kwa ꞊dhegblü ˗nu ˈwo kun Betɛdhö bhë ˗wo yökë ˗kwɛ do ˈˈpiʋ̈ kö ˈwo wo ˗bha ꞊ladio ˈkɔ dɔ Statɛnö, Ailandö Nuyɔɔkö ˈˈpian ˗ta. ˗A ꞊ladio ˈö ˈˈdhʋ̈ ˗wo ˗kun ˗a ˗dhɛ ˗ni ˈgü WBBR. ˈˈDhü ˗nu ˈwo kun mü ˗wo ˗an ˗bɔ ˈwo ˈkɔ ˈkpii˗ do dɔ yökëmɛn ˗nu wɔdhɛ ˈka, ˈwo˗ do ˈbha dɔ ꞊ladio ꞊kwɛɛ˗ ˗nu ˗lodhɛ ˈka. ˗Dhɛ ˈwo wo bo yö ˗nu ˈwo ˈˈdhʋ̈ ˗an ˈka, ˗wo ꞊ladio ꞊kwɛɛ˗ ˗nu ˗ya ˈkwëë˗ ˈö ˗ya ˈˈwɩ ˗sü ˗bha. ˈˈKɛɛ ˈwɔn ˈˈgbɩɩ˗ ˈbha ˗nu ˗wo ˗kun mü ˈö˗ ˗an dua ˈdhö ˗mü kö ˗wo ˗an ˈˈɲan bhɔ.

꞊Ladio ˗bha antɛnö ˈkpii˗ dɔ ˗sü ˗kun an ˗kɔa ˈˈgbɩɩ˗ ꞊dedewo. Antɛnö ga ˈö ˈˈdhʋ̈ ˗a duaan ˗kun mɛtrö 91 ˈka ˈö ˗an dua ˈdhö ˗mü kö ˗wa dɔ ˈˈdhü ꞊plɛ ˈö ˗an duaan ˈdhö mɛtrö 61 ˈka, ˗an ꞊zinŋgü. ˗A ˈgüdan ˗sü ˗blɛɛsü ˈti ˈwɔn ˈkun. ˈˈKɛɛ Zoova ˗bha ˗takundhe ˈsaa˗ ˈgü, ˗yö ˗dho ˈö ˗ɲan ˗an ˗gɔ. Kwa ꞊dhegblü do ˈwo˗ ˗dhɛ Kalvinö Prosɛ ˈö yö ˈö bhë ˗a ˗kë ˈpö, ˗ya ˗pö: «Yi ˗bha antɛnö ga dɔ ˗sü ˗blɛɛsü ˗yö ˗ɲan ˗be, yi ˗dho yi ˗de ˗gɔn ˗a ˗wɔn ˈgü.» Kwa ꞊dhegblü ˗nu ˗wa ˗yö ꞊dhɛ Zoova ˈnën wo ˗takun ˈö ˈwo ˗mɔn yö ˈö bhë ˗a ˗bha. ˈKö ˗kë ˈˈdhʋ̈, ˈwɔn ˈˈgbɩɩ˗ do ˈˈwɛɛ ˗kun mü.

˗A ˈˈtʋ̈ŋ ˈö ˈˈdhʋ̈ ˗a ˈka, ꞊ladio ˈˈwɩ ˗sü ˗kun pë ꞊dɛɛ ˈka. ꞊Kwɛɛ˗ ˗nu yi ˗dho ꞊ladio ˈˈwɩ ˗an ˈka bhë, ˗an ˈdhɔ ˗sü ˈyaa kun ˈˈplëëplë. Kwa ꞊dhegblü ˗nu ˗wo mɛn ˗wo ˗kë ˈˈgbɩɩ˗ ˗pë ˈö˗ watö ˗mɔn 500 ˗bha ˈö mɛn ˈbha ꞊yaa˗ ˗yökë ˈsaadhö, ˗a ꞊slɔɔ. ˗Wo wo ˗ta ˗yö mikro ˈdhɔ ˗sü ˗bha ˈwo ˈwɔn ˗blɛɛ telefɔnö ˈgü. Fevlie ˈˈsu ˈgü gbeŋyi do ˈka, kwa ꞊dhegblü ˗nu ˗wo ˗we ˗a ˗bha kö ꞊kwɛɛ˗ ˗nu ˈwo ˈˈdhʋ̈ ˈwo ˗an ˈˈwɩ ˗su ˈgüdan. ˗An ˗bhawɔn ˗yö ꞊ladio ˈˈwɩ ˗sü ploglamö ˗bha. ˗A ˗wɔn ˈgü, ˗wo ˗ya ˗Gblüdëdhɛ ˈˈtan bho ˗sü ˗bha. Kwa ꞊dhegblü do ˈwo˗ ˗dhɛ Ɛnɛsö Lowe ˗ya ˗pö ꞊dhɛ ˈdhɛ zakanmɛn Lutɛɛfɔdö b ˗yö ˈˈtan  ˈö bhë ˗a man ꞊ladio ˈgü ˈˈkidhʋŋ 25 ˗naan ꞊taa, ˗yö wo ˗dhɛ telefɔnö ˈˈdhiʋ̈.

Kwa ꞊dhegblü Lutɛɛfɔdö ˗ya ˗pö: «Ka ˗zuö ˈö bhë ˗a ˈduannu. Ka ˗we ꞊dhɛ gioonën ˗nu ˈdhö!» ˈLëë˗ kwa ꞊dhegblü ˗nu ˗kun, ˈwo to mü ˈwo ploglamö ˈduannu. ˈˈKɛɛ ˗yö ˗kun ga ˗sü ˈka ˗an ˈgü ꞊dhɛ ˈwa ˗mɔn ꞊ladio ˈˈwɩ ˗sü ˗bha.

˗Kwɛ 1924 Fevlie 24 ˈgü, ꞊ladio ˈˈwɩ ˗sü ˗blɛɛsü ˈka kwa ꞊dhegblü Lutɛɛfɔdö ˗ya ˗pö ꞊dhɛ ꞊ladio ˈö bhë kwa ˗dho ˗a ˈsü «kö ˈkwa kwa ˗bha Gbludë Yesu ˗bha yökë ˗a ˈka.» ˗Ya ˗pö ˈzü ꞊dhɛ «꞊ladio ˈö bhë ˗yö ˗dho mɛn ˈˈpɛpɛ ˗takun kö ˗wo Biblö ˈgüman, kö ˗wa ˈwɔn dɔ ꞊dhɛ ˈˈtʋ̈ŋ ˈö ˈkwa˗ ˈgü yö ˗a ˗wɔn ˗yö ˈˈgbɩɩ˗.»

꞊Ladio ˈˈwɩ ˗sü ˗blɛɛsü ˈö ˈˈdhʋ̈, ˗yö ˗ɲan ꞊dedewo. ˗Kwɛ 33 ˈnën ˈkwa˗ ˗kë Zoova ˗bha ꞊Gbɛkiö ˗nu ˗bha ploglamö ˈˈwɩ ˗sü ˗bha.

˗Kwɛ 1924 Ʒue ˈˈsu ˈgü, Biblö ꞊klaŋ ˗nu ˗wo ˗bhɔkwëë ˈkpii˗ ˗kë Kolɔnbisö Owayo ˈˈpian ˗ta. Mɛn ˗nu ˗wo ˗go ˈˈkpɔnŋtaadhɛ ˗todhʋ̈sü ˈgü ˈwo dho mü kö ˈwo wo ˈˈtʋ̈ ˈto ˈˈdhɛɛtadhiaŋ˗ ˗nu ˗bha. Laabö ˗wo, ꞊Glee˗ ˗wo, ˈˈKwi ˗wo, ˈˈLüman ˗wo, Glɛkö ˗wo, Itali -wo, Ɔngri ˗wo, Lituani ˗wo, Polonɛ ˗wo, Rusi ˗wo, Sikadinavö ˗wo, waa Uklɛnö ˗wo ˗an ˈgü. ˗Ya ˈgo mü, mɛn ˗nu ˗wo wo ˈˈtʋ̈ to ˈˈdhɛɛtadhiaŋ˗ ˗bha ꞊ladio ˈgü ˈö kwa ꞊dhegblü ˗nu ˗wa ˗pö zunalö ˗bɛnzëmɛn ˗nu ˗dhɛ ˗wo ˈwɔn ˈö ˗gban ˗bhɔkwëë ˈö bhë ˗a ˗bha ˗a blɛɛˈˈ ˗dhɛkpaɔyi ˈˈpɛpɛ ˈka.

Ʒue 24 ˈgü ˈˈmaandhoowayi ˈka, ˈmɛn ˈwo ˗ʒiö 5.000 ˗ta ˗wo ˗zlanwopö ˈpö ˈˈkwipö ˈö bhë ˗a ˈgü. ˗Wo ˈsëëdhɛ ˗be 30.000 ˗nu mɛn ˗nu ˗dhɛ. ˈWo mɛn ˈˈgblü ꞊va ꞊klaŋkë Biblö ˈka ˗sü züdɔ. ˈˈGlaadhiʋ̈ ˗tɔn ˗yö yi ˈö bhë ˗a ˗dhɛ: «Mɛn zuʋ̈ˈˈ ˈˈgblü dhi ˗yi ꞊dede ˈö ˗bhɔkwëë ˈkpii˗ ˈgü.»

Ʒue 25 ˈgü ˈˈmaandhooyi ˈka, kwa ꞊dhegblü Lutɛɛfɔdö ˗bha ˈˈdhɛɛtadhiaŋ˗ ˈö˗ zë ˗a ˈgü ˗yö ˈsëëdhɛ do ˈö zadɔ ˗zlanwo ˗gɔdhiʋ̈mɛn ˗nu ˗bha, ˗a ˗wo ˗pö ˗zogbandhe ˈka. ˗Ya ˗pö ꞊dhɛ «ˈˈsɛgɔdhiʋ̈mɛn ˗nu, ˗zlanwo ˗gɔdhiʋ̈mɛn ˗nu waa mɛn ˗nu ˈwo ˈˈdhoodɔsü ˗gɔdhiʋ̈ bhë ˗wo mɛnbhɩɩdhe ˗nu ˗kan gagade ˈö ˗gban ˗Zlan ˗bha ˗Gblüdëdhɛ ˗bha ˈö dho ˈwɔn ˗së kë ˗an ˗dhɛ bhë, ˗a dɔ ˗sü ˗bha.» ˗Ya ˗pö ˈzü ꞊dhɛ mɛn ˗nu ˈwo bhë «˗wo wo ˗kɔ ˗da Sosiete dɛ nashɔn ˗dhɛ, ˈwo˗ pö ˗Zlan ˈnën ˈö ö ˗kɔ ˗yɛ ˗a ˗bha kö ˗yö ˈˈsɛtadhɛ ꞊kɔɔn˗ ö ˗bha ˈka.» Biblö ꞊klaŋ ˗nu ˗bhawɔn ˗yö ˈgüdɔgbɩɩsü ˗bha kö nɔɔn˗ ˈö bhë ˗wa pö mɛn ˗nu ˗dhɛ.

꞊Taabha, ˈwɔn ˈö ˗gban ˗bha ˈˈGlaadhiʋ̈ ˗tɔn ˗ya ˗blɛɛ ˈö˗ pö: «˗Bhɔkwëë ˈkpii˗ ˈö kun Kolɔnbusö bhë ˗yö kwa ꞊dhegblü ˗nu ˗bha ˗zoyödhe ˗gɛn ˗gban  ꞊dedewo. ˈKö ˗kë ꞊dhɛ ˗wo ˗gban ˗an ˗gɔ, ˗yö ˗an ꞊faanmën kö ˗wo ˗zlanwopö.» Leo Klausö ˈö kun ˗bhɔkwëë ˈkpii˗ ˗ta, ˗ya ˗pö: «˗Dhɛ ˈö ˗bhɔkwëë ˈkpii˗ ˗yö ɲën, nɔɔn˗ ˈö bhë yi˗ ˗wo ˗pö yi ꞊sɔbhɛɛ ˈka yi ˗bha ˈˈyasa ˗nu ˈgü.»

Ɔtɔblö ˈˈsu ˈgü, Biblö ꞊klaŋ ˗nu ˗wo ˗ya ˈsëëdhɛ ˈˈpɛn ˈö kwa ꞊dhegblü Lutɛɛfɔdö ˗yö ˗zlanwo ˗gɔdhiʋ̈mɛn ˗nu zë za ˈka ˗a ˈgü bhë, ˗a ˈˈmliɲɔn ꞊va ˗gblü ˗sü ˗bha. ˈˈKwipö ˈnën ˈdɛdɛ ˈwo˗ ˗dhɛ Oklaoma Zeta zuni bhë ˗a ˈgü, ˗dhɛ ˈö Flankö Ʒɔsɔnö ˗yö ö bo ˈsëëdhɛ ˈˈpɛn ˗nu ˗gblü ˗sü ˈka, ˗yö ˗kun ˈö ꞊dhegblü ˗nu ˈˈdhiʋ̈ ˈˈgan ˗ni ˈgü minitö 20 ˈˈpiʋ̈. ˗A dua ˈyaa ˗mü kö ˗yö ˈto ˗dhɛ ˈˈgbɛɛdhɛ ˈgü ˈyö sü ꞊dhɛ mɛn ˗nu ˈwo ˈˈkwipö ˈö bhë ˗a ˈgü, ˈö ˈwɔn ˗ya ˗shiö ˗an ˗dhɛ ˗wo ˗kun ˗a mɛɛnˈˈ ˗ni ˈgü ˗a ˗bha ˗zlanwopösü ˗wɔn ˈgü. Ʒɔsɔnö ˗yö ˗dho ˈö ˗bin ꞊sua ˗zlanwo ˈkɔ do ˈgü. Mɛn ˈbha ˈti kë mü. ˗A ˗wɔn ˈgü, ˗yö ˈsëëdhɛ ˈˈpɛn ˗da pɛɛ ˗bha Biblö ˈgü, ˈö˗ ˈbha ˗nu ˗wɔ ˈpö mɛn ˗nu ˗yadhɛ ˗bha ˈö yö ˈˈkpɛnŋ. ˗Dhɛ ˈö ˗kë ꞊dhɛ ˈˈtʋ̈ŋ ˗kun ˗a ˗gɔ, ˗yö ˗dho ˈzü ˈö˗ ˗kë ˈˈdhʋ̈ ꞊sua ˗zlanwo ˈkɔ ꞊plɛ ˈbha ˈgü.

Flankö ˗yö ˗dho ˗bia ˈka ˗dhɛ ˈö waa ö ꞊dhegblü ˗nu ˈwo dho ˗kpan ˗a ˗bha wo ˈkwëë˗ bhë ˗a ˈgü, ˈö dho ˈzü ˈö ˗bin ˈˈwo yi ˈˈdhoodɔdhɛ ꞊zlöö ˈö ˗dhɛ ˗ga mɛn ˗nu ˈwo kun ˗a mɛɛnˈˈ ˗ni ˈgü ˗an ˗wɔn ˈgü. ˗Wo ˗nu ˈwo bɔ ˗a ˈˈsuee, ˈˈkɛɛ ˗wo ˈti˗ yö. ˗A ˗dhɛ ˈti ꞊gwëë ˈö˗ ꞊dhegblü ˗nu ˈwo kun ˗zlanwopö ˗ni ˈgü ˗a ˈˈsuee ˈwo nu ˗a ˈˈpiʋ̈ ˈwo ˗ʒiö.

Kwa ꞊dhegblü nu ˈwo ˈˈdhʋ̈ ˗a mɛn do ˗ya ˗pö: «˗Dhɛ yi ˈdho ˗ni ˈgü yi ˗bɔ ꞊sua ˗zlanwo ˈkɔ ˗nu ˈwo ˈˈdhʋ̈ ˗an ˈˈdhiʋ̈. Yi ˗kpan mɛn ˗nu ˈwo ˗mɔn 50 ˗bha ˗an ˗bha kö ˗wo ˈsëëdhɛ ˈˈpɛn ˗nu ˈwo ˈˈdhʋ̈ ˗an ˗wo pö ˗ni ˈgü, ˗wa ˗zɔn ˗ni ˈgü ˈpö wo ˗bha pɛɛ ˗dhɛ. Yi ˗to mü ˈyi ˗ʒiö kö ˈwɔn ˈya ˗dho yi ꞊slɔɔ. ˈˈKɛɛ yi Zoova ˈˈnuɛ ˗bho ˗a ˗bha yi ˗takunsü kö ˈyi˗ ˗bha nɔɔnwo pö bhë ˗a ˗bha. Yi˗ ˈˈnuɛ ˗bho ˈzü ˗a ˗bha yi ˗takpasü kö mɛn ˗nu ˈwa ˗dho yi ˈkun ˈpö ˗a ˗bha.

Biblö ꞊klaŋ ˗nu ˈwo kun ˈˈsɛ ˈˈwɛɛ ˗nu ˈgü, ˗wo ˗zlanwopö wo ꞊sɔbhɛɛ ˈka ꞊dhɛ ˗kɔ ˈö bhë ˗a ˈdhö ˈpö. Flansö ˈˈdhuŋ ꞊ʒiaan, kwa ꞊dhegblü do ˈwo˗ ˗dhɛ Zozɛfö Klɛtö bhë, ˗yö ˗zlanwopö ˈˈsënŋ ˈˈpɔn ˗mɛn ˗nu ˈwo kun Polonɛ ˈka ˗an ˗dhɛ. ˗Wo wo ˗kɔ ˗yɛ n ˗bha kö ˈˈdhɛɛtadhiaŋ˗ ˈö ˗gɔ ˗kë «˗A yi ˈyaa mü ꞊gblɛɛn ˈzü kö gamɛn ˗nu ˗wo ˗buö» bhë ˈa˗ zë. ˈDhɛ kwa ꞊dhegblü ˗nu ˗wo mɛn ˗dhɛ ˗a ˈka ˈsëëdhɛ ˗gblü ˈˈkwipö ˈö bhë ˗a ˈgü, pɛɛ ˈö kun mü ˗ya ˗pö ö ˗bha ˗zlanwogümɛn ˗nu ˗dhɛ ˈwa ˗dho nu ˗a ˗ta. Mɛn gbɛ˗ ˈti˗ ˗wo ˗ya ꞊bhlëë ˈgü, ˈyö sü ꞊dhɛ ˈmɛn ˈwo ˗mɔn 5.000 ˗bha ˗wo ˗nu ˈwo wo ˈˈtʋ̈ to ˈö pɛɛ ˗yö ˗kë ˗an ˈˈpiʋ̈ mü. Kwa ꞊dhegblü Klɛtö ˗yö pɛɛ ˗dhɛ kö ˗yö ö ˗bha ˗zoyödhe ˗wɔn blɛɛˈˈ, ˈˈkɛɛ ˈyö pɛɛ ˈti ˈˈwɩ ˗a ˗bha. ˗Dhɛ ˈö Klɛtö ˗yö ö bo ˈö ˈsëëdhɛ ˈˈpɛpɛ ˈö kun ˗a ˗gɔ ˗a nu mɛn ˗nu ˗dhɛ ˈyö ˗tɔ ꞊dhɛ ˗wo ˗kun ˗a ˈˈpiʋ̈ kö ˈwɔn ˈö ˗gban ˗Zlan ˗bha ˈwo˗ dɔ.—Amos 8:11.

Kwa ꞊dhegblü ˈwo˗ ˗dhɛ Blaɔnö ˗yö ˗dho nɔɔn˗ ˗së ˗pö ˈˈsɛ ˈwo˗ ˗dhɛ ˗ni ˈgü ꞊dɛɛ Gana bhë ˗a ˈgü, Aflikö. Mɛn ꞊vadhɛ ˗wo gagade ˗man ˈyö sü ꞊dhɛ ˗yö ˈˈdhɛɛtadhiaŋ˗ ˗nu ˗zë, ö kwa ˗bha ˈsëëdhɛ ꞊va to ˗an ˗gɔ. Zan Blasɔnö ˈö kun ꞊blɛdhɛ ˈˈdhoodɔ ˗sü ˗yö draanˈˈ ˗ni ˈgü bhë ˗yö ö ˈˈtʋ̈ ˗to kwa ꞊dhegblü Blaɔnö ˗bha ˈˈdhɛɛtadhiaŋ˗ ˗nu ˗bha ˈpö, ˈö˗ yö ꞊dhɛ ˈya gagade ꞊slɔɔ. ˗Ya ˗pö: «N zuʋ̈ˈˈ ˈˈgblü ˗yö ˗dhi ꞊dedewo ˈa ˗ya ˗a ˗wɔn blɛɛˈˈ ˗sü ˗bha n ˗züzü yi ˗bha ꞊klaŋ ˈkɔɔdhö.»

꞊Klaŋwo ˈö ˗kë ˗Zlan ˗yö ö ˈkoodhö ˗yaaga ˈka bhë, ˗dhɛ ˈö Zan ˗ya yö ꞊dhɛ ˈyaa Biblö ˈgü, ˗yö ˗dhö ˈö pɛɛ do dhɛɛˈˈ kpɔ ˗a ˈka ö ˗bha ˗zlanwo ˈkɔɔdhö. ˈWɔn ˗yö ˗shiö pɛɛ ˗dhɛ ˈö ˗gbla ˈö˗ pö: «Kletiɛn ˈyaa ˗mü ü ˈka, Dügɔmɛn ˗bha mɛn ˗mü ü ˈka, ˗bhö ʒiö!»

ˈDhɛ Zan ˗lo ˈkɔɔ, ˗yö ˈsëëdhɛ ˗bɔ pɛɛ ˈö ˈˈdhʋ̈ ˗a ˗dhɛ ˈö˗ pö ˗yö nu kö ꞊klaŋwo ˈö ˗kë ˗Zlan ˗yö ö ˈkoodhö ˗yaaga ˈka bhë, ˗ya ˈgü ˈˈpʋ mɛn ˗nu  ˗dhɛ. Pɛɛ ˗ya ˗pö Zan ˗dhɛ ˗yö ˈdho ö ˗bha famasi ꞊klaŋgɔmɛn ˈkpii˗ ˈˈpiʋ̈. ꞊Taabha, ˗a ˗bha ꞊klaŋgɔmɛn ˗ya dhɛɛˈˈ ˗kpɔ ꞊dhɛ ˗ya ˈsëëdhɛ bɔ pɛɛ ˗dhɛ ˗ee?

Zan ˗ya ˗yɔ ˗bɔ ˈö˗ pö: «꞊Ii.»

꞊Klaŋgɔmɛn ˗ya ˗pö Zan ˗dhɛ ˗yö ˈsëëdhɛ bɔ pɛɛ ˗dhɛ kö ˗yö ˗bhawɔntodhe ˗dhɛ ˗a ˗gɔ. ˈDhɛ ˗kë ˈˈdhʋ̈ ˈyö Zan ˗ya pö pɛɛ ˗dhɛ:

«Gɔndë, n ˗man ꞊klaŋgɔmɛn ˗ya ˗pö ˈa ˈsëëdhɛ bɔ ü ˗dhɛ kö ˈa ˗bhawɔntodhe ˗dhɛ ü ˗gɔ. ˈSëëdhɛ ˈö ˈˈdhʋ̈ ˈnën ˈa ˗bɛnzë ˗ni ˈgü yö. ˈˈKɛɛ ü dua ˗mü kö ˈü˗ ˈwɔn dɔ ꞊dhɛ ꞊klaŋwo ꞊suasü ˈnën ˈü˗ ˗zɔn mɛn ˗nu ˗dhɛ.»

˗Yö ˗mën ꞊klaŋgɔmɛn ˈka ˈö˗ pö Zan ˗dhɛ: «Blasɔnö, pë ˈö ü dua ˈdhö ˗mü kö ˈü˗ ˗bɛnzë ˈnën bhë ˗ee?»

ˈYö Zan ˗ya pö: «꞊Ii, n ˗gɔmɛn pë ˈa˗ ˈˈpiʋ̈ kö ˈa˗ ˗bɛnzë ˈyö bhë.»

«꞊Klaŋgɔmɛn ˗ya ˗yɔ bɔ ˈö˗ pö: «Ü ˗dho ˈgo ꞊klaŋkɔɔdhö. ˈBha ˈwɔn yaa blɛɛˈˈ ˈˈsɛgɔdhiʋ̈mɛn ˗nu ˗bha pɛɛ ˈka, ü ˈti ˗dho ˈto ˗an ˗bha ꞊klaŋkɔ ˈö yö ˗a ˈgü.»

ˈYö Zan ˗ya pö: «N ˗gɔmɛn ˈbha yi ꞊klaŋkë pë ˈbha ˈka yi ˈti˗ ˈgüman, yi dua ˈyaa ˗mü kö ˈyi ü dhɛɛˈˈ ˈkpɔ ˗ee?»

ˈYö ꞊klaŋgɔmɛn ˗ya pö: «Ka dua ˗mü.»

ˈYö Zan ˗ya pö: «˗Gɔmɛn, pë ˈö˗ kë ˈyö bhë. Gɔndënën ˈö bhë ˗yö ˗kun yi ꞊klaŋkë ˗ni ˈgü Biblö ˈka, ˈa dhɛɛˈˈ kpɔ ˗a ˗gɔ. ꞊Ya kë ꞊dhɛ ˗yö ˈti ˗mɔn ˗a ˗yɔ bɔ ˗sü ˗bha, ˈmën ˗kë ˈa dho ˈsëëdhɛ bɔ kö ˈa bhɛɛˈˈ ˗a ˗dhɛ?»

Blasɔn ˈti ˗bhawɔntodhe ˗dhɛ pɛɛ ˗gɔ, ˈˈkɛɛ ˗yö ˗to ö ˗bha ꞊klaŋkɔ bhë ˗a ˈgü.

ˈˈGlaadhiʋ̈ ˗tɔn ˗yö kwa ˗bha yö ˗wɔn ˗blɛɛ ˈö˗ pö: «꞊Dhɛ Davi ˈdhö, kwa ꞊mɔɔn˗ ˗bha ˈkwa˗ pö: ‹Ü ˗dho ˗gblü ˗gɔn ˗a ˈka ꞊faan nu n ˗dhɛ.› (Ps. 18:39) ˗Kwɛ ˈö bhë ˗yö ˗kun mɛn ꞊faanmën ˗kwɛ ꞊dede ˈka, ˈyö sü ꞊dhɛ kwa Dëmɛn ˗kɔ ˗yö ˗kun ˈwɔn ˈö bhë ˗a ˈgü. ˗A ˗dhɔkëmɛn ˗nu ˈwo ˗klu ˗a ˗bha, ˗wo nɔɔn˗ ˗së ˗pö zuʋ̈gblüdhi ˈka.»

꞊Taabha ˗kwɛ ˈö ˈˈdhʋ̈ ˗a ˈgü, kwa ꞊dhegblü ˗nu ˗wo ˈˈslö ˗mɛɛn kö ˈwo ꞊ladio ˈö bhë ˗a ˈˈwɛɛ ˈbha ˈˈdhi ˈˈpʋ. ˗Wa ꞊Ladio ˈkɔ ˗dɔ Shikago Zeta zuni, ˈwo˗ ˗dhɛ WORD. ꞊Waa˗ pö ˈˈdhʋ̈, ˗a ˗gɛn ˈnën ˗tɔ ˗zlanwopösü. ˗A ꞊Ladio ˗yökë ˗a ˈka ꞊kwɛɛ˗ ˗nu ˗wo ˗kun ˗së ꞊dedewo. ˗A ˗wɔn ˈgü, ˗a ˗wo ˗yö ˗dho mü ꞊gblɛɛn ˈö mɛn ˗nu ˗wo ˗Gblüdëdhɛ nɔɔnwo man ˈö dho ˈö yö ˗a ˈka Kanada ˈˈdhuŋ ꞊ʒiaan.

˗Kwɛ 1925 ˈgü, Zoova ˗yö kwa ꞊dhegblü ˗nu ˗takun ˗Dhɛkpaɔ dhiaˈˈ ˈsëëdhɛ 12 ˈgüman ˗kɔ ˗dɛɛ ˈbha ˗bha. ˗A ˗wɔn ˈgü, mɛn ˈbha ˗nu ˗wo ˗kan Zoova ˗dhɔkësü ˗bha. ˈˈKɛɛ ˈwɔn ˈgüman ˗kɔ ˗dɛɛ ˈö ˈˈdhʋ̈, ˗yö mɛn ꞊vadhɛ zuʋ̈ˈˈ ˈˈgblü ˗dhi. ˗Yö ˗gban ˈwɔn ˗nu ˈwo ˗kë ˈdhaŋ˗ ˈgü waa ˗kɔ ˈwo pa ˗a ˈka ˗Zlan ˗dhɔkëmɛn ˗nu ˈka bhë, ˗a ˗bha.