Dhɛɛˈˈ ˗nu ˈö mɛn ˗nu ˗wa kpɔ
ˈMën ˗kë ˈö mɛn ˈbha ˗nu ˗wa pö ꞊dhɛ Psaume 12:7 ˗yö ˗wɩ «Zoova ˗wo ˗nu» ˈka (˗a ˈˈɲan ˈsɛɛn˗ 6 ˈgü), ˈˈkɛɛ kö Traduction du monde nouveau ˗zë ˗yö ˗wɩ «˗wëëmɛn ˗nu» ˈka (˗a ˈˈɲan ˈsɛɛn˗ 5 ˈgü)?
ˈWɔn ˈö ˗kë ˗ya ˗zɔn ꞊dhɛ Biblö ˈˈɲan ˈö bhë ˗yö ˗wɩ mɛnbhɩɩdhe ˗nu ˈka.
Psaume 12:1-4 ˗ya ˗pö ꞊dhɛ «˗towotamɛn ˗nu ˈwaa ˈdhö ˈzü mɛnbhɩɩdhe ˗nu ꞊zinŋgü.» ˗Kwa kwa ˈˈtʋ̈ŋ kë ˗së ˈka Psaume 12:5-7 ˈgü. ˗Ya ˗pö:
«ˈDhɛ ˗kë ꞊dhɛ ˗wo saanˈˈ wɔ ˗ni ˈgü ˗wëëmɛn ˗nu ˗ta,
ˈö ˈˈflɛɛmɛn ˗nu ˈdhö ˗wëë ˗wo ˈkpɔ ˗ni ˈgü,
a ˗dho wlüüˈˈ kö ˈa ˗an ˗takun, pë ˈö Zoova ˗ya pö ˈyö bhë.
A ˗dho ˗an dha mɛn ˗nu ˈwo ˗an ˗wëë ˗kë wo ˗ni ˈgü, ˗an ˗gɔ.
Zoova ˗wo ˗nu ˗wo ˈˈslʋ̈ʋ̈slʋ̈.
˗Wo ˗kë ꞊dhɛ ˈwëë˗ ˈwo˗ ˈˈyi bho ˈˈsɛɛdhö ˈˈshiʋ̈ ˈka ˗gɛnɲan ˈka ˈˈsɔɔplɛ ˗a ˈdhö.
ˈAa Zoova ü ˗dho ü ˗kɔ kpa ˗an ˗ta.
Ü ˗dho mɛn ˈö ˗dhö ˗a ˗takpa ꞊dɛɛ ˈgümɛn ˗nu ˗gɔ ˗toëpö ˈka.»
˗A ˈˈɲan ˈsɛɛn˗ 5 ˗yö ˗wɩ pë ˈö ˗Zlan dho ˗a kë «˗wëëmɛn ˗nu» ˗dhɛ ˗a ˈka. ˗Yö ˗dho ˗an dha.
˗A ˈˈɲan ˈsɛɛn˗ 6 ˗ya ˗pö ꞊dhɛ «Zoova ˗wo ˗nu ˗wo ˈˈslʋ̈ʋ̈slʋ̈» ꞊dhɛ «ˈwëë˗ ˈwo˗ ˈˈyi bho ˗a ˈdhö.» ˗Kɔ ꞊dede ˈkwa Zoova ˗wo yö ˗a ˈka, ˈyö bhë.—Ps. 18:30; 119:140.
Psaume 12:7 ˗ya ˗pö: «ˈAa Zoova ü ˗dho ü ˗kɔ kpa ˗an ˗ta, ü ˗dho mɛn ˈö ˗dhö ˗a ˗takpa ꞊dɛɛ ˈgümɛn ˗nu ˗gɔ ˗toëpö ˈka.» De ˗nu ˈö ˗wɩ ˗an ˈka?
˗A pö ˈö˗ ˈˈɲan ˈsɛɛn˗ 6 ˗ya wo ꞊dhɛ «ü ˗dho ü ˗kɔ kpa ˗an ˗ta» bhë, mɛn ˈbha ˗nu ˗wa ˗ga ꞊dhɛ ˗yö ˗wɩ «Zoova ˗wo ˗nu» ˈka. Kwa˗ ˈwɔn ˗dɔ ꞊dhɛ ˈdhɛ ˗gban Biblö ˗gɔ ˗mɛn ˗nu ˗wo pë ˈˈpɛpɛ ˗kë kö ˈwo˗ shiʋ̈ˈˈ ɛɛnˈˈ ˈwo˗ ꞊kɛɛ˗ ˈˈkan, Zoova ˗yö ö ˗kɔ ˗kpa ˗a ˗ta.—Is. 40:8; 1 Piɛ. 1:25.
ˈKö ˗kë ˈˈdhʋ̈, pë ˈö˗ ˈˈɲan ˈsɛɛn˗ 5 ˗ya pö bhë gagade ˗mü ˈpö. «Mɛn ˗nu ˈwo saanˈˈ wɔ ˗ni ˈgü ˗an ˗ta» waa «ˈˈflɛɛmɛn ˗nu» ˈwo bhë, Zoova ˗yö ˗an ˗takun ˈö dho ˗an ˗takun ˈzü.—Job 36:15; Ps. 6:4; 31:1, 2; 54:7; 145:20.
˗Ya kë ˈˈdhʋ̈, kö ˈmën ˈö Zoova ˗yö ˗wɩ ˗a ˈka ˗a ˈˈɲan ˈsɛɛn˗ 7 ˈgü ˈˈsa?
ˈKwa ˗dhɛ ˗ga Biblö ˈˈɲan ˈö bhë ˗a ˈgü, kwa˗ ˗yö mü ˈˈpuu ˈka ꞊dhɛ Zoova ˗yö ˗wɩ mɛnbhɩɩdhe ˗nu ˈka.
Psaume 12:1 züdɔdhɛ ˈgü, Davi ˗yö ˗klu ˗Zlan ˗bha ˗mɛn ˗nu ˈö mɛn ˗nu ˗wo ꞊suakë ˗an ˗gɔ, ˗an ˗wɔn ˗blɛɛ. ˗Ya ˈgo mü, kwa˗ ˗yö ꞊dhɛ Zoova ˗dho luuˈˈ ꞊suamɛn ˗nu ˈwo ˈˈdhʋ̈ ˗an ˗gɔ. Psaume ˈö bhë ˗ya ˗kë ˈö ga kwa ˈgü ꞊dhɛ ˗Zlan ˗dho nu ö ˗bha ˈˈsɛgümɛn ˗nu dhɛ, ˈyö sü ꞊dhɛ ˗a ˗wo ˗nu ˗wo ˈˈslʋ̈ʋ̈slʋ̈.
˗A ˈˈɲan ˈsɛɛn˗ 7 ˗ya ˗pö ꞊dhɛ Zoova ˗dho ö ˗kɔ kpa «˗an» ˗ta. ˗Ya kë ˈˈdhʋ̈ kö ˗yö ˗wɩ mɛn ˗nu ˈö ˈwɔnyaakëmɛn ˗nu ˗wo pë ˈˈdhiʋ̈˗ ˗kë ˗an ˈka bhë, ˗an ˈka.
˗Wo ˈö ˗kë «˗an» ˈka Biblö ˈˈɲan ˈö bhë ˗a ˈgü ˗yö ˗go Eblö ˈsëëdhɛ ˗be ˗nu ˈwo ˈdhaŋ˗ bho ˗an ˈˈdhiʋ̈ ˗an ˈgü. ˗Wo ˈö ˗kë «kwa» ˈka bhë ˗wa ˗ya ˗gɛnɲan ˈka ꞊plɛ Eblö ˗wo ˈgü, ˈwo˗ ꞊dhiëëta Glɛkö ˗wo ˈgü. ˗Yö ˗wɩ ˗klu ˗Zlan ˗bha ˗mɛn ˗nu ˈwo saanˈˈ wɔ ˗ni ˈgü ˗an ˗ta, ˗an ˈka. ˗A ˈˈdhiʋ̈todhɛ ˈgü, ˗klu ˗Zlan ˗bha ˗mɛn «˗dhɛ ˈö ˗dhö» ˗yö ˗dho ö ˗kɔ kpa ˗a ˗ta «꞊dɛɛ ˈgümɛn ˗nu ˗gɔ.» ꞊Dɛɛ ˈgümɛn ˗nu ˈwo ˈˈdhʋ̈ ˈnën ˈwo ˗tɔ mɛn ˗nu ˈwo «wɔn yaa ˗pɛn ˗ni ˈgü.» (Ps. 12:7, 8) Aramö ˗wo ˈgü, ˗a ˈˈɲan ˈsɛɛn˗ 7 ˗ya ˗pö: «ˈAa yi Dëmɛn, ü ˗dho mɛn kpɛnŋdhö ˗nu ˗takpa. Ü ˗dho ˗an ˗takpa ꞊dɛɛ ˈgümɛn zuʋ̈ˈˈ yaa ˗sü ˗nu ˗gɔ ˗toëpö ˈka.» ˈWɔn ˗nu ˈwo bhë ˗wa ˗zɔn ꞊dhɛ Psaume 12:7 ˈti ˈˈwɩ ˗Zlan ˗wo ˗nu ˈka.
˗A ˗wɔn ˈgü, Biblö ˈˈɲan ˈö bhë ˗yö ˗wɩ ˗klu «˗Zlan ˗bha ˗mɛn ˗nu» ˈö ˗Zlan dho ˈwɔn ˗së kë ˗an ˗dhɛ, ˗an ˈka.
