Madhi waa ö ꞊gɔɔn Zan a ˗wo ˗ya ˗sü ˈka ˈˈsɛ do ˈwo ꞊mɔɔn˗ ˗bha kö ˗wo nɔɔn˗ ˗së pö mɛn ˗nu ˈwo go Fidhipinö ˗an ˗dhɛ, ˗a ˈgü. Kolona virisö ˈˈtʋ̈ŋ ˈgü, Madhi ˗yö ˗ya mɛn ˗nu ꞊klaŋ ˗kë Biblö ˈka ˗sü ˗bha ö ˗gɔ ˈˈsɛ ˈgü, ˈö˗ ˗kë ˈpö ˈˈsɛ ˈˈwɛɛ ˗nu ˈgü. ˗Kɔ ˗kë ꞊dhɛ?

Madhi ˗yö ö ˗bha Biblö ꞊klaŋnën ˗nu dhɛɛˈˈ ˗kpɔ, ˈö˗ pö: «Ka mɛn ˈbha ˗dɔ ˈö˗ ˈˈpiʋ̈ kö ˈö Biblö draanˈˈ ˗ee?» ꞊Waa˗ pö ꞊ii, Madhi ˗ya ˗pö ˗an ˗dhɛ ꞊dhɛ ˗wo ö ˗zɔn ˗a ˗mɛn ˗dhɛ. Dhɛɛˈˈ ˗bhaasü ꞊suu ˈö bhë ˗ya kë ꞊shiöŋ, ˈwɔn ˗së ˗nu ˗wo ˗go ˗a ˈgü. ˈMën ˗kë? ˈYö sü ꞊dhɛ mɛn ˗nu ˈö Biblö ˗dhɔ ˗yö ˗an ˗kë bhë, ˗wa ˈˈpiʋ̈ kö wo ˗bha ˈkɔdhigümɛn ˗nu waa wo ˈˈtɔŋdë ˗nu ˗wa ˗dɔ ˈpö. ˈDhɛ ˈˈdhʋ̈ ˈsa kö wɔn ˗së ˗mɛɛn ˈö go Madhi ˗bha dhɛɛˈˈ ˈö bhë ˗a ˈgü?

Madhi ˗bha Biblö ꞊klaŋnëndhe do ˈwo˗ ˗dhɛ Ʒasöminö bhë ˗yö mɛn ˗yiishiö ˈˈwɛɛ ˈbha ˈwo kun ˗a ˈˈpiʋ̈ kö ˈwo Biblö draanˈˈ ˗an ˗zɔn Madhi ˗dhɛ. ˗A mɛn do ˈwo˗ ˗dhɛ Klisinö, Biblö draansü ˗dhɔ ˗ya ˗kë ꞊dedewo. ˗A ˗wɔn ˈgü, ˗ya ˗pö Madhi ˗dhɛ ꞊dhɛ ˈwo Biblö draanˈˈ ˗gɛnɲan ˈka ꞊plɛ ˈˈdhoogɔ do ˈgü. ˈDhɛ Madhi ˗ya dhɛɛˈˈ kpɔ ꞊dhɛ mɛn ˈbha ˈö˗ ˈˈpiʋ̈ kö ˈö Biblö draanˈˈ ˗ya ˗dɔ ˗ee? Klisinö ˗ya ˗yɔ ˗bɔ ˈö˗ pö: «꞊Ii, a ˗dho n ˈˈtɔŋdhe ˗nu ˗zɔn ü ˗dhɛ.» ˈˈDhoogɔ ˗nu ˗wo dɔ ˗a ˈˈpiʋ̈ ˗an ˈgü, Klisinö ˗yö ö ˈˈtɔŋdhe ˗nu ˗yiishiö ˗zɔn Madhi ˗dhɛ. ꞊Taabha, Klisinö ˗ya mɛn ˈbha ˗zɔn ˈzü Madhi ˗dhɛ ˈö wo ˗de ˈpö ˈwo˗ mɛn ˈbha ˗nu ˗zɔn ˈzü.

Klistinö ˗kun ˗a ˈˈpiʋ̈ kö ö ˗bha ˈkɔdhigümɛn ˈbha ˗nu ˈwo kun Fidhipinö bhë ˗wo Biblö draanˈˈ ˈpö. ˗A ˗wɔn ˈgü, ˗yö ö ˈdhu Andrea ˗kpɔɔ. ˗A züdɔdhɛ ˈgü, Andrea ˗ya ˗pö ö ˗de ˗dhɛ: «Zoova ˗bha ꞊Gbɛkiö ˗nu ˗bha ˗zlanwo ˗yö ˈya˗ ˈyö sü ꞊dhɛ ˈwaa ˈdhaŋ˗ bho Yesu ˗wɔn ˈˈdhiʋ̈, ˈö go mü Ancien testament ˈnën ˈwo wo ˗bha ꞊klanwo ˗gban ˗a ˗ta.» ˈˈKɛɛ ˈdhɛ Madhi ˗ya ˗takun ˗gɛnɲan ˈka dosɛnŋ ˈˈkpaan, ˗a ˗bha ˈwɔn yö ˗kɔ ˗yö ˗go ˈˈgblʋʋ. ˗Ya pë ˗dɛɛ ˈbha ˗nu yö Biblö ˈgü, ˗ya ˗pö: «Biblö ꞊yaa˗ pö ˈˈdhʋ̈, kö gagade ˗mü!»

ˈDhɛ ˈˈtʋ̈ŋ ˈbha ˗yö ˗ʒiö, Andrea ˗yö ö ˈˈtɔŋdhe ꞊plɛ waa ö yökëyoo do ˗zɔn Madhi ˗dhɛ ˈzü, ˈwo ˗ya Biblö draansü ˗bha ˈpö. Madhi ˈyaa kun ˗a ˈwɔn dɔ ˗ni ˈgü ꞊dhɛ Andrea dë ˈzlaa˗ ˈnëndhe do ˈö ˈˈɲɛɛntiimɛn ˈka ˈwo˗ ˗dhɛ Anʒela bhë ˗yö ˗kun ö ˈˈtʋ ˈto ˗ni ˈgü wo ˗bha Biblö ꞊klaŋ ˗bha. ˗Dhɛkpaɔyi do ˈka, Anʒela ˗ya ˗pö Andrea ˗dhɛ ꞊dhɛ ˗yö ö ˗zɔn Madhi ˗dhɛ kö ˈö Biblö draanˈˈ ˗a ˈˈpiʋ̈ ˈpö. Pë ˗nu ˈö Anʒela kun ˗an draanˈˈ ˗ni ˈgü bhë ˗an ˗dhɔ ˗kun ˗a kë ˗ni ˈgü. ˈDhɛ ˈˈsu do ˗yö ˗ʒiö kö ˗ya Biblö ˈˈɲan ꞊vadhɛ ˈkun ö ˗zo ˈˈpiʋ̈. ˗Yö ˗kun ˗a ˈˈpiʋ̈ ˗ʒianwo kö ˈö Biblö draanˈˈ ˗gɛnɲan ˈka ˗yiishiö ˈˈdhoogɔ do ˈgü. Andrea ˗bha ˗takundhe ˈsaa˗ ˈgü, Anʒela ˗yö ˗ya ˗bhɔkwëë kë ˗sü ˗bha zumö ˈˈdhiʋ̈.

 ˈDhɛ Madhi ˗ya ˈwɔn dɔ ꞊dhɛ ˈˈtʋ̈ŋ ˈö Biblö ˗zɔn ˗ni ˈgü ˗a ˈka Klisinö ˗dhɛ bhë kö ˗a ꞊gɔɔn Ʒozue ˗ya ˈˈsuee, ˗ya dhɛɛˈˈ ˗kpɔ ꞊dhɛ ˗yö ꞊mɔɔn˗ ˗bha ˈö Biblö draanˈˈ ˈpö ˗ee? Ʒozue ˗ya ˗yɔ ˗bɔ ˈö˗ pö:«A ˗dho n ˈˈtʋ ˈto ka ˗bha dosɛnŋ. ˈˈKɛɛ kö n dhɛɛˈˈ ˈkpɔ, a ˗dho ʒiö.» ˈDhɛ ˈwo ˗ya Biblö draansü ˗bha ˈö minitö ˈˈsoodhu ˗yö ˗ʒiö kö ˗ya dhɛɛˈˈ ˈkpɔ ꞊va ˗ya ziö ˗a ˈka Klisinö ˗ta, ˈö kun ˗a ˈˈpiʋ̈ ˈzü kö ˈö˗ draanˈˈ.

Madhi ˗bha dhɛɛˈˈ ˗bhaasü ˈö˗ kpɔ bhë, ˗ya ˗kë ˈö Biblö ꞊klaŋnën ꞊va ꞊dede ꞊slɔɔ. ˗Ya mɛn ꞊vadhɛ ˗nu kwa ꞊dhegblü ˗nu ˗dhɛ kö ˗wo ˗an ˗takun Biblö draansü ˗bha. Mɛn ˗nu ˈö Madhi ˗yö Biblö draansü zübho ˗an ˈˈpiʋ̈ ˈˈdhʋ̈ ˗wo ˗dho ˈwo ˗kë 28, ˈˈsɛgɔ ˗yiishiö ˈgü.

Ʒasöminö ˈö kun Biblö ꞊klaŋnën ˗blɛɛsü ˈka ˈwɔn ˗gɔ ˈö yö ˗a ˈgü bhë, ˗yö ˗bɔ ˈˈyi ꞊bhaa ˗kwɛ 2021 Avlidhö ˈˈsu ˈgü. Klisinö ˗de ˈpö ˗a ˗bha ˗yö ˗kë ˗kwɛ 2022 ˈMɛn ˈˈsu ˈgü, ˈö ö ꞊yɛɛ˗ ˗kë ꞊taabha ö ˗bha ˈkɔdhigümɛn ˗nu ˈˈpiʋ̈ Fidhipinö. ˗A mɛn ˗nu ˈö Klisinö ˗yö ˗an ˗zɔn Madhi ˗dhɛ ˈpö bhë, ˗wo ˗bɔ ˈˈyi ꞊bhaa. Anʒela ˗yö ˗bɔ ˈˈyi ꞊bhaa kö ˈˈsu ˈbha ˗ya ʒiö, ˈö ˈˈtʋ̈ŋ ˗gban ˈgü ˗yödhiʋ̈ ˈka ꞊dɛɛ. Klisinö ꞊gɔɔn Ʒozue, ˗an ˈdhu Andrea waa Biblö ꞊klaŋnën ˈˈwɛɛ ˈbha ˗nu ˗de ˈpö ˗an ˗gɛn ˗yö ˈdho ˗ni ˈgü ˈˈdhiʋ̈.

˗Kwɛ këŋ do ˗blɛɛsü ˈgü, mɛn ꞊vadhɛ ˗wo nɔɔn˗ ˗së ˈö ꞊gban Yesu ˗bha bhë ˗a ˗pö wo ˗bha ˈkɔdhigümɛn ˗nu waa wo ˈˈtɔŋdë ˗nu ˗dhɛ. (Zan 1:​41, 42; Këw. 10:​24, 27, 48; 16:​25-33) Kwa ꞊mɔɔn˗ ˗bha ˈpö ˈkwa kwa ˗bha Biblö ꞊klaŋnën ˗nu dhɛɛˈˈ kpɔ ˈkwa˗ pö: «Ü mɛn ˈbha ˗dɔ ˈö˗ ˈˈpiʋ̈ kö ˈö Biblö draanˈˈ ˗ee?» Dhɛɛˈˈ ˗bhaasü ˈö bhë, ˗a ˈbha ˗ya kë kwa ꞊mɔɔn˗ ˗bha ˈkwa bɔ ˗a ˗ta ˈkwa mɛn ꞊va ꞊dede ˈwo˗ ˈˈpiʋ̈ kö ˈwo Biblö draanˈˈ ˗an ꞊slɔɔ.