˗Dhɛ ˈˈslʋ̈ʋ̈slʋ̈dhɛ ˈö kun ˗Zlan ˗dhɔkëgükɔ ˈgü bhë, ˗a ˗da ˈkɔɔdhɛ ˗kun mü. La Bible. Traduction du monde nouveau ˈö yö ˈˈkpɛnŋ kö ˗kwɛ 2023 ˈti ˗wo ꞊köŋ bhë ˗a ˈgü, ˗yö pö ˗sü ˈka ꞊dhɛ «˗da ˈkɔɔdhɛ ˈö kun ˈkɔ ˈwëëdhö bhë ˗a ꞊duaan ˗yö ˗kun kude 20, ˈö kun ˈkɔ ˈˈpian ˈˈtɩɩsü ꞊duaan ˈka ˈpö. ˗A ˗gɔ ˗ta ˗kun kude 120 ˈka.» (2 Chron. 3:4) Biblö ꞊dhiëëtasü ˈbha ˗nu ˈgü, ˗yö pö ˗sü ˈka ꞊dhɛ ˗da ˈkɔɔdhɛ ˗gɔ ˗ta ˗kun «kude 120» ˈka ˈö ˗kë ꞊dhɛ ˈkɔ ˈö˗ ˗gɔ ˗ta ˈdhö mɛtrö 53 ˈka ˗a ˈdhö.

ˈˈKɛɛ Traduction du monde nouveau ˈö yö ˈˈkpɛnŋ ˗kwɛ 2023 ˈgü bhë ˗ya ˗pö ꞊dhɛ ˗Zlan ˗dhɔkëgükɔ ˈö Sadhomɔn ˗ya dɔ ˈˈdhʋ̈ ˗a ˗da ˈkɔɔdhɛ «˗gɔ ˗ta ˗kun kude 20» ɛɛnˈˈ mɛtrö 9 ˈka. a Pë ˗nu ˈö ˗an ˗wɔn ˈgü ˈkwa˗ bho ˈˈgblʋʋ, ˗kwa ˗an ˗ga.

˗Da ˈkɔɔdhɛ ˗gɔ ˗ta ˈyaa ˗bɛnzë ˗sü ˈka 1 Rois 6:3 ˈgü. Biblö ˈˈɲan ˈö bhë ˗a ˈgü, Zedhemi ˗yö ˗da ˈkɔɔdhɛ ˈˈpian ꞊gblɛɛn waa ˗a ꞊klöö ꞊duaan ˗zɔn. ˗Yö ˈti˗ ˗gɔ ˗ta ˗wɔn blɛɛˈˈ. ˗A ˈˈɲan ˈˈgblʋ̈gblʋ̈ ˗dhɛ ˈö dɔ ˗a ˈˈpiʋ̈ ˗a ˈgü, ˗yö pë ˈˈwɛɛ ˗nu ˈwo ˗gban ˗Zlan ˗dhɔkëgükɔ ˗bha ˗an ˗wɔn ˗blɛɛ mü. ˗A ˈbha ˗nu ˈnën ˈwo ˗tɔ zën ˈˈtia ˈkpii˗, ˈˈyi ˗bun ˗a ˈgü ˈpë ˈkpii˗ ˗kɔŋ do waa ꞊gbandhü ꞊plɛ ˈwo ˗an ˗yökë ˈpö zën ˈka ˈö ˈwo kun dɔ ˗sü ˈka ˗da ˈkɔɔdhɛ ˈˈkpan ˈˈdhiʋ̈. (1 Rois 7:​15-37) ˗Ya kë ˗be ꞊dhɛ ˗da ˈkɔɔdhɛ ˗gɔ ˗ta ˗yö ˗kun mɛtrö 50 ˈka ˈö ꞊gblɛɛn ˈö ˗ʒiö ˗a ˈka ˗Zlan ˗dhɔkëgükɔ ˈˈpian ˗dhɛ ˗nu ˈwo to ˗an ˗ta, kö ˈmën ˗kë ˈˈsa ˈö Zedhemi ˈti ˗an ˗wɔn blɛɛˈˈ? ˗A ˗de ˗ʒiaan ˈdhɛ ˗kwɛ këŋ ꞊va ˗yö ˗ʒiö, Zuifö ˗nu ˈwo kun ꞊kwɛŋzü ˗wɔn blɛɛˈˈ ˗mɛn ˗nu ˈka ˗wo ˈti ˗Zlan ˗dhɔkëgükɔ ˈö Sadhomɔn ˗ya dɔ bhë ˗a ˗da ˈkɔɔdhɛ ˗gɔ ˗ta ˗bha ˗kë ꞊gblɛɛn ˗sü ˗wɔn blɛɛˈˈ.

˗Zlan ˗dhɔkëgükɔ ˗da ˈkɔɔdhɛ ˗gɔ ˗ta ˗bha ˗kë kude 120 (mɛtrö ˗kɔŋ ˈˈsoodhu) ˈka ˗sü kö ˗a ˈˈbhaŋ ˗nu ˗mɔn ˗dɔ ˗a ˗gɔ ˗sü ˗bha bhë, ˈyaa pëziigɔkɔmɛn ˗nu ˗zokun. Pë ˈˈpɛpɛ ˈwo ˗an dɔ ˗gwö waa blikö ˗nu ˗an ˈka ꞊kwɛŋzü ˈö ˈbha ˗nu ˗kë ˗zlanbɔ ˗nu ˗dhɔkëdhɛ ˈka Ezitö bhë, ˗an ˗gɛngbandhɛ ˗kun ˈˈgbɛɛ ˈö ˗an ˗gɔ ˗ta ˈˈdhuŋ ˗dhɛ kun ˈˈtɩtɩ. ˈˈKɛɛ ˗Zlan ˗dhɔkëgükɔ ˈö Sadhomɔn ˗ya dɔ bhë, ˈyaa kun ˈˈdhʋ̈. Pëziigɔkɔmɛn ˗nu ˗wa ˗pö ꞊dhɛ ˈˈkplʋʋ ˗nu kplüüŋgüdhɛ ˗yö ˗kun kude ˈˈsɔɔdo ɛɛnˈˈ mɛtrö 2 waa santimɛtrö 7 ˈka. ˈWɔn ˗nu ˈwo ˗gban ˈkɔ ˗nu ˈwo kun ꞊kwɛŋzü ˗an ˗bha ˗a dɔ ˗mɛn do ˈwo˗ ˗dhɛ Teodɔ Busiŋkö ˗ya ˗pö: «˗Zlan ˗dhɔkëgükɔ ˈˈbhaŋ kplüüŋgüdhɛ ˈö kun ˗da ˈkɔɔdhɛ ˗bha bhë, ˗a ˗gɔ ˗ta ˈyaa ꞊mɔɔn˗ ˗bha kö ˗yö ˗kë kude 120 ˈka.»

˗Wo ˈti 2 Chroniques 3:4 ˗ya ˗së ˈka. ˈKö ˗kë ꞊dhɛ Biblö ˗be zii ˗nu ˈgü, Biblö ˈˈɲan ˈö bhë ˗ya ˗pö «kude 120,» ˗a ˗be ˈˈwɛɛ ˈbha ˗nu ˈö mɛn ˗nu ˈdhaŋ˗ bho ˗an ˈˈdhiʋ̈ ꞊dhɛ Kodɛsö Alɛzandrinusö ˈwo ˗bɛnzë ˈö ˗ya ˗mɔn ˗kwɛ 1.500 ˗bha waa Kodɛsö Anbrosianusö ˈö˗ ˗bha ˗ya ˗mɔn ˗kwɛ 1.400 ˗bha bhë ˗an ˈgü, ˗wa ˗pö mü «kude 20.» ˈMën ˗kë ˈö ˈsëëdhɛ ˗bɛnzëmɛn ˗yö pë «120» ˗ya? ˗A ˗gɛn ˈnën ˗tɔ ꞊dhɛ ˗wo ga ˗nu ˈwo ˗kë «këŋ do» waa «kude» ˈka bhë, ˗wo ˗bhɔ wo ˈkwëë˗ Eblö ˗wo ˈgü. ˗Ya kë ˈˈdhʋ̈ kö ˈsëëdhɛ ˗bɛnzëmɛn ˗yö «këŋ do» ˗ya «kude» ꞊ʒiaan ˈgü.

ˈˈKɛɛ ˈkö ˗kë ꞊dhɛ kwa˗ ˈˈpiʋ̈ kö ˈwɔn ˈö ˗gban ˗Zlan ˗dhɔkëgükɔ ˈö Sadhomɔn ˗ya dɔ bhë ˗a ˗bha ˈkwa˗ dɔ, ˗a ˗dhɛ ˈö ˈkwa dho kwa ˈˈɲan ˗klu ˗a ˗bha ꞊ʒiaan ˈyö ˗tɔ ˗zlandhɔkëgükɔ ˈkpii˗ ˗dɛɛ ˈö˗ ˈˈbin ˗kë ˗a zii ˈka bhë. Zoova ˗bha ö ˗dhɔkëmɛn ˗nu ˈˈpɛpɛ ˗dhɛ ˗sü kö ˗wo ö gba ˗a ˗dhɔkëgükɔ ˈö bhë ˗a ˈgü, kwa˗ ˈˈnuɛ ˗bho ˗a ˗bha ꞊dedewo!—Ebl. 9:​11-14; ˗Dhɛ. 3:12; 7:​9-17.